Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Talateu ki he Ngaahi Saame, Konga 2: Hū ki he ʻEikí pea Fakahīkihikiʻi Hono Huafa Māʻoniʻoní

“Talateu ki he Ngaahi Saame, Konga 2: Hū ki he ʻEikí pea Fakahīkihikiʻi Hono Huafa Māʻoniʻoní,” Fuakava Motuʻá – Tohi Lēsoni ʻa e Faiako Seminelí (2026)

“Talateu ki he Ngaahi Saame, Konga 2: Hū ki he ʻEikí pea Fakahīkihikiʻi Hono Huafa Māʻoniʻoní,” Fuakava Motuʻá – Tohi Lēsoni ʻa e Faiako Seminelí

Saame 1–2; 8; 19–33; 40; 46: Lēsoni 101

Talateu ki he Ngaahi Saame, Konga 2

Hū ki he ʻEikí pea Fakahīkihikiʻi Hono Huafa Māʻoniʻoní

Photos taken of David A. Bednar during his visit to Africa South East area in October & November 2013.Youth Devotional held in Durban, South Africa. Some youth singing in the congregation. Similar outtakes, also some exterior shots of the chapel.

Ko e founga ʻe taha ke hū ai ki he Tamai Hēvaní mo Sīsū Kalaisí ko hono fakahaaʻi hoʻo ʻofa mo e līʻoa kiate Kinauá. Ko e konga lahi ʻo e ngaahi Sāmé ko ha ngaahi sīpinga fakapunake ia ʻo e moihū ki he Tamaí mo e ʻAló ʻi he fakafetaʻi, tautapa, mo e ngaahi lotu. ʻE lava ke tokoni e lēsoni ko ʻení ke fakahaaʻi ʻe he kau akó ʻenau ngaahi ongo ke moihū ki he Tamai Hēvaní mo Sīsū Kalaisí.

Teuteu ʻa e tokotaha akó: ʻAi ke ʻilo ʻe he kau akó te nau maʻu ha faingamālie ke fakakaukauloto ai ki heʻenau ngaahi fakakaukau mo e ongo fekauʻaki mo e Tamai Hēvaní, Sīsū Kalaisi, mo e ngaahi meʻa toputapú ʻi heʻenau teuteu ke vahevahe e ngaahi ongo ko iá ʻi he lēsoni ko ʻení. Poupouʻi e kau akó ke fanongo ki he mūsika fakalaumālié pea toe vakaiʻi ʻa e ngaahi potufolofola, kupuʻi lea, pe ngaahi ʻīmisi toputapu ʻoku nau manako taha aí, ʻo kumi ha ngaahi meʻa pau te nau ala fie vahevahe. ʻE lava ʻe hono fai ʻení ʻo teuteuʻi honau lotó mo e ʻatamaí ki he ʻekitivitī ʻi he lēsoni ko ʻení.

Ngaahi ʻEkitivitī Ako ʻOku Ala Fakahokó

Ko e Moihū ki he ʻOtuá

Fakatokangaʻi ange: ʻE hoko ʻa e ʻekitivitī ʻi he fakaʻosinga ʻo e lēsoni ko ʻení ko ha konga ʻo e fakakaukauloto ʻi he Lēsoni 112: “Siviʻi Hono 7 Hoʻo Akó.” Fakapapauʻi ke tuku ha taimi lahi ki he kau akó ke nau kamata ngāue ai ki he ʻekitivitií lolotonga e kalasí.

Ke kamata e kalasí, ʻoange ha miniti ʻe taha ki he kau akó ke nau fakalaulauloto ai ki he fehuʻi ko ʻení:

Ko e hā nai hono ʻuhinga kiate koe ʻa e “moihū ki he ʻOtuá”?

Naʻe vahevahe ʻe ʻEletā Tiini M. Teivisi, lolotonga ʻene ngāue ʻi he Kau Pīsopeliki Pulé, ha ngaahi founga te tau lava ai ʻo moihū ki he ʻOtuá ʻi he taimi naʻá ne akonaki ai ʻo pehē:

ʻI he taimi ʻoku tau mōihū ai ki he ʻOtuá, ʻoku tau haʻu kiate Ia ʻi he ʻofa molumalu, loto-fakatōkilalo pea mo e tanganeʻia. ʻOku tau fakahaaʻi mo tali Ia ko hotau tuʻi fakaleveleva, ko e Tupuʻanga ʻo e ʻunivēsí, pea ko ʻetau Tamai ʻofeina mo taʻengatá.

ʻOku tau fakaʻapaʻapa mo ʻaʻapa kiate Ia.

ʻOku tau fakavaivai kiate Ia.

ʻOku tau hiki hake hotau lotó ʻi he lotu lahi, ʻo makakoloaʻaki ʻEne folofolá, fiefia ʻi Heʻene ʻaloʻofá pea tukupā ke muimui kiate ia ʻi he mateaki kakato. (“Ko e Ngaahi Tāpuaki ʻo e Moihuú,” Liahona, Nōvema 2016, 94)

Te ke fakamatalaʻi fēfē ʻa e faikehekehe ʻo e ʻalu pē ki he lotú, temipalé, pe seminelí mo hoʻo moihū ki he ʻOtuá ʻi hoʻo ʻalu ki aí?

Vahevahe nounou mo e kau akó ha founga ʻe taha pe ua ʻokú ke saiʻia taha ai ʻi hono fakahaaʻi ʻe he kakaí ʻenau ngaahi ongo ʻo e moihū ki he Tamai Hēvaní mo Sīsū Kalaisí. ʻOku kau ʻi he ngaahi sīpingá ha foʻi maau, vitiō, ngāue fakaʻaati, konga tohi, pe hiva toputapu. Te ke lava ʻo fakakau ai ha ngaahi meʻa naʻá ke tohi pe faʻu pē ʻe koe. Fakamatalaʻi ange ki he kau akó ʻoku lahi ha ngaahi founga ʻe lava ke fakahaaʻi ai ʻe ha taha ʻene ngaahi ongo ke moihū ki he Tamai Hēvaní mo Sīsū Kalaisí.

Poupouʻi e kau akó ke fakakaukau ki he founga te nau ala fakahaaʻi ai ʻenau ngaahi ongo ke moihū ki he Tamai Hēvaní mo Sīsū Kalaisí. ʻI he lolotonga ʻo e lēsoní, tokanga mo ongoʻingofua ʻa e kau ako ʻoku ʻikai ke nau ongoʻi ha fehokotaki mo e Tamai Hēvaní mo Sīsū Kalaisi ʻi he taimi ní.

ʻI hoʻo tohinoa akó, fili ha fehuʻi ‘e taha pe lahi ange ‘i he ngaahi fehuʻi ko ‘ení ke tali. Te ke lava ʻo fakaʻaongaʻi ha konga ʻo e pōpoaki ʻa ʻEletā Teivisí pe ko e ngaahi lea pē ʻaʻau ke fakamatalaʻi fakanounou ʻaki hoʻo ngaahi ongó.

Ko e hā hoʻo ongo fekauʻaki mo e Tamai Hēvaní, Sīsū Kalaisi, mo e ngaahi meʻa toputapú?
Ko e hā e founga lelei taha ke fakahaaʻi ai hoʻo ʻofá, fakaʻapaʻapá, pe ʻapasia ki he Tamai Hēvaní, Sīsū Kalaisi, pe ngaahi tāpuaki fakalaumālié?

ʻI he fakaʻosinga ʻo e lēsoni he ʻaho ní, te ke kamata ke fakahaaʻi hoʻo ngaahi ongó. Manatuʻi ʻeni ʻi hoʻo akó. Fakakaukau ki he founga te ke fie fakahaaʻi ai ʻa e meʻa ʻokú ke ako mo ongoʻí. Fakaafeʻi ʻa e Laumālie Māʻoniʻoní ke tokoniʻi koe ʻi hoʻo ngaahi feingá.

Ko e moihū ki he ʻEikí ʻi he ngaahi sāmé

ʻOku lahi ha ngaahi saame ko hono fakahaaʻi fakapunake mo faʻa lotu ia ʻa e ngaahi fakakaukau toputapu, ngaahi ongo, ʻamanaki lelei, mo e ngaahi holi ʻa e kau faʻu tohí. Neongo ʻoku lekooti ʻe ha ngaahi potufolofola lahi ʻa e folofola ʻa e ʻEikí kiate kitautolú, ka ʻoku toutou fakahaaʻi ʻe he ngaahi sāmé ʻa e ngaahi lea ʻa e kau faʻu tohí kiate Iá. Lau ʻa e Saame 18:1–6, ʻo kumi e ngaahi foʻi lea mo e kupuʻi lea naʻe fakaʻaongaʻi ʻe Tēvita ke fakahaaʻi ʻaki ʻene ngaahi ongo fekauʻaki mo e ʻEikí.

Fakaafeʻi e kau akó ke hiki e ngaahi foʻi lea mo e ngaahi kupuʻi lea ne nau ʻiló ʻi he palakipoé. ʻE lava ke ʻiloʻi ʻe he kau akó ha ngaahi kupuʻi lea kehekehe, hangē ko e:

Ko e ʻEikí hoku mālohingá (veesi 1).
Ko e ʻEikí hoku makatuʻú, mo hoku koló, mo hoku fakamoʻuí, ko hoku ʻOtuá, mālohí, fakaū, mālohi ʻo ʻeku moʻuí, pe hūfanga māʻolungá (veesi 2).
ʻOku ngali mo e ʻEikí ʻa e fakafetaʻí (veesi 3).
ʻOku ongona ʻe he ʻEikí ʻetau tangi kiate Iá (veesi 6).

ʻE lava ke vahevahe ʻe he kau ako naʻa nau hiki ha ngaahi kupuʻi leá ʻa e ʻuhinga naʻe fiemaʻu ai ʻe Tēvita ke ʻilo ʻeni ʻe heʻene kau laukongá fekauʻaki mo e ʻEikí. Fakakaukau ke fehuʻi ki he kau akó pe kuo fakahoko fēfē ʻe he ʻEikí ʻa e ngaahi fatongia ko ʻení ʻi heʻenau moʻuí.

Fakaafeʻi e kau akó ke fili ha taha ʻo e ngaahi potufolofola ko ʻení ke ako mo ha hoa. Poupouʻi kinautolu ke nau toutou kiʻi taʻofi ʻo fevahevaheʻaki ʻenau ngaahi fakakaukaú mo e ongó.

ʻOku fakahaaʻi ʻe he ngaahi sāmé ha ngaahi founga lahi te tau lava ai ʻo vahevahe ʻetau ngaahi ongo ki he ʻEikí. Ako māmālie ha taha ʻo e ngaahi potufolofola ko ʻení, ʻo fakaʻilongaʻi ha ngaahi foʻi lea mo ha ngaahi kupuʻi lea ʻoku nau fakahaaʻi hoʻo ngaahi ongo fekauʻaki mo e ʻEikí.

Fakahaaʻi hoʻo ngaahi ongo ke moihuú

ʻOange ki he kau akó e toenga ʻo e taimi kalasí ke nau kamata faʻu ha meʻa ʻokú ne fakahaaʻi ʻenau ongo fekauʻaki mo e Tamai Hēvaní mo Sīsū Kalaisí. Fakafuofuaʻi e ngaahi fiemaʻu hoʻo kau akó, pea fakaʻaliʻali ha niʻihi pe kotoa ʻo e ngaahi meʻa ko ʻení.

Te ke lava ʻo ʻoange ha ʻū naunau fakaʻaati hangē ko ha pepa, penivahevahe lanu kehekehe, peni fakaʻilonga, mo ha ngaahi meʻa pehē maʻá e kau ako ʻoku nau fie tā ha fakatātā ʻo ʻenau ngaahi ongó.

Koeʻuhí ko ha ngāue fakafoʻituitui ʻeni, te ke lava ʻo lue takai ʻi he lokí ʻo fai ha tokoni, fakahinohino, mo ha fakalotolahi ʻo ka fiemaʻu. Kapau ʻe feʻunga, fakakaukau ke tā ha fasi leʻosiʻi mo toputapu lolotonga ʻa e ʻekitivitií.

ʻE ala tokoni ke fakahaaʻi hoʻo ʻofá mo e loto-falalá ki ha kau ako pē ʻoku nau fefaʻuhi mo ʻenau ngaahi fakakaukau pe ongo fekauʻaki mo e ʻEikí. ʻE lava ke hoko ʻa e ʻekitivitī 6 ko ha fili lelei ki he kau ako ʻoku kei taʻepauʻia ʻi heʻenau tuí.

Tuku ha taimi ke fakahaaʻi ai hoʻo ngaahi fakakaukau mo e ongo fekauʻaki mo e Tamai Hēvaní, Sīsū Kalaisi, mo e ngaahi meʻa toputapú. Fili ha taha ʻo e ngaahi meá ni pe faʻu ha meʻa pē ʻaʻau. Mahalo he ʻikai te ke maʻu ha taimi ke fakaʻosi ai hoʻo ngāué ʻi he kalasí he ʻahó ni, ka te ke lava ʻo kamata faʻu ha foʻi hiva pe foʻi maau pe fakaʻuhingaʻi ha tā fakatātā pe vitiō. ʻE lava ke hokohoko atu hoʻo ngāue ki hoʻo meʻa ke fakahāʻí ʻi tuʻa ʻi he kalasí. Te ke lava ʻo fili ke fakakau ha potufolofola mei he ngaahi Sāmé kuó ke pehē ʻoku ʻuhingamālie.

Faʻu ha foʻi maau pe foʻi hiva ʻokú ne fakahaaʻi hoʻo ngaahi ongo fekauʻaki mo e Tamai Hēvaní mo Sīsū Kalaisí.
Faʻu ha foʻi vitiō pe ko ha lekooti ʻo e ongó ʻa ia ʻokú ke vahevahe ai hoʻo ngaahi ongo fekauʻaki mo e Tamai Hēvaní mo Sīsū Kalaisí. Ki ha foʻi vitiō, te ke lava ʻo fakakau ai ha ngaahi ʻīmisi toputapu ʻokú ke saiʻia taha ai mei he Gospel Library.
Naʻe faʻa fakafehoanaki ʻe he kau faʻu Sāmé ʻa e Fakamoʻuí ki ha meʻa kehe ke fakahaaʻi ʻa ʻEne mahuʻinga kiate kinautolú. ʻOku kau ʻi he ngaahi sīpingá ʻa e “Ko hoku makatuʻú ʻa [e ʻEikí], mo ʻeku koló” (Saame 18:2) mo e “Ko e ʻeku māmá … ʻa [e ʻEikí]” (Saame 27:1). Hiki ha lisi ʻo ha ngaahi meʻa ʻi hoʻo moʻuí ʻe lava ke nau fakafofongaʻi ʻa e ongo ʻokú ke maʻu ki he ʻEikí.
Faʻu ha fakatātā, tā valivali, meme, fakaʻaliʻali, pe ko ha ngāue fakaʻaati kehe ʻokú ne fakahaaʻi hoʻo ngaahi ongo fekauʻaki mo e Tamai Hēvaní mo Sīsū Kalaisi.
Fekumi ki ha ngaahi ʻīmisi toputapu kehekehe pea fakatahatahaʻi e ʻū fakatātaá (collage). Fili ha ngaahi ʻīmisi ʻokú ne fakafofongaʻi ʻa e ngaahi meʻa fekauʻaki mo e Tamai Hēvaní, Sīsū Kalaisi, pea mo e ongoongoleleí ʻa ia ʻoku mahuʻinga kiate koé. Hiki ha kiʻi fakamatala ki he ʻīmisi takitaha ʻo fakamatalaʻi fakanounou ai hoʻo ngaahi fakakaukaú mo e ngaahi ongó.
Hiki hoʻo ngaahi fakakaukau fekauʻaki mo e Tamai Hēvaní mo Sīsū Kalaisí. Mahalo te ke fie vahevahe ha aʻusia kuó ne tākiekina e ongo ʻokú ke maʻu kiate Kinauá.

Te ke lava ʻo tuku ke vahevahe ʻe he kau akó ʻa e meʻa naʻa nau faʻu he ʻaho ní. Te ke lava ʻo tuku ha taimi moʻó e kau akó ke vahevahe ʻenau ngāué lolotonga e ngaahi lēsoni ʻi he kahaʻú hili ʻenau fakakakato e ngaahi meʻa kuo nau faʻú. Fakakaukau ke fakaafeʻi e kau akó ke tānaki atu ki he meʻa ʻoku nau faʻú ʻi he hokohoko atu ʻenau ako fekauʻaki mo Sīsū Kalaisi lolotonga e ngaahi lēsoni ka hokó. Talaange ki he kau akó te nau fakakaukauloto ki he aʻusia mohu founga ko ʻení ʻi he Lēsoni 112: “Siviʻi Hono 7 Hoʻo Akó.”

Ngaahi Maʻuʻanga Tokoni Kehé

ʻOku ʻuhinga ki he hā ke moihū ki he ʻOtuá?

Ko e moihū ki he ʻOtuá ko hono foaki kiate Ia ʻetau ʻofá, ʻapasiá, ngāue tokoní, mo e mateakí. Naʻe fekau ʻe he ʻEikí kia Mōsese, “Hū ki he ʻOtuá, he ko ia pē te ke tauhi kiate ia” (Mōsese 1:15). Kuó Ne ʻosi fekauʻi foki, “Ke ke ʻofa ki he ʻEiki ko ho ʻOtuá ʻaki ho lotó kotoa mo ho mālohí, ʻatamaí, mo e iví kotoa; pea ke ke tauhi kiate ia ʻi he huafa ʻo Sīsū Kalaisí” (Tokāteline mo e Ngaahi Fuakava 59:5). ʻOku ʻikai ngata pē ʻi hono fakahaaʻi ʻe he moihuú ʻa ʻetau ʻofa ki he ʻOtuá mo ʻetau tukupā kiate Iá, ka ʻokú ne ʻomi ʻa e mālohi ke tauhi ʻEne ngaahi fekaú. ʻOku tau tupulaki ʻi he ʻiló mo e faivelengá ʻo fakafou ʻi he moihuú. (Ngaahi Tefito ʻo e Ongoongoleleí, “Moihuú,” Gospel Library)

ʻE tokoniʻi fēfē kitautolu ʻe he mūsika toputapú ke tau moihū ki he ʻEikí?

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou manako ke hivaʻi e himi, “ʻE Kāinga Kuo Langa ha Tuʻunga.” ʻOku ʻikai ha taha ʻi he palanité ʻe kovi ange ʻene hivá ʻiate au. Ka ʻoku tokoni hono fakatahaʻi ʻo e hivá mo e fakalea ʻo e himí ke u ako fekauʻaki mo e ʻaloʻofá pea mo e mālohi fakaivia ʻo e Fakalelei ʻa e Fakamoʻuí ʻi ha founga mālohi fau. Ko e ngaahi himi ʻoku ou saiʻia taha aí ʻoku nofotaha ia ʻi hono fakafoki mai ʻo e ongoongoleleí mo akoʻi ha ngaahi lēsoni fakatokāteline mālohi. Pea ʻi he ngaahi pōpoaki ko iá, ʻi he hivá mo e fakaleá fakatouʻosi, te ke lava ai ʻo “Fanongo kiate Ia.” Kiate aú, ʻoku faʻa hoko ʻa e hivá ko ha founga ke u fetuʻutaki ai mo e ʻEikí. (“‘Hear Him’ in Your Heart and in Your Mind,” Inspiration [blog], Apr. 21, 2020, ChurchofJesusChrist.org)

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻOku ʻi ai ha ivi makehe ʻo e hiva ʻoku toputapú ke fakafetuʻutaki ʻa e ʻofa ki he ʻEikí ʻoku tau ongoʻí. Ko ha tokoni fakaʻofoʻofa ki heʻetau lotú ʻa e faʻahinga fetuʻutaki ko ʻení. ʻOku ʻi ai ha tokolahi ʻoku faingataʻa ke nau fakahaaʻi ʻenau ngaahi ongó ʻi ha ngaahi lea ʻi heʻenau lotú, ka ʻe lava ke kau fakataha ʻa e tokotaha kotoa ʻi hono fakafetuʻutaki ʻa e ngaahi ongo peheé ʻo fakafou ʻi he ngaahi lea fakalaumālie ʻo ʻetau ngaahi himí. (“Worship through Music,” Ensign, Nov. 1994, 10)

Lolotonga e hoko ʻa ʻEletā Melili J. Peitimeni ko ha mēmipa ʻo e Kau Fitungofulú, naʻá ne vahevahe ʻo pehē:

Ko e ngaahi himi ʻa e Siasí ko ha founga ia ʻo e moihuú; ʻoku nau hoko ko ha lotu ʻo e fakafetaʻí pea mo hano fakahaaʻi ʻo e tukupaá. ʻOku langaki ʻe he ngaahi himi lahi ʻa e uouangatahá ʻi he Kāingalotú pea pehē ki hono langa hake ha tukui kolo ʻo e Kāingalotú. ʻOku nau fakaafeʻi ʻa e Laumālié ki he ngaahi fakatahá pea ki heʻetau moʻuí. ʻOku nau akoʻi ʻa e tokāteliné. ʻOku faʻa fakahaaʻi ʻe he ngaahi himí ha fakamoʻoni pea ʻe lava ke hoko ia ko ha maluʻi pe ko ha maʻuʻanga ʻo e fakafiemālié mo e fakamoʻuí. (“The Power of Hymns,” Ensign, July 2001, 15–16)

Ngaahi ʻEkitivitī Fakalahi ki he Akó

Saame 8

ʻE lava ke toe vakaiʻi ʻe he kalasí ʻa e Saame 8 ko ha sīpinga ʻo e moihū ki he ʻEikí ʻo fakafou ʻi he fiefia ʻi he fakaʻofoʻofa ʻo ʻEne ngaahi fakatupú. Fakaafeʻi e kau akó ke lau ʻa e Saame 8:1–9. Hili iá pea lau pe hivaʻi ʻa e himi “ʻE ʻOtua ko e Tapuhā.”

Fakaafeʻi e kau akó ke fakakakato e foʻi moʻoni ko ʻení mei he sāmé mo e himí: Ko e ʻEikí ko e …

ʻE lava ke vahevahe ʻe he kau akó ʻa e meʻa naʻa nau ako mo ongoʻi lolotonga ʻenau ako e ngaahi leá ni. Te nau lava ʻo vahevahe ha ngaahi aʻusia kuo nau ongoʻi ofi ai ki he ʻEikí ʻi natula.

Ko hono fakahaaʻi ʻo e lotó

ʻI hoʻomou aleaʻi e ngaahi founga ʻoku fakahaaʻi ai ʻe he kakaí ʻenau moihuú, te mou lava ʻo fakaʻaliʻali ha ngaahi konga kuo filifili mei he foʻi vitiō “The Remarkable Power of Music.” Naʻe vahevahe ʻe Kuleki Sesipolo, ʻa ia naʻe hoko ko e talēkita ʻo e Kuaea Tāpanekalé ʻi he Temipale Sikueá, ʻa e ngaahi talanoa puipuituʻa ʻo e ngaahi himi ko ʻení. ʻOku fakakau foki ai mo e fakaʻuhingá.

“It Is Well with My Soul” (mei he taimi 2:20 ki he 08:25)

41:17
“Amazing Grace” (mei he taimi 08:52 ki he 14:33)

41:17
“O Come, O Come, Emmanuel” (mei he taimi 14:34 ki he 20:38)

41:17
“Savior, Redeemer of My Soul” (mei he taimi 35:31 ki he 41:00)

41:17

Ngaahi Saame ʻi he ngaahi tohi folofola kehé

Mahalo ʻe ʻaonga ki he kau akó hono ako ʻo e ngaahi saame naʻe hiki ʻe ha kau fafine mo ha kau tangata faivelenga ʻi he ngaahi tohi folofola kehé. Te ke lava ʻo vahevahe ʻa e ngaahi potufolofola ko ʻení. Fakaafeʻi e kau akó ke fili ha potufolofola ʻe taha ke ako.

ʻE lava ke kumi ʻe he kau akó ʻa e ngaahi holi, ngaahi ongo, mo e ngaahi fakakaukau naʻe vahevahe ʻe he tokotaha faʻu tohí. Hili e laukongá, ʻe lava ke vahevahe ʻe he kau akó ʻa e meʻa ne nau maʻú mo ha hoa naʻá ne ako ha saame kehe.