Есүс Христ

Есүс Христийн тухай буюу Түүний хэн болох, бидний төлөө юу хийсэн, биднийг юу мэдээсэй, хийгээсэй гэж хүсдэг зэргийг мэдэхээс илүү чухал зүйл бидэнд байхгүй. Судрууд болон орчин үеийн бошиглогч, төлөөлөгчдийн сургаалууд бидний Аврагч, Гэтэлгэгчийн хувьд Түүний чухал үүргийг таньж мэдэхэд бидэнд тусалдаг.

Мөнх бус байдлын өмнөх дэлхийд Есүс Христ Тэнгэрлэг Эцэгийн бүх хүүхдийн Аврагч байхаар сонгогдсон гэдгийг бид судруудаас мэдэж авдаг (1 Петр 1:19–20; Абрахам 3:27-г үзнэ үү). Есүс Христ анхнаасаа л Түүний хүүхдүүдийг аварч, өргөмжлөхөд зориулсан Бурханы төлөвлөгөөг гүйцэлдүүлэх гол хүн нь байсаар ирсэн билээ. Есүс Христ Эцэгийн удирдлага доор тэнгэр, газрыг бүтээсэн (Мосе 1:32–33-ыг үзнэ үү). Хуучин Гэрээний үед Есүс Христийг агуу Иехова гэдгээр нь мэддэг байв. Тэрээр эртний бошиглогч, итгэгчдийг удирдан чиглүүлж байсан. Түүний хайр, нигүүлсэл сорилт бэрхшээлтэй үед тэднийг хүчирхэгжүүлж байсан.

Есүс Христ 2000 гаруй жилийн өмнө гайхамшигтайгаар төрж дэлхийд ирсэн юм. Тэрээр Израилын нутагт амьдарч, хүмүүсийн дунд тохинуулж байв. Тэрээр өвчтэй нэгнийг эдгээх, нас барагсдыг амилуулах зэрэг хүчит гайхамшгуудыг үйлдсэн билээ (Maтай 11:4–5-ыг үзнэ үү). Тэрээр Өөрийн Сүмийг байгуулж, Өөрийг нь дагах хүн бүхэнд наманчлал, нүглүүдийн өршөөл, мөнх амьдралын тухай заасан. Есүс Христ Эцэгтээ үргэлж дуулгавартай байж, төгс амьдралаар амьдарсан (2 Нифай 31:7-г үзнэ үү).

Есүс Христ Эцэгийн хүүхдүүдийг аврахаар дэлхийд ирсэн учраас тэдний нүглийн төлөөсийг өөрийн хүслээр Өөр дээрээ авсан. Олон зууны өмнө Исаиа: “Үнэхээр Тэр бидний сул дорой байдлыг тээж, өвчин зовлонг маань үүрчээ. … Гэмт үйлдлийн маань улмаас Тэр хатгагдан хилэнцийн маань улмаас Тэр бяцарч авай” (Исаиа 53:4–5) хэмээн бошиглосон байдаг. Есүсийн сүв бүрээс цус шүүрэхэд хүргэсэн асар их зовлон шаналлыг Тэрээр амссан (Лук 22:44; Сургаал ба Гэрээнүүд 19:15–20-ийг үзнэ үү). Түүнийг баривчилж, хилс хэргээр яллаж, цаазаар авах ял оноожээ. Түүнийг хэрцгийгээр загалмайд хадсан бөгөөд Тэрээр тэнд зовж шаналан, бидний төлөө амиа өгсөн (Maтай 27:50-ийг үзнэ үү). Гэвч Түүний үхэл төгсгөл байгаагүй юм. Есүс Христ булшнаас өндийж, амилсан бөгөөд дагалдагчдадаа тохинуулжээ (Лук 24:36–40; 3 Нифай 11:8–15-ыг үзнэ үү).

Өнөө үед Есүс Христийн Сүмийн гишүүд Түүнийг амласныхаа дагуу дэлхийд эргэн ирэхийг нь харуулдан хүлээж байна. Энэ нь хэзээ тохиохыг хэн ч мэдэхгүй (Сургаал ба Гэрээнүүд 49:7-г үзнэ үү), харин Түүний Хоёр дахь ирэлтийн өмнө тохиох тэмдгүүд болон үйл явдлуудын тухай судруудад өгүүлдэг. Их Эзэнийг эргэж ирэхэд дэлхий өөрчлөгдөж, Тэрээр зөв шударга хүмүүст бүх зүйлийг илчлэх болно (Сургаал ба Гэрээнүүд 101:23–34-ийг үзнэ үү).

Тэнгэрлэг Эцэг Өөрийнх нь Хүү болох Есүс Христийг хүлээн авах хүмүүст элбэг дэлбэг адислалуудыг бэлтгэсэн (Сургаал ба Гэрээнүүд 84:37–38-ыг үзнэ үү). Есүс Христ: “Хэрэв та нар надад ирэх аваас та нар мөнх амьдралыг авах болно. Болгоогтун, миний нигүүлслийн мутар та нарын зүг сунгаастай байна, мөн ирэх хэнийг боловч түүнийг би хүлээн авах болно” (3 Нифай 9:14) хэмээн тунхаглажээ. Бид Түүнд итгэж, нүглээ наманчилж, баптисм хүртэж, Бурханы зарлигуудыг дагаж, ариун сүмийн ариун нандин ёслолуудыг хүлээн авах үедээ Их Эзэний урилгыг хүлээн авах хүсэлтэй байгаагаа харуулдаг.

Бид итгэл, наманчлалаар Есүс Христэд даруухнаар хандах юм бол нүглүүдийнхээ ангижралыг хүлээн авч чадна (Мозая 4:2–3-ыг үзнэ үү). Есүс Христийн Цагаатгал нь мөн бидэнд “бурханлаг хүч буюу өнөө үеийн ачаа дарамт, саад бэрхшээл, уруу таталтуудыг даван туулах хангалттай хүч[тэй]” байх боломжийг олгодог. Есүс Христээс бидний хүлээн авсан хайр, нигүүлсэл, өршөөл бидний амьдралыг үүрд өөрчилж, Бурханы хүслийг биелүүлэхээр урагшлах хүч чадлыг бидэнд өгнө (Мозая 5:2; Хиламан 15:7–8-ыг үзнэ үү).