“Levitico, Bahin 1: ‘Kini nga Butang Mao ang Usa ka Pagkasama,’” Manwal sa Magtutudlo sa Seminary sa Daang Tugon (2026)
“Levitico, Bahin1: ‘Kini nga Butang Mao ang Usa ka Pagkasama,’” Manwal sa Magtutudlo sa Seminary sa Daang Tugon
Exodo 35–40; Levitico 1; 4; 16; 19: Leksiyon 53
Levitico, Bahin 1
“Kini nga Butang Mao ang Usa ka Pagkasama”
Samtang ang naandan nga pagsakripisyo sa mga hayop mahimong katingalahan karon, kini nga mga sakripisyo nakatabang sa karaang Israel nga masayod ug makadayeg unsa ang gipakigsaad sa Manluluwas nga buhaton alang kanila. Ang pagkat-on mahitungod sa karaang pagsakripisyo mahimo usab nga makatabang kanato nga masayod ug makadayeg unsa ang gibuhat sa Manluluwas alang kanato. Kini nga leksiyon makatabang sa mga estudyante nga mobati og pasalamat alang ni Jesukristo ug sa Iyang maulaong sakripisyo.
Pagpangandam sa estudyante: Dapita ang mga estudyante sa pagpamalandong og tambag nga ilang mahatag sa usa ka tawo nga nanlimbasog sa pagsabot kon unsa ang nahimo ni Jesukristo kanila. Pwede usab nimong dapiton ang mga estudyante sa pagpangutana og sakop sa pamilya o higala kon unsa nga tambag ang ilang mahatag.
Posibleng mga Kalihokan sa Pagkat-on
Unsa ang Iyang nabuhat alang kanako?
Aron maandam ang mga estudyante nga maghisgot mahitungod ni Jesukristo, ikonsiderar ang pagpakigbahin sa mosunod nga kasinatian.
Si Presidente Dallin H. Oaks sa Unang Kapangulohan mipakigbahin sa mosunod nga panagsulti niya kauban sa usa ka miyembro sa Simbahan:
Sa usa ka Sabado sa hapon nga miting sa usa ka komperensiya sa stake daghang tuig nang milabay, ako nakahimamat og babaye nga miingon nga gihangyo siya sa iyang mga higala sa pagbalik sa simbahan human sa katuigan nga dili na aktibo, apan wala siya makahunahuna og bisan unsa nga rason nga siya mobalik. Aron sa pagdasig kaniya, miingon ako, “Kon imong hunahunaon ang tanang mga butang nga nabuhat sa Manluluwas kanimo, daghan ka og mga rason nga mobalik aron sa pagsimba ug pagserbisyo Kaniya.” Nakurat ko sa dihang siya mitubag, “Unsay nabuhat Niya alang kanako?” (“Unsa ang Nabuhat sa Atong Manluluwas alang Kanato?,” Liahona, Mayo 2021, 75)
Pamalandongi unsay imong isulti ngadto sa babaye kon siya mosukna nimo niini nga pangutana.
-
Sa unsang paagi ang atong mga kinabuhi maapektohan kon kita mapakyas sa pag-ila o paghinumdom kon unsa ang gibuhat sa Manluluwas alang kanato?
Aron matabangan ang mga estudyante nga mapersonal ang leksiyon karon, ikonsiderar ang pagpangutana sa mosunod. Hatagi ang mga estudyante og panahon sa pagrekord sa ilang mga tubag diha sa ilang mga journal sa pagtuon.
-
Unsa ang nabuhat sa Manluluwas alang kanimo?
-
Unsay imong gibati mahitungod ni Jesukristo sa unsay Iyang nabuhat alang kanimo?
Samtang kamo magtuon sa Levitico karon, pagtinguha sa giya gikan sa Espiritu Santo mahitungod kon unsaon nimo pagpalawom sa imong pasalamat sa kon unsa ang gibuhat sa Ginoo alang kanimo.
Pagpangita ni Kristo diha sa mga sakripisyo
Aron sa pag-andam sa mga estudyante sa pagtuon sa Levitico, ikonsiderar ang pagpakita sa mga imahe gikan sa sinugdanan sa leksiyon. Dapita ang mga estudyante sa paghisgot unsay ilang nasayran mahitungod sa karaang ordinansa sa pagsakripisyo sa hayop. Pananglitan, pwede nimo silang pangutan-on kanus-a ang Dios misugo sa Iyang mga anak sa pagpahigayon og mga pagsakripisyo sa hayop ug nganong Siya mihatag niana nga sugo. Kon gikinahanglan, pwede nimong ipabasa sa mga estudyante ang Moises 5:6–7. Dayon ipangutana ang mosunod nga pangutana.
-
Unsay girepresentaran niini nga mga sakripisyo?
Tabangi ang mga estudyante nga makasabot nga gikan sa panahon ni Adan ug Eva, ang Dios misugo sa Iyang katawhan sa pagpahigayon og sakripisyo sa hayop aron pagtabang nila nga mahinamon sa Manluluwas ug sa Iyang maulaong sakripisyo. Kini nga naandan natapos sa pagkamatay sa Manluluwas kinsa mao ang “mahinungdanon ug kataposan nga sakripisyo” (Alma 34:10).
Ang basahon sa Levitico naglangkob sa mga direksiyon sa Ginoo alang sa hayop ug laing matang sa mga sakripisyo nga Iyang gipabuhat sa Iyang katawhan. Ang Levitico sama sa usa ka tamdanan nga basahon nga naghatag og mga instruksiyon alang sa mga ordinansa sa karaang Israel, mga ritwal, ug sagradong mga responsibilidad.
Hatagi og oportunidad ang mga estudyante sa pagtuon sa pipila sa mga sakripisyo nga gihulagway diha sa Levitico. Ang usa ka paagi sa pagbuhat niini mao ang paghatag sa handout nga nag-ulohang “Karaan nga Sakripisyo: Usa ka Simbolo ni Jesukristo.” Pwede nimong bulagon sa paghatag ang duha ka kalihokan gikan sa handout, o ihatag nimo kini isip usa ka handout.
Ikonsiderar ang pag-organisa sa mga estudyante nga magpares. Pwede pod nimong tahasan ang matag pares aron sa pagkompleto sa usa sa mga kalihokan. Ang mga estudyante mahimong motudlo dayon unsay ilang nakat-onan ngadto sa laing pares nga mikompleto sa lahi nga kalihokan. O mahimo nimong dapiton ang usa ka kauban sa matag pares sa pagkompleto sa Kalihokan nga Tun-an 1 ug ang laing kauban mokompleto sa Kalihokan nga Tun-an 2. Human ang mga estudyante indibidwal nga mokompleto sa ilang mga kalihokan, sila makatudlo sa matag-usa.
Human makompleto sa mga estudyante ang ilang pagtuon, dapita sila sa pagpakigbahin sa pipila sa ilang tubag sa mga pangutana sa handout. Pwede nimong gamiton ang mosunod nga pangutana aron sa pagtabang sa mga estudyante sa pagpamubo unsay ilang nakat-onan.
-
Unsaon nimo pagpamubo ngadto sa yano nga pamahayag unsay imong nakat-onan karon mahitungod sa Manluluwas ug sa Iyang maulaong sakripisyo?
Mahimong mopakigbahin ang mga estudyante og nagkalain-laing mga kamatuoran, nga sama sa:
-
Si Jesukristo andam nga mitanyag sa Iyang Kaugalingon isip sakripisyo alang kanato.
-
Mahimo kitang mapasaylo sa atong mga sala tungod sa Pag-ula ni Jesukristo.
-
Pinaagi sa Iyang maulaong sakripisyo, gibayran ni Jesukristo ang atong mga sala pinaagi sa pagdala niini ngadto sa Iyang Kaugalingon.
Aron mapalawman pa ang pagpasalamat sa mga estudyante niini nga mga kamatuoran, ikonsiderar ang pagpakigbahin sa mosunod nga pamahayag ug mga pangutana. Pwede nimong gamiton kini nga pamahayag sa Leksiyon 27: “Genesis 22.”
Si Presidente Dallin H. Oaks sa Unang Kapangulohan mipasabot nganong si Jesukristo mipahigayon sa Pag-ula:
Si Jesukristo mibuhat niining tanan tungod kay Siya nahigugma sa tanang mga anak sa Dios. Ang gugma mao ang hinungdan niining tanan, ug kini mao gikan pa sa sinugdanan. …
Ako … nag-ampo nga kitang tanan mahinumdom unsay nahimo sa atong Manluluwas alang sa matag usa kanato. (“Unsa ang Nabuhat sa Atong Manluluwas alang Kanato?,” Liahona, Mayo 2021, 75)
-
Sa unsang paagi kini nakatabang kanimo nga masayod nga si Jesukristo mitugot sa Iyang kaugalingon nga isakripisyo tungod sa Iyang gugma kanimo?
-
Unsa ang pipila ka mga paagi nga kita makahinumdom sa Ginoo ug sa Iyang sakripisyo?
Tabangi ang mga estudyante nga makasabot nga usa ka paagi nga kita makahinumdom sa sakripisyo sa Manluluwas mao ang pinaagi sa pag-ambit sa sakramento matag semana.
Aron matabangan ang mga estudyante nga makakita sa koneksiyon tali sa karaan nga sakripisyo ug sa sakramento, ikonsiderar ang pagpasalida sa bidyo nga “Always Remember Him” (5:27), nga anaa sa ChurchofJesusChrist.org. Mahimo dayon nimong ipangutana ang mosunod.
5:27 -
Sa unsang paagi ang sakramento susama sa karaang mga pagsakripisyo?
-
Sa unsang paagi ka naningkamot sa paghinumdom sa Manluluwas diha sa imong inadlaw-adlaw nga kinabuhi?
Unsa ang gibuhat ni Jesukristo alang kanako
Hatagi ang mga estudyante og panahon sa pagpamalandong sa ilang mga pagbati ngadto ni Jesukristo. Aron maandam sila sa pagbuhat niini, pwede nimong dapiton ang klase sa pagkanta sa “IAko Nagpabilin nga Natingala” (Mga Himno, nu. 114). Ang mga estudyante makaila sa mga hugpong sa mga pulong gikan sa himno nga nagpakita sa ilang mga pagbati ngadto sa Manluluwas.
Sa laing paagi, pwede nimong dapiton ang mga estudyante nga mopili sa usa ka lahi nga himno o usa ka kasulatan mahitungod sa Manluluwas ug sa Iyang Pag-ula. Pwede nilang ipakigbahin ang mga hugpong sa mga pulong nga nagpakita sa ilang mga pagbati ngadto Kaniya.
Dayon, dapita ang mga estudyante sa pagtubag sa mosunod nga mga pangutana diha sa ilang mga journal sa pagtuon.
-
Unsay imong gibati mahitungod sa Manluluwas ug unsa ang Iyang nahimo alang kanimo?
Ang andam nga mga estudyante mahimong mopahayag sa ilang mga hunahuna ug mga pagbati mahitungod sa Manluluwas. Ikonsiderar ang pagpakigbahin sa imong kaugalingong mga pagbati ug pagpamatuod mahitungod Kaniya.