Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻEkesōtosi 2–4: “Te u ʻi Ho Ngutú”

“ʻEkesōtosi 2–4: ‘Te u ʻi Ho Ngutú,’” Fuakava Motuʻá – Tohi Lēsoni ʻa e Faiako Seminelí (2026)

“ʻEkesōtosi 2–4: ‘Te u ʻi Ho Ngutú,’” Fuakava Motuʻá – Tohi Lēsoni ʻa e Faiako Seminelí

ʻEkesōtosi 1–6: Lēsoni 39

ʻEkesōtosi 2–4

“Te u ʻi Ho Ngutú”

Jesus Christ appearing to the prophet Moses. Mist or a cloud hovers around the figure of the Savior.

ʻI he taimi ʻoku tau fehangahangai ai mo e ngaahi faingataʻá, ʻoku tataki kitautolu ʻe he ʻEikí ʻi he ʻofa ʻo fakafou ʻi Heʻene kau palōfitá. ʻI he malumalu ʻo e pule ʻa Feló, naʻe faingataʻaʻia e fānau ʻo ʻIsilelí ʻi he nofo pōpulá pea nau tangi ki he ʻEikí. Naʻe fanongo ʻa e ʻEikí ki heʻenau tangí peá Ne ui ʻa Mōsese ko ha palōfita ke tokoni kiate kinautolu. ʻE lava ke tokoniʻi ʻe he lēsoni ko ʻení ʻa e kau akó ke nau fakaʻaongaʻi kakato ange e ngaahi folofola ʻa e ʻEikí ʻo fakafou ʻi Heʻene kau palōfitá ʻi heʻenau moʻuí.

Teuteu ʻa e tokotaha akó: Fakaafeʻi e kau akó ke nau toe vakaiʻi e ngaahi akonaki fakamuimuitaha mei he palōfitá. Fakaafeʻi leva kinautolu ke aleaʻi mo ha mēmipa ʻo e fāmilí pe kaungāmeʻa ʻa e founga kuo faitāpuekina ai ʻenau moʻuí ʻi he muimui ki he ngaahi akonaki ʻa e palōfitá.

Ngaahi ʻEkitivitī Ako ʻOku Ala Fakahokó

Ko e leʻo fē ke falala ki aí

Fakakaukau ke kamata e kalasí ʻaki hano vahevahe e fakamatala ko ʻení pea fai e ngaahi fehuʻi ko ʻení.

Naʻe pehē ʻe ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

16:5

ʻOku tau moʻui ʻi ha palanite ʻoku lauimiliona ai e ngaahi leʻo ʻoku vālaú. ʻOku vivili mai e ʻinitanetí, ʻetau telefoni toʻotoʻó, mo e ngaahi meʻa fakafiefiá ke maʻu ʻetau tokangá mo nau takiekina kitautolu. (“Ko e Palōfita ʻa e ʻOtuá,” Liahona, Mē 2018, 26)

Lisi ʻo ha ngaahi sīpinga ʻe niʻihi ʻo e ngaahi leʻo kuó ke mamata pe fanongo ai ʻi he ngaahi ʻaho kuo hilí.

Ko e hā ʻokú ke fakatokangaʻi fekauʻaki mo e ngaahi maʻuʻanga fakamatala kehekehé?
ʻOku kehe fēfē ʻa e ngaahi lea ʻa e kau palōfitá mei he ngaahi leʻo kehé?

Fakakaukau ke fakaʻaliʻali e ngaahi fakamatala vakaiʻi fakaekita ko ʻení pea fakaafeʻi e kau akó ke nau fakakaukau ki heʻenau ngaahi talí.

ʻI he ngaahi fakamatala takitaha ko ʻení, fakafuofuaʻi koe ʻo fakaʻaongaʻi ha meʻafua mei he 1 (ʻikai ke moʻoni) ki he 5 (fuʻu moʻoni ʻaupito):

ʻOku ou falala lahi ange ki he ngaahi lea ʻa e kau palōfitá mo e kau ʻaposetoló kae ʻikai ʻi he ngaahi leʻo pe ivi tākiekina kehé.
ʻOku ou falala ki he faleʻi mo e fakahinohino ʻoku tau maʻu mei he kau palōfita mo e kau ʻaposetolo ʻa e ʻEikí.
ʻOku ou feinga ke ako e ngaahi lea ʻa e kau palōfita mo e kau ʻaposetolo ʻo e ʻaho ní.

ʻI he ako ʻa e kau akó he ʻaho ní, fakaafeʻi kinautolu ke fakafanongo ki ha ngaahi ueʻi mei he Laumālié fekauʻaki mo e founga te nau lava ai ʻo muimui kakato ange ki he faleʻi ʻa e kau palōfitá mo e kau ʻaposetoló ʻi heʻenau moʻuí.

Ko e ui ʻe he ʻEikí ʻa Mōsese ke hoko ko ha palōfitá

Neongo ko ha tangata ʻIsileli ia ʻi hono fāʻeleʻí, ka naʻe ohi hake ʻa e palōfita ko Mōsesé ʻi he fale ʻo Feló ʻi ʻIsipite. ʻI he kei valevale ʻa Mōsesé, naʻe fekau ʻe Felo ke tāmateʻi e fānau tangata ʻIsileli kotoa pē ne toki fāʻeleʻí (vakai, ʻEkesōtosi 1:22). Ke fakahaofi ʻa Mōsesé, naʻe fufuuʻi ia ʻe heʻene faʻeé ʻi ha kato pea fakatētē ia he tafaʻaki ʻo ha vaitafe. Naʻe ʻiloʻi ʻa Mōsese ʻe he ʻofefine ʻo Feló, ʻa ia naʻá ne ohi hake ia ko hono foha (vakai, ʻEkesōtosi 2:1–10). ʻI ʻIsipité, naʻe ako lelei mo “mālohi [ʻa Mōsese] ʻi he lea mo e ngāue” (Ngāue 7:22).

ʻI heʻene hoko ko ha tangata lahí, naʻe tāmateʻi ʻe Mōsese ha tangata ʻIsipite ʻi haʻane feinga ke maluʻi ha taha ʻo e kau pōpula ʻIsilelí. Naʻe hola ʻa Mōsese ki Mitiane, ʻa ia naʻá ne nofo ai mo ha taulaʻeiki lahi ko Setelō pea mali mo hono ʻofefine ko Sīpolá (vakai, ʻEkesōtosi 2:11–21). Lolotonga hono tokangaʻi ʻe Mōsese ha fanga sipi ʻi Mitiané, naʻá ne maʻu ha aʻusia mo Sihova.

Fakaʻaliʻali ʻa e fakatātā ko ʻení. Fakaafeʻi e kau akó ke fakakaukauloto ko Mōsese kinautolu ʻi heʻenau lau e ngaahi veesi ko ʻení pea tali e ngaahi fehuʻi ko ʻení ʻi ha fanga kiʻi kulupu iiki. Hili iá, ʻe lava ke nau vahevahe fakakalasi e ngaahi meʻa mahuʻinga ne nau akó.

The Old Testament prophet Moses kneeling before the burning bush on Mount Sinai. Light is emanating from the bush.

ʻEkesōtosi 3:1–6. Te ke ongoʻi fēfē nai? Ko e hā hono ʻuhingá?

ʻEkesōtosi 3:7–14. Ko e fē ʻi he ngaahi akonaki ʻa e ʻEikí naʻe mahuʻingamālie mo fakafiemālie taha kiate koé?

Ke tokoni ke nofotaha e tokanga ʻa e kau akó ʻia Sīsū Kalaisi ʻi heʻenau ako e ngaahi veesi ko ʻení, fakakaukau ke fakaʻaliʻali ha fakatātā ʻo e Fakamoʻuí ʻi lotomālie ʻi he palakipoé. Te ke lava ʻo fakaafeʻi e kau akó ke nau tohi takatakai ʻi he fakatātaá ha ngaahi kupuʻi lea fekauʻaki mo e Fakamoʻuí, ʻo fakamatalaʻi ʻi Heʻene ngaahi leá ʻa e meʻa te tau lava ʻo ako fekauʻaki mo Ia mo Hono vā fetuʻutaki mo Mōsese mo e fānau ʻa ʻIsilelí. ʻE lava ke kau ʻi he ngaahi sīpinga ʻo e ngaahi fakakaukaú ʻa hono ui ʻe Sīsū ʻa Mōsese ʻaki hono hingoá (veesi 4), naʻe ngaohi ʻe he ʻi ai tonu ʻa Sīsuú ʻa e potu kelekelé ke toputapu (veesi 5), naʻe mamata ʻa Sīsū ki he ngaahi faingataʻá mo fanongo ki he tangi ʻa Hono kakaí (veesi 7), pea naʻe talaʻofa ʻe Sīsū ke nofo mo Mōsese (veesi 12).

Kapau he ʻikai talaatu ʻe he kau akó, fakamahinoʻi ange ʻa e huafa “Ko Aú” (ʻEkesōtosi 3:14). Fakamatalaʻi ange ʻoku maʻu ia mei he foʻi lea tefito ko e Sihova, ʻa ia ʻe lava ke fakaʻuhingaʻi ko e “ʻOku ʻi ai Ia” pe “ʻOkú Ne moʻui.” Naʻe mei faingofua pē hono fakatokangaʻi ʻo e hingoá ʻe he kau ʻIsilelí. Ke tokoni ke mahino ki he kau akó hono mahuʻinga ʻo e hingoa ko ʻení, te ke lava ʻo fehuʻi ange pe ko e hā ʻe ʻuhingamālie ai ke ʻiloʻi ʻoku moʻui moʻoni ʻa e ʻEikí pea ʻoku ʻi ai maʻu pē Iá.

Hili hono vahevahe ʻe he kau akó ʻenau ngaahi talí, te ke lava ʻo fai ʻa e fehuʻi ko ʻení.

Kapau naʻá ke ʻi he tūkunga ʻo Mōsesé, ko e hā ha ngaahi fakakaukau pe ongo naʻá ke mei maʻu?

Fakamatalaʻi ange neongo hono fakahā ʻe he ʻEikí ko hai Ia mo e meʻa naʻá Ne talaʻofa maí, naʻe kei hohaʻa pē ʻa Mōsese fekauʻaki mo hono ui ia ke fakahaofi ʻa ʻIsilelí.

Lau ʻa e ʻEkesōtosi 4:10–15, ʻo kumi e tali ʻa e ‘Eikí ki he ngaahi hohaʻa ʻa Mōsesé.

Ko e hā ʻokú ke ako fekauʻaki mo e ngaahi lea ʻa e kau palōfitá mei he ngaahi veesi ko ʻení?

Tokoniʻi e kau akó ke nau ʻiloʻi e foʻi moʻoni ʻoku folofola ʻaki ʻe he ʻEikí ʻEne folofolá ʻo fakafou ʻi Heʻene kau palōfitá.
ʻE tokoniʻi fēfē hoʻo moʻuí pe ko hoʻo ngaahi filí ʻi hono ʻiloʻi e moʻoni ko ʻení?

Fakamanatu e kamataʻanga ʻo e lēsoní mo e ngaahi leʻo kehekehe ʻoku nau fakaʻamu ke maʻu ʻetau tokangá. Fakakaukau ki ha meʻa te ke lava ʻo vahevahe mo ha taha kehe ke tokoni ke mahino kiate ia ʻoku folofola mai ʻa e ʻEikí ʻo fakafou ʻi he kau palōfitá pea ʻoku totonu ke tau fanongo ki he kau palōfitá kae ʻikai ko e ngaahi leʻo kehé. Te ke lava ʻo fakakau e meʻa naʻá ke ako mei he ʻEkesōtosi 3 mo ha faʻahinga aʻusia pē ʻaʻau, pe ko ha taha ʻokú ke ʻilo, kuó ne tokoniʻi koe ke ke ʻiloʻi ʻoku folofola mai ʻa e ʻEikí ʻo fakafou ʻi Heʻene kau palōfitá.

Fakaafeʻi e kau akó ke vahevahe e meʻa te nau ala lea ʻakí. ʻE lava ke fakaʻaongaʻi e fehuʻi vakaiʻi ko ʻení “Kuo tāpuekina fēfē koe pe ko ha taha ʻokú ke ʻiloʻi ʻe he mahino ko ʻení?”

Ko hono fakaʻaongaʻi e ngaahi lea ʻa e kau palōfita ʻa e ʻEikí ʻi heʻetau moʻuí

Ko e hā ha ngaahi founga te tau lava ai ʻo fanongo mo fakaʻaongaʻi e folofola ʻa e ʻEikí ʻoku fakafou mai ʻi Heʻene kau palōfitá, ʻi heʻetau moʻuí?

Poupouʻi ha kau ako ʻe niʻihi ke vahevahe ha ngaahi sīpinga ʻo hono fakaʻaongaʻi ʻo e ngaahi akonaki ʻa e kau palōfitá. Kapau ʻe ʻaonga, vahevahe ha ngaahi fakakaukau hangē ko e:

Fakaʻaongaʻi ha faleʻi fakaepalōfita pau mei ha lea ʻi he konifelenisi lahi fakamuimuitahá.
ʻI hono toutou ako e ngaahi lea ʻa e kau palōfitá, hangē ko e fanongo ki ha lea ʻi he konifelenisi lahí ʻi he pongipongi kotoa pē lolotonga e teuteu ki he akó.
Faʻu ha palani ke ako ʻa e ngaahi lea fakamuimuitaha ʻi he konifelenisi lahí ʻa e kau mēmipa takitaha ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. (Kapau ʻoku maʻu ʻe he kau akó ha naunau fakaʻilekitulōnika, te nau lava ʻo fakaʻaongaʻi ʻa e konga ki he Palani Akó ʻi he Gospel Library app.)

Hiki ʻi hoʻo tohinoa akó ʻa e founga te ke fanongo mo fakaʻaongaʻi ai e folofola ʻa e ʻEikí ʻo fakafou ʻi Heʻene kau palōfitá ʻi hoʻo moʻui fakatāutahá. Lekooti ko ha konga hoʻo palaní ʻa e ngaahi faingataʻa ʻokú ke pehē te ke ala fehangahangai mo iá. Tohi ʻi he faingataʻa takitaha ʻa e founga te ke lava ʻo ikunaʻi ai iá.

Fakamatalaʻi ange ki he kau akó te nau maʻu ha faingamālie ʻi ha lēsoni he kahaʻú, Lēsoni 55: “Siviʻi Hono 3 Hoʻo Akó,” ke vakaiʻi e tuʻunga ʻoku nau ʻi ai ʻi hono fakahoko ʻenau ngaahi palaní.

Fakaʻosi ʻaki hano vahevahe hoʻo fakamoʻoni ʻoku folofola mai ʻa e ʻEikí ʻo fakafou ʻi Heʻene kau palōfita moʻuí he ʻahó ni.

Ngaahi Maʻuʻanga Tokoni Kehé

Ko e hā mo ha toe meʻa ʻoku tau ʻilo fekauʻaki mo e huafa “Ko AÚ”?

Naʻe fakaʻaongaʻi ʻe he Fakamoʻuí ʻi heʻene moʻui fakamatelié ʻa e huafá ni ke fakahā ki he kau Siú ko Sihova Ia (vakai, Sione 8:56–59). Naʻá Ne toe pehē foki ko Ia ʻa e “Ko Au Lahí” ʻi he Tokāteline mo e Ngaahi Fuakavá (Tokāteline mo e Ngaahi Fuakava 29:1; 38:1; 39:1).

Te u fakamālohia fēfē ʻeku fakamoʻoni ʻoku uiuiʻi ʻe he ʻOtuá ʻa e kau palōfitá?

Naʻe pehē ʻe Palesiteni Lāsolo M. Nalesoni:

ʻOku fili ʻe he ʻEiki ko Sīsū Kalaisí, ʻa ia ko Hono Siasí ʻení, ha kau palōfita mo ha kau ʻaposetolo ke nau fakahā ʻEne ʻofá mo akoʻi ʻEne ngaahi fonó. …

Fehuʻi ki hoʻo Tamai Hēvaní pe ko e kau ʻaposetolo mo e kau palōfita moʻoni kimautolu ʻa e ʻEikí. Fehuʻi ange pe kuo tau maʻu ha fakahā ki he meʻá ni mo ha ngaahi meʻa kehe. (“The Love and Laws of God” [fakataha lotu ʻa e ʻUnivēsiti Pilikihami ʻIongí, 17 Sepitema, 2019], 3, 5, speeches.byu.edu)

Naʻe akonaki ʻa Sisitā Kalo F. Makongikī, ko ha tokoni mālōlō ʻi he Kau Palesitenisī Lahi ʻo e Kau Finemuí ʻo pehē:

ʻI heʻetau lau mo ako ʻi he faʻa lotu mo e loto fakamātoato ʻa e lea fakapalōfitá ʻi he tui kia Kalaisí, ʻe fakahā ʻe he Laumālie Māʻoniʻoní ʻa e moʻoní ki hotau ʻatamaí mo e lotó. (“Moʻui ʻo Fakatatau mo e Lea ʻa e Kau Palōfitá,” Liahona, Nōvema 2014, 79)

ʻOku totonu nai ke u falala maʻu pē ki he ngaahi lea ʻa e palōfitá?

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

16:5

ʻI he 1982, taʻu ʻe ua kimuʻa pea ui ʻa Misa Lāsolo M. Nalesoni ko ha Taki Māʻolungá, naʻá ne pehē: “Kuo teʻeki ke u fehuʻi kiate au, ‘Ko e fē ʻa e taimi ʻoku lea ai ʻa e palōfitá ko ha palōfita pea mo e taimi ʻoku ʻikai lea ai [ko ha palōfitá]?’ Ko e meʻa pē ne u tokanga ki aí pe, ‘ʻE founga fēfē haʻaku hoko ʻo hangē ko iá?’” Pea naʻá ne toe pehē, “Ko ʻeku [fakakaukaú] ke taʻofi hono fakafehuʻia e ngaahi lea ʻa e palōfitá kae tali ʻi he loto-fakafetaʻi lahi” [Russell M. Nelson, ʻi he Lane Johnson, “Russell M. Nelson: A Study in Obedience,” Ensign, Aug. 1982, 24]. Ko e founga ʻeni ʻoku fili ai ʻe ha tangata loto-fakatōkilalo mo fakalaumālie ke fokotuʻutuʻu ki ai ʻene moʻuí. ʻI he taimí ni, hili ha taʻu ʻe 36 mei ai, kuó ne hoko ko e palōfita ʻa e ʻEikí. (“Ko e Palōfita ʻa e ʻOtuá,” Liahona, Mē 2018, 26)

Fēfē kapau ʻoku ʻikai mahino kiate au e ngaahi lea ʻa e palōfitá?

Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí:

15:17

Taimi ʻe niʻihi te tau maʻu ha faleʻi ʻoku ʻikai mahino kiate kitautolu pe hangē ʻoku ʻikai ʻaonga kiate kitautolú, neongo kuo tau lotu mo fakakaukau lelei ki ai. ʻOua naʻá ke siʻaki ʻa e faleʻí, ka ke puke maʻu ia ke ofi kiate koe. Kapau ʻe ʻoatu ʻe ha taha ʻokú ke falala ki ai ha meʻa ʻoku hangē ha ʻoneʻoné mo palōmesi atu ʻoku ʻi ai ha momoʻi koula ai, mahalo ʻe fakapotopoto ke ke puke maʻu ia ʻi ho nimá ʻi ha kiʻi taimi siʻi, ʻo lulululu fakalelei ia. Kuó u fakahoko maʻu pē ia ki he faleʻi ʻoku haʻu mei ha palōfita, hili ha kiʻi taimi kuo kamata ke ʻasi hake ʻa e fanga kiʻi kongokonga koulá pea kuó u houngaʻia ai. (“Finding Safety in Counsel,” Ensign, May 1997, 26)

Ngaahi ʻEkitivitī Fakalahi ki he Akó

Mōsese ko ha sīpinga ʻo Kalaisi

Ke tokoni ke mahino ki he kau akó ko Mōsesé ko ha sīpnga ia pe fakataipe ʻo Kalaisi, te ke lava ʻo fakaafeʻi kinautolu ke fakafehoanaki ʻa e ngaahi meʻa ʻoku faitatau ʻi he ʻEkesōtosi 2 mo e Mātiu 2:13–16. ʻE lava ke fakamahinoʻi ʻe he kau akó ha ngaahi faitatau hangē ko ʻení:

ʻI he kei fānau iiki ʻa Mōsese mo Sīsuú, naʻá Na fakatou foua ha tuʻutuʻuni ʻa ha tuʻi ke tāmateʻi e fānau ʻIsilelí.
Ke fakahaofi kinaua mei he tuʻutuʻuni ʻa e tuí, naʻe ʻave ʻa Sīsū ʻe Siosefa mo Mele ki ʻIsipite, pea naʻe ohi hake ʻa Mōsese ʻi ha ʻapi ʻIsipite.
Naʻe fakatou ʻohake ʻa Mōsese mo Sīsū ke na fakahaofi e kakai ʻo e ʻOtuá mei he nofo pōpulá.

Hili iá te ke lava ʻo fehuʻi ki he kau akó pe ʻoku akoʻi mo fakamoʻoniʻi fēfē ʻe he ngaahi faitatau ko ʻení ʻa Sīsū Kalaisi.

Ko e tali ki ha palōfitá

Ke tokoni ke mahino ki he kau akó ʻa e founga ʻoku totonu ke tau tali ai ki ha palōfitá, fakaafeʻi kinautolu ke lau ʻa e ʻEkesōtosi 4:29–31, ʻo kumi e founga naʻe tali ai e kau ʻIsilelí kia Mōsesé. Te ke lava foki ʻo vahevahe ʻa e lea ko ʻeni naʻe fai ʻe Palesiteni M. Lāsolo Pālati (1928–2023) ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI heʻetau fanongo ki he faleʻi ʻa e ʻEikí ʻoku fakahā mai ʻe he Palesiteni ʻo e Siasí, ʻoku totonu ke fakalotolahi mo taimi tonu ʻetau talí. (“His Word Ye Shall Receive,” Ensign, May 2001, 65)

Aleaʻi e meʻa te tau lava ʻo ako mei he tali ʻa e kakaí mo e lea ʻa Palesiteni Pālatí. Kole ange ha ngaahi sīpinga ʻo e tali leleí mo e taimi totonú pea aleaʻi ʻa e ʻuhinga ʻoku fakahoko ai ʻe he ngaahi fili ko iá ha faikehekehé.

Ngaahi ʻekitivitī ako ki hono fakaʻaongaʻi e ngaahi lea ʻa e kau palōfitá

Ko ha ngaahi founga ʻeni ʻe niʻihi ʻe lava ke ʻahiʻahi ai ʻe he kau akó hono fakaʻaongaʻi e ngaahi lea ʻa e kau palōfitá ʻi heʻenau moʻuí. ʻI he ʻuluaki ʻekitivitií, ʻe lava ke ako fakaʻilekitulōnika ʻe he kau akó ʻa e ngaahi lea ʻa e kau palōfitá, pe te ke ʻoange ha tatau ʻo e ngaahi pulusinga ʻo e Liahona ʻo e konifelenisi lahí pe paaki ange e ngaahi pōpoaki fakamuimuitahá.

Fakaafeʻi e kau akó ke fekumi ʻi he ngaahi pōpoaki lolotonga mei he palōfitá mo e kau ʻaposetoló (mei he ngaahi tohi ʻi he mītia fakasōsialé, ngaahi lea ʻo e konifelenisi lahí, pe ngaahi akonaki kehé). Fakaafeʻi e kau akó ke kumi ha ngaahi kupuʻi lea ʻoku ʻuhingamālie kiate kinautolu. Fakaafeʻi kinautolu ke hiki e ngaahi kupuʻi lea ko ʻení ʻi he palakipoé.
Fili ha ngaahi palakalafi pe akonaki mei he ngaahi lea fakamuimuitaha ʻa e kau palōfitá. Fili ha ngaahi konga ʻokú ke ongoʻi ʻoku mahuʻinga taha ki hoʻo kau akó. Teuteuʻi e ngaahi konga ko ʻení ʻi ha laʻipepa tufa pea fakaafeʻi e kau akó ke nau ako e ngaahi konga naʻe toʻó ʻo hangē pē ha folofola fakahangatonu mai ʻa e ʻEikí kiate kinautolú. ʻE lava ke nau fakaʻilongai ʻa e meʻa ʻoku makehe kiate kinautolú.