Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

1 Ngaahi Tuʻi 18: Ko e Fili ke Muimui ki he ʻEikí

“1 Ngaahi Tuʻi 18: Ko e Fili ke Muimui ki he ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“1 Ngaahi Tuʻi 18: Ko e Fili ke Muimui ki he ʻEikí,” Fuakava Motuʻá – Tohi Lēsoni ʻa e Faiako Seminelí

1 Ngaahi Tuʻi 12–13; 17–22: Lēsoni 82

1 Ngaahi Tuʻi 18

Ko e Fili ke Muimui ki he ʻEikí

The Old Testament prophet Elijah standing next to an altar. Elijah has his arms extended as he commands fire from heaven to consume the altar.

ʻOku lahi fēfē nai hoʻo tukupā ke muimui ki he ʻOtuá? Ke fakahaaʻi ko e ʻOtua ʻo ʻIsilelí ʻa e ʻOtua moʻoni pē ʻe tahá, naʻe poleʻi ai ʻe ʻIlaisiā ʻa e kau taulaʻeiki ʻo Pealí ki ha feʻauhi. Naʻe tali ʻe he ʻEikí e ngaahi lotu ʻa ʻIlaisiaá peá ne ikuna ʻi he feʻauhí. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke muimui ki he ʻEikí.

Teuteu ʻa e tokotaha akó: Fakaafeʻi e kau akó ke fakakaukau ki ha foʻi taimi ʻe taha pe lahi ange ʻi heʻenau moʻuí ne nau ʻiloʻi ai ʻoku moʻoni ʻa e Tamai Hēvaní pe ko Sīsū Kalaisi, pe ko ha taimi ne nau ongoʻi ai Hona mālohí ʻi heʻenau moʻuí. Pe ko ʻenau fakakaukau ki he meʻa te nau lava ʻo fai ke ʻiloʻi ai pe ʻoku moʻoni ʻa e Tamai Hēvaní mo Sīsū Kalaisi pea ʻoku totonu nai ke nau muimui kakato kiate Kinaua.

Ngaahi ʻEkitivitī Ako ʻOku Ala Fakahokó

Te tau lava nai ʻo muimui ʻi ha ivi tākiekina ʻe ua ʻi he taimi pē taha?

ʻI hono fakaʻaongaʻi ha tepi pe ko ha naunau kehe, ʻai ha foʻi laine ʻe ua ʻi he falikí ke na huʻu fehangahangai ʻo hangē ko ʻene hā atu ʻi laló. Kole ki ha tokotaha ako ke tuʻu ʻi lotomālie ʻi he feituʻu ʻoku vāofi ai e ongo muiʻi lainé pea tuʻu e ongo vaʻé ki he laine takitaha.

Simple drawing of a stick figure standing on two blue lines with arrow heads at the end

Kole ki he tokotaha akó ke ʻai ha ngaahi foʻi manga, ʻo feinga ke luelue ʻi he ongo lainé fakatouʻosi. ʻEke ange pe ko e hā e fuoloa ʻene ongoʻi te ne kei lava peé. Kapau ʻe fiemaʻu, fakamahinoʻi ange neongo ʻe lava ke lue ha taha ʻi he ongo lainé fakatouʻosi ʻi ha kiʻi mamaʻo siʻi, ka he ʻikai fuoloa, pe te ne lava ʻo lue fakalelei ʻi ha taha ʻo e ongo foʻi lainé.

Fakaafeʻi e tokotaha akó ke foki ki hono nofoʻangá.

ʻI he lēsoni ko ʻení, ʻe lava ke fakafofongaʻi ʻe ha laine ʻe taha ʻa e ngaahi founga ʻa e ʻEikí, pea ʻe lava ke fakafofongaʻi ʻe he laine ʻe tahá ʻa e ngaahi ivi tākiekina kehe ʻoku ʻikai fenāpasi mo e ngaahi founga ʻa e ʻEikí.

Ko e hā ha ngaahi founga te tau lava ai ʻo feinga ke muimui ki he ʻEikí mo e ngaahi ivi tākiekina kehé ʻi he taimi tatau?

Ko e poleʻi ʻe ʻIlaisiā ʻa e kau taulaʻeiki ʻa Pealí ki ha feʻauhi

ʻI he 1 Ngaahi Tuʻi 18, naʻe fiemaʻu ʻe ʻIlaisiā ke līʻoa kakato ʻa e puleʻanga ʻo ʻIsilelí ki he ʻEikí. Ko e ʻosi nai ʻeni ha taʻu ʻe tolu mei hono fakaʻaongaʻi ʻe ʻIlaisiā hono mālohi faisilá ke ʻomi ha laʻalaʻā ki he fonuá (vakai, 1 Ngaahi Tuʻi 17:1). Ka naʻe hokohoko atu e moihū ʻa ʻIsileli ki he ngaahi ʻotua loí, kau ai ʻa Peali (vakai, 1 Ngaahi Tuʻi 18:18). Naʻe poleʻi ʻe ʻIlaisiā ʻa e kau palōfita loi ʻe laungeau ʻo Pealí mo e kau palōfita ʻo e vao tapú ki ha feʻauhi ʻi he Moʻunga Kāmelí ke fakamoʻoniʻi pe ko hai ʻia Peali mo Sihova ʻoku ʻOtua moʻoní (vakai, 1 Ngaahi Tuʻi 18:19). Kimuʻa pea kamata ʻa e feʻauhí, naʻe lea ʻa ʻIlaisiā ki he kakaí.

Lau ʻa e 1 Ngaahi Tuʻi 18:21, ʻo kumi e ngaahi lea ʻa ʻIlaisiā ki he kakaí. ʻOku ʻuhinga ʻa e foʻi lea lotolotoua ʻi hení ki he momou pe vaivai.

Ko e hā e meʻa naʻe fekau ʻe ʻIlaisiā ki he kakaí ke nau faí?

ʻOku toe fakalea ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakamatalá ni ʻi he foungá ni:

ʻI he ngaahi ʻahó ni, ʻe ala pehē atu ʻa ʻIlaisiā:

ʻOku ʻi ai e ʻOtua ko ʻetau Tamai Hēvaní pe ʻoku ʻikai ke Ne ʻi ai, ka ʻo kapau ʻokú Ne moʻui, moihū kiate Ia.

Ko Sīsū Kalaisi pē ʻa e ʻAlo ʻo e ʻOtuá, ʻa e Huhuʻi kuo toetuʻu ʻo e faʻahinga ʻo e tangatá, pe ʻoku ʻikai, ka ʻo kapau ko Ia ia, muimui kiate Ia. (“Tuʻu Maʻu mo Tuʻu ʻAliʻaliaki ʻi he Tui kia Kalaisí,” Liahona, Nōvema 2018, 30)

Ko e hā e meʻa ʻoku makehe kiate koe mei he ngaahi fakamatala ʻa ʻIlaisiā mo ʻEletā Kulisitofasoní?

Fakaafeʻi e kau akó ke vahevahe ʻenau ngaahi fakakaukaú. Ko ha ngaahi moʻoni ʻe niʻihi te tau lava ʻo akó ko e:

ʻOku fakaʻatā kitautolu ʻe he ʻEikí ke tau fili pe te tau muimui nai kiate Ia pe ko e ngaahi ʻotua loí mo e ngaahi hala taʻe-māʻoniʻoni ʻo e māmaní.

ʻI he taimi ʻoku tau ʻilo ai ʻoku moʻui ʻa e Tamai Hēvaní pea ko Sīsū ʻa e Kalaisí, ʻoku totonu ke tau tukupā ke muimui kiate Kinaua.

Tali ʻa e ngaahi fehuʻi ko ʻení ʻi hoʻo tohinoa akó:

ʻOku mālohi fēfē ʻeku tui ʻoku ʻi ai haʻaku Tamai ʻi Hēvani mo ha Fakamoʻui?
ʻOku lahi fēfē nai ʻeku tukupā ke muimui kiate Kinauá?
Ko e hā ha meʻa te ne ala taʻofi au mei heʻeku tukupā ke muimui kakato kiate Kinauá?

ʻI he hoko atu hoʻo akó, fekumi ki he fakahinohino ʻa e Laumālie Māʻoniʻoní ke tokoni atu ke ke ʻiloʻi e founga te ke lava ai ʻo ikunaʻi ha faʻahinga faingataʻa pē te ne ala taʻofi koe mei hoʻo muimui kakato ki he Tamai Hēvaní mo Sīsū Kalaisí.

Ko e feʻauhi ʻi he vahaʻa ʻo Peali mo Sihová

Lau ʻa e 1 Ngaahi Tuʻi 18:23–24, ʻo kumi e ngaahi tūkunga ʻo e feʻauhi ʻa ʻIlaisiā mo e kau palōfita loi ʻa Pealí.

Naʻe ʻuluaki feinga ʻa e kau taulaʻeiki ʻa Pealí, ʻo ui ki honau ʻotua loí ʻi ha ngaahi houa lahi. Lau ʻa e 1 Ngaahi Tuʻi 18:26–29, ʻo kumi e meʻa naʻe hokó.

Ko e hā ʻa e meʻa naʻá ke maʻú?

Lau ʻa e 1 Ngaahi Tuʻi 18:30–39 ke ʻiloʻi e meʻa naʻe hoko ʻi he taimi naʻe ui ai ʻa ʻIlaisiā ki he ʻOtuá. Hili iá pea toʻo ha laʻipepa ʻo vaeua ia. Tā ʻi ha vaheua ʻe taha ʻo e laʻipepá ha fakatātā ʻo e meʻa naʻe hoko ʻi he taimi naʻe teuteuʻi ai ʻe ʻIlaisiā ʻene feilaulaú mo ui ki he ʻOtuá.

Ko e hā ha meʻa te ke fakakaukau ki ai mo ongoʻi kapau naʻá ke ʻi ai?
Te ne liliu fēfē nai hoʻo fakamoʻoni ki he ʻEikí mo hoʻo loto-fiemālie ke muimui kiate Iá?

ʻI he tafaʻaki ʻe taha ʻo hoʻo laʻipepá, tohi pe tā ha fakatātā ʻo ha taimi ʻe taha pe lahi ange ʻi hoʻo moʻuí naʻá ke ʻilo ai ʻoku moʻoni ʻa e Tamai Hēvaní pe ko Sīsū Kalaisi, pe ko ha taimi naʻá ke ongoʻi ai Hona mālohí ʻi hoʻo moʻuí. Pe ko hoʻo tohi pe tā ha fakatātā ʻo e meʻa te ke lava ʻo fai ke ʻiloʻi ai pe ʻokú Na moʻoní pea kapau ʻoku totonu ke ke muimui kakato kiate Kinaua.

ʻI he ʻosi ʻa e kau akó, fakakaukau ke ʻoange ha taimi ki ha niʻihi tokolahi ʻe loto ke vahevahe ʻa e meʻa naʻa nau tā pe tohí kapau ʻoku ʻikai fuʻu fakataautaha. ʻE lava ke ʻomi ʻe hono poupouʻi ha kau ako tokolahi ke vahevahé ha ngaahi fakakaukau kehekehe mo tokoni ke ʻiloʻi ʻe he kau ako kehé ʻa e founga ʻe lava ke uesia ai kinautolu ʻe he ngaahi moʻoni ʻoku nau akó. ʻE ala ʻaonga foki ke fai ha ngaahi fehuʻi hangē ko ia ʻi laló.

ʻOku tokoniʻi fēfē koe ʻi hoʻo fakakaukau ki hoʻo ngaahi aʻusia ʻi hoʻo mamata ki he mālohi ʻo e Tamai Hēvaní mo Sīsū Kalaisi ʻi hoʻo moʻuí ʻi hoʻo tukupā ke moihū mo muimui ʻiate Kinauá?
ʻOkú ke pehē ko e hā e ʻuhinga ʻoku mahuʻinga ai ke muimui kakato ki he Tamai Hēvaní mo e Fakamoʻui ko Sīsū Kalaisí?

Ke fakaʻosi ʻa e lēsoni ko ʻení, hiki ʻi hoʻo tohinoa akó ʻa e ongo ʻokú ke maʻu fekauʻaki mo e muimui kakato ki he Tamai Hēvaní mo Sīsū Kalaisí. Fekumi ki he tataki ʻa e Laumālie Māʻoniʻoní ke tokoni atu ke ke manatuʻi mo fakahaaʻi hoʻo ngaahi ongó. Te ke lava ʻo fakakau ai ʻa e meʻa ʻokú ke loto ke fai pe manatuʻi koeʻuhí ko e lēsoni ko ʻení.

Vahevahe hoʻo fakamoʻoni ki he Tamai Hēvaní mo Sīsū Kalaisi pea mo e ngaahi tāpuaki ʻo e muimui kakato kiate Kinauá.

Ngaahi Maʻuʻanga Tokoni Kehé

Ko e hā ha ngaahi founga ʻoku tau “lotolotoua” ai he ʻahó ni?

Naʻe akoʻi ʻe ʻEletā Tēvita P. Houma ʻo e Kau Fitungofulú ha ngaahi founga lahi ʻe lava ke tau puputuʻu ai pe ko hai te tau muimui ki aí:

ʻOku tau moʻui ʻi ha māmani ʻoku tokolahi ai ha kakai ʻoku nau feinga ke maʻu ʻetau tokangá. ʻOku faingataʻa ke ʻiloʻi e leʻo ke falala ki aí, koeʻuhí ko e lahi ʻa e ongoongó, tweets, blogs, podcasts, mo e faleʻi meia Alexa, Siri, mo ha ngaahi leʻo kehe. Ko e taimi ʻe niʻihi ʻoku tataki ʻe he ʻinitanetí ʻetau moʻuí, ʻo tau fakakaukau ʻe ʻomi ʻe he tokolahi e maʻuʻanga tokoni lelei taha ʻo e moʻoní. ʻI he taimi ʻe niʻihi ʻoku tau faʻa “… lotolotoua” (1 Ngaahi Tuʻi 18:21), ʻo fili ke “ʻikai momoko pe vela” (Fakahā 3:15–16). Ka ʻoku kei ʻi ai e taimi ʻoku tau muimui pē he meʻa ʻoku ala faingamālié, pea tukutaha e tokangá ʻi ha leʻo pe meʻa ʻe taha ke ne tataki kitautolu, pe fakafalala kakato pē ki heʻetau fakakaukaú. …

ʻOku ʻikai ko e lelei tahá maʻu pē ʻa e meʻa ʻoku manakoá. He ʻikai ke maʻu ha lelei ia mei he lotolotouá. ʻOku ʻikai faʻa maʻu ha meʻa mahuʻinga ia ʻi he tali faingamālié pē. He ʻikai ke lahi e mahinó ʻi hono tukutaha e tokangá ʻi ha leʻo pe meʻa pē ʻe taha. Pea ʻe hoko ʻetau fuʻu fakafalala ki hotau potó ke ne taki hotau ʻatamaí ki ha fakakaukau fiemohea. Kapau he ʻikai ke tau tokanga, ʻe lava ʻe he ngaahi leʻo halá ʻo tohoakiʻi kitautolu mei he ngaahi tefitoʻi moʻoni ʻo e ongoongoleleí pea faingataʻa ke tauhi e tuí, ʻo tau loto-mamahi, ʻiteʻita; mo taʻefiemālie. …

Pea ko ia ai, ʻoku fiemaʻu ke tau fakapapauʻi pe ko e fē ʻi he ngaahi leʻo kehekehe ko ʻení te tau talangofua ki aí. Te tau muimui nai he ngaahi leʻo taʻefalalaʻanga ʻoku taukapoʻi ʻe he māmaní, pe te tau fai e ngāue ʻoku fiemaʻu ke fakahinohino ai kitautolu ʻe he leʻo ʻo e Tamaí ʻi heʻetau ngaahi filí mo maluʻi kitautolu mei he fakatuʻutāmakí? (“Fanongo ki Hono Leʻó,” Liahona, Mē 2019, 41–43)

ʻOku fōtunga fēfē ʻa e Moʻunga Kāmelí?

Naʻe fakataha ʻa e palōfita ko ʻIlaisiaá mo e kau palōfita loi ʻo Pealí ki he Moʻunga Kāmelí. ʻE lava ke tokoni ʻa e fakatātā ko ʻeni ʻo e Moʻunga Kāmelí ʻi ʻIsilelí ke fakakaukauloto ʻa e kau akó ki he feituʻu naʻe ui ai ʻe ʻIlaisiā ke tō hifo ha afi mei he langí pea naʻe ʻikai lava ia ʻe he kau palōfita loi ʻa Pealí.

Ngaahi ʻEkitivitī Fakalahi ki he Akó

Ko ha founga ‘e taha ke kamata ‘aki e lēsoní

Fakaafeʻi e kau akó ke feinga ke fai ha ngāue ʻe ua ʻi he taimi tatau, hangē ko e fakamālohisino push-up pea mo punopuna, pe laukonga mo talanoa mo ha kaungāmeʻa. Aleaʻi ʻa e ʻuhinga ʻoku ʻikai lelei ai ʻa e feinga ke fai ha meʻa ʻe ua ʻi he taimi ʻe tahá. Fakaafeʻi ke nau lau e fehuʻi ʻa ʻIlaisiaá ʻi he 1 Ngaahi Tuʻi 18:21.

“ʻEiki, Te U Muimui Atu”

Fakakaukau ke kamata e lēsoní ʻaki hano hivaʻi e “ʻEiki, Te U Muimui Atu” (Ngaahi Himi, fika 127).

Pe ʻi he hili hono ʻeke ʻo e fehuʻi ofi ki he fakaʻosinga ʻo e lēsoní, “ʻOkú ke pehē ko e hā e ʻuhinga ʻoku mahuʻinga ai ke muimui kakato ki he Tamai Hēvaní mo e Fakamoʻui ko Sīsū Kalaisí?”, fakakaukau ke hivaʻi ʻa e “ʻEiki, Te U Muimui Atú.” Fakaafeʻi e kau akó ke vahevahe pe ko e hā ha ngaahi foʻi lea pe kupuʻi lea ʻi he himi ko ʻení ʻokú ne ueʻi kinautolu ke muimui ki he ʻEikí.

1 Ngaahi Tuʻi 19:1–12. Ko e folofola ʻa e ʻEikí kia ʻIlaisiā ʻi ha kihiʻi leʻo siʻí

Ko e ngaahi veesi ko ʻeni ʻi he 1 Ngaahi Tuʻi 19 ko e kaveinga ia ʻi he Lēsoni 162: “Fekumi ki ha Fakahā Fakataautaha ki Heʻeku Ngaahi Fehuʻí,” ka ʻo kapau te ke fie akoʻi ia heni, fakakaukau ki he meʻá ni:

Tā ha ngaahi ongo kehekehe maʻá e kau akó pea fakaafeʻi ke nau fakamatalaʻi e ngaahi ongo ko iá. ʻE lava ke kau ai ha kaikaila, matangi mālohi, mofuike, mo ha fanafana. Fakaafeʻi e kau akó ke vahevahe e meʻa ʻoku fiemaʻu ke fanongo mo fakatokangaʻi ai e ongo takitaha.

Hili e feʻauhi ʻa ʻIlaisiā mo e kau taulaʻeiki ʻa Pealí, naʻe tāmateʻi ʻa e kau taulaʻeiki faiangahalá pea fakaʻaongaʻi ʻe ʻIlaisiā ʻa e mālohi ʻo e ʻOtuá ke ʻomi ha ʻuha, ʻo fakangata ai e ngaahi taʻu ʻo e laʻalaʻaá (vakai, 1 Ngaahi Tuʻi 18:40–45). Naʻa mo e hili ʻa e afi fakaofo mei he langí mo e ʻuhá, naʻe fuakava ʻa Sisipeli te ne toʻo e moʻui ʻa ʻIlaisiaá ko ha sāuni, ʻo tupu ai ha hola ʻa ʻIlaisiā ʻo toitoi ʻi ha ʻana (vakai, 1 Ngaahi Tuʻi 19:1–8).

Lau ʻa e 1 Ngaahi Tuʻi 19:9–13, ʻo kumi ʻa e founga naʻe fetuʻutaki ai ʻa e ʻEikí mo ʻIlaisiaá.

Ko e hā ha meʻa te tau lava ʻo ako mei he talanoa ko ʻení fekauʻaki mo e founga ʻoku faʻa fetuʻutaki ai ʻa e ʻEikí mo kitautolú?

Kapau ʻe ʻaonga, fakaafeʻi e kau akó ke tangutu maʻu mo fakalongolongo ʻi ha sekoni ʻe 30 pea fakafanongo ki ha faʻahinga ongo naʻe ʻikai ke nau fakatokangaʻi kimuʻa. Fehuʻi ange pe ʻoku fakatātaaʻi fēfē ʻe he ʻekitivitī ko ʻení ʻa e meʻa kuo pau ke tau fai ke maʻu ai e ngaahi pōpoaki ʻe lava ke ʻomi ʻe he ʻEikí ʻo fakafou mai ʻi he kihiʻi leʻosiʻi mo vanavanaiki ʻo e Laumālié.

Ko e hā e meʻa ʻokú ne tokoniʻi koe ke ke ʻiloʻi mo fanongo ki he kihiʻi leʻosiʻi ʻoku lea atu kiate koé?
Ko e hā ha ngaahi tāpuaki kuó ke fakatokangaʻi koeʻuhí ko e ivi tākiekina ʻo e Laumālié ʻi hoʻo moʻuí?

Hili e vahevahe ʻa e kau akó, fakakaukau ke vahevahe foki mo ha ngaahi aʻusia mo ha fakamoʻoni fakataautaha.