Manwal ng Guro ng Seminary para sa Lumang Tipan

Mga Nilalaman
Pahina ng Pamagat
Pambungad sa Manwal ng Guro
Mga Lesson sa Lumang Tipan
- Halina’t Basahin ang Lumang Tipan
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko ng Pagkabuhay
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Mga Bilang 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Hukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Cronica 14–20; 26; 30
- Ezra 1; 3–7; Nehemias 2; 4–6; 8
- Esther
- Job 1–3; 12–14; 19; 21–24; 38–40; 42
- Mga Awit 1–2; 8; 19–33; 40; 46
- Mga Awit 49–51; 61–66; 69–72; 77–78; 85–86
- Mga Awit 102–103; 110; 116–119; 127–128; 135–139; 146–150
- Mga Kawikaan 1–4; 15–16; 22; 31; Eclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3; 7; 16–18; 20
- Jeremias 31–33; 36–38; Mga Panaghoy 1; 3
- Ezekiel 1–3; 33–34; 36–37; 47
- Daniel 1–7
- Oseas; Joel
- Amos; Obadias; Jonas
- Mikas; Nahum; Habakuk; Sefanias
- Hagai 1–2; Zacarias 1–4; 7–14
- Malakias
Mga Lesson sa Paghahanda sa Buhay
- Doctrinal Mastery: Paghahanap ng mga Sagot sa Aking mga Tanong
- Mga Kasanayan sa Pag-aaral ng Banal na Kasulatan
- Para sa Lakas ng mga Kabataan: Paggawa ng mga Pagpili
- Pagkakaroon ng Pag-asa sa Sariling Kakayahan o Self-Reliance
- Pisikal at Emosyonal na Kalusugan
- Paghahanda para sa Edukasyon at Trabaho sa Hinaharap
- Pagtatagumpay sa Paaralan
- Paghahanda ng Missionary
- Paghahanda para sa Templo
- Mga Turo ng mga Lider ng Simbahan
Apendiks

Genesis 39: Pagdaig sa Tukso

“Genesis 39: Pagdaig sa Tukso,” Manwal ng Titser ng Seminary para sa Lumang Tipan (2026)

“Genesis 39: Pagdaig sa Tukso,” Manwal ng Titser ng Seminary para sa Lumang Tipan

Genesis 37–41: Lesson 34

Genesis 39

Pagdaig sa Tukso

Matapos maging tagapamahala si Jose sa bahay ni Potifar, tinukso siya ng asawa ni Potifar na labagin ang batas ng kalinisang-puri. Alam ni Jose na ang pagpapatangay sa tuksong iyon ay isang “kasalanan laban sa Diyos” at pinili niyang tumakas mula sa tukso (tingnan sa Genesis 39:9, 12). Ang lesson na ito ay makatutulong sa mga estudyante na maipakita ang kanilang katapatan sa Diyos sa pamamagitan ng paglaban sa tukso na labagin ang batas ng kalinisang-puri.

Paghahanda ng estudyante: Sabihin sa mga estudyante na isipin na kunwari ay hiniling sa kanila na pangunahan ang isang talakayan sa kanilang klase sa Sunday School tungkol sa iba’t ibang paraan na mapaglalabanan nila ang mga tukso ni Satanas. Sabihin sa mga estudyante na mag-isip ng tatlong paraan na ibabahagi nila sa kanilang klase.

Mga Posibleng Aktibidad sa Pag-aaral

Mga tuksong kinakaharap natin

Maaari mong ipalista sa klase sa pisara ang mga tuksong kinakaharap ng mga kabataan ngayon. Upang matulungan ang mga estudyante na mapag-isipan pa ang mga tukso na personal nilang kinakaharap at kung paano sila tutugon sa mga ito, maaari mong sabihin na kumpletuhin ng bawat estudyante ang sumusunod na aktibidad sa isang papel.

Pumili ng tukso at magsulat ng maikli at makatotohanang sitwasyon kung saan maaaring kaharapin ng isang tinedyer ang tuksong iyon.

Kolektahin ang mga sitwasyon at muling ipamigay ang mga ito sa klase.

Basahin ang bago ninyong sitwasyon. Sa likod ng papel, isulat kung ano ang maaaring magpahirap para mapaglabanan ang tuksong iyon. Magsulat din ng dalawang bagay na maaari ninyong hikayatin na gawin ng isang tao para matulungan siyang mapaglabanan o madaig ang tuksong iyon.

Ipaliwanag sa mga estudyante na bagama’t maaaring hindi nila maranasan ang gayong tukso na nakalista sa sitwasyon, maaari silang gumamit ng katulad na payo sa sarili nilang mga sitwasyon. Tulungan ang mga estudyante na masuri ang kanilang sariling kakayahan na mapaglabanan ang tukso.

Isipin ang mga tukso na maaaring makaharap ninyo nang personal.

Ano ang nagawa na ninyo, o magagawa ninyo, upang magkaroon ng lakas mula sa Ama sa Langit at kay Jesucristo upang mapaglabanan ang mga tuksong iyon?

Maaari mong anyayahan ang mga estudyante na idagdag sa isinulat nila sa sitwasyon ang sarili nilang mga karanasan. Hikayatin silang patuloy na magdagdag ng mga ideya sa kanilang sitwasyon habang pinag-aaralan nila ang Genesis 39. Ipaalam sa kanila na kapag humingi sila ng tulong mula sa Espiritu Santo, makapagbibigay Siya ng mga ideya upang mapaglabanan at madaig ang mga tuksong kinakaharap nila.

Ang karanasan ni Jose sa tukso

Kung gumamit ka ng mga larawan para ibuod ang mga pangyayari sa buhay ni Jose sa Lesson 33: “Genesis 37–41,” maaari mong ipakitang muli ang mga ito. Sabihin sa isang estudyante na ibuod ang naaalala niya tungkol sa kung paano pinagpala ng Panginoon si Jose sa bahay ni Potifar. Kung kailangan ng mga estudyante ng tulong, sabihin sa kanila na basahin at ibuod ang Genesis 39:1–6.

Basahin ang Genesis 39:7–8, at alamin ang nangyari kay Jose pagkatapos niyang maging tagapamahala sa bahay ni Potifar.

Anong tukso ang nakaharap ni Jose?

Ipaliwanag na naharap si Jose sa tukso na labagin ang batas ng kalinisang-puri. Tulungan ang mga estudyante na pag-isipan kung ano ang nauunawaan nila tungkol sa batas ng kalinisang-puri sa pamamagitan ng pag-anyaya sa kanila na gawin ang mga sumusunod.

Sa inyong study journal, isulat kung paano ninyo ilalarawan ang batas ng kalinisang-puri at kung bakit ito mahalaga.

Kapag tapos nang magsulat ang mga estudyante, maaari mong ipakita ang sumusunod na pahayag. Sabihin sa mga estudyante na basahin ito nang mag-isa at hanapin ang mga kabatiran na maaari nilang idagdag sa isinulat nila sa kanilang study journal.

Inihahayag sa Para sa Lakas ng mga Kabataan: Isang Gabay sa Paggawa ng mga Pagpili ang mga sumusunod tungkol sa batas ng kalinisang-puri:

Nakasaad sa batas ng kalinisang-puri na sinasang-ayunan ng Diyos ang seksuwal na aktibidad sa pagitan lamang ng isang lalaki at isang babaeng ikinasal. …

Sa labas ng kasal sa pagitan ng isang lalaki at isang babae, mali ang hipuin ang mga pribado at sagradong bahagi ng katawan ng ibang tao kahit nakadamit. Sa iyong mga pagpili kung ano ang gagawin, titingnan, babasahin, iisipin, ipo-post, o ite-text, iwasan ang anumang bagay na sadyang pumupukaw ng pagnanasa sa iba o sa iyong sarili. Kabilang dito ang anumang anyo ng pornograpiya. (Para sa Lakas ng mga Kabataan: Isang Gabay sa Paggawa ng mga Pagpili, 23, 25)

Sa inyong palagay, bakit tayo binigyan ng Ama sa Langit ng batas ng kalinisang-puri?
Sa anong mga paraan sinusubukang tuksuhin ni Satanas ang mga kabataan na labagin ang batas ng kalinisang-puri?

Maaaring kabilang sa mga posibleng isagot ng mga estudyante ang pagkuha o pagpapadala ng mga hindi angkop na larawan, panonood o pakikinig sa media na may seksuwal na pahiwatig o kahalayan, hindi pagpapanatiling sagrado ng pakikipagtalik o seksuwal na damdamin. Kung may mga tanong ang mga estudyante tungkol sa pagkaakit sa kapwa babae o kapwa lalaki, maaaring makatulong na ipaliwanag na ang “pagkaakit sa kapwa babae o kapwa lalaki ay hindi kasalanan. Kung ganito ang nadarama [ng isang tao] at hindi [siya] naghahangad o kumikilos ayon sa mga ito, ipinamumuhay [niya] ang sagradong batas ng kalinisang-puri ng Ama sa Langit” (Para sa Lakas ng mga Kabataan: Isang Gabay sa Paggawa ng mga Pagpili, 27).

Basahin ang Genesis 39:9–12, at alamin kung paano napaglabanan ni Jose ang tukso na labagin ang batas ng kalinisang-puri.

Ang Genesis 39:9 ay isang doctrinal mastery passage. Maaari mong anyayahan ang mga estudyante na markahan ang mga doctrinal mastery passage sa natatanging paraan upang madali nilang mahanap ang mga ito.

Ano ang natutuhan ninyo mula sa halimbawa ni Jose?

Maaaring matukoy ng mga estudyante ang mga katotohanang tulad ng: Ang ating katapatan sa Diyos ay makapagbibigay sa atin ng lakas na mapaglabanan ang tukso na labagin ang batas ng kalinisang-puri (talata 9).

Maaaring markahan ng mga estudyante sa kanilang mga banal na kasulatan kung ano ang nagawa ni Jose dahil sa kanyang katapatan sa Diyos, halimbawa, sa talata 8 (“siya’y tumanggi”), talata 10 (“hindi siya pumayag”), at talata 12 (“siya’y tumakas”).

Upang matulungan ang mga estudyante na masagot ang sumusunod na tanong, maaari mo silang bigyan ng sitwasyon na magagamit nila upang ibahagi kung paano magagawa ng isang tao ang tatlong bagay na ginawa ni Jose. Isang posibleng sitwasyon ang pag-iimbita na manood ng isang pelikula, palabas, o konsiyerto na gumagamit ng mga imoral na larawan at salita. Maaaring kabilang sa isa pang posibleng sitwasyon ang pamimilit na magpadala sa mga kaibigan ng mga hindi angkop na text o larawan.
Sa paanong mga paraan natin matutularan ang halimbawa ni Jose kapag nahaharap tayo sa tukso?

Pagpapalakas ng ating kakayahang sundin ang batas ng kalinisang-puri

Sabihin sa mga estudyante na ibahagi ang natutuhan nila sa kanilang kapartner.

Matutulungan tayo ng Tagapagligtas na madaig ang tukso

Maaaring may mga estudyante ka na nahihirapang sundin ang batas ng kalinisang-puri at kailangan nilang makadama ng pag-asa sa pagsisisi at pagdaig sa adiksiyon. Patotohanan ang mapagmahal, matiyaga, at mapagpatawad na katangian ng Ama sa Langit at ni Jesucristo. Maaari mong ipanood ang video na “Temptation Fades as We Seek Christ in Every Thought” (2:57), na matatagpuan sa ChurchofJesusChrist.org. Sabihin sa mga estudyante na alamin kung paano tayo mabibigyan ng pag-asa ng Tagapagligtas.

2:58

Itinuro ni Elder Dale G. Renlund ng Korum ng Labindalawang Apostol kung paano makapagbibigay ng pag-asa ang Tagapagligtas sa mga taong nahihirapang sundin ang mga kautusan ng Diyos.

Gaano man katagal na wala tayo sa landas ng tipan o gaano man tayo nalihis, sa sandaling magpasiya tayong magbago, tutulungan tayo ng Diyos na makabalik. Sa pananaw ng Diyos, sa pamamagitan ng taos-pusong pagsisisi at pagpapatuloy sa paglakad nang may katatagan kay Cristo, kapag nakabalik tayo sa landas, ito ay magiging tila hindi tayo umalis rito. Ang Tagapagligtas ay nagbabayad para sa ating mga kasalanan at pinalalaya tayo sa napipintong paglalaho ng kaligayahan at mga pagpapala. (“Piliin Ninyo sa Araw na Ito,” Liahona, Nob. 2018, 106)

Ano ang gusto ninyong maunawaan ng isang tao na nawalan na ng pag-asa dahil sa mga nakaraan niyang desisyon mula sa pahayag ni Elder Renlund?
Ano ang nakatulong sa inyo para mapaglabanan ang tukso na maaari ninyong imungkahi sa ibang tao?

Paggawa ng plano na sundin ang batas ng kalinisang-puri

Upang matulungan ang mga estudyante na gumawa ng plano na kumilos ayon sa itinuro sa kanila ng Espiritu tungkol sa pagsunod sa batas ng kalinisang-puri, bigyan sila ng ilang minuto upang sagutin ang mga sumusunod na tanong sa kanilang study journal.

Ano ang natutuhan mo na makatutulong sa iyo na sundin ang batas ng kalinisang-puri o mapaglabanan ang iba pang tukso?
Ano ang natutuhan mo tungkol sa pagiging tapat sa Diyos?
Paano mo sisimulang ipamuhay ang natutuhan at nadama mo ngayon?

Hikayatin ang mga estudyante na isali ang Ama sa Langit at si Jesucristo sa kanilang mga pagsisikap na labanan ang tukso. Maaari mong ibahagi ang iyong patotoo tungkol sa kakayahan ng Tagapagligtas na tulungan tayo na mapaglabanan ang tukso at ang Kanyang mapagmahal na awa sa pagtulong sa atin na magsisi.

Isaulo

Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at balikan ang mga ito sa mga lesson sa hinaharap. Ang mahalagang parirala ng banal na kasulatan ay “Paano ngang magagawa ko itong malaking kasamaan at kasalanan laban sa Diyos?” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Paano ko mapaglalabanan ang mga tuksong makakaharap ko?

May kapangyarihan ang Ama sa Langit at si Jesucristo na tulungan ka. Puspusin ang buhay mo ng mga bagay na nag-aanyaya ng kapangyarihang iyon sa buhay mo, tulad ng panalangin, pag-aaral ng mga banal na kasulatan, at paglilingkod sa iba. Bumaling kay Jesucristo at sa Kanyang ebanghelyo at makikita mo na ang mga kahinaan ay maaaring maging mga kalakasan. Humingi ng tulong sa mga magulang, lider, at propesyonal na tagapayo kung kinakailangan. (Para sa Lakas ng mga Kabataan: Isang Gabay sa Paggawa ng mga Pagpili, 27.)

Paano naaangkop ang batas ng kalinisang-puri ng Panginoon sa mga naaakit sa kapwa nila babae o kapwa nila lalaki?

Ang pagkaakit sa kapwa babae o kapwa lalaki ay hindi kasalanan. Kung ganito ang nadarama mo at hindi ka naghahangad o kumikilos ayon sa mga ito, ipinamumuhay mo ang sagradong batas ng kalinisang-puri ng Ama sa Langit. Ikaw ay minamahal na anak ng Diyos at isang disipulo ni Jesucristo. Tandaan na nauunawaan ng Tagapagligtas ang lahat ng nararanasan mo. Sa pamamagitan ng iyong pakikipagtipan sa Kanya, makasusumpong ka ng lakas na sundin ang mga utos ng Diyos at tanggapin ang mga pagpapalang ipinapangako Niya. (Para sa Lakas ng mga Kabataan: Isang Gabay sa Paggawa ng mga Pagpili, 27–28)

Bakit ibinigay sa atin ng Diyos ang batas ng kalinisang-puri?

Ang damdaming seksuwal ay mahalagang bahagi ng plano ng Diyos sa paglikha ng masayang pagsasama ng mag-asawa at mga walang-hanggang pamilya. Hindi masama ang mga damdaming ito—sagrado ang mga ito. Dahil napakasagrado at napakatindi ng mga damdaming seksuwal, ibinigay sa iyo ng Diyos ang Kanyang batas ng kalinisang-puri para ihanda kang gamitin ang mga damdaming ito ayon sa nilalayon Niya.

… Gagawing posible ng pagsunod sa batas na ito na sumulong kayo sa walang hanggan at maging higit na katulad ng inyong Ama sa Langit. Lalago ang iyong tiwala sa sarili habang namumuhay ka bilang disipulo ni Jesucristo. (Para sa Lakas ng mga Kabataan: Isang Gabay sa Paggawa ng mga Pagpili, 23, 26)

Mga Karagdagang Aktibidad sa Pag-aaral

Pagdaig sa mga tukso sa ating panahon

Tulungan ang mga estudyante na makita kung paano makatutulong sa kanila ang Para sa Lakas ng mga Kabataan: Isang Gabay sa Paggawa ng mga Pagpili para madaig ang mga tukso. Maaari kang magpakita ng kopya nito at itanong:

Ano sa palagay ninyo ang ilang dahilan kung bakit binuo ng mga lider ng Simbahan ang gabay na aklat na Para sa Lakas ng mga Kabataan?

Ibahagi na itinuro ni Elder Dieter F. Uchtdorf ng Korum ng Labindalawang Apostol na makatutulong sa mga kabataan ang Para sa Lakas ng mga Kabataan na “mas umangkop sa mga hamon at tukso ng ating panahon” (“Si Jesucristo ang Lakas ng mga Kabataan,” Liahona, Nob. 2022, 10). Pagkatapos ay maaaring saliksikin ng mga estudyante ang bahaging may pamagat na “Paano naman ang …?” sa gabay na aklat na Para sa Lakas ng mga Kabataan, at alamin ang mga paksang tinalakay na maaaring maituring na tukso para sa mga kabataan ngayon. Maaari nilang hanapin ang mga pahina na tumatalakay sa tuksong iyon at ibahagi ang isang alituntunin na maaaring sundin ng mga kabataan para maiwasan ang tukso.

Paggawa ng plano para mapaglabanan ang tukso

Upang matulungan ang mga estudyante na gumawa ng plano na lumapit kay Cristo at mapaglabanan ang tukso, magagamit ng mga estudyante ang resource na Pag-adjust sa Buhay-Missionary. Maaari nilang tingnan ang Bahagi F: Pagkontrol sa Seksuwal at Romantikong Damdamin sa ilalim ng “Resources para Matugunan ang mga Pangangailangang Panlipunan,” at maghanap ng mga ideya na maaari nilang idagdag sa kanilang plano. Maaari mo ring sabihin sa mga estudyante na iugnay ang Genesis 39:9 sa bahaging ito.

Walang-hanggang pananaw

Maaaring malaman ng ilang estudyante na ibinilanggo si Jose matapos niyang takasan ang tukso na labagin ang batas ng kalinisang-puri (tingnan sa Genesis 39:20). Upang matulungan sila na makita kung paano pinagpala si Jose sa pamamagitan ng pagkakaroon ng walang-hanggang pananaw, maaari mong ipanood ang “Ang Ating Kaugnayan sa Diyos” mula sa time code na 8:41 hanggang 9:42.

13:17

Mga opsiyon sa video

“I Choose to Be Pure” (4:19). Anim na kabataan na magkakaiba ng relihiyon ang tuwirang nagsalita kung bakit pinili nila na maging dalisay ang puri. Maaaring panoorin ng mga estudyante ang video at alamin kung ano ang hinahangaan nila tungkol sa kung bakit pinipili ng mga kabataang ito na sundin ang batas ng kalinisang-puri.

4:19

“Why is it important to live the law of chastity?” (5:42). Sinagot nina Elder Dale G. Renlund ng Korum ng Labindalawang Apostol at ng kanyang asawa na si Sister Ruth L. Renlund ang tanong ng isang dalagita tungkol sa batas ng kalinisang-puri.

5:43

“Pagsubok sa Inyong Pananampalataya” mula sa time code na 7:15 hanggang 8:11. Ibinahagi ni Elder Neil L. Andersen ng Korum ng Labindalawang Apostol kung paano sinunod ng kanyang kaibigan ang batas ng kalinisang-puri habang dumaranas ng pagkaakit sa kapwa lalaki.

14:56