Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

1 Ngaahi Tuʻi 17: “Naʻe ʻAlu Ia Mo Ne Fai ʻo Tatau mo e Lea ʻa ʻIlaisiaá”

“1 Ngaahi Tuʻi 17: ‘Naʻe ʻAlu Ia Mo Ne Fai ʻo Tatau mo e Lea ʻa ʻIlaisiaá,’” Fuakava Motuʻá – Tohi Lēsoni ʻa e Faiako Seminelí (2026)

“1 Ngaahi Tuʻi 17: ‘Naʻe ʻAlu Ia Mo Ne Fai ʻo Tatau mo e Lea ʻa ʻIlaisiaá,’” Fuakava Motuʻá – Tohi Lēsoni ʻa e Faiako Seminelí

1 Ngaahi Tuʻi 12–13; 17–22: Lēsoni 81

1 Ngaahi Tuʻi 17

“Naʻe ʻAlu Ia Mo Ne Fai ʻo Tatau mo e Lea ʻa ʻIlaisiaá”

A painting by James Johnson showing a woman with long brown hair and a simple tunic, pouring oil into a small plate.

ʻOku faʻa ʻomi ʻe heʻetau Tamai Hēvani ʻofá mo Hono ʻAlo ko Sīsū Kalaisí, ha ngaahi faingamālie ke tau fakamālohia ai ʻetau tui kiate Kinauá lolotonga e ngaahi faingataʻa ʻo e moʻuí. Lolotonga ha laʻalaʻā, naʻe kole ʻe he palōfita ko ʻIlaisiaá ki ha uitou ʻi Salifati ke foaki kiate ia ʻa e fakaʻosi ʻo ʻene meʻakaí. ʻI he ngāue ʻa e uitoú ʻi he tuí, naʻe talaʻofa ange ʻe he ʻEikí kiate ia ha ngaahi tāpuaki maʻongoʻonga. Hangē ko e uitoú, te tau lava ʻo fakahaaʻi ʻetau tui ki he ʻOtuá ʻaki ʻetau muimui ki Heʻene kau palōfitá. ʻE lava ke tokoni ʻa e lēsoni ko ʻení ki he kau akó ke nau ngāue ʻi he tui lahi ange ki he Tamai Hēvaní mo Sīsū Kalaisi ʻaki ʻenau muimui ki he ngaahi lea ʻa e kau palōfitá.

Teuteu ʻa e tokotaha akó: Fakaafeʻi e kau akó ke nau feinga ke ʻiloʻi ha meʻa kuo fakaafeʻi kitautolu ʻe he ʻEikí ke tau fai ʻo fakafou ʻi Heʻene palōfitá mo ha talaʻofa kuó Ne foaki mai ʻo kapau te tau fai ia. Fakaafeʻi ʻa e kau akó ke omi mateuteu ki he kalasí ke vahevahe.

Ngaahi ʻEkitivitī Ako ʻOku Ala Fakahokó

Ngaahi fakaafe fakaepalōfita

Ke tokoni ke ʻilo ʻe he kau akó ʻa e founga ʻoku ʻomi ai ʻe he Tamai Hēvaní mo Sīsū Kalaisi ha fakahinohino kiate kitautolu ʻo fakafou ʻi Heʻena kau palōfitá, te ke lava ʻo fakaʻaliʻali ʻa e ʻekitivitī ko ʻení. Fakakaukau ke fakakau ʻa e palōfita lolotongá mo ha fakaafe kuó ne toki fai kimuí ni mai. Pe ko hano tala atu ʻe he kau akó ha kau palōfita ʻe niʻihi (kau ai ʻa e palōfita lolotongá) pea lisi ha fakaafe ʻe taha pe lahi ange kuo ʻomi ʻe he ʻEikí kiate kitautolu ʻo fakafou ʻi he palōfita takitaha.

Fakatauhoa ʻa e kau palōfitá mo ha fakaafe naʻe fai ʻe he ʻEikí ki honau kakaí:

Tokoua ʻo Sēletí
Mōsese
Līhai
Pilikihami ʻIongi

Mavahe mei Selusalema ʻo ʻalu ki he feituʻu maomaonganoá.
Fononga ki he ʻOtu Moʻunga Maká.
Foʻu ha ʻū vaka lafalafa ke folau ai ‘i he tahí ki he fonua ‘o e talaʻofá.
Fononga ʻi ha kelekele mōmoa he Tahi Kulokulá.

Ngaahi Talí: 1–F (vakai, ʻEta 2:16; 6:4, 12); 2–H (vakai, ʻEkesōtosi 14:21–22); 3–A (vakai, 1 Nīfai 2:1–2); 4–E (vakai, Tokāteline mo e Ngaahi Fuakava 136:1). Te ke lava ʻo fakaafeʻi e kau akó ke fakalaulauloto pe naʻa nau mei muimui nai ki he fakahinohino fakaepalōfita ko ʻení kapau naʻa nau moʻui ʻi he kuonga ʻo e kau palōfita ko iá.

Fakaafeʻi e kau akó ke fakakaukau ki heʻenau ngaahi tali ki he ngaahi fakaafe ʻa e palōfita moʻuí ʻaki hono fai e ngaahi meʻá ni.

ʻI he meʻafua 1–10, te ke fakafuofuaʻi fēfē koe ʻi he ngaahi fakamatala takitaha ko ʻení:

ʻOku ou tui ʻoku folofola ʻa e ʻEikí ʻo fakafou ʻi he kau palōfita.
ʻOku ou maheni mo e meʻa ʻoku akoʻi ʻe he ʻEikí ʻo fakafou mai ʻi Heʻene kau palōfita ʻo e ʻaho ní.
ʻOku ou muimui ki he ngaahi akonaki ʻa e ʻEikí ʻoku fakafou mai ʻi Heʻene kau palōfitá.

ʻI hoʻo ako ʻa e 1 Ngaahi Tuʻi 17, tokanga ki he ngaahi fakakaukau mei he Laumālie Māʻoniʻoní. Fakakaukau ki he founga ʻe lava ke liliu ai ʻe hoʻo ako he ʻaho ní hoʻo ngaahi ongo fekauʻaki mo e ngaahi fakamatala ko ʻení.

Ko ʻIlaisiā mo e uitou ʻo Salifatí

ʻE lava ke lau pe fakamatalaʻi fakanounou ʻa e ongo palakalafi ko ʻení.

Koeʻuhí ko e faiangahalá, naʻe vahevahe ai ʻa e puleʻanga ʻIsilelí ki ha puleʻanga ʻe ua: ko ʻIsileli mo Siuta (vakai, 1 Ngaahi Tuʻi 11–12). Lolotonga e pule ʻa e Tuʻi angakovi ko ʻĒhapí, naʻe fekauʻi mai ʻe he ʻEikí ʻEne palōfita ko ʻIlaisiaá ki he kakai ʻo ʻIsilelí.

ʻI hono fakaʻaongaʻi ʻe ʻIlaisiā ʻa e mālohi ʻo e ʻOtuá, naʻá ne taʻofi ai ʻa e ʻuhá mei he fonuá, ʻa ia naʻe tupu ai ha laʻalaʻā ʻi ha ngaahi taʻu lahi. Naʻe tokonaki ʻe he ʻEikí ʻa e ngaahi fiemaʻu ʻa ʻIlaisiaá, ʻo fakahinohinoʻi ia ke toitoi ʻi ha veʻe vai ʻa ia naʻe fafanga ai ia ʻe he fanga lēvení (vakai, 1 Ngaahi Tuʻi 17:1–6).

Lau ʻa e 1 Ngaahi Tuʻi 17:8–16.

Naʻe fakahaaʻi fēfē ʻe ʻIlaisiā pe ko e uitoú ʻa e tui kia Sīsū Kalaisí?
Naʻe fakahoko fēfē ʻa e talaʻofa ʻa e ʻEikí?
ʻE lava fēfē ke hoko ʻa ʻIlaisiā mo e uitoú fakatouʻosi ko ha fakataipe ʻo Sīsū Kalaisi?

Fakaafeʻi e kau akó ke vahevahe ʻenau ngaahi talí. Ko e taha ʻo e ngaahi founga ʻe lava ke fakamanatu ai ʻe ʻIlaisiā ki he kau akó ʻa Sīsū Kalaisí ko hono fakaafeʻi ʻa e uitoú ke muimui ʻi he meʻa naʻá ne lea ʻaki ke fakamoʻui ai iá. Naʻá ne toe palōmesi ange foki ʻe fakalahi ʻa e meʻakaí (1 Ngaahi Tuʻi 17:14–16), ʻo hangē ko e talaʻofa ʻa e Fakamoʻuí ki he niʻihi kehé (vakai, Mātiu 14:15–21). Ko e taha ʻo e ngaahi founga ʻe lava ke fakamanatu ai ʻe he uitoú ki he kau akó ʻa Sīsū Kalaisí ko e founga naʻá ne loto-fiemālie ai ke feilaulauʻi ʻa e meʻa kotoa pē naʻá ne maʻú, ʻo hangē ko ia naʻe fai ʻe he Fakamoʻuí.

Fehuʻi ange pe ko e hā e ngaahi lēsoni naʻe ako ʻe he kau akó mei he talanoa ko ʻení. ʻE lava ke nau vahevahe ha ngaahi tefitoʻi moʻoni kehekehe. Kapau he ʻikai ke nau lave ki he moʻoni ko ʻení, fakapapauʻi ke tānaki atu ia: ʻOku ʻomi ʻe he ngāue ʻi he tui ki he ngaahi folofola ʻa e Fakamoʻuí ʻa ʻEne ngaahi tāpuaki kuo talaʻofa maí. ʻOku kau heni ʻa e ngaahi folofola ʻa e Fakamoʻuí ʻo fakafou ʻi Heʻene kau palōfitá.
Ko e hā ha meʻa ʻe lava ke faingataʻa ai ke ngāueʻi ʻa e ngaahi akonaki ʻa e Fakamoʻuí ʻi he tuí?
Ko e hā e meʻa ʻokú ke ʻilo fekauʻaki mo e Tamai Hēvaní mo Sīsū Kalaisi ʻe lava ʻo tokoni atu ke ke ngāue ʻi he tuí?

Ko e folofola ʻa e Fakamoʻuí ʻo fakafou ʻi Heʻene kau palōfitá

Fakaafeʻi e kau akó ke vahevahe ʻa e feituʻu ʻe lava ke maʻu ai e folofola ʻa e ʻEikí ʻoku fakafou mai ʻi Heʻene kau palōfitá. Makehe mei he folofolá mo e konifelenisi lahí, ʻe lava ke vahevahe ʻe he kau akó ha ngaahi feituʻu hangē ko e ongo makasini Liahoná mo e Ki Hono Fakamālohia ʻo e Toʻu Tupú, Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, mo e mītia fakasōsialé.

Fakaafeʻi e kau akó ke fakaʻaongaʻi ha taha ʻo e ngaahi maʻuʻanga tokoni ko ʻení ke fakakakato ʻa e ʻekitivitī ko ʻení. Fakakaukau ke fakaʻaliʻali e ngaahi fakahinohinó pea ʻoange ki he kau akó ha taimi pau ke nau ako ai.

Tā ha kōlomu ʻe ua ʻi ho tohinoa akó. Tā ha foʻi mā ke ne fakafofongaʻi e foʻi mā ʻa e uitoú ʻi he kōlomu toʻohemá pea mo ha ipu lolo mo ha puha mahoaʻa (vakai, 1 Ngaahi Tuʻi 17:12, 16) ʻi he kōlomu toʻomataʻú.
Fakahingoa ʻa e kōlomu toʻohemá Ko e Meʻa ʻOku Kole Mai ʻe he Tamai Hēvaní mo Sīsū Kalaisí. Fakahingoa ʻa e kōlomu toʻomataʻú Ko ʻEna Ngaahi Tāpuaki Kuo Talaʻofa Maí.
ʻI he kōlomu toʻohemá, hiki ha lisi ʻo e ngaahi meʻa ʻoku kole mai ʻe he Tamai Hēvaní mo Sīsū Kalaisi ke tau fai ʻo fakafou ʻi Heʻena kau palōfitá. Hiki ʻi he kōlomu toʻomataʻú ʻa e ngaahi tāpuaki kuo talaʻofa mai ʻi he talangofua ki Heʻena ngaahi folofolá.

Mahalo ʻe tokoni ke ʻoange ha sīpinga ki he kau akó. Te ke lava ʻo fakahū ʻa e “ko hono moʻui ʻaki e Lea ʻo e Potó” ʻi he kōlomu toʻohemá. Hili iá ʻe lava ke lau ʻe he kau akó ʻa e Tokāteline mo e Ngaahi Fuakava 89:18–21 ke ʻiloʻi ʻa e ngaahi tāpuaki ʻoku talaʻofa mai ʻe he ʻEikí. Pe ko hoʻo vahevahe ha sīpinga kimuí ni mei he ngaahi lea ʻa e palōfitá ʻi he konifelenisi lahí.

Fakaafeʻi e kau akó ke vahevahe ʻa e meʻa ne nau tohi ʻi heʻenau ongo kōlomú ʻi ha fanga kiʻi kulupu iiki. Fakapapauʻi ʻoku maʻu ʻe he tokotaha ako takitaha ha faingamālie ke vahevahe ha meʻa ʻe taha pe lahi ange mei he kōlomu takitaha. Hili iá ʻe lava ke aleaʻi ʻe he ngaahi kulupú ʻa e fehuʻi ko ʻení.

Kuó ke mamata fēfē ki he ngaahi tāpuaki ʻo hono ngāue ʻaki e tui ki he folofola ʻa e ʻEikí ʻoku fakafou mai ʻi Heʻene kau palōfitá?

Palani ke muimui ki he kau palōfita ʻa e ʻOtuá

Poupouʻi e kau akó ke fekumi ki he tokoni ʻa e Laumālie Māʻoniʻoní ʻi heʻenau fakahoko ʻa e ʻekitivitī ko ʻení.

Hiki pe siakaleʻi ʻi he kōlomu toʻohemá ha meʻa ʻoku kole atu ʻe he ʻEikí ke ke fai ʻo fakafou ʻi Heʻene kau palōfitá ʻokú ke ongoʻi ʻokú Ne finangalo ke ke tokanga taha ki ai.
Hiki pe siakaleʻi ʻi he kōlomu toʻomataʻú ʻa e founga kuo talaʻofa mai ai ʻe he ʻEikí ke tāpuakiʻi koe kapau te ke muimui ki Heʻene faleʻí.
Fakakaukauloto ki he meʻa naʻá ke tohí pe siakaleʻí, pea hiki hoʻo palani ke talangofua ki he meʻa kuo kole atu ʻe he ʻEikí ke ke fai ʻo fakafou ʻi Heʻene palōfitá.

Fakaafeʻi e kau akó ke kumi ha founga ke manatuʻi ai e meʻa ʻoku nau palani ke faí. Hangē ko ʻení, ʻe lava ke faitaaʻi ʻe he kau akó ʻenau talí pea fakaʻaongaʻi ia ko ha wallpaper ʻi heʻenau telefoní. ʻE maʻu ʻe he kau akó ha faingamālie ke muimuiʻi mo lipooti ʻenau palani ʻi he Lēsoni 96: “Siviʻi Hono 6 Hoʻo Akó.”

Fakakaukau ke fakaʻosi e kalasí ʻaki haʻo fakamoʻoni ʻe ofi ange ʻa e kau akó kia Sīsū Kalaisi ʻi heʻenau feinga ke muimui ki Heʻene palōfitá.

Ngaahi Maʻuʻanga Tokoni Kehé

Ko hai ʻa ʻIlaisiā?

ʻOku ʻomi ʻe he Fakahinohino ki he Ngaahi Folofolá ha fakamatala lahi ange fekauʻaki mo ʻIlaisiā pea mo e mahuʻinga ʻo e mālohi faisila naʻá ne maʻu ʻi he kuonga muʻá pea ʻoku hokohoko atu ke maʻu ʻi onopōní.

Fēfē kapau ʻoku ou ongoʻi ʻoku ʻikai feʻunga ʻa e meʻa ʻoku ou maʻu ke foakí?

Naʻe fakamatala ʻa Sisitā Mīseli D. Keleki ʻo e Kau Palesitenisī Lahi mālōlō ʻo e Kau Finemuí ʻo pehē:

Te tau lava ʻo ʻave ʻa ia ʻoku tau maʻú kia Kalaisi, pea te Ne fakalahi ʻetau ngaahi ngāué. Ko e meʻa te ke foakí, ʻoku lahi ʻānoa ia—pea naʻa mo hoʻo ngaahi tōnounoú mo e vaivaiʻangá—ʻo kapau te ke falala ki he ʻaloʻofa ʻa e ʻOtuá. (“Taʻefiemālie Fakalangí,” Liahona, Nōvema 2018, 54)

ʻE tāpuekina fēfē au ʻe he ʻEikí ʻi heʻeku muimui faivelenga ki Heʻene palōfitá?

Naʻe akonaki ʻa ʻEletā Lenitolo K. Pēneti ʻo e Kau Fitungofulú ʻo pehē:

ʻOku ou palōmesi atu kapau te mou ngāue ʻi he tui ki hoʻomou Tamai Hēvaní mo ʻEne palaní—ʻa ʻEne palani lahi ʻo e fiefiá—pea kapau te mou ngāue ʻi he tui kia Sīsū Kalaisi mo ʻEne Fakaleleí pea muimui ki he kau palōfita ʻa e ʻOtuá, ʻe foaki atu kiate kimoutolu ʻa e mālohi ke fai ha faʻahinga meʻa pē ʻoku finangalo ʻa e ʻEikí ke mou faí pea ke mou aʻusia ʻa e faʻahinga tuʻunga pē ʻokú Ne finangalo ke mou aʻusiá, neongo homou ngaahi tūkungá. (“Prophetic Invitations and Promised Blessings,” [Brigham Young University devotional, Mar. 19, 2019], 1, speeches.byu.edu)

ʻOku hokohoko atu nai hono kolea ʻe he ʻOtuá ha ngaahi meʻa faingataʻa mei Hono kakaí?

Naʻe akonaki ʻa Palesiteni Lāsolo M. Nalesoni ʻo pehē:

Kuo kole maʻu pē ʻe he ʻOtuá ki Heʻene fānau ʻo e fuakavá ke nau fai e ngaahi meʻa faingataʻá. Koeʻuhí ko e ngaahi foha mo e ʻofefine tauhi fuakava kimoutolu ʻo e ʻOtuá, ʻoku moʻui ʻi he konga kimui ʻo e ngaahi ʻaho kimui ní, ʻe kole atu e ʻEikí ke ke fai ha ngaahi meʻa faingataʻa. Te ke lava ʻo falala ki ai. …

ʻE kole atu ke mou tali ha ngaahi ngāue faingataʻa pea hoko ko ha meʻangāue ʻi he toʻukupu ʻo e ʻEikí. Pea te Ne ʻai ke ke malava ʻo fakahoko ʻa e meʻa ʻoku taʻe-malavá. (“Hoko ko ha Kau Nofotuʻi Moʻoni” [fakataha lotu fakamāmani lahi maʻá e kakai lalahi kei talavoú, 10 Sānuali 2016], Gospel Library)

Ngaahi ʻEkitivitī Fakalahi ki he Akó

1 Ngaahi Tuʻi 17:17–24. Ko e fokotuʻu ʻe ʻIlaisiā ʻa e foha ʻo e uitoú mei he maté

Mahalo ʻe ʻaonga ki he kau akó ʻenau vakai ki ha sīpinga ʻe taha ʻo e tui ʻa e uitou ʻo Salifatí ʻi he 1 Ngaahi Tuʻi 17. Te ke lava ʻo fakaafeʻi e kau akó ke lau ʻa e 1 Ngaahi Tuʻi 17:17 ke sio pe ko e hā e meʻa naʻe hoko ki he foha ʻo e uitoú. ʻE lava ke mou aleaʻi ʻa e ngaahi meʻá ni:

Ko e hā e ʻuhinga ka ngali fakaʻohovale ai ʻeni ki he uitoú?
Ko e hā ha meʻa te ke fokotuʻu ange ki he uitoú ke ne faí?

ʻE lava leva ke lau ʻe he kau akó ʻa e 1 Ngaahi Tuʻi 17:19–23 ke vakai ki he founga naʻe tali ʻaki ʻe he uitoú ʻa e tūkungá.

Ko e hā ha meʻa te tau lava ʻo ako mei he talanoa ko ʻení?

Te ke lava ʻo tokoniʻi e kau akó ke nau vakai ki hono moʻoni ʻo e ngaahi faingataʻa ʻi heʻetau moʻuí neongo ʻetau fakafeangai ʻi he tui faivelenga ki he ngaahi lea ʻa e palōfitá.

Lau ʻa e 1 Ngaahi Tuʻi 17:24, ʻo kumi e fakamoʻoni naʻe fai ʻe he uitoú hili ʻa e aʻusia ko ʻení.

Kuo fakamālohia fēfē hoʻo tui kia Sīsū Kalaisí ʻe he ngaahi faingataʻá?

Puleʻanga ʻe ua

Ko e ngaahi meʻa naʻe hoko ʻi he 1 Ngaahi Tuʻi 17 ko e ʻuluaki meʻa ia naʻe hoko ʻi he folofolá ʻe ako ʻe he kau akó ʻi he seminelí ʻa ia naʻe hoko hili hono vaeua ʻo e puleʻanga ʻIsilelí ʻi he 1 Ngaahi Tuʻi 11–12. ʻE ala tokoni ʻa e vakai fakalūkufua ko ʻení ke mahino ki he kau akó ʻa e puipuituʻa ʻo e ongo puleʻanga ʻo ʻIsileli mo Siutá.

Ke kamata ʻa e fealēleaʻaki ko ʻení, te ke lava ʻo fakaʻaliʻali ʻa e fakahokohoko ko ʻeni ʻo e meʻa naʻe hokó pea kole ki he kau akó ke nau feinga ke ʻiloʻi ʻa e taimi ʻo e Tuʻi ko Solomoné.

Hili iá ʻe lava ke lau pe fakamatalaʻi fakanounou ʻe ha taha ako ʻa e palakalafi ko ʻení.

Neongo naʻe kamata ʻa Solomone ko ha tokotaha muimui angatonu ʻo e ʻEikí, ka naʻe faifai pē peá ne fili ke talangataʻa ki he ngaahi fekau ʻa e ʻEikí. Tupu mei heʻene talangataʻá, naʻe folofola ai ʻa e ʻEikí kia Solomone ʻe ʻave ʻa e puleʻanga ʻo ʻIsilelí meiate ia ʻo foaki ki heʻene tamaioʻeiki ko Selopoamí. ʻE ʻiloa ʻa e puleʻanga ʻo Selopoamí ko e puleʻanga ʻo ʻIsilelí, ʻIfalemí, pe ko e puleʻanga fakatokelaú. ʻE hoko ʻa e foha ʻo Solomone ko Lehopoamí ko e tuʻi ki he faʻahinga ʻe ua ʻoku toé. ʻE ʻiloa ʻa e puleʻanga ʻo Lehopoamí ko e puleʻanga ʻo Siutá, pe ko e puleʻanga fakatongá (vakai, 1 Ngaahi Tuʻi 11:10–13, 26–40; 12:16–20).

ʻI hono fakaʻaongaʻi ʻo e fakamatala fakahokohokó, ʻe lava leva ke ʻiloʻi ʻe he kau akó ʻa e ongo puleʻanga mo e kau palōfita naʻa nau malanga ʻi he ongo puleʻanga ko iá pea fakamatalaʻi ʻa e meʻa ʻe iku ʻo hoko ki he puleʻanga takitaha.

Ke maʻu ha fakamatala lahi ange fekauʻaki mo e puleʻanga ʻo Siutá vakai ki he palakalafi ko ʻeni ʻoku maʻu ʻi he “Siutá” ʻi he Fakahinohino ki he Ngaahi Folofolá.

Ke maʻu ha fakamatala lahi ange fekauʻaki mo e puleʻanga ʻo ʻIsilelí vakai, “Israel, Kingdom of” ʻi he Bible Dictionary.