“Levitico, Bahin 2: Pagsakripisyo alang sa Ginoo,” Manwal sa Magtutudlo sa Seminary sa Daang Tugon (2026)
“Levitico, Bahin 2: Pagsakripisyo alang sa Ginoo,” Manwal sa Magtutudlo sa Seminary sa Daang Tugon
Exodo 35–40; Levitico 1; 4; 16; 19: Leksiyon 54
Levitico, Bahin 2
Pagsakripisyo alang sa Ginoo
Ang karaang Israel mipahigayon og mga ritwal nga nagsimbolo ni Jesukristo ug sa Iyang Pag-ula. Lakip niini nga mga ritwal mao ang pagsakripisyo sa sinunog nga mga halad. Kini nga mga halad nagpakita usab sa mapadayonong pasalig sa Israel sa pagsakripisyo sa bisan unsa nga gipangayo sa Ginoo ngadto kanila. Kini nga leksiyon mahimong makatabang sa mga estudyante nga makaila sa mga sakripisyo nga ilang mahimo aron mas mahisama sa Langitnong Amahan ug ni Jesukristo.
Pagpangandam sa estudyante: Dapita ang mga estudyante sa pagbuhat og usa ka butang nga ilang gibati nga usa ka maayong sakripisyo alang sa Ginoo. Ang ubang mga ehemplo mahimong maglakip sa pagbayad sa ikapulo o mga halad sa puasa, pagsakripisyo sa panahon aron tabangan ang usa ka tawo nga nanginahanglan, o pagsakripisyo og pipila ka dugang nga mga minuto sa pagkatulog aron magtuon sa mga kasulatan. Dapita ang mga estudyante sa pagpamalandong kon sa unsang paagi kini nga sakripisyo makaapekto sa ilang relasyon ngadto sa Ginoo.
Posibleng mga Kalihokan sa Pagkat-on
Pagkaandam nga mosakripisyo
Ikonsiderar ang pagsugod sa klase pinaagi sa pagtabang sa mga estudyante nga makita ang bili sa pagkahimong andam sa paghimo og mga sakripisyo alang sa Ginoo. Mahimo nimo kini pinaagi sa pagsulat diha sa pisara sa mosunod nga pamahayag. Dapita ang mga estudyante sa paghisgot niini nga mga pangutana.
Ang yawi aron mahimong malampuson ang atong adlaw mao ang …
-
Unsaon man ninyo pagtapos niining kapahayag [sentence]?
-
Ngano kaha nga gibati nimong makatabang ang imong tubag sa usa ka tawo nga mahimong adunay malampuson nga adlaw?
Si Elder Taylor G. Godoy sa Seventy mipakigbahin sa mosunod kabahin sa usa ka malamposon nga adlaw:
Ang yawi aron mahimong malamposon ang atong adlaw mao ang pagkaandam nga mosakripisyo. (“Usa Nalang ka Adlaw,” Liahona, Mayo 2018, 34)
-
Ngano kaha sa inyong hunahuna ang pagkaandam nga mosakripisyo makahimong malamposon sa atong adlaw?
Ikonsiderar ang pagsulat sa mga tubag sa mga estudyante sa mosunod nga pangutana diha sa pisara. Pwede nga inyong himoong basehan kini nga mga tubag sa lahilahi nga mga punto sa tibuok leksiyon.
-
Unsa ang pipila ka mga sakripisyo nga gipangayo sa Ginoo kanato nga inyong gibati nga magdala sa malamposong adlaw, semana, o kinabuhi?
Ikonsiderar ang pagdapit sa mga estudyante sa pagpamalandong sa ilang pagkaandam sa paghimo og mga pagsakripisyo alang sa Ginoo. Usa ka paagi aron mahimo ninyo kini mao ang pagpakita sa usa ka tsart nga pie [lingin]. Ihatag ang mosunod nga mga instruksiyon.
Paghimo og tsart nga pie sa imong journal sa pagtuon. Butangi og porsyento (0 ka porsyento ngadto sa 100 ka porsyento) nga imong gibati nga nagpakita sa imong kaandam sa milabayng semana aron sa pagsakripisyo alang sa Ginoo. Dayon pamalandongi ang mosunod nga mga pangutana:
-
Kon gibati nimo nga ang imong porsyento taas, nganong andam ka nga mosakripisyo alang sa Ginoo?
-
Kon imong gibati nga mubo ang imong porsyento, unsa kahay nakapugong kanimo gikan sa pagkahimong mas andam sa pagsakripisyo?
Ikonsiderar ang pag-ampo sa hilom. Hangyoa ang Langitnong Amahan sa pagtabang kanimo nga makasabot unsay gusto Niya nga imong masayran ug buhaton mahitungod sa imong personal nga mga pagsakripisyo. Atol niini nga leksiyon, bantayi ang imong mga hunahuna ug mga pagbati nga mahimong moabot pinaagi sa Espiritu Santo.
Mga Halad nga Sinunog
Sa Levitico 1, ang Ginoo misugo sa mga Esraelita sa paghimo og sinunog nga mga halad. Ang mga pari naghimo niini nga mga halad matag adlaw. Ang mga halad simbolo sa Pag-ula sa Manluluwas. Kini usab nga mga halad timaan sa padayon nga pasalig sa Israelita ngadto sa Ginoo.
Basaha ang Levitico 1:3, 8–9, nga mangita sa mga pulong ug hugpong sa mga pulong nga mahimong malambigit sa mga sakripisyo nga tingali atong mahimo alang sa Ginoo karon.
-
Unsay imong nakaplagan?
Kon nagkinahanglan og tabang ang mga estudyante, pwede ninyong ipasabot ang pipila sa mosunod:
-
“Boluntaryo niya kining kagustohan nga ihalad” (bersikulo 3).
-
“Ulo,” “tambok,” “mga sulod,” ug “mga paa” (mga bersikulo 8–9). Kini nga lainlain nga mga parte sa mga hayop mahimong simbolikanhon nga halad sa bisan unsa nga Iyang gipangayo kanato, lakip na ang atong mga kasingkasing, mga hunahuna, ug mga lawas.
-
“Mosunog sa tibuok sa ibabaw sa halaran” (bersikulo 9). Ang pagsunog sa tibuok hayop ibabaw sa altar nagrepresentar sa bug-os nga pasalig ngadto sa Ginoo.
-
“Usa ka kahumot alang sa Ginoo” (bersikulo 9). Kini mahimong nagpasabot nga ang atong mga sakripisyo tam-is ug makapahimuot ngadto sa Langitnong Amahan ug sa Manluluwas.
Si Jesukristo mao ang hingpit nga ehemplo sa paghalad og sakripisyo.
-
Sa unsa nga paagi makatabang kanato ang kaandam sa pagsakripisyo nga mas mahisama sa Manluluwas?
Usa ka leksiyon nga atong makat-onan pinaagi sa pagsabot sa sinunog nga mga halad mao nga kita mahimong mas mahisama sa atong Manluluwas samtang kita andam sa pagsakripisyo sa bisan unsa nga gipangayo sa Langitnong Amahan kanato.
Pagpakabuhi diha sa balaod sa sakripisyo sa atong panahon
Human makompleto ang maulaong sakripisyo ni Jesukristo, Iyahang gipasibo [adjust] ang matang sa sakripisyo nga Iyang gipangayo nga himoon sa mga tawo (tan-awa sa 3 Nephi 9:19–20). Bisan sa pagkakaron wala kita mosakripisyo og mga hayop, ang Ginoo mihangyo gihapon sa Iyang katawhan sa paghimo og mga sakripisyo. Ang mga sakripisyo naglakip labaw pa sa pagtugyan sa atong temporal nga mga kabtangan.
Ipakita ang mosunod nga mga instruksiyon, mga tudling sa kasulatan, ug mga pangutana. Pwede nimong dapiton ang mga estudyante nga kompletohon kini nga sila ra.
Tun-i ang duha o sobra pa sa mosunod nga mga tudling, nga mangita sa mga panabot nga makatabang nimo nga makatubag sa mga pangutana sa ubos.
-
Mga Taga-Roma 12:1–2
-
-
Sa unsang paagi kini nga mga tudling magamit nimo aron makatabang sa usa ka tawo nga makasabot unsa ang gusto sa Ginoo kanato nga isakripisyo sa atong panahon?
-
Sa unsang paagi ang pagsakripisyo niini nga mga paagi makatabang kanato nga mas mahisama sa Manluluwas?
-
Ngano kaha sa imong hunahuna nga mahimong lisod sa pipila ka tawo nga mahimong andam sa pagsakripisyo unsa ang gipangayo sa Ginoo kanila?
-
Pagdapit og mga boluntaryo sa pagpakigbahin unsa ang ilang nakat-onan ug unsaon nila pagtubag sa duha ka pangutana sa ibabaw. Mahimo usab tingali ninyong hisgotan sa unsa kini nga mga bersikulo magamit sa mga sakripisyo nga ilang gilista sa pisara sa sayo pa sa leksiyon. Kini nga panaghisgot mahimong modala ngadto sa sunod nga pangutana.
Mga panalangin sa pagsakripisyo
Ikonsiderar ang pagbahin sa mga estudyante ngadto sa gagmay nga mga grupo. Dapita sila sa paggamit sa ilang mga tubag sa nangagi nga pangutana aron makahimo og senaryo diin ang usa ka tawo mahimong magduhaduha sa pagsakripisyo unsa ang gipangayo sa Ginoo kanila. Ang mosunod mao ang usa ka yano nga ehemplo. Dapita ang mga estudyante sa paghisgot sa kauban nga pangutana diha sa ilang mga grupo. Aron makatabang niini nga panaghisgot, ang mga estudyante mahimong magtuon sa “Sakripisyo” diha sa Giya ngadto sa mga Kasulatan.
Handurawa nga kamo adunay higala nga mibati nga wala silay igong panahon sa paghimo niining mga sakripisyo nga gipangayo sa Ginoo kanila.
-
Unsa ang imong mahimong ipakigbahin nga mahimong makatabang nga maresolbar ang pipila ka mga pangutana sa imong higala?
Dapita ang pipila ka grupo sa pagpakigbahin sa ilang mga hunahuna. Samtang mopakigbahin sila, ikonsiderar ang pag-follow-up og mga pangutana nga sama sa “Unsay ganahan ninyo sa inyong higala nga masayran mahitungod sa Langitnong Amahan ug ni Jesukristo nga makatabang nila nga mahimong mas andam sa paghimo og sakripisyo alang Kanila?” o “Unsa nga personal nga mga kasinatian ang mahimo ninyong ipakigbahin nga nagtudlo ninyo og bili sa paghimo og mga sakripisyo alang sa Ginoo?”
Aron mapalawman pa ang pagsabot mahitungod sa sakripisyo, mahimo nimong ipakita ang mosunod nga pamahayag.
Si Elder Ulisses Soares sa Kurom sa Napulog Duha ka Apostoles mipakigbahin sa pipila ka panalangin nga gihatag sa Ginoo samtang kita mohimo og mga sakripisyo ngadto Kaniya:
Ang atong determinasyon nga walay buhaton supak sa kabubut-on sa Dios ug sa pagsakripisyo sa tanan nga gisugo nga ihatag ug sa pagsunod sa Iyang mga pagtulun-an makatabang nato sa paglahutay diha sa dalan sa ebanghelyo ni Jesukristo—bisan sa nasinati nga kalisdanan, kahuyang sa atong kalag, o sosyal nga pagpamugos ug kalibotanong mga pilosopiya nga supak sa Iyang mga pagtulun-an. (“Magpas-an sa Atong Krus,” Liahona, Nob. 2019, 114)
-
Unsa ang imong nakat-onan mahitungod sa Ginoo ug sa Iyang mga rason sa paghangyo kanato sa pagsakripisyo?
Personal nga sakripisyo
Dapita ang mga estudyante nga mamalandong sa mga impresyon nga ilang nadawat. Ikonsiderar ang pagpakita sa mosunod nga mga instruksiyon. Kon makatabang, ang mga estudyante mahimong motan-aw sa lista sa mga sakripisyo sa pisara samtang ilang kompletohon kini nga kalihokan.
Kompletoha ang usa sa mosunod diha sa imong journal sa pagtuon:
-
Usa ka sakripisyo nga ako andam sa paghimo alang sa Langitnong Amahan mao ang …
Butang nga akong nakat-onan karon nga makatabang kanako nga magpadayon o ipalambo kini nga sakripisyo mao ang …
-
Usa ka butang ang akong sugdan o hunongon sa pagbuhat aron sa pagpakita sa akong kaandam sa pagsakripisyo alang sa Ginoo mao ang …
Butang nga akong nakat-onan karon nga makatabang kanako nga mohimo niini nga kausaban mao ang …
Mahimo nimong dapiton ang mga estudyante sa pagpakigbahin unsay ilang gisulat uban sa ilang pagpamatuod kon unsa ang ilang nakat-onan o nabatyagan.