Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻEkesōtosi 1: Ko Hono Fakaʻapaʻapaʻi ʻo e ʻOtuá ʻi he Fehangahangai mo e Fakafepakí

“ʻEkesōtosi 1: Ko Hono Fakaʻapaʻapaʻi ʻo e ʻOtuá ʻi he Fehangahangai mo e Fakafepakí,” Fuakava Motuʻá – Tohi Lēsoni ʻa e Faiako Seminelí (2026)

“ʻEkesōtosi 1: Ko Hono Fakaʻapaʻapaʻi ʻo e ʻOtuá ʻi he Fehangahangai mo e Fakafepakí,” Fuakava Motuʻá – Tohi Lēsoni ʻa e Faiako Seminelí

ʻEkesōtosi 1–6: Lēsoni 38

ʻEkesōtosi 1

Ko Hono Fakaʻapaʻapaʻi ʻo e ʻOtuá ʻi he Fehangahangai mo e Fakafepakí

Illustration of a party scene with drinking going on and one girl standing alone.

Naʻe fakapōpulaʻi ʻe he felo ʻIsipité ʻa e kau ʻIsilelí pea fekauʻi e kau māʻulí ke tāmateʻi e ngaahi foha ʻIsilelí ʻi hono fāʻeleʻí. Naʻe fili ʻa e kau māʻuli ko ʻení ke talangataʻa kia Felo koeʻuhí ko ʻenau ʻapasia ki he ʻOtuá. Hangē ko e kau fafine faivelenga ko ʻení, te tau lava ʻo fili ke falala ki he ʻOtuá neongo e ngaahi tūkunga faingataʻá. ʻE lava ke tokoni ʻa e lēsoni ko ʻení ki he kau akó ke fakamuʻomuʻa ʻa e ʻOtuá ʻi he ngaahi faingataʻa kehé.

Teuteu ʻa e tokotaha akó: Fakakaukau ke fakaafeʻi e kau akó ke nau fehuʻi ki ha mēmipa ʻo e fāmilí pe kaungāmeʻa ʻa e founga kuo nau mamata ai ki hono tāpuekina kinautolu ʻe he ʻOtuá ʻi heʻenau muimui kiate Ia kae ʻikai ko e niʻihi kehé.

Ngaahi ʻEkitivitī Ako ʻOku Ala Fakahokó

Loto-toʻa faka-Kalaisí

Fakakaukau ke vahevahe ʻeni meia Palesiteni Nalesoni.

Naʻe fakamatalaʻi ʻe Palesiteni Lāsolo M. Nalesoni e ngaahi ʻulungaanga ʻo e kau ākonga ʻa Sīsū Kalaisí:

14:51

ʻOku loto-fiemālie ʻa e kau ākonga moʻoni ʻa Sīsū Kalaisí ke hā mahino, lea, pea mo makehe mei he kakai ʻo māmaní. ʻOku nau taʻeilifia, moʻui līʻoa, pea mo loto-toʻa. (“Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 40–41)

Ko e hā ʻe fiemaʻu ai ha loto-toʻa ke ngāue ʻi he founga naʻe fakamatalaʻi ʻe Palesiteni Nalesoní?
ʻOkú ke pehē ko e hā ʻoku mahuʻinga ai ke muimui ʻi he faleʻi ʻa Palesiteni Nalesoní?

Fakaʻaliʻali ʻa e sivi fakaekita ko ʻení ke tokoni ki he kau akó ke nau fakalaulauloto ki he ongo ʻoku nau maʻu fekauʻaki mo e talangofua ki he ʻOtuá kae ʻikai moʻulaloa ki he ngaahi faingataʻa kehé.

Lau e ngaahi fakamatala ko ʻení pea fakafuofuaʻi ʻenau moʻoni kiate koé ʻi ha meʻafua mei he 1 (ʻikai ke moʻoni) ki he 5 (moʻoni ʻaupito).

ʻOku ou loto-fiemālie ke fakamuʻomuʻa ʻa e ʻEikí, naʻa mo e taimi ʻoku ou ongoʻi ai ʻoku teke au ʻe he niʻihi kehé ke tukuhifo ʻeku ngaahi tuʻunga moʻuí.
ʻOku ʻikai ke u fakapapauʻi pe ʻe tāpuakiʻi au ʻe he ʻOtuá ʻi heʻeku feinga ke talangofua ki Heʻene ngaahi fekaú.
ʻOku ou loto-fiemālie ke taukaveʻi ʻa e meʻa ʻoku ou ʻilo ʻoku totonú, neongo kapau ʻoku ʻikai ko e fili manakoá ia.

Poupouʻi e kau akó ke tokanga ki he ngaahi ueʻi mei he Laumālié ʻi heʻenau ako e ʻEkesōtosi 1. ʻE lava ke tokoniʻi kinautolu ʻe he Laumālié ke nau teuteu ke ngāue ʻi he loto-toʻa ʻi he taimi ʻoku nau ongoʻi ai ʻoku teke kinautolu ke nau fai ha ngaahi meʻa ʻoku fepaki mo e finangalo ʻo e ʻOtuá.

Ngaahi sīpinga māʻoniʻoni

Fakakaukau ke fakaafeʻi e kau akó ke vahevahe e meʻa ʻoku nau ʻilo fekauʻaki mo e meʻa naʻe hoko ki he kau ʻIsilelí hili e pekia ʻa Siosefa ʻo ʻIsipité. ʻI hano fiemaʻu, fakaʻaongaʻi ha konga pe kotoa ʻo e fakamatala fakanounou ko ʻení.

Hili e pekia ʻa Siosefa ʻo ʻIsipité, naʻe tupu tokolahi ʻa e kau ʻIsilelí (naʻe toe ui foki ko e kakai Hepeluú) ʻi he fonua ko ʻIsipité. ʻI he manavahē ʻa e Felo foʻoú naʻa ikunaʻi ʻe he kau ʻIsilelí ʻa e kau ʻIsipité, naʻá ne fakangāueʻi pōpula kinautolu (vakai, ʻEkesōtosi 1:6–14).

Lau ʻa e ʻEkesōtosi 1:15–16, ʻo kumi e meʻa naʻe fekau ʻe Felo kia Sifila mo Piua, ko ha ongo māʻuli Hepelū, ke na faí. ʻOku ʻuhinga ʻa e “māʻulí” ki he kau fafine ʻoku tokoni ʻi he fāʻelé. ʻOku ʻuhinga ʻa e “fāʻelé” (veesi 16) ki he ngaahi nofoʻanga ʻoku fakaʻaongaʻi ʻe he kakai fefine ʻoku fāʻelé.

Fakaafeʻi ʻa e kau akó ke vahevahe ʻa e meʻa naʻa nau maʻú. Kumi ha ngaahi founga ke tokoni ki he kau akó ke nau fakafelāveʻi e ongo naʻe maʻu ʻe he ongo fafine ko ʻení ke na fai e meʻa naʻe fiemaʻu ʻe he niʻihi kehé kae ʻikai ko e finangalo ʻo e ʻOtuá. Ko e fehuʻi mo e ʻekitivitī ko ʻení ko ha founga ia ʻe taha ke fakahoko ai ʻeni.

Kapau ko Sifila mo Piua koe, ko e hā naʻá ne mei ʻai ke faingataʻa kiate koe ke fakamuʻomuʻa e finangalo ʻo e ʻOtuá ʻi he fiemaʻu ʻa Feló?

Fakakaukau ke vahevahe e kalasí ki ha ngaahi kulupu. Fakaafeʻi e ngaahi kulupú ke feinga ke ʻiloʻi e ngaahi tūkunga kuo nau fehangahangai mo ia pe te nau fehangahangai mo ia ʻa ia ʻe ala faingataʻa ai ke fili e finangalo ʻo e ʻOtuá koeʻuhí ko ha ngaahi faingataʻa kehe. ʻAi ke nau faʻu ha lisi ʻo e ngaahi ʻuhinga ʻe ala hohaʻa ai ha taha fekauʻaki mo e muimui ki he ʻOtuá ʻi he ngaahi tūkunga ko iá.

Lau ʻa e ʻEkesōtosi 1:17–21, ʻo kumi e ʻuhinga naʻe fai ai ʻe Sifila mo Piua ʻa e ngaahi fili naʻá na faí.

Ko e hā naʻá ke maʻú?
Ko e hā ʻe lava ke fakaʻaiʻai ʻe he ngaahi veesi ko ʻení ha taha te ne fifili pe ʻoku totonu nai ke nau fakamuʻomuʻa ʻa e ʻOtuá ʻi he ngaahi faingataʻa kehe ʻoku nau fehangahangai mo iá?

Lolotonga e vahevahe ʻa e kau akó, mahalo te ke fie talaange kiate kinautolu ʻoku ʻuhinga ʻa e “manavahē ki he ʻOtuá” (vakai, veesi 17, 21) ki he fakaʻapaʻapaʻi ʻa e ʻOtuá. Fakamahinoʻi ange ʻa e kupuʻi lea “naʻe fai lelei ʻe he ʻOtuá” kia Sifila mo Piua (veesi 20) kapau ʻoku ʻikai ʻilo ia ʻe he kau akó. Fakaafeʻi e kau akó ke fakaʻilongaʻi ʻa e kupuʻi lea ko ʻení. ʻOku ʻuhinga ʻeni naʻe tāpuakiʻi ʻe he ʻOtuá ʻa Sifila mo Piua ʻi heʻena fakamuʻomuʻa Ia ʻi he ngaahi faingataʻa naʻá na fehangahangai mo iá. Ko e tāpuaki ʻe taha naʻe foaki ʻe he ʻEikí kia Sifila mo Piuá ko ha ngaahi hako.
Ko e hā ha moʻoni te tau lava ʻo ako meia Sifila mo Piua ʻe lava ʻo tokoni kiate kitautolu ʻi he taimi ʻoku tau fehangahangai ai mo e ngaahi faingataʻa ke muimui ki he niʻihi kehé kae ʻikai ko e ʻOtuá?

ʻI hono fakaʻaongaʻi e lea pē ʻa e kau akó, ʻe lava ke nau ʻilo ha moʻoni hangē ko ʻení ʻi heʻetau fakavaivai ki he ʻOtuá kae ʻikai ke fakahehema ki he ngaahi takiekina kehé, te Ne tāpuakiʻi kitautolu.

Neongo ʻoku nofotaha ʻa e toenga ʻo e lēsoní ʻi he founga ʻoku “fai lelei [ai ʻa e] ʻOtuá” kiate kitautolú, te ke lava ʻo tuku ha taimi ke tokanga taha ai ki he sīpinga moʻulaloa ʻa e Fakamoʻuí ki he finangalo ʻo e Tamai Hēvaní. Te ke lava ʻo ngāue ʻaki ha fehuʻi hangē ko ʻení ke fakahoko ia. Kapau ʻoku faingataʻa ke maʻu ʻe he kau akó ha ngaahi sīpinga, te ke lava ʻo tataki kinautolu ki he Sione 6:38 pe Luke 22:42.
Ko e hā kuo akoʻi pe fai ʻe he Fakamoʻuí ʻokú ne fakahaaʻi e founga ʻokú Ne hoko ai ko e sīpinga haohaoa ʻo e moʻoni ko ʻení?
Fakakaukau ki ha ʻekitivitī ke tokoni ke mahino ki he kau akó ʻa e ngaahi founga ʻe lelei ai hono fakahoko ʻe he ʻEikí (tāpuakiʻi) kinautolu ʻi heʻenau fakaʻapaʻapaʻi Iá ʻaki hono fakamuʻomuʻa Iá. Ko ha fakakaukau ʻeni ʻe ua. Fili ha taha ʻo e ongo meʻá ni pe ko ha taha ʻo hoʻo ngaahi filí ke tokoni ki he kau akó ke tali e ngaahi fehuʻi ko ʻení.
1. Vahevahe mo e kau akó ʻa e vitiō “Leave the Party” (6:26) pe vitiō “Ke Mou Vilitaki ʻi he Loto-toʻa, Mālohi, pea Longomoʻui” mei he taimi 1:20 ki he 5:13 (ʻoku fakatou maʻu e ongo vitioó fakatouʻosi ʻi he ChurchofJesusChrist.org). Fakaafeʻi e kau akó ke feinga ke ʻiloʻi e founga naʻe tāpuakiʻi ai ʻe he ʻEikí ʻa Sione ʻi hono fakamuʻomuʻa e ʻOtuá ʻi he ngaahi faingataʻa kehé.
10:35
1. ʻOange ki he kau akó ha ngaahi potufolofola ke nau ako ʻa ia ʻoku fakahaaʻi ai ha ngaahi founga kuo ngāue lelei ai ʻa e ʻOtuá mo e niʻihi kehé ʻi hono fili Ia kae ʻikai ko e ngaahi faingataʻa kehé. ʻE lava ke nau ako ʻa e 2 Nīfai 5:6–13; Mōsaia 24:11–15; 4 Nīfai 1:15–18. ʻE lava foki ke maʻu ʻe he kau akó ha ngaahi potufolofola kehe ʻokú ne fakahaaʻi ʻa e founga ʻoku fengāueʻaki lelei ai ʻa e ʻOtuá mo ʻEne fānaú ʻi he taimi ʻoku nau fakamuʻomuʻa ai Iá.
ʻE fēfē nai e taimi ʻoku “fai lelei [ai ʻa e] ʻOtuá” kiate kitautolú?
Ko e hā ha founga kuo fai lelei atu ai ʻa e ʻOtuá kiate koe pe ko ha taha ʻokú ke ʻiloʻi ʻi hoʻo tukulolo ki Hono finangaló kae ʻikai ke fakahehema ki he ngaahi faingataʻa kehé?
Ko e hā ʻoku mahuʻinga ai kiate koe ke ke fili ke fakamuʻomuʻa ʻa e ʻOtuá neongo pe ko e hā hono olá?

Ko hono fakavaivaiʻi hotau lotó ki he ʻOtuá

Fakakaukau ke fakaʻaliʻali e ongo fehuʻi ko ʻení ke tokoni ki he kau akó ke fakakaukau ki he meʻa kuo nau ako pe ongoʻi he ʻaho ní pea mo e founga ʻe lava ke tokoni ai kiate kinautolu ʻi heʻenau fehangahangai mo e ngaahi tūkunga faingataʻá.

Fili ha taha ʻo e ngaahi fehuʻi ko ʻení ke tali ʻi hoʻo tohinoa akó:

Ko e hā kuó ke ako pe ongoʻi he ʻahó ni ʻe lava ʻo tokoni atu ke ke maʻu ha loto-falala ʻe tāpuakiʻi koe ʻe he ʻOtuá ʻi he taimi ʻokú ke fili ai ke fakamuʻomuʻa Iá?
Ko e hā te ke vahevahe mo ha taha ʻoku ʻikai ke ne fakapapauʻi pe ʻoku mahuʻinga ke fili ʻa e ʻOtuá ʻi he taimi ʻoku tau fehangahangai ai mo e ngaahi faingataʻa kehé?

Fakakaukau ke ʻoange ha faingamālie ki he kau akó ke vahevahe e meʻa ne nau tohí. Te ke lava foki ʻo vahevahe ʻa e talaʻofa ʻa e Fakamoʻuí ki he kakai ʻoku fakatangaʻi koeʻuhí ko ʻenau fili Iá, ʻoku maʻu ʻi he Mātiu 5:10–12. Fakakaukau ke vahevahe hoʻo fakamoʻoni ki he founga ʻe tāpuakiʻi ai kitautolu ʻe he ʻOtuá ʻi he taimi ʻoku tau fili ai ke muimui kiate Iá, neongo ʻene faingataʻá.

Ngaahi Maʻuʻanga Tokoni Kehé

ʻEkesōtosi 1:17. ʻOku ʻuhinga ki he hā ʻa e manavahē ki he ʻOtuá?

ʻOku ʻomi ʻe he Fakahinohino ki he Ngaahi Folofolá ha ʻuhinga ʻe ua ʻo e manavaheé: “(1) ko e manavahē ki he ʻOtuá, ko ha ongoʻi ʻapasia mo ʻaʻapa ia kiate ia pea talangofua ki heʻene ngaahi fekaú; (2) ko e manavahē ki he tangatá, ngaahi fakatuʻutāmaki, mamahi mo e koví ko e ilifia ia ki he ngaahi meʻa peheé pea tailiili pe fakatuʻatamaki ki ai” (Fakahinohino ki he Ngaahi Folofolá, “Manavaheé,” Gospel Library).

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

16:21

Neongo ʻoku kehe ʻeni ka ʻoku fekauʻaki ia mo e ngaahi ilifia ʻoku tau faʻa aʻusiá, ʻa e meʻa ʻoku fakamatalaʻi ʻe he folofolá ko e “manavahē [faka-ʻOtuá]” (Hepelū 12:28) pe “ko e manavahē [ki he ʻEikí]” (Siope 28:28; Lea Fakatātā 16:6; ʻĪsaia 11:2–3). ‘Oku ‘ikai hangē ia ko e ilifia fakamamani ko ia ‘okú ne fakatupu ‘a e loto-tailiilí mo e loto-hohaʻá, ka ko e manavahē ‘oku faka-ʻOtuá ko ha maʻuʻanga melino, loto-fakapapau, mo e loto-falala.

Ka ‘oku fakamaama mo fakalaumālie fēfē ha meʻa ʻoku tupu ai e manavaheé?

‘Oku kāpui ‘e he manavahē fakalaumālie ko ia ‘oku ou feinga ke fakamatalaʻí ‘a e ongoʻi loto-ʻapasia moʻoni, fakaʻapaʻapa, mo e tanganeʻia ʻi he ‘Eiki ko Sīsū Kalaisí (vakai, Saame 33:8; 96:4), mo e talangofua ki Heʻene ngaahi fekaú (vakai, Teutalōnome 5:29; 8:6; 10:12; 13:4; Saame 112:1), mo e nofo ‘amanaki ki he Fakamaau Fakaʻosí mo e fakamaau totonú ‘i Hono toʻukupú. (“Ko Ia Naʻa Nau Taʻofi ʻEnau Ilifiá,” Liahona, Mē 2015, 48)

Te u lava fēfē ʻo laka atu ki muʻa ʻi he loto-toʻa neongo ʻeku ongoʻi ilifiá?

Naʻe pehē ʻe ʻEletā Kala B. Kuki ʻo e Kau Palesitenisī ʻo e Kau Fitungofulú:

11:5

ʻE tokoniʻi kitautolu ʻe he ʻOtua ʻo e langí mo māmani ke tau ikunaʻi ʻa e loto-foʻí mo ha faʻahinga faingataʻa pē ʻoku tau foua kapau te tau sio pē kiate Ia, muimui ʻi he ueʻi ʻa e Laumālie Māʻoniʻoní, pea hokohoko atu—ʻi he tui.

ʻOku tau fakamālō pē, he ko e taimi ʻoku tau vaivai ai pe ʻikai malavá, ʻoku fakamālohia ʻe he ʻEikí ʻetau tuí. Te ne lava ʻo fakatupulaki ʻa ʻetau malava ʻo ope atu ʻi he meʻa te tau lavá. (“Hokohoko Atu Pē—ʻi he Tui,” Liahona, Mē 2023, 14)

Naʻe akoʻi ʻe Palesiteni Tōmasi S. Monisoni (1927–2018):

16:18

Te tau fehangahangai kotoa pē mo e manavasiʻí, foua e manukí, fehangahangai mo e fakaangá. ʻAi ke tau maʻu--ʻe kitautolu kotoa--ha loto-toʻa ke fakafepakiʻi e tui fakatokolahí, mo e loto-toʻa ke taukaveʻi ʻetau tefitoʻi moʻoní. ʻOku ʻomi ʻe he loto toʻá, kae ʻikai ko e [moʻulaloá], ʻa e hōifua ʻa e ʻOtuá. ʻOku hoko e loto-toʻá ko ha ʻulungaanga matamata-lelei ʻi he taimi ʻoku ʻikai ngata pē ko ha loto-fiemālie ke mate … ka ko e fakapapau ke moʻui fakaʻeiʻeiki. ʻI heʻetau laka atu, mo feinga ke moʻui hangē ko ia ʻoku tonu ke tau faí, kuo pau ke tau maʻu e tokoni mei he ʻEikí mo lava ke maʻu ha nonga ʻi Heʻene ngaahi folofolá. (“Ke ke Mālohi Peá ke Loto-toʻa,” Liahona, Mē 2014, 69)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Te ke lava ʻo kamata e lēsoní ʻaki haʻamou sio ʻi he “Leave the Party” kae ʻikai lau e lea ʻa Palesiteni Nalesoní. Taʻofi fakataimi e vitioó ʻi he 3:08. Fehuʻi ki he kau akó pe ko e hā naʻe mei faingataʻa kia Sione ʻi he tūkunga ko ʻení. Fehuʻi ange pe ko e hā ha ngaahi tūkunga ʻe ala ongoʻi ai ʻe he toʻu tupú ha takiekina ke talangataʻa ki he ʻOtuá.

Hili hono ʻiloʻi ʻe he kau akó ʻa e moʻoni fekauʻaki mo e ngaahi tāpuaki ʻa e ʻOtuá, sio he toenga ʻo e vitioó. Tuku ke kumi ʻe he kau akó ʻa e fili naʻe fai ʻe Sioné mo e founga naʻe “fai lelei” ai ʻa e ʻOtuá kia Sione koeʻuhí ko ʻene filí.

ʻEkesōtosi 1:17, 21. Manavahē mo muimui ki he ʻOtuá

Hili hono aleaʻi ʻe he kau akó ʻa e ngaahi tūkunga ne nau ongoʻi pe lava ke nau ongoʻi mafasia aí, te ke lava ʻo tokoniʻi kinautolu ke nau ʻiloʻi ʻa e ʻuhinga ʻo e manavahē ki he ʻOtuá mo e muimui loto-toʻa kiate Iá. Fakakaukau ke fakaafeʻi e kau akó ke fakaʻaongaʻi ʻa e Fakahinohino ki he Ngaahi Folofolá pea ako ʻa e ngaahi potufolofola ʻoku hiki atu ʻi lalo ʻi he “Loto-toʻá,” “Manavahē,” pe “Manavahē ki he ʻOtuá.” Poupouʻi kinautolu ke kumi ha ngaahi potufolofola ʻe lava ʻo tokoni ʻi he taimi ʻoku aʻusia ai ʻe ha taha ha mālohi ke taʻe tokanga ki he ngaahi fekau pe ngaahi tuʻunga moʻui ʻa e ʻEikí.

Ko hono maʻu ha mahino ki he ngaahi tāpuaki ʻa e ʻEikí

Ke tokoni ke mahino ki he kau akó ʻoku ʻikai tatau maʻu pē ʻa e ngaahi tāpuaki ʻa e ʻOtuá ki he muimui ki Hono finangaló ʻi he tūkunga kotoa pē, lau ʻa e lea ko ʻeni meia Palesiteni Monisoní.

Naʻe akoʻi ʻe Palesiteni Tōmasi S. Monisoni (1927–2018):

16:18

ʻOku ʻikai ke ʻomi ʻe he loto-toʻa kotoa pē ha faʻahinga ola ʻilonga pe vave pehē, ka ʻoku nau ʻomi kotoa ha nonga ki he ʻatamaí mo ha ʻilo kuo taukaveʻi ʻa e totonú mo e moʻoní. (“Ke ke Mālohi Peá ke Loto-toʻa,” Liahona, Mē 2014, 68)

Te ke lava foki ʻo fakamatalaʻi ange ʻoku ʻikai ʻuhinga e muimui ki he ʻOtuá te tau malu maʻu pē mei he ngaahi fili ʻa e niʻihi kehé. Neongo naʻe hao ʻa e kau māʻuli ko ʻení meia Felo, ka naʻe tāmateʻi ʻa e ngaahi ʻofefine ʻo ʻOnaitá ʻe he kau taulaʻeiki koví ʻi heʻenau fakafisi ke hū ki he ngaahi ʻotua loí (vakai, ʻĒpalahame 1:11). Ke tokoni ke mahino ki he kau akó ʻa e fiemaʻu ke falala ki he ʻOtuá neongo ʻa e olá, te ke lava ʻo ʻeke ange ha ngaahi fehuʻi hangē ko ʻení:

ʻOkú ke pehē ko e hā ʻoku ʻikai toʻo maʻu ai pē ʻe he ngaahi tāpuaki ʻa e ʻOtuá ʻa e ngaahi faingataʻá pe mamahí?
Ko e hā ʻokú ne tokoniʻi koe ke fakamuʻomuʻa Hono finangaló ʻi he ngaahi faingataʻa kehé neongo pe ko e hā ʻa e olá?

“ʻOua ʻe Puputuʻu”

Kapau ʻoku tataki ʻe he fakamatala ʻa e kau akó ʻa e lēsoní ki hono aleaʻi ʻo e manavaheé, fakakaukau ke sio ʻi he “Be Not Troubled” (4:30). Kole ki he kau akó ke kumi e founga ʻe lava ke tokoniʻi ai kitautolu ʻe he ʻOtuá ke tau ikunaʻi ʻetau manavaheé. Fakaafeʻi leva e kau akó ke vahevahe e founga kuo tokoniʻi ai kinautolu ʻe he ʻOtuá ke ikunaʻi ʻenau manavaheé.

4:31