Profetët

Profeti Jozef Smith u thirr nga Perëndia për të predikuar ungjillin e rivendosur të Jezu Krishtit dhe për t’i ndihmuar fëmijët e Perëndisë të marrin ordinancat e priftërisë që nevojiten për shpëtimin dhe ekzaltimin. Pasuesit e tij, përfshirë Presidentin e Kishës sot, kanë marrë po atë autoritet dhe përgjegjësi për të vazhduar si përfaqësues të Zotit. Lexoni te Doktrina e Besëlidhje 107:91–92. Çfarë ju tregon ky fragment rreth rolit domethënës të profetit të Zotit në Kishën e Jezu Krishtit të Shenjtorëve të Ditëve të Mëvonshme?

Anëtarët e Kishës që kërkojnë të ndjekin shërbëtorët e zgjedhur të Zotit, bekohen. Ftojini anëtarët e grupit tuaj t’i krahasojnë të vërtetat që jepen mësim te Helamani 13:24–28 dhe tek 3 Nefi 12:1–2. Pse disa individë i respektojnë profetët e së shkuarës, por i hedhin poshtë profetët e gjallë? Çfarë bekimesh keni dalluar për shkak se kemi profetë dhe apostuj të gjallë në tokë sot?

Ezekiel 2:7; Lluka 1:70; 6:12–13; 1 Nefi 22:2; 3 Nefi 20:24; Doktrina e Besëlidhje 107:23

Rasëll M. Nelson, “Mbështetja e Profetëve”, Liahona, nëntor 2014, f. 74–76

Presidenti Rasëll M. Nelson shpjegoi: “Është pikërisht sepse [udhëheqësit e Kishës së Zotit] interesohe[n] thellësisht për të gjithë fëmijët e Perëndisë, që e shpalli[n] të vërtetën e Tij. Ne mund të mos u themi njerëzve gjithnjë atë që duan të dëgjojnë. Profetët rrallëherë admirohen në masë. Por ne gjithmonë do të japim mësim të vërtetën!” Kur ju ka ndihmuar gatishmëria për t’i mirëbesuar profetit të Zotit që ta dalloni vërtetësinë e mesazhit të tij?

Shkrimet e shenjta paralajmërojnë për profetë të rremë të cilët do të dalin në ditët e fundit dhe do të orvaten t’i mashtrojnë fëmijët e Perëndisë (shihni te Mateu 24:24). Zoti shpjegoi se Ai gjithnjë do t’i ngrejë profetët e Tij nëpërmjet modelit të themeluar që njihet në Kishë. Lexoni te Gjoni 10:1–2 dhe Doktrina e Besëlidhje 43:7. Çfarë do të thotë që shërbëtorët e Zotit do të hyjnë nga porta? Si ndihmon që ta shmangni mashtrimin, njohuria që zbulesa nga Perëndia gjithmonë vjen nëpërmjet kanaleve të njohura të priftërisë?

Lexojeni thënien në vijim nga Presidenti Rasëll M. Nelson me anëtarët e grupit tuaj: “Mbështetja e profetëve nga ana jonë është një zotim vetjak se ne vërtet do të bëjmë më të mirën për t’i përkrahur përparësitë e tyre profetike. Mbështetja jonë është një tregues [si] bet[im] se ne e pranojmë thirrjen e tyre si profetë që të jetë ligj[vënëse] dhe detyruese për ne.” Lexoni te Doktrina e Besëlidhje 107:22. Në çfarë mënyrash mund ta përkrahim Presidencën e Parë nëpërmjet “mirëbesimi[t], besimi[t] dhe lutje[ve]” tona?

Mateu 10:40; 3 Nefi 28:34; Doktrina e Besëlidhje 1:14; 112:20, 30–32

“Kapitulli 11: Ndiqni Profetin e Gjallë”, Mësime të Presidentëve të Kishës: Ezra Taft Benson (2014), f. 155–163

Apostulli Pal shpjegoi se apostujt dhe profetët janë themeli i Kishës (shihni tek Efesianëve 2:19–20). Lexoni tek Efesianëve 4:11–14. Si na ruajnë apostujt dhe profetët e Zotit që të mos të jemi “të lëkundur dhe të transportuar nga çdo erë doktrineje, nga mashtrimi i njerëzve, nga dinakëria e tyre”? (Vargu 14.)

Lexojeni thënien vijuese nga Plaku Nil L. Andersen me anëtarët e grupit tuaj:

“Disa e vënë në dyshim besimin e tyre, kur gjejnë një thënie të një udhëheqësi të Kishës dekada më parë, që duket në mospajtim [mospërputhje] me doktrinën tonë. Ekziston një parim i rëndësishëm që qeveris doktrinën e Kishës. Doktrina jepet mësim nga të 15 pjesëtarët e Presidencës së Parë dhe të Kuorumit të Të Dymbëdhjetëve. Ajo nuk fshihet në një paragraf të turbullt të një bisede. Parimet e vërteta mësohen shpesh e nga shumëkush. Doktrina jonë nuk është e vështirë për t’u gjetur.”

Ftojini anëtarët e grupit të diskutojnë se si mund t’i dallojmë parimet e vërteta të ungjillit dhe doktrinën zyrtare të Kishës.

Amos 3:7; Doktrina e Besëlidhje 124:125–126

Dallin H. Oaks, “The Sure Witness of Modern Prophets”, Liahona, tetor 2023, f. 5–7

D. Tod Kristoferson, “Doktrina e Krishtit”, Liahona, maj 2012, f. 86–89

Në Dhiatën e Vjetër ne lexojmë për Naamanin, një kapiten të ushtrisë së mbretit të Sirisë. Ai vuante nga një sëmundje që njihej si lebra. Ai mësoi se kishte një profet në Izrael, i cili kishte fuqinë për të shëruar, dhe Naamani udhëtoi për ta takuar (shihni te 2 Mbretërve 5:1–9). Studioni vargjet te 2 Mbretërve 5:10–14. Pse Naamani u acarua nga udhëzimet që iu dhanë nga profeti i Zotit? Çfarë ndodhi që e shtyu Naamanin t’ua vinte veshin më në fund fjalëve të profetit dhe të shërohej? Si mund ta zbatoni këtë tregim në vetë jetën tuaj?

Zgjedhja për ta ndjekur këshillën e profetëve të Zotit sjell siguri. Me anëtarët e grupit tuaj, lexojeni thënien vijuese nga Presidenti Henri B. Ajring:

“Zgjedhja për të mos [e] zbatuar këshillën profetike, e ndryshon vetë terrenin [mbi të cilin] qëndrojmë. Ai bëhet më i rrezikshëm. Mospranimi i këshillës profetike [e] zvogëlon fuqinë tonë për të marrë këshillë të frymëzuar në të ardhmen. …

Çdo herë në jetën time kur kam zgjedhur ta vonoj ndjekjen e këshillës së frymëzuar apo kur kam vendosur se bëja përjashtim, unë arrita të kuptoj se e kisha vënë veten në rrezik. Çdo herë që e kam dëgjuar këshillën e profetëve, e kam ndier të pohuar në lutje dhe pastaj e kam zbatuar, kam mësuar se isha në një gjendje të sigurt. Përgjatë shtegut, kam kuptuar se për mua ishte përgatitur rruga dhe se vendet e ashpra ishin zbutur. Perëndia më ka udhëhequr drejt sigurisë, nëpër një shteg që ishte përgatitur me kujdes të përzemërt, disa herë i përgatitur kohë më parë.”

Ftojini anëtarët e grupit të tregojnë mënyra se si mund të kenë marrë siguri dhe mbrojtje më të madhe për shkak se zgjodhën të ndiqnin këshillën e një profeti.

Isaia 55:8–9; Mormoni 9:7–9; Nenet e Besimit 1:9

M. Rasëll Ballard, “Perëndia Është në Timon”, Liahona, nëntor 2015, f. 24–27