Хуучин Гэрээний семинарын багшийн гарын авлага

Контент
Нүүр хуудас
Багшийн гарын авлагын танилцуулга
Хуучин Гэрээний хичээлүүд
- Хуучин Гэрээний ангид тавтай морилно уу
- Мосе 1; Абрахам 3
- Эхлэл 1–2; Мосе 2–3; Абрахам 4–5
- Эхлэл 3–4; Мосе 4–5
- Эхлэл 5; Мосе 6
- Moсе 7
- Эхлэл 6–11; Мосе 8
- Эхлэл 12–17; Абрахам 1–2
- Эхлэл 18–23
- Эхлэл 24–33
- Эхлэл 37–41
- Эхлэл 42–50
- Гэтлэл 1–6
- Христийн амилсны баяр
- Гэтлэл 7–13
- Гэтлэл 14–18
- Гэтлэл 19–20; 24; 31–34
- Гэтлэл 35–40; Леви 1; 4; 16; 19
- Тооллого 11–14; 20–24; 27
- Дэд хууль 6–8; 15; 18; 29–30; 34
- Иошуа 1–8; 23–24
- Шүүгчид 2–4; 6–8; 13–16
- Рут; 1 Самуел 1–7
- 1 Самуел 8–10; 13; 15–16
- 1 Самуел 17–18; 24–26; 2 Самуел 5–7
- 2 Самуел 11–12; 1 Хаад 3; 6–9; 11
- 1 Хаад 12–13; 17–22
- 2 Хаад 2–7
- 2 Хаад 16–25
- 2 Шастир 14–20, 26, 30
- Езра 1, 3–7; Нехемиа 2, 4–6, 8
- Естер
- Иов 1–3; 12–14; 19; 21–24; 38–40; 42
- Дуулал 1–2; 8; 19–33; 40; 46
- Дуулал 49–51; 61–66; 69–72; 77–78; 85–86
- Дуулал 102–103; 110; 116–119; 127–128; 135–139; 146–150
- Сургаалт үгс 1–4; 15–16; 22; 31; Номлогчийн үгс 1–3; 11–12
- Исаиа 1–12
- Исаиа 13–14; 22; 24–30; 35
- Исаиа 40–49
- Исаиа 50–57
- Исаиа 58–66
- Иеремиа 1–3, 7, 16–18, 20
- Иеремиа 31–33; 36–38; Гашуудал 1, 3
- Езекиел 1–3; 33–34; 36–37; 47
- Даниел 1–7
- Хосеа; Иоел
- Амос; Обадиа; Иона
- Мика; Нахум; Хабаккук; Зефаниа
- Хаггаи 1–2; Зехариа 1–4, 7–14
- Малахи
Амьдралд бэлтгэх хичээл
- Төгс эзэмших сургаал: Асуултдаа хариулт олох
- Судар судлах ур чадвар
- Өсвөр үеийнхний бат бөх байдлын төлөө удирдамж
- Бие даах чадвартай болох
- Бие махбод, сэтгэл санааны эрүүл мэнд
- Ирээдүйн боловсрол, ажилд бэлтгэх
- Сургуульд амжилттай сурах
- Номлолд бэлтгэх
- Ариун сүмд бэлтгэх
- Сүмийн удирдагчдын зааврууд
Хавсралт

Мосе 7:22–47: Енохын үзэгдэл

“Мосе 7:22–47: Енохын үзэгдэл,” Хуучин Гэрээний семинарын багшийн гарын авлага (2026)

“Мосе 7:22–47: Енохын үзэгдэл,” Хуучин Гэрээний семинарын багшийн гарын авлага

Moсe 7: 17-р хичээл

Мосе 7:22–47

Енохын үзэгдэл

Illustration depicting the City of Enoch being taken up.

Та амьдралдаа Бурханы нигүүлслийг хэзээ мэдэрсэн бэ? Их Эзэн Еноход өөрийн өдрөөс эхлэн Мянган жил хүртэлх дэлхийн түүхийг харуулсан үзэгдэл үзүүлсэн. Енох Тэнгэрлэг Эцэгийнхээ хүүхдүүдээ хайрлах хайрын талаар гүн гүнзгий мэдэж авсан. Энэ хичээл Бурханы нигүүлсэл, бүх хүүхдээ хайрлах хайрыг мэдрэхэд суралцагчдад тусална.

Суралцагчийн бэлтгэл: Суралцагчдад Тэнгэрлэг Эцэг ямархуу байдгийг таниулсан туршлага эсвэл судрын талаар бодохыг хүс. Тэд мөн эцэг эх, итгэж найддаг удирдагчдаас эсвэл найзуудаасаа туршлага эсвэл судар хуваалцахыг хүсэж болох юм. Суралцагчдыг хуваалцах бэлтгэлтэй ирэхийг уриал.

Боломжит суралцах үйл ажиллагаа

Бурханы нигүүлсэл, хайрыг мэдрэхийн төлөөх тэмцэл

Бурханы тухай Түүний зан чанарын талаар илүү ихийг мэдэхэд суралцагчдыг бэлтгэхийн тулд дараах жишээг унших юм уу үзүүл:

Бурханыг зөвхөн зөв зүйл хийж байгаа хүмүүст анхаардаг эсэхэд Калэб эргэлздэг байв.

Ойр дотнын хэн нэгнийх нь сонголтод Бурхан уурлаж магадгүй гэдэгт Зөү санаа нь зовдог. Тэрээр Бурхан тэднийг гэсгээх вий гэхээс санаа нь зовдог.

Оливиа өөрийгөө хэзээ ч Бурханы хайрыг мэдэрч байгаагүй гэж боддог.

Энэ хүмүүст яагаад ийм мэдрэмж төрж болох вэ?

Энэ хичээлийг цааш үргэлжлүүлэхдээ эдгээр жишээнээс эргэцүүлэн бодох нэг жишээг сонго.

Уг хичээлийн туршид Ариун Сүнсний нөлөөг хүлээн авахад нь суралцагчдад туслахын тулд дараах асуултуудыг тунгаан бодоход тэднийг урамшуул.

Хэрэв танд үүнтэй төстэй асуудал тулгарсан бол үүнд чинь туслах Тэнгэрлэг Эцэгийн талаар та юу мэдэх вэ?
Танд Тэнгэрлэг Эцэгийн талаар ямар ямар асуулт байна вэ?

Их Эзэний таныг болон бүх хүүхдээ гэх хайрыг нь мэдэж, мэдрэхийн тулд Түүнээс тусламж эрэлхийл.

Дээш тэнгэрт аваачигдаагүй хүмүүсийн талаарх Енохын үзэгдэл

Дараах мэдээллийг өөрийн үгээр нэгтгэн дүгнэх талаар бодож үзээрэй.

Их Эзэний тусламж, удирдамжаар Енох Сион хотыг байгуулсан гэдгийг сана. Сионы хүмүүс Их Эзэнд нэгдэж, зөв шударга ёсонд оршин сууж, бие биедээ санаа тавьдаг байв (Мосе 7:16–19-ийг үзнэ үү). Их Эзэн Сионы хүмүүс итгэл, зөвт байдлынхаа ачаар дээш тэнгэрт аваачигдана гэдгийг Еноход үзэгдэлд харуулжээ (Мосе 7:20–21-ийг үзнэ үү). Енох мөн “хүмүүсийн үлдсэнийг тэрчлэн болгоов” (Мосе 7:22) гэдэг нь Аврагчийг дагаагүйгээс дэлхийд орхигдсон хүмүүсийг хэлж байна.

Мосе 7:23–26-г уншиж, Енохын юу харсныг олж мэд.

Та Сатаны талаар юу олж мэдсэн бэ?
Сатаны талаар эдгээр зүйлийг ойлгож авах нь яагаад чухал гэж та бодож байна вэ?

Енох Бурхан ёс бус зүйлд хэрхэн ханддагийг харсан.

Дараа нь Енох Бурханыг дагахгүй байхаар шийдсэн хүмүүсийг Тэрээр харж байгааг ойлгоод, сэтгэл зүрх нь хөндүүрлэжээ.

Та Енохыг Иеховаг буюу Есүс Христийг харсан тухай тайлбарлаж болно. Адамын уналтаас хойш Иехова бошиглогчдод үзэгдэж, тэдэнтэй ярилцдаг болсон. Эдгээр цаг үед Тэрээр ихэвчлэн Эцэгийнхээ адилаар ярьдаг байв. Эцэг, Хүү хоёрын нэгдмэл байдал нь Аврагчийн сэтгэл Эцэгийг мөн илэрхийлж байдагтай адил юм. Тиймээс суралцагчдын Енох, Иехова хоёрын хоорондох энэхүү үзэгдлийг судлах зүйл нь Тэнгэрлэг Эцэгийн талаар таньж мэдэхэд тэдэнд тусална.

Суралцагчдыг дараах шүлгийг унших үед та тэднийг удаан тогтож уншин, уншсан зүйлээ тунгаан бодохын тулд түр зогсож, шүлгийг нэгээс олон удаа уншихад урамшуулж болно. Ийм аргаар унших нь Тэнгэрлэг Эцэгийнх нь талаар илүү ихийг заах Сүнсийг урихад суралцагчдад тусална.

Мосе 7:28–33-ыг уншиж, Тэнгэрлэг Эцэгийн талаар илүү сайн ойлгож, мэдэхэд тус болох үг, хэллэгийг тэмдэглэж ав.

Та эдгээр шүлгээс Бурханы талаар юу мэдэж авсан бэ?

“Бурхан …” гэж самбарт бичиж, сурч мэдсэн зүйлсээрээ уг өгүүлбэрийг дуусгахыг суралцагчдаас хүсэх талаар бодож үзээрэй. Олон төрлийн хариулт өгөхөд урамшуул. Үүнд дараах зарим хариулт багтаж болно. Үүнд:

биднийг гүн гүнзгий хайрладаг (28–33-р шүлэг).
бидэнд буй энэ хорвоо ертөнцийг бүтээсэн (30-р шүлэг).
шударга, нигүүлсэнгүй мөн нинжин сэтгэлтэй (30-р шүлэг).
бидэнд сонгох эрхийг өгсөн (32-р шүлэг).
биднийг бие биеэ хайрлахыг хүсдэг (33-р шүлэг).
биднээс Түүнийг сонгохыг хүсдэг (33-р шүлэг).

Суралцагчдыг олж мэдсэн зүйлээ хуваалцах үед дараах дагалдах асуултуудыг тавих талаар бодож үзээрэй.

Тэнгэрлэг Эцэгийн тухай энэ үнэн таны хувьд яагаад утга учиртай вэ?
Энэ үнэнийг мэдэх нь таны сонгосон нөхцөл байдалд байгаа хүнд хэрхэн туслах вэ? Энэ нь танд хэрхэн тус болж болох вэ?

Арван хоёр төлөөлөгчийн чуулгын ерөнхийлөгч Жэффри Р.Холланд Енохын туршлагыг ашиглан Аврагч бидэнд Тэнгэрлэг Эцэг ямар болох, түүнчлэн Тэр биднийг хэр их хайрладгийг харуулсан гэж заасан. Тэрээр Тэнгэрлэг Эцэгийн талаар дараах ойлголтыг хуваалцжээ.

Тэнгэрээс өөрт нь нээгдсэн хүн төрөлхтний агуу үзэгдлийн дунд Енох мөнх бус амьдралын адислал, сорилтуудын аль алиныг ажиглан зогсохдоо Эцэгтэй харц тулгаран, Түүний уйлж байгааг хараад мэл гайхав. Тэр энэхүү дэлхий ертөнцийн хамгийн хүчирхэг Нэгэнд хандан гайхсан, биширсэн аясаар: “Та хэрхэн уйлж чаддаг билээ?” … гэхэд,

Энэхүү ганц, анхаарал татсан дүр зургаар, ямар ч шашны номлол зохиолын дамжуулж чадахгүй Бурханы жинхэнэ мөн чанарыг заасан юм. …

Бурхан бидний амьдралд оролцдог гэдгийг харуулах ямар мартагдашгүй гайхалтай дүр төрх вэ! Бурханы хүүхдүүд Түүнийг, Түүний илгээсэн “Бурханы сайн мэдээг ч” сонгохгүй байгаа үед эцэг эх нь хэчнээн их шаналдаг гэж санана! [Ром 1:1]. Биднийг маш их хайрладаг хүнийг хайрлах нь ямар амархан гээч! …

Бидний нэрийг мэддэг, залбирлыг сонсож, хариулдаг Бурханы сүнсэн хүүхдийн хувьд мөнхөд биднийг нандигнан хайрладаг хувь хүний, амьд Бурханы энэ өдрийг би гэрчилж байна. (”The Grandeur of God,” Liahona, Nov. 2003, 72)

Ерөнхийлөгч Холландын мэдэгдлээс юу өөрсдөд нь сэтгэгдэл төрүүлснийг хуваалцахад суралцагчдыг урь.

Самбарт дараах асуултуудыг бичих талаар бодож үзээрэй. Асуултуудыг жижиг бүлгээр ярилцахад суралцагчдыг урь. Мөн хичээлийн эхэнд сонгосон жишээнүүдэд эдгээр санаа хэрхэн хэрэгжиж болох тухай ярилцахад тэднийг урь. Суралцагчдыг хариулах үед өрөөн дотуур тойрон алхаж, тэдний зарим хариултыг сонс.

Биднийг бие биеэ хайрлахгүй үед Тэнгэрлэг Эцэг яагаад бидний төлөө уйлдаг гэж та нар бодож байна вэ?
Бид Түүнийг дагаж, хайрлахыг сонгоогүй үед Тэр яагаад бидний төлөө уйлж болох вэ?
Бурханы бидэнд хандах хандлагын талаар Сатан ямар худал хуурмагийг бидэнд итгүүлэхийг хүсдэг вэ?

Суралцагчид эдгээр асуултыг ярилцсаны дараа өөр нэгэн суралцагчаас сонссон зүйл нь ангийнханд хуваалцахад тустай зүйл байсан эсэхийг асуух талаар бодож үзээрэй. Ингэснээр суралцагчид нэг нэгнийхээ хариултуудыг сайшаан магтахын зэрэгцээ хариултуудыг эргэн харах боломжтой болдог. Та мөн сонссон, тус болохуйц хариултуудыг онцолж болно.

Енох Аврагчийн амьдрал, номлолыг харав

Дараа нь Их Эзэн Еноход газар дээр үлдсэн наманчлаагүй хүмүүс үерт мөхөх болно гэдгийг харуулжээ (Мосе 7:34–44-ийг үзнэ үү). Үүний хариуд, Енох уйлав. Их Эзэн Енохыг тайвшруулж, “Зүрх сэтгэлээ өргө, мөн баяртай бай мөн хар” (Мосе 7:44) гэж хэлсэн.

Мосе 7:44–47-г уншаад, Их Эзэн Енохыг тайвшруулахын тулд юу харуулсныг олж мэд. “Зөв шударга” (45 болон 47-р шүлэг) гэдэг нь Есүс Христийн нэр цол гэдгийг мэдэх нь тустай байж болно.

Эдгээр зүйлийг харах нь яагаад Енохын бодгалийг баясгана гэж та нар бодож байна вэ? (47-р шүлэг)
Есүс Христийг илгээх нь Эцэгийн нигүүлсэл, хайрыг хэрхэн харуулж байна вэ?

Хэрэв тустай гэж үзвэл та Аврагч Бурханы бүх хүүхдэд, тэр ч бүү хэл ёс бусыг үйлдэж, үерт нас барсан хүмүүст хэрхэн туслах талаар ярилцаж болно. Хэдийгээр ёс бусыг үйлдсэн хүмүүс үерт мөхөж, сүнсний ертөнцөд нүглийнхээ төлөө зовох ёстой байсан ч Аврагчаар дамжуулан наманчилж чадна гэдгийг ойлгоход нь суралцагчдад тусал (Мосе 7:38–39; 1 Петр 3:18–20-ийг үзнэ үү).

Бурханы хайрыг мэдрэх

Хичээлийн төгсгөлд суралцагчдыг дараах үйл ажиллагааг гүйцэтгэхдээ Ариун Сүнсээр дамжуулан тусламж эрэлхийлэхэд урь. Өөрөөр, суралцагчид Тэнгэрлэг Эцэгийн нигүүлсэл, хайрыг мэдрэх хэрэгтэй өөрийн амьдралд байгаа хэн нэгэнд зориулан захидал бичиж болно.

Хичээлийн эхэнд сонгосон жишээн дээр гарсан хүнд туслахын тулд захидал бич. Захидлынхаа нэг хэсэгт дараах зүйлсийг багтаа.

Мосе 7-оос Тэнгэрлэг Эцэгийн нигүүлсэл, хайрын талаар сурсан зүйлс. Ялангуяа танд утга учиртай байсан гэж бодож буй тодорхой үг хэллэг эсвэл шүлгийг багтаа.
Бурханы нигүүлсэл, хайрыг мэдрэхэд тань тусалсан бусад судар, туршлага.
Энэ хүнд Бурханы хайрыг мэдрэхэд тусална гэж таны бодож буй зарим нэмэлт санаа.

Бодол санаа, туршлага, мэдрэмжээ хуваалцахад суралцагчдыг урьснаар хичээлээ өндөрлө. Бурханы хайрын талаарх хувийн гэрчлэлээ нэмэхийг бод.

Нэмэлт эх сурвалж

Енох хэнийг харсан бэ?

Енох Иеховаг буюу Эцэгийнхээ өмнөөс үйлдэж буй Есүс Христийг харсан. Уналтын үр дагаврын нэг нь хүн төрөлхтөн Эцэгийн оршихуйгаас зайлуулагдсан явдал байв (Мосе 4:29, 31; 5:1, 4-ийг үзнэ үү). Хүүгээ танилцуулахаас бусдаар Эцэг хүн төрөлхтөнд Хүүгээр дамжуулан харагдах болно (Joseph Fielding Smith, Doctrines of Salvation, 1:27-г үзнэ үү). Зөвхөн Хүүгийн буюу Есүс Христийн ажлаар л хүн төрөлхтөн Эцэгийн дэргэд буцааж авчрагдана (Алма 11:44; Хиламан 14:15–17; Иосеф Смитийн Орчуулгын Иохан 1:19-ийг үзнэ үү).

Арван хоёр төлөөлөгчийн чуулгын ахлагч Жэффри Р.Холланд ийн тайлбарласан.

Эцэг (Елохим)-ийн удирдлага, эрх мэдлээр Хүү (Иехова/Есүс) Эцэгийнхээ үүргийг гүйцэтгэж чадна…. Эцэгээс өөрт нь өгсөн “эрх мэдлийн бурханлаг томилолтын” ачаар Христ ямар ч үед хаана ч Эцэгийнхээ өмнөөс ярьж бас үйлдэж чадна. (Christ and the New Covenant: The Messianic Message of the Book of Mormon [1997], 183–184)

Мосе 7:28. Бурхан яагаад уйлдаг вэ?

Арван хоёр төлөөлөгчийн чуулгын ерөнхийлөгч М.Рассэлл Баллард (1928–2023) ийн заажээ.

Бид бол Бурханы хүүхдүүд. Бидний хүн нэг бүр Их Эзэн Бүхнийг Чадагч Бурханы хувьд үнэ цэнтэй бөгөөд хэрэв биднийг итгэлтэй байвал баяр баясгалангийн бүрэн дүүрэн байдлыг авчрах, эсвээс биднийг итгэлтэй бус байхад ч нулимсыг нь дуслуулах хэмжээний үнэ цэнтэй билээ. (“The Atonement and the Value of One Soul,” Liahona, May 2004, 87)

Бурхан бидэнд хэр их хайртай вэ?

Тэргүүн зөвлөлийн ерөнхийлөгч асан Дийтр Ф.Угдорф ийн заасан.

Өөрийнхөө төсөөлж чадах хамгийн цэвэр, бүх талыг хамарсан хайрын тухай бодоод үз. Одоо энэхүү хайр дээр өөрсдийгөө хайрладаг Бурханы хязгааргүй хайрыг нэмээд үз—энэ бол таныг гэсэн Бурханы хайрын хэмжүүр юм [Исаиа 54:10; Иеремиа 31:3-ыг үзнэ үү].

… Бидний алдаа дутагдлаас үл хамааран Бурхан биднийг бүрэн дүүрэн хайрладаг. Бид төгс биш ч Тэрээр биднийг төгс хайрладаг. Бид өөрсдийгөө зүг чиг заагчгүй, хаягдсан хүмүүс гэж бодож болох ч Бурханы хайр биднийг бүрэн дүүрэн тэвэрсэн байдаг.

Тэрээр хэмжээлшгүй цэвэр, ариун нандин, дүрслэхийн аргагүй хайраар бялхан байдаг учраас биднийг хайрладаг. Бид түүх намтрынхаа улмаас Бурханд чухал байгаа юм биш. Харин бид Түүний хүүхдүүд учраас Түүнд чухал байгаа юм. Тэрээр хүүхдүүдээ тэр ч байтугай, алдаа дутагдал гаргасан, хавчигдаж гадуурхагдсан, адармаатай, уй гашууд автсан, шаналж зовсон хүмүүсийг ч мөн хайрладаг. Бурханы хайр агуу учраас Тэрээр бардам зантнууд, амин хувиа бодогчид, биеэ тоогчид, ёс бусыг үйлдэгчдийг хүртэл хайрладаг.

Энэ нь бидний одоогийн байдлаас үл хамааран бидэнд найдвар бий гэсэн үг юм. Бидний гай зовлон, уй гашуу, алдаа дутагдлаас үл хамааран хязгааргүй өрөвч сэтгэлтэй Тэнгэрлэг Эцэг маань бидэнд улам ойр байхыг хичээдэг шиг, биднийг ч мөн өөртөө ойр байгаасай хэмээн хүсэн хүлээдэг билээ [Сургаал ба Гэрээ 88:63-ыг үзнэ үү]. (“Бурханы хайр,” 2009 оны 10-р сарын Ерөнхий чуулган, 24)

Moсe 7:30. “Та тэнд байсаар буй бөлгөө” гэсэн хэллэг ямар утгатай вэ?

Арван хоёр төлөөлөгчийн чуулгын ахлагч Нийл А.Максвэлл (1926–2004) ийн тайлбарласан.

Их Эзэнээс олон илчлэлт хүлээн авсан Енох өргөн уудам бүтээлүүдийнх нь дунд “Та тэнд байсаар буй бөлгөө” (Мосе 7:30; мөн Иеремиа 10:12-ыг үзнэ үү) хэмээн баттайгаар дуу алдан Бурханыг магтан дуулжээ.

Энэхүү онцгой баталгаа нь бидэнд амьдралын туршид бүхий л нөхцөл байдлыг даван гарахад тусална. Бүхний Бурхан үнэндээ туршлагаас бүрдсэн бидний өчүүхэн жижиг, хувь хүний ертөнцөд оролцдог! Өргөн уудам хязгааргүй ноёрхлынхоо дунд ч Тэр биднийг нэг бүрчлэн тоолж, мэдэж, төгс хайрладаг (Мосе 1:35; Иохан 10:14-ийг үзнэ үү). (“Yet Thou Art There,” Ensign, Nov. 1987, 30)

Нэмэлт суралцах үйл ажиллагаа

Сатан, Бурхан хоёрыг харьцуулсан хүснэгт

Сатан, Бурхан хоёрын ялгааг олж харах нь суралцагчдад тустай байвал дараахтай адил хүснэгт зурах талаар бодож үзээрэй. Суралцагчид хичээлээ үзэж байхдаа Сатан, Бурхан хоёрын талаар олж мэдсэн зүйлээ нөхөн бичиж болно.

Сатан	Бурхан

Та бөглөсөн багануудыг хооронд нь харьцуулж, Сатан, Тэнгэрлэг Эцэг хоёрын тухай эдгээр зүйлийг ойлгох нь амьдралд нь ямар өөрчлөлт авчирдаг талаар хуваалцахад суралцагчдыг урьж болно.

Аврагчийн цол хэргэм

Мосе 7:39, 45, 47 дээрх Аврагчийн цол хэргэмүүдийг олж, энэ нь юу болох талаар судалж, тунгаан бодоход суралцагчдыг урь. Аврагчийн талаар олж мэдсэн зүйл болон энэ нь тэдний хувьд яагаад утга учиртай болохыг суралцагчдаас асуу.

Енохын өсөлт хөгжил

Яагаад Тэнгэрлэг Эцэг, Есүс Христ хоёртой илүү адил болохыг хүсэж байгаагаа хуваалцахад суралцагчдыг урь. Енох Тэнгэрлэг Эцэгийн төлөө ярьж, Түүнийг төлөөлж байсан Есүс Христ буюу Иеховатай уулзаж ярилцах үедээ тэдэнтэй илүү адил болсон гэдгийг тайлбарла. Moce 7:28–52-ыг уншиж, Енох ямар байдлаар Тэнгэрлэг Эцэг, Есүс Христ хоёртой адил мэдэрч, үйлдэж эхэлсэн гэдгийг олж мэд. Зарим ойлголтод Бурхантай адилаар Енох нүгэл үйлдсэн хүмүүсийн төлөө уйлсан тухай (Мосе 7:41, 44-ийг үзнэ үү) мөн Есүс Христийн Цагаатгалд баяссан тухай ойлголт багтаж болно (Мосе 7:45–47-г үзнэ үү). Тэрээр мөн хүмүүст нигүүлсэл үзүүлэхийг гуйж, Ноагийнхтай адил дахин үер илгээхгүй байхыг Бурханаас гуйв. Бурхан дуртайяа зөвшөөрчээ (Мосе 7:50–51-ийг үзнэ үү).