Seminary
1 Samuel 3: “Sulti, O Ginoo, Kay Mamati ang Imong Sulugoon”


“1 Samuel 3: ‘Sulti, O Ginoo, Kay Mamati ang Imong Sulugoon,’” Manwal sa Magtutudlo sa Seminary sa Daang Tugon (2026)

“1 Samuel 3: ‘Sulti, O Ginoo, Kay Mamati ang Imong Sulugoon,’” Manwal sa Magtutudlo sa Seminary sa Daang Tugon

Ruth; 1 Samuel 1–7: Leksiyon 70

1 Samuel 3

“Sulti, O Ginoo, Kay Mamati ang Imong Sulugoon”

The boy Samuel in bed watching an oil lamp burn.

Unsa ka maayo ang imong gibati sa pag-ila sa tingog sa Ginoo diha sa imong kinabuhi? Usa ka gabii nakigsulti ang Ginoo sa batang si Samuel. Sa tabang ni Eli, nailhan ra ni Samuel ang tingog sa Ginoo. Siya mitubag, “Sulti, O Ginoo, kay mamati ang Imong sulugoon” (1 Samuel 3:9). Nakigsulti usab ang Ginoo kanato, ug sama kang Samuel, kinahanglang makaila kita sa Iyang tingog. Kini nga leksiyon makatabang sa mga estudyante nga tinguhaon ug ilhon ang personal nga pagpadayag.

Pagpangandam sa estudyante: Pangutan-a ang mga estudyante, “Sa unsang paagi nimo madungog ang tingog sa Ginoo diha sa imong kinabuhi?” Dapita sila sa pagpamalandong kon unsaon nila pagtubag. Pwede usab nilang pangutan-on ang mga higala o mga sakop sa pamilya.

Posibleng mga Kalihokan sa Pagkat-on

Pagpaminaw sa tingog sa Ginoo

Ikonsiderar ang pagdapit og boluntaryo nga mobarog atubangan sa klase nga andam magpataptap sa mata. Taptapi ang estudyante. Tagsa-tagsa, dapita ang pipila ka sakop sa klase nga tawagon ang estudyante sa ngalan. Hangyoa ang gitaptapan nga estudyante sa pag-ila kon kinsa ang mitawag sa iyang ngalan.

  • Nganong dali rang ilhon ang ubang tingog?

  • Unsa ang pipila ka espirituhanon nga mga leksiyon ang mahimong may kalabotan niini nga kalihokan?

Posibleng ipakigbahin o dili sa mga estudyante ang mga baroganan nga susama sa mga kamatuoran nga gihisgotan niini nga leksiyon. Kon ila kining buhaton, dapita silang mangita og mga ebidensiya o pagsabot niini nga mga kamatuoran samtang ilang tun-an ang 1 Samuel 3. Kon dili, okay ra na. Pasalamati ang tanang estudyante sa ilang gipakigbahin.

Isulat sa pisara ang mosunod nga kamatuoran: Nakigsulti nato ang Dios ug gusto Niya nga mailhan nato ang Iyang tingog. Ipasabot nga nakigsulti nato ang Ginoo pinaagi sa Espiritu Santo (tan-awa sa Doktrina ug mga Pakigsaad 8:2). Nailhan kini isip personal nga pagpadayag. Mailhan sa mga estudyante ang dugang nga mga baroganan sa personal nga pagpadayag sa kinatibuk-an sa leksiyon.

Si Presidente Russell M. Nelson mitudlo:

Official portrait of President Russell M. Nelson taken January 2018

Usa sa mga butang nga gibalik-balik sa Espiritu og sil-sil sa akong hunahuna … mao ang pagkaandam sa Ginoo nga mopadayag sa Iyang hunahuna ug kabubut-on. Ang pribilehiyo sa pagdawat og pagpadayag usa sa labing mahinungdanon nga mga gasa sa Dios ngadto sa Iyang mga anak. …

Ang Dios buot ba gayod makigsulti kaninyo? Oo! (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 94–95)

Dapita ang mga estudyante nga pamalandongan ang mosunod nga mga pangutana:

  • Nagtuo ba ka nga gusto gyod ang Dios nga makigsulti nimo? Ngano o nganong dili?

  • Unsa ka kasegurado sa imong abilidad sa pag-ila sa pagpadayag?

  • Unsa ang nakapasayon o nakapalisod alang nimo sa pag-ila sa tingog sa Dios (o personal nga pagpadayag) diha sa imong kinabuhi?

Ipahayag ang imong pagsalig nga gusto sa Dios nga makigsulti sa imong mga estudyante.

Sa katibuk-an sa leksiyon, sulayi ang pagtinguha ug pag-ila sa mga mensahe gikan sa Ginoo. Sulayi pag-ila kon sa unsang paagi Siya nakigsulti nimo.

Mga baroganan sa pagpadayag

Gipanganak ni Hana si Samuel isip tubag sa iyang mga pag-ampo. Dihang bata pa si Samuel, gidala siya ni Hana ngadto sa tabernakulo diin siya maatiman ni Eli. Usa ka gabii, nakasinati ang batang si Samuel nga pagkadungog sa tingog sa Ginoo.

Sa dili pa ihatag ang mga instruksiyon sa ubos, pwede nimong ipasabot nga ang pipila sa mga baroganan diha sa mga kasulatan gipasabot. Nagpasabot kini nga wala ni direktang isulti diha sa mga bersikulo. Makatabang nato ang Espiritu Santo sa pag-ila sa gipasabot nga mga baroganan samtang atong pangutan-on ang atong kaugalingon og sama sa: “Unsa kahay gusto sa tagsulat niini nga mga bersikulo nga makat-onan nako?” o “Unsa ang pipila sa importanteng mga leksiyon ang gitudlo niini nga mga bersikulo?”

Tun-i ang 1 Samuel 3:1–10, 19, nga pangitaon ang mga panabot ug mga kamatuoran bahin sa pagdawat og pagpadayag gikan sa Dios.

Dihang mahuman na sa pagtuon ang mga estudyante, dapita sila sa pagsulat diha sa pisara sa mga baroganan nga ilang nadiskobrehan. Gamit ang kaugalingon nilang mga pulong, nailhan tingali sa mga estudyante ang mga baroganan nga gilista sa ubos. Kon naglisod sila sa pag-ila sa mga baroganan, pwede nimong ilista ang mosunod ug dapiton sila sa pag-ila sa hugpong sa mga pulong o mga bersikulo nga nagtudlo niini.

  • Ang Ginoo mapailobong mitabang nato bisan pa og dili nato dayon mailhan ang Iyang tingog (tan-awa sa mga bersikulo 4, 6, 8, 10).

  • Ang Ginoo nakigsulti sa kabatan-onan (tan-awa sa mga bersikulo 4, 6, 8, 10).

  • Kasagaran nagkinahanglan kini og panahon ug pagpraktis aron mapamilyar sa tingog sa Ginoo (tan-awa sa mga bersikulo 7, 10, 19).

  • Makatabang nato ang uban sa pag-ila sa tingog sa Ginoo (tan-awa sa mga bersikulo 8–9).

  • Dihang atong ipakita nga andam tang maminaw ug molihok, mas daghan pa ang ipadayag sa Ginoo. (tan-awa sa mga bersikulo 10, 19)

  • Nganong makatabang kini nga mga baroganan samtang kita naningkamot sa pag-ila sa tingog sa Ginoo diha sa atong kinabuhi?

  • Sa unsang paagi nagpakita kini sa Iyang gugma para nato?

Pag-ila sa tingog sa Ginoo

Ang Ginoo nakigsulti kanato sa daghang paagi pinaagi sa Espiritu Santo. Ang pagkat-on kon sa unsang paagi Siya nakigsulti nimo makatabang aron imong mas mailhan ang Iyang tingog diha sa imong kinabuhi.

icon sa seminary Hatagi ang mga estudyante sa handout nga “Unsaon Nako sa Pag-ila sa Tingog sa Ginoo?” Ikonsiderar ang paghimo sa unang laray sa tsart isip usa ka klase sa dili pa dapiton ang mga estudyante nga kompletohon ang nahibiling mga laray. Mas maayo tingaling dapiton ang mga estudyante nga kompletohon kini nga sila-sila ra aron personal sila nga makapamalandong. Kon para nimo wala nay igong panahon para niini nga kalihokan, ikonsiderar ang pagdapit sa mga estudyante nga pipila lang ka laray ang humanon, o ikonsiderar ang pagpadayon sa leksiyon sa laing adlaw.

Dihang mahuman na sa pagtuon ang mga estudyante, paggahin og panahon aron ilang mahisgotan ang ilang nadiskobrehan ug sa pagpangutana. Gamita kini nga panahon sa pagtugot sa mga estudyante nga ipakigbahin kon sa unsang paagi nila nadungog ang tingog sa Ginoo diha sa ilang kinabuhi. Pwede sab kang magpakigbahin og personal nga kasinatian ug ipasabot kon sa unsang paagi nimo Siya nadungog.

Pasalamati ang mga estudyante sa mga butang nga ilang gipakigbahin. Pahibaloa sila nga ang ilang mga gitampo makahimo og makahuloganong kalainan sa klase.

Pagkahimong pamilyar sa tingog sa Ginoo

Sama kang Samuel, nagkinahanglan tingali og panahon ug praktis aron kita makapamilyar sa tingog sa Ginoo ug mailhan ang personal nga pagpadayag (tan-awa sa 1 Samuel 3:7, 10, 19).

  • Sama ni Samuel, unsa ang pipila ka paagi nga masulayan nato sa pag-ila ang tingog sa Ginoo?

Ang pipila ka ideya mao tingali ang pagpakig-istorya sa ginikanan o kasaligan nga tigmatuto kon sa unsang paagi makadawat og pagpadayag sama nga si Samuel nakig-istorya ngadto ni Eli. Si Samuel miiingon, “Sulti, O Ginoo, kay mamati ang imong sulugoon” (1 Samuel 3:10). Tingali mahimo usab natong klarohon sa Ginoo nga andam ta sa pagpaminaw sa Iyang mga mensahe pinaagi sa pagbaton og mga gutlo sa pagpamalandong ug pagpaminaw human sa pag-ampo o sa tibuok adlaw. O pwede natong irekord sa usa ka journal ang pipila sa mga paagi nga midawat kita og mga mensahe gikan sa Langitnong Amahan, sama niadtong naa sa handout.

Diha sa imong journal sa pagtuon, paghimo og plano sa usa ka butang nga gusto nimong himoon sa pagtinguha ug pag-ila sa pagpadayag gikan sa Ginoo diha sa imong kinabuhi.

Ipamatuod nga samtang ang mga estudyante mohimo og gipunting nga paningkamot sa ngadto-ngadto, madugangan ang ilang abilidad sa pag-ila og personal nga pagpadayag. Ipahibalo sa mga estudyante nga mahatagan sila og kahigayon sa pagpamalandong sa ilang mga paningkamot sa pag-ila sa personal nga pagpadayag diha sa Leksiyon 80: “Sukda ang Imong Nakat-onan 5.”