Սեմինարիա
Մովսես 1.12–26․ «Դեն գնա, սատանա»

«Մովսես 1․12–26․ «Դեն գնա, սատանա» Հին Կտակարան․ Սեմինարիայի ուսուցչի ձեռնարկ (2026)

«Մովսես 1․12–26․ «Դեն գնա, սատանա» Հին Կտակարան․ Սեմինարիայի ուսուցչի ձեռնարկ

Մովսես 1, Աբրահամ 3․ Դաս 5

Մովսես 1.12-26

«Դեն գնա, սատանա»

Մենք բոլորս զգացել ենք սատանայի գայթակղությունները: Սակայն, երբ մենք, ինչպես Մովսեսը, հիշում ենք, թե ով ենք մենք իրականում, կարող ենք Աստծուց զորություն ստանալ՝ հաղթահարելու սատանային և նրա գայթակղությունները մեր կյանքում: Այս դասի նպատակն է օգնել ուսանողներին Աստծուց զորություն ստանալ՝ հաղթահարելու իրենց անձնական գայթակղությունները:

Ուսանողի նախապատրաստում. առաջարկեք ուսանողներին խորհել գայթակղություններից մեկի մասին, որին իրենք անձամբ բախվում են, և դասի գալ պատրաստված՝ սովորելու, թե ինչպես հաղթահարել այն:

Հնարավոր ուսումնական վարժություններ

Դիմակայել գայթակղությանը

Որպեսզի պատրաստեք ուսանողներին սովորելու հաղթահարել գայթակղությունները, կարող եք կիսվել հետևյալ խոսքերով և հարցերով:

Տասներկու Առաքյալների Քվորումից նախագահ Ջեֆրի Ռ. Հոլլանդն ուսուցանել է.

Նախագահ Ջեֆրի Ռ. Հոլլանդ

Մենք խոսում ենք համարձակ, քանի որ սատանան իրական է և սպասում է, որ ձեզ կործանի, և դուք բախվում եք նրա ազդեցությանն ավելի ու ավելի վաղ տարիքում: («Բոլորս զինվորագրված ենք», Լիահոնա, նոյեմբեր 2011, 45)

  • Ի՞նչ եք մտածում նախագահ Հոլլանդի այս մեջբերման մասին:

  • Ինչպիսի՞ գայթակղությունների են բախվում Վերջին Օրերի Սրբերի դեռահասները:

Օգտակար կլինի գրատախտակին գրել այն գայթակղությունները, որոնք նշում են ուսանողները: Դուք պետք է խնդրեք ուսանողներին մտորել դրանց շուրջ ավելի ուշ՝ դասի ընթացքում:

Կարող եք առաջարկել ուսանողներին գրել հետևյալ հարցերի իրենց պատասխաններն ուսումնասիրության օրագրում:

Խորհեք մի գայթակղության մասին, որին դուք բախվել եք կամ կարող եք բախվել: Դիտարկեք հետևյալը.

  • Ի՞նչն է ձեզ համար դժվարություն ստեղծում՝ այդ գայթակղությանը դիմակայելիս:

  • Ի՞նչ եք անում, որպեսզի օգնություն և զորություն գտնեք՝ գայթակղությանը դիմակայելու համար:

  • Ձեր կարծիքով, որքանո՞վ արդյունավետ եք հաղթահարում ձեր գայթակղությունը:

Այսօր Մովսես 1.1–26 հատվածներն ուսումնասիրելիս առաջնորդություն փնտրեք Սուրբ Հոգուց՝ բացահայտելու ճշմարտություններ, որոնք կարող են զորացնել ձեզ, երբ դուք գայթակղության բախվեք:

Մովսեսը գայթակղվում է սատանայի կողմից

Առաջարկեք ուսանողներին կիսվել, թե ինչ են հիշում նախորդ դասից, կամ նրանք կարող են համառոտ վերանայել Մովսես 1.1–10 հատվածները և խորհել իրենց սովորածի շուրջ: Անհրաժեշտության դեպքում հիշեցրեք նրանց, որ Մովսեսը «տեսավ Աստծուն դեմ առ դեմ, և նա խոսեց նրա հետ» (Մովսես 1.2) և որ Աստված երեք անգամ ուսուցանեց Մովսեսին, որ նա Իր որդին է (տես հատվածներ 4, 6 և 7):

Չնայած Մովսեսը հզոր մարգարե էր, նա նույնպես բախվեց մեծ գայթակղության: Աստծո հետ Մովսեսի ունեցած փորձառությունից կարճ ժամանակ անց նա չափազանց դժվար փորձառություն ունեցավ, երբ «Սատանան եկավ գայթակղելու նրան» (Մովսես 1․12)։ Այն բանի շնորհիվ, ինչ Մովսեսը գիտեր և ինչ արեց, նա կարողացավ հաղթել: Կարդացեք Մովսես 1.12–22 հատվածները՝ փնտրելով, թե ինչն օգնեց Մովսեսին հաղթահարել սատանայի գայթակղությունները: Կարող եք նշել ձեր գտածը։

Կարող եք դիտել «I Am a Son of God» տեսանյութի 2:50–6:30 հատվածը կամ ամբողջ տեսանյութը, եթե նախորդ դասի ժամանակ ուսանողներին ցույց չեք տվել առաջին մասը։ Տեսանյութից հետո կարող եք առաջարկել ուսանողներին կարդալ հատվածները՝ փնտրելով, թե ինչն օգնեց Մովսեսին հաղթահարել Սատանայի գայթակղությունները: Այնուհետև ուսանողները կարող են քննարկել հետևյալ հարցը զույգերով կամ փոքր խմբերով.

6:31

  • Ի՞նչ ենք սովորում Մովսեսի փորձառությունից, որը կարող է օգնել մեզ հաղթահարել մեր գայթակղությունները:

Կարող եք գրատախտակին գրել հետևյալ անավարտ սկզբունքը․ Մենք կարող ենք ստանալ Աստծո օգնությունը, որպեսզի հաղթահարենք գայթակղությունները՝ … Առաջարկեք ուսանողներին գալ գրատախտակի մոտ և ավարտել սկզբունքն իրենց խոսքերով: Եթե ուսանողներն օգնության կարիք ունեն, կարող եք ուղղորդել նրանց՝ տալով հետևյալ հարցերը.

  • Ինչպե՞ս կոչեց սատանան Մովսեսին հատված 12-ում, և ինչպե՞ս արձագանքեց Մովսեսը հատված 13-ում:

  • Ի՞նչ հիշեց Մովսեսն Աստծո հետ ունեցած իր հոգևոր փորձառությունից, որն օգնեց, երբ նա բախվեց գայթակղության:

Ուսանողները կարող են ավարտել սկզբունքը մի քանի եղանակով, ներառյալ հետևյալները.

… հիշելով, որ մենք Աստծո զավակներն ենք

… հիշելով անցյալի հոգևոր փորձառությունները

… դիմելով Աստծուն՝ զորություն ստանալու համար

Մի քանի սկզբունք նշելուց հետո կարող եք օգտագործել հետևյալ մեջբերումը և հարցերը, որպեսզի օգնեք խորացնել ուսանողների հասկացողությունն իրենց հայտնաբերած ճշմարտությունների վերաբերյալ:

Նախագահ Ռասսել Մ. Նելսոնը կիսվել է հետևյալով այն զորության մասին, որ մենք ստանում ենք, երբ հիշում ենք, որ Աստծո զավակներն ենք․

Նախագահ Ռասսել Մ. Նելսոն

Իմ սիրելի ընկերներ, դուք բառացիորեն Աստծո հոգևոր զավակներն եք: Դուք այս ճշմարտությունը երգել եք՝ «Աստծո զավակն եմ» երգի բառերը սովորելուց հետո։ Բայց արդյո՞ք այդ հավերժական ճշմարտությունը դրոշմված է ձեր սրտում: Արդյո՞ք այս ճշմարտությունն օգնել է ձեզ գայթակղության բախվելիս։ («Ընտրություններ հավերժության համար» [համաշխարհային հոգևոր հավաք չափահաս երիտասարդների համար, մայիսի 15, 2022])

  • Ձեր կարծիքով, ի՞նչ է նշանակում, որ ձեր սրտում դրոշմված լինի այն ճշմարտությունը, որ դուք Աստծո զավակն եք:

  • Հիշելն այն մասին, որ մենք Աստծո զավակներն ենք, ինչպե՞ս կարող է զորացնել մեզ, երբ մենք բախվում ենք գայթակղության:

  • Ձեր կարծիքով, ինչո՞ւ է մեզ անհրաժեշտ Աստծո օգնությունը՝ գայթակղությունը հաղթահարելու համար։

Առաջարկեք ուսանողներին կիսվել օրինակներով, երբ Աստված զորացրել է որևէ մեկին՝ գայթակղությունը հաղթահարելու համար։ Դա կարող է լինել օրինակ սուրբ գրություններից, իրենց մտերիմ մարդկանց կյանքից կամ իրենց կյանքից: Քանի որ գայթակղություններն անձնական են, հիշեցրեք ուսանողներին, որ չկիսվեն որևէ կոնկրետ գայթակղությամբ:

Անձնական գայթակղությունների հաղթահարում

Որպեսզի օգնեք ձեր ուսանողներին հասկանալ, թե ինչպես կարող են ապրել այսօր քննարկված սկզբունքներով, առաջարկեք նրանց ընտրել մեկ կամ երկու գայթակղություն, որոնք գրվել էին գրատախտակին դասի սկզբում: Առաջարկեք ուսանողներին դասարանով կամ փոքր խմբերով մտածել գործնական եղանակներ, թե տվյալ գայթակղությանը բախվող մարդը ինչպես կարող է կիրառել այս սկզբունքները՝ այդ գայթակղությունը հաղթահարելու համար:

Առաջարկեք ուսանողներին գրել իրենց գաղափարները գրատախտակին, կամ կարող եք ցուցադրել հետևյալ գաղափարներից մի քանիսը:

Մովսես 1.12–26 հատվածներում մեր սովորածը կիրառելու եղանակներ.

  • Գրեք ձեր օրագրում մի դեպք, երբ դուք զգացել եք Տիրոջ սերը և իմացել եք, որ Աստծո զավակն եք: Կարող եք դա կրկնել գայթակղության ժամանակ:

  • Մտապահեք և վերարտադրեք ոգեշնչող սուրբ գրությունները, օրհներգերը կամ հաղորդության աղոթքները, որպեսզի կարողանաք դրանք կրկնել գայթակղության պահին: (Այս ռազմավարությունը Փրկիչն օգտագործել է Մատթեոս 4.1–11 հատվածներում։)

  • Ամեն օր աղոթեք Տիրոջ զորությանն ու ուժը ստանալու համար՝ գայթակղությունը հաղթահարելու համար: Ամեն երեկո դիմեք Երկնային Հորը, որպեսզի շնորհակալություն հայտնեք Նրան, ընդունեք թուլությունները, ներողություն խնդրեք և խոստանաք շարունակել փորձել (տես 3 Նեփի 18.15, 18):

  • Հիշեք անցյալում ձեր ունեցած հոգևոր փորձառությունները և գրեք դրանք օրագրում: Օգտագործեք դրանք, երբ գայթակղություն է առաջանում:

  • Ծնողների, վստահելի մեծահասակների կամ ընկերների հետ քննարկեք, թե ինչպես են այս սկզբունքներն օգնել նրանց և ինչպես նրանք խորհուրդ կտան կիրառել դրանք:

Առաջարկեք ուսանողներին կազմել ծրագիր, որը կօգնի նրանց հաղթահարել այն գայթակղությունները, որոնց բախվում են: Կարող եք դա անել՝ տալով հետևյալ ցուցումները.

Հիշեք այն գայթակղությունը, որի մասին խորհում էիք դասի սկզբում կամ մեկ այլ գայթակղություն, որի դեմ պայքարում եք:

Կիսվեք ձեր վկայությամբ Տիրոջ զորության և ուժի մասին, որը դուք զգացել եք ձեր կյանքում, և Նրա ցանկության մասին՝ օգնելու ձեր ուսանողներին հաղթահարել իրենց գայթակղությունները: Արտահայտեք ձեր վստահությունը նրանց հանդեպ և նրանց ունակության հանդեպ՝ Աստծո օգնությամբ հաղթահարելու իրենց գայթակղությունները։

Ուղղորդում խնդրելով Երկնային Հորից՝ ավարտեք հետևյալ նախադասությունը ձեր ուսումնասիրության օրագրում կամ ձեր մտքում․ «Որպեսզի պատրաստվեմ հաղթահարել այս գայթակղությունը, ես պետք է »: