Exodo 16

• Kanus-a ka kataposang mikaon?

• Kon bag-o ka pa mikaon, nganong gigutom ka na karon?

• Nganong kinahanglan kitang mokaon sumala sa naandan?

Si Elder D. Todd Christofferson sa Korum sa Napulog Duha ka Apostoles mitandi sa pagpakaon sa atong pisikal nga mga lawas ngadto sa pag-atiman sa atong mga espiritu:

Kitang tanan nakahibalo sa panginahanglan sa pisikal nga sustansiya. Ang kagutom ug kauhaw nagpahinumdom nato pag-ayo kon kita makalimot. Apan ang espirituhanon nga panginahanglan alang sa sustansiya parehas ra kaimportante. (“Daily Bread: Pattern,” Gospel Library)

• Ngano sa imong hunahuna nga ang panginahanglan sa pagpakaon sa atong mga espiritu sama ka importante sa pag-atiman sa atong mga lawas?

• Nganong sayon man malimtan ang atong espirituhanon nga mga panginahanglan?

Paggahin og panahon sa pagpamalandong sa mosunod nga mga pangutana. Ikonsiderar ang pagrekord sa imong mga hunahuna sa imong journal sa pagtuon:

• Mibati ka ba nga ang samang tinguha sa pag-atiman sa imong espiritu kada adlaw sama sa imong gibuhat sa imong lawas? Ngano o nganong dili?

• Unsa ang imong gibati nga gusto sa Langitnong Amahan nga imong buhaton kada adlaw aron sa pag-atiman sa imong espiritu?

Pangita og inspirasyon aron makahibalo unsa ang padayon nimong buhaton, o unsa ang pwede nimong mausab, sa paghatag sa imong espiritu sa inadlaw nga kusog gikan sa Ginoo nga gikinahanglan niini.

Human makatabok sa Pula nga Dagat, ang mga Israelita “misalig sila sa Ginoo ug sa iyang sulugoon nga si Moises” (Exodo 14:31). Nanganta ug nanayaw sila sa pagdayeg sa Ginoo sa pagluwas kanila (tan-awa sa Exodo 15:1–21). Apan, ang pagdayeg sa Ginoo sa mga Israelita wala magdugay. Samtang gidala sila ni Moises paingon sa Bukid sa Sinai, sila nag-atubang ug lainlaing mga problema, ug gisulayan ang ilang pagtuo.

Basaha ang Exodo 16:2–4, 11–15, nga mangita kon giunsa paghatag sa Ginoo sa mga panginahanglan sa mga Israelita.

• Unsay imong nakaplagan?

Basaha ang Juan 6:31–35, 47–51, nga mangita sa unsay gitudlo ni Jesus mahitungod sa manna.

• Sa unsang mga paagi ang manna susama ni Jesukristo?

• Sa unsang paagi nga ang gitanyag ni Jesus kanato walay kataposan nga mas maayo kay sa manna?

Ablihan ang PDF

• Sa unsang paagi kini nga mga detalye bahin sa manna magamit sa atong panginahanglan sa espirituwal nga pagpabaskog?

• Unsa ang matudlo kanimo niining mga detalye mahitungod sa manna sa pagdawat sa espirituhanong pagpabaskog gikan ni Jesukristo?

Mahimong nadiskobrehan sa mga estudyante ang daghang bililhong mga kamatuoran. Mahimo nilang ipakigbahin kon nganong gibati nila nga importante ang mga kamatuoran nga ilang nahibaloan. Pwede usab kang mangutana og laing follow-up nga mga pangutana. Ang nahabilin niini nga leksiyon magtutok sa mosunod nga kamatuoran: kon kita mosalig sa Ginoo kada adlaw, Siya mopanalangin kanato sa espirituhanong pagpabaskog nga atong gikinahanglan. (Hinumdomi: Ang mga estudyante mamalandong sa ilang tinguha nga mosalig sa Ginoo diha sa Leksiyon 55: “Pagsukod sa Imong Nakat-onan 3.” Kon gibati nimo nga nadasig sa pagtutok sa laing kamatuoran alang sa nahibilin niini nga leksiyon, seguroha nga mohimo ka og katugbang nga mga pagpahiangay kon imong itudlo ang Leksiyon 55.)

Aron mapalawman ang panabot sa mga estudyante sa atong inadlaw nga panginahanglan ni Jesukristo, mahimo nimong ipakigbahin ang mosunod nga pamahayag o tan-awa ang “Pagkaon sa Matag Adlaw: Sundanan” (2:51), nga anaa sa ChurchofJesusChrist.org.

2:52

Namulong si Elder Christofferson sa atong panginahanglan alang sa inadlaw nga espirituhanong pagpabaskog gikan sa Ginoo:

Dili kita angay nga maghunahuna nga makalahutay kita og mga semana ug mga bulan nga walay espirituhanong pagkaon ug dili mag-antos ug walay makapatay nga impluwensya sa atong espirituhanong kinabuhi. Ang pag-ila sa katinuod sa atong panginahanglan sa inadlaw-adlaw nga espirituhanong administrasyon, o manna, makatabang nato nga madugangan ang atong kaisog sa pagbuhat sa matarong nga butang ug sa pagserbisyo sa uban labaw pa kay sa atong maangkon kon atong ibaliwala ang Dios. (“Daily Bread: Pattern,” Gospel Library)

• Ngano nga ang pagsalig sa Ginoo matag adlaw mas maayo kaysa panagsa, gamhanan nga espirituhanong mga kasinatian?

Sa imong journal nga pagtuon, butangi og label ang usa ka pahina nga “Pagkaon sa Matag Adlaw: Jesukristo.” Sa tunga-tunga sa pahina, pagdrowing og pan. Tun-i ang mosunod nga mga kasulatan, nga mangita sa mga butang nga atong gibuhat kada adlaw aron mosalig sa Ginoo ug modawat og espirituhanong pagpabaskog. Isulat ang imong nakit-an sa palibot sa imong drowing nga pan.

• Deuteronomio 8:3

• 1 Nephi 17:3

• 2 Nephi 32:3

• Alma 37:36–37

  Dapita ang mga estudyante sa paghisgot kon unsay ilang nadiskobrehan pinaagi sa pagpangutana sama sa mosunod. Mahimo nimong awhagon ang mga estudyante sa pagdugang og mga ideya sa ilang mga journal sa pagtuon samtang magkat-on sila gikan sa ilang mga klasmeyt.

• Hain niini nga mga aksiyon ang nakatabang nimo sa pagdapit sa Pan sa Kinabuhi, si Jesukristo, sa imong kinabuhi kada adlaw? Sa unsang paagi nga Siya miamuma o mipalig-on kanimo isip resulta?

• Agi og dugang sa unsay imong nakit-an diha sa mga kasulatan, unsa pa nga mga butang ang imong gipaningkamotan nga buhaton kada adlaw aron mosalig sa Ginoo?

• Unsa ang imong isulti sa usa ka tawo kinsa mibati nga dili nila kinahanglan nga buhaton kini nga mga butang?

Tan-awa ang lista nga imong gisulat sa palibot sa pan diha sa imong journal sa pagtuon. Lingini ang usa o duha ka ideya nga imong gibati nga gusto sa Ginoo nga sugdan nimo sa pagbuhat o pagbuhat og lahi aron mas makasalig Kaniya kada adlaw. Dayon tubaga ang mosunod:

• Kanus-a ug asa nimo buhaton kini nga butang matag adlaw?

• Unsa nga mga hagit ang kinahanglan nimong mabuntog aron mahimo kini nga batasan nga kabahin sa imong adlaw-adlaw nga naandang buhaton? Unsaon nimo pagbuntog kini nga mga hagit?

• Sa imong hunahuna sa unsang paagi ang pagbuhat niini nga butang kada adlaw makaapekto sa imong relasyon sa Langitnong Amahan ug ni Jesukristo sa paglabay sa panahon?