Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

1 Samuela 17: Tēvita mo Kolaiate

“1 Samuela 17: Tēvita mo Kolaiate,” Fuakava Motuʻá – Tohi Lēsoni ʻa e Faiako Seminelí (2026)

“1 Samuela 17: Tēvita mo Kolaiate,” Fuakava Motuʻá – Tohi Lēsoni ʻa e Faiako Seminelí

1 Samuela 17–18; 24–26; 2 Samuela 5–7: Lēsoni 74

1 Samuela 17

Tēvita mo Kolaiate

The boy David (from the Old Testament) is bent over with his slingshot in his left hand. Goliath, in full armor, is falling back as the stone hits him. The army can be seen in the background.

ʻI he taimi naʻe ʻalu ai ʻa Tēvita ke tau mo Kolaiaté, ko ha “tamasiʻi pē” ʻa Tēvita ʻo ne hanga atu kia Kolaiate, ko ha “tangata tau pē ia talu ʻene kei siʻí” (1 Samuela 17:33). Ka neongo ia, naʻe ʻiloʻi ʻe Tēvita ʻe ʻiate ia ʻa e ʻEikí, ʻa ia naʻe liliu lahi ʻaupito ai e meʻa kotoa. ʻI he ʻaho ní, te tau lava ʻo maʻu ha mālohi ʻi hotau ngaahi faingataʻaʻiá ʻi heʻetau kau fakataha mo Sīsū Kalaisi ke fehangahangai mo kinautolú. ʻE lava ke tokoni ʻa e lēsoni ko ʻení ke falala ʻa e kau akó ki he ʻEikí ʻi heʻenau fehangahangai mo honau ngaahi faingataʻaʻiá.

Teuteu ʻa e tokotaha akó: Fakaafeʻi e kau akó ke fakakaukau ki ha ngaahi tūkunga ʻe ala fiemaʻu ai ke fakahaaʻi ʻe ha toʻu tupu ha loto-toʻa. ʻE lava ke kole ʻe he kau akó ki ha mēmipa ʻo e fāmilí pe kaungāmeʻa ha ngaahi aʻusia kuo nau maʻu ʻa ia ʻoku fiemaʻu ki ai ʻa e loto-toʻá.

Ngaahi ʻEkitivitī Ako ʻOku Ala Fakahokó

Ko Hoku Kolaiaté

Kimuʻa pea kamata e kalasí, fakakaukau ke fakapipiki ha meʻi tepi pe kohiʻi ha peni fakaʻilonga ʻi he holisí ke fakaʻilongaʻi ʻa e lōloa ʻo Kolaiaté (meimei fute ʻe 9 ʻinisi ʻe 9, pe mita ʻe 3).

Fakaʻaliʻali ʻa e fakatātā mei he kamataʻanga ʻo e lēsoní.

Ko e hā e meʻa ʻokú ke ʻilo fekauʻaki mo e talanoa ʻo Tēvita mo Kolaiaté?

Fakaafeʻi ha niʻihi ʻo e kau akó ke nau tuʻu ʻo fakafehoanaki honau māʻolungá mo e māʻolunga ʻo Kolaiaté ʻi he holisí. Poupouʻi ke nau fakakaukauloto pe ʻe fēfē ha fehangahangai mo Kolaiate ʻi ha tau tautau toko taha mo ia.

Tā ha fakatātā lahi ʻi he palakipoé ʻo Kolaiate. Fakahingoa ia ko e Ko Hotau Ngaahi Faingataʻaʻiá. Fakaafeʻi e kau akó ke hiki e ngaahi faingataʻa ʻoku fehangahangai mo e toʻu tupú ʻi he tafaʻaki ʻo e fakatātā lahi ʻi he palakipoé.
Ko e hā ha ngaahi faingataʻa—lalahi pe iiki—ʻoku fehangahangai mo e toʻu tupú ʻi he ʻahó ni?

Hili hono hiki ʻe he kau akó ha ngaahi faingataʻa ʻi he palakipoé, fakaafeʻi kinautolu ke tā ha fakatātā lahi ʻi heʻenau tohinoa akó pea fakahingoa ia ko e Ko Hoku Faingataʻaʻiá. ʻE lava ke hiki ʻe he kau akó ha faingataʻa fakataautaha ʻi he tafaʻaki ʻo ʻenau fakatātaá. Fakaafeʻi e kau akó ke fakalaulauloto fakalongolongo ki he ngaahi meʻá ni:

Fakalaulauloto ki ha faʻahinga faingataʻa pē te ke ala maʻu ʻi hoʻo moʻuí. Fili ha faingataʻa ʻe taha ke ke tokanga taha ki ai ʻi he ʻahó ni. Fakakaukau ki he loto-falala ʻokú ke maʻu ʻe lava ke tokoniʻi ai koe ʻe he ʻEikí ʻi he faingataʻa ko ʻení. Lekooti hoʻo ngaahi fakakaukaú ʻi hoʻo tohinoá.

ʻI hoʻo ako ʻa e 1 Samuela 17, fakaafeʻi ʻa e Laumālie Māʻoniʻoní ke tokoni atu ke ke ʻiloʻi ʻa e founga te ke lava ai ʻo fakaafea e tokoni ʻa e Fakamoʻuí ke ke fehangahangai mo ho faingataʻaʻiá.

Tuí kae ʻikai ko e ilifiá

Ke tokoni ke mahino ki hoʻo kau akó ʻa e puipuituʻa ʻo e talanoa ko ʻení, te ke lava ʻo vahevahe ha faʻahinga fakaikiiki mei he palakalafi ko ʻení naʻe ʻikai vahevahe ʻe he kau akó ʻi he kamataʻanga ʻo e lēsoní.

Naʻe tau ʻa ʻIsileli mo e kau Filisitiá. Naʻe fai ʻe ha tangata toʻa Filisitia ko Kolaiate ha pole. Naʻá ne pehē kapau ʻe ikunaʻi ia ʻe ha taha ʻo e kau ʻIsilelí ʻi ha fehangahangai tuʻo taha pē, ʻe tukulolo leva ʻa e kau Filisitiá pea nau hoko ko e kau tamaioʻeiki ki ʻIsileli. Ka ʻo kapau ʻe ikuna ʻa Kolaiate, ʻe hoko ʻa ʻIsileli ko ha kau tamaioʻeiki ki he kau Filisitiá. ʻI ha ʻaho ʻe 40, naʻe haʻu ʻa Kolaiate ʻo poleʻi e kakai ʻIsilelí ke nau tau. Naʻe manavahē ʻa e Tuʻi ko Saulá mo e kau tau ʻa ʻIsilelí. Naʻe haʻu ʻa Tēvita ke ʻave ha meʻakai ki hono ngaahi taʻoketé ʻa ia ko ha kau sōtia ʻi he taú. Naʻá ne fanongo ki he pole ʻa Kolaiate ki he kau tau ʻa ʻIsilelí (vakai, 1 Samuela 17:1–25).

Lau ʻa e 1 Samuela 17:26, ʻo kumi e tali ʻa Tēvita ʻi heʻene fanongo ki he pole ʻa Kolaiate ki he kau tau ʻa ʻIsilelí.

Ko e hā e meʻa ʻoku makehe kiate koe ʻi he tali ʻa Tēvitá?

Ke tokoni ke ako ʻe he kau akó ʻa e ngaahi veesi ko ʻení, te ke lava ʻo fakaafeʻi ha kau ako ʻe toko tolu ʻe loto-fiemālie ke lau ʻa e ngaahi konga ʻo e Tuʻi ko Saulá, Tēvitá, mo e tokotaha fakamatalá.

Lau ʻa e 1 Samuela 17:31–37, ʻo kumi e ʻuhinga naʻe fuʻu loto-falala ai ʻa Tēvita ki he “ʻOtua moʻuí” (veesi 36).

Ko e hā e meʻa naʻe ako ʻe Tēvita fekauʻaki mo e ʻEikí naʻá ne maʻu ai ha loto-falala ke tau mo Kolaiaté?

ʻI hono tokoniʻi e kau akó ke nau fakamatalaʻi e ngaahi tefitoʻi moʻoni fakauluí ʻi he lea pē ʻanautolú, ʻe lava ke ne fakaloloto ange ʻenau mahino ki he folofolá mo e ngaahi lea ʻa e kau palōfitá. Ko e founga ʻe taha ke fai ai ʻení ko hono fai ha ngaahi fehuʻi vakaiʻi hili hano vahevahe ʻe ha tokotaha ako ha fakamatala. Ko ha sīpinga ʻa e fehuʻi ko ʻení.

(Ki ha ako lahi ange ʻi hono tokoniʻi ʻo e kau akó ke fakamatalaʻi ʻa e ngaahi tefitoʻi moʻoni fakauluí, vakai, “Tukutaha e tokangá ki he ngaahi moʻoni ʻoku nau tataki ki he uluí mo langaki ʻa e tui kia Sīsū Kalaisí” ʻi he Fakatupulaki ʻa e Ngaahi Taukei ʻa e Faiakó.)
ʻE tokoniʻi fēfē kitautolu ʻe he meʻa naʻe ako ʻe Tēvita fekauʻaki mo e ʻEikí ʻi heʻetau fehangahangai mo hotau ngaahi faingataʻaʻiá?

Ko e tefitoʻi moʻoni ʻe taha ʻe ala fakamatalaʻi ʻe he kau akó ʻi he lea pē ʻanautolú ko e taimi ʻoku tau falala ai ki he ʻEikí, te Ne tokoniʻi kitautolu ke tau fehangahangai mo hotau ngaahi faingataʻaʻiá.

Falala ki he ʻEikí

Lau ʻa e 1 Samuela 17:38–51, ʻo kumi e ngaahi founga naʻe fakafalala ai ʻa Tēvita ki he ʻEikí ʻi heʻene fehangahangai mo Kolaiaté. Fakakaukau ke fakaʻilongaʻi ʻa e meʻa ʻokú ke maʻú.

Naʻe fakahaaʻi fēfē ʻe Tēvita naʻá ne falala ki he ʻEikí?

ʻE lava ke tali e kau akó ʻaki ha ngaahi tali kehekehe, hangē ko e taimi naʻe vete ai ʻe Tēvita e teunga tau ʻa e tuʻí pea fili ha ngaahi foʻi maka mo ha maka tā ko ha meʻataú (veesi 39–40) pe ko e taimi naʻá ne fakamoʻoni ai kia Sīsū Kalaisí (veesi 45–47). Kole ki he kau akó ke fakamatalaʻi ʻa e founga naʻe fakahaaʻi ai ʻe he ngāue takitaha ʻa e founga naʻe falala ai ʻa Tēvita ki he ʻEikí.

Ko e fehangahangai mo hotau ngaahi faingataʻaʻiá

Fakakaukau ke fakaʻaliʻali ha foʻi maka ʻe nima pe tā ha foʻi maka ʻe nima ʻi he palakipoé (vakai, 1 Samuela 17:40). ʻE lava ke fakafofongaʻi ʻe he ngaahi foʻi maka ko ʻení ha ngaahi founga te tau lava ai ʻo falala ki he ʻEikí ʻi heʻetau fehangahangai mo hotau ngaahi faingataʻaʻiá. Fakakaukau ke vahevahe ʻa e kau akó ki ha ngaahi hoa pe ngaahi kulupu iiki ke muimui ʻi he ngaahi fakahinohino ʻi laló. Te nau lava ʻo hiki ʻenau ngaahi talí ʻi he palakipoé ʻi he tafaʻaki ʻo e ngaahi foʻi maká.

Fili ha taha ʻo e ngaahi faingataʻa ʻoku hiki ʻi he palakipoé ʻi lalo ʻi he Ko Hotau Ngaahi Faingataʻaʻiá.

Feinga ke ʻiloʻi ha founga ʻe nima, tautautefito ki he faingataʻa naʻá ke filí, ʻa ia ʻe lava ke falala ai ha taha ki he Tamai Hēvaní mo Sīsū Kalaisi ʻi heʻene fehangahangai mo e faingataʻa ko ʻení. Fakamatalaʻi ʻa e ʻuhinga naʻá ke fili ai ʻa e ngāue takitaha.

Fakaafeʻi ha kau ako ʻe loto-fiemālie ke vahevahe ʻa e meʻa ne nau aleaʻí.

Kuo tokoniʻi fēfē koe pe ko ha taha ʻokú ke ʻiloʻi ʻe he Tamai Hēvaní mo Sīsū Kalaisi ke fehangahangai mo ha faingataʻa?
Ko e hā ha ngaahi ngāue naʻá ke fai pe ko e tokotaha ko iá ke maʻu ʻEna tokoní?

Naʻe fakamoʻoni ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ki he founga ʻe lava ke tokoniʻi ai kitautolu ʻe Sīsū Kalaisi ke fehangahangai mo e ngaahi faingataʻá:

14:11

Kapau naʻe tuʻu ʻi heni e Fakamoʻuí ʻi he ʻahó ni, te Ne fakahaaʻi mai ʻEne ʻofa taʻe fakangatangata ʻiate koé, mo ʻEne falala kakato kiate koé. Te Ne talaatu te ke lava ke fai ʻeni. Te ke lava ʻo langa ha moʻui fonu ʻi he fiefiá mo e nēkeneká, koeʻuhí ko Sīsū Kalaisi hoʻo mālohingá. (“Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 12)

Ko e hā e meʻa ʻokú ke ʻilo fekauʻaki mo Sīsū Kalaisi ʻe lava ʻo tokoni ke ke fehangahangai mo ho ngaahi faingataʻaʻiá ʻi he loto-falala lahi ange kiate Ia?

Fehangahangai mo Hotau Kolaiate fakatāutahá

Fakaʻaliʻali e ngaahi fakahinohino ko ʻení.

Fakakaukau ki he faingataʻa fakataautaha naʻá ke tohi fekauʻaki mo ia kimuʻa ʻi hoʻo tohinoá. Fekumi ki ha ngaahi ueʻi mei he Laumālie Māʻoniʻoní ke tokoni atu ke ke fili ha founga ʻe taha te ke lava ai ʻo falala ki he ʻEikí ke fehangahangai mo e faingataʻa ko iá.

Tā ha foʻi maka ʻe taha pe lahi ange ʻi hoʻo tohinoa akó. Hiki ʻa e meʻa te ke faí mo e founga te ke fakahoko ai iá ʻi he tafaʻaki pe ʻi loto ʻi he ngaahi foʻi maká.

Fakaafeʻi e kau akó ke vahevahe.

Fakamoʻoni ki he malava mo e holi ʻa e Fakamoʻuí ke tokoniʻi e kau akó ʻi honau ngaahi faingataʻaʻiá. Fakahaaʻi hoʻo falala ki he ivi malava hoʻo kau akó ke fehangahangai mo honau ngaahi faingataʻaʻiá fakataha mo Sīsū Kalaisí.

Ngaahi Maʻuʻanga Tokoni Kehé

ʻE tokoniʻi fēfē kitautolu ʻe he Fakamoʻuí ʻi hotau ngaahi faingataʻaʻiá ʻi heʻetau falala kiate Iá?

Naʻe pehē ʻe ʻEletā Kala B. Kuki ʻo e Kau Fitungofulú:

11:5

ʻE tatau ai pē pe ko e hā ʻa e lahi, tuʻunga mo e mamafa ʻo e ngaahi faingataʻa ʻoku tau foua ʻi he moʻuí, ʻoku ʻi ai ʻa e ngaahi taimi ʻoku tau ongoʻi ke kiʻi mālōlō, mavahe, hola, pe ngalingali foʻi. Ka ʻi hono fakaʻaongaʻi ʻa e tui ki hotau Fakamoʻui ko Sīsū Kalaisí, ʻe tokoniʻi ai ke tau ikunaʻi ʻa e loto-foʻí ʻo tatau ai pē pe ko e hā ʻa e ngaahi faingataʻa ʻoku tau fehangahangai mo iá. (“Kātaki ʻo Hokohoko Atu—ʻi he Tui,” Liahona, Mē 2023, 15)

Naʻe vahevahe ʻe Sisitā Tamala W. Lūnia ʻo e Kau Palesitenisī Lahi ʻo e Kau Finemuí ʻo pehē:

11:30

ʻOku ou fakamoʻoni ʻoku maʻu ʻe he Fakamoʻuí ʻa e ivi malava ke liliu ha faʻahinga ʻahiʻahi faingataʻa pē ʻokú ke foua ke hoko ko ha tāpuaki, koeʻuhí ko ʻEne Fakaleleí. Kuó Ne talaʻofa mai “ʻaki ʻa e fuakava taʻe-faʻa-liliu” ko e taimi te tau fāifeinga ai ke ʻofa mo muimui kiate Iá, “ʻe fengāueʻaki fakataha ʻa e ngaahi meʻa kotoa pē ʻa ia kuo fakamamahiʻi ʻaki ʻa [kitautolú] koeʻuhi ko [ʻetau] leleí” [Tokāteline mo e Ngaahi Fuakava 98:3; naʻe tānaki atu hono fakamamafaʻí]. ʻA e ngaahi meʻa kotoa pē. (“Vakai ki he Fāmili ʻo e ʻOtuá ʻi he Vakai Fakalūkufuá,” Liahona, Nōvema 2023, 68)

Ko e hā mo ha toe meʻa te u lava ʻo ako mei he talanoa ʻo Tēvita mo Kolaiaté?

Naʻe fakamatala ʻa Palesiteni Kamila N. Sionisoni, ko e Palesiteni Lahi ʻo e Fineʻofá, ʻo pehē:

10:8

Ke ikunaʻi ʻe Tēvita ʻa Kolaiaté, naʻe pau ke fepaki ʻa e kiʻi tamasiʻí mo e saienití. Ko e moʻui fiemālie naʻe mei maʻu ʻe Tēvitá ko haʻane foki ki he tauhi ʻo e fanga sipí. Ka, naʻá ne fakakaukau ki heʻene aʻusia ʻi hono fakahaofi ʻo e fanga lamí mei ha laione mo ha peá. Pea mei he ngaahi meʻa fakaloto-toʻa ko iá, naʻá ne maʻu e tui mo e loto-toʻa ke tuku ke tataki ʻe he ʻOtuá ʻene moʻuí. … ʻI hono maʻu ʻe Tēvita ha holi ke tuku ke lāngilangiʻia ʻa e ʻOtuá, mo fanongo ki he Laumālie Māʻoniʻoní, pea loto-fiemālie ke tuku ke hoko ʻa e Fakamoʻuí ko e kamataʻanga mo e ngataʻanga ʻo ʻene moʻuí, naʻá ne ikunaʻi ai ʻa Kolaiate pea fakahaofi ʻa hono kakaí.

Ko hono moʻoní, ʻoku fakaʻatā kitautolu ʻe he tefitoʻi moʻoni ʻo e tauʻatāina ke filí ke tau fakakaukauʻi ʻetau moʻuí—naʻe mei foki ʻa Tēvita ia ki ʻapi, ki hono tokangaʻi ʻo e fanga sipí. Ka ʻoku mateuteu ʻa Sīsū Kalaisi ke fakaʻaongaʻi kitautolu ko ha ngaahi meʻangāue fakalangi, ko ha kau tamaioʻeiki ʻaonga ʻi Hono toʻukupú, ke fakahoko ʻEne palani ki heʻetau moʻuí! ʻOkú Ne ʻaloʻofa ke fakaʻaongaʻi au ko e vaivaí, ko ha meʻangāue ʻi Hono toʻukupú, ʻo kapau ʻoku ou maʻu e tuí ke tuku ke Ne hoko ko e kamataʻanga ʻo ʻeku moʻuí. (“Fakaafeʻi ʻa Kalaisi ko e Kamataʻanga Hoʻo Moʻuí,” Liahona, Nōvema 2021, 81)

Fēfē kapau ʻe kei faingataʻa pē ʻa e ngaahi polé, pea naʻa mo ʻeku ngāue ʻaki ʻa e tui kia Sīsū Kalaisí?

Naʻe akonaki ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

He ʻikai ʻaupito teitei mole ʻa e ʻamanaki leleí ia. Kapau he ʻikai hoko mai leva mo kakato e ngaahi mana ko iá pe hangehangē ka ʻikai pē ke hoko maí, manatuʻi ʻa e sīpinga ne tā ʻe he Fakamoʻuí Heʻene mamahí: kapau he ʻikai fakalaka ʻa e ipu mahí meiate koe, inu ia peá ke toʻa, ʻo falala ʻoku ʻi ai ha ngaahi ʻaho fakafiefia ʻoku toka mei muʻa. …

Tau manatuʻi foki neongo ha faʻahinga puke pe faingataʻa, ʻoku kei huluʻānoa e ngaahi meʻa ʻi he moʻuí ke fakatuʻamelie mo houngaʻia aí. (“Hangē ha Ipu Kuo Maumaú,” Liahona, Nōvema 2013, 41, 42)

Ngaahi ʻEkitivitī Fakalahi ki he Akó

Fakamatala ʻoku ʻoatú

Fakakaukau ke vahevahe ʻa e fakamatala ko ʻení ʻi he kamataʻanga ʻo e lēsoní ko ha konga ʻo e fealēleaʻaki fekauʻaki mo hotau ngaahi faingataʻaʻiá.

Naʻe akoʻi ʻe Palesiteni Tōmasi S. Monisoni (1927–2018):

ʻOku ʻi ai koā ha Kolaiate ʻi hoʻo moʻuí? ʻOku ʻi ai ha Kolaiate ʻi heʻeku moʻuí? ʻOkú ne tuʻu maʻu nai ʻi he vahaʻa ʻoʻoú mo e fiefia ʻokú ke fiemaʻú? Mahalo he ʻikai fute ʻe hongofulu … hoʻo Kolaiaté, ka ʻoku ngalingali ʻe ngali faingataʻa tatau pe. …

… ʻOku ʻikai tāumamaʻo e tokoni ʻa e ʻOtua Mafimafí. Ko e hā ʻa e meʻa te tau faí? … Kuo pau ke ikunaʻi hotau faingataʻaʻiá, ʻa hotau Kolaiaté. (“Meeting Your Goliath,” New Era, June 2008, 5)

Tēvita ko ha Fakataipe ʻo Sīsū Kalaisi

Ke tokoni ke vakai e kau akó kia Tēvita ko ha fakataipe ʻo Sīsū Kalaisi, fakakaukau ke fakaʻaliʻali e saati ko ʻení mo e ngaahi potufolofolá pē. Fakaafeʻi e kau akó ke lau e ngaahi potufolofolá mo haʻanau hoa pea fakapapauʻi ʻa e founga ʻoku fekauʻaki ai ʻa e potufolofola takitaha mo Sīsū Kalaisí. Hili ha taimi feʻunga, ʻe lava ke vahevahe ʻe he kau akó ʻa e meʻa ne nau maʻú mo e kalasí.

Tēvita	Sīsū Kalaisi
Tēvita 1 Samuela 17:12 (Naʻe fanauʻi ʻa Tēvita ʻi Pētelihema.)	Sīsū Kalaisi Luke 2:4–7
Tēvita 1 Samuela 16:11; 17:15 (Naʻe hoko ʻa Tēvita ko ha tauhi sipi.)	Sīsū Kalaisi Sione 10:14
Tēvita 1 Samuela 16:13 (Naʻe pani ʻa Tēvita ko e tuʻi ʻo ʻIsileli.)	Sīsū Kalaisi Luke 4:18; Sione 1:49
Tēvita 1 Samuela 17:50–51 (Naʻe fakahaofi ʻe Tēvita ʻa ʻIsileli ʻaki ʻene ikunaʻi ha fuʻu saieniti.)	Sīsū Kalaisi 2 Nīfai 9:10–12 (ʻOku fakamoʻui kitautolu ʻe Sīsū ʻaki ʻEne ikunaʻi ʻa e angahalá mo e maté.)

Fakatātaaʻi ʻa e talanoá

Ki ha founga ʻe taha ke fakahoko ai ʻa e talanoá, fakakaukau ke fakaafeʻi ha kau ako ʻe toko tolu ʻe loto-fiemālie ke fakatātaaʻi ʻa e ngaahi tuʻunga ʻo Saula, Tēvita, mo Kolaiaté, mo ha tokotaha ako hono fā ke hoko ko ha taha fakamatala. Te ke lava ʻo ʻoange ki he kau akó ha pine hingoa mo ha ʻū naunau, hangē ko ha kalauni maʻa Saula pe ko ha maka-tā maʻa Tēvita. Fakapapauʻi ʻoku ʻikai toʻo ʻe he ʻekitivitī ko ʻení ha fuʻu taimi lahi mei he toenga ʻo e lēsoní.

Ko ha talanoa ʻo Tēvita mo Kolaiate ʻi onopōní

Ke tokoni ke vakai hoʻo kau akó ki ha sīpinga fakaonopooni ʻo ha taha ʻoku falala ki he ʻEikí ʻi ha faingataʻa, fakakaukau ke huluʻi ʻa e “Working through Emotional Trauma” (3:58). ʻOku hā ʻi he vitiō ko ʻení ha finemui naʻe fefaʻuhi mo ha faingataʻaʻia fakaeloto ʻi ha ngaahi taʻu lahi. Te ke lava ʻo fakaafeʻi e kau akó ke nau vakai ki he founga naʻá ne fakafalala ai ki he ʻEikí ki ha tokoní.

3:58