Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Mōsese 6:47–68: “Ko e Palani ʻEni ʻo e Fakamoʻuí”

“Mōsese 6:47–68: ʻKo e Palani ʻEni ʻo e Fakamoʻuí,’” Fuakava Motuʻá – Tohi Lēsoni maʻá e Faiako Seminelí (2026)

“Mōsese 6:47–68: ‘Ko e Palani ʻEni ʻo e Fakamoʻuí,’” Fuakava Motuʻá – Tohi Lēsoni maʻá e Faiako Seminelí

Sēnesi 5; Mōsese 6: Lēsoni 14

Mōsese 6:47–68

“Ko e Palani ʻEni ʻo e Fakamoʻuí”

Ko Sīsū Kalaisi ʻa e uho ʻo e palani ʻo e fakamoʻui ʻa ʻetau Tamai Hēvaní. ʻOkú Ne fakaafeʻi ʻa e taha kotoa ke haʻu kiate Ia ʻaki hono moʻui ʻaki ʻEne tokāteliné. ʻE lava ke tokoni ʻa e lēsoni ko ʻení ke mahino ki he kau akó ʻa e founga ke haʻu ai kia Sīsū Kalaisi pea maʻu ʻa e ngaahi tāpuaki ko Ia pē mo ʻEne Tamaí te Na lava ʻo foakí.

Teuteu ʻa e tokotaha akó: Fakaafeʻi ʻa e kau akó ke fehuʻi ki ha mēmipa ʻo e fāmilí pe kaungāmeʻa ʻa e ʻuhinga ʻoku mahuʻinga ai ʻa Sīsū Kalaisi kiate kinautolú pea mo hono ʻuhinga kiate kinautolu ke haʻu kiate Iá.

Ngaahi ʻEkitivitī Ako ʻOku Ala Fakahokó

Haʻu kia Kalaisi

Fakakaukau ke fakaʻaliʻali ha fakatātā ʻo Sīsū Kalaisi, hangē ko ia ʻi he kamataʻanga ʻo e lēsoní. Hili iá pea vahevahe leva ʻa e tūkunga ko ʻení.

Fakakaukauloto ʻoku ʻi ai haʻo kaungāmeʻa ʻoku ʻikai ke ne ʻilo ʻa Sīsū Kalaisi. ʻOku ʻeke atu ʻe hoʻo kaungāmeʻá pe ko hai ʻa Sīsū Kalaisi pea mo e ʻuhinga ʻoku mahuʻinga ai kiate koé.

ʻOange ha taimi ki he kau akó ke fakakaukau ki he founga ʻe lava ke nau fakahoko ai ha talí. Hili iá pea fakaafeʻi kinautolu ke vahevahe ʻenau ngaahi fakakaukaú ʻi ha fanga kiʻi kulupu iiki pe mo e kalasí.

Kapau naʻá ke maʻu ha kiʻi taimi nounou pē ke fakahoko ai ha tali, ko e hā te ke fiemaʻu hoʻo kaungāmeʻá ke ne ʻilo fekauʻaki mo Sīsū Kalaisí? Ko e hā hono ʻuhingá?

Fakamanatu ki he kau akó ʻa e uiuiʻi ʻo ʻĪnoke ke ne malanga ʻaki ʻa e fakatomalá ki ha falukunga kakai faiangahala (vakai, Mōsese 6:27–29). Fakamatalaʻi ange ʻe nofotaha ʻa e lēsoni ʻo e ʻaho ní ʻi heʻene ngaahi akonaki ki he kakai ko iá. Naʻe fakatefito ʻa e pōpoaki ʻa ʻĪnoké ʻi heʻetau fiemaʻu ʻa Sīsū Kalaisí mo e founga ʻe lava ke tau haʻu ai kiate Iá.

Ke tokoni ke fakakaukau ʻa e kau akó ki heʻenau fiemaʻu ʻa e Fakamoʻuí, fakakaukau ke fakaʻaliʻali ʻa e ngaahi fakahinohino ko ʻení pea ʻoange ha taimi ki he kau akó ke nau vakaiʻi fakalongolongo kinautolu ʻi he fakamatala takitaha.

ʻI hono fakaʻaongaʻi ha meʻafua mei he 1 (ʻikai moʻoni kiate au) ki he 5 (moʻoni kiate aú), fakafuofuaʻi koe ʻo fakaʻaongaʻi ʻa e ngaahi fakamatala ko ʻení:

ʻOku ou ʻiloʻi ʻa e ʻuhinga ʻoku ou fiemaʻu ai ha Fakamoʻuí.
ʻOku mahino kiate au ʻa e founga te u lava ai ʻo haʻu kia Sīsū Kalaisí.
ʻOku ou lolotonga fie haʻu ʻo muimui ʻia Sīsū Kalaisi.

Neongo pe ko e hā ʻa e tuʻunga naʻá ke fakafuofuaʻi ai koé, ʻoku finangalo ʻa e Fakamoʻuí ke ke haʻu kiate Ia pea maʻu ʻa e ngaahi tāpuaki ko Ia pē te Ne lava ʻo foaki atú. ʻI hoʻo ako ʻa e ngaahi lea ʻa e palōfita ko ʻĪnoké ʻi he ʻaho ní, tokanga ki he ngaahi ueʻi ʻa e Laumālié ke mahino lelei ange ʻa e ʻuhinga ʻokú ke fiemaʻu ai ʻa e Fakamoʻuí mo e founga te ke lava ai ʻo haʻu kiate Iá.

Akoʻi ʻe ʻInoke hono kakaí

Ke tokoni ki he kau akó ke ako mei he ngaahi akonaki ʻa ʻĪnoke ʻi he Mōsese 6, fakakaukau ke hiki ʻa e saati ko ʻení ki he palakipoé. ʻE lava foki ke hiki ʻe he kau akó ʻa e sātí ki heʻenau tohinoa akó. Kole ki he kau akó ke nau ako ʻa e ngaahi vēsí. Vahe ki ha vaheua ʻe taha ʻo e kalasí ke kumi ʻa e ʻuhinga ʻoku tau fiemaʻu ai ha Fakamoʻuí. ʻE lava ke kumi ʻe he vaeua ʻe tahá ʻa e founga ʻoku tau haʻu ai kia Kalaisí. ʻI he ako ʻa e kau akó, mahalo te ke fie lue takai ʻo fehuʻi ki he kau akó pe ʻoku ʻi ai ha ngaahi foʻi lea pe kupuʻi lea ʻoku nau fiemaʻu tokoni ke mahino. ʻE ala tokoni ʻeni ke mahino ki he kau akó ʻa e veesi 59:

ʻOku fanauʻi kitautolu ʻi he Laumālié ʻaki ʻetau maʻu ʻa e meʻa-foaki ʻo e Laumālie Māʻoniʻoní (vakai, Ngaahi Tefitó mo e Ngaahi Fehuʻí, “Fakahinohino ki hono Ako ʻo e Ongoongoleleí: “Meʻafoaki ʻo e Laumālie Māʻoniʻoní,” Gospel Library).
ʻOku ʻuhinga ʻa e fakamāʻoniʻoniʻí ke “tauʻatāina mei he angahalá, pea hoko ʻo haohaoa, maʻa, mo māʻoniʻoni tuʻunga ʻi he [Fakalelei] ʻa Sīsū Kalaisí” (Fakahinohino ki he Ngaahi Folofolá, “Fakamāʻoniʻoniʻí,” Gospel Library).

Ngaahi akonaki ʻa ʻĪnoke fekauʻaki mo e haʻu kia Kalaisí: Mōsese 6:48–52, 57–59

ʻOku ou fiemaʻu ha Fakamoʻui koeʻuhí …	Te u lava ʻo haʻu kia Kalaisi ʻaki …

Hili hono fakakakato ʻe he kau akó ʻenau konga ʻo e sātí, ʻoange ha faingamālie ke aleaʻi ai ʻa e ngaahi meʻa ne nau maʻú. Te nau lava ʻo fai ʻeni ʻaki haʻanau fakafonu fakakalasi ʻa e saati ʻi he palakipoé pe vahevahe ʻa e meʻa ne nau akó mo hanau hoa.

Ko e hā naʻá ke ako mei he ngaahi veesi ko ʻení fekauʻaki mo e ʻuhinga ʻoku tau fiemaʻu ai ha Fakamoʻuí?

ʻE lava ke vahevahe ʻe he kau ako naʻa nau nofotaha ʻi he ʻuhinga ʻoku tau fiemaʻu ai ha Fakamoʻuí ha ngaahi moʻoni hangē ko e te tau lava ʻo maʻu ʻa e ngaahi tāpuaki ʻo e fakamoʻuí ʻo fakafou ʻia Sīsū Kalaisi toko taha pē (veesi 52); ʻoku fiemaʻu ke fakatomala ʻa e kakai kotoa pē ʻi he feituʻu kotoa pē (veesi 49–50, 57); ʻoku ʻikai lava ke nofo ha meʻa ʻoku taʻemaʻa ʻi he puleʻanga ʻo e ʻOtuá (veesi 57). Te ke lava ʻo fakaafeʻi ʻa e kau akó ke hiki ʻa e ngaahi moʻoni ne nau maʻú ʻi he saati ʻi he palakipoé.
Ko e hā naʻe akoʻi atu ʻe he ngaahi veesi ko ʻení fekauʻaki mo e ngaahi ngāue pau te ke lava ʻo fai ʻa ia ʻe tokoni ke ke haʻu ai kia Sīsū Kalaisí?

ʻE lava ke hiki ʻe he kau ako naʻa nau nofotaha ki he founga te tau lava ai ʻo haʻu kia Kalaisí ʻa e meʻa naʻa nau maʻú ʻi he palakipoé. ʻE lava ke fakanounouʻi ʻenau ngaahi talí ki ha foʻi moʻoni hangē ko e ʻoku tau haʻu kia Kalaisi ʻi heʻetau fakafanongo ki he leʻo ʻo e Fakamoʻuí, tui kiate Ia, fakatomala mei heʻetau ngaahi angahalá, papitaiso, pea maʻu ʻa e meʻa-foaki ʻo e Laumālie Māʻoniʻoní.

Mahalo ʻe tokoni ke fakamatalaʻi ange ʻoku faʻa fakamatalaʻi ʻe he folofolá ʻi he taimi ʻe niʻihi ʻa e founga ko ʻení ko e “tokāteline ʻa Kalaisí” (2 Nīfai 31:2–21), ko e tokāteline ʻa e Fakamoʻuí (vakai, 3 Nīfai 11:31–40), pe ko e ongoongolelei ʻa e Fakamoʻuí (vakai, 3 Nīfai 27:13–22). Fakakaukau ke fakaafeʻi ʻa e kau akó ke lau ʻa e Mōsese 6:62 ke vakai ki ha foʻi lea ʻe taha naʻe fakaʻaongaʻi ʻe he Tamai Hēvaní ke fakamatalaʻi ʻaki ʻa e founga ko ʻení. Te ke lava ʻo fakaafeʻi ʻa e kau akó ke vahevahe ʻa e meʻa ʻoku nau fakatokangaʻi fekauʻaki mo e fatongia ʻo Sīsū Kalaisí ʻi he palani ʻo e fakamoʻui ʻa e Tamai Hēvaní.
Ko e hā te ke talaange ki ha taha ʻoku fifili pe ʻoku ʻaonga nai ʻa e ngāue ʻoku fiemaʻu ke fakahoko, ke haʻu ai kia Kalaisí?

ʻE ala tokoni ke ako ʻe he kau akó ha niʻihi pe kotoa ʻo e ngaahi veesi ko ʻení, ko ha konga ʻo hoʻomou aleaʻi ʻa e fehuʻi kimuʻá, ʻo kumi ʻa e ngaahi tāpuaki te tau lava ʻo maʻu ʻi heʻetau haʻu kia Sīsū Kalaisí: Mātiu 11:28–30; 2 Nīfai 31:21; 3 Nīfai 19:13–14; ʻEta 12:27; Molonai 10:32–33. Te ke lava foki ʻo fakakaukau ke fakaafeʻi ʻa e kau akó ke vahevahe ʻa e ngaahi tāpuaki kuo nau aʻusia ʻi heʻenau feinga ke haʻu kia Sīsū Kalaisí.

Fakahaaʻi ʻa e mahinó

Fakaafeʻi ʻa e kau akó ke vakai ki he tūkunga mo honau kaungāmeʻá mei he kamataʻanga ʻo e lēsoní. Ke akoako fakamatalaʻi ʻa e meʻa kuo ako ʻe he kau akó, ʻe lava ke nau vahevahe ʻenau tali ki he ongo fehuʻi ko ʻení ʻi ha fanga kiʻi kulupu iiki.

Fakatefito ʻi he meʻa kuó ke ako mo ongoʻi ʻi he ʻaho ní, fakamatalaʻi ʻeni ki hoʻo kaungāmeʻá ʻi ha founga ʻe faingofua ke mahino kiate kinautolu:

Ko e hā ʻoku tau fiemaʻu ai ʻa Sīsū Kalaisí?
Ko e hā te tau lava ʻo fai ke haʻu kiate Iá?

Fakakaukau ke fakaʻosi ʻa e lēsoní ʻaki hono fakaafeʻi ʻa e kau akó ke lekooti ʻa e ngaahi fakakaukau pe ngaahi ongo fakalaumālie kuo nau maʻú ʻi heʻenau tohinoa akó. Te ke lava ʻo vahevahe ʻa e meʻa kuó ke ako fekauʻaki mo ʻetau fiemaʻu ʻa Sīsū Kalaisí pea fakamoʻoni ki he founga kuo faitāpuekina ai hoʻo moʻuí ʻe hoʻo haʻu kiate Iá.

Ngaahi Maʻuʻanga Tokoni Kehé

ʻOku mahuʻinga fēfē ʻa e fakaafe ʻa e Fakamoʻuí ke haʻu kiate Iá?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Ko e kupuʻi lea “haʻu kia Kalaisí” ko ha fakaafe ia. Ko e fakaafe mahuʻinga taha ia te ke lava ʻo fai ki ha taha kehe. Ko e fakaafe mahuʻinga taha ia ʻe lava ke tali ʻe ha taha. (“Haʻu kia Kalaisi,” Liahona, Māʻasi 2008, 49)

ʻOku tokoniʻi fēfē kitautolu ʻe he tokāteline ʻo Sīsū Kalaisí ke tau haʻu kiate Iá?

Naʻe pehē ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻOku mau tui ʻe lava ʻo fakamoʻui ʻa e faʻahinga ʻo e tangatá kotoa pē ʻi he Fakalelei ʻa Kalaisí, tuʻunga ʻi he talangofua ki he ngaahi fono mo e ngaahi ouau ʻo e Ongoongoleleí.” (Ko e Ngaahi Tefito ʻo e Tui 1:3). ʻE toki lava pē ke haʻu kakato ʻa e tokotaha kotoa kia Sīsū Kalaisi ʻaki ʻene tali ʻa e ongoongolelei kuo fakafoki maí. ʻOku tau “tali ʻa e ongoongolelei kuo fakafoki maí, ʻo fou ʻi he tui kia Sīsū Kalaisí mo ʻEne Fakaleleí, fakatomala, papitaiso, maʻu ʻa e foaki ʻo e Laumālie Māʻoniʻoní, pea kātaki ʻo aʻu ki he ngataʻangá” [Malanga ʻAki ʻEku Ongoongoleleí: Ko ha Fakahinohino ki he Ngāue Fakafaifekaú (2004), 1].

Ko e pōpoaki fakataha ʻeni ʻa e Tamaí mo e ʻAló. ʻOkú Na finangalo ke muimui ʻa e fānau kotoa ʻa e Tamai Hēvaní ki he tokāteline ʻo Kalaisí. (“Ko e Meʻaʻofa Fakaʻofoʻofa ʻo e Sākalamēnití,” Liahona, ʻAokosi 2018, 20)

ʻE lava fēfē ke tokoniʻi au ʻe he tokāteline ʻo Kalaisí?

Naʻe vahevahe ʻe Palesiteni Lāsolo M. Nalesoni ʻo pehē:

5:27

ʻOku mālohi fau ʻa e tokāteline haohaoa ʻa Kalaisí. ʻOkú ne liliu ʻa e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí. ʻOku tokoni mai ʻa e tokāteline ʻa Kalaisí ke tau ʻilo mo nofo ʻi he hala ʻo e fuakavá. Ko e nofo ʻi he hala fāsiʻi ko ia kuo fakamahinoʻi lelei maí, ʻe iku ʻo fakafeʻungaʻi ai kitautolu ke maʻu ʻa e meʻa kotoa ʻoku maʻu ʻe he ʻOtuá. ʻOku hala ha meʻa ʻe toe mahuʻinga ange ʻi he meʻa kotoa ʻoku maʻu ʻe heʻetau Tamaí! (“Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 6)

Ngaahi ʻEkitivitī Fakalahi ki he Akó

Ko ha mahino lahi ange ki he tokāteline ʻo e Fakamoʻuí

ʻE lava ke fakaloloto ʻe he kau akó ʻenau mahino ki he tokāteline ʻo Kalaisí ʻaki hono fili ha tafaʻaki ʻe taha ʻo e tokāteliné ke ako lahi ange. Te nau lava ʻo ako ʻa e konga totonú ʻi he peesi 6–9 ʻo e Malanga ʻAki ʻEku Ongoongoleleí: Ko ha Fakahinohino ki Hono Vahevahe ʻo e Ongoongolelei ʻo Sīsū Kalaisí (2023). ʻE lava ke nau tali ʻa e ngaahi fehuʻi ko ʻení lolotonga ʻenau akó:

Ko e hā ʻene ʻuhinga kiate koe ʻa e tafaʻaki ko ʻeni ʻo e tokāteline ʻa Kalaisí?
ʻE lava fēfē ke ne tokoniʻi koe ke ke haʻu kia Kalaisí?
ʻE lava fēfē ke ne tokoniʻi koe ke ke hangē ko e Tamai Hēvaní?

Hili iá, ʻe lava ke ke huluʻi ha foʻi vitiō ʻe taha pe fakatouʻosi mei he “Ko e Falala ki he Tokāteline ʻa Kalaisí,” ʻoku maʻu ʻi he ChurchofJesusChrist.org. Naʻe vahevahe ʻe ʻEletā ʻĒveni A. Simuti ʻo e Kau Fitungofulú ʻa e founga ʻe lava ai ʻe he falala ki he tokāteline ʻo Kalaisí ʻo liliu ʻetau tōʻonga moʻuí (taimi 3:41 ki he 5:33). Naʻá ne fakamatalaʻi leva ʻa e founga naʻe falala ai ʻa e ongomātuʻa mali ko Tuleivisi mo Keisií kia Sīsū Kalaisi neongo ʻa e ngaahi faingataʻa ʻokú na fehangahangai mo iá (taimi 6:02 ki he 8:26).

10:30

Mōsese 6:59. Fanauʻi fakatuʻasinó mo e fanauʻi foʻou fakalaumālié

ʻE lava ke ako ʻa e kau akó fekauʻaki mo e founga ʻo e fanauʻi foʻou fakalaumālié ʻaki hono fakafehoanaki ia ki he fanauʻi fakatuʻasinó.

Fakaafeʻi ʻa e kau akó ke lau ʻa e Mōsese 6:59 pea feinga ke ʻiloʻi ʻa e ngaahi ʻelemēniti ʻe tolu (vai, Laumālie, toto) ʻa ia ʻoku mahuʻinga ki he fanauʻi fakatuʻasinó mo e fakalaumālié fakatouʻosi.

Fakaafeʻi ha tokotaha ako ke ne lau ʻa e Mōsese 6:60, pea fehuʻi ange:

Ko e hā ʻa e fatongia ʻo e ngaahi meʻá ni ʻi he founga ʻo e toe fanauʻi foʻoú?

Ke tokoni ke tali ʻe he kau akó ʻa e fehuʻi ko ʻení, te ke lava ʻo lau ʻa e fakamatala ko ʻeni ʻa ʻEletā Pulusi R. Makongikī (1915-85) ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI he fanauʻi fakamatelie kotoa pē ʻoku fakauku ʻa e tamasiʻí pe taʻahiné ʻi he vai ʻi he manava ʻo e faʻeé. ʻOku hū ʻa e laumālié ki he sinó ʻi he taimi tukupau kuo filí, pea ʻoku tafe maʻu pē ʻa e totó ʻi he kālava ʻo e tokotaha foʻoú. Ikai ngata aí, ka hala ʻi he ngaahi meá ni, ʻoku ʻikai ha moʻui, ʻikai ha fanauʻi, ʻikai ha moʻui fakamatelie.

ʻI he fanau kotoa pē ki he puleʻanga ʻo e langí, ʻoku fakauku ʻa e pēpē toki fanauʻi foʻou ʻia Kalaisí ʻi he vai, ʻokú ne maʻu ʻa e Laumālie Māʻoniʻoní ʻi he hilifaki ʻo e nimá, pea ʻoku fakamaʻa ia ʻe he taʻataʻa ʻo Kalaisí mei he angahala kotoa pē. Ka ʻikai ʻa e ngaahi meʻá ni takitaha, ʻoku ʻikai ha fanauʻi fakalaumālie, ʻikai ha moʻui foʻou, ʻikai ha ʻamanaki lelei ki he moʻui taʻengatá. (A New Witness for the Articles of Faith [1985], 288)

Mōsese 6:63. “ʻOku nau fakamoʻoniʻi kotoa pē au”

Ke tokoni ke ʻilo ʻe he kau akó ʻa e founga ʻoku fakamoʻoni ai ʻa e meʻa kotoa pē kia Sīsū Kalaisí, te ke lava ʻo ʻai ke nau lau ʻa e Mōsese 6:63. Hili iá, te ke lava ʻo kole ki he kau akó ke vahevahe ʻa e meʻa ʻokú ne fakamoʻoniʻi ʻa Sīsū Kalaisi ʻi heʻenau moʻuí.

Fakatokangaʻi ange: Kapau naʻá ke fakaʻaongaʻi lahi ʻa e Mōsese 6:63 ʻi he Lēsoni 7: “Sēnesi 1:1–25” ke ako lahi ange fekauʻaki mo Sīsū ko e Tupuʻangá, ʻe lava ke ke fili ke ʻoua te ke fakaʻaongaʻi ia heni.

Vitiō

ʻI he teuteu ʻa e kau akó ke aleaʻi ʻa e ʻuhinga ʻoku mahuʻinga ai ke haʻu kia Sīsū Kalaisí, te ke lava ʻo fakaafeʻi kinautolu ke nau mamata ʻi he “Come unto Christ: 2014 Theme Song” (4:48).

4:49