Dashuria Hyjnore

Dashuria e përkryer e Jezu Krishtit ndikoi te secili prej veprimeve të Tij. Merrini parasysh këta shembuj: Mateu 26:39; Lluka 7:22; 1 Nefi 19:9. Si e tregon secili prej këtyre fragmenteve dashurinë e Krishtit për ne? Mund t’i krahasoni këta shembuj të dashurisë së Shpëtimtarit me përshkrimin e Palit për dashurinë hyjnore te 1 Korintasve 13. Si e ka treguar Shpëtimtari këtë lloj dashurie kundrejt jush?

Profeti Jozef Smith dha mësim: “Dashuria është një prej karakteristikave kryesore të Hyjnisë”. Merreni parasysh të shkruani në ditar fjalët: E di se Perëndia më do sepse … Gjatë gjithë javës, shkruani mënyra se si do ta përfundonit këtë fjali. Mund të lexoni ose të dëgjoni një këngë të tillë si “Per’ndia Ësht’ Dashuri” ose “Ati Im Qiellor më Do” për ide.

Merreni parasysh këtë mësim nga Plaku Xhefri R. Holland: “Urdhërimi i parë i madh i gjithë përjetësisë është që ta duam Perëndinë me të gjithë zemrën, fuqinë, mendjen dhe forcën tonë – ai është urdhërimi i parë i madh. Por e vërteta e parë e madh[e] e gjithë përjetësisë është që Perëndia na do me gjithë zemrën, fuqinë, mendjen dhe forcën e Tij.” Diskutoni se si njohuria për dashurinë e madhe të Perëndisë për ju mund ta ndryshojë mënyrën se si ndiheni, mendoni dhe veproni.

Të parit e materialit filmik “Charity: An Example of the Believers” [“Dashuria Hyjnore: Një Shembull për Besimtarët”] (4:50) mund të frymëzojë një diskutim rreth mënyrës se si dashuria si e Krishtit ta ndryshon jetën. Si i tregojnë të rejat në këtë material filmik dashuri si ajo e Krishtit nxitëses së re të tifozëve? Si ndikoi kjo dashuri tek ajo? Si ndikoi tek të rejat e tjera? Mendoni për njerëzit përreth vetes të cilët mund të kenë nevojë të ndiejnë dashurinë e Shpëtimtarit. Bisedoni rreth mënyrave se si mund t’i jepni dashuri si ajo e Krishtit njërit ose dy prej tyre.

Lluka 10:30–37; 1 Gjon 3:16–18; 4:7–11, 18–19

Alan T. Filips, “Perëndia Ju Njeh dhe Ju Do”, Liahona, nëntor 2023, f. 49–52

Majkëll T. Ringud, “Sepse Perëndia na Deshi aq Shumë”, Liahona, maj 2022, f. 88–90

Suzën H. Porter, “Dashuria e Perëndisë: Më e Gëzueshmja për Shpirtin”, Liahona, nëntor 2021, f. 33–35

Lexoni te 1 Korintasve 13:1–7 duke përfytyruar veten në këto vargje. Më pas lexoni vargun 8. Çfarë do të thotë për ju që “dashuria [hyjnore] nuk lig[ë]shtohet kurrë”? Merreni parasysh a ka ndonjë cilësi të renditur te vargjet 4–7 për të cilën mund të punoni, që t’ju ndihmojë të jeni një shembull më i mirë i dashurisë hyjnore.

Ndërkohë që dashuria hyjnore është një dhuratë nga Perëndia, si çdo dhuratë, duhet që ta pranojmë. Çfarë mësoni nga Moroni 7:48; 8:26 rreth mënyrës se si ta pranoni dhuratën e dashurisë hyjnore?

Presidenti Rasëll M. Nelson na mësoi këto të vërteta të rëndësishme për dashurinë hyjnore: “Dashuria hyjnore është kundërhelmi ndaj grindjes. Dashuria hyjnore është dhurata shpirtërore që na ndihmon ta largojmë nga vetja njeriun e natyrshëm, që është egoist, vetëshfajësues, kryelartë dhe xheloz. Dashuria hyjnore është karakteristika kryesore e një pasuesi të vërtetë të Jezu Krishtit. Dashuria hyjnore e përcakton një paqebërës.” Ndërsa i përsiatni fjalët e Presidentit Nelson, çfarë ju frymëzon Shpirti të bëni? Merreni parasysh ta vendosni thënien e Presidentit Nelson diku ku do ta shihni shpesh si një kujtues për të treguar dashuri hyjnore për të tjerët.

Si e identifikoni një ndjekës të Jezu Krishtit? Shpëtimtari Vetë dha mësim: “Prej kësaj do t’ju njohin të gjithë që jeni dishepujt e mi, nëse keni dashuri për njëri-tjetrin” (Gjoni 13:35). Si grup, mendoni rreth njerëzve që i admironi, të cilët janë shembuj të vërtetë të dashurisë hyjnore. Në ç’mënyrë i keni parë ata të tregojnë dashurinë e pastër të Krishtit? Merreni parasysh t’i dërgoni një mesazh në telefon ose t’i shkruani një pusullë njërit prej këtyre njerëzve dhe t’i tregoni atë që admironi rreth tij ose saj.

Bisedoni rreth disa zgjedhjeve të rëndësishme që bëni çdo ditë. Më pas lexoni pjesën “Duajeni Perëndinë, duajeni të afërmin tuaj” te Për Forcën e Rinisë: Një Udhëzues për Bërjen e Zgjedhjeve ([2022], f. 10–15). Diskutoni për mënyrën se si dhurata e dashurisë hyjnore mund të jetë një udhërrëfyes ndërsa e bëni secilën prej atyre zgjedhjeve.

Merreni parasysh këtë këshillë nga Presidenti Diter F. Uhtdorf: “Çfarëdo problemesh që po i has familja juaj, çfarëdo që duhet të bëni për t’i zgjidhur ato, fillimi dhe fundi i zgjidhjes është dashuria hyjnore, dashuria e pastër e Krishtit”. Punoni së bashku për të bërë një listë të disa problemeve ose sfidave me të cilat individët ose familjet përballen sot, të tilla si grindja ose zilia. Më pas mund të lexoni te Moroni 7:45 dhe të bisedoni rreth mënyrës se si mund të ndihmojnë për t’i zgjidhur problemet në listën tuaj cilësitë e dashurisë hyjnore që përshkruhen në këtë varg. Më pas mund të bëni një plan të thjeshtë për ta zbatuar dashurinë hyjnore që t’ju ndihmojë të zgjidhni njërin nga problemet. Përfshijeni Perëndinë në planin tuaj dhe kërkoni ndihmë nga të tjerët si të jetë e përshtatshme.

2 Nefi 26:30; Doktrina e Besëlidhje 121:45–46

Rasëll M. Nelson, “Kërkohen Paqebërës”, Liahona, maj 2023, f. 98–101

Ulises Soares, “Ndjekës të Princit të Paqes”, Liahona, maj 2023, f. 85–87

Xh. Enet Denis, “Zgjedha e Tij Është e Ëmbël dhe Barra e Tij Është e Lehtë”, Liahona, nëntor 2022, f. 80–82

Marvin J. Ashton, “The Tongue Can Be a Sharp Sword”, Ensign, maj 1992, f. 18–20

“Dashuria Hyjnore, Dashuria e Pastër e Krishtit”, Mësimet e Presidentëve të Kishës: Jozef Smith (2009), f. 451–463