Есүс Христийн Хоёр дахь ирэлт

Есүс Христийг эргэн ирэхэд дэлхий дээрх бүх ёс бус явдал төгсөх болно. Тэр цаг зарим хүний хувьд яагаад аймшигтай байх вэ? (Та Сургаал ба Гэрээнүүд 29:17-г уншиж, тунгаан бодож болно.) Аврагчийн Хоёр дахь ирэлт яагаад зөв шударга хүмүүст айдас төрүүлэхгүй байх вэ? (Та 1 Нифай 22:17, 22-ыг уншиж, тунгаан бодож болно.)

Есүсийг эздийн Эзэний хувиар дахин ирэх үед олон чухал үйл явдал болно. Та бүхэн дараах судрын хэсгүүдээс нэгийг эсвэл түүнээс олон хэсгийг судалж, удахгүй болох эдгээр үйл явдлын талаар юу сурснаа хуваалцаж болно. Үүнд: Матай 25:31–46; Сургаал ба Гэрээнүүд 29:9–11; 63:53–54; 76:50–54, 63; 88:96–98; 101:24–25; 133:19, 25; Итгэлийн тунхаг 1:10. Эдгээр үйл явдал Есүс Христийн талаар бидэнд юу зааж байна вэ?

Бяцхан Есүсийн зургийг хараад, үүнийг Түүний Хоёр дахь ирэлтийн зурагтай харьцуул. Та энэ хоёр зургийн зарим ялгааг ярихад тань тус болох “Есүс даруухан төрсөн” дууны шүлгийг унших юм уу дуулж болох юм. Эдгээр зураг болон энэ дуу нь бидэнд Есүс Христийн тухай юуг ойлгоход тусалж байна вэ?

“Есүс Христийн Хоёр дахь ирэлт” (3:02) видеог үзээд, Аврагчийн эргэн ирнэ гэдгийг онцолдог видеон дээр дурдсан зүйлсийн талаар ярилц. Видеон дээр Есүс Христийг эргэн ирэх үеийн Түүний байдлыг дүрслэхдээ ямар үгс ашигласан байна вэ? Эдгээр үг Түүний талаар бидэнд юу заадаг вэ? Та мөн “Израилын Гэтэлгэгч” эсвэл “Түүнийг дэлхийд дахин ирэхэд” гэх мэт Хоёр дахь ирэлтийн тухай дууллын үгсийг хамтдаа унших юм уу дуулж, энэ нь Аврагчийн тухай болон Түүний дэлхий дээр эргэн ирэх талаар юу зааж байгаа талаар ярилцаж болно.

Малахи 3:1; Лук 21:25–28; Үйлс 1:9–11; Сургаал ба Гэрээ 36:8

(Нийл Л.Андэрсэн, “Таны хаанчлал ирэх болтугай,” 2015 оны 4-р сарын Ерөнхий чуулган, 112)

Аврагчийг эргэн ирэхэд бидний бэлтгэх нэг арга зам бол Түүний Сүнс бидэнтэй хамт байж чадах газруудад байхыг хичээх явдал юм. “Иймийн тул, ариун газруудад зогсогтун та нар, мөн Их Эзэний өдөр ирэх хүртэл бүү хөдөл; учрыг болгоогтун, энэ нь даруй ирэх болой” хэмээн Их Эзэн эртний гэгээнтнүүдэд заасан. Яагаад та ариун газруудад байхыг Аврагчийн эргэн ирэхэд бэлтгэх сайн арга зам гэж бодож байна вэ? Ерөнхийлөгч Өүкс тайлбарлахдаа: “Тэдгээр ‘ариун газрууд’ гэж юу вэ? Тэдгээрт мэдээж ариун сүм болон ариун сүмийн гэрээнүүдээ итгэлтэй сахих явдал орно. Үүнд хүүхдүүдийг эрхэмлэн дээдэлж, эцэг эхчүүдийг хүндэлдэг гэр орон орох нь мэдээж. Ариун газруудад мэдээж санваарын удирдагчдаас өгсөн үүргээ, түүний дотор салбар, тойрог, гадаснууд дахь номлолын үүрэг болон дуудлагаа итгэлтэйгээр биелүүлэх нь орно.” Христэд төвлөрсөн үйл ажиллагаануудыг ариун газруудад явуулахад цаг заваа зориулснаар та хэрхэн адислагдаж байгаагаа бод. Эдгээр үйл ажиллагаа таныг Их Эзэнийг ирэхэд хэрхэн бэлтгэж байна вэ?

Иосеф Смит—Maтай 1-ийг уншаад, Хоёр дахь ирэлтийн өмнө тохиох үйл явдлуудын талаарх бошиглолуудыг хайж ол. Эдгээр үйл явдлыг мэдэх нь тэдгээрт бэлтгэхэд тань хэрхэн туслах вэ? Та гэр бүл эсвэл найз нөхдөдөө Хоёр дахь ирэлтэд бэлэн байхад мөн үүнд хөтлөх сорилтын үйл явдлуудад хэрхэн тусалж чадах вэ? Зөрчилдөөн, ядуурал, хилэнц үгүй болох Хоёр дахь ирэлтийн дараах амьдралд та зүрх сэтгэлээ хэрхэн бэлтгэж болох вэ? Аврагчийг эргэн ирэхэд та нарт ямар зан чанар байх нь чухал гэж бодож байна вэ? Эдгээр зан чанарыг хэрхэн хөгжүүлэх вэ? Хүлээн авсан мэдрэмжээ бичиж, үүнийхээ дагуу үйлд.

Их Эзэний сэргээгдсэн Сүмийн нэрийн тухай бод. “Хожмын үеийн гэгээнтэн” гэдэг нь та нарын хувьд юу гэсэн үг вэ? Та нар Аврагчид итгэх, Түүний ирнэ гэдэгт итгэх итгэл найдварынхаа талаар бусдад мэдүүлэхийн тулд өдөр тутмын яриандаа Сүмийн нэрийг хэрхэн түлхүү ашиглаж болох вэ?

Аврагч Өөрийг нь эргэн ирэхэд ямагт бэлэн байхын ач холбогдлыг бидэнд заахын тулд арван онгон охины тухай сургаалт зүйрлэлийг хуваалцсан (Maтай 25:1–13; Сургаал ба Гэрээнүүд 45:56–57-г үзнэ үү). Ахлагч Дэвид А.Бэднар энэ сургаалт зүйрлэлд дүрсэлсэн тосны талаар: “Энэхүү үнэт тосыг нэг удаад нэг дуслаар буюу ‘шат шатаар, дүрэм дүрмээр’ (2 Нифай 28:30) мөн тэвчээртэй, тууштай байж олж авдаг. Түүнийг олоход амархан товч зам гэж байхгүй; хамгийн сүүлийн мөчид гэнэт хичээн бэлдэх нь ч боломжгүй юм” гэж заасан. Есүс Христийн Хоёр дахь ирэлтэд бэлтгэхийн тулд бид хувь хүн болон гэр бүл, тойргоороо хийж болох зүйлсийн талаар ярилцах үедээ нэг удаад нэг дусал тосоор савыг дүүргэж болно.

Есүс Христийн Хожмын Үеийн Гэгээнтнүүдийн Сүмийн гишүүдийн хувьд “Түүний ирэлтээр Түүнийг хүлээн авахад бэлтгэгдсэн хүмүүсийг” цуглуулахад туслах онцгой бөгөөд бурханлаг үүрэг бидэнд бий. “Сүмийн ирээдүй: Аврагчийн Хоёр дахь ирэлтэд зориулан дэлхийг бэлтгэх нь” хэмээх ерөнхийлөгч Нэлсоны нийтлэлийг үз. Дараа нь Аврагчийг хүлээн авахад дэлхийг бэлтгэх гэдэг нь юу гэсэн утгатай талаар ярилц. Аврагч яагаад Өөрийнх нь ирэлтэд дэлхийг бэлтгэхээр хожмын үеийн гэгээнтнүүдийг томилсон гэж та бодож байна вэ? Бид үүнийг хэрхэн хийх вэ?

Зарим хүн Аврагчийн Хоёр дахь ирэлтийн өмнө тохиох үйл явдлуудын талаар бодох үедээ санаа зовох юм уу айж болох юм. Та нар хамтдаа дараах үгийг уншиж болно. “Аврагчийн ирэхэд бэлтгэх хамгийн сайн арга бол сайн мэдээг хүлээн авч, түүнийг амьдралынхаа нэг хэсэг болгох явдал. Бид Есүсийн дэлхий дээр байхдаа заасны дагуу өдөр бүр өөрсдийн чадах хамгийн сайнаар амьдрах ёстой. Бид бошиглогчийн удирдамжийг эрэлхийлж, Түүний зөвлөгөөг дагаж чадна. Бид Ариун Сүнс бидний чиглүүлэгч байхаар зохистой амьдрах хэрэгтэй. Тэгээд бид Аврагчийн ирэхийг ямар ч айдасгүй харин аз жаргалтайгаар хүсэн хүлээх болно.” Дараа нь эдгээр зөвлөгөө бүр нь сайн мэдээний дагуу илүү сайн амьдрахад бидэнд хэрхэн тусалж болох талаар ярилц. Ингэснээр бид Аврагчийн эргэн ирэхтэй холбоотой үйл явдлуудын талаар бодох үедээ тайван байж, амар амгаланг мэдэрч чадна.

Рассэлл М.Нэлсон, “Мормоны Ном, Израилын цугларалт ба Хоёр дахь ирэлт,” Лиахона, 2014 оны 7-р сар

Д.Тодд Кристоффэрсон, “Их Эзэнийг эргэн ирэхэд бэлтгэх нь,” 2019 оны 4-р сарын Ерөнхий чуулган, 99–101

Эйми А.Врайт, “Тэр өдрийг Христ дотор тэсэн гар,” Лиахона, 2023 оны 11-р сар, 9–12