Manwal ng Guro ng Seminary para sa Lumang Tipan

Mga Nilalaman
Pahina ng Pamagat
Pambungad sa Manwal ng Guro
Mga Lesson sa Lumang Tipan
- Halina’t Basahin ang Lumang Tipan
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko ng Pagkabuhay
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Mga Bilang 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Hukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Cronica 14–20; 26; 30
- Ezra 1; 3–7; Nehemias 2; 4–6; 8
- Esther
- Job 1–3; 12–14; 19; 21–24; 38–40; 42
- Mga Awit 1–2; 8; 19–33; 40; 46
- Mga Awit 49–51; 61–66; 69–72; 77–78; 85–86
- Mga Awit 102–103; 110; 116–119; 127–128; 135–139; 146–150
- Mga Kawikaan 1–4; 15–16; 22; 31; Eclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3; 7; 16–18; 20
- Jeremias 31–33; 36–38; Mga Panaghoy 1; 3
- Ezekiel 1–3; 33–34; 36–37; 47
- Daniel 1–7
- Oseas; Joel
- Amos; Obadias; Jonas
- Mikas; Nahum; Habakuk; Sefanias
- Hagai 1–2; Zacarias 1–4; 7–14
- Malakias
Mga Lesson sa Paghahanda sa Buhay
- Doctrinal Mastery: Paghahanap ng mga Sagot sa Aking mga Tanong
- Mga Kasanayan sa Pag-aaral ng Banal na Kasulatan
- Para sa Lakas ng mga Kabataan: Paggawa ng mga Pagpili
- Pagkakaroon ng Pag-asa sa Sariling Kakayahan o Self-Reliance
- Pisikal at Emosyonal na Kalusugan
- Paghahanda para sa Edukasyon at Trabaho sa Hinaharap
- Pagtatagumpay sa Paaralan
- Paghahanda ng Missionary
- Paghahanda para sa Templo
- Mga Turo ng mga Lider ng Simbahan
Apendiks

Deuteronomio 6:1–6: Ibigin ang Diyos nang Iyong Buong Puso

“Deuteronomio 6:1–6: Ibigin ang Diyos nang Iyong Buong Puso,” Manwal ng Titser ng Seminary para sa Lumang Tipan (2026)

“Deuteronomio 6:1–6: Ibigin ang Diyos nang Iyong Buong Puso,” Manwal ng Titser ng Seminary para sa Lumang Tipan

Deuteronomio 6–8; 15; 18; 29–30; 34: Lesson 58

Deuteronomio 6:1–6

Ibigin ang Diyos nang Iyong Buong Puso

Matapos gabayan ang mga Israelita sa loob ng 40 taon sa ilang, ibinahagi ni Moises ang kanyang huling payo sa kanila bago iniutos ng Panginoon kay Josue na pamunuan sila sa pagpasok sa lupang pangako. Ang isang mahalagang bahagi ng mensahe ng propetang si Moises ay “iibigin mo ang Panginoon mong Diyos ng iyong buong puso” (Deuteronomio 6:5). Ang lesson na ito ay makatutulong sa mga estudyante na maunawaan kung paano nila maipapakita ang kanilang pagmamahal sa Diyos.

Paghahanda ng mga estudyante: Sabihin sa mga estudyante na hilingin sa isang magulang, tagapag-alaga, o lider ng Simbahan na ibahagi ang ilan sa kanilang mga paboritong paraan ng pagpapakita na mahal nila ang isang tao sa pamamagitan ng gawa. Maaaring makatulong na sabihin sa mga estudyante na ang lesson ay magtutuon sa mga paraan kung paano natin maipapakita ang ating pagmamahal sa Diyos.

Mga Posibleng Aktibidad sa Pag-aaral

Pagpapakita ng pagmamahal

Maaari mong gamitin ang sumusunod na aktibidad para matulungan ang mga estudyante na pag-isipan at pag-usapan ang iba’t ibang paraan kung paano sila magpapakita ng pagmamahal.

Sa inyong study journal, isulat ang pangalan ng isang kapamilyang mahal ninyo.
Sa loob ng 60 segundo, maglista sa ilalim ng kanyang pangalan ng kahit ilang natatanging paraan na maiisip ninyo para maipakita ang inyong pagmamahal sa kanya.

Sabihin sa ilang boluntaryo na ibahagi ang pangalang isinulat nila at ang ilan sa mga ideya nila sa pagpapakita ng pagmamahal.

Kapag natapos nang magbahagi ang mga estudyante, ipabasa sa kanila ang Deuteronomio 6:5 at ipabahagi ang natutuhan nila. (Maaaring ibahagi ng mga estudyante sa sarili nilang mga salita ang katotohanang gaya ng: Iniuutos sa atin ng Diyos na Siya’y ibigin nang buong puso, kaluluwa, at lakas.) Maaari mong imungkahi sa mga estudyante na i-link o i-cross-reference ang talatang ito sa doctrinal mastery passage na Mateo 22:36–39, kung saan binigyang-diin ni Jesucristo ang kahalagahan nito.

Maaari mong isulat sa gitna ng pisara ang Ama sa Langit at si Jesucristo. Bigyan ng dalawang minuto ang mga estudyante na pumunta sa pisara at ilista ang iba’t ibang paraan kung paano natin maipapakita ang pagmamahal natin sa Kanila.

Pagkatapos ay hikayatin ang mga estudyante na ibahagi kung alin sa mga ideya ng kanilang mga kaklase ang pinakamahalaga para sa kanila at bakit.

Pag-isipan ang mga sumusunod na tanong.

Ano ang tunay mong nadarama para sa Ama sa Langit at kay Jesucristo? Bakit iyon ang nadarama mo?
Ano ang ilan sa mga paraan kung paano mo maipapakita sa Kanila ang nadarama mo?

Sa inyong pag-aaral ng aklat ng Deuteronomio sa linggong ito, bigyang-pansin ang mga pahiwatig mula sa Espiritu Santo. Mapapalalim ng Kanyang impluwensya ang pagmamahal ninyo para sa Ama sa Langit at kay Jesucristo, at magtuturo ito sa inyo ng mga paraang maipapakita ninyo ang pagmamahal na iyon sa Kanila.

Mahal tayo ng Diyos nang Kanyang buong puso

Upang matulungan ang mga estudyante na matuto mula sa halimbawa ng Diyos, maaari mo silang anyayahan na i-link o i-cross reference ang Deuteronomio 6:5 sa 1 Juan 4:19. Matapos basahin ang talata 19, maaari mong hilingin sa mga estudyante na ibahagi ang mga paraan kung paano ipinakita ng Diyos ang Kanyang pagmamahal para sa lahat ng tao o sa kanila.

Ang sumusunod na pahayag ay makatutulong sa mga estudyante na pagnilayan ang perpektong halimbawa ng pagmamahal ng Diyos sa atin nang Kanyang buong puso. Maaari mo itong idisplay at ipabasa nang malakas sa isang estudyante. Pagkatapos ay hayaan itong nakadisplay habang tinatalakay ng mga estudyante ang kanilang mga sagot sa mga tanong sa ibaba.

Tinulungan tayo ni Pangulong Jeffrey R. Holland ng Korum ng Labindalawang Apostol na mas maunawaan ang tunay na katangian ng Diyos.

19:24

Ang una at dakilang utos sa kawalang-hanggan ay ang mahalin ang Diyos nang buo nating puso, kakayahan, pag-iisip at lakas—iyan ang una at dakilang utos. Subalit ang una at dakilang katotohanan sa kawalang-hanggan ay mahal tayo ng Diyos nang buo Niyang puso, kakayahan, pag-iisip at lakas. Ang pagmamahal na iyon ay saligang bato ng kawalang-hanggan, at ito ay dapat na maging saligang bato ng ating buhay araw-araw. Katunayan sa katiyakan lamang na iyon na nag-aalab sa ating kaluluwa tayo magkakaroon ng kumpiyansang patuloy na manalig, patuloy na magsikap na magpakabuti pa, patuloy na humingi ng kapatawaran ng ating mga kasalanan, at ipakita ang gayon ding kabutihan sa ating kapwa. (“Bukas ay Gagawa ng mga Kababalaghan ang Panginoon sa Inyo,” Liahona, Mayo 2016, 127)

Ano ang natutuhan ninyo mula sa pahayag ni Pangulong Holland na makahihikayat sa atin na ipakita ang ating pagmamahal sa Diyos?
Ano ang ilang hakbang na maaaring gawin ng isang tao para magawa niyang mahalin ang Diyos “nang buo [niyang] lakas” kung pakiramdam niya ay hindi pa sapat ang kanyang lakas para gawin ito?

Ang pagsunod ay pagpapakita ng pagmamahal

Upang mabigyan ang mga estudyante ng maikling konteksto ng aklat ng Deuteronomio, maaari mong ipakita ang larawan ni Moises mula sa simula ng lesson habang ibinubuod o ipinababasa mo nang malakas sa isang estudyante ang sumusunod na talata.

Pagkatapos maglingkod bilang propeta ng Diyos sa loob ng 40 taon, iniutos ni Moises sa mga Israelita na magkampo sa hangganan ng lupang pangako. Kalaunan ay pamumunuan sila ni Josue sa papasok sa hangganan (tingnan sa Deuteronomio 31:23). Nakita ni Moises ang lupang pangako mula sa tuktok ng bundok bago siya pinagbagong-anyo ng Panginoon, o bago dinala ng Panginoon si Moises sa Kanyang presensya nang hindi ito namamatay(tingnan sa Deuteronomio 34:1–6; Alma 45:18–19). Ang aklat ng Deuteronomio ay naglalaman ng huling payo ni Moises sa mga tao, kabilang na ang inspiradong payo tungkol sa pagmamahal sa Diyos at pagsunod sa Kanyang mga utos.

Basahin ang mga sumusunod na talata, at alamin ang mga pagkakatulad ng itinuro ni Moises sa kanyang mga tao at itinuro ni Jesus sa Kanyang mga disipulo tungkol sa kung paano maipapakita ang ating pagmamahal sa Diyos.

Deuteronomio 6:1–6; 30:16

Juan 14:15, 21–24

Ano ang natutuhan ninyo tungkol sa pagpapakita ng pagmamahal natin sa Diyos?

Kung nailista na kanina ng isang estudyante sa pisara ang “pagsunod sa mga utos” bilang isang paraan na maipapakita ang ating pagmamahal sa Diyos, maaari mo itong bigyang-diin. Kung hindi pa, maaari mo itong idagdag sa pisara.
Sa inyong palagay, bakit isang makabuluhang paraan ang pagsunod sa mga utos para maipakita sa Ama sa Langit at kay Jesucristo na mahal natin Sila?

Pagmamahal sa Diyos sa ating buhay sa araw-araw

Pumili ng isa sa mga karaniwang lugar na ito: sa trabaho, sa paaralan, sa seminary, sa simbahan, sa bahay, sa praktis, sa mga kaibigan, sa social media. Paano ninyo sasagutin ang mga sumusunod na tanong mula sa inyong karanasan habang isinasaisip ang lugar na ito?

Sa lugar na ito, paano mo nakitang ipinapakita ng isang tao ang kanyang pagmamahal sa Diyos?
Ano ang ilang angkop na paraan para ipakita ang iyong pagmamahal sa Diyos sa lugar na ito?
May anumang bagay ba na maaaring magpahirap sa pagpapakita ng pagmamahal sa Diyos sa lugar na ito? Kung mayroon, paano natin ito madadaig?

Pangwakas

Bilang pagtatapos, maaari mong ipahayag ang iyong pagmamahal sa Ama sa Langit at kay Jesucristo.

Bukod sa iyong patotoo, maaari mo ring ibahagi ang sumusunod na pahayag at anyayahan ang mga estudyante na ipahayag ang kanilang nadarama para sa Ama sa Langit at kay Jesucristo sa kanilang study journal. Hikayatin silang kumilos ayon sa anumang impresyong maaaring natanggap nila mula sa Espiritu sa oras ng lesson.

May mahahalagang itinanong si Elder K. Brett Nattress ng Pitumpu na dapat nating personal na pag-isipan.

Nais kong patotohanan na ang ating Ama sa Langit ay hindi nakakalimot sa atin at na perpekto ang Kanyang pagmamahal sa atin. Ang tanong ko ay: Naaalala ba natin Siya? At mahal ba natin Siya? (“Talaga Bang Napatawad Na Ako?,” Liahona, Mayo 2023, 68–69)

Karagdagang Resources

Paano nakatulong sa Tagapagligtas ang Kanyang pagmamahal sa Diyos para matiis ang Kanyang nagbabayad-salang sakripisyo?

Itinuro ni Elder D. Todd Christofferson ng Korum ng Labindalawang Apostol:

Kung iniibig natin ang Diyos nang buong puso, kaluluwa, pag-iisip, at lakas, ang magiging pokus natin sa buhay ay ang pagtupad ng Kanyang mga hangarin. Walang sinuman, siyempre, ang nakagawa niyon nang mas lubusan at ganap kaysa sa ating huwaran na si Jesucristo na minsang nagwika, “Hindi ako pinabayaang nag-iisa ng Ama; sapagkat lagi kong ginagawa ang mga bagay na nakakalugod sa kanya.” Ang Kanyang pinakamataas na prayoridad ay luwalhatiin ang Ama.

Ang pinakamataas na prayoridad na iyon, ang pinakamataas na katapatang iyon, ang nagbigay-kakayahan kay Jesus na matapos ang Kanyang Pagbabayad-sala, na inumin ang pinakamapait sa lahat ng mapait na saro hanggang sa huling patak. …

Habang nakapako si Cristo sa krus, ang ating kapalaran, ang ating kawalang-kamatayan, at ang ating buhay na walang hanggan ay nasa bingit, at ang bagay na gumawa ng kaibahan upang pumabor sa atin ang pagpapasiya kung magkakaroon ng saysay ang ating buhay ay ang pag-ibig ni Jesucristo sa Ama nang Kanyang buong puso, kaluluwa, pag-iisip, at lakas. (“Unahin ang Unang Utos” [Liahona–Digital Lamang, Peb. 2023])

“Alin ba ang dakilang utos?” (Mateo 22:36)

Ipinaliwanag ni Pangulong Dallin H. Oaks ng Unang Panguluhan:

Nang tanungin si Jesus kung alin ang dakilang utos, dalawa ang ibinigay Niya. Ang una ay ibigin ang Diyos, na ipinapakita natin sa pagsunod sa Kanyang mga utos. Ang pangalawa ay ibigin ang ating kapwa. Kailangan nating gawin pareho ang mga ito, at hindi madali iyan. Karamihan sa atin ay may tendensiya na di-gaanong pansinin ang ibigin ang ating kapwa at labis na bigyang-diin ang pagsunod sa batas (mga kautusan). Tiyak na iyan ang tendensiya ko dahil abugado ako. Tutal, ang pagmamahal sa Diyos at pagpapakita ng ating pagmamahal sa Diyos sa pamamagitan ng pagsunod sa Kanyang mga utos ang unang dakilang utos. At siyempre, mas madali para sa atin ang husgahan ang ating sarili at ang iba kung sinusunod ba natin ang batas. Pero mahalaga ring sundin ng bawat isa sa atin ang pangalawang utos, na “katulad nito,” ang mahalin ang ating kapwa tulad ng pagmamahal sa atin ni Jesus. (“Panindigan ang Katotohanan” [pandaigdigang debosyonal para sa mga young adult, Mayo 21, 2023], Gospel Library)

Ano ang magagawa natin upang mapalalim ang ating pagmamahal sa Diyos?

May mga ideya sa artikulong “3 Ways to Develop Genuine Love for God,” kung paano natin mapapasidhi ang ating pagmamahal sa Diyos sa pagdaan ng mga araw.

Mga Karagdagang Aktibidad sa Pag-aaral

Alternatibong simula upang matulungan ang mga estudyante na maunawaan ang konteksto ng Deuteronomio

Maaari mong simulan ang lesson sa pagtulong sa mga estudyante na makaugnay sa pagbibigay ni Moises ng kanyang huling payo sa mga taong mahal niya. Makatutulong din ito sa mga estudyante na pag-isipan ang pinakamahalaga sa kanila.

Maaari mo itong gawin sa pamamagitan ng pagpapakita ng mga sumusunod na tagubilin at pagbibigay sa mga estudyante ng dalawa hanggang tatlong minuto para mag-isip o isulat ang kanilang mga iniisip. Pagkatapos ay anyayahan ang ilang estudyante na magbahagi ng mga kaisipan na hindi masyadong personal.

Isipin kunwari na malalayo ka sa iyong mga mahal sa buhay nang matagal na panahon o posibleng magpakailanman. Maaari kang mag-iwan ng isang maikling sulat na nagpapayo para sa kanila bago ka umalis.

Anong payo ang ibabahagi mo sa kanila? (Maaari mong isama ang inaasahan mong gagawin o hindi nila gagawin sa hinaharap, ang inaasahan mong uunahin nila sa kanilang buhay, o ang nadarama mo tungkol kay Jesucristo at sa Kanyang ebanghelyo.)

Pagkatapos ay tulungan ang mga estudyante na maunawaan ang konteksto ng aklat ng Deuteronomio sa pamamagitan ng pagbabahagi ng konteksto mula sa lesson na matatagpuan sa ilalim lamang ng heading na “Ang pagsunod ay pagpapakita ng pagmamahal.”

Mga halimbawa ng pag-una sa Diyos sa ating buhay

Nagbigay si Elder D. Todd Christofferson ng Korum ng Labindalawang Apostol ng ilang halimbawa kung ano ang maaaring kahulugan ng unahin ang pagmamahal sa Diyos sa ating buhay sa kanyang mensaheng “Unahin ang Unang Utos” (Liahona–Digital Lamang, Peb. 2023).

Maaari kang mag-print ng mga kopya ng mga bahagi ng kanyang mensahe sa ilalim ng sumusunod na apat na heading. Sabihin sa maliliit na grupo na pag-aralan ang isang bahagi, isa sa bawat grupo at maghandang magbahagi ng mga ideya sa kung paano natin uunahin ang ating pagmamahal sa Diyos sa ating buhay.

Pag-una sa Unang Utos: “[Tuparin] ang Aking mga Utos”

Pag-una sa Unang Utos: “Pakainin Mo ang Aking mga Tupa”

Pag-una sa Unang Utos: Manawagan sa Kanya; Magpakabusog sa Kanyang mga Salita

Pag-una sa Unang Utos: Pananagutan sa Diyos

Mateo 22:36–39: “Ang dakilang utos”

Upang maituro sa mga estudyante ang Deuteronomio 6:5 sa paraang makatutulong sa kanila na maunawaan ang kahalagahan nito, sabihin sa kanila na mabilis na ibahagi sa isang kapartner ang itinuturing nilang pinakamahalaga sa mga sumusunod na kategorya (o iba pang mga kategorya na maaari mong piliin).

Pelikula

Bakasyunan

Dessert o panghimagas

Himno

Pagkatapos ay sabihin sa mga estudyante na basahin ang Mateo 22:36–39, at alamin kung paano tumugon si Jesucristo sa tanong na katulad niyon.

Itanong sa mga estudyante kung alam nila kung saan natin matatagpuan ang unang dakilang utos na tinukoy ni Jesus. Sabihin sa kanila na markahan ang Deuteronomio 6:5 at i-cross reference o i-link ito sa Mateo 22:36–39.