11: Vakasaqara na Vuli: Vakatulewataka na Vanua o Gole Kina kei na Cava Me Caka Mo Yaco Kina
11:
Vakasaqara na Vuli: Vakatulewataka na Vanua o Gole Kina kei na Cava Me Caka Mo Yaco Kina
Ripote:Wasea vakalailai e dua na ka o sotava ni o vakaraitaka na yalodina ena macawa sa oti.
Vakananuma:E vakavurea vakacava na madigi na vuli?
Sarasara:“Education for a Better Life,” e tiko ena srs.lds.org/videos. (Sega na vidio? Wilika na tabana e 29.)
Vuli Baleta na Bula Torocake
Kevaka o sega ni sarava rawa na vidio, wilika na itukutuku.
Elder Joseph W. Sitati: Ena yabaki 13 au a tiko ena dua na koro mai Kenya. E lailai sara na ka e tu vei ira na tamata. Ia, o ira e rawa ni ra volia na veika era vinakata na tani sai ira era vuli vinaka. Au raica kina ni vuli e ki kina dua na bula vinaka.
E lako tiko ga mai vei au na vakasama meu lako yani ka veitalanoa kei qasenivuli liu ena dua na koronivuli au vinakata meu curu kina. A gadrevi kina na baisikeli nei tamaqu meu lako ena ilakolako oqo ka taura e veimama ni siga. Au a sega ni se bau biuta na noqu koro. Au a sega ni kila vinaka na vosa Vakavalagi, ka turaga vulavula na qasenivuli liu. Au se sega vakadua ni se bau sotava ka veivosaki kei na dua na tamata vulavula, ka sa veivakayalolailaitaki na vakasama oqo.
E dua na ka e lomaqu e vakauqeti au tiko ga ka tukuna vei au, meu cakava na ka oqo, au sa mani biubiu ka lako yani meu sota kei qasenivuli liu. Niu raici koya yani au raica ni kidroa o koya ni raica e dua na gonetagane ka duri dodonu tu vaka na sotia e matana. Au raica e matana na lomavinaka, oqori e solia vei au na qaqa. Au tukuna vua niu vinakata saraga meu lewena na nona koronivuli kau na marau kevaka ena vakacurumi au. E kaya o koya, “Io, eda na qai raica ni sa oti yaco mai na macala ni veitarogi.” Au kaya yani, “Vinaka, saka.” Lailai mai na va na miniti au sa curu tale mai e tuba.
Na va na miniti oya e loma ni valenivolavola e dua na gauna ni vakatakila kina noqu bula. Au a digitaki duadua ena noqu koronivuli meu lako ki na dua na koronivuli cecere ena neitou yasayasa. Ni sa solia vei au na turaga vinaka oqo na madigi oqo, au vakavinavinaka sara kina, ka vakauqeti au sara meu dua vei ira na gone gumatua duadua ena noqu kalasi.
E dolava oqori e dua na madigi meu gole yani ki na dua tale na koronivuli vinaka kau qai vakavakarau meu gole yani ki univesiti. Na noqu vuli e vukei au meu kunea e dua na watiqu ena univesiti. E vukei au meu kunea e dua na cakacaka ena tauni. Ni keirau tiko voli e Nairobi, keirau sota kei na dua na veiwatini kaulotu ka sureti keirau ki na nodrau vale, ka ra soqoni tiko kina kei ira na leweni Lotu. Kevaka meu a sega ni tiko e Nairobi ena gauna oya, keu a sega ni kunea na kosipeli. Na noqu sa rawata na cakacaka vinaka ka vakadeitaki,e vukei au meu veiqaravi ena Lotu.
Au vakadinata ni vuli kina noda bula rawati koya. Ena dolava vei iko e levu na vanua mo rawa ni vakarautaka na veika vakayago ka mo rawa ni bula rawati iko talega vakayalo.