Есүс Христийн сайн мэдээнээс суралцах ба заах

Ерөнхийлөгч Рассэлл М.Нэлсон: “Танд ямар ч асуудал тулгарсан бай хариулт нь үргэлж Есүс Христийн амьдрал болон сургаалаас олддог билээ. Түүний Цагаатгал, хайр, нигүүлсэл, сургаал хийгээд эдгээлт, өсөлт хөгжлийн сэргээгдсэн сайн мэдээнийх нь талаар илүү ихийг сурч мэд. Түүнд ханд! Түүнийг дага!” хэмээн заасан. Аврагчийн амьдрал, сургаалуудыг судалснаар таны асуулт болон асуудлууд хэрхэн хариулагдаж байсан бэ? Таны итгэл тухайн цаг үед хэрэгтэй байсан хариултуудыг олж мэдэхэд тань хэрхэн тусалсан бэ? Энэ долоо хоногт та судалж, итгэснээр Аврагчийн талаар юуг сурч мэдэж болохыг, мөн энэ нь өнөөдөр танд тулгарч байгаа асуулт эсвэл асуудалд хэрхэн тусалж болох талаар эргэцүүлэн бод. Та төлөвлөн бичээд, төлөвлөгөөгөө дагаж мөрдөх сануулга бэлдэж болно.

Сургаал ба Гэрээнүүд 88:118 дахь Их Эзэний зөвлөгөөг уншиж, тунгаан бод. Судлах мөн итгэлээр суралцах хоёрын ялгаа юу вэ? Энэ хоёр зарчим хэрхэн уялдаж болох вэ? Бидний сайн мэдээг судлах арга барил сургууль дээр эсвэл онлайнаар суралцахаас өөр байдаг уу? Яагаад? Их Эзэн “шилдэг номууд” гэсэн нь юу гэсэн утгатай вэ? Та нарын хүн нэг бүр Өсвөр үеийнхний бат бөх байдлын төлөө: Сонголт хийхэд туслах хөтөч дэх “Үнэн таныг чөлөөлнө” хэсгээс судлаад, мэдлэг олж авснаар ирэх адислалуудын талаар сурсан зүйлсээ ярилцаж болно. Сурсан зүйлтэйгээ хамаатай зорилго тавих талаар бодож үзээрэй.

Алма 1:26; 31:5; Сургаал ба Гэрээнүүд 93:53

Дэвид А.Бэднар, “Их Эзэний арга замаар суралцах нь,” Лиахона, 2018 оны 10-р сар, 50–53

Үлиссэс Соарэс, “Христийг болон Түүний сайн мэдээг бишрэн шүтэхүй,” Лиахона, 2022 оны 5-р сар, 115–117

“Хичээнгүйлэн суралцахад урь,” Аврагчийн арга барилаар заах нь (2022), 24–27

Ирээд, Намайг дага гарын авлагын оршилд, заах нь яагаад ариун үүрэг хариуцлага болохыг ойлгоход бидэнд тусалдаг. Энэ нь бидэнд “Сайн мэдээг судлах, заах бүхий л зорилго нь бидний хөрвөлтийг гүнзгийрүүлж, Есүс Христтэй илүү адилхан болоход туслах явдал юм” гэж заадаг. Та Есүс Христтэй илүү адил заахад тань туслах Аврагчийн арга барилаар заах нь номоос нэг хэсгийг сонгон судалж болно. Сайн мэдээ таныг болон бусдыг Түүнтэй илүү адил болоход удирдан чиглүүлж болохын тулд та үүнийг хэрхэн илүү сайн зааж болох вэ? Та гэр орондоо болон сүм дээр эсвэл бусад орчинд сайн мэдээг илүү сайн заахын тулд ямар жижиг зүйлсийг хийж чадах вэ? Та бусдад сайн мэдээг илүү сайн заахын тулд хэрхэн илүү хичээнгүйлэн суралцахыг эрэлхийлж болох вэ?

Ахлагч Бага Жон С.Пингрий Ерөнхий чуулган дээр хэлсэн “Мөнхийн үнэн” захиасандаа: “Бидний зорилго бол Ариун Сүнсний хөрвүүлэгч хүчийг урих замаар үнэнийг заах явдал юм” гэж заасан. Дараа нь тэрээр зааж байхдаа Сүнсийг урихад бидэнд тусалж чадах Их Эзэн болон Түүний бошиглогчдын өгсөн 7 энгийн урилгыг хуваалцсан. Та эдгээр 7 зарчмыг болон тэдгээр нь бидэнд сайн мэдээг Сүнсний хүчээр заахад хэрхэн тусалж чадах талаар ярилцаж болно. Магадгүй та 7 зарчмыг хэрэгжүүлэхийн тулд тэдгээрийг санахад бие биедээ туслах хөгжилтэй аргыг бодож олж болох юм. Жишээ нь: Товчлол эсвэл бусад энгийн цээжлэх аргыг бодож олж болно.

Аврагчийн арга барилаар заах нь гарын авлагад Тэргүүн зөвлөл биднийг ийн урьсан. “Бид таныг Есүс Христийн тухай болон Тэрээр сайн мэдээг хэрхэн заасан талаар илүү дэлгэрэнгүй суралцахад урьж байна. Түүний үг, үйлдэл, зан чанарыг залбиран байж судлан, Түүнд илүү ойртож дагахыг хичээгээрэй.” Аврагчийн зарим үг, үйлдэл, зан чанарын талаар ярилц. Тэдгээр нь танд сайн мэдээг заах үедээ Сүнсийг урихад хэрхэн тусалж болох вэ? Аврагчийн арга барилаар заах нь гарын авлагад зааж байгаа хүмүүсээ хайрлах, Сүнсээр заах, сургаалыг заах, хичээнгүйлэн суралцахад урих зэрэг Христтэй адил заах дөрвөн зарчмыг хуваалцдаг. Сайн мэдээний үнэнүүдийг гэр оронд болон сүм дээр мөн өөр хаа нэгтээ заахдаа эдгээр зарчмыг хэрэгжүүлж болох арга замуудын тухай ярилц. Та мөн Аврагчийн арга барилаар заах нь гарын авлагын 37-р хуудсан дээрх хувийн үнэлгээг гүйцэтгэж болно. Та олж авсан ойлголтынхоо талаар ярилцаад, Христийн сайн мэдээг заахад бэлтгэж, заах арга барилдаа ямар нэгэн өөрчлөлт гаргамаар байгаа эсэхээ залбирч тунгаан бодож болно.

Иохан 14:16–17, 26; Алма 37:33–37; Сургаал ба Гэрээнүүд 11:21–22; 42:12–17; 88:122

Jeffrey R. Holland, “A Teacher Come from God,” Ensign, May 1998, 25–27

Dieter F. Uchtdorf, “A Teacher’s Checklist” (address given during the Teaching in the Savior’s Way broadcast, June 12, 2022), Gospel Library

Нийл Л.Андэрсэн, “Есүс Христийн хүч ба цэвэр үнэн сургаал” (өсвөр үеийнхэн болон залуучуудад заах тухай нэвтрүүлэг, 2023 оны 6-р сарын 11), Gospel Library

“Invite Diligent Learning” (видео), Gospel Library

Алма 32:28–31-ыг уншин тунгаан бодохдоо өчүүхэн жижиг үр сүр жавхлант мод болж хувирдаг гайхамшгийн тухай бод. Дараа нь Жан Э.Нюүмэн ахын зөвлөгөөг унш. “Хүүхдүүд эцэг эхээсээ олон зүйлийг өвлөн авдаг ч гэрчлэлийг өвлөх боломжгүй. Бид үр ургуулж чадахгүйн адилаар хүүхдүүддээ гэрчлэл өгч чадахгүй. Гэвч бид ‘үгийг хааж боомилдог’ өргөсгүй, сайн хөрс бүхий тэжээллэг орчныг бүрдүүлж чадна. Бид хүүхдүүд маань болон бидний хайртай бусад хүн үр суулгах газар бүхий, ‘үгийг [сонсоод], үүнийг [ойлгох]’ [Матай 13:18–23-ыг үзнэ үү] мөн тэд өөрсдөө ‘уг үр сайн’ [Алма 32:30] гэдгийг олж мэдэж болох туйлын сайн нөхцөлийг бүрдүүлэхийг хичээж чадна.” Таныг болон танай гэр бүлийг мөнхийн үнэнүүдээс суралцахад зориулж гэр орныг тань илүү тэжээллэг орчин болгоход юу туслах вэ? Сайн мэдээний сайн сайхны талаар мэдэж авахад та нар бие биедээ хэрхэн тусалж чадах вэ? Та нар Христийн тухай бие биеийнхээ гэрчлэлийг арчлан, хүчирхэгжүүлэхийн тулд юу хийж болох вэ?

Ахлагч Дэвид А.Бэднар ийн заасан. “Хэрвээ Есүс Христийн тухай болон Түүний сэргээгдсэн сайн мэдээний талаар таны эсвэл миний мэддэг бүх зүйл бусад хүний бидэнд заасан юм уу хэлсэн зүйл байдаг бол Түүний тухай болон Түүний хожмын үеийн сүр жавхлант ажлын талаарх бидний гэрчлэлийн суурь элсэн дээр баригдсан гэсэн үг юм [Матай 7:24–27-г үзнэ үү]. Бид бусад хүний, тэр тусмаа хайрладаг, итгэж найддаг хүмүүсийнхээ сайн мэдээний гэрэл, мэдлэг дээр л тулгуурлаж эсвэл түүнээс нь зээлээд байж болохгүй.” Хиламан 5:12-ыг хамтдаа уншихдаа ахлагч Бэднарын хэлсэн үгсийг бод. Та далайн эргийн зургийг харж байхдаа (эсвэл цөөрөм, горхи эсвэл нуурын эргээр алхахдаа) энэхүү эшлэл болон шүлгийг тунгаан бодож, ярилцаж болно. Хүмүүс яагаад гэр орноо элсэн дээр барьдаггүй талаар бод. Тэд ямар төрлийн суурь дээр барьдаг вэ? Та гэрчлэлээ бат бөх суурин дээр барихын тулд юу хийж болох вэ? Сайн мэдээнээс суралцах ямар дадал хэвшлийг та өнөөдөр эхлүүлж эсвэл дагахаар дахин шийдвэр гаргаж болох вэ? Та “Мэргэн, мунхаг хоёр” эсвэл “Бат бөх суурь” гэх мэт дуунуудыг хамтдаа дуулж, Есүс Христийн сайн мэдээний бат бөх суурин дээр амьдралаа барих талаар бодож болно.

Хүмүүс яагаад байшингаа шинэчлэн загварчилдаг талаар товчхон ярилц. Тэр ч байтугай байшингийн томоохон засварын зургийг харж болно. Гэр орноо үр дүнтэй шинэчлэхийн үр дагавар юу вэ? Ерөнхийлөгч Нэлсон сайн мэдээнээс сурах нь “гэр бүл болгон өөрсдийн гэр орныг итгэлийн ариун газар болгохын тулд хариуцлагатай бөгөөд анхааралтай үйлдэхээр хичээхэд гэр бүлүүдийг хүчирхэгжүүлэх боломжтой юм. Таныг гэр орноо сайн мэдээнээс суралцах төв болгон өөрчлөхөөр хичээнгүйлэн ажиллахад … танай хүүхдүүд Аврагчийн сургаалаас суралцаж, түүгээр амьдрахдаа баяртай байх болно. … Гэр бүлд тань мэдэгдэхүйц өөрчлөлтүүд гарч, тогтвортой үргэлжлэх болно” гэж заасан билээ. Гэр бүлийнхэнтэйгээ эсвэл хамт амьдардаг хүмүүстэйгээ харахыг хүсэж байгаа өөрчлөлтүүдийнхээ талаар ярилц. Та сайн мэдээнээс суралцах илүү сайн төв болгохын тулд гэр орноо хэрхэн “өөрчилж” болох вэ? Сайжруулсан мөн гэр оронд төвлөрсөн байдлаар сайн мэдээг судлах нь хэрхэн та бүхнийг хүчирхэгжүүлж чадах вэ? Хүссэн өөрчлөлтөө гаргахын тулд та юу хийж болох вэ? Мөн өсөлт хөгжлөө хэрхэн хэмжиж болох вэ?

Сургаал ба Гэрээнүүд 93:38–49; Мосе 6:57–62

Дэвин Ж.Дюррант, “Гэр орондоо заах нь баяр баясгалантай бөгөөд ариун нандин үүрэг хариуцлага юм,” 2018 оны 4-р сарын Ерөнхий чуулган, 53–58

Гэр орондоо сайн мэдээнээс суралцах нь (сайн мэдээг судлах эх сурвалжийн цуглуулга), ChurchofJesusChrist.org