Мормоны Ном

Есүс Христийн Хожмын Үеийн Гэгээнтнүүдийн Сүмийн гишүүд Библийг ариун судруудын ном гэж үздэг. Хуучин Гэрээ, Шинэ Гэрээ хоёр хоёул Есүс Христийг гэрчилдэг бөгөөд Бурханы хүүхдүүдийн авралыг гүйцэлдүүлэх Түүний ажлын гэрч юм. Мормоны Номыг Америк дахь Бурханы бошиглогчид бичсэн бөгөөд энэ нь Есүс Христийн бас нэгэн гэрээ болдог. Мормоны Ном нь “Есүс Христийн сайн мэдээний бүрэн байдлыг” агуулдаг бөгөөд Библид гардаг Есүс Христ болон Түүний бошиглогчдын тухай түүхүүд үнэн гэдгийг дэлхийд баталдаг (Сургаал ба Гэрээнүүд 20:8–12-ыг үзнэ үү). Библитэй хамт Мормоны Ном нь хүмүүст Бурханы төлөвлөгөөний талаар илүү тодорхой ойлголттой болоход тусалдаг бөгөөд тэднийг Есүс Христийг дагахад бэлтгэдэг (Езекиел 37:15–17; 2 Нифай 3:12-ыг үзнэ үү).

Мормоны Ном нь өнөө үед Бурханы хүмүүст агуу адислал болдог. Энэ нь Есүс Христийн үгсийг агуулдаг (2 Нифай 33:10-ыг үзнэ үү). Ерөнхийлөгч Рассэлл М.Нэлсон ийн тайлбарласан.

“[Мормоны Ном] амьдралын хамгийн чухал асуултуудын хариултыг агуулдаг. Энэ нь Христийн сургаалыг заадаг. Үүнд хэдэн зууны туршид мөн Библийн олон тооны орчуулгаас алдагдсан ‘агуу хийгээд эрхэм’ [1 Нифай 13:29–33-ыг үзнэ үү] үнэний олныг дэлгэрүүлэн тодорхойлдог.

Мормоны Ном Есүс Христийн Цагаатгалын тухай өөр хаа ч олдохгүй хамгийн бүрэн дүүрэн бөгөөд эрх мэдэл бүхий ойлголтыг өгдөг. … Есүс Христийн сайн мэдээний бүрэн хүч Мормоны Номд байдаг. Үнэхээр байдаг.”

Мормоны Номыг Бурханы бэлэг болон хүчээр гаргаж ирсэн. Уг номыг анх эртний Америкийн бошиглогчид төмөр ялтаснууд дээр тэмдэглэсэн байдаг. Эдгээрийг олон зууны турш Америкийн Нэгдсэн Улсын Нью-Йорк мужийн Иосеф Смитийн гэрийн ойролцоо булсан бөгөөд тэнгэр элч Моронай тэдгээрийг хаанаас олохыг Иосеф Смитэд үзүүлжээ. Уг цэдгийг орчуулах зэмсэг болох Урим ба Туммим нь ялтаснууд болон эртний бусад олдворын хамт хадгалагдсан байв (Иосеф Смит—Түүх 1:30–35-ыг үзнэ үү).

Иосеф Смит дөнгөж 23-тай, бага ангийн боловсролтой байсан хэдий ч Мормоны Номыг англи хэл рүү өдөрт найман хуудас орчуулдаг байв. Тэрээр эртний хэлний талаар ямар ч ойлголтгүй байсан ба ямар ч тэмдэглэл ашигладаггүй байв. Тэрээр 85 орчим хоногийн дотор уг номыг бүхэлд нь орчуулж дуусгасан. Хүмүүс түүнээс хэрхэн орчуулж чадсаныг асуухад, энэ нь “Бурханы бэлэг болон хүчээр” (Мормоны Номын нүүр хуудас; мөн Russell M. Nelson, “A Treasured Testament,” Ensign, July 1993-ыг үзэ үү) хийгдсэн гэдгийг Иосеф энгийнээр хэлжээ.

1830 онд Сүм зохион байгуулагдахаас хэдхэн хоногийн өмнө Мормоны Ном англи хэл дээр хэвлэгдсэн юм (Church History Topics, “Printing and Publishing the Book of Mormon,” Gospel Library-г үзнэ үү). Өнөөдөр Мормоны Ном 100 гаруй хэлээр орчуулагдан дэлхий даяар хэрэглэгдэж байна.

Есүс Христийн шавь болох нь насан туршийн үйл явц юм. Бидний хүн нэг бүр Тэнгэрлэг Эцэг, Есүс Христ хоёр луу эргэн очих сүнслэг замын өөр өөр хэсэгт байгаа. Гэхдээ та хаана ч байсан Мормоны Ном тэдэнд илүү ойртоход тань тусалж чадна. Бурханы үг хөрвүүлэх хүчээр дүүрэн (Алма 5:7; 31:5-ыг үзнэ үү). Мормоны Ном таныг дэлхийн худал хуурмагаас зайлсхийхэд тусалж, сүнслэг аюулгүй байдал руу хөтлөх болно (1 Нифай 15:24; Хиламан 3:29–30-ийг үзнэ үү).

Мормоны Номын ач холбогдлын улмаас Есүс Христийн Хожмын Үеийн Гэгээнтнүүдийн Сүмийн бүх гишүүн Мормоны Ном үнэн гэдгийг өөрсдөө олж мэдэхээр эрэлхийлэх хэрэгтэй гэдгийг Их Эзэний үйлчлэгчид онцолсон юм. Мормоны Номын удиртгал хэсэгт “Биднийг Мормоны Номыг уншиж, агуулдаг захиасыг нь зүрх сэтгэлдээ тунгаан бодоод, энэ ном үнэн үү гэдгийг Мөнхийн Эцэг Бурханаас Христийн нэрээр асуухад урьдаг. Энэ замыг сонгож, итгэлээр асуусан хүмүүс энэхүү ном үнэн бөгөөд бурханлаг чанартай гэсэн гэрчлэлийг Ариун Сүнсний хүчээр олж авах болно (Moронай 10:3-5-ыг үзнэ үү)” хэмээн дурдсан байдаг.