“Exodo 14: ‘Ayaw Kamo Kahadlok,’” Manwal sa Magtutudlo sa Seminary sa Daang Tugon (2026)
“Exodo 14: ‘Ayaw Kamo Kahadlok,’” Manwal sa Magtutudlo sa Seminary sa Daang Tugon
Exodo 14–18: Leksiyon 45
Exodo 14
“Ayaw Kamo Kahadlok”
Mawad-an tingali ta og paglaom usahay, sama sa gibati sa mga Israelinhon samtang natanggong tali sa Pulang Dagat ug sa kasundalohan ni Paraon. Bisan pa niana, magamit gihapon nato karon ang tambag ni Moises ngadto kanila: “Ayaw kamo kahadlok! Pabilin sa inyong nahimutangan ug tan-awa ang buhaton sa Ginoo niining adlawa aron pagluwas kaninyo” (Exodo 14:13). Kini nga leksiyon makatabang sa mga estudyante nga tinguhaon ang pagsalig sa Ginoo alang sa kalig-on ug kaluwasan.
Pagpangandam sa estudyante: Dapita ang mga estudyante sa pagtuon sa Exodo 14:13–14 ug sa pagkonsiderar sa mga aspeto sa ilang kinabuhi diin mahimong makatabang kini nga mga bersikulo.
Posibleng mga Kalihokan sa Pagkat-on
Gipalibotan og mga pagsulay
Tabangi ang mga estudyante nga pamalandongan ang mga hagit sa ilang kinabuhi nga gibati nilang dili nila makaya o natanggong. Usa ka paagi sa pagbuhat niini mao ang pagpakigbahin sa mosunod nga pamahayag ni Brother Milton Camargo sa Kinatibuk-ang Kapanguluhan sa Sunday School. Pwede nimong isulat sa tunga sa pisara ang tambag sa iyang amahan.
Gipakigbahin ni Brother Milton Camargo, Unang Magtatambag sa Kinatibuk-ang Kapangulohan sa Sunday School, ang tambag sa iyang amahan:
Ang akong papa sauna misulti kanako, “Ayaw pagpunting pag-ayo sa imong mga problema nga dili ka na makakita sa solusyon.” (“Magpunting kang Jesukristo,” Liahona, Mayo 2023, 64)
Hangyoa ang mga estudyante nga ipakigbahin kon para nila unsay gitudlo sa amahan ni Brother Camargo. Dayon dapita sila nga isulat libot sa pamahayag nga naa sa pisara ang bisan unsang mga problema, mga hagit, o mga pagsulay nga tingali lisod alang kanila nga makakita og mga solusyon.
Pwedeng kusgon og tubag sa mga estudyante ang una sa mosunod nga mga pangutana. Para sa ikaduhang pangutana, mas maayo tingaling dapiton sila nga hilom nga pamalandongnn ang ilang mga tubag.
Pamalandonga ang mga panahon dihang gibati nimo nga walay solusyon ang mga problema nga imong giatubang.
-
Unsa ang pipila ka mga paagi nga ang usa ka tawo mahimong mosanong sa ingon nga mga kahimtang?
-
Unsay sagad nimong tubag sa maong mga kahimtang?
Samtang imong tun-an ang Exodo 14 karon, tinguhaa ang inspirasyon gikan sa Espiritu Santo aron matabangan ka nga modako ang imong tinguha sa pagsalig sa Ginoo samtang nag-atubang o nangandam sa pag-atubang sa mga hagit ug mga pagsulay.
Ang problema sa mga Israelinhon
Aron matabangan ang mga estudyante nga masabtan ang kahimtang sa mga Israelinhon diha sa Exodo 14, ipakita o tabangi sila nga makita ang mapa 2 diha sa Mga Mapa sa Biblia, nga makita diha sa edisyon sa Santos sa Ulahing mga Adlaw sa King James nga Biblia. Samtang imong ipakigbahin ang mosunod nga parapo, dapita ang mga estudyante nga pangitaon ang Pihahirot (2:B3) diha sa mapa.
Sa pagbiya sa mga anak sa Israel sa Ehipto, gisugo sa Ginoo si Moises nga pangulohan sila paingon sa Pi-hahiroth (Exodo 14:2). Wala madugay human gibuhian ang mga Israelinhon, nakaamgo si Paraon nga sila “dili makagula sa dapit nga awaaw” (Exodo 14:3), maong gipagahi niya ang iyang kasingkasing ug gigukod sila.
Si Presidente Jeffrey R. Holland sa Korum sa Napulog Duha ka Apostoles mipasabot sa mosunod bahin sa mga kahimtang sa mga Israelinhon.
Ang mga anak sa Israel [diha sa usa ka] makalilisang nga kahimtang. … Dihay mga karwahe nga nagsunod kanila, pinadpad nga mga balas sa matag kilid, ug dakong tubig diha dayon sa unahan. … Niini nga sitwasyon, kini sa tinuod usa ka butang kalabot sa kinabuhi ug kamatayon. (“Cast Not Away Therefore Your Confidence,” Ensign, Mar. 2000, 9)
Aron matabangan ang mga estudyante nga mahunahuna kini nga asoy, pwede nimong ipakita nila ang mosunod nga hulagway sa Pulang Dagat. Dapita sila sa paghandoraw nga kauban sila sa mga Israelinhon niining higayona.
-
Unsa kaha ang imong reaksiyon ubos niini nga mga kahimtang?
Ikonsiderar ang pagdapit sa mga estudyante nga itandi ug unsa ang kalainan sa pagsanong sa mga Israelinhon sa ilang mga kahimtang sa reaksiyon ni Moises. Ang pagtimaan sa mga pagkaparehas ug mga kalainan tali sa mga tawo, mga pagtulun-an, ug mga panghitabo diha sa mga kasulatan maoy usa ka importanteng kahanas sa pagtuon sa kasulatan. Ang paghimo niini nga mga pagkompara makatabang sa mga estudyante nga mailhan ang importanteng mga kamatuoran sa ebanghelyo nga tingali dili nila makita sa laing paagi. Pwede nimong ipasabot kadali ang kahanas sa pagkompara ug pagtan-aw sa kalainan. Dapita ang mga estudyante sa pagbansay niini sa mosunod nga kalihokan sa pagtuon.
Sa imong journal sa pagtuon, paghimo og gamay nga tsart nga naay duha ka kolum. Butangi og ngalan ang usa ka kolum nga Mga Israelinhon ug ang usa Moises.
Basaha ang Exodo 14:10–14, nga pangitaon kon unsay gisulti sa mga Israelinhon ug unsay gisulti ni Moises. I-summarize kon unsay imong makaplagan diha sa nahiangay nga kolum.
-
Unsa ang gipunting sa mga Israelinhon niini nga mga kahimtang? Unsa ang gitutokan ni Moises?
-
Unsay imong namatikdan pinaagi sa pagtandi sa unsay ilang gisulti?
-
Unsay imong nakat-onan gikan niini nga asoy nga mahimong makatabang nimo sa imong mga hagit?
Apil sa uban pang kamatuoran nga ipakigbahin tingali sa mga estudyante, tabangi sila nga makasabot sa mosunod: Ang pagpunting ngadto kang Jesukristo makadugang sa atong paglaom panahon sa mga hagit ug mga pagsulay.
-
Unsa nga mga problema sa imong hunahuna ang mahitabo kon mopunting lang kita sa atong mga hagit ug mga pagsulay?
Pagpunting kang Kristo
Ikonsiderar ang pagpakigbahin sa nahibilin nga bahin sa pamahayag ni Brother Camargo gikan sa sinugdanan sa leksiyon.
Gipakigbahin ni Brother Camargo ang mosunod bahin sa gahom sa pagpunting kang Jesukristo:
Ang akong papa sauna misulti kanako, “Ayaw pagpunting pag-ayo sa imong mga problema nga dili ka na makakita sa solusyon.”
Ako mopamatuod nga si Ginoong Jesukristo mao ang solusyon bisan gani sa atong labing lisod nga mga problema. (“Magpunting kang Jesukristo,” Liahona, Mayo 2023, 64)
-
Ngano sa imong hunahuna nga ang pagpunting kang Jesukristo makatabang kon mobati kita nga napalibotan o natanggong na sa atong mga hagit ug mga pagsulay?
Aron ipakita kon unsay gitudlo ni Brother Camargo, dapita ang mga estudyante nga ipunting una ang ilang hunahuna sa mga hagit nga ilang gisulat sa pisara. Hatagan nila og pagtagad kadtong mga hagit sulod sa 30 segundos. Dayon hangyoa sila sa pagpamalandong sa unsay ilang gibati.
Sunod, pagbutang og litrato ni Jesukristo diha sa atubangan sa klase. Dapita ang mga estudyante nga ipunting mismo ang ilang mga hunahuna sa Iyang gahom ug gugma sulod sa 30 segundos. Dapita ang mga estudyante sa pagsulat sa ilang mga tubag sa mosunod nga mga pangutana diha sa ilang mga journal sa pagtuon.
-
Unsay kalainan nga imong mamatikdan dihang mas nakatutok ka kang Jesukristo ug sa Iyang gahom kaysa sa imong mga hagit nga giatubang?
Ipakita ang mga pangutana sa ubos, ug paresparesa o bahinbahina ang mga estudyante sa gagmayng grupo. Dapita sila nga mopili og duha o tulo ka hagit nga naa sa pisara ug hisgotan kini nga mga pangutanaha.
-
Sa unsang paagi si Jesukristo mahimong solusyon sa mga problema, mga hagit, o mga pagsulay nga imong gipili?
-
Sa unsang paagi ang usa ka tawo makalihok uban ang hugot nga pagtuo kang Jesukristo atol nianang piho nga problema, hagit, o pagsulay?
Dapita ang andam na nga mga estudyante nga mopakigbahin sa unsay ilang nakat-onan o gibati.
Ang dakong gahom sa Ginoo
Ikonsiderar ang pagpabasa sa mga estudyante sa mosunod nga mga bersikulo nga tagsa-tagsa o magkauban. Pwede usab idrowing sa mga estudyante ang unsay ilang nabasa diha sa ilang mga journal sa pagtuon.
Kon makaayo sa imong mga estudyante, pwede nimong dapiton ang pipila ka estudyante nga dramahon og kadali ang mga bersikulo 19–22. Pananglitan, pwede kang maghimo og gamayng babag nga pwede rang matangtang o mabulag, aron makaagi ang mga estudyante.
Ang laing opsiyon mao ang pagpasalida sa animated video nga “Ang Pagpalabay” gikan sa time code nga 1:28 hangtod 2:32. Kini nga bidyo naa sa ChurchofJesusChrist.org.
Basaha ang Exodo 14:15–31, nga mangita kon giunsa pagpakig-away ug pagluwas sa Ginoo ang mga Israelinhon.
-
Unsa ang nakapadasig nimo mahitungod niini nga asoy?
-
Unsay imong nakaplagan nga makatabang nimo aron mosalig ka sa Ginoo?
Personal nga kalig-on ug kaluwasan
Ang sunod nga pangutana tingali sa sinugdanan lisod tubagon sa mga estudyante. Makatabang ang pagkadungog sa mga kasinatian sa uban aron mapamalandong nila ang kaugalingon nilang mga kasinatian. Pwede kang mopakigbahin og kasinatian nimo o sa imong kaila nga makatabang aron matubag ang pangutana. O pagpasalida og bidyo nga sama sa mosunod nga nagpakita sa kaimportante sa pagpunting ngadto sa Manluluwas atol sa atong mga pagsulay:
“Pagpangita kang Kristo Panahon sa Lisod nga mga Panahon” (4:35)
“Pagbati sa Gugma ug Pagkamaayo sa Ginoo panahon sa mga Pagsulay” (4:18)
Ang duha ka bidyo anaa sa ChurchofJesusChrist.org.
-
Sa unsang paagi ang pagpunting kang Jesukristo panahon sa hagit o pagsulay nakatabang nimo o sa imong kaila?
Tabangi ang mga estudyante nga makita nga usahay dili kita makadawat og tabang gikan sa Ginoo sa pagbuntog sa atong mga hagit sa mga paagi nga atong gilaoman. Pero, ang pagpunting kang Jesukristo makatabang nato nga makabaton og paglaom ug kalig-on bisan unsa pay atong giatubang.
Ikonsiderar ang pagtapos pinaagi sa pagpakigbahin sa imong pagpamatuod kang Jesukristo ug ang kaimportante sa pagpunting ngadto Kaniya panahon sa atong mga pagsulay. Pwede nimong ikonsiderar ang paglakip sa pamahayag sa ubos uban ang imong pagpamatuod.
Si Brother Camargo mipamatuod nga ang Manluluwas makatabang nato:
Si Ginoong Jesukristo buhi karon. Siya mahimong aktibo, matag adlaw anaa sa atong kinabuhi. Siya mao ang kasulbaran sa atong mga problema, apan kinahanglan kita nga mohangad ug motutok aron makakita Kaniya. Siya miingon, “Paghunahuna ngari kanako sa matag hunahuna; ayaw pagduha-duha, ayaw kahadlok” [Doktrina ug mga Pakigsaad 6:36]. (“Magpunting kang Jesukristo,” Liahona, Mayo 2023, 67)