Exodo 15; 17: Pag-ila sa mga Kamatuoran gikan sa Dios diha sa mga Kasulatan
“Exodo 15; 17: Pag-ila sa mga Kamatuoran gikan sa Dios diha sa mga Kasulatan,” Manwal sa Magtutudlo sa Seminary sa Daang Tugon (2026)
“Exodo 15; 17: Pag-ila sa mga Kamatuoran gikan sa Dios diha sa mga Kasulatan,” Manwal sa Magtutudlo sa Seminary sa Daang Tugon
Exodo 14–18: Leksiyon 46
Exodo 15; 17
Pag-ila sa mga Kamatuoran gikan sa Dios diha sa mga Kasulatan
Ang Dios kasagarar naggamit og pisikal nga mga kasinatian sa pagtudlo og importanteng espirituhanon nga mga leksiyon. Pananglitan, gigamit sa Dios ang mga panginahanglan sa mga Israelinhon alang sa tubig ug alang sa tabang sa gubat aron tudloan sila ug kita. Pinaagi sa pagbansay ug giya sa Espiritu, makakat-on kita sa pag-ila ug paggamit sa espirituhanon nga mga kamatuoran diha sa mga asoy sa kasulatan sa atong kinabuhi. Kini nga leksiyon makatabang sa mga estudyante nga makapraktis sa pag-ila sa mga kamatuoran gikan sa Dios diha sa mga asoy sa kasulatan ug pagkonektar sa maong mga kamatuoran sa ilang kinabuhi.
Pagpangandam sa estudyante: Dapita ang mga estudyante sa pagpamalandong sa mga asoy nga ilang gitun-an gikan sa Daang Tugon ug sa Perlas nga Labing Bililhon hangtod karon nga semester. Hangyoa sila sa pag-adto sa klase nga andam nga mopakigbahin kon unsaon nila pagkompleto ang mosunod nga kapahayag: “Ganahan ko sa asoy nga tungod kay kini nagtudlo kanako nga .”
Posibleng mga Kalihokan sa Pagkat-on
Pag-ila sa mga kamatuoran sa ebanghelyo diha sa mga kasulatan
Niini nga leksiyon, makabaton og higayon ang mga estudyante nga makakaplag ug makapaambit og lainlaing mga kamatuoran sa ebanghelyo. Makatabang tingali ang pagpahinumdom sa mga estudyante nga ang Langitnong Amahan ug si Jesukristo mao ang tinubdan sa tanang kamatuoran sa ebanghelyo. Ipasabot nga ang pagkat-on kon unsaon pagpangita ug paggamit sa mga kamatuoran sa ebanghelyo makatabang kanato aron mas maduol sa Langitnong Amahan ug ni Jesukristo.
Sa pagsugod sa leksiyon, ikonsiderar ang pagpangutana sa mga estudyante kon unsaon nila pagkompleto ang mga blangko diha sa kapahayag sa ubos. Kon makatabang ang biswal nga pahinumdom sa pipila sa mga asoy nga inyong natun-an, pwede nimong ipakita ang mga hulagway nga sama sa ubos. O dapita ang mga estudyante nga tan-awon ang mga hulagway sa Daang Tugon diha sa Libro sa mga Hulagway sa Ebanghelyo [2009], nga makita diha sa Librarya sa Ebanghelyo ubos sa “Mga Bidyo ug mga Hulagway.”
Kompletoha ang mosunod nga kapahayag nga adunay asoy sa kasulatan nga imong gipili:
“Ganahan ko sa asoy sa kay kini nagtudlo kanako nga .”
Samtang mopakigbahin ang mga boluntaryo diha sa klase, pwede nilang isulat sa pisara ang mga kamatuoran nga ilang nailhan. Ang mga kamatuoran nga ilang gipakigbahin mahimong ipahayag isip doktrina, sama sa “Kita mga anak sa Dios” (tan-awa sa Moises 1:1–7). O pwede kining ipahayag isip mga baroganan nga mahimong maggamit, sama sa “Kon kita andam nga magiyahan sa Dios, Iyang dugangan ang atong abilidad sa pagtuman sa Iyang buhat” (tan-awa sa Moises 6:31–36). Pwede usab nimong hangyoon ang mga estudyante nga mopakigbahin aron ipasabot kon nganong ang kamatuoran nga ilang gisulat importante sa ilang kinabuhi.
Isip magtutudlo, paningkamoti nga dili mohatag og kaugalingon nga tubag sa matag komentaryo sa estudyante. Makatabang tingali nga hangyoon ang klase nga ipakigbahin ang unsay ilang nakat-onan gikan sa komentaryo sa laing estudyante. Makatabang kini sa mga estudyante nga madiskobrehan ang kaugalingon nilang mga hunahuna ug mga pagbati pinaagi sa impluwensiya sa Espiritu Santo. Para sa dugang nga pagbansay niini, tan-awa ang “Tabangi ang mga tigkat-on nga mangako og responsibilidad alang sa ilang pagkat-on” diha sa Pagpalambo sa mga Kahanas sa Magtutudlo [2022].
Samtang mopakigbahin ang mga estudyante, pwede nimong ipasabot nga adunay importanteng kalainan tali sa pagkagusto sa usa ka asoy sa kasulatan ug sa pagpangita og may kalabotan nga mga kamatuoran gikan sa Dios sa maong asoy. Ipasabot nga samtang mainampoon silang magtinguha sa giya sa Espiritu diha sa ilang pagtuon sa kasulatan, ang Langitnong Amahan motabang kanila nga makaplagan ang mga kamatuoran nga labing adunay kalabotan ngadto kanila.
Human sa pagpakigbahin sa mga estudyante, dapita sila nga pamalandongan ang ilang mga paningkamot sa pag-ila sa mga kamatuoran diha sa ilang personal nga pagtuon sa kasulatan. Pwede nimong gamiton ang mosunod nga mga pag-aghat.
Irekord ang imong mga tubag sa mosunod nga mga pangutana diha sa imong journal sa pagtuon:
Nakatabang ba nimo ang imong personal nga pagtuon sa kasulatan nga mas maduol sa Langitnong Amahan ug ni Jesukristo? Ngano o nganong wala?
Unsa ka sagad kang mohunong og kadiyot panahon sa imong pagtuon sa kasulatan aron ilhon ang mga kamatuoran nga para nimo gusto sa Langitnong Amahan nga imong tutokan?
Nagtinguha ba ka nga masabtan kon sa unsang paagi magamit sa imong kinabuhi ang mga asoy sa kasulatan?
Samtang imong tun-an ang mga asoy gikan sa Exodo 15 ug 17 karon, hatagi og pagtagad ang gidasig nga mga hunahuna ug mga pagbati gikan sa Espiritu. Pangitaa ang mga impresyon nga makatabang nimo nga makakuha og dugang sa imong personal nga pagtuon sa kasulatan.
Pag-ila sa mga kamatuoran sa ebanghelyo gikan sa Exodo 15, 17
Niini nga seksiyon sa leksiyon, ang mga estudyante adunay kahigayonan nga mailhan ug makaplagan ang may kalabotan nga mga kamatuoran gikan sa asoy sa pag-atiman sa Ginoo sa mga Israelinhon didto sa kamingawan.
Ikonsiderar ang pagbahin sa klase nga magpares-pares. I-asayn ang parehas og numero nga mga magkapares nga tun-an ang matag usa sa mga asoy diha sa handout. Pwede nimong iasayn ang mga estudyante nga wala pa kaayoy kasinatian sa pagtuon sa mga kasulatan nga makigtambayayong ngadto sa mga estudyante nga adunay daghang kasinatian.
Seguroha nga mahatagan og igong panahon ang mga paresan aron maghisgot ug mangandam. Pwede kang maglibot-libot ug tabangan ang mga estudyante nga nagkinahanglan tingali og dugang nga giya.
Human sa igong panahon sa pagtuon, paghisgot, ug pag-andam, hatagi og higayon ang mga magkapares nga ipakigbahin ang unsay ilang nakat-onan. Ang mosunod mao ang mga paagi nga mahimong ipakigbahin sa mga estudyante depende sa nahabilin nga oras:
Ang kada pares mopakigbahin sa usa ka pares nga nagtuon og laing asoy. Dayon sila makigbaylo sa makausa pa aron ipakigbahin sa usa ka magkapares nga nagtuon sa nahibiling bahin sa asoy.
Magtagbo una ang mga managpares ug ipakigbahin sa uban nga nagtuon sa sama nga asoy. (Kini makahatag sa mga estudyante og dugang panglantaw bahin sa kaugalingon nilang asoy.) Dayon magtapok ang mga estudyante ug ipakigbahin sa mga grupo nga dunay unom ka sakop, diin ang kada pares nagtuon og lain-laing asoy.
Magpuli-puli ang mga paresan sa pagpresentar sa ilang giandam sa tibuok klase.
Ipahaom sa kaugalingon ang leksiyon
Sa pagtapos sa leksiyon, ikonsiderar ang paggamit og mga pag-aghat nga sama sa mosunod aron tabangan ang mga estudyante nga mapahaom sa kaugalingon ang leksiyon.
Irekord ang imong mga hunahuna bahin sa mosunod diha sa imong journal sa pagtuon:
Unsay imong gibati nga gusto sa Langitnong Amahan nga imong mahinumdoman gikan niini nga leksiyon? Ngano man?
Unsaon nimo paggamit ang kahanas sa pag-ila sa mga kamatuoran gikan sa mga asoy sa kasulatan diha sa imong personal nga pagtuon sa kasulatan? Sa unsang paagi ang paggamit niini nga kahanas makaapekto sa imong kasinatian sa mga kasulatan?
Pwede nimong dapiton ang mga boluntaryo nga ipakigbahin ang pipila ka bahin sa ilang gisulat diha sa ilang journal sa pagtuon.
Ikonsiderar usab ang pagpangita og kahigayonan sa umaabot nga mga leksiyon nga dapiton ang mga estudyante sa pagpakigbahin sa mga kamatuoran nga ilang nakat-onan gikan sa ilang personal nga pagtuon sa kasulatan.