Tokoniʻi ʻa e kau akó ke nau feinga ʻi he ʻiloʻilo pau ke hangē ange ko Sīsū Kalaisí.

ʻOku fakaafeʻi ʻa e Laumālie Māʻoniʻoní ke fakamoʻoni ki he Tamaí mo e ʻAló pea ueʻi kitautolu ke hokohoko atu ʻetau moʻui ʻo hangē ko Kinauá, ʻi hono fakatokangaʻi ʻo e ngaahi ngāue pe ʻulungaanga ʻo Sīsū Kalaisí ʻi he niʻihi kehé pea mo hono vahevahe mo kinautolu ʻa e ʻilo ko iá. Lolotonga ʻa e kalasí, vakai ki he kau akó pea fehuʻi loto hifo, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻi he tokotaha ako ko iá?” Vahevahe ʻa e meʻa ʻokú ke ʻiloʻí ʻi ha founga ʻe tokoni ke nau ʻiloʻi ʻokú ke ʻilo ʻoku nau feinga ke hoko ʻo hangē ange ko Sīsū Kalaisí.

• Hili ʻa e sio ʻa e faiakó ʻoku fakaava ʻe Huliō ʻa e matapaá ki he kau akó, naʻá ne fehuʻi fakalongolongo pē kiate ia, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou sio ki ai ʻi he tokotaha ko ʻení?” ʻOkú ne vahevahe leva ʻa e meʻá ni: “Huliō, fakamālō atu ʻi hoʻo fakaava ʻa e matapaá maʻá e kau akó. ʻOkú ke fakamanatu mai ʻa e founga naʻe kumi ai ʻe he Fakamoʻuí ha ngaahi founga ke tokoniʻi mo faitāpuekina ʻa e niʻihi kehé.”

• ʻOku maʻu ʻe Kai ha ongoongo fekauʻaki mo ha mole ʻi hono fāmilí, pea ʻoku sio ʻa e faiakó ki hono fakafiemālieʻi ia ʻe Kalaní. ʻOku fehuʻi loto pē ʻe he faiakó, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻia Kalani?” ʻOku vahevahe leva ʻe he faiakó mo ia, “Kalani, ʻi heʻeku sio ki hoʻo talanoa mo tokoni kia Kai ʻi he ʻaho ní, naʻá ke fakamanatu mai kiate au ʻa e founga naʻe fakaʻaongaʻi ai ʻe Sīsū ha taimi ke feohi taha taha ai mo e niʻihi kehé. Fakamālō atu ʻi hoʻo fai ʻa e meʻa naʻá Ne mei faí.”

1. Fili ha tokotaha ako ʻi hoʻo kalasí pea fehuʻi, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻi he tokotaha ko ʻení?” Teuteuʻi ʻa e meʻa te ke lea ʻaki ki he tokotaha akó pea vahevahe mo ia ʻa e tōʻongá pe ʻulungāngá.

2. Fili ha tokotaha ako ʻe taha pea fehuʻi, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻi he tokotaha ko ʻení?” Teuteu ʻa e meʻa te ke lea ʻaki ki he tokotaha akó, pea vahevahe leva ʻa e ʻulungāngá mo ia.

• ʻE founga fēfē hano fakaafeʻi ʻo e kau akó ke hokohoko atu ʻenau feinga ke hangē ko Sīsū Kalaisí ʻi hoʻo vakai ki he ngaahi ʻulungaanga faka-Kalaisi ʻi he kau akó pea vahevahe mo kinautolu hoʻo ngaahi fakakaukaú?

• Kamata ʻaki hano fili ha toko taha pe ua ʻo e kau akó ʻi he ʻaho. Vakaiʻi pea vahevahe mo kinautolu ʻa e founga ʻokú ke fakatokangaʻi ai ʻenau anga faka-Kalaisi angé. Hokohoko atu ʻeni kae ʻoua kuo hoko ko ha meʻa angamaheni.

• 2 Nīfai 25:26

• Chad H Webb, “ʻOku Mau Lea ʻia Kalaisi, ‘Oku Mau Fiefia ʻia Kalaisi” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2018), broadcasts.ChurchofJesusChrist.org

Hili hono ʻiloʻi ha ngaahi ngāue pe ʻulungaanga ʻo Sīsū Kalaisí, te ke lava ʻo tokoniʻi hoʻo kau akó ke nau feinga ke muimui ʻi Heʻene sīpingá ʻi heʻenau moʻui fakatāutahá. Ko e founga ʻe taha te ke lava ai ʻo tokoniʻi hoʻo kau akó ko hono ʻai ke nau fakakaukau ki he ngaahi meʻa ʻe tolu ko ʻení:

1. Ko ha taha te nau lava ʻo tāpuekina ʻaki ha ngāue pe ʻulungaanga faka-Kalaisi.

2. Ko ha meʻa te nau lava ʻo fai ke tāpuekina ai ʻa e tokotaha ko iá ʻaki ʻa e ngāue pe ʻulungaanga faka-Kalaisí.

3. Ko ha taimi te nau lava ʻo fai ai ia.

ʻI he taimi ʻoku fakakaukau ai hoʻo kau akó ki he ngaahi ueʻi ko ʻení, ʻe lava ke tokoniʻi kinautolu ʻe he Laumālie Māʻoniʻoní ke nau feinga fakamātoato ange ke muimui ʻi he sīpinga ʻa Sīsū Kalaisí mo fakatupulaki ʻenau holi ke ngāué.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Hili hono ʻiloʻi mo aleaʻi ʻa e ʻulungaanga faka-Kalaisi ʻo e angaʻofá, ʻoku fakaafeʻi ʻe he faiakó ʻa e kau akó ke nau fakalaulauloto mo hiki ʻenau tali ki he ngaahi fehuʻi ko ʻení:

1. Ko hai ʻokú ke ʻiloʻi ʻoku fiemaʻu ke ne aʻusia ʻa e angaʻofa ʻa Sīsū Kalaisí?

2. Ko e hā te ke lava ʻo fai ke tokoniʻi kinautolu ke nau ongoʻi ʻa e angaʻofa ʻa e Fakamoʻuí?

3. Ko e fē te ke lava ʻo fakahoko ai iá?

ʻI he ngaahi ʻulungaanga pe tōʻonga faka-Kalaisi takitaha ko ʻení, hiki ha fehuʻi te ke lava ʻo ʻeke ki hoʻo kau akó te ne fakaafeʻi kinautolu ke muimui ʻi he sīpinga ʻa e Fakamoʻuí:

• ʻOfá

• ʻI he folofola ʻa e Fakamoʻuí, “E Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34)

• Ko ha ngāue pe ʻulungaanga ʻo e Fakamoʻuí ʻi ha lēsoni ka hoko mai

• Ko e hā naʻá ke ako ʻi hoʻo akoako fakaafeʻi ʻa e kau akó ke kumi ha ngaahi founga ke muimui ai ki he sīpinga ʻa Sīsū Kalaisí?

• Ko e hā ʻe hoko ki hoʻo kau akó ʻi hoʻo fakaafeʻi maʻu pē kinautolu ke ʻiloʻi ʻa e ngaahi founga te nau lava ai ʻo muimui ki he sīpinga ʻa e Fakamoʻuí?

• Tuku ha taimi lolotonga hono teuteuʻi hoʻo ngaahi lēsoni hokó ke faʻu ha ngaahi fehuʻi ʻokú ne poupouʻi ʻa e kau akó ke muimui ki he sīpinga ʻa Sīsū Kalaisí ʻi ha taimi pē te ke ʻiloʻi ai ha taha ʻo Hono ngaahi ʻulungāngá pe tōʻongá.

• Gerrit W. Gong, “Ko e Ngāue Fakaetauhí,” Liahona, Mē 2023, 16–19