Librarya
Pagpasaylo

“Kapasayloan,” Mga Hilisgotan ug mga Pangutana (2023)

babaye nga nag-ampo

Giya sa Pagtuon sa Ebanghelyo

Pagpasaylo

Pagdawat og paglaom ug pagkaayo pinaagi ni Jesukristo

Ang pagpasaylo mao ang gasa sa Dios ngari kanato. Pinaagi sa atong Manluluwas, nga si Jesukristo, makadawat kita og kapasayloan kon kita maghinulsol. Usahay bation nato ang kabug-at sa pagtinguha og kapasayloan sa mga butang nga atong gibasolan. Apan kon biyaan nato ang atong mga sala ug makasinati og kausaban sa kasingkasing pinaagi sa gahom sa maulaong sakripisyo ni Jesukristo, makakaplag kita og pagkaayo, kalinaw, ug pagkabag-o nga pagbati sa hingpit nga kalipay.

Niini nga kinabuhi, makat-on usab kini sa paghatag og kapasayloan ngadto niadtong kinsa tingali nakapasakit o nakapasilo kanato. Ang pagpasaylo sa uban tingali lisod, ilabi na kon ang usa ka tawo nakapasamad nato og lawom. Apan pinaagi sa pagsunod sa sugo sa Ginoo sa pagpasaylo ug pinaagi sa pagsalig ni Jesukristo, makakaplag kita og kahupayan gikan sa kasakit ug makabaton og paglaom alang sa umaabot. Ang pagpasaylo sa uban makatabang usab nato sa pagpalambo og Kirstohanong mga hiyas aron kita mas makaandam sa pagdawat og kinabuhing dayon ug magpuyo kauban sa atong Langitnong Amahan sa makausa pa.

Unsa ang Kapasayloan?

Aron makadawat og kapasayloan kinahanglan ang atong mga sala og mga sayop—dako o gamay—mapasaylo sa hingpit. Kini nahimong posible pinaagi sa Pag-ula ni Jesukristo. Tungod kay Siya nag-antos alang sa atong mga sala, mahimo kitang malimpyo pag-usab samtang sinsero kitang maghinulsol ug magbaton og hugot nga pagtuo sa abilidad sa Manluluwas sa pag-ayo kanato. Pinaagi sa kaluoy sa Dios makabati kita og kalinaw, kalig-on, ug hingpit nga kalipay samtang atong biyaan ang atong mga sala. Ang Manluluwas misugo usab kanato sa pagpasaylo sa uban sama sa Iyang pagpasaylo kanato.

Kinatibuk-ang pagpasabot sa hilisgotan: Kapasayloan

May kalabotan nga mga giya sa pagkat-on sa ebanghelyo: Hugot nga Pagtuo diha ni Jesukristo, Paghinulsol, Bunyag, Paghukom, Gugma nga Putli

Seksiyon 1

Ang Ginoo Nagsaad og Kapasayloan Kon Kita Sinsero nga Maghinulsol sa Atong mga Sala

young adult nga lalaki

Ang Langitnong Amahan mihatag nato og mga sugo aron sa pagtabang nato nga magpabilin sa dalan sa pakigsaad ug mobalik sa pagpuyo uban Kaniya sa makausa pa. Pinaagi sa gasa sa kabubut-on, mopili kita sa pagsunod sa ehemplo sa atong Manluluwas ug motuman sa mga sugo sama sa Iyang gibuhat. Dayag lang, dili kita mahingpit sa pagtuman sa mga sugo—kasagaran makahimo kita og mga sayop tungod sa atong personal nga mga pakigbisog, mga kahuyang, ug mga tentasyon. Apan kon magpakita kita og hugot nga pagtuo diha ni Jesukristo ug sa Iyang maulaong sakripisyo, makabuntog kita sa atong mga sala ug mga kasaypanan. Makakaplag usab kita og kalinaw sa kahibalo nga ang Dios nagsaad og kapasayloan ngadto sa tanan kinsa maghinulsol ug motuman sa mga sugo (tan-awa sa 1 Juan 1:9; Doktrina ug mga Pakigsaad 1:31–32).

Kon kita maghinulsol ug nabunyagan ug nakompirmahan, madawat nato ang kapasayloan sa atong mga sala ug hatagan sa gasa sa Espiritu Santo (tan-awa sa Mga Buhat 2:38). Matag higayon nga moambit kita sa sakramento, mohimo kita og pakigsaad uban sa Ginoo ug mapasaylo ang atong mga sala pinaagi sa paghalad ngadto sa Ginoo og usa ka masulob-on nga kasingkasing ug mahinulsolon nga espiritu (tan-awa sa Moroni 6:1–4).

Pinaagi sa proseso sa paghinulsol, ang atong mga kasingkasing mausab ug magtinguha kita sa pagbuhat og maayo ug pagserbisyo sa uban (tan-awa sa Mosiah 5:2; Alma 36:24). Mobati kita og hingpit nga kalipay sa kaayo sa Dios ug maningkamot nga mapatunhay ang kapasayloan sa atong mga sala (tan-awa sa Mosiah 4:10–12, 26). Samtang sinserong kitang maghinulsol ug motuman sa atong mga pakigsaad, ug molahutay hangtod sa kataposan, kita mahimong mabalaan ug takos nga mobalik ngadto sa presensya sa atong Langitnong Amahan (tan-awa sa 3 Nephi 27:19–22).

Mga butang nga angayang hunahunaon

  • Ang katawhan ni Hari Benjamin napuno sa hingpit nga kalipay ug kalinaw sa ilang tanlag sa dihang nakadawat sila og kapasayloan sa ilang mga sala. Basaha ang Mosiah 4:1–3 ug pamalandongi kon sa usang paagi nga ang pagbutang sa inyong hugot nga pagtuo diha ni Jesukristo ug sa Iyang maulaong sakripisyo makahatag og hingpit nga kalipay ug kalinaw sa inyong kinabuhi. Aduna bay mga pamaagi nga kamo hingpit nga makahatag sa inyong kabubut-on ngadto sa Dios samtang biyaan ninyo ang inyong mga sala?

  • Sa dihang si Alma ang Batan-on nakabig ngadto sa ebanghelyo, wala na niya batia ang kasakit sa iyang kanhi nga mga sala (tan-awa sa Alma 36:12–14, 17–24). Ikonsiderar ang pagtan-aw niini nga bidyo ni Presidente Russell M. Nelson nga nagpasabot kon unsa ang dakong kausaban sa kasingkasing ug sa unsang paagi kita tinud-anay nga makabig ngadto sa ebanghelyo ni Jesukristo. Giunsa nimo sa pagpaningkamot nga makabig ngadto sa Ginoo? Sa unsa nga paagi nga ang inyong pagkakabig nakapanalangin sa inyong kinabuhi ug sa mga kinabuhi niadtong anaa sa inyong palibot?

Kalihokan alang sa pagkat-on kauban ang laing mga tawo

  • Kon magtinguha kita og kapasayloan, mangita kita og mga oportunidad nga motubo—bisan kausaban—pinaagi sa atong Manluluwas, nga si Jesukristo. Tan-awa ang time-lapse nga bidyo mahitungod sa pipila ka butang sa kinaiyahan nga miagi og kausaban, sama sa usa ka ulod nga nahimong usa ka kabakaba o usa ka liso nga nausab ngadto sa usa ka bulak. Hisgoti kon sa unsa nga paagi nga kita adunay potensyal nga mahimong usa ka maanindot nga butang pinaagi ni Jesukristo ug sa Iyang Pag-ula.

  • Si Presidente Nelson mitudlo nga kitang tanan kinahanglan nga maghinulsol ug nga kon buhaton nato kada adlaw, mahimo kitang labing maayong bersyon sa atong kaugalingon. Rebyoha ang iyang pakigpulong “Kita Makabuhat og Mas Maayo pa ug Mahimong mas Maayo,” ug hisgoti unsaon ninyo sa paghinulsol kada adlaw aron makaangkon og bag-ong panglantaw sa inyong kaugalingon, sa Dios ug sa kalibotan (tan-awa usab sa Giya ngadto sa mga Kasulatan, “Paghinulsol, Repentance,” Librarya sa Ebanghelyo).

Pagkat-on pa og dugang

Seksiyon 2

Ang Ginoo Nagsugo Kanato sa Pagpasaylo sa Uban

mga batan-ong lalaki nga nag-istoryahanay

Sa dihang si Kristo diha sa krus, gihangyo Niya ang Amahan sa pagpasaylo sa mga sundalo nga milansang Niya sa krus. Kining buhat sa gugma mao ang hingpit nga ehemplo sa pagpasaylo ug nagpahinumdom nato sa pagpasaylo sama sa Iyang gibuhat.

Atol sa Iyang mortal nga pangalagad, ang Manluluwas mitudlo kanato sa paghigugma sa atong mga kaaway ug sa “higugmaa ang inyong mga kaaway ug pag-ampo kamo alang sa mga tawo nga nagpasipala kaninyo” (Mateo 5:44). Tingali mobati kita nga imposible nga mag-ampo alang niadtong kinsa nakapasakit nato pag-ayo, apan ang pagbuhat sa ingon nagpakita sa Dios nga atong gibutang ang atong hugot nga pagtuo diha Kaniya. Si Presidente M. Russell Ballard mitudlo, “Ang pag-ampo nga sinsero alang niadtong tingali makonsiderar nga atong mga kaaway nagpakita sa atong pagtuo nga ang Dios makausab sa atong kasingkasing ug sa kasingkasing sa uban.”

Sa Doktrina ug mga Pakigsaad 64:8–11, makat-onan nato nga kon kita mopili nga dili mopasaylo, kita ang adunay mas dakong sala kay sa tawo nga nakahimog sayop kanato. Samtang itanyag nato ang pagpasaylo ngadto sa tanan, gipakita nato sa Dios nga dili lamang nga kita andam nga motuman sa Iyang mga sugo apan usab nga kita mosalig Kaniya sa pagbuhat unsa ang labing maayo alang sa Iyang mga anak.

Mga butang nga angayang hunahunaon

  • Sa pagpasidungog sa Pasko sa Pagkabanhaw niadtong 2023, si Presidente Nelson midapit sa tanang tawo sa tibuok kalibotan sa pagsinati sa milagro sa pagpasaylo. Siya miingon: “Ako mosaad nga samtang kamo mopasaylo, ang Manluluwas mohupay sa inyong kasuko, pagdumot, ug kasakit. Ang Prinsipe sa Kalinaw mohatag kaninyo og kalinaw.” Aduna bay pagdumot nga inyong gihambin o kasakit nga inyong gibati tungod kay nagduhaduha kamo sa pagpasaylo sa usa ka tawo? Ikonsiderar unsa nga mga lakang nga inyong mahimo sa pagpasaylo, ug pamalandongi sa unsa nga paagi nga ang Langitnong Amahan ug si Jesukristo mogiya kaninyo.

  • Samtang kita makugihon nga mag-ampo alang sa Iyang panabang, ang Manluluwas makahatag nato og kalig-on nga atong gikinahanglan sa pagpasaylo sa uban, bisan kon kini ingon og imposible. Si Presidente Nelson mitudlo: “Apan ang Manluluwas mohatag kaninyo sa abilidad sa pagpasaylo ni bisan kinsa nga miabusar kaninyo sa bisan unsa nga paagi. Dayon ang ilang masakit nga mga binuhatan dili na makadaot sa inyong kalag.” Palandonga kon sa unsang paagi nga ang kapasayloan mao ang gasa sa Manluluwas ngari kanato ug sa unsa nga paagi Siya mihimo niini nga posible alang ninyo nga mopasaylo kon kini morag wala nay kahimoan. Sa unang paagi nga ang paghunahuna og kapasayloan isip usa ka gasa makahatag ninyo og kalinaw?

Kalihokan alang sa pagkat-on kauban ang laing mga tawo

  • Usahay nagkinahanglan kini og sama nga kaisog sa pagpasaylo sama sa pagpangayo og kapasayloan. Hisgoti ang pipila ka ehemplo sa mga tawo kinsa mitanyag og kapasayloan sa malisod nga mga sirkumstansiya. Unsa nga mga panalangin ang moabot kon kita mopasaylo sa uban? Dapita ang tanan sa paghunahuna og usa ka tawo kinsa nasakitan o nasilo kanila sa pipila ka paagi ug sa pag-ampo alang niana nga indibidwal sa ilang kaugalingong panahon. Mahimo usab nga inyong isugyot nga mosulay sila sa pagserbisyo niana nga tawo kon kini angay alang sa ilang sitwasyon, ug dapita sila sa pagtan-aw kon nakapausab ba kini sa paagi sa ilang pagbati ngadto sa indibidwal.

  • Kon kita mohangyo sa Manluluwas sa paglig-on nato pinaagi sa Iyang maulaong sakripisyo, kita makadawat sa espirituhanong paglambo nga atong gikinahanglan sa pagpasaylo sa uban. Ipakita unsa ang paglambo—tingali pinaagi sa pagpakita og bidyo sa usa ka tren nga nagkakusog sa pagdagan o usa ka atleta nga naghimo og impresibo nga lihok. Basaha ang mga seksiyon sa pakigpulong ni Presidente Nelson, ug hisgoti kon sa unsang paagi nga ang Manluluwas makahatag nato og gahom sa pagpasaylo niadtong kinsa nakapasakit nato pag-ayo samtang atong tutokan ang espirituhanong paglambo.

Pagkat-on pa og dugang