Эхлэл 37–41

Энэ ёгт үлгэр нь нүхэнд унасан нэгэн илжигний тухай өгүүлнэ. Айж бас гарах гарцгүй болсон илжиг гасалж, чарлах нь тэр. Илжгийг гарган авах арга зам хайсны эцэст эзэн нь нүх рүү шороо асгаж эхлэв. Хүрзээр шороо асгах болгонд илжигний нуруун дээр буух ба энэ нь түүнийг улам л гаслуулж байлаа.

Илжгийг нуруун дээрх шороогоо сэгсрэх бүрд хөл доорх шороо нь овоорч байв. Илжиг шороог ахин дахин сэгсэрч унагасаар, овоорсон шороон дээр гишгэх үйлдлээ давтсаар, улмаар илжиг нүхнээс гарч чадах хүртлээ өндөрт гарав.

• Энэ ёгт үлгэр Тэнгэрлэг Эцэгийн бидэнд туршлага хуримтлуулах боломжийг олгодог сорилт, бэрхшээлтэй хэрхэн холбоотой байж болох вэ?

Амьдралдаа сорилттой тулгарч байсан эсвэл урам зориг мохож байсан үеэ бод. Дараах асуултуудын заримд өгсөн хариултаа судлах тэмдэглэлдээ бич.

• Та нарт дээр дурсан үйл явдал тохиоход хариуд нь юу хийсэн бэ?

• Зовлон бэрхшээл тулгарахад Их Эзэнийг санах нь яагаад хэцүү байж болох вэ?

• Мөнхийн талаас нь авч үзвэл, Тэнгэрлэг Эцэг та бүгдийн амьдралыг адислахын тулд сорилт бэрхшээлийг тань хэрхэн ашиглаж болох вэ?

Өнөөдөр Иосефын амьдралыг судлах явцдаа Тэнгэрлэг Эцэг, Есүс Христ хоёр хүнд хэцүү сорилтыг ч гэсэн та нарын амьдралд адислал болгон хувиргаж чадна гэсэн итгэлийг өгөх Ариун Сүнсний илчлэлийг эрэлхийл.

Иосефыг 17 настай байхад эцэг Иаковынхаа хамгаас хайртай хүү байсанд нь түүний ах нар атаархжээ. Ирээдүйд тэд түүний өмнө сөгдөж байгаагаар зүүдэлсэн зүүдээ хуваалцсанд нь Иосефыг үзэн ядаж байв. Удалгүй тэд Иосефыг боол болгон худалджээ (Эхлэл 37-г үзнэ үү).

Иосефыг Египетийн Фараоны түшмэл Потифар гэдэг хүнд худалджээ. Иосеф эцэст нь Потифарын гэрийн даамал болов (Эхлэл 39:1–4-ийг үзнэ үү).

Потифарын эхнэр Иосефын араас тачаадан зууралдаж байсан ч Иосеф ариун явдлын хуулийг зөрчихөөс татгалзаж, түүнээс зугтжээ. Потифарын эхнэр Иосефыг өөртэй нь зүй бус харьцсан гэж хилсээр буруутгаж, түүнийг шоронд хорив (Эхлэл 39:7–20-ийг үзнэ үү).

Иосеф шоронд байхдаа Фараоны зарц нарын зүүдийг тайлсан (Эхлэл 40-ийг үзнэ үү).

Хоёр жилийн дараа Фараон тайлж чадахгүй нэгэн зүүд зүүдэлжээ. Шоронгоос суллагдсан Фараоны нэг зарц Иосефыг зүүд тайлж чадна гэж Фараонд хэлэв. Иосеф Фараонд түүний зүүд удахгүй Египетэд долоон жилийн сайн ургац хураалт болж, харин дараа нь өлсгөлөнгийн долоон жил залгана гэсэн утгатайг хэлэв (Эхлэл 41-ийг үзнэ үү).

1. Дараах шүлгүүдийг уншаад, Иосефыг сорилттой тулгарахgд нь Их Эзэн хэрхэн тусалсныг олж мэд.

   1. Эхлэл 39:1–6 (Иосефыг ах нар нь боол болгон худалдсаны дараа)

   2. Эхлэл 39:20–23 (Иосефыг Потифар шоронд хорьсны дараа)

   3. Эхлэл 41:14–16, 25–32 (Иосефыг эцэст нь шоронгоос сулласны дараа)

2. Дараах асуултуудад хариул.

   • Иосеф соригдохдоо хариуд нь юу хийсэн бэ гэдгээс бид ямар ямар үнэнийг сурч болох вэ?

   • Иосеф эрэлхийлж байсан адислалаа хүлээн авахын тулд яагаад олон жил хүлээх ёстой болсон гэж та нар бодож байна вэ?

   • Бурхан Иосефт сорилт бэрхшээлээ даван туулахад нь тусалсан ямар нотолгоог та нар харж байна вэ?

   • Хүнд хэцүү үеийг туулахад Тэнгэрлэг Эцэг, Есүс Христ хоёр хэрхэн бидэнд үүнийг адил тусалж чадах вэ?

Эхлэл 41:37–45-ыг уншаад, Бурхан Иосефыг болон бусдыг адислахын тулд түүнд тохиолдсон сорилтуудыг хэрхэн ашигласан нотолгоог олж мэд.

• Их Эзэн Иосефыг болон бусдыг сорилт бэрхшээлүүдээр нь дамжуулан хэрхэн адисалсан бэ?

  Заасан үнэнүүдээс Бурханы хүч, нигүүлслийн тухай суралцахад нь суралцагчдад тусалж болох асуултуудыг тавь. Дараах асуултууд нь таны ашиглаж болох жишээнүүд юм. Их Эзэний хайр, хүч, нигүүлслийн талаар суралцахад нь суралцагчдад туслах нэмэлт сургалтад зориулж “Багшийн хөгжүүлбэл зохих ур чадвар” дээрх “Их Эзэний хайр, хүч, нигүүлслийг амьдралаасаа олж харахад нь суралцагчдад туслах” гэх хэсгийг үзнэ үү.

• Иосеф өөрийн үзэж туулсан туршлагын дараа Их Эзэний талаар юуг мэдээсэй гэж хүсэх байна гэж та нар бодож байна вэ?

• Тэнгэрлэг Эцэг, Есүс Христ хоёртой харилцах харилцаагаа бэхжүүлэхэд бидний сорилт бэрхшээл хэрхэн туслах вэ?

Сургаал ба Гэрээ 90:24-ийг болон Арван хоёр төлөөлөгчийн чуулгын ахлагч Ф.Угдорфын дараах мэдэгдлийг унш. Эдгээр нь Иосефт болон сорилт, бэрхшээлтэй тулгарч буй хүмүүст хэрхэн хамаатай болохыг олж мэд.

Заримдаа бидэнд амьдралын сорилт бэрхшээлд нухлагдан, сэтгэл санаа нь харанхуйд автагдах үе байдаг ч Бурханы хайр болон Есүс Христийн сэргээгдсэн сайн мэдээний адислалууд төсөөлөхийн аргагүй ямар нэг зүйлийг дэлбээлүүлэх болно гэдгийг би гэрчилж байна. (“Бурхан төсөөлөхийн аргагүй зүйлийг хийх болно,” 2020 оны 10-р сарын Ерөнхий чуулган, 52)

• Сургаал ба Гэрээ 90:24 болон ахлагч Угдорфын мэдэгдэл Иосефт төдийгүй та нарт хэрхэн хамаатай вэ?

Тэнгэрлэг Эцэг биднийг сорилттой тулгарах үед хэрхэн адисалдаг талаар эргэцүүлэн бодоход нь суралцагчдыг бэлтгэхийн тулд ChurchofJesusChrist.org дээрх “Faith Murray’s Story: Overcoming Adversity through Service” (4:52)-ыг үзүүл. Их Эзэн Фэйтийг болон бусдыг адислахын тулд сорилт бэрхшээлийг нь хэрхэн ашигласан тухай олж мэдэхэд суралцагчдыг урь.

4:52

Тэнгэрлэг Эцэг та нарын амьдралыг адислахын тулд учирсан сорилт бэрхшээлийг тань ашиглаж байгааг харсан өөрийн болон бусдын туршлагын талаар бод. Дараах асуултуудын дор хаяж хоёрт нь судлах тэмдэглэлдээ хариулж бич.

• Тэнгэрлэг Эцэг хэрхэн та нарын таньдаг хүмүүсийн амьдралыг адислахын тулд сорилт бэрхшээлийг ашиглаж байгааг та нар харсан бэ? Та нар тэр хүмүүсээс юу сурч мэдсэн бэ?

• Хэрэв хэн нэгэн яг одоо хүнд хэцүү сорилтод орсон байвал та нар тэднийг Тэнгэрлэг Эцэг, Есүс Христ хоёрын талаар юуг мэдээсэй гэж хүсэж байна вэ?

• Амьдралдаа сорилт бэрхшээл тулгарахад Бурханд итгэлтэй хэвээр үлдэхэд та нарт юу тусалж байсан бэ?