1 Samuela 25

Koeʻuhí ko Sīsū Kalaisi, te u lava ʻo …

Naʻe fakamatalaʻi ʻe Palesiteni Lāsolo M. Nalesoni ha meʻa te tau lava kotoa ʻo fai koeʻuhí ko Sīsū Kalaisi:

15:3

Te ke lava fakafou ʻi [he] Fakalelei taʻe fakangatangata [ʻa e Fakamoʻuí], ʻo fakamolemoleʻi ʻa kinautolu kuo nau fakamamahiʻi koé pea mahalo he ʻikai ke nau teitei tokanga ki heʻenau angakoví.

ʻOku faʻa faingofua ke fakamolemoleʻi e tokotaha ʻokú ne kolea fakamātoato mo loto-fakatōkilalo hoʻo fakamolemolé. Ka ʻe foaki atu ʻe he Fakamoʻuí ʻa e malava ke ke fakamolemoleʻi ha taha pē kuó ne ngaohikoviʻi koe ʻi ha faʻahinga founga pē. Pea he ʻikai leva ke toe uesia ho laumālié ʻi heʻenau ngaahi tōʻonga fakamamahí. (“Meʻaʻofa ʻe Fā ʻoku ʻOatu ʻe Sīsū Kalaisi Maʻaú” [Fakataha lotu faka-Kilisimasi ʻa e Kau Palesitenisī ʻUluakí, 2 Tīsema 2018], Gospel Library)

• Ko e hā e meʻa ʻoku fakafaingamālieʻi ʻe Sīsū Kalaisi ʻo fakafou ʻi Heʻene Fakaleleí?

ʻI he fononga ʻa Tēvita mo ʻene kau tangatá ʻi he feituʻu maomaonganoá, naʻa nau fetaulaki ai mo e kau tamaioʻeiki ʻo ha tangata ko Napale. Lolotonga e ngaahi taimi ʻo e taú, naʻe faʻa maumauʻi ʻe he kau sōtia ongosiá ʻa e laó ke maʻu ʻa e meʻa naʻa nau fiemaʻú. Naʻe fiemaʻu ʻe Tēvita mo ʻene kau tangatá ha tokoni mo ha poupou. Ko ha tangata koloaʻia ʻa Napale pea naʻe lahi ʻene tākanga monumanú. Naʻe ʻikai ngaohikovia ʻe Tēvita mo ʻene kau taú ʻa e kau tamaioʻeiki ʻa Napalé ʻo toʻo e meʻa ne nau fiemaʻú ka ne nau angaʻofa ki he kau tamaioʻeikí ni ʻo ʻikai toʻo ha meʻa meiate kinautolu (vakai, 1 Samuela 25:7, 15–16). Naʻe fekauʻi atu ʻe Tēvita haʻane kau tamaioʻeiki ʻe toko 10 ke nau ō ʻo kole ʻi he melino kia Napale ha meʻakai mo ha ngaahi meʻa naʻe fuʻu fiemaʻu (vakai, 1 Samuela 25:5–9). Naʻe fakaʻitaʻi ʻe Napale ʻa Tēvita pea ʻikai ke ne fie tokoni kiate ia mo ʻene kau taú (vakai, 1 Samuela 25:10–11).

1. Lau ʻa e 1 Samuela 25:3, 14, 17, 25, ʻo kumi e ngaahi ʻulungaanga ʻo Napalé.

2. Lau ʻa e 1 Samuela 25:13, 21–22, ʻo kumi e tali ʻa Tēvita ki he ngaahi lea taʻeʻofa ʻa Napalé mo ʻene taʻe-loto ke tokoní.

Fakalaulauloto ki hoʻo tali ki he ngaahi fehuʻi ko ‘ení:

• Ko e fē ha taimi kuo ngaohikovia ai koe ʻe ha taha kehe?

• Ko e hā ha ngaahi ngāue, lavameʻa, pe ngaahi faingataʻa kuó ke fai pe naʻá ke fakamolemoleʻi ai ʻa e tokotahá ni ʻi he ngaohikovia naʻá ne fakahokó?

Naʻe siotonu ha tamaioʻeiki ʻa Napale ki he fekeʻikeʻi ʻi he vahaʻa ʻo hono ʻeikí mo Tēvitá. Naʻe fakahā ʻe he tamaioʻeikí kia ʻApikale, ko e uaifi ʻo Napalé (vakai, 1 Samuela 25:14–17). ʻI he taimi naʻe ʻilo ai ʻe ʻApikale ʻa e fekeʻikeʻi ko ʻení, naʻá ne fakalelei maʻa Napale ʻo kole kia Tēvita ke fakamolemoleʻi ia (vakai, 1 Samuela 25:18–20, 23–28). ʻOku lava ke tau vakai kia ʻApikale ko ha ʻulungaanga fakatātā ʻo Kalaisi. Te tau lava ʻo maʻu ʻa e ʻulungaanga fakatātā ʻo Kalaisí ʻi heʻetau ako ʻa e folofolá mo kumi ʻa e founga ʻoku tokoniʻi ai kitautolu ʻe he fakafoʻituituí, ngaahi meʻá, pe naʻa mo e ngaahi meʻa naʻe hokó ke tau fakakaukau kia Kalaisí.

Lau ʻa e 1 Samuela 25:18–19, 23–28, 31, ʻo kumi ha meʻa pē naʻe lea ʻaki pe fai ʻe ʻApikale ʻoku faitatau mo ha meʻa kuo folofola ʻaki pe fai ʻe Sīsū Kalaisi. Fakakaukau ke fakaʻilongaʻi ʻa e meʻa ʻokú ke maʻú.

• ʻOku hoko fēfē ʻa ʻApikale ko ha ʻulungaanga fakatātā ʻo Sīsū Kalaisi?

Naʻe vahevahe ʻe Sisitā Kilisitina M. Ī ʻo e Kau Palesitenisī Lahi ʻo e Fineʻofá ha ngaahi fakakaukau fekauʻaki mo e malava ʻa e Fakamoʻuí ke tokoniʻi kitautolu ke tau faʻa fakamolemolé.

ʻI he talanoa ko ʻení, ʻoku lava ke vakai kia ʻApikale ko ha sīpinga mālohi pe fakataipe ʻo Sīsū Kalaisi. ʻOku fakafou ʻi Heʻene feilaulau fakaleleí, ʻa e lava ke Ne fakatauʻatāinaʻi kitautolu mei he angahalá mo e mafatukituki ʻo e ongoʻi ʻitá mo e tāufehiʻá pea ʻomi kiate kitautolu ʻa e tokoni ʻoku tau fiemaʻú.

Hangē pē ko e loto-fiemālie ʻa ʻApikale ke toʻo maʻana ʻa e angahala ʻa Napalé, naʻe pehē pē ʻa hono toʻo ʻe he Fakamoʻuí—ʻi ha founga taʻe-hano-tatau—Maʻana ʻa ʻetau ngaahi angahalá mo e ngaahi angahala ʻa kinautolu kuo nau fakamamahiʻi pe fakaʻitaʻi kitautolú. …

ʻE lava ke akoʻi mai ʻe hono ʻomi ko ia ʻe ʻApikale ha meʻatokoni lahi mo e naunaú, ʻoku ‘omi ‘e he Fakamoʻuí kiate kinautolu kuo fakamamahiʻi mo fakalaveaʻí ʻa e poupou mo e tokoni ʻoku tau fiemaʻú ke fakamoʻui mo fakahaohaoaʻí. …

Hangē pē ko e tokoniʻi ʻe ʻApikale ʻa Tēvita ke ʻoua ʻe “fakamamahi ki [hono] lotó” [1 Samuela 25:31] pea mo maʻu ʻa e tokoni naʻá ne fiemaʻú, ʻe pehē pē ʻa hono tokoniʻi koe ʻe he Fakamoʻuí. (“Hoihoifua ko e fetongi ʻo e Efuefú: Ko e Halanga Faifakamoʻui ʻo e Fakamolemolé,” Liahona, Nōvema 2022, 36–37)

• ʻOku tokoniʻi fēfē kitautolu ʻe he Fakamoʻuí ke tau fakamolemoleʻi e niʻihi kehé?

Lau ʻa e 1 Samuela 25:32–35, ʻo kumi e founga naʻe liliu ai ʻe he ngaahi ngāue ʻa ʻApikalé ʻa Tēvitá.

• Te tau ongoʻi fēfē nai ʻi he taimi ʻoku tau maʻu ai e tokoni ʻa e Fakamoʻuí ke fakamolemoleʻi e niʻihi kehé?

Fakakakato ʻeni ʻi hoʻo tohinoa akó:

1. Tā ha fofonga ʻokú ne fakafofongaʻi hoʻo ngaahi ongó ʻi he taimi ʻoku fakalotomamahiʻi pe fakaʻitaʻi ai koe ʻe ha tahá.

2. ʻI he tafaʻaki ʻo e fakatātā ko iá, tā ha fofonga ʻokú ne fakafofongaʻi ha taha naʻá ne fakaʻitaʻi koe.

3. ʻI he vahaʻa ʻo e ongo fakatātaá, hiki ha lisi ʻo e meʻa ʻoku mahino kiate koe fekauʻaki mo e Fakamoʻuí ʻe lava ʻo tokoni atu ke ke fakamolemoleʻi ʻa e niʻihi kehé.