Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Mosesy 7:22–47: Ny fahitan’i Enoka

“Mosesy 7:22–47: Ny fahitan’i Enoka,” Testamenta Taloha: Boky torolalana ho an’ny mpampianatra seminera (2026)

“Mosesy 7:22–47: Ny fahitan’i Enoka,” Testamenta Taloha: Boky torolalana ho an’ny mpampianatra seminera

Mosesy 7: Lesona 17

Mosesy 7:22–47

Ny fahitan’i Enoka

Illustration depicting the City of Enoch being taken up.

Oviana ianao no nahatsapa ny famindram-pon’ Andriamanitra teo amin’ny fiainanao? Nasehon’ny Tompo tamin’i Enoka ny fahitana ny tantaran’ny tany nanomboka tamin’ny androny ka hatramin’ny Arivotaona. Nianatra tamin’ny fomba lalina mikasika ny fitiavan’ny Ray any An-danitra manokana ny zanany i Enoka. Afaka manampy ireo mpianatra hahatsapa ny famindram-pon’ Andriamanitra sy ny fitiavany ny zanany rehetra ity lesona ity.

Fiomanan’ny mpianatra: Asao ny mpianatra hieritreritra zavatra niainana sy soratra masina izay manampy azy ireo hahafantatra hoe manao ahoana ny Ray any An-danitra. Azon’izy ireo atao ihany koa ny mangataka ny ray aman-dreny na mpitarika na namana mahatoky mba hizara zavatra niainana na soratra masina amin’izy ireo. Asao ireo mpianatra ho tonga vonona hizara momba izany.

Sahanasa fianarana azo atao

Mitolona mba hahatsapa ny famindram-po sy fitiavan’ Andriamanitra

Vakio na asehoy ireto rafi-tantara manaraka ireto mba hanomanana ireo mpianatra hianatra kokoa momba an’ Andriamanitra sy ny toetrany:

Nanontany tena i Kaleba raha toa ka tsy miraharaha afa-tsy ny olona manao ny tsara Andriamanitra.

Manahy i Zo fa mety ho tezitra amin’ny safidy ataon’ireo olona akaiky azy Andriamanitra. Manahy izy fa mety te hanasazy azy ireo Izy.

Mihevitra i Olivia fa tsy mbola nahatsapa ny fitiavan’ Andriamanitra mihitsy izy.

Inona no mety mahatonga ireo olona ireo hahatsapa toy izany?

Misafidiana iray amin’ireo rafi-tantara ireo mba hosaintsainina rehefa manohy ity lesona ity ianao.

Mba hanampiana ireo mpianatra ho mora mandray ny fitaoman’ny Fanahy Masina mandritra ity lesona ity dia amporisiho izy ireo hisaintsaina ireto fanontaniana manaraka ireto:

Inona no fantatrao momba ny Ray any An-danitra izay afaka manampy anao raha toa ka manana olana mitovitovy amin’izany ianao?
Inona no fanontaniana anananao momba ny Ray any An-danitra?

Mitadiava fanampiana avy amin’ny Tompo mba hahafantarana sy hahatsapana ny fitiavany anao sy ny zanany rehetra.

Ny fahitan’i Enoka momba ireo izay tsy nakarina tany an-danitra

Hevero ny hamintina ireto manaraka ireto amin’ny teninao manokana:

Tsarovy fa tamin’ny alalan’ny fanampiana sy ny fitarihan’ny Tompo no nanorenan’i Enoka ny tanànan’i Ziona. Niray hina tao amin’ny Tompo ny vahoakan’i Ziona, niaina tamim-pahamarinana ary nifampikarakara (jereo ny Mosesy 7:16–19). Naneho tamin’i Enoka ny Tompo tao anatin’ny fahitana iray, fa hampiakatra ny vahoakan’i Ziona ho any an-danitra Izy noho ny finoany sy ny fahamarinany (jereo ny Mosesy 7:20–21). “Nahatazana koa ny vahoaka sisa” i Enoka (Mosesy 7:22), ilazana ireo olona izay tavela teto an-tany noho izy ireo tsy te hanaraka ny Mpamonjy.

Vakio ny Mosesy 7:23–26 ka tadiavo ny zavatra hitan’i Enoka.

Inona no ianaranao momba an’i Satana?
Nahoana araka ny eritreritrao no zava-dehibe ny mahatakatra ireo zavatra momba an’i Satana ireo?

Hitan’i Enoka ny fihetsik’ Andriamanitra manoloana ny faharatsiana

Avy eo i Enoka niaina fangorakorahana rehefa nahita an’ Andriamanitra nandinika ireo olona izay nisafidy ny tsy hankatò Azy.

Azonao atao ny manazava fa nahita an’i Jehovah, na Jesoa Kristy i Enoka. I Jehovah no miseho sy miresaka amin’ireo mpaminany, nanomboka tamin’ny Fahalavoan’i Adama. Matetika Izy no miteny toy ireny hoe ny Ray ireny mihitsy no miteny. Toy izany no maha iray ny Ray sy ny Zanaka ka maneho ny Ray ihany koa ny fihetseham-pon’ny Mpamonjy. Noho izany, afaka manampy ireo mpianatra hianatra momba ny Ray any An-danitra koa ny zavatra hohalalinin’izy ireo momba io fahitana nisy teo amin’i Enoka sy Jehovah io.

Rehefa mamaky ireto andinin-tsoratra masina manaraka ireto ireo mpianatra dia azonao atao ny mamporisika azy ireo hamaky miadana, hiato kely hisaintsaina ny zavatra vakiany, ary angamba hamaky ireo andininy ireo mihoatra ny indray mandeha. Afaka manampy ireo mpianatra hanasa ny Fanahy hampianatra azy ireo misimisy kokoa momba ny Rainy any An-danitra ny famakiana toy izany.

Vakio ny Mosesy 7:28–33 ary mariho ireo teny na andian-teny izay manampy anao hahafantatra ary hahatakatra tsara kokoa ny Ray any An-danitra.

Inona no ianaranao momba an’ Andriamanitra avy amin’ireo andinin-tsoratra masina ireo?

Hevero ny hanoratra hoe: “Andriamanitra dia …” eny amin’ny solaitra be, ary angataho ireo mpianatra hamita io fanambarana io avy amin’ny zavatra nianaran’izy ireo. Amporisiho ny fanomezana valiny isan-karazany. Mety hahitana toy izao ireo valiny sasantsasany:

tia antsika loatra (andininy 28–33).
namorona izao rehetra izao kanefa Izy dia eo ho antsika (andininy 30).
feno famindram-po sy tsara fanahy (andininy 30).
nanome antsika fahafahana misafidy (andininy 32).
maniry ny hifankatiavantsika (andininy 33).
maniry ny hisafidianantsika Azy (andininy 33).

Hevero ny hametraka fanontaniana fanombanana fahatakarana rehefa mizara ny zavatra hitany ireo mpianatra, toy ny hoe:

Nahoana no manan-danja aminao izany fahamarinana momba ny Ray any An-danitra izany?
Ahoana no ahafahan’ny fahalalana izany fahamarinana izany manampy ilay olona ao anatin’ilay toe-javatra nofidinao? Ahoana no hanampian’izany anao?

Nampianatra tamin’ny alalan’ny fampiasana ny zavatra niainan’i Enoka ny Filoha Jeffrey R. Holland ao amin’ny Kôlejin’ny Apôstôly Roambinifolo, fa mampiseho amintsika ny toetran’ny Ray any An-danitra sy ny halehiben’ny fitiavany antsika ny Mpamonjy. Nizara izao fahakatarana manaraka izao momba ny Ray any An-danitra izy:

Teo anivon’ny fahitana lehibe iray momba ny zanakolombelona izay nosokafan’ny lanitra mba hohitany, raha nandinika ireo fitahiana sy ny zava-tsarotra amin’ny fiainana eto an-tany i Enoka, dia nitodika tany amin’ny Ray izy ka talanjona nahita Azy nitomany. Hoy izy, sady gaga no talanjona, tamin’ity Olona mahery indrindra eto amin’ity tontolo rehetra ity: “Manao ahoana loatra re no dia afaka mitomany Ianao?” …

Mampianatra misimisy kokoa ny tena toetran’ Andriamanitra mihoatra noho izay mety omen’ny fampitaovana teôlôjika rehetra misy izany tranga tokana sy mahaliana izany. …

Tena sary tsy azo fafaina momba ny fidiran’ Andriamanitra an-tsehatra eo amin’ny fiainantsika izany! Halahelo tokoa ny an’ny ray na ny reny rehefa tsy mifidy Azy na ny “filazantsaran’ Andriamanitra” nalefany ny zanany! [Romana 1:1]. Tena mora ny mitia olona iray izay tena tia antsika manokana! …

Mijoro ho vavolombelona aho anio momba ny Andriamanitra velona iray izay mahafantatra ny anarantsika, mihaino sy mamaly ny vavaka ataontsika ary mankamamy antsika mandrakizay amin’ny maha fanahy zanany antsika. (”The Grandeur of God,” Liahona, Nov. 2003, 72)

Asao ireo mpianatra hizara izay zavatra niavaka tamin’izy ireo avy amin’ny fanambaran’ny Filoha Holland.

Hevero ny hanoratra ireto fanontaniana manaraka ireto eny amin’ny solaitrabe. Asao ireo mpianatra hifanakalo hevitra momba ireo fanontaniana ireo anatina vondrona kely. Asao ihany koa izy ireo hifanakalo hevitra momba ny fomba mety hampiharana ireo hevitra ireo amin’ireo rafi-tantara izay nofidiny tany am-piandohan’ny lesona. Mandehana mivezivezy eran’ny efitrano, rehefa mamaly ireo mpianatra, ary henoy ny sasantsasany amin’ireo valiny omen’izy ireo.

Nahoana araka ny eritreritrao no mitomany noho ny amintsika ny Ray any An-danitra rehefa tsy mifankatia isika?
Nahoana Izy no mety hitomany noho ny amintsika rehefa tsy misafidy ny hanaraka sy ho tia Azy isika?
Inona avy ireo lainga tian’i Satana hinoantsika momba ny fihetseham-pon’ Andriamanitra amintsika?

Rehefa avy nifanakalo hevitra momba ireo fanontaniana ireo ny mpianatra dia anontanio ny zavatra henon’izy ireo avy amin’ny mpianatra iray hafa, izay mety hanampy ny fizarana izany amin’ny kilasy manontolo. Ahafahan’ireo mpianatra mamerina mijery ny valin-teniny sady mifanome sitraka noho ny valin-tenin’izy ireo izany. Azonao atao koa ny manasongadina ireo valiny mahasoa renao.

Hitan’i Enoka ny fiainana sy ny asa nanirahana ny Mpamonjy

Nasehon’ny Tompo tamin’i Enoka avy eo fa ho faty amin’ny safo-drano ireo olona tavela eto an-tany izay tsy mibebaka (jereo ny Mosesy 7:34–44). Nitomany i Enoka, setrin’izany. Nampionona an’i Enoka ny Tompo avy eo, nanao hoe: “Asandrato ny fonao dia mifalia ka jereo” (Mosesy 7:44).

Vakio ny Mosesy 7:44–47, hitadiavana ny zavatra nasehon’ny Tompo an’i Enoka mba hankaherezana azy. Mety hanampy ny mahafantatra fa “ny Marina” (andininy 45 sy 47) dia anaram-boninahitr’i Jesoa Kristy.

Nahoana araka ny eritreritrao ny fahitana ireo zavatra ireo no hahatonga ny fanahin’i Enoka hiravoravo? (andininy 47).
Amin’ny fomba ahoana ny fandefasana an’i Jesoa Kristy no maneho ny famindram-po sy ny fitiavan’ny Ray?

Azonareo atao, raha manampy, ny mifanakalo hevitra momba ny fomba hanampian’ny Mpamonjy ny zanak’ Andriamanitra rehetra, eny fa na dia ireo olona ratsy fanahy sy maty tamin’ny safo-drano aza. Ampio ireo mpianatra hahatakatra fa na dia maty tamin’ny safo-drano aza ny olon-dratsy ary tsy maintsy nijaly noho ny fahotany any amin’ny tontolon’ny fanahy, dia mbola afaka mibebaka amin’ny alalan’ny Mpamonjy ihany izy ireo (jereo ny Mosesy 7:38–39; 1 Petera 3:18–20).

Mahatsapa ny fitiavan’ Andriamanitra

Asao ireo mpianatra hitady fanampiana amin’ny alalan’ny Fanahy Masina rehefa manao ity sahanasa manaraka ity izy ireo, ho famaranana ny fotoam-pianarana. Afaka manoratra amin’ny olona fantany izay mila mahatsapa ny famindram-po sy ny fitiavan’ny Ray any An-danitra ihany koa ireo mpianatra.

Manorata taratasy iray mba hanampiana ilay olona ao amin’ilay rafi-tantara izay nofidinao tany am-piandohan’ny lesona. Ampidiro ho isan’ny ao anatin’ny taratasinao ireto manaraka ireto:

Ny zavatra nianaranao avy ao amin’ny Mosesy 7 momba ny famindram-po sy ny fitiavan’ny Ray any An-danitra. Ampidiro ao ireo andian-teny manokana na andinin-tsoratra masina izay heverinao ho tena manan-danja.
Ireo soratra masina hafa na traikefa izay nanampy anao hahatsapa ny famindram-po sy ny fitiavan’ Andriamanitra.
Ireo hevitra fanampiny izay heverinao fa mety hanampy io olona io hahatsapa ny fitiavan’ Andriamanitra.

Farano amin’ny fanasana ireo mpianatra hizara ny eritreritra, ny traikefa, ary ny fijoroana ho vavolombelona ananan’izy ireo ny lesona. Hevero ny hanampy ny fijoroanao ho vavolombelona manokana momba ny fitiavan’ny Ray.

Loharanom-pitaovana fanampiny

Iza no hitan’i Enoka?

Nahita an’i Jehovah na Jesoa Kristy nisolo tena ny Ray i Enoka. Iray amin’ireo vokatry ny Fahalavoana ny fandroahana ny olombelona tsy ho eo anatrehan’ny Ray (jereo ny Mosesy 4:29, 31; 5:1, 4). Ankoatra ny fampahafantarana ny Zanany, dia amin’ny alalan’ny Zanaka no hisehoan’ny Ray amin’ny olona (jereo ny Joseph Fielding Smith, Doctrines of Salvation, 1:27). Amin’ny alalan’ny asan’i Jesoa Kristy Zanaka ihany no ahafahan’ny olombelona miverina indray eo anatrehan’ny Ray (Jereo ny Almà 11:44; Helamàna 14:15–17; Dikantenin’i Joseph Smith, Jaona 1:19).

Nanazava ny Loholona Jeffrey R. Holland ao amin’ny Kôlejin’ny Apôstôly Roambinifolo hoe:

Eo ambanin’ny fitarihana sy fahefan’ny Ray (Elohima), ny Zanaka (Jehovah/Jesoa) dia afaka misolo tena ny Ray.… Afaka miteny sy manao asa ho an’ny Ray amin’ny fotoana rehetra sy amin’ny toerana rehetra i Kristy amin’ny alalan’ny “fanomezam-pahefana avy amin’ Andriamanitra” nomen’ny Ray Azy. (Christ and the New Covenant: The Messianic Message of the Book of Mormon [1997], 183–184)

Mosesy 7:28. Nahoana Andriamanitra no mitomany?

Nampianatra ny Filoha M. Russell Ballard (1928–2023) tao amin’ny Kôlejin’ny Apôstôly Roambinifolo hoe:

Zanak’ Andriamanitra isika. Sarobidy aok’izany ny tsirairay amintsika ka mitondra fifaliana feno ho an’ny Tompo Andriamanitra Tsitoha raha mahatoky isika, na ranomaso rehefa tsy izany. (“The Atonement and the Value of One Soul,” Liahona, May 2004, 87)

Hatraiza ny fitiavan’ Andriamanitra antsika?

Nampianatra ny Filoha Dieter F. Uchtdorf, fony izy tao amin’ny Fiadidiana Voalohany hoe:

Eritrereto ny fitiavana madio indrindra, tena mandany ny rehetra azonao eritreretina. Ampitomboy amin’ny habeny tsy manam-petra izany fitiavana izany—izany no refin’ny fitiavan’ Andriamanitra anao [jereo ny Isaia 54:10; Jeremia 31:3].

… Na dia tsy tanteraka aza isika dia tia antsika tanteraka Andriamanitra. Na dia tsy lavorary aza isika dia tiany amin’ny fomba lavorary. Na dia mahatsiaro ho very sy tsy misy mpitarika aza isika dia manemitra antsika tanteraka ny fitiavan’ Andriamanitra.

Tia antsika Izy satria feno fitiavana tsy manam-petra izay masina sy madio ary tsy hay faritana. Manan-danja eo anatrehan’ Andriamanitra isika, tsy noho ireo fahaizantsika fa amin’ny maha-zanany antsika. Tiany ny tsirairay amintsika, eny fa na dia ireo izay manana fahalemena, na nolavina, na hafahafa, na malahelo, na torotoro. Lehibe tokoa ny fitiavan’ Andriamanitra ka tiany na dia ny mpiavonavona, ny tia tena, ny mpianjona, ary ny ratsy fanahy aza.

Izany dia midika fa, na inona na inona toe-javatra misy antsika ankehitriny, dia misy fanantenana ho antsika. Na inona na inona fahoriantsika, na alahelontsika, na fahadisoana ataontsika, dia irin’ny Raintsika any An-danitra feno fangorahana tsy manam-petra isika hanatona Azy mba hahafahany manatona antsika [jereo ny Fotopampianarana sy Fanekempihavanana 88:63]. (“The Love of God,” Liahona, Nov. 2009, 22–23)

Mosesy 7:30. Inona no dikan’ilay andian-teny hoe “kanefa dia eo Ianao”?

Nanazava ny Loholona Neal A. Maxwell (1926–2004) tao amin’ny Kôlejin’ny Apôstôly Roambinifolo hoe:

Nidera an’ Andriamanitra teo anivon’ireo zavaboariny midadasika i Enoka, izay nanambaran’ny Tompo zavatra maro tokoa, ary nihiaka tamim-pahatokiana hoe: “kanefa dia eo Ianao” (Mosesy 7:30; jereo koa ny Jeremia 10:12).

Afaka manohana antsika amin’ireo vanim-potoana sy toe-javatry ny fiainantsika rehetra izany toky manokana izany. Tena miraharaha ny amin’ireo tontolo kely tsirairay iainantsika Ilay Andriamanitr’izao rehetra izao! Manisa antsika Izy, mahafantatra antsika ary tia antsika tanteraka eo anivon’ny fanjakany tsy hita noanoa (jereo ny Mosesy 1:35; Jaona 10:14). (“Yet Thou Art There,” Ensign, Nov. 1987, 30)

Sahanasa fianarana fanampiny

Tabilao iray mampitaha an’i Satana sy Andriamanitra

Manaova tabilao toy izao manaraka izao, raha toa ilain’ny ireo mpianatra ny fahitana ny fifanoherana misy eo amin’i Satana sy Andriamanitra. Afaka mameno ny zavatra nianarany momba an’i Satana sy Andriamanitra ireo mpianatra, eo am-mpandalin’izy ireo ny lesona.

Satana	Andriamanitra

Azonao atao ny manasa ireo mpianatra hampitaha ireo tsanganana feno ary hizara ny fiovana entin’ny fahatakarana ireo zavatra mikasika an’i Satana sy ny Ray any An-danitra ireo eo amin’ny fiainan’izy ireo.

Ireo anaram-boninahitra iantsoana ny Mpamonjy

Asao ireo mpianatra hitady ny anaram-boninahitry ny Mpamonjy ao amin’ny Mosesy 7:39, 45, 47 ary handalina na hisaintsaina ny dikan’izy ireo. Anontanio an’ireo mpianatra ny zavatra nianarany momba ny Mpamonjy sy ny antony maha-zava-dehibe izany amin’izy ireo.

Ny fivoaran’i Enoka

Asao ireo mpianatra hizara ny antony itiavan’izy ireo ny ho tonga tahaka ny Ray any An-danitra sy i Jesoa Kristy kokoa. Hazavao fa rehefa nahita sy niresaka tamin’i Jesoa Kristy, na Jehovah, izay niteny sy nisolo tena ny Ray any An-danitra i Enoka, dia nanjary nitovy kokoa tamin’ Izy Ireo i Enoka. Vakio ny Mosesy 7:28–52 ka tadiavo ny fomba nanombohan’i Enoka nahatsapa sy nanao zavatra tahaka ny Ray any An-danitra sy i Jesoa Kristy. Ireo hevi-baovao sasantsasany dia ahitana fa, tahaka an’ Andriamanitra, i Enoka dia nitomany ny amin’ny olona nanota (jereo ny Mosesy 7:41, 44) ary nifaly tamin’ny Sorompanavotana nataon’i Jesoa Kristy (jereo ny Mosesy 7:45–47). Nitalaho famindram-po ho an’ny olona koa izy ary nangataka tamin’ Andriamanitra mba tsy handefa safo-drano hafa aorian’i Noa. Nanaiky an-tsitrapo Andriamanitra (jereo ny Mosesy 7:50–51).