Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

2 Ngaahi Tuʻi 6: “Ko Kinautolu ʻOku Kau Mai Kiate Kitauá”

“2 Ngaahi Tuʻi 6: ‘Ko Kinautolu ʻOku Kau Mai Kiate Kitauá,’” Fuakava Motuʻá – Tohi Lēsoni ʻa e Faiako Seminelí (2026)

“2 Ngaahi Tuʻi 6: ‘Ko Kinautolu ʻOku Kau Mai Kiate Kitauá,’” Fuakava Motuʻá – Tohi Lēsoni ʻa e Faiako Seminelí

2 Ngaahi Tuʻi 2–7: Lēsoni 85

2 Ngaahi Tuʻi 6

“Ko Kinautolu ʻOku Kau Mai Kiate Kitauá”

ʻI hono ʻākoloʻi ʻe he kau tau Sīliá ʻa ʻIlaisá, naʻe kalanga e tamaioʻeiki ʻa e palōfitá ʻi he manavahē, “Ko e hā te ta faí?” (2 Ngaahi Tuʻi 6:15). Naʻe fakafiemālieʻi ʻe ʻIlaisa ʻene tamaioʻeikí ʻaki ʻene tokoniʻi ia ke vakai ki he tokoni ʻa e ʻEikí. ʻE lava foki ke fakafiemālieʻi kitautolu ʻi heʻetau ako ke vakai ki he tokoni ʻa e ʻEikí. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-falala lahi ange ki he tokanga taʻetūkua ʻa e ʻEikí.

Teuteu ʻa e tokotaha akó: Fakaafeʻi e kau akó ke teuteu ke vahevahe ha aʻusia ne tāpuekina pe maluʻi ai kinautolu ʻe he ʻEikí pe ko ha taha ʻoku nau ʻilo.

Ngaahi ʻEkitivitī Ako ʻOku Ala Fakahokó

Ko hono fakatokangaʻi e tokanga ʻa e Fakamoʻuí

Ke kamata hoʻo lēsoní, fakakaukau ke tā ha fakatātā faingofua ʻi lotomālie ʻi he palakipoé.

ʻOku fonu ʻa e folofolá ʻi he ngaahi talaʻofa ʻa e Fakamoʻuí maʻa Hono kakai ʻoku feinga ke tauhi kiate Iá. Ke fakakaukauloto ki ha taha ʻo e ngaahi talaʻofa ko ʻení, tā ha fakatātā faingofua ʻi lotomālie ʻi ha peesi ʻi hoʻo tohinoa akó pea fakahingoa ia Ko Au.

Hili iá, lau leva ʻa e Tokāteline mo e Ngaahi Fuakava 84:88, pea tā takatakai ʻi hoʻo fakatātaá ʻa e founga ʻokú ke fakakaukauloto ai ki he ngaahi talaʻofa ʻa e ʻEikí.

Te ke lava ʻo fakaafeʻi ha tokotaha ako ke tānaki atu ki he fakatātā ʻi he palakipoé ʻa e meʻa naʻa nau tā ʻi heʻenau tohinoá, ʻo fakamatalaʻi ʻa e ʻuhinga naʻa nau tā ai ʻa e meʻa naʻa nau taá. ʻE lava ke fakaafeʻi ha kau ako kehe ke tānaki atu ha meʻa kehe naʻa nau mei tā. Pe ko hono vahevahe mo fakamatalaʻi ʻe he kau akó ʻenau ʻū fakatātaá mo ha kaungāʻapi.

ʻOkú ke pehē ʻe ala tokoni fēfē nai ki ha taha kapau naʻá ne lava ʻo fakatokangaʻi e ngaahi talaʻofa ko ʻení ʻoku hoko ʻi heʻene moʻuí?
Ko e hā e ʻuhinga ʻe lava ke faingataʻa ai ke tau sio pe fakatokangaʻi e ngaahi tāpuaki mo e maluʻi ʻa e ʻEikí ʻi heʻetau moʻuí?

Mahalo ʻe tokoni ke fakamoʻoniʻi ʻoku kau mālohi ʻa e Tamai Hēvaní mo e Fakamoʻuí ʻi he moʻui ʻa e tokotaha ako takitaha.

Fakalaulauloto ki he tuʻunga ʻoku ʻi ai hoʻo fakatokangaʻi e kau ʻa e Tamai Hēvaní mo Sīsū Kalaisi ʻi hoʻo moʻuí. Hili iá pea tali e ngaahi fehuʻi ko ʻení ʻi hoʻo tohinoa akó:

Te ke lava nai ʻo fakatokangaʻi ha founga ʻe taha ʻoku hoko ai ʻa e Tamai Hēvaní mo Sīsū Kalaisi ko ha tāpuaki pe ko ha maluʻi kiate koe? Kapau ko ia, ʻokú Na fakahoko fēfē ia?
Ko e hā ha tūkunga ʻokú ke fehangahangai mo ia ʻi hoʻo moʻuí ʻe lava ʻo tokoni atu ke ke fakatokangaʻi lelei ange ai ʻEna ngaahi tāpuakí mo e maluʻí?

ʻI hoʻo ako ʻa e 2 Ngaahi Tuʻi 6, fakaafeʻi ʻa e Laumālie Māʻoniʻoní ke tokoniʻi koe ke ʻiloʻi ʻa e ngaahi founga ʻoku tāpuekina mo maluʻi ai koe ʻe he Tamai Hēvaní mo Sīsū Kalaisí.

Tokoni fakalangí

Fakakaukau ke fakamatalaʻi ʻeni ke tokoni ke mahino ki he kau akó ʻa e puipuituʻa ʻo e 2 Ngaahi Tuʻi 6.

Lolotonga ha taimi ʻo e tau ʻi he vahaʻa ʻo ʻIsileli mo Sīliá, naʻe aleaʻi fakafufū ʻe he tuʻi ʻo Sīliá ʻa ʻene ngaahi palani taú mo ʻene kau tamaioʻeikí. Ka neongo ia, naʻe toutou fakahā ʻe he ʻEikí ʻa e ngaahi palani ʻa Sīliá ki he palōfita ko ʻIlaisá, ʻa ia naʻá ne fakatokanga leva ki he tuʻi ʻo ʻIsilelí. ʻI hono ʻiloʻi ʻeni ʻe he tuʻi ʻo Sīliá, naʻá ne fekauʻi atu ha kau tau ke puke pōpula ʻa ʻIlaisa (vakai, 2 Ngaahi Tuʻi 6:8–13).

Fili ha founga lelei ke ako ai ʻe he kau akó ʻa e ngaahi veesi ko ʻení ke tokoni ke nau ʻiloʻi ʻa e ngaahi tefitoʻi moʻoni fakauluí. Hangē ko ʻení, mahalo ʻe tokoni ki he kau akó ke ako mei he fakakaukau ʻo e tamaioʻeiki ʻa ʻIlaisá. ʻE lava ke nau kiʻi tuku ha taimi ke fakakaukau ki he ongo te nau maʻu kapau ne nau ʻi hono tuʻungá. ʻE lava foki ke lau fakakalasi pe fakakulupu iiki ʻa e kau akó, kae lau ʻe ha kau ako kehekehe ʻa e ngaahi konga maʻa ʻIlaisá, tamaioʻeiki ʻa ʻIlaisá, mo e tuʻi ʻo ʻIsilelí.

Mahalo ʻe tokoni ke fakamatalaʻi ange ko Samēliá ko e kolomuʻa ia ʻo e puleʻanga ʻo ʻIsilelí.

Lau ʻa e 2 Ngaahi Tuʻi 6:14–23, ʻo kumi e ngaahi founga naʻe tāpuakiʻi mo maluʻi ai ʻe he ʻEikí ʻa ʻIlaisa mo ʻene tamaioʻeikí.

Ko e hā e meʻa naʻe makehe kiate koe mei he talanoa ko ʻení?
Ko e hā ha ngaahi moʻoni mei he talanoá ni ʻe lava ke mahuʻinga kiate kitautolu he ʻahó ni?

Fakakaukau ke vahevahe ʻa e moʻoni ko ʻení kapau naʻe teʻeki vahevahe ʻe he kau akó ha foʻi moʻoni tatau ʻi he lea pē ʻanautolu: ʻE lava ke tokoniʻi kitautolu ʻe he ʻEikí ke tau ʻiloʻi ʻEne ngaahi tāpuakí mo e maluʻí ʻi heʻetau moʻuí.
ʻOkú ke pehē naʻe tokoni fēfē kia ʻIlaisa mo ʻene tamaioʻeikí ʻa hono ʻiloʻi e ngaahi tāpuaki mo e maluʻi ʻa e ʻEikí?

Ko hono fakatokangaʻi e ngaahi tāpuaki mo e maluʻi ʻa e ʻEikí

Ke tokoni ke ʻiloʻi ʻe he kau akó ha ngaahi founga ʻe lava ke tāpuakiʻi mo maluʻi ai kinautolu ʻe he ʻEikí, te ke lava ʻo fokotuʻutuʻu kinautolu ki ha ngaahi hoa pe fanga kiʻi kulupu iiki ki he ʻekitivitī ko ʻení.

Fakatokangaʻi ange: ʻE ʻoange ki he kau akó ha faingamālie ke nau fakakaukau ki he lisi ʻoku nau faʻu ʻi he ʻekitivitī ko ʻení ʻi he Lēsoni 96: “Siviʻi Hono 6 Hoʻo Akó.”

Hiki ha lisi ʻo e ngaahi founga kehekehe ʻe lava ke tokangaʻi mo tauhi ai kitautolu ʻe he ʻEikí. Hiki ki he lahi taha te ke lava ʻo fakakaukau ki aí ʻi ha miniti ʻe ua.

Hili e miniti ʻe uá, te ke lava ʻo fakaafeʻi kinautolu ke kumi ha toe ngaahi fakakaukau te nau lava ʻo fakakau mei he Mōsaia 24:13–15; Tokāteline mo e Ngaahi Fuakava 8:2–3; 38:7 pe ngaahi potufolofola kehe te ke ala fokotuʻu ange. Te ke lava foki ‘o vahevahe e lea ko eni meia Palesiteni ʻAealingí.

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e meʻá ni fekauʻaki mo e tokoni ʻa e ʻEikí:

Hangē pē ko e tamaioʻeiki ko ia ʻa ʻIlaisá, ʻoku lahi ange ʻa e kakai ʻoku mou kau fakatahá, ʻiate kinautolu ʻoku mou mamata ʻoku fakafepaki atú. ʻOku ʻi ai ha niʻihi ʻoku mou kau ʻoku ʻikai ke lava e mata fakamatelié ʻo sio ki ai. ʻE tokoniʻi kimoutolu ʻe he ʻEikí pea ʻe ʻi ai e taimi te ne ui mai ha niʻihi kehe ke tuʻu fakataha mo kimoutolu. (“ʻA Kimoutolu ʻOku Fai ʻa e Ngāué,” Liahona, Nōvema 2008, 58)

Fakakaukau ke fakaafeʻi ha ngaahi kulupu ke nau taufetongi ʻi hono vahevahe ha ngaahi sīpinga mei heʻenau lisí ka ke hiki ʻe koe pe ko ha niʻihi ʻe loto-fiemālie ʻa e ngaahi sīpingá ʻi he palakipoé. Te ke lava ʻo fakaʻatā ha ngaahi kulupu ke hokohoko atu ʻenau vahevahé kae ʻoua kuo vahevahe ʻa e ngaahi fakakaukau makehe kotoa pē.

Fakaafeʻi e kau akó ke vahevahe ha ngaahi sīpinga te nau lava ʻo fakakaukau ki ai mei he folofolá ʻo ha taimi naʻe tokangaʻi ai ʻe he ʻEikí ha taha ʻi he ngaahi founga ʻoku hiki he palakipoé.

ʻI hoʻomou aleaʻi e ngaahi fehuʻi ko ʻení, te ke lava ʻo fili ke vahevahe ʻi he taimi kuó ke fakatokangaʻi ai e ngaahi tāpuaki pe tokoni ʻa e ʻOtuá ʻi hoʻo moʻuí.

Ko e hā ha meʻa te ne lava ʻo ʻai ha niʻihi ʻo e ngaahi tāpuaki ko ʻeni mei he ʻEikí ke faingataʻa ange hono fakatokangaʻí ʻi he ngaahi tāpuaki kehé?
Ko e fē ha taimi kuo tāpuekina pe maluʻi ai koe ʻe he ʻEikí, pe ko ha taha ʻokú ke ʻilo, ʻi ha taha ʻo e ngaahi founga ko ʻení?
Ko e hā e meʻa ‘oku akoʻi atu ʻe he aʻusia ko ʻení fekauʻaki mo e ʻEikí?

Fakaʻā hotau matá

Fakakaukau ke fakaʻosi e lēsoní ʻaki hano fakaʻaliʻali e konga lea mo e ngaahi fakahinohino ko ʻení.

Naʻe fakamatalaʻi ʻe Sisitā Mīseli D. Keleki, ʻo e Kau Palesitenisī Lahi mālōlō ʻo e Kau Finemuí, ʻa e meʻa te tau lava ʻo fai kapau ʻoku tau faingataʻaʻia ke vakai ki he founga ʻoku ngāue ai ʻa e ʻOtuá ʻi heʻetau moʻuí:

9:44

Mahalo ʻe ʻi ai ha taimi te ke hangē pē ko e tamaioʻeikí ʻo fiu feinga ke ʻilo ki he anga ʻo e ngāue mai ʻa e ʻOtuá ki hoʻo moʻuí—ʻa e ngaahi taimi ʻokú ke ongoʻi lōmekina aí—he taulōfuʻu ʻa e ngaahi faingataʻa ʻo e moʻui matelié. Kiʻi tatali pea falala ki he ʻOtuá mo ʻEne taimí, koeʻuhí te ke lava ʻo falala ki Hono finangaló ʻaki ho lotó kotoa. Ka ʻoku ʻi ai ha lēsoni fika ua ʻi heni. Siʻoku kāinga ʻofeina, te ke lava ʻo lotu ki he ʻEikí ke Ne fakaʻā ho matá ke ke sio ki ha ngaahi meʻa ʻoku ʻikai ke angamaheni hoʻo sio ki aí. (“Mata ke Mamatá,” Liahona, Nōvema 2020, 15)

Fakakaukau ke tali e fehuʻi ko ʻení ʻi hoʻo tohinoa akó:

Ko e hā e meʻa naʻá ke ako he ʻahó ni ʻokú ne tokoniʻi koe ke ke ongoʻi loto-falala ʻoku tokangaekina koe ʻe he ʻEikí?

Fakamoʻoni ki he ʻofa ʻa e ʻEikí mo ʻEne malava ke tokoniʻi e kau akó ke nau vakai ki Heʻene tokoní ʻi heʻenau moʻuí.

Ngaahi Maʻuʻanga Tokoni Kehé

Ko e hā mo ha toe meʻa te tau lava ʻo ako mei he talanoa ʻo ʻIlaisa mo ʻene tamaioʻeikí?

Naʻe akoʻi ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

15:41

Mahalo pē ʻe ʻi ai pe ʻikai fekauʻi mai ha saliote afi ia ke matafi atu ai ʻetau ilifiá mo ikunaʻi e ngaahi meʻa fakailifiá, ka ʻoku mahino ʻa e lēsoní. ʻOku tau kau mo e ʻEikí, ʻokú Ne tokaimaʻananga mai mo Ne tāpuakiʻi kitautolu ʻi ha founga ko Ia tokotaha pē te Ne lavá. ʻE lava ʻe he lotú ʻo ʻomi e ivi mo e fakahā ʻoku tau fiemaʻu ke fakatefito ai ʻetau fakakaukaú ʻia Sīsū Kalaisi mo ʻEne feilaulau fakaleleí. Naʻe ʻafioʻi ʻe he ʻEikí ʻe ʻi ai ha ngaahi taimi te tau ongoʻi ilifia ai. Kuo tau ʻosi foua kotoa ia. …

Neongo mahalo ʻoku tau tokosiʻi ʻi he Siasí ni, ʻo fakatatau mo e lau fika ʻa e māmaní, ka ko e taimi ʻoku fakaava ai hotau mata fakalaumālié, “ko kinautolu ʻoku kau mai kiate [kitautolú], ʻoku tokolahi hake ia ʻiate kinautolu ʻoku kau kiate kinautolú” (2 Ngaahi Tuʻi 6:16). (“ʻOua ʻe Puputuʻu,” Liahona, Nōvema 2018, 18–19)

Te u lava fēfē ke ʻiloʻi e toʻukupu ʻo e ʻOtuá ʻi heʻeku moʻuí?

Naʻe akonaki ʻa Palesiteni Lāsolo M. Nalesoni ʻo pehē:

Lotua ke ke maʻu ha mata ke mamata ki he ivi tākiekina ʻo e ʻOtuá ʻi hoʻo moʻuí pea mo e māmani ʻokú ke ʻi aí. Kole ke Ne fakahā atu pe ʻokú Ne moʻui—pe ʻokú Ne ʻafioʻi koe. Fehuʻi ange pe ko e hā ʻEne ongoʻi fekauʻaki mo koé. Hili ia peá ke fakafanongo leva. (“Haʻu, ʻo Muimui ʻIate Au,” Liahona, Mē 2019, 90)

ʻOku kei ʻomi nai ʻe he ʻOtuá ha kau ʻāngelo ke tokoniʻi kitautolu he ʻahó ni?

Naʻe akonaki ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Talu mei he kamataʻangá ʻo fai mai ʻi he ngaahi kuonga fakakosipelí mo hono ngāue ʻaki ʻe he ʻOtuá ha kau ʻāngelo ko hono kau fakafofonga ke fakahā ki Heʻene fānaú ʻa ʻEne ʻofá mo e tokangá. …

ʻOku ʻikai ke tau faʻa mamata kiate kinautolu. Ka ʻoku ʻi ai pē e taimi ʻoku fai ai e mamata kiate kinautolu. Ka neongo pe ʻoku ʻiloʻi pe taʻe-ʻiloʻi kinautolu, ʻoku nau [takaofi] maʻu pē. ʻI he taimi ʻe niʻihi ʻoku nau fakahoko ai ha fatongia fakaʻeiʻeiki ʻoku mahuʻinga fau ki he māmaní fakalūkufua. Ko e taimi ʻe niʻihi ʻoku fakafoʻituitui pē ʻa e pōpoakí. ʻI he taimi ʻe niʻihi ʻoku taumuʻa e kau ʻāngeló ke fai ha fakatokanga. Ka ko e lahi tahá ke fakafiemālieʻi, ʻoatu ha tokanga makehe ʻi he ʻaloʻofa pe tataki ʻi he ngaahi taimi ʻo e faingataʻá. …

ʻOku ou fakamoʻoni ʻoku kei fekauʻi mai pē ʻa e kau ʻāngeló ke tokoniʻi kitautolu, ʻo hangē pē ko hono fekauʻi mai kinautolu ke tokoni kia ʻĀtama mo ʻIví, ke tokoni ki he kau palōfitá, pea ke tokoniʻi moʻoni ʻa e Fakamoʻui Tonu ʻo e māmaní. (“Ko e Tauhi Mai ʻa e Kau ʻĀngeló,” Liahona, Nōvema 2008, 29)

Ngaahi ʻEkitivitī Fakalahi ki he Akó

Ko ha founga ‘e taha ke kamata ‘aki e lēsoní

Ki ha founga ʻe taha ke teuteuʻi ai hoʻo kau akó ke ako ʻa e 2 Ngaahi Tuʻi 6, fakakaukau ke tuku takai ha ʻū fakatātā ʻo Sīsū Kalaisi ʻi he lokí. Fokotuʻu ha niʻihi ʻi he ngaahi feituʻu te ke lava ʻo sio ki aí mo ha niʻihi ʻi he ngaahi feituʻu ʻoku faingataʻa ange e sio ki aí.

ʻI he kamataʻanga ʻo e lēsoní, ʻeke ki hoʻo kau akó pe naʻa nau fakatokangaʻi ha taha ʻo e ʻū fakatātā ʻo e Fakamoʻuí naʻá ke tuku takai ʻi he lokí. Fakaafeʻi ke nau tala atu e feituʻu ʻoku ʻi ai e ʻū fakatātaá. Kapau ʻoku ʻi ai ha ʻū fakatātā naʻe ʻikai ke nau fakatokangaʻi pe maʻu, ʻoange ha fanga kiʻi tokoni ki he kau akó ke kumi e toenga ko iá.

Fakaafeʻi e kau akó ke vahevahe ha ngaahi founga ʻe lava ke fakaʻaongaʻi ai e ʻekitivitī ko ʻení ʻi heʻenau moʻuí. ʻE lava ke tokoni e ongo fehuʻi ko ʻení ʻi he alēleá:

ʻE tatau fēfē nai ʻa e aʻusia ko ʻení mo e feinga ke sio mo fakatokangaʻi ʻa e ngaahi tāpuaki mo e maluʻi ʻa e ʻEikí ʻi heʻetau moʻuí?
Ko e hā e ʻuhinga ʻoku faʻa faingataʻa ai he taimi ʻe niʻihi ke tau sio pe fakatokangaʻi ʻa e ngaahi tāpuaki mo e maluʻi ʻa e ʻEikí ʻi heʻetau moʻuí?

Hili iá ʻe lava ke fakalaulauloto ʻa e kau akó ki he tuʻunga lelei ʻo ʻenau fakatokangaʻi ʻa e kau mai ʻa e ʻEikí ʻi heʻenau moʻuí.

Ko hono tokoniʻi e kau akó ke nau fakakaukauloto ki he fakamatalá

Ke tokoni ke fakakaukauloto e kau akó ki he talanoa ʻi he 2 Ngaahi Tuʻi 2:14–23, te ke lava ʻo huluʻi e vitiō “Elisha and the Lord’s Army” (1:09). Hili iá, fakakaukau ke fakaafeʻi e kau akó ke toe vakaiʻi e ngaahi vēsí ke kumi e ngaahi fakaikiiki naʻe ʻikai maʻu ʻi he vitioó.

1:9

2 Ngaahi Tuʻi 6:1–7. Naʻe tētē ʻa e toki ukameá ki he fukahi vaí

Kapau ʻokú ke ongoʻi ʻe ʻaonga ki hoʻo kau akó ha fealeaʻaki fekauʻaki mo e founga ʻoku ʻafioʻi mo tokanga mai ai ʻa e ʻOtuá ki he meʻa ʻoku mahuʻinga kiate kitautolú, fakakaukau ke hiki ʻa e ngaahi faingataʻa pe ngaahi fili ko ʻení ʻi he palakipoé:

Fai ha sivi faingataʻa ʻi he akó
Mole ha kī pe telefoni toʻotoʻo
Fefaʻuhi mo ha vā fetuʻutaki

Fehuʻi ki he kau akó pe ko e fē ʻi he ngaahi faingataʻa pe ngaahi fili ko ʻení ʻoku nau pehē ʻoku tokanga lahi taha ki ai ʻa e ʻOtuá.

Fakaafeʻi e kau akó ke lau ʻa e 2 Ngaahi Tuʻi 6:1–7, ʻo kumi ha mana naʻe fakahoko ʻe he palōfita ko ʻIlaisá. Hili iá pea fakakaukau ke ʻeke ki he kau akó ʻa e ngaahi fehuʻi ko ʻení:

Ko e hā e ʻuhinga naʻe hoko ai e tō ʻa e toki ukameá ko ha meʻa ke hohaʻa ki ai ʻa e tangatá ni?
ʻI he puipuituʻa ʻo e palani ʻo e fakamoʻuí, ko e hā hono mahuʻinga ʻo e toki ukameá?
Ko e hā ha meʻa ʻe lava ke akoʻi mai ʻe he mana ko ʻení fekauʻaki mo e ʻOtuá?

ʻE lava ke ʻiloʻi ʻe he kau akó ha moʻoni hangē ko ʻení: ʻOku ʻafioʻi ʻe he ʻOtuá ʻetau ngaahi hohaʻá pea ʻokú Ne ʻaloʻofa kiate kitautolu.

Hili iá peá ke fakaafeʻi leva e kau akó ke nau lau e lea ko ʻeni ʻa Palesiteni Tōmasi S. Monisoní (1927–2018).

ʻOku ʻafioʻi heʻetau Tamai Hēvaní ʻa ʻetau ngaahi fiemaʻú pea te Ne tokoniʻi kitautou ʻi heʻetau kole tokoni kiate Iá. ʻOku ou tui ʻoku ʻikai haʻatau fiemaʻu ʻe fuʻu siʻisiʻi pe taʻe mahuʻinga. ʻOku tokanga ʻa e ʻEikí ki he ngaahi meʻa iiki ʻo ʻetau moʻuí. (“Fakakaukau ki he Ngaahi Tāpuakí,” Liahona, Nōvema 2012, 88)

Fakaafeʻi e kau akó ke vahevahe ha ngaahi aʻusia kuo nau maʻu ʻi hono tokoniʻi kinautolu ʻe he ʻEikí ʻi ha fanga kiʻi founga iiki.