Jezu Krishti

Asgjë nuk është më e rëndësishme për ne sesa të mësojmë rreth Jezu Krishtit, se kush është Ai, çfarë ka bërë për ne dhe çfarë do Ai që të dimë dhe të bëjmë. Shkrimet e shenjta dhe mësimet e profetëve dhe apostujve bashkëkohorë na ndihmojnë ta dallojmë rolin e Tij thelbësor si Shpëtimtari dhe Shëlbuesi ynë.

Ne mësojmë në shkrimet e shenjta se në botën para lindjes, Jezu Krishti u zgjodh të ishte Shpëtimtari për të gjithë fëmijët e Atit Qiellor (shihni te 1 Pjetër 1:19–20; Abraham 3:27). Prej fillimit fare, Jezu Krishti ka qenë figura kyç për përmbushjen e planit të Perëndisë për shpëtimin dhe ekzaltimin e fëmijëve të Tij. Nën drejtimin e Atit, Jezu Krishti krijoi qiejt dhe tokën (shihni te Moisiu 1:32–33). Gjatë kohës së Dhiatës së Vjetër, Jezu Krishti njihej si Jehova i Madh. Ai i udhërrëfeu dhe i drejtoi profetët dhe besimtarët në lashtësi. Dashuria dhe mëshira e Tij i forcuan ata gjatë sprovave të tyre.

Më shumë se 2 000 vjet më parë, Jezu Krishti erdhi në tokë përmes një lindjeje që qe mrekulli. Ai jetoi dhe dha shërbesë mes popullit në tokën e Izraelit. Ai kreu mrekulli të fuqishme, të tilla si shërimi i të sëmurëve dhe ringjallja e të vdekurve (shihni te Mateu 11:4–5). Ai themeloi Kishën e Tij dhe dha mësim doktrinën e pendimit, të faljes së mëkateve dhe të jetës së përjetshme për të gjithë ata që do ta ndiqnin Atë. Jezu Krishti bëri një jetë të përkryer, duke ecur gjithnjë me bindje ndaj Atit të Tij (shihni te 2 Nefi 31:7).

Për shkak se Jezu Krishti erdhi në tokë për të shpëtuar fëmijët e Atit, Ai me vullnet të lirë mori mbi Vete dënimin për mëkatet e tyre. Shekuj më parë, Isaia kishte profetizuar: “Megjithatë ai mbante sëmundjet tona dhe kishte marrë përsipër dhembjet tona. … Ai u tejshpua për shkak të shkeljeve tona, u shtyp për paudhësitë tona” (Isaia 53:4–5). Jezusi përjetoi agoni të tejskajshme, duke e bërë t’i dilte gjak nga çdo por (shihni te Lluka 22:44; Doktrina e Besëlidhje 19:15–20). Atë e arrestuan dhe e dënuan me akuza të rreme dhe i dhanë dënimin me vdekje. E gozhduan mizorisht në kryq, ku Ai vuajti dhe dha jetën për ne (shihni te Mateu 27:50). Por vdekja e Tij nuk ishte fundi. Jezu Krishti u ngrit nga varri dhe u dha shërbesë ndjekësve të Tij si një qenie e ringjallur (shihni te Lluka 24:36–40; 3 Nefi 11:8–15).

Sot, anëtarët e Kishës së Jezu Krishtit e presin me padurim kthimin e premtuar të Tij në tokë. Askush nuk e di kur do të ndodhë kjo (shihni te Doktrina e Besëlidhje 49:7), por shkrimet e shenjta flasin për shenja dhe ngjarje që do t’i paraprijnë Ardhjes së Tij të Dytë. Toka do të ndryshojë kur Zoti të kthehet dhe Ai do t’ua zbulojë të gjitha gjërat atyre që janë të drejtë (shihni te Doktrina e Besëlidhje 101:23–34).

Ati Qiellor ka përgatitur bekime të bollshme për ata që e pranojnë Birin e Tij, Jezu Krishtin (shihni te Doktrina e Besëlidhje 84:37–38). Jezu Krishti deklaroi: “Në qoftë se do të vini tek unë, ju do të keni jetën e përjetshme. Vini re, krahu im i mëshirës është shtrirë drejt jush dhe kushdo që do të vijë, unë do ta pranoj” (3 Nefi 9:14). Ne e tregojmë dëshirën për ta pranuar ftesën e Zotit për të ardhur tek Ai kur e vëmë besimin tonë tek Ai, pendohemi për mëkatet tona, pagëzohemi, i zbatojmë urdhërimet e Perëndisë dhe marrim ordinancat e shenjta të tempullit.

Kur i drejtohemi përulësisht Jezu Krishtit me besim dhe pendim, mund të marrim një heqje të mëkateve tona (shihni te Mosia 4:2–3). Shlyerja e Jezu Krishtit bën të mundur gjithashtu që të “[kemi] të drejtën e përdorimit të fuqisë së perëndishmërisë – fuqi e mjaftueshme për të përballuar barrët, pengesat dhe tundimet e kohës”. Dashuria, mëshira dhe falja që marrim nga Jezu Krishti, mund të bëjnë të ndodhë ndryshimi afatgjatë në jetën tonë dhe të na japë fuqinë për të ecur përpara duke bërë vullnetin e Perëndisë (shihni te Mosia 5:2; Helamani 15:7–8).