Pagkamit sa Aking mga Mithiin

Basahin:Sa paglikha ng mga mithiin, isipin ang iyong mga priyoridad. Maraming mithiin ang makatutulong sa ating humusay pa, ngunit sa patnubay ng Panginoon maaari nating piliin ang pinakamagagandang mithiin para sa ating buhay.

Sinabi ni Elder Oaks: “Dapat [nating malaman] na hindi sapat na dahilan ang pagiging maganda para gawin ito. Ang magagandang bagay na magagawa natin ay higit pa ang dami kaysa libreng oras natin para magawa ang mga ito. May ilang bagay na mas maganda kaysa iba, at ito ang mga bagay na dapat nating unahin sa ating buhay” (“Maganda, Mas Maganda, Pinakamaganda,” Ensign o Liahona, Nob. 2007, 104).

Ang mga mithiin ay pinakamabisa kapag pinupukaw, hinahamon, at hinihikayat tayo nito. Habang gumagawa o pinagbubuti mo ang inyong mga mithiin, tukuyin mo ang gusto mong makamit, lumikha ng ilang paraan upang masukat ang iyong pag-unlad, at gumawa ng time line para makamit ito.

Activity:Rebyuhin sandali ang mga mithiing itinakda mo gamit ang Aking Plano sa iyong misyon. Kung hindi mo sinimulan ang Aking Plano habang nasa misyon ka, rebyuhin ang worksheet sa likod ng manwal na ito.

Basahin:Ang kasal na walang hanggan ay napakahalagang bahagi ng plano ng Diyos para sa Kanyang mga anak. Kung ikaw ay nakibahagi sa Aking Plano habang nasa misyon ka, maaalala mo kung paanong ang isa sa mga pinakamahalagang layunin ng iyong misyon ay para maihanda ka sa pagkakaroon ng walang-hanggang pamilya. Sa lahat ng iyong mga mithiin, ang kasal na ibinuklod sa templo ang dapat na pinakamataas na priyoridad. Sa pagbaling mo sa maiinam na personal na mga hangarin, tulad ng pag-aaral at propesyon o trabaho, maaaring madaling hayaang maging hadlang ang iba pang mga priyoridad. Ang pag-aasawa ay nagbibigay ng mga oportunidad para sa personal at espirituwal na pag-unlad na hindi maaaring matamo sa ibang paraan. Ito ang dahilan kung bakit pinapayuhan ng mga propeta ang mga returned missionary na aktibong hangarin ang pag-aasawa.

Sinabi ni Pangulong Thomas S. Monson: “Alam ko na maraming dahilan kaya kayo atubiling gumawa ng hakbang para makapag-asawa. … Marahil ay natatakot kayong magkamali sa pagpili. Ang masasabi ko rito ay kailangan ninyong sumampalataya” (“Kapangyarihan ng Priesthood,” Ensign o Liahona, Mayo 2011, 67).

Ipinahayag ni Elder M. Russell Ballard: “Kayong mga single adult ay kailangang magdeyt at mag-asawa o magpakasal. Huwag na sana kayong magpaliban! … Maiiwasan ninyo ang maraming problemang nararanasan ninyo kung kayo ay ‘sabik sa paggawa’ ng matwid na pakikipagdeyt, panliligaw, at pag-aasawa” (“Young Adults,” 69).

Itinuro ni Elder Richard G. Scott: “Kung kayo ay wala pang asawa at wala pang napili para sa selestiyal na kasal, pagsikapan ito. Ipanalangin ito. Asahan ito sa takdang oras ng Panginoon. … Sinabi ng Kanyang mga propeta na mapapasainyo ang pagpapalang iyon kapag namumuhay kayo na palaging karapat-dapat para dito. Hindi natin alam kung mangyayari ito sa buhay na ito o sa kabilang panig ng tabing. Ngunit ipamuhay ito. Ipagdasal ito” (“Receive the Temple Blessings,” Ensign, Mayo 1999, 27).

Pag-isipang mabuti:Paano mo mas maipapakita ang iyong pananampalataya sa paghahanap ng mapapangasawa? Ano ang ibig sabihin ng “asahan ang kasal o pag-aasawa sa takdang oras ng Panginoon”? Ano ang ibig sabihin ng mamuhay at manalangin para sa kasal? Paano mo mapalalakas ang iyong hangaring makasal sa templo?

Basahin:Kahit gumagawa tayo ng mabubuting mithiin, hindi natin palaging nakakamtan ang mga ito. Maraming dahilan kung bakit hindi ito maaaring mangyari, pero marahil natutuhan mo na, sa iyong misyon o sa iba pang mga karanasan, ang ilang paraan para manatili ka sa tamang landas. Itala sa iyong journal ang mga ideya mo.