Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻEkesōtosi 16: Meʻakai Fakaʻahó

“ʻEkesōtosi 16: Meʻakai Fakaʻahó,” Fuakava Motuʻá – Tohi Lēsoni ʻa e Faiako Seminelí (2026)

“ʻEkesōtosi 16: Meʻakai Fakaʻahó,” Fuakava Motuʻá – Tohi Lēsoni ʻa e Faiako Seminelí

ʻEkesōtosi 14–18: Lēsoni 47

ʻEkesōtosi 16

Meʻakai Fakaʻahó

Hili hono fakahaofi ʻe he ʻEikí Hono kakaí mei ʻIsipité, naʻa nau fehangahangai mo ha ngaahi faingataʻa foʻou mo ha ngaahi faingamālie ke nau tupulaki ai. Naʻe ʻikai ke toe lava ʻa e kakai ʻIsilelí ʻo fakafalala ki he kau ʻIsipité ke nau ʻoange ʻa e ngaahi fie maʻu tefito hangē ko e meʻakaí mo e vaí. Naʻe fie maʻu ke nau ako ke fakafalala ki he ʻEikí ki heʻenau ngaahi fie maʻu fakaʻahó. ʻE lava ke tokoni ʻa e lēsoni ko ʻení ke fakafalala fakaʻaho ʻa e kau akó ki he ʻEikí.

Teuteu ʻa e tokotaha akó: Fakaafeʻi e kau akó ke fekumi ki ha fakamoʻoni ʻo e mālohi ʻo e ʻEikí ʻi heʻenau moʻuí ʻi he vahaʻa ʻo e taimí ni mo e kalasi hokó. Poupouʻi ke nau tuku ha taimi ʻi heʻenau lotu fakataautaha pe fakafāmilí ke fakamālō ki he Tamai Hēvaní ʻi Heʻene tokoní.

Ngaahi ʻEkitivitī Ako ʻOku Ala Fakahokó

Ko e fie maʻu ke fafanga fakaʻahó

Fakakaukau ke kamata e kalasí ʻaki hono aleaʻi e ngaahi meʻa ʻoku fie maʻu ʻe hotau sinó ʻi he ʻaho kotoa pē. Hangē ko ʻení, te ke lava ʻo fakaʻaliʻali ha mā. Fakaafeʻi ha tokotaha ako ʻoku fiekaia ke haʻu ki muʻa ʻi he kalasí pea kai ha meʻi mā. ʻI he kai ʻa e tokotaha akó, fai ange e ngaahi fehuʻi ko ʻení:

Ko e fē taimi naʻá ke kai fakamuimui aí?
Kapau naʻá ke toki kai pē, ko e hā ʻokú ke fiekaia ai he taimi ní?
Ko e hā ʻoku fie maʻu ai ke tau kai maʻu peé?

Naʻe fakafehoanaki ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa hono fafanga hotau sino fakamatelié ki hono tokangaʻi hotau laumālié:

ʻOku tau ʻiloʻi kotoa ʻa e fie maʻu ke ʻi ai ha fakaivia fakatuʻasinó. ʻOku fakamanatu mai ʻe he fiekaiá mo e fieinuá kapau ʻe ngalo ʻiate kitautolu. Ka ʻoku mālohi tatau pē ʻa e fie maʻu fakalaumālie ʻo e tokoní. (“Daily Bread: Pattern,” Gospel Library)

ʻOkú ke pehē ko e hā ʻoku mahuʻinga tatau ai ʻa e fie maʻu ke fafanga hotau laumālié mo hono tokangaʻi hotau sinó?
Ko e hā ʻe faingofua ai ke taʻe-fakatokangaʻi ʻetau ngaahi fie maʻu fakalaumālié?

Tuku ha kiʻi taimi ke ke fakalaulauloto ai ki he ngaahi fehuʻi ko ʻení. Fakakaukau ke lekooti hoʻo ngaahi fakakaukaú ʻi hoʻo tohinoa akó:

ʻOkú ke ongoʻi nai ʻa e holi tatau ke tokangaʻi ho laumālié ʻi he ʻaho kotoa pē ʻo hangē ko ia ʻokú ke fai ki ho sinó? Ko e hā hono ʻuhinga ki hoʻo tali ʻio pe ʻikaí?
Ko e hā ʻokú ke ongoʻi ʻe finangalo ʻa e Tamai Hēvaní ke ke fai ʻi he ʻaho takitaha ke tokangaʻi ai ho laumālié?

Fekumi ki ha ueʻi fakalaumālie ke ke ʻiloʻi ʻa e meʻa te ke lava ʻo hokohoko atu hono faí, pe ko e meʻa te ke lava ʻo liliu, ke ʻoange ki ho laumālié ʻa e mālohi fakaʻaho mei he ʻEikí ʻokú ne fie maʻú.

Ko e fakafalala fakaʻaho ki he ʻEikí

Hili e kolosi ʻa e kau ʻIsilelí ʻi he Tahi Kulokulá, naʻa nau “tui [ki he ʻEikí], mo ʻene tamaioʻeiki ko Mōsesé” (ʻEkesōtosi 14:31). Naʻa nau hiva mo tauʻolunga ke fakafetaʻi ki he ʻEikí ʻi hono fakahaofi kinautolú (vakai, ʻEkesōtosi 15:1–21). Ka neongo ia, naʻe ʻikai fuoloa e fakafetaʻi ʻa e kau ʻIsilelí ki he ʻEikí. Lolotonga hono tataki kinautolu ʻe Mōsese ki he Moʻunga Sainaí, naʻa nau fehangahangai mo ha ngaahi palopalema kehekehe, pea naʻe siviʻi ai ʻenau tuí.

Lau ʻa e ʻEkesōtosi 16:2–4, 11–15, ʻo kumi e founga naʻe tokonaki ai ʻe he ʻEikí e ngaahi fie maʻu ʻa e kakai ʻIsilelí.

Ko e hā ʻa e meʻa naʻá ke maʻú?

Fakakaukau ke fakaafeʻi e kau akó ke fakaʻilongaʻi ʻa e foʻi lea “ma” ʻi he ʻEkesōtosi 16:15 pea ke fakafekauʻaki pe fakafehokotaki ia ki he Sione 6:47–51.

Lau ʻa e Sione 6:31–35, 47–51, ʻo kumi e meʻa naʻe akoʻi ʻe Sīsū fekauʻaki mo e maná.

Ko e hā ha ngaahi founga ʻoku faitatau ai ʻa e maná mo Sīsū Kalaisí?
ʻOku lelei fēfē ange ʻa e meʻa ʻoku foaki mai ʻe Sīsū maʻatautolú ʻi he maná?

Vahevahe e ngaahi tali tonú hili e ʻosi ʻa e kau akó: 1. Moʻoni; 2. Hala; 3. Hala; 4. Moʻoni; 5. Moʻoni; 6. Hala; 7. Moʻoni; 8. Hala.

ʻE fakaʻaongaʻi fēfē nai ʻa e ngaahi fakaikiiki ko ʻeni fekauʻaki mo e maná ki heʻetau fie maʻu ha meʻakai fakalaumālié?
Ko e hā ʻe lava ke akoʻi atu ʻe he ngaahi fakaikiiki ko ʻeni fekauʻaki mo e maná kau ki hono maʻu ʻo e meʻakai fakalaumālie meia Sīsū Kalaisí?

Naʻe lea ʻa ʻEletā Kulisitofasoni fekauʻaki mo ʻetau fie maʻu ke fafangaʻi fakalaumālie fakaʻaho kitautolu mei he ʻEikí:

ʻOku ʻikai totonu ke tau fakakaukau ʻe ʻikai te tau faingataʻaʻia pea uesia hotau ivi fakalaumālié kapau ʻe lau uike pe māhina ha ʻikai ke tau maʻu ha meʻakai fakalaumālie. ʻOku tokoni e ʻiloʻi ʻo e fie maʻu ha tokoni fakalaumālie fakaʻahó, pe maná, ke tau loto-toʻa ange ke fai e meʻa ʻoku totonú pea tokoniʻi e niʻihi kehé, ʻo lahi ange ia ʻi haʻatau taʻetokanga ki he ʻOtuá. (“Daily Bread: Pattern,” Gospel Library)

Ko e hā ʻoku lelei ange ai ʻa e fakafalala fakaʻaho ki he ʻEikí ʻi he ngaahi aʻusia fakalaumālie mālohi mo maʻongoʻonga ʻoku tātātaha ʻene hokó?

Meʻakai fakaʻahó

ʻOange e ngaahi fakahinohino ko ʻení. Makehe mei he ngaahi potufolofola ʻoku fokotuʻu atú, ʻe lava ke kumi ʻe he kau akó ha ngaahi fakamatala mei he kau taki ʻo e Siasí ʻaki ʻenau fekumi ʻi he ngaahi foʻi lea pe kupuʻi lea hangē ko e “fakaʻaho” pe “ʻaho takitaha” ʻi he Gospel Library.

Fakahingoa ʻi hoʻo tohinoa akó ha peesi “Meʻakai Fakaʻahó: Sīsū Kalaisi.” ʻI he vaeuaʻanga mālie ʻo e pēsí, tā ai ha foʻi mā. Ako e ngaahi potufolofola ko ʻení, ʻo kumi ha ngaahi meʻa te tau lava ʻo fai ʻi he ʻaho kotoa pē ke fakafalala ki he ʻEikí mo maʻu ha meʻakai fakalaumālie. Hiki takatakai e meʻa ʻokú ke maʻú ʻi hoʻo fakatātā ʻo e foʻi maá.

Teutalōnome 8:3
1 Nīfai 17:3
2 Nīfai 32:3
ʻAlamā 37:36–37

Fakaafeʻi e kau akó ke aleaʻi e meʻa ne nau ʻiló ʻaki hono fai ha ngaahi fehuʻi hangē ko ʻení. Te ke lava ʻo poupouʻi e kau akó ke tānaki atu ha ngaahi fakakaukau ki heʻenau tohinoa akó ʻi heʻenau ako mei honau kaungāakó.
Ko e fē ʻi he ngaahi ngāue ko ʻení kuó ne tokoniʻi koe ke fakaafeʻi fakaʻaho ʻa e Mā ʻo e Moʻuí, ʻa Sīsū Kalaisi, ki hoʻo moʻuí? Ko e hā e ola ʻo ʻEne fafangaʻi pe fakamālohia koé?
Makehe mei he meʻa naʻá ke maʻu ʻi he folofolá, ko e hā ha ngaahi meʻa kehe ʻokú ke feinga ke fai ʻi he ʻaho takitaha ke ke fakafalala ai ki he ʻEikí?
Ko e hā te ke talaange ki ha taha ʻokú ne ongoʻi ʻoku ʻikai fie maʻu ke ne fai e ngaahi meʻa ko ʻení?

Kapau ʻoku toe lahi e taimí, fakakaukau ke hivaʻi mo e kalasí ha himi fekauʻaki mo ʻetau fie maʻu ʻa e ʻEikí, hangē ko e “ʻOku ou Fie Maʻu Koe” (Ngaahi Himí, fika 48). ʻE lava ke vahevahe ʻe he kau akó ha ngaahi laine mei he himí ʻoku mahuʻingamālie kiate kinautolu.

Sio ki he lisi naʻá ke hiki takai ʻi he foʻi mā ʻi hoʻo tohinoa akó. Siakaleʻi ha fakakaukau ʻe taha pe ua ʻokú ke ongoʻi ʻe finangalo ʻa e ʻEikí ke ke kamata fakahoko pe fakahoko ʻi ha founga kehe ke ke fakafalala lelei ange ai kiate Ia ʻi he ʻaho takitaha. Hili ia pea tali leva e ngaahi fehuʻi ko ʻení:

Ko e fē ʻa e taimi mo e feituʻu te ke fai ai ʻa e meʻá ni ʻi he ʻaho takitaha?
Ko e hā ha ngaahi faingataʻa ʻe fie maʻu ke ke ikunaʻi ke hoko ʻeni ko ha konga ʻo hoʻo ngāue fakaʻahó? Te ke ikunaʻi fēfē e ngaahi faingataʻa ko ʻení?
ʻOkú ke pehē ʻe liliu fēfē ʻe hono fai ʻo e meʻa ko ʻení ʻi he ʻaho kotoa peé ho vā fetuʻutaki mo e Tamai Hēvaní mo Sīsū Kalaisi ʻi he fakalau ʻa e taimí?

Fakaʻosi ʻaki hano vahevahe hoʻo ngaahi fakakaukau mo e ngaahi ongo fekauʻaki mo e fie maʻu ke tau fakafalala ki he ʻEikí ʻi he ʻaho takitaha. Kumi ha ngaahi faingamālie ʻi he ngaahi lēsoni he kahaʻú ke muimuiʻi ai e ngaahi ngāue ʻa e kau akó. Te ke lava foki ʻo toutou fakamatala ki hoʻo kau akó ʻa e tūkunga hoʻo feinga fakaʻaho ke fakafalala ki he ʻEikí.

Ngaahi Maʻuʻanga Tokoni Kehé

Te u lava fēfē ʻo maʻu ha meʻakai fakalaumālie mei he ʻEikí ʻi he ʻaho takitaha?

Naʻe fakamoʻoni ʻa Palesiteni Lāsolo M. Nalesoni ʻo pehē:

17:18

ʻE holofa vave ʻaupito ha fakamoʻoni ʻoku ʻikai ke fafanga fakaʻaho “ʻaki ʻa e folofola lelei ʻa e ʻOtuá” [Molonai 6:4]. Ko ia ai, ʻoku mahino ʻa e faitoʻo ki he founga ʻa Sētané: ʻOku tau fie maʻu ke fai ha moihū fakaʻaho ki he ʻEikí mo ako ʻEne ongoongoleleí. (“Ko e Mālohi ʻo e Ivi Fakalaumālié,” Liahona, Mē 2022, 99)

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:13

Naʻe fiefia ʻa e fānau ʻIsilelí ʻi he maʻu meʻatokoni mei he kueilí ʻi he toafá, ka ko e meʻa naʻá ne tauhi kinautolu ke nau moʻuí ko e fanga kiʻi mana iiki mo faingofua ʻo e maná—ʻa ʻenau meʻakai fakaʻahó [vakai, ʻEkesōtosi 16].

ʻE kāinga, ʻoku lelei taha ange ke teuteuʻi mo tufaki ʻa e meʻakai fakaʻahó ʻi ʻapi. ʻOku tanumaki lelei taha ʻa e tuí mo e fakamoʻoní ʻi he ngaahi founga angamaheni mo fakanatulá, ʻo fakatupulaki ʻaki ʻi he sitepu ʻe taha ʻi he taimi pē ʻe taha, ʻi he ngaahi momeniti ʻoku iiki mo faingofuá ʻi he hokohoko atu ʻa e moʻui fakaʻahó. (“Ko Sīsū Kalaisi ʻa e Mālohinga ʻo e Mātuʻá,” Liahona, Mē 2023, 57)

Ko e hā mo ha toe meʻa te tau lava ʻo ako mei he fakamatala ʻo hono foaki fakaʻaho ʻe he ʻOtuá ha mana ki he kakai ʻIsilelí?

Naʻe vahevahe ʻe ʻEletā D. Toti Kulisitofasoni ha ngaahi lēsoni lahi ange ʻi he “Meʻakai Fakaʻahó: Meʻa ke Aʻusiá” (3:12) mo e “Daily Bread: Change” (3:00).

2:59

2:48

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fakaʻaliʻali ha meʻakai kehekehe ʻe ua: ko e taha ʻoku tolonga fuoloa (hangē ko e laisé) pea taha ʻoku ʻikai tolonga fuoloa (hangē ko e maá pe fuaʻiʻakaú).

ʻOkú ke pehē ko e hā hono fuoloa ʻo e tolonga ʻa e meʻakai takitaha ko ʻení kimuʻa pea nau maumaú?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí “ʻoku taimi nounou pē e tolonga ʻa e tui lahí” (“Spiritual Preparedness: Start Early and Be Steady,” Liahona, Nov. 2005, 39).

ʻOkú ke pehē ko e hā e ʻuhinga ʻa Palesiteni ʻAealingí?

Mahalo ʻe vahevahe ʻe he kau akó kapau ʻoku ʻikai ke tau hokohoko atu hono langaki ʻetau tui kia Sīsū Kalaisí, ʻe lava ke fakavaivaiʻi pe mole atu ʻa e tui ko iá. ʻI hono ako ʻe he kau akó ʻa e ʻEkesōtosi 16, fakaafeʻi ke nau fakakaukau ki ha ngaahi founga te nau lava ai ʻo fakamālohia fakaʻaho ʻenau tui ki he ʻEikí, kae ʻikai fakafalala ki he ngaahi aʻusia he kuohilí.

Ko e sivi ʻo e talangofuá

Fakaafeʻi e kau akó ke fakafekauʻaki pe fakafehokotaki e ʻEkesōtosi 16:4 mo e ʻĒpalahame 3:25. Kole ange ke nau lau ʻa e potufolofola takitaha, ʻo kumi ha taha ʻo e ngaahi ʻuhinga ʻoku ʻomi ai ʻe he ʻOtuá ha ngaahi fekau kiate kitautolú.

Ko e hā ʻoku faingataʻa ai he taimi ʻe niʻihi ke talangofua ki he ʻEikí?
Ko e hā ʻe lava ʻo tokoni ke tau ikunaʻi ai ʻa e ngaahi faingataʻa ko ʻení?

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e moʻui fakamatelié ko ha vahaʻa taimi ia ʻo e siviʻi, ke vakai pe te tau fai e meʻa kotoa pē ʻe fekau mai ʻe he ʻEiki ko hotau ʻOtuá. ʻE fie maʻu heni ʻa e tui taʻeveiveiua kia Kalaisí ʻo aʻu ki he ngaahi taimi ʻo e faingataʻa lahí. ʻE fie maʻu ia ke tau vilitaki atu ki muʻa ʻi he tui mālohi kia Kalaisi, ʻo tataki kitautolu ʻe he Laumālié pea fakafalala ʻe tokonaki ʻe he ʻOtuá ʻetau ngaahi fie maʻú. (“Falala Taʻeveiveiua ki he ʻOtuá,” Liahona, Mē 2017, 33)

Kuo tokonaki fēfē ʻe he ʻEikí hoʻo ngaahi fie maʻú ʻi hoʻo feinga ke fai ʻo hangē ko ʻEne fekaú?

Ko e fakafalala ki he ʻEikí ʻo fakafehoanaki mo e [falala ki he] ngaahi maʻuʻanga tokoni kehé

Tokoni ke ʻiloʻi ʻe he kau akó ʻa e ngaahi tāpuaki ʻo e fakafalala ki he ʻEikí ʻi hono fakafehoanaki ki he ngaahi palopalema ʻe ala hoko ʻi he fakafalala ki he ngaahi maʻuʻanga tokoni kehé. Te ke lava ʻo fakamanatu ki he kau akó naʻe kimuʻa pea ʻalu ʻa e kakai ʻIsilelí ki he toafá, naʻe ʻoange ʻe ʻIsipite ha meʻakai mo ha vai kiate kinautolu (vakai, ʻEkesōtosi 16:2–3).

Ko e hā naʻe lelei ange ai ki ʻIsileli ke nau fakafalala fakaʻaho ki he ʻEikí ʻi haʻanau fakafalala ki ʻIsipité?

Tokoni ke mahino ki he kau akó neongo naʻe foaki ʻe ʻIsipite ha meʻakai maʻa ʻIsileli, ka naʻa nau tauhi foki ʻa ʻIsileli ko ha kau nofo pōpula pea fakaʻilo ʻenau ngaahi tui mo e tukufakaholo halá ki ʻIsileli. Naʻe hoko e fakafalala ʻa ʻIsileli ki he ʻEikí ke nau maʻu ai mo honau hakó ha tauʻatāina mo e ivi malava ke fakalakalaka. Naʻe faifai pea aʻu ʻa ʻIsileli ki he fonua ʻo e talaʻofá.

Ko e hā ha ngaahi maʻuʻanga fakamatala ʻe ala ʻahiʻahiʻi ai kitautolu ke tau fakafalala ki ai kae ʻikai fakafalala ki he ʻEikí?
Ko e hā ʻoku lelei ange ai kiate kitautolu ke fakafalala ki he ʻEikí ʻi he fakafalala ki he kakai kehé pe ngaahi meʻa kehé?

Ko e ʻaho Sāpaté

ʻI he ako ʻa e kau akó fekauʻaki mo e maná, fakakaukau ke kole ange ke vahevahe ʻa e ngaahi tefitoʻi moʻoni ʻoku nau ʻilo fekauʻaki mo e ʻaho Sāpaté. ʻE lava ke nau tala atu naʻe ngāue lahi ange ʻa ʻIsileli ʻi he ʻaho hono onó koeʻuhí ke nau lava ʻo mālōlō ʻi he Sāpaté. Mahalo te nau fakatokangaʻi foki naʻe foaki ʻe he ʻEikí ha meʻa lahi ange maʻa ʻIsileli ʻi he ʻaho hono onó koeʻuhí ke nau lava ʻo tauhi ʻa e ʻaho Sāpaté ke māʻoniʻoni. Tokoni ke aleaʻi ʻe he kau akó ʻa e ngaahi meʻa ʻoku faitatau mo ʻetau moʻuí ʻaki hono fehuʻi ange:

Ko e hā ha ngaahi meʻa kehe ʻe niʻihi ʻe ala fie maʻu ke tau fai lolotonga e uiké kae lava ke tau tauhi lelei ange ai ʻa e ʻaho Sāpaté ke māʻoniʻoni?
Kuo foaki fēfē mai ʻe he Tamai Hēvaní mo Sīsū Kalaisi ha meʻa fakatuʻasino mo fakalaumālie maʻau mo ho fāmilí ʻi hoʻo feinga ke tauhi ʻa e ʻaho Sāpaté ke māʻoniʻoní?