Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻEkesōtosi 15; 17: Ko Hono ʻIloʻi e Ngaahi Moʻoni mei he ʻOtuá ʻi he Folofolá

“ʻEkesōtosi 15; 17: Ko Hono ʻIloʻi e Ngaahi Moʻoni mei he ʻOtuá ʻi he Folofolá,” Fuakava Motuʻá – Tohi Lēsoni ʻa e Faiako Seminelí (2026)

“ʻEkesōtosi 15; 17: Ko Hono ʻIloʻi e Ngaahi Moʻoni mei he ʻOtuá ʻi he Folofolá,” Fuakava Motuʻá – Tohi Lēsoni ʻa e Faiako Seminelí

ʻEkesōtosi 14–18: Lēsoni 46

ʻEkesōtosi 15; 17

Ko Hono ʻIloʻi e Ngaahi Moʻoni mei he ʻOtuá ʻi he Folofolá

Moses sitting on a rock having his hands held up by Aaron and Hur.

ʻOku faʻa fakaʻaongaʻi ʻe he ʻOtuá e ngaahi aʻusia fakatuʻasinó ke akoʻi ʻaki e ngaahi lēsoni fakalaumālie mahuʻingá. Hangē ko ʻení, naʻe fakaʻaongaʻi ʻe he ʻOtuá e ngaahi fiemaʻu ʻa e kau ʻIsilelí ki ha vai pea mo ha tokoni ʻi he taú ke akoʻi kinautolu mo kitautolu. Te tau lava ʻo ako ke ʻiloʻi mo fakaʻaongaʻi ʻa e ngaahi moʻoni fakalaumālié ʻi he ngaahi fakamatala ʻi he folofolá ki heʻetau moʻuí, ʻo fakafou ʻi hono akoakó mo e fakahinohino ʻa e Laumālié. ʻE lava ke tokoni ʻa e lēsoni ko ʻení ki he kau akó ke nau akoako kumi e ngaahi moʻoni mei he ʻOtuá ʻi he ngaahi fakamatala fakafolofolá mo fakafehokotaki ʻa e ngaahi moʻoni ko iá ki heʻenau moʻuí.

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi fakamatala kuo nau ako mei he Fuakava Motuʻá mo e Mataʻitofe Mahuʻingá ʻi he semesitā ko ʻení. Kole ange ke nau omi mateuteu ki he kalasí ke vahevahe ʻa e founga te nau fakakakato ai ʻa e sētesi ko ʻení: “ʻOku ou saiʻia ʻi he talanoa ʻo koeʻuhí he ʻokú ne akoʻi mai ai kiate au .”

Ngaahi ʻEkitivitī Ako ʻOku Ala Fakahokó

Ko hono kumi e ngaahi moʻoni ʻo e ongoongoleleí ʻi he folofolá

ʻI he lēsoni ko ʻení, ʻe maʻu ʻe he kau akó ʻa e faingamālie ke kumi mo vahevahe ha ngaahi moʻoni kehekehe ʻo e ongoongoleleí. Mahalo ʻe tokoni ke fakamanatu ki he kau akó ko e Tamai Hēvaní mo Sīsū Kalaisi ʻa e maʻuʻanga ʻo e ngaahi moʻoni kotoa ʻo e ongoongoleleí. Fakamatalaʻi ange ʻe lava ke tokoni hono ako e founga ke ʻilo mo fakaʻaongaʻi ai e ngaahi moʻoni ʻo e ongoongoleleí ke tau ofi ange ai ki he Tamai Hēvaní mo Sīsū Kalaisi.

Ke kamata e lēsoní, fakakaukau ke fehuʻi ki he kau akó pe te nau fakafonu fēfē ʻa e konga ʻoku ʻatā ʻi he sētesi ʻi laló. Kapau ʻe ʻaonga ha fakamanatu ʻo ha niʻihi ʻo e ngaahi fakamatala kuó ke akó, te ke lava ʻo fakaʻaliʻali ha ngaahi fakatātā ʻo hangē ko ia ʻi laló. Pe fakaafeʻi e kau akó ke kumi ʻi he ngaahi fakatātā ʻo e Fuakava Motuʻá ʻi he Tohi Fakatātā ʻo e Ongoongoleleí [2009], ʻa ia ʻoku lava ke maʻu ʻi he Gospel Library ʻi he “Ngaahi Vitioó mo e Ngaahi Fakatātaá.”

Fakakakato ʻa e sētesi ko ʻení ʻaki ha fakamatala fakafolofola naʻá ke fili:

“ʻOku ou saiʻia ʻi he talanoa ʻo e koeʻuhí ʻokú ne akoʻi au .”

The Old Testament prophet standing beside an altar. Abraham's son Isaac is strapped to the altar. Abraham is holding a dagger in the air as he prepares to sacrifice Isaac. An angel is appearing before Abraham and commanding him to not sacrifice his son.

Joseph's brothers talking away his coat of many colors.

The Old Testament prophet Moses standing with his arm extended toward the Red Sea. Moses is commanding the Red Sea to part to allow the Israelites to escape the Pharoah of Egypt.

Lekooti ʻi hoʻo tohinoa akó ʻa hoʻo ngaahi tali ki he ngaahi fehuʻi ko ‘ení.

ʻOku tokoni nai hoʻo ako folofola fakatāutahá ke ke ofi ange ai ki he Tamai Hēvaní mo Sīsū Kalaisi? Ko e hā hono ʻuhinga ki hoʻo tali ʻio pe ʻikaí?
Ko e hā hono tuʻo lahi hoʻo kiʻi taʻofi lolotonga hoʻo ako folofolá ke ʻiloʻi ʻa e ngaahi moʻoni ʻokú ke ongoʻi ʻoku finangalo ʻa e Tamai Hēvaní ke ke tokanga taha ki aí?
ʻOkú ke feinga nai ke mahino kiate koe ʻa e founga ʻoku kaunga ai ʻa e ngaahi fakamatala fakafolofolá ki hoʻo moʻuí?

ʻI hoʻo ako e ngaahi fakamatala mei he ʻEkesōtosi 15 mo e 17 he ʻaho ní, tokanga ki he ngaahi fakakaukau mo e ongo fakalaumālie mei he Laumālié. Kumi ha ngaahi ongo ʻe lava ʻo tokoni ke ke maʻu ai ha meʻa lahi ange mei hoʻo ako folofola fakatāutahá.

Ko hono ʻiloʻi ha ngaahi moʻoni ʻo e ongoongoleleí mei he ʻEkesōtosi 15, 17

Hili ha taimi feʻunga ke ako, aleaʻi, mo teuteu ai, ʻoange ki he ngaahi hoá ha faingamālie ke vahevahe ʻa e meʻa ne nau akó. Ko ha ngaahi founga ʻeni ʻe ala vahevahe ai e kau akó ʻo fakatatau mo e taimi ʻoku maʻú:

Vahevahe ʻa e ngaahi hoá takitaha mo ha hoa ne nau ako ha fakamatala kehekehe. Hili iá te nau lava ʻo vilo takai tuʻo taha ke vahevahe mo ha hoa ne nau ako e toenga ʻo e fakamatalá.
ʻUluaki fakataha ʻa e ngaahi hoá pea vahevahe mo e niʻihi kehe naʻa nau ako ha fakamatala tataú. (ʻE lava ke ʻoange heni ha ngaahi fakakaukau lahi ange ki he kau akó fekauʻaki mo ʻenau fakamatalá.) Hili iá pea fakataha mai leva e kau akó ʻo vahevahe fakakulupu tautau toko ono, ʻa ia naʻe ako ai ʻe he hoa takitaha ha ngaahi fakamatala kehekehe.
ʻAi ke taufetongi e ngaahi hoá ʻi hono fakamatalaʻi e meʻa ne nau teuteu maʻá e kalasí.

Fakatāutahaʻi ʻa e lēsoní

Ke fakaʻosi e lēsoní, ʻe lava ke ke fakaʻaongaʻi ha ngaahi fakakaukau hangē ko ʻení ke tokoni ke fakataautahaʻi ʻe he kau akó ʻa e meʻa ne nau akó.

Lekooti hoʻo ngaahi fakakaukau fekauʻaki mo e ngaahi meʻá ni ʻi hoʻo tohinoa akó:

Ko e hā ʻokú ke ongoʻi ʻoku finangalo e Tamai Hēvaní ke ke manatuʻi mei he lēsoni ko ʻení? Ko e hā hono ʻuhingá?
Te ke fakaʻaongaʻi fēfē ʻa e taukei ʻo hono ʻiloʻi ʻo e ngaahi moʻoni mei he ngaahi talanoa fakafolofolá ʻi hoʻo ako folofola fakatāutahá? ʻE faitokonia fēfē ʻe hono fakaʻaongaʻi ʻo e taukei ko ʻení ʻa hoʻo aʻusia ʻi he folofolá?

Te ke lava ʻo fakaafeʻi ha niʻihi ʻe loto-fiemālie ke vahevahe ha konga ʻo e meʻa ne nau hiki ʻi heʻenau tohinoa akó.

Fakakaukau foki ke kumi ha ngaahi faingamālie ʻi he ngaahi lēsoni ka hokó ke fakaafeʻi e kau akó ke vahevahe e ngaahi moʻoni ʻoku nau ako mei heʻenau ako folofola fakatāutahá.

Ngaahi Maʻuʻanga Tokoni Kehé

Ko e hā te tau lava ʻo ako mei he fakamatala ʻo hono ʻomi ʻe he ʻEikí ha vai fakaofo mei he maká?

Naʻe pehē ʻe ʻEletā Tēvita W. Feleli ʻo e Kau Fitungofulú:

Naʻe fakatahataha ʻa e kakaí, pea naʻe hā mai ʻa e ʻEikí ʻi ha ʻao ʻi muʻa ʻiate kinautolu ʻi he funga maká. Hangē ko e fakahinohinó, naʻe taaʻi ʻe Mōsese ʻa e maká ʻaki hono tokotokó, pea naʻe ʻoho mai ʻa e vaí ki tuʻa, ko ha vai feʻunga ke fakafiemālieʻi ʻa e fieinua ʻo ha puleʻanga lolotonga ʻenau nofo kemi ai ʻi ha taʻu nai ʻe taha (vakai, ʻĪsaia 48:21; 1 Nīfai 17:29). ʻI hono fai iá, naʻe fakahaaʻi ʻe Sihova ko Ia ʻa e Maka ʻo ʻIsilelí, ko e maʻuʻanga vai moʻui taupotu tahá (vakai, Fakahinohino ki he Ngaahi Folofolá, “Sīsū Kalaisi, Maka”), pea ko Mōsese ʻa ʻEne palōfitá. (“The Lord Is among Us!,” Ensign, Feb. 2002, 35)

ʻE founga fēfē haʻatau poupouʻi hotau kau taki faka-Siasí?

Naʻe akoʻi ʻe Palesiteni Lāsolo M. Nalesoni:

Ko ʻetau hikinimaʻi e kau palōfitá, ko ha tukupā fakatāutaha ia te tau fai hotau tūkuingatá ke poupouʻi ʻenau ngaahi taumuʻa fakaepalōfitá. Ko ʻetau hikinimá ʻoku hangē ia ha fakaʻilonga ʻo ha fakapapau ʻoku tau tali honau uiuiʻi ko e palōfitá ʻoku moʻoni pea tau haʻisia ki ai. (“Ko Hono Poupouʻi ʻo e Kau Palōfitá,” Liahona, Nōvema 2014, 75)

Naʻe pehē ʻe ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko ha faingamālie ke hikinimaʻi hotau kau takí; ʻoku haʻu fakataha mo ha fatongia fakatāutaha ke vahevahe ʻenau kavengá pea hoko ko e kau ākonga ʻa e ʻEiki ko Sīsū Kalaisí. (“Ko e Kavenga Fakafiefia ʻo e Tuʻunga Fakaākongá,” Liahona, Mē 2014, 10)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fakakaukau ke kamata ʻa e lēsoní ʻaki hano fakaʻaliʻali ʻa e fakatātā ko ʻení pea kole ki ha tokotaha ako ke ne fakamahinoʻi ange ʻa e foheʻuli ʻo e vaká.

Vahevahe ʻa e lea ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku tuʻunga tatau pē ʻa e ngaahi tefitoʻi moʻoni ʻo e ongoongoleleí kiate au mo koe ʻo hangē pē ko e fohe ʻulí ki ha vaka. ʻOku fakaʻatā kitautolu ʻe he ngaahi tefitoʻi moʻoni totonú ke tau ʻilo hotau halá mo tuʻu maʻu, tuʻu ʻaliʻaliaki mo taʻe lava ke ueʻi ke ʻoua naʻa tau fakahoko ha ngaahi fehalaaki ʻi he lotolotonga ʻo e ngaahi pole mo e ngaahi fakakaukau fakapuputuʻu ʻo e ngaahi ʻaho ní. (“Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 126)

Tokoni ke mahino ki he kau akó ʻa e mahuʻinga ʻo e fekumi mo ʻiloʻi e ngaahi moʻoni ʻo e ongoongoleleí te nau lava ʻo fakaʻaongaʻi ʻi heʻenau moʻuí ʻi heʻenau ako e ngaahi fakamatala ʻi he folofolá. Te ke lava ʻo fakamahinoʻi ange ha taha ʻo e ngaahi fakamatala fakafolofola ʻokú ke saiʻia taha aí. Tokoni ke ʻilo ʻe he kau akó ʻa e faikehekehe ʻi hono ʻiloʻi e talanoa ʻo e fakamatalá mo hono ʻiloʻi e ngaahi tefitoʻi moʻoni mo e tokāteline ʻoku mahuʻinga ʻi he fakamatalá.

Ngaahi aʻusia ʻa e toʻu tupú ʻi hono ʻiloʻi e ngaahi tefitoʻi moʻoni ʻi he folofolá

Ke fakaʻatā e kau akó ke fanongo ki he ngaahi fakamoʻoni ʻa e toʻu tupú fekauʻaki mo hono ʻiloʻi e ngaahi tefitoʻi moʻoni ʻi he folofolá, huluʻi e vitiō “Identifying Doctrines and Principles: Students’ Testimonies” (2:39). Hili e vitioó, te ke lava ʻo kole ki he kau akó ke vahevahe ha ngaahi aʻusia ne nau maʻu ai ha foʻi moʻoni ʻi ha fakamatala fakafolofola naʻá ne faitāpuekina ʻenau moʻuí.

2:39

Lāungá

Ke tokoni ke mahino ki he kau akó ʻa e fakatuʻutāmaki fakalaumālie ʻo e lāunga (hanu) ʻi he fakahinohino mei hotau kau taki ʻo e Siasí, fakakaukau ke fakaʻaliʻali ha sēini. Aleaʻi ʻa e founga ʻoku poupouʻi ai ʻe he fehokotakiʻanga takitaha ʻi he sēiní ʻa e ngaahi fehokotakiʻanga kehé. Fakaafeʻi e kau akó ke nau faʻu ha “sēini folofola” ʻo ha ngaahi potufolofola ʻoku nau fepoupouʻaki ʻaki hono fakafehokotaki pe fakafekauʻaki fakataha e ngaahi veesi ko ʻení:

ʻEkesōtosi 15:23–24

ʻEkesōtosi 16:2–3

ʻEkesōtosi 17:2–4

Fakaafeʻi e kau akó ke vahevahe e meʻa ʻoku nau fakatokangaʻi fekauʻaki mo e tōʻonga fakakaukau ʻa e tokolahi ʻo e kau ʻIsilelí. Te ke lava foki ʻo ʻai ke nau vahevahe ha ngaahi founga ʻoku lāunga ai ha kakai ʻe niʻihi he ʻahó ni fekauʻaki mo e fakahinohino mei he kau taki ʻo e Siasí.

Kole ki he kau akó ke lau ʻa e ongo potufolofola ko ʻení pea tānaki atu kinaua ki heʻenau sēini folofolá:

ʻEkesōtosi 16:8; 1 Nīfai 2:12

ʻAi ke vahevahe ʻe he kau akó ha ngaahi moʻoni ʻoku nau ako mei he ngaahi potufolofola ko ʻení mo e kalasí. ʻE lava ke ʻiloʻi ʻe he kau akó ha ngaahi moʻoni peheni, ko e taimi ʻoku tau lāunga ai ki he kau taki ʻo e Siasí, ʻoku tau lāunga moʻoni ki he ʻEikí pe ʻe lava ke iku ʻa e ʻikai mahino kiate kitautolu e ngaahi fengāueʻaki ʻa e ʻOtuá ki haʻatau lāunga ʻi Heʻene akonakí.

Te ke lava ʻo ʻoange ki he kau akó ha ngaahi sīpinga ʻe lava ke fili ai ha taha ke lāunga pe tali faivelenga ʻa e meʻa ʻoku kole ange ke ne faí. ʻE lava ke fakakaukauʻi ʻe he kau akó ʻa e meʻa ʻoku hoko ʻi he lāungá pe ko hono tali ia ʻi he tui ʻi he tūkunga takitaha. ʻOku kau ʻi he ngaahi sīpingá ʻa hono ui koe ke ngāue fakafaifekau ʻi ha feituʻu kehe ʻo e māmaní mei he feituʻu naʻá ke ʻamanaki ki aí, ʻikai tali ha lotu ʻi he founga naʻá ke ʻamanaki ki aí, pe kole atu ʻe ha taki fakalotofonua ʻo e Siasí ke ke fai ha meʻa ʻoku ʻikai faingamālie.

ʻE lava ke ke fakaafeʻi e kau akó ke nau lau ʻa e 1 Nīfai 2:16, ʻo kumi e meʻa naʻe fai ʻe Nīfai ke ngāue ʻi he tui ʻi heʻene fehangahangai mo e ngaahi tūkunga tatau naʻe tupu ai ʻa e lāunga hono ongo taʻoketé.

ʻEkesōtosi 17:8–13. Ko Hono Poupouʻi ʻo e palōfitá

Fakaafeʻi ha tokotaha ako ke haʻu ki muʻa he kalasí. Tuku ha Tohi Tapu pe tohi lahi kehe ki he ongo nima ʻo e tokotaha akó. Kole ki he tokotaha akó ke fakamafao fakahangatonu hono ongo nimá ki he tafaʻakí, ʻo puke ʻa e ongo tohí ke feʻunga tonu mo e matá. Talaange ki he tokotaha akó ke feinga ke tauhi ʻa e tuʻunga ko iá ʻi he fuoloa taha ʻe lavá. ʻI he taimi ʻoku helaʻia ai ʻa e tokotaha akó, fakaafeʻi ha ongo tamaiki ako kehe ke na haʻu ʻo tokoni ke poupouʻi hake e nima ʻo e tokotaha akó.

Fakaafeʻi e kau akó ke lau leʻolahi ʻa e ʻEkesōtosi 17:8–13. Aleaʻi ʻa e founga ʻoku faitatau ai ʻa e fakamatala ko ʻení mo e tokotaha ako ʻoku feinga ke puke hake ʻa e ongo tohí.

Fakaafeʻi e kalasí ke fakakaukauloto naʻe fakafofongaʻi ʻe he tokotaha ako naʻá ne pukepuke ʻa e ʻū tohí ʻa e palōfita ʻa e ʻOtuá. Tuku ke vahevahe ʻe he kau akó ʻa e meʻa ʻe lava ke fakafofongaʻi ʻe he mamafa naʻe puke hake ʻe he tokotaha akó ki ha palōfita. (ʻE lava ke kau ʻi he ngaahi sīpingá ʻa hono tokangaʻi ʻo e ngāue fakafaifekaú, tauhi ke haohaoa ʻa e tokāteline ʻoku akoʻi ʻi he Siasí, tokangaʻi ʻo e ngāue tokoni ʻofa fakaetangata ʻi he funga ʻo e māmaní, mo e ngaahi meʻa peheé.) Te ke lava ʻo fakaafeʻi e kalasí ke nau toe fai ʻa e fakafehoanakí, ʻo fetongi ʻaki e kau taki fakalotofonuá ʻa e palōfitá. Hangē ko ʻení, ʻe lava ke vahevahe ʻe he kau akó ʻa e mamafa ʻe ala ongoʻi ʻe ha pīsope, taki ʻo e Kau Finemuí, pe mātuʻá.

Tokoniʻi e kau akó ke nau ʻilo mei he ʻEkesōtosi 17:11–13 ʻoku tokoni hono poupouʻi e palōfita ʻa e ʻEikí ke tau ikunaʻi ʻetau fepaki mo Sētané.

Fakaʻaongaʻi ha niʻihi pe kotoa ʻo e ngaahi fehuʻi ko ʻení ke tokoni ke mahino mo fakalaulauloto e kau akó ki he mahuʻinga ʻo e ngaahi moʻoni ko ʻení:

Ko e hā ha ngaahi founga pau te ke lava ai ʻo poupouʻi ʻa e palōfitá (pe ko hoʻo pīsopé, kau taki ʻo e Kau Finemuí, mātuʻá, mo e ngaahi meʻa peheé) fakahangatonu pe ʻi he ʻinitanetí?
Kuo tokoni fēfē hono poupouʻi hoʻo kau takí ke ke ikuna ʻi he fehangahangai mo Sētané?
ʻOku tokoniʻi fēfē koe ʻe he Tamai Hēvaní mo Sīsū Kalaisi ʻi hoʻo poupouʻi ʻEna kau tamaioʻeiki kuo filí?