“1 Samuel 1: ‘Ang Ginoo Mihatag Kanako sa Akong Gihangyo Kaniya,’” Manwal sa Magtutudlo sa Seminary sa Daang Tugon (2026)
“1 Samuel 1: ‘Ang Ginoo Mihatag Kanako sa Akong Gihangyo Kaniya,’” Manwal sa Magtutudlo sa Seminary sa Daang Tugon
Ruth; 1 Samuel 1–7: Leksiyon 69
1 Samuel 1
“Ang Ginoo Mihatag Kanako sa Akong Gihangyo Kaniya”
Nakasulay na ba ka nga nangamuyo sa Langitnong Amahan para sa usa ka panalangin nga daw nagkinahanglan sa imong pailob ug hugot nga pagtuo? Si Hana, usa ka matarong nga Israelinhong babaye, nangandoy nga makabaton og anak. Bisan og ang iyang halangdon nga mga tinguha wala matuman “matag tuig” (1 Samuel 1:7), padayong milihok si Hana uban ang hugot nga pagtuo ug mihangyo sa Langitnong Amahan alang niini nga panalangin. Gitubag ang mapaubsanong mga pag-ampo ni Hana dihang nadawat niya ang kalinaw, kalipay, ug ang usa ka anak nga ginganlan niya og Samuel. Kini nga leksiyon makatabang sa mga estudyante nga masabtan nga dunggon sa Langitnong Amahan ang ilang mapaubsanong mga pag-ampo ug panalanginan sila.
Pagpangandam sa estudyante: Dapita ang mga estudyante nga maghunahuna og usa ka kasinatian dihang nadawat nila o sa ilang kaila ang tubag sa pag-ampo. Pwedeng mangandam ang mga estudyante sa pagpakigbahin niana nga kasinatian isip kabahin sa kalihokan sa pagtuon.
Posibleng mga Kalihokan sa Pagkat-on
Kon mobati nga ang mga pag-ampo wala matubag
Ang makadiyos nga musika makadapit sa Espiritu Santo dihasa inyong klasrom ug makaandam sa kasingkasing ug hunahuna sa mga estudyante alangsa kasinatian sa pagkat-on. Ikonsiderar ang pagsugod sa klase pinaagi sa pagdapit sa mga estudyante sa pagpili og paboritong himno nga nagtudlo sa gahom sa pag-ampo ngadto sa Langitnong Amahan. Sa dili pa ang pangbukas nga pag-ampo, ang klase pwedeng mokanta o maminaw sa unang linya sa usa ka kanta nga sama sa “Ampo sa Usa ka Bata,” (Songbook sa mga Bata, 12–13) o “Ikaw Naghunahuna Ba sa Pag-ampo?,” (Mga Himno, num. 82). Mahimo usab nga motan-aw ang mga estudyante og angay nga bidyo nga sama sa “Naa Ba Gayod Ka?” (3:46) o “Pabilin Uban Kanako,” (3:08) nga anaa sa ChurchofJesusChrist.org.
Samtang imong sugdan ang leksiyon, ipakita ang mosunod nga senaryo o ang parehas nga labing haom sa mga panginahanglan sa imong klase. Ikonsiderar ang pagsulat niini diha sa pisara.
Human sa leksiyon sa seminary bahin sa pag-ampo, giduol ka sa usa ka higala ug miangkon nga, “Nag-ampo man ko, pero dili ko segurado kon natubag ba kini.” Samtang nag-istorya mo, naa siyay tulo ka pangutana.
-
Unsaon man nako pagkahibalo nga gipaminaw ug gitubag sa Langitnong Amahan ang akong mga pag-ampo?
-
Unsa ang pipila ka paagi nga tubagon sa Langitnong Amahan ang mga pag-ampo?
-
Unsay akong mahimo aron mahimong mas makahuloganon ang akong mga pag-ampo ngadto sa Langitnong Amahan?
Ang mosunod nga kalihokan maoy usa ka pagsukod sa kaugalingon. Kini nga mga kahigayonan nagtugot sa mga estudyante nga susihon ang kasamtangan nilang pagsabot sa mga kamatuoran nga ilang tun-an diha sa klase. Makatabang usab kini sa mga estudyante nga makita kon unsay ilang gikinahanglan o gustong makat-onan.
Sa sukdanan nga 1 (ubos) hangtod 5 (taas), gradohi kon unsa ka masaligon ang imong gibati nga matubag nimo ang matag pangutana gikan sa senaryo.
Pagpili og usa ka pangutana nga gusto nimong makat-onan og dugang karon. Isulat ang maong pangutana diha sa imong journal sa pagtuon. Sa imong pagtuon, tinguhaa ang giya sa Espiritu aron tabangan kang matubag ang pangutana nga imong gipili.
Si Hana naghandom og anak
Sa yuta sa Efraim, usa ka matarong nga Israelinhon nga ginganlan og Elcana ang naay duha ka asawa, si Penina ug si Hana (ang dinaghan nga kaminyoon komon niining panahona ug gidawat sa Ginoo).
Basaha ang 1 Samuel 1:1–8 nga pangitaon ang mga hagit nga giatubang ni Hana. (Ang “kailog” diha sa bersikulo 6 posible nga si Pinina.)
-
Unsay imong nakaplagan?
-
Kon nanlimbasog ka og personal nga mga hagit sama kang Hana, unsa kahay imong hunahunaon o bation?
Bisan og managlahi kaayo ang ilang mga sitwasyon, pwede nimong pangutan-on ang mga estudyante kon sa unsang paagi sila makasabot sa kahimtang ni Hana.
Samtang tun-an sa mga estudyante ang sunod nga tudling, mabantayan tingali nila nga sa sinugdanan si Eli, ang high priest, nasaypan og sabot ang mapaubsanong pag-ampo ni Hana. Tabangi ang mga estudyante nga magpunting kang Hana, kon giunsa niya pagtubag si Eli, ug ang panalangin nga iyang nadawat gikan sa Ginoo (tan-awa sa bersikulo 20). Kon makatabang, ipasabot nga samtang matinud-anon silang nag-istoryahanay, gitul-id dayon ni Eli ang iyang sayop.
Pwedeng tan-awon sa mga estudyante ang bidyo nga “Ang Hugot nga Pagtuo ni Hana” (3:08) nga anaa sa ChurchofJesusChrist.org ug sundan kini diha sa ilang mga kasulatan. Pwede nimong ihunong kadiyot ang bidyo sa time code nga 1:03 ug dapita ang mga estudyante sa pagpakigbahin sa ilang mga hunahuna bahin sa mga bersikulo 9–13 ug ihunong na usab og kadiyot sa time code nga 1:30 aron dapiton ang mga estudyante sa pagpakigbahin sa ilang mga panglantaw bahin sa mga bersikulo 14–20.
Basaha ang 1 Samuel 1:9–20 ug 2:1–2 nga pangitaon kon unsay gibuhat ni Hana agig tubag sa iyang mga kalisdanan.
-
Unsay imong nadiskobrehan?
-
Unsay atong makat-onan bahin sa Langitnong Amahan ug sa pag-ampo gikan niini nga asoy?
Pwedeng ipakigbahin sa mga estudyante ang lainlaing mga hunahuna. Pasalamati sila ug pangutan-a kon nganong importanteng mahibaloan ang ilang nadiskobrehan. Kon dili hisgotan sa mga estudyante ang mosunod nga kamatuoran, isulat kini sa pisara ug pangutana kon sa unsang paagi ang istorya ni Hana maoy ebidensya niini: Samtang mangaliyupo kita sa Langitnong Amahan pinaagi sa mapainubsanong pag-ampo, Siya maminaw ug mopanalangin kanato.
-
Unsa ang pipila ka pulong o hugpong sa mga pulong diha sa 1 Samuel 1:9–20 nga nagpakita nga ang mga pag-ampo ni Hana mapaubsanon ug makahuloganon?
-
Sumala sa mga bersikulo 17–18, unsa nga paghupay ang gihatag sa Ginoo kang Hana samtang naghulat siya nga mapanalanginan og usa ka anak?
Makatabang tingali ang pagpasabot nga kita, sama kang Hana, kinahanglan tingali nga mosalig sa Ginoo ug mapailobong maghulat sa Iyang mga panalangin. Dili tingali Siya motubag sa paagi nga atong gilaoman, pero makasalig kita nga Siya motubag sa mga pag-ampo sumala sa Iyang kabubut-on ug kon unsay labing maayo para nato.
Pwede nimong ipakigbahin ang usa ka pananglitan sa mapaubsanon, makahuloganon nga pag-ampo nga wala tubaga sa paagi nga gidahom, sama sa “Giunsa Nako #PagpaminawKaniya: Elder D. Todd Christofferson” (2:25) gikan sa ChurchofJesusChrist.org o “One–on–One (Pagpangalagad uban ang Gugma)” (time code 7:24 hangtod 9:00). Sa laing paagi, pwede nimong ipakigbahin ang usa ka pananglitan gikan sa imong kinabuhi.
Ang Langitnong Amahan maminaw sa atong mga pag-ampo ug mopanalangin kanato
Pwede nimong gamiton ang mosunod nga kalihokan aron mapalawom ang pagsabot sa mga estudyante bahin sa kamatuoran nga ilang nailhan sa ibabaw ug tubagon ang tulo ka pangutana sa sinudganan sa leksiyon. Usa ka paagi sa pagbuhat niini mao ang paghatag o pagpakita sa mga instruksiyon sa ubos para sa matag pangutana (A, B, ug C). Pwede nimong hatagan ang mga estudyante og opsiyon nga magtuon sa indibidwal o makigtinabangay sa gagmayng grupo sa mga estudyante nga mipili sa parehong pangutana. Pwede nimong grupohon og tinagtulo ang mga estudyante, nga ang kada tawo mipili og lainlaing pangutana nga tun-an. Pwede nilang ipakigbahin ang unsay ilang nakit-an ngadto sa grupo.
Pangutana A: Sa unsang paagi ang istorya ni Hana makatabang sa usa ka tawo nga motuo nga ang Langitnong Amahan naminaw sa ilang mga pag-ampo ug nagpanalangin kanila?
Gamita ang mga himan [tool] sa pagtuon sa kasulatan nga sama sa Topical Guide, Giya ngadto sa mga Kasulatana, ug Librarya sa Ebanghelyo aron mangita og pipila ka tudling sa kasulatan o usa ka pahayag gikan sa lider sa Simabahan nga makatabang sa usa ka tawo nga masabtan nga tubagon sa Langitnong Amahan ang mga pag-ampo (pananglitan, Santiago 1:5–6; Enos 1:2–10; 3 Nephi 18:20; Doktrina ug mga Pakigsaad 90:24).
Pangutana B: Sa unsang paagi ang istorya ni Hana makatabang sa usa ka tawo nga masabtan ang pipila ka paagi sa pagtubag sa Langitnong Amahan sa iyang mga pag-ampo?
Gamita ang mga himan sa pagtuon sa kasulatan nga sama sa Topical Guide, Giya ngadto sa mga Kasulatana, ug Librarya sa Ebanghelyo aron mangita og pipila ka asoy sa kasulatan o usa ka pahayag gikan sa lider sa Simabahan nga makatabang sa usa ka tawo nga masabtan ang pipila ka paagi sa pagtubag sa Langitnong Amahan sa mga pag-ampo (pananglitan, Lucas 22:39–44; 2 Mga Taga-Corinto 12:7–9; Mosiah 24:10–16; Doktrina ug mga Pakigsaad 6:22–23; 8:2–3).
Pangutana C: Sa unsang paagi ang istorya ni Hana makatabang sa usa ka tawo sa pagsulay nga himoong mas mapaubsanon ug makahuloganon ang iyang pag-ampo?
Gamita ang mga himan [tool] sa pagtuon sa kasulatan nga sama sa Topical Guide, Giya ngadto sa mga Kasulatan, ug Librarya sa Ebanghelyo aron mangita og pipila ka tudling sa kasulatan o usa ka pahayag gikan sa lider sa Simabahan nga makatabang sa usa ka tawo nga gustong himoong mas mapaubsanon ug makahuloganon ang iyang mga pag-ampo (pananglitan, Enos 1:2–10; Alma 5:45–46; Ether 3:1–5; Doktrina ug mga Pakigsaad 46:30).
Ipakita ang pagsabot
Aron tabangan ang mga estudyante nga ipakigbahin ang ilang nakat-onan ug gibati karon, pwede silang makigpares sa usa ka estudyante nga gitun-an ang usa sa ubang pangutana ug tudloan ang usag usa. Pwede nimong palawoman ang panaghisgot pinaagi sa pagdapit sa mga estudyante sa pagpakigbahin diha sa klase sa ilang mga hunahuna ug dasiga ang mga estudyante nga nagtuon sa ubang pangutana nga mohatag og dugang panghunahuna.
Samtang imong taposon ang klase, pasaligi pag-usab ang mga estudyante nga, sama kang Hana, usahay kinahanglan kitang maghulat nga tubagon sa Langitnong Amahan ang atong mga pag-ampo. Sa Iyang paagi ug panahon, ang Langitnong Amahan maminaw gayod sa ilang mga pag-ampo ug mopanalangin kanila.