Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻEkesōtosi 14: “ʻOua Te Mou Manavahē”

“ʻEkesōtosi 14: ‘ʻOua Te Mou Manavahē,’” Fuakava Motuʻá – Tohi Lēsoni ʻa e Faiako Seminelí (2026)

“ʻEkesōtosi 14: ‘ʻOua Te Mou Manavahē,’” Fuakava Motuʻá – Tohi Lēsoni ʻa e Faiako Seminelí

ʻEkesōtosi 14–18: Lēsoni 45

ʻEkesōtosi 14

“ʻOua Te Mou Manavahē”

The Old Testament prophet Moses standing with his arm extended toward the Red Sea. Moses is commanding the Red Sea to part to allow the Israelites to escape the Pharoah of Egypt.

Mahalo te tau ongoʻi he taimi ʻe niʻihi ʻoku siva ʻetau ʻamanakí, ʻo meimei tatau mo e ongo naʻe maʻu ʻe he kau ʻIsilelí lolotonga ʻenau fihia ʻi he vahaʻa ʻo e Tahi Kulokulá mo e kau tau ʻa Feló. Ka neongo ia, ʻoku kei ʻaonga pē ʻa e faleʻi ʻa Mōsese kiate kinautolú kiate kitautolu he ʻahó ni: “ʻOua te mou manavahē, tuʻu fakalongolongo pē, ʻo mamata ki he fakamoʻui [ʻa e ʻEikí]” (ʻEkesōtosi 14:13). ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e holi ke falala ki he ʻEikí ki ha mālohi mo ha fakahaofi.

Teuteu ʻa e tokotaha akó: Fakaafeʻi e kau akó ke nau ako ʻa e ʻEkesōtosi 14:13–14 pea fakakaukau ki he ngaahi tafaʻaki ʻo ʻenau moʻuí ʻe lava ke tokoni ai ʻa e ngaahi veesi ko ʻení.

Ngaahi ʻEkitivitī Ako ʻOku Ala Fakahokó

ʻĀkilotoa ʻe he ngaahi faingataʻá

Tokoniʻi e kau akó ke nau fakakaukau ki he ngaahi faingataʻa ʻi heʻenau moʻuí ʻe lava ke ne ʻai ke nau ongoʻi lōmekina pe fihia ai. Ko e founga ʻe taha ke fakahoko ai ʻení ko hono vahevahe ʻa e lea ko ʻeni meia Brother Militoni Kamako ʻo e Kau Palesitenisī Lahi ʻo e Lautohi Faka-Sāpaté. Te ke lava ʻo hiki e faleʻi ʻa ʻene tamaí ʻi lotomālie he palakipoé.

Naʻe vahevahe ʻe Brother Militoni Kamako, ko e Tokoni ʻUluaki ʻi he Kau Palesitenisī Lahi ʻo e Lautohi Faka-Sāpaté ha faleʻi mei heʻene tamaí:

Naʻe faʻa talamai ʻe heʻeku tangataʻeikí kiate au, “ʻOua te ke fuʻu tokanga taha pē ki hoʻo ngaahi palopalemá ʻo ʻikai ke ke toe lava ai ʻo fakatokangaʻi ʻa e founga ke fakaleleiʻi aí.” (“Tokanga Taha kia Sīsū Kalaisi,” Liahona, Mē 2023, 64)

Kole ki he kau akó ke vahevahe ʻenau fakakaukau ki he meʻa naʻe akoʻi ʻe he tamai ʻa Brother Kamakó. Fakaafeʻi leva kinautolu ke hiki takatakai ʻi he fakamatala ʻi he palakipoé ha faʻahinga palopalema, faingataʻa, pe ʻahiʻahi ʻe ala faingataʻa kiate kinautolu ke nau sio ki ha founga ke fakaleleiʻi ai.

ʻE lava ke tali leʻolahi ʻe he kau akó ʻa e ʻuluaki fehuʻi ʻo e ngaahi fehuʻi ko ʻení. ʻI he fehuʻi hono uá, mahalo ʻe fakapotopoto ke fakaafeʻi kinautolu ke fakalaulauloto fakalongolongo ki heʻenau ngaahi talí.

Fakalaulauloto ki ha ngaahi taimi naʻá ke ongoʻi ai naʻe ʻikai ha founga ke fakaleleiʻi ʻaki e ngaahi palopalema kuó ke fehangahangai mo iá.

Ko e hā ha ngaahi founga ʻe fakahoko ai ʻe ha taha ha tali ʻi ha ngaahi tūkunga pehē?
Ko e hā e founga angamaheni ʻokú ke faʻa tali ʻaki ai e ngaahi tūkunga peheé?

ʻI hoʻo ako ʻa e ʻEkesōtosi 14 he ʻaho ní, fekumi ki ha ueʻi fakalaumālie mei he Laumālie Māʻoniʻoní ke tokoniʻi koe ke fakatupulaki hoʻo holi ke falala ki he ʻEikí ʻi hoʻo fehangahangai pe teuteu ke fehangahangai mo e ngaahi faingataʻá mo e ʻahiʻahí.

Ko e ngaahi faingataʻaʻia ʻa e kau ʻIsilelí

Ke tokoni ke mahino ki he kau akó ʻa e tūkunga ʻo e kakai ʻIsilelí ʻi he ʻEkesōtosi 14, fakaʻaliʻali pe tokoniʻi kinautolu ke nau kumi ʻa e mape 2 ʻi he Ngaahi Mape ʻo e Tohi Tapú, ʻoku maʻu ʻi he tatau ʻa e Siasí ʻo e Tohi Tapu ʻa Kingi Sēmisí. ʻI hoʻo vahevahe e palakalafi ko ʻení, fakaafeʻi e kau akó ke kumi ʻa Pi-heloti (#3) ʻi he mapé.

ʻI he mavahe ʻa e fānau ʻo ʻIsilelí mei ʻIsipité, naʻe fekauʻi ʻe he ʻEikí ʻa Mōsese ke ne tataki kinautolu ki Pi-heloti (ʻEkesōtosi 14:2). Hili ha taimi nounou mei hono tukuange ʻo e kau ʻIsilelí, naʻe fakatokangaʻi ʻe Felo “kuo nau ʻefihia ʻi he fonuá” (ʻEkesōtosi 14:3), ko ia naʻá ne fakafefeka hono lotó pea nau tulimui kiate kinautolu.

Naʻe fakamatalaʻi ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo e ngaahi tūkunga ʻo e Kau ʻIsilelí.

Naʻe fepaki e fānau ʻo ʻIsilelí mo [ha] tūkunga faingataʻa. … Naʻe ʻi ai ha ngaahi saliote ʻi mui ʻiate kinautolu, ngaahi moʻunga ʻoneʻone ʻi he tafaʻaki kotoa pē, pea vai lahi ʻaupito ʻi muʻa. … Ne nau ʻi ha tuʻunga fakatuʻutāmaki he taimi ko ʻení. (“Cast Not Away Therefore Your Confidence,” Ensign, Mar. 2000, 9)

Ke tokoni ki he kau akó ke nau fakakaukauloto ki he fakamatala ko ʻení, te ke lava ʻo fakaʻaliʻali ange kiate kinautolu ʻa e fakatātā ko ʻeni ʻo e Tahi Kulokulá. Fakaafeʻi kinautolu ke fakakaukauloto naʻa nau ʻi he lotolotonga ʻo e kau ʻIsilelí ʻi he momeniti ko ʻení.

Naʻá ke mei tali fēfē nai ʻi he ngaahi tūkunga ko ʻení?

Fakakaukau ke fakaafeʻi e kau akó ke fakafehoanaki mo fakafaikehekeheʻi e tali ʻa e kau ʻIsilelí ki honau ngaahi tūkungá mo e tali ʻa Mōsesé. Ko ha taukei ako folofola mahuʻinga ʻa hono ʻiloʻi ʻo e ngaahi meʻa ʻoku faitatau mo faikehekehe ai ʻa e kakaí, ngaahi akonakí, mo e ngaahi meʻa ʻoku hoko ʻi he folofolá. ʻE lava ke tokoni hono fai ʻo e ngaahi fakafehoanaki ko ʻení ke ʻiloʻi ʻe he kau akó e ngaahi moʻoni mahuʻinga ʻo e ongoongoleleí ʻa ia he ʻikai ke nau lava ʻo fakatokangaʻí. Mahalo te ke fie fakamatalaʻi nounou ʻa e taukei ʻo e fakafehoanakí mo e fakafaikehekeheʻí. Fakaafeʻi e kau akó ke akoako fakahoko ia ʻi he ʻekitivitī ako ko ʻení.

Tā ʻi hoʻo tohinoa akó, ha saati kōlomu ʻe ua. Fakahingoa e kōlomu ʻe taha ko e kau ʻIsilelí pea fakahingoa e kōlomu ʻe tahá ko Mōsese.

Lau ʻa e ʻEkesōtosi 14:10–14, ʻo kumi e meʻa naʻe lea ʻaki ʻe he kau ʻIsilelí mo e meʻa naʻe lea ʻaki ʻe Mōsesé. Fakamatalaʻi fakanounou e meʻa ʻokú ke maʻú ʻi hono kōlomu totonú.

Ko e hā naʻe tokanga taha ki ai ʻa e kau ʻIsilelí ʻi he ngaahi tūkunga ko ʻení? Ko e hā naʻe tokanga taha ki ai ʻa Mōsesé?
Ko e hā ʻokú ke fakatokangaʻi ʻi hono fakafehoanaki e meʻa naʻa nau lea ʻakí?
Ko e hā ʻokú ke ako mei he fakamatala ko ʻení ʻe lava ʻo tokoni atu ʻi hoʻo ngaahi faingataʻaʻiá?

ʻI he ngaahi moʻoni kehe ʻe ala vahevahe ʻe he kau akó, tokoni ke nau vakai ki he meʻá ni: ʻE lava ke fakatupulaki ʻetau ʻamanaki leleí lolotonga e ngaahi faingataʻá mo e ʻahiʻahí ʻi he nofotaha ʻia Sīsū Kalaisí.
ʻOkú ke pehē ko e hā ha ngaahi palopalema ʻe lava ke hoko kapau te tau tokanga taha pē ki hotau ngaahi faingataʻaʻiá mo e ngaahi ʻahiʻahí?

Nofotaha ʻia Kalaisi

Fakakaukau ke vahevahe ʻa e toenga ʻo e lea ʻa Brother Kamako mei he kamataʻanga ʻo e lēsoní.

Naʻe vahevahe ʻe Brother Kamako ʻa e meʻá ni fekauʻaki mo e mālohi ʻo e tokanga taha kia Sīsū Kalaisí:

Naʻe faʻa talamai ʻe heʻeku tangataʻeikí kiate au, “ʻOua te ke fuʻu tokanga taha pē ki hoʻo ngaahi palopalemá ʻo ʻikai ke ke toe lava ai ʻo fakatokangaʻi ʻa e founga ke fakaleleiʻi aí.”

ʻOku ou fakamoʻoni ko e ʻEiki ko Sīsū Kalaisí ʻa e founga fakaleleiʻí ʻo aʻu ki heʻetau palopalema faingataʻa tahá. (“Tokanga Taha kia Sīsū Kalaisi,” Liahona, Mē 2023, 64)

ʻOkú ke pehē ko e hā ʻoku ʻaonga ai e tokanga taha kia Sīsū Kalaisí ʻi he taimi ʻoku tau ongoʻi ai ʻoku ʻākilotoa kitautolu pe fihia ʻi hotau ngaahi faingataʻaʻiá pe ʻahiʻahí?

Ke fakatātaaʻi e meʻa naʻe akoʻi ʻe Brother Kamakó, fakaafeʻi e kau akó ke ʻuluaki nofotaha ʻenau fakakaukaú ʻi he ngaahi faingataʻa ne nau hiki ʻi he palakipoé. Tuku ke nau tokanga taha ki he ngaahi faingataʻa ko iá ʻi ha sekoni ʻe 30. Hili iá pea kole ange ke nau fakalaulauloto ki he ongo ʻoku nau maʻú.

Hokó, fakapipiki ha fakatātā ʻo Sīsū Kalaisi ʻi muʻa ʻi he kalasí. Fakaafeʻi e kau akó ke tukutaha ʻenau fakakaukaú ʻi Hono mālohí mo e ʻofá ʻi ha sekoni ʻe 30. Fakaafeʻi e kau akó ke hiki ‘enau ngaahi tali ki he ngaahi fehuʻi ko ʻení ʻi heʻenau tohinoa akó.
Ko e hā ha faikehekehe te ke fakatokangaʻi ʻi he taimi ʻokú ke tokanga taha ai kia Sīsū Kalaisi mo Hono mālohí ʻo lahi ange ʻi he ngaahi faingataʻa ʻokú ke fehangahangai mo iá?

Fakaʻaliʻali e ngaahi fehuʻi ʻi laló, pea vahevaheʻi ʻa e kau akó ke nau tauhoa pe ʻi ha fanga kiʻi kulupu iiki. Fakaafeʻi kinautolu ke fili ha faingataʻa ʻe ua pe tolu ʻi he palakipoé pea aleaʻi e ongo fehuʻi ko ʻení.
Ko e hā ha ngaahi founga ʻe lava ke hoko ai ʻa Sīsū Kalaisi ko ha fakaleleiʻanga ʻo e ngaahi palopalema, ngaahi faingataʻa, pe ngaahi ʻahiʻahi naʻá ke filí?
ʻE lava fēfē ha taha ʻo ngāue ʻi he tui kia Sīsū Kalaisi lolotonga e palopalema, faingataʻa, pe ʻahiʻahi ko iá?

Fakaafeʻi ha kau ako te nau loto-fiemālie ke vahevahe ‘a e meʻa ne nau ako pe ongoʻí.

Ko e mālohi mafimafi ʻo e ʻEikí

Fakakaukau ke lau fakafoʻituitui pe tauhoa ʻe he kau akó e ngaahi veesi ko ʻení. ʻE lava foki ke tā fakatātaaʻi ʻe he kau akó ʻa e meʻa ne nau laú ʻi heʻenau tohinoa akó.

Kapau ʻe ʻaonga ki hoʻo kau akó, te ke lava ʻo fakaafeʻi ha kau ako ʻe niʻihi ke fakatātaaʻi nounou ʻa e veesi 19–22. Hangē ko ʻení, te ke lava ʻo faʻu ha kiʻi ʻā vahevahe siʻisiʻi ʻe lava ke toʻo pe fakamavaheʻi, ʻo fakaʻatā e kau akó ke nau fou ai.

Ko ha fili ʻe taha ko hono huluʻi ʻa e vitiō “The Passover” mei he taimi 1:28 ki he 2:32. ʻOku maʻu ʻe vitiō ko ʻení ʻi he ChurchofJesusChrist.org.

2:54

Lau ʻa e ʻEkesōtosi 14:15–31, ʻo kumi e founga naʻe maluʻi pe fakahaofi ai ʻe he ʻEikí e kakai ʻIsilelí.

Ko e hā ʻa e meʻa ʻokú ne fakalotoa koe fekauʻaki mo e talanoa ko ʻení?
Ko e hā naʻá ke maʻu ʻoku tokoni atu ke ke falala ki he ʻEikí?

Mālohi fakatāutahá mo e fakahaofí

Mahalo ʻe faingataʻa he kamataʻangá ke tali ʻe he kau akó ʻa e fehuʻi hokó. ʻE lava ʻenau fakakaukau ki he ngaahi aʻusia ʻa e niʻihi kehé, ʻo tokoni ke nau fakakaukau ki heʻenau ngaahi aʻusiá. Mahalo te ke fie vahevahe ha aʻusia kuó ke maʻu pe ko ha taha ʻokú ke ʻiloʻi ʻe ala tokoni ke tali e fehuʻí. Pe huluʻi ha foʻi vitiō hangē ko ʻení ʻokú ne fakahaaʻi ʻa e mahuʻinga ʻo e tokanga taha ki he Fakamoʻuí lolotonga hotau ngaahi faingataʻaʻiá:

“Finding Christ During Difficult Times” (4:35)

“Feeling the Lord’s Love and Goodness in Trials” (4:18)

ʻE maʻu ʻa e ongo vitioó ʻi he ChurchofJesusChrist.org.

4:35

4:21

Kuo tokoniʻi fēfē koe pe ko ha taha ʻokú ke ʻiloʻi ʻe he nofotaha ʻia Sīsū Kalaisi lolotonga ha faingataʻa pe ʻahiʻahi?

Tokoniʻi e kau akó ke nau ʻiloʻi ʻe ʻi ai e taimi ʻe niʻihi ʻe ʻikai lava ke fakahaofi kitautolu mei hotau ngaahi faingataʻaʻiá ʻi he ngaahi founga ʻoku tau ʻamanaki ki aí. Ka neongo ia, ʻe lava ke tokoniʻi kitautolu ʻe he tokanga taha kia Sīsū Kalaisí ke tau maʻu ha ʻamanaki lelei mo ha mālohi neongo pe ko e hā ʻoku tau fehangahangai mo iá.

Fakakaukau ke fakaʻosi ʻaki hano vahevahe hoʻo fakamoʻoni kia Sīsū Kalaisí pea mo e mahuʻinga ʻo e tokanga taha kiate Ia ʻi hotau ngaahi faingataʻaʻiá. ʻE lava ke ke fakakau ʻa e fakamatala ʻi laló fakataha mo hoʻo fakamoʻoní.

Naʻe fakamoʻoni ʻa Brother Kamako ʻe lava ke tokoniʻi kitautolu ʻe he Fakamoʻuí:

ʻOku moʻui ʻa e ʻEiki ko Sīsū Kalaisí ʻi he ʻahó ni. ʻE lava ke Ne kau mai mo tokonia fakaʻaho kitautolu ʻi heʻetau moʻuí. Ko e fakalelei Ia ki heʻetau ngaahi palopalemá, ka kuo pau ke tau tokanga taha mo sio kiate Ia. Kuó Ne folofola, “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē” [Tokāteline mo e Ngaahi Fuakava 6:36]. (“Tokanga Taha kia Sīsū Kalaisi,” Liahona, Mē 2023, 67)

Ngaahi Maʻuʻanga Tokoni Kehé

ʻE tokoniʻi fēfē au ʻe Sīsū Kalaisi ʻi hoku ngaahi faingataʻaʻiá?

Naʻe fakahoko ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ha fakaafe ʻo pehē:

ʻAhiʻahi lea ʻaki ʻa e huafa ʻo “Sīsū Kalaisi” ʻi ha feituʻu fakatuʻutāmaki mo ha taha kuo mole ʻa e ʻamanakí. ʻOku malava ʻi hoʻo ui ʻi he loto fakaʻapaʻapa Hono huafá ʻo liliu ha taimi faingataʻa. (“Ko Sīsū Kalaisi ʻa e Talí” [efiafi mo ha Taki Māʻolunga, 8 Fēpueli, 2019], 3)

Naʻe pehē ʻe Palesiteni Lāsolo M. Nalesoni:

Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. (“Ko Sīsū Kalaisi Maʻu Pē ʻa e Talí,” Liahona, Mē 2023, 127)

Naʻe pehē ‘e Palesiteni Lāsolo M. Nalesoni:

ʻI hono tukutaha ʻetau tokangá he palani ʻa e ʻOtuá ki he fakamoʻuí … pea mo Sīsū Kalaisi mo ʻEne ongoongoleleí, te tau lava ʻo ongoʻi fiefia ʻo tatau ai pē ko e hā e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu ʻa e fiefiá meiate ia pea koeʻuhí ko Ia. Ko Ia e tupuʻanga ʻo e fiefia kotoa pē. (“Fiefiá mo e Moʻui Fakalaumālié,” Liahona, Nōvema 2016, 82)

Naʻe pehē ʻe ʻEletā ʻAisake K. Molisoni ʻo e Kau Fitungofulú:

ʻOku hoko ʻa e ʻofa ʻoku tau ongoʻi koeʻuhí ko e Fakamoʻuí mo ʻEne Fakaleleí ko ha maʻuʻanga tokoni mālohi kiate kitautolu ʻi hotau ngaahi taimi faingataʻaʻiá. … Naʻá Ne fekau, “Te mou maʻu ʻa e mamahí ʻi māmani; ka mou loto-toʻa; kuó u ikuʻi ʻa māmani” [Sione 16:33]. Te Ne lava ʻo tokoniʻi kitautolu ke tau kātekina ha faʻahinga mamahi, mahamahaki mo ha faingataʻa pē ʻoku tau fehangahangai mo ia ʻi he moʻui fakamatelié. (“ʻOku Tau Lava ʻo Fakahoko Ha Ngaahi Meʻa Faingataʻa ʻo fakafou ʻIate Ia,” Liahona, Nōvema 2022, 116–17)

Ko e hā ʻoku ʻikai fakahaofi maʻu ai pē au ʻe he ʻOtuá mei hoku ngaahi faingataʻaʻiá mo e ngaahi ʻahiʻahí?

Naʻe fakamatalaʻi ʻe Palesiteni Tōmasi S. Monisoni (1927–2018):

ʻOku ʻafioʻi foki heʻetau Tamai Hēvaní … ʻoku tau ako mo tupulaki pea mo mālohi ange ʻi heʻetau fehangahangai mo ikunaʻi ʻa e ngaahi ʻahiʻahi ʻa ia kuo pau ke tau lavaʻí. ʻOku tau ʻiloʻi ʻoku ʻi ai ha ngaahi taimi te tau foua ai ʻa e mamahi ʻo e lotó, ha taimi te tau loto mamahi ai, mo ha taimi ʻe ʻahiʻahiʻi ai kitautolu ʻo aʻu ki he ngataʻanga ʻo ʻetau kātakí. Ka, ʻoku hanga ʻe he ngaahi faingataʻa ko iá ʻo ʻai ke tau liliu ʻo lelei ange, ke toe fakaleleiʻi ʻetau moʻuí ʻi he founga ʻoku akoʻi ai kitautolu heʻetau Tamai Hēvaní, pea hoko ko ha faʻahinga meʻa kehe mei hotau tuʻunga ki muʻá—ʻo lelei ange mei he kuo hilí, mahino lahi ange mei he kuo hilí, ʻofa lahi ange mei he kuo hilí, mo fakamoʻoni mālohi ange ʻi ha toe taimi. (“ʻE ʻIkai Te u Fakatukutukuʻi Koe, pe Liʻaki Koe,” Liahona, Nōvema 2013, 87)

Ngaahi ʻEkitivitī Fakalahi ki he Akó

Ko e poto mo e mālohi ʻo e ʻOtuá

ʻI hono aleaʻi e mape ʻi he lēsoní, mahalo te ke fakakaukau ke fakamamafaʻi e poto mo e mālohi ʻo e ʻOtuá ʻaki hono fakamatalaʻi naʻe ʻuluaki tūʻuta e fānau ʻo ʻIsilelí ʻi Sūkote (ʻEkesōtosi 13:20). Tokoni ke kumi ʻe he kau akó ʻa Sukote ʻi he mapé. Fakaafeʻi kinautolu ke kumi ʻa e hala hangatonu taha mei Sukote ki Kēnaní (ko e fonua ʻo e talaʻofá).

Fakaafeʻi e kau akó ke lau ʻa e ʻEkesōtosi 14:1–2, ʻo kumi e feituʻu naʻe folofola ai ʻe he ʻEikí kia Mōsese ke tataki ki ai e fānau ʻo ʻIsilelí. Tokoniʻi kinautolu ke maʻu ʻa Pi-heloti ʻi he mapé.

Ko e hā ʻokú ke fakatokangaʻi fekauʻaki mo e feituʻu naʻe tataki ki ai ʻe he ʻEikí e fānau ʻo ʻIsilelí?

Mahalo te ke fie fakamatalaʻi ange ko e hala hangatonu taha ki Kēnaní ko e fononga ʻi he fakatokelau ʻo e Tahi Kulokulá ʻi he Tahi Metiteleniané. Ka naʻe fakahinohinoʻi ʻe he ʻEikí ʻa e kau ʻIsilelí ke nau fononga fakatonga mo nofo kemi ʻo ofi ki he Tahi Kulokulá.

Ko e hā ha ngaahi fehuʻi naʻá ke mei maʻu fekauʻaki mo e halá kapau na ko ha taha koe ʻo e kau ʻIsilelí?
ʻE tokoni fēfē nai ki he niʻihi kehé hono ʻave ʻo e kau ʻIsilelí ki he Tahi Kulokulá ke nau “[ʻilo ko Ia ʻa e ʻEikí]”? (ʻEkesōtosi 14:4).

Tokāteline mo e Ngaahi Fuakava 8:3. “Ko ʻeni ʻa e laumālie ʻo e fakahaá”

Ke tokoniʻi e kau akó ke nau ako fekauʻaki mo e fakahaá, fakaafeʻi kinautolu ke lau ʻa e ʻEkesōtosi 14:15–16. Kole ange ke nau kumi e founga naʻe ʻilo ai ʻe Mōsese ʻa e meʻa ke fai ʻi he taimi naʻa nau fihia ai ʻi he vahaʻa ʻo e kau tau ʻa Feló mo e Tahi Kulokulá.

ʻOkú ke pehē naʻe folofola fēfē ʻa e ʻEikí kia Mōsese ʻi he taimi ko ʻení?

Fakaafeʻi e kau akó ke nau lau ʻa e potufolofola fakataukei fakatokāteline Tokāteline mo e Ngaahi Fuakava 8:2–3, ʻo kumi e founga naʻe folofola ai ʻa e ʻEikí kia Mōsesé.

Ko e hā ʻokú ke ako fekauʻaki mo e fakahaá?
Ko e fē ha taimi kuo folofola ai ʻa e ʻEikí ki ho ʻatamaí pe lotó?

Fakaafeʻi e kau akó ke fakafekauʻaki pe fakafehokotaki e ʻEkesōtosi 14:15–16 ki he Tokāteline mo e Ngaahi Fuakava 8:2–3.

Ko e ivi tākiekina ʻo e talanoa ʻa Mōsese ki he Tahi Kulokulá

Mahalo te ke fie tokoniʻi e kau akó ke nau sio ki he ʻaonga ʻo e fakamatala ko ʻení ki heʻenau moʻuí. Fakakaukau ki hano vahevahe ʻo e talanoa ko ia ʻi ha ngaahi taʻu ʻe lauiafe, kuo ueʻi ʻe he talanoa ʻo hono fakahaofi ʻe he ʻEikí ʻa e fānau ʻo ʻIsilelí mei he nofo pōpula ʻi ʻIsipité ha kau palōfita mo ha kakai ke nau tui ki he ʻEiki ko Sīsū Kalaisí.

Vahevahe ʻa e kalasí ke tauhoa pe ʻi ha fanga kiʻi kulupu iiki, pea vahe ange ha taha ʻo e ngaahi potufolofola ko ʻení ke nau ako. Hiki e ngaahi fehuʻi ʻi laló ʻi he palakipoé ke vakai ki ai mo aleaʻi ʻe he kau akó ʻi heʻenau akó.

1 Nīfai 3:31; 4:1–3 (Naʻe feinga ʻa e ngaahi foha ʻo Līhaí ke ʻomi ʻa e ʻū lauʻi peleti palasá meia Lēpani.)

1 Nīfai 17:25–27, 51 (Naʻe feinga ʻa Nīfai ke fakalotoʻi hono ongo taʻoketé ke tokoni kiate ia ke foʻu ha vaka.)

ʻAlamā 36:27–28 (Ko e akoʻi ʻe ʻAlamā hono foha ko Hilamaní ke falala ki he ʻOtuá.)

ʻOkú ke pehē naʻe mei tokoni fēfē ʻa e fakamatala ʻo e ʻEkesōtosí ki he tokotaha pe kulupu ko ʻení ʻi honau tūkungá?
Ko e hā ha ngaahi laine pe kupuʻi lea mei he ʻEkesōtosi 14 te ne lava ʻo poupouʻi koe ke ke falala ki he ʻEikí mo Hono mālohi ke fakahaofi koé?

Fakaafeʻi e kau akó ke fakaʻaongaʻi ʻa e fakamatala ko ʻení ʻi heʻenau moʻuí ʻi he fakakaukau ko ʻení:

Kapau naʻe finangalo lelei ʻa e ʻOtuá ke ne fakamavaeuaʻi ʻa e Tahi Kulokulá maʻá e kau ʻIsileli ʻo e kuonga muʻá, ʻoku ou ʻilo te Ne lava foki ʻo tokoniʻi au ʻi he .