Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Akoako Fakataukei Fakatokāteline 5: Ako Maʻuloto ʻo e Ngaahi Potufolofolá mo Hono Fakaʻaongaʻi e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié

“Akoako Fakataukei Fakatokāteline 5: Ako Maʻuloto ʻo e Ngaahi Potufolofolá mo Hono Fakaʻaongaʻi e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié,” Fuakava Motuʻá – Tohi Lēsoni ʻa e Faiako Seminelí (2026)

1 Samuela 17–18; 24–26; 2 Samuela 5–7: Lēsoni 76

Akoako Fakataukei Fakatokāteline 5

Ako Maʻuloto ʻo e Ngaahi Potufolofolá mo Hono Fakaʻaongaʻi e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié

ʻE lava ke tokoni ʻa e fakataukei fakatokāteliné ki he kau akó ke langa ʻenau moʻuí ʻi he makatuʻunga ʻo Sīsū Kalaisí mo ʻEne ongoongoleleí. ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e ngaahi kupuʻi lea fakafolofola mahuʻinga ʻi he ngaahi potufolofola fakataukei fakatokāteliné pea fakaʻaongaʻi e ngaahi tefitoʻi moʻoni fakalangi ki hono maʻu ʻo e ʻilo fakalaumālié.

Teuteu ʻa e tokotaha akó: Fakakaukau ke fakaafeʻi e kau akó ke nau fili mo kamata ako maʻuloto ha potufolofola fakataukei fakatokāteline. ʻE lava ke hoko ʻa e polokalama Fakataukei Fakatokāteliné ko ha maʻuʻanga tokoni ʻaonga. ʻE lava ke maʻu ha lisi ʻo e ngaahi potufolofolá ʻi he Fakamatala ki he ʻElito ʻo e Fakataukei Fakatokāteliné (2023).

Ngaahi ʻEkitivitī Ako ʻOku Ala Fakahokó

Toe vakaiʻi ʻo e fakataukei fakatokāteliné: Ako Maʻulotó

Te ke lava ʻo kamata e kalasí ʻaki hono tokoniʻi e kau akó ke nau vakai ki he mahuʻinga ʻo hono ako maʻuloto ʻo e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻingá. Ko e founga ʻe taha ke fakahoko ai ʻení ko hono ʻeke e ngaahi fehuʻi ko ʻení.

Ko e hā ʻa e ʻuluaki meʻa ʻokú ke manatuʻi naʻá ke ako maʻulotó? ʻOkú ke kei ʻiloʻi nai ia?
Kuó ke ako maʻuloto nai ha potufolofola? Ko e hā hono lelei ʻo hono ako maʻuloto iá?
Te ke lava nai ʻo fakakaukau ki ha ngaahi taimi naʻe folofola maʻuloto ʻaki ai ʻe he Fakamoʻuí ʻa e folofolá?

Kapau ʻe fiemaʻu, fakamanatu ki he kau akó naʻe fakaʻaongaʻi ʻe Sīsū Kalaisi ʻa e folofolá ʻi ha ngaahi tūkunga kehekehe, hangē ko e taimi naʻe ʻahiʻahiʻi ai Ia ʻe Sētané (vakai, Mātiu 4:4, 7, 12), ʻi he taimi naʻe fai ange ai kiate Ia ha ngaahi fehuʻi faingataʻá (vakai, Mātiu 9:13; 15:4, 7–9; Maʻake 10:7–8), pea mo e taimi naʻá Ne akoʻi ai ʻa e kau Nīfaí (vakai, 3 Nīfai 22; 24–25).

Ke tokoni ke ako maʻuloto ʻe he kau akó ʻa e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻingá, fakakaukau ke fai ʻeni. Pe fili ha ʻekitivitī ako maʻuloto ʻe taha mei he “Ngaahi ʻEkitivitī Fakamanatu ʻo e Fakataukei Fakatokāteliné” ʻi he fakamatala fakalahí.

Fakaʻaliʻali ha lisi ʻo e ngaahi potufolofola fakataukei fakatokāteline kuo ako ʻe he kau akó. Fakaafeʻi e kau akó ke fili ha potufolofola te nau fie ako maʻuloto. Hili iá pea fakaafeʻi e kau akó ke fakakakato ʻeni.

Hiki ʻa e potufolofola fakataukei fakatokāteliné mo e kupuʻi lea mahuʻingá ʻi hoʻo tohinoá (ko e lelei tahá ke hiki peni vahevahe). Lau leʻolahi leva ia kiate koe. Hili hono laú, tamateʻi pe kohiʻi ha foʻi lea pe mataʻifika ʻe taha pe ua. Toe lau leʻolahi ia. Toutou fai ʻeni kae ʻoua kuó ke tamateʻi kotoa e ngaahi foʻi leá mo e fiká. Pea vakai pe te ke lava ʻo hiki maʻuloto ʻa e potufolofolá mo e kupuʻi lea mahuʻingá.

Kapau ʻoku ʻi ai ha taimi feʻunga, ʻe lava ke toe fai ʻe he kau akó ʻa e meʻa tatau mo ha potufolofola ʻe taha.

Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié

Fakakaukau ki he tūkunga ko ʻení:

ʻOku kau ʻa Siō ki ha kulupu ʻo ha ngaahi kaungameʻa ʻoku nau faʻa taʻeʻofa ki he niʻihi kehe ʻi he akó pea ʻi he mītia fakasōsialé. ʻOku nau fakakaukau ko e meʻa ʻoku nau faí ʻoku fakaoli mo fakafiefia. ʻI ha ʻaho ʻe taha, naʻe sio ʻa Siō ki hano fakamataliliʻi hono kiʻi tuofefiné. ʻOkú ne lava ʻo sio ki he mamahi hono tuofefiné. ʻOkú ne hohaʻa pe ʻe uesia fēfē ia ʻe he houtamaki fakamamahí. ʻOku fakatupu ʻe he mamata ʻa Siō ki hono fakamamahiʻi hono tuofefiné ke ne fakatokangaʻi ha meʻa kuo teʻeki ke ne fakatokangaʻi kimuʻa. ʻOkú ne fakatokangaʻi ʻa e ongo ʻokú ne fakatupu mo hono ngaahi kaungāmeʻá ki he niʻihi kehé. ʻOkú ne ongoʻi loto-foʻi mo fifili pe ko e hā ʻoku totonu ke ne fai ʻi he taimi ní.

Ko e hā ha ngaahi fili faingataʻa fekauʻaki mo e founga ʻoku totonu ke ne fai ʻe Siō ki he niʻihi kehé ʻe ala fakakaukau ke ne fai? Ko e hā e ʻuhinga ʻe ala faingataʻa ai ke fakahoko e ngaahi liliu ko ʻení?

Ke tokoni ke fakaʻaongaʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié ki he tūkungá, te ke lava ʻo fakaafeʻi kinautolu ke nau fai ʻeni.

Fili ha taha ʻo e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié ʻokú ke pehē ʻe ala ʻaonga kia Sioó. Fakakakato ʻa e ʻekitivitī ʻi lalo ʻoku fekauʻaki mo e tefitoʻi moʻoni naʻá ke filí.

Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

Hiki ha lisi ʻo e meʻa kotoa pē ʻokú ke pehē ʻe finangalo ʻa e Tamai Hēvaní ke ʻiloʻi ʻe Sioó. Fakakaukau ki he ngaahi akonaki ʻo e folofolá hangē ko e Sēnesi 1:26–27 mo e 1 Samuela 16:7 ʻe lava ʻo tokoni ke tonu ange ʻene vakai kiate ia mo e niʻihi kehé.

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

Hiki ha lisi ʻo e ngaahi folofolá pe ngaahi lea ʻi he konifelenisi lahí ʻe lava ke ako ʻe Siō ke tokoniʻi ia ke ne fili ke fakatomala mo liliú.

Te ke lava ʻo ʻalu ki he tab Konifelenisi Lahí ʻi he Gospel Library. ʻAlu ki he “Ngaahi Tefitó,” pea fili ha tefito ʻoku fekauʻaki mo e tūkunga ʻo Sioó, hangē ko e ʻofa faka-Kalaisí, manavaʻofá, faʻifaʻitakiʻangá, pe fakatomalá. Vakai ki ha lea pea kumi ha fakamatala te ne lava ʻo fakamālohia pe fakahinohinoʻi ʻa Siō.

Kapau ʻokú ke fiemaʻu tokoni ʻi hono kumi ha potufolofola, te ke lava ʻo toe vakaiʻi ʻa e ngaahi potufolofola fakataukei fakatokāteliné.

Ngāue ʻi he tuí

Ke fakahaaʻi e meʻa ʻe lava ke fai ʻe Sioó, faʻu ha kiʻi laʻipepa fakatātā ʻoku ʻi ai ha ʻīmisi ʻe tolu ki he ono ʻoku nau fakatātaaʻi e founga ʻe lava ai ʻa Siō ʻo ngāue ʻi he tui kia Sīsū Kalaisí. Fakakaukau ki he founga ʻe lava ke fakaʻaongaʻi ai ʻe Siō ʻene ʻilo kia Sīsū Kalaisí, ko ha konga ʻo hoʻo kiʻi laʻipepa fakatātaá.

Ngaahi ʻEkitivitī Fakalahi ki he Akó

Ngaahi tūkunga kehé

Te ke lava ʻo fakaʻaongaʻi ha talanoa naʻe fai ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá, ko ha fetongi ʻo e ngaahi tūkunga ʻi he lēsoní. ʻI he talanoá, naʻe fili ha kiʻi tamasiʻi ke angaʻofa hili ʻene mamata ki he mamahi naʻe fakatupu ʻe heʻene ngaahi tōʻongá ki hano kaungāako. Te ke lava ʻo mamata ʻi he konga ʻuluakí (mei he 5:21 ki he 6:05), pea tuku leva ki he kau akó ke nau ngāueʻi e ngaahi tefitoʻi moʻoni ki hono maʻu ʻo e ʻilo fakalaumālié. Hili iá, te ke lava ʻo fakaʻaliʻali ʻa e konga hono uá (6:05 ki he 6:56), kae kumi ʻe he kau akó ʻa e founga naʻe fakaʻaongaʻi mo ʻaonga ai ki he tamasiʻí hono fakaʻaongaʻi ha taha ʻo e ngaahi tefitoʻi moʻoni ko iá.

Konga 1

15:10

Konga 2

15:10

Ko ha founga ʻe taha ko hono ako ʻa e tūkunga ko ʻení. ʻE lava ke tānaki atu ʻe he kau akó ha ngaahi fakaikiiki ʻo fakaʻaongaʻi ʻa e ngaahi fehuʻi ʻoku ʻoatú.

ʻOku fifili ʻa (fakahū ʻa e hingoá) pe ʻoku totonu nai ke ne ngāue fakafaifekau taimi kakato pe tokanga taha pē ki hono vahevahe fakalūkufua ʻo e ongoongoleleí.

Ko e hā e ʻuhinga ka fiemaʻu ai ʻe he tokotahá ni ke ngāue fakafaifekau taimi kakató?
Ko e hā e ʻuhinga ka ne hohaʻa ai fekauʻaki mo e ngāue fakafaifekau taimi kakató?

ʻE lava ke fakaʻaongaʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié ke tali ʻaki e palopalema ʻa e fakafoʻituituí. ʻE lava ke tokoni ʻa e ngaahi potufolofola fakataukei fakatokāteline ko ʻení: Mōsese 1:39; ʻĒpalahame 2:9–11; Sosiua 24:15.