« ព្រះគម្ពីរមរមន » ប្រធានបទ និង សំណួរ ( ឆ្នាំ២០២៣ )
មគ្គុទ្ទេសក៍សិក្សាដំណឹងល្អ
ព្រះគម្ពីរមរមន
សក្ខីបទមួយទៀតអំពីព្រះយេស៊ូវគ្រីស្ទ
ព្យាការីបុរាណបានសរសេរព្រះគម្ពីរមរមនសម្រាប់មនុស្សនៅជំនាន់របស់យើង ។ ដោយជាដៃគូនឹងព្រះគម្ពីរប៊ីប នោះព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។ អស់អ្នកដែលអាន និងសិក្សាព្រះគម្ពីរនេះដោយស្មោះសរ នឹងទទួលអារម្មណ៍នៃព្រះវិញ្ញាណបរិសុទ្ធ ហើយរកឃើញនូវចម្លើយចំពោះសំណួរសំខាន់ៗជាច្រើននៃជីវិត ។ តាមរយៈការអានព្រះគម្ពីរមរមន មនុស្សអាចរៀនដោយខ្លួនឯងថាព្រះមានព្រះជន្មរស់ ថាទ្រង់ស្រឡាញ់ពួកគេ ហើយថាដំណឹងល្អរបស់ព្រះយេស៊ូវគ្រីស្ទត្រូវបានស្ដារឡើងវិញនៅលើផែនដីនេះ ។
ព្យាការីសម័យទំនើបតែងតែអញ្ជើញសមាជិកសាសនាចក្រឲ្យសិក្សាព្រះគម្ពីរមរមនជាប្រចាំ ។ ឧទាហរណ៍ ប្រធាន រ័សុល អិម ណិលសុន បានប្រកាសថា ៖ « ខ្ញុំសូមសន្យាថា ពេលបងប្អូនសិក្សាព្រះគម្ពីរមរមនរាល់ថ្ងៃប្រកបដោយការអធិស្ឋាន នោះបងប្អូននឹងធ្វើការសម្រេចចិត្តដែលប្រសើរជាង—រៀងរាល់ថ្ងៃ ។ ខ្ញុំសូមសន្យាថា ពេលបងប្អូនជញ្ជឹងគិតនូវអ្វីដែលបងប្អូនសិក្សា នោះបង្អួចស្ថានសួគ៌នឹងបើកឡើង ហើយបងប្អូននឹងទទួលចម្លើយចំពោះសំណួរផ្ទាល់ខ្លួន និងការដឹកនាំសម្រាប់ជីវិតរបស់បងប្អូនផ្ទាល់ ។ ខ្ញុំសូមសន្យាថា ពេលបងប្អូនសិក្សាព្រះគម្ពីរមរមនរាល់ថ្ងៃ នោះបងប្អូនអាចត្រូវបានការពារឲ្យផុតពីអំពើអាក្រក់នៃថ្ងៃនោះ » ។
តើអ្វីជាព្រះគម្ពីរមរមន ?
ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ គឺជាគម្ពីរនៃព្រះគម្ពីរដ៏បរិសុទ្ធ ។ ព្រះគម្ពីរនេះមាននូវការសរសេររបស់ព្យាការីសម័យបុរាណ ដែលរស់នៅក្នុងអឌ្ឍគោលខាងលិច ។ ក្នុងនាមជាព្យាការីនៃការស្ដារឡើងវិញ យ៉ូសែប ស្ម៊ីធ បានបកប្រែព្រះគម្ពីរមរមនដោយអំណោយទាន និងព្រះចេស្ដានៃព្រះ ( សូមមើល គោលលទ្ធិ និងសេចក្ដីសញ្ញា ១៣៥:៣ ) ។ ព្រះគម្ពីរមរមនអមជាមួយនឹងព្រះគម្ពីរប៊ីប ថ្លែងទីបន្ទាល់អំពីព្រះយេស៊ូវគ្រីស្ទ ហើយមាននូវភាពពេញលេញនៃដំណឹងល្អ ( សូមមើល អេសេគាល ៣៧:១៥–១៧; គោលលទ្ធិ និងសេចក្ដីសញ្ញា ២០:៨–៩ ) ។ ព្រះគម្ពីរមរមនក៏ជាសាក្សីអំពីការហៅជាព្យាការីរបស់យ៉ូសែប ស្ម៊ីធ និងការស្ដារឡើងវិញនៃដំណឹងល្អផងដែរ ។
ទិដ្ឋភាពទូទៅនៃប្រធានបទ ៖ ព្រះគម្ពីរមរមន
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្រះគម្ពីរ ព្រះគម្ពីរប៊ីប យ៉ូសែប ស្ម៊ីធ ការស្តារឡើងវិញនៃដំណឹងល្អ
ផ្នែកទី ១
ព្រះគម្ពីរមរមនថ្លែងទីបន្ទាល់ថាព្រះយេស៊ូវគ្រីស្ទគឺជាព្រះប្រោសលោះនៃពិភពលោក
សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ចាត់ទុកព្រះគម្ពីរប៊ីបថាជាព្រះគម្ពីរបរិសុទ្ធ ។ ទាំងព្រះគម្ពីរសញ្ញាចាស់ និងព្រះគម្ពីរសញ្ញាថ្មី គឺជាសាក្សីនៃព្រះយេស៊ូវគ្រីស្ទ និងនៃកិច្ចការរបស់ទ្រង់ក្នុងការនាំមកនូវសេចក្ដីសង្គ្រោះដល់បុត្រាបុត្រីរបស់ព្រះ ។ ព្រះគម្ពីរមរមនត្រូវបានសរសេរដោយពួកព្យាការីរបស់ព្រះនៅទ្វីបអាមេរិក និងឈរជាសក្ខីបទមួយទៀតអំពីព្រះយេស៊ូវគ្រីស្ទ ។ ព្រះគម្ពីរមរមនរួមបញ្ចូលនូវ « ភាពពេញលេញនៃដំណឹងល្អរបស់ព្រះយេស៊ូវគ្រីស្ទ » ហើយបញ្ជាក់ទៅកាន់ពិភពលោកថាដំណើររឿងរបស់ព្រះយេស៊ូវគ្រីស្ទ និងពួកសិស្សរបស់ទ្រង់ដែលមានក្នុងព្រះគម្ពីរប៊ីបគឺជាការពិត ( សូមមើល គោលលទ្ធិ និងសេចក្ដីសញ្ញា ២០:៨–១២ ) ។ អមជាមួយនឹងព្រះគម្ពីរប៊ីប ព្រះគម្ពីរមរមនជួយមនុស្សឲ្យមានការយល់ដឹងកាន់តែច្បាស់អំពីផែនការរបស់ព្រះ និងរៀបចំពួកគេឲ្យដើរតាមព្រះយេស៊ូវគ្រីស្ទ ( សូមមើល អេសេគាល ៣៧:១៥–១៧; នីហ្វៃទី២ ៣:១២ ) ។
ព្រះគម្ពីរមរមនគឺជាពរជ័យដ៏អស្ចារ្យសម្រាប់រាស្ដ្ររបស់ព្រះនាសព្វថ្ងៃនេះ ។ ព្រះគម្ពីរនេះមាននូវព្រះបន្ទូលនៃព្រះយេស៊ូវគ្រីស្ទ ( សូមមើល នីហ្វៃទី២ ៣៣:១០ ) ។ ប្រធាន រ័សុល អិម ណិលសុន បានពន្យល់ ៖
« [ ព្រះគម្ពីរមរមន ] មាននូវចម្លើយសម្រាប់សំណួរពិបាកៗបំផុតក្នុងជីវិត ។ វាបង្រៀននូវគោលលទ្ធិនៃព្រះគ្រីស្ទ ។ វាពង្រីក ហើយបញ្ជាក់អំពីសេចក្ដីពិត ‹ ដ៏ច្បាស់ និងពិសេសៗ › [ សូមមើល នីហ្វៃទី១ ១៣:២៩–៣៣ ] ជាច្រើនដែលបានបាត់បង់អស់ជាច្រើនសតវត្សរ៍ និងតាមរយៈការបកប្រែដ៏ច្រើននៃព្រះគម្ពីរប៊ីប ។
« ព្រះគម្ពីរមរមនផ្ដល់នូវការយល់ដឹងពេញលេញ ហើយមានអំណាចបំផុតអំពីដង្វាយធួនរបស់ព្រះយេស៊ូវគ្រីស្ទដែលអាចរកឃើញគ្រប់ទីកន្លែង ។ … អំណាចពេញលេញនៃដំណឹងល្អនៃព្រះយេស៊ូវគ្រីស្ទមាននៅក្នុងព្រះគម្ពីរមរមន ។ ពិតណាស់ » ។
រឿងទាំងឡាយដែលត្រូវពិចារណា
-
យ៉ូសែប ស៊្មីធ បានបង្រៀនថា ព្រះគម្ពីរមរមនគឺជា « មូលដ្ឋាននៃសាសនារបស់យើង » ( សូមមើល Teachings of Presidents of the Church: Joseph Smith ( ឆ្នាំ២០១១ ) ទំព័រ៦៤ ) ។ នៅក្នុងផ្នែកស្ថាបត្យកម្ម សិលាគន្លឹះគឺជាថ្មដែលមានរាងស្រួចនៅគែមៗនៅកណ្ដាលនៃកំណោងទ្រសំណង់ ដែលភ្ជាប់ថ្មផ្សេងទៀតឲ្យនៅជាប់នឹងគ្នា ហើយការពារមិនឲ្យកំណោងទ្រនោះរលំ ។ ដូចជាសិលាគន្លឹះនៃសំណង់ស្ថាបត្យកម្មដែរ ព្រះគម្ពីរមរមនគឺជាផ្នែកដ៏សំខាន់ចំពោះជំនឿរបស់យើងលើព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ ។ តើទីបន្ទាល់របស់អ្នកអំពីព្រះគម្ពីរមរមន បានមានឥទ្ធិពលលើទីបន្ទាល់របស់អ្នកចំពោះផ្នែកផ្សេងទៀតនៃដំណឹងល្អយ៉ាងដូចម្ដេច ?
សកម្មភាពសម្រាប់ការរៀនសូត្រជាមួយអ្នកដទៃ
-
សារលិខិតចម្បងនៃព្រះគម្ពីរមរមនគឺថាព្រះយេស៊ូវគឺជាព្រះគ្រីស្ទ ។ សូមអញ្ជើញសមាជិកនៃក្រុមរបស់អ្នកឲ្យអាន ទំព័រចំណងជើងនៃព្រះគម្ពីរមរមន ដោយផ្ដោតជាពិសេសលើកថាខណ្ឌទីពីរ ។ តើទំព័រចំណងជើងសង្កត់ធ្ងន់លើសារៈសំខាន់នៃព្រះគម្ពីរមរមនតាមរបៀបណា ? បទគម្ពីរខាងក្រោមក៏អាចមានប្រយោជន៍ផងដែរ ៖ នីហ្វៃទី១ ៦:៤; យ៉ាកុប ១:៧;អោមណៃ ១:២៦; នីហ្វៃទី៣ ១១:១៣–១៧; មរ៉ូណៃ ១០:៣២–៣៣ ។ ហេតុអ្វីបានជាវាសំខាន់ក្នុងការជួយអ្នកដទៃឲ្យយល់ថា គោលបំណងនៃព្រះគម្ពីរមរមនគឺដើម្បីថ្លែងជាសាក្សីថាព្រះយេស៊ូវ គឺជាព្រះគ្រីស្ទ ?
ស្វែងយល់បន្ថែមទៀត
-
នីហ្វៃទី២ ២៩:១–១៣; ៣៣:១០–១៥ គោលលទ្ធិ និងសេចក្ដីសញ្ញា ៤២:១២; យ៉ូសែប ស៊្មីធ—ប្រវត្តិ ១:៣៤; មាត្រានៃសេចក្តីជំនឿ ១:៨
-
ប្រធាន រ័សុល អិម ណិលសុន « The Book of Mormon: What Would Your Life Be Like without It? » Liahona ខែវិច្ឆិកា ឆ្នាំ២០១៧ ទំព័រ ៦០–៦៣
-
« Chapter 9: The Book of Mormon—Keystone of Our Religion » Teachings of Presidents of the Church: Ezra Taft Benson ( ឆ្នាំ២០១៤ ) ទំព័រ ១២៥–១៣៤
ផ្នែកទី ២
ការលេចចេញមកនៃព្រះគម្ពីរមរមនគឺជាអព្ភូតហេតុ
ព្រះគម្ពីរមរមនត្រូវបាននាំយកមកដោយអំណោយទាន និងព្រះចេស្ដានៃព្រះ ។ ព្រះគម្ពីនេះត្រូវបានកត់ត្រាដំបូងដោយពួកព្យាការីអាមេរិកកាលពីបុរាណ នៅលើផ្ទាំងចំណារដែក ។ អស់រយៈពេលជាច្រើនសតវត្សរ៍ ផ្ទាំងចំណារទាំងនោះត្រូវបានកប់នៅក្បែរផ្ទះរបស់យ៉ូសែប ស្ម៊ីធ នៅភាគខាងលើនៃរដ្ឋញូវយ៉ក នៅសហរដ្ឋអាមេរិក រហូតដល់ពេលដែលសារទូតនៃស្ថានសួគ៌គឺមរ៉ូណៃ បានបង្ហាញ យ៉ូសែប ស្ម៊ីធ ពីទីកន្លែងដើម្បីស្វែងរកផ្ទាំងចំណារទាំងនោះ ។ ឧបករណ៍សម្រាប់បកប្រែកំណត់ត្រាមានយូរីម និងធូមីម ក៏ត្រូវបានរក្សាទុកជាមួយផ្ទាំងចំណារទាំងនេះ រួមជាមួយនឹងវត្ថុបុរាណផ្សេងទៀតផងដែរ ( សូមមើល យ៉ូសែប ស៊្មីធ—ប្រវត្ដិ ១:៣០–៣៥ ) ។
ទោះបីជាយ៉ូសែប ស្ម៊ីធ មានអាយុត្រឹមតែ ២៣ឆ្នាំ និងទទួលបានការសិក្សាអប់រំជាផ្លូវការតិចតួចក្ដី ក៏លោកបានបកប្រែព្រះគម្ពីរមរមនជាភាសាអង់គ្លេស នៅក្នុងកម្រិតមួយគឺ ប្រាំបីទំព័រក្នុងមួយថ្ងៃ ។ លោកមិនមានការយល់ដឹងអំពីភាសាបុរាណទេ ហើយលោកក៏មិនប្រើប្រាស់កំណត់ចំណាំអ្វីដែរ ។ លោកបានបញ្ចប់ការបកប្រែព្រះគម្ពីរទាំងមូលក្នុងរយៈពេលប្រមាណជា ៨៥ ថ្ងៃ ។ នៅពេលដែលមនុស្សសួរថា តើលោកអាចបកប្រែបានយ៉ាងដូចម្តេច យ៉ូសែបបាននិយាយយ៉ាងសាមញ្ញថាវាត្រូវបានធ្វើឡើង « ដោយអំណោយទាន និងអំណាចនៃព្រះ » ( ទំព័រចំណងជើងនៃព្រះគម្ពីរមរមន សូមមើលផងដែរ រ័សុល អិម ណិលសុន « A Treasured Testament » Ensign ខែកក្កដា ឆ្នាំ១៩៩៣ ) ។
ព្រះគម្ពីរមរមនត្រូវបានបោះពុម្ពជាភាសាអង់គ្លេសតែប៉ុន្មានថ្ងៃប៉ុណ្ណោះ មុនពេលការរៀបចំសាសនាចក្រនៅឆ្នាំ១៨៣០ ( សូមមើល ប្រធានបទប្រវត្តិសាសនាចក្រ « Printing and Publishing the Book of Mormon » បណ្ណាល័យដំណឹងល្អ ) ។ នៅសព្វថ្ងៃនេះ ព្រះគម្ពីរមរមនត្រូវបានបកប្រែទៅជាង ១០០ ភាសា ហើយត្រូវបានប្រើប្រាស់នៅទូទាំងពិភពលោក ។
រឿងទាំងឡាយដែលត្រូវពិចារណា
-
យ៉ូសែប ស៊្មីធ ត្រូវបានបញ្ជាឲ្យការពារផ្ទាំងចំណារដោយប្រុងប្រយ័ត្ន ។ ក្នុងអំឡុងដំណើរការនៃការបកប្រែ មានមនុស្សពីរបីនាក់ដែលពិតជាបានឃើញផ្ទាំងចំណារទាំងនេះ ។ ទោះជាយ៉ាងនេះក្ដី យ៉ូសែប ស៊្មីធ ត្រូវបានប្រាប់ឲ្យបង្ហាញផ្ទាំងចំណារទាំងនោះដល់សហការីជិតស្និទ្ធរបស់លោក ។ មនុស្សទាំងនេះត្រូវបានគេស្គាល់ជាផ្លូវការថាជា « ពួកសាក្សីបីនាក់ » និង « ពួកសាក្សីប្រាំបីនាក់ » ។ អ្នកអាចអានទីបន្ទាល់របស់ពួកគេនៅក្នុង « ទីបន្ទាល់នៃពួកសាក្សីបីនាក់ » និង « ទីបន្ទាល់នៃពួកសាក្សីប្រាំបីនាក់ » ។ ហេតុអ្វីបានជាវាមានសារៈសំខាន់ក្នុងការជួយអ្នកដទៃឲ្យដឹងពីបទពិសោធន៍របស់ពួកសាក្សីបីនាក់ និងពួកសាក្សីប្រាំបីនាក់ ? តើអ្នកអាចធ្វើអ្វីដើម្បីចែកចាយសក្ខីភាពផ្ទាល់ខ្លួនរបស់អ្នកអំពីព្រះគម្ពីរមរមនជាមួយអ្នកដទៃ ?
សកម្មភាពសម្រាប់ការរៀនសូត្រជាមួយអ្នកដទៃ
-
ទោះបីជាមនុស្សជាច្រើនបានឆ្ងល់ថា តើដំណើការនៃការបកប្រែព្រះគម្ពីរមរមនមានលក្ខណៈយ៉ាងដូចម្ដេចក្ដី ក៏ យ៉ូសែប ស្ម៊ីធ បានផ្ដល់ព័ត៌មានជាក់លាក់តិចតួចណាស់អំពីការណ៍នេះ ដោយគ្រាន់តែប្រាប់ថា វាត្រូវបានបកប្រែ « ដោយអំណោយទាន និងអំណាចនៃព្រះ » ( បុព្វកថានៃព្រះគម្ពីរមរមន; គោលលទ្ធិ និងសេចក្ដីសញ្ញា ១៣៥:៣ ) ។ សូមអញ្ជើញសមាជិកក្រុមរបស់អ្នកឲ្យអាន « Book of Mormon Translation » នៅក្នុង ប្រធានបទប្រវត្ដិសាសនាចក្រ ( បណ្ណាល័យដំណឹងល្អ ) ។ សូមសួរពួកគេថា តើការយល់ដឹងអ្វីខ្លះដែលពួកគេទទួលបានចេញមកពីការអាននេះ ។ ហេតុអ្វីបានជាអ្នកគិតថា យ៉ូសែប ស្ម៊ីធ បានសង្កត់ធ្ងន់លើ « អំណោយទាន និងអំណាចនៃព្រះ » នៅពេលពិភាក្សាអំពីការបកប្រែព្រះគម្ពីរមរមន ?
ស្វែងយល់បន្ថែមទៀត
-
អេសាយ ២៩:១១–១៤, ១៨–១៩; យ៉ូសែប ស៊្មីធ—ប្រវត្តិ ១:៣០–៣៥, ៤២–៥៤
-
ពួកបរិសុទ្ធ ៖ រឿងអំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ភាគ ១ បទដ្ឋាននៃសេចក្ដីពិត ឆ្នាំ១៨១៥–ឆ្នាំ១៨៤៦ ( ឆ្នាំ២០១៨ ) ទំព័រ ២១–៣០ ៣៩–៦៤
-
រ័សុល អិម ណិលសុន « A Treasured Testament » Ensign ខែកក្កដា ឆ្នាំ១៩៩៣
-
« Days of Harmony » ( វីដេអូ ) បណ្ណាល័យដំណឹងល្អ
ផ្នែកទី ៣
អ្នកអាចដឹងដោយខ្លួនឯងថា ព្រះគម្ពីរមរមនគឺពិត
ការក្លាយជាសិស្សរបស់ព្រះយេស៊ូវគ្រីស្ទគឺជាដំណើរការពេញមួយជីវិត ។ យើងម្នាក់ៗស្ថិតនៅកន្លែងផ្សេងគ្នានៅលើផ្លូវខាងវិញ្ញាណដើម្បីត្រឡប់ទៅរកព្រះវរបិតាសួគ៌ និងព្រះយេស៊ូវគ្រីស្ទវិញ ។ ប៉ុន្តែ មិនថាយើងនៅទីណានៅលើផ្លូវនោះទេ ព្រះគម្ពីរមរមនអាចជួយយើងឲ្យខិតកាន់តែជិតទ្រង់ទាំងទ្វេបាន ។ ព្រះបន្ទូលនៃព្រះគឺពោរពេញទៅដោយអំណាចនៃការផ្លាស់ប្រែចិត្តជឿ ( សូមមើល អាលម៉ា ៥:៧; ៣១:៥ ) ។ ព្រះគម្ពីរមរមនអាចជួយអ្នកចៀសវាងនូវការបោកប្រាស់របស់ពិភពលោក និងដឹកនាំអ្នកនៅលើផ្លូវទៅកាន់សុវត្ថិភាពខាងវិញ្ញាណ ( សូមមើល នីហ្វៃទី១ ១៥:២៤; ហេលេមិន ៣:២៩–៣០ ) ។
ដោយសារតែសារៈសំខាន់នៃព្រះគម្ពីរមរមន អ្នកបម្រើរបស់ព្រះអម្ចាស់បានសង្កត់ធ្ងន់ថា សមាជិកគ្រប់រូបរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គប្បីស្វែងរកដើម្បិដឹងដោយខ្លួនឯងថាព្រះគម្ពីរមរមនគឺពិត ។ បុព្វកថានៃព្រះគម្ពីរមរមន ថ្លែងថា « យើងសូមអញ្ជើញមនុស្សទាំងអស់នៅគ្រប់ទិសទី សូមឲ្យអានព្រះគម្ពីរមរមន សូមឲ្យពិចារណាមើលនៅក្នុងចិត្តនូវពាក្យពេចន៍នៅក្នុងគម្ពីរនេះ ហើយបន្ទាប់មក សូមឲ្យសួរដល់ព្រះជាព្រះវរបិតាដ៏នៅអស់កល្បជានិច្ចដោយនូវព្រះនាមនៃព្រះគ្រីស្ទ ថាតើគម្ពីរនេះពិតឬទេ ។ អស់អ្នកណាដែលធ្វើតាមបែបបទនេះ ហើយសូមសួរដោយសេចក្ដីជំនឿ នោះនឹងបានទទួលទីបន្ទាល់អំពីសេចក្ដីពិត និងទេវភាពរបស់គម្ពីរនេះ ដោយព្រះចេស្ដានៃព្រះវិញ្ញាណបរិសុទ្ធ ។ ( សូមមើល មរ៉ូណៃ ១០:៣–៥ ) ។ »
រឿងទាំងឡាយដែលត្រូវពិចារណា
-
សូមអានសេចក្ដីថ្លែងការណ៍ខាងក្រោមដោយ អែលឌើរ ជែហ្វ្រី អ័រ ហូឡែន « ខ្ញុំធ្វើទីបន្ទាល់ថាមនុស្សម្នាក់ពុំអាចចាប់ផ្តើមមាន សេចក្តីជំនឿដ៏ពេញលេញនៅក្នុងកិច្ចការថ្ងៃចុងក្រោយនេះបានទេ—ហើយដោយហេតុនោះគឺពុំអាចរកឃើញនូវរង្វាស់នៃសន្តិភាពដ៏ពេញលេញ ព្រមទាំងការលួងលោមនៅក្នុងកិច្ចការនេះនៅអំឡុងពេលរបស់យើងបានឡើយ—លើកលែងតែគាត់ឱបក្រសោបនូវទេវភាពនៃព្រះគម្ពីរមរមន និងព្រះអម្ចាស់ យេស៊ូវគ្រីស្ទ ដែលព្រះគម្ពីរនេះធ្វើបន្ទាល់អំពីទ្រង់ » ។ តើព្រះគម្ពីរមរមនបានជះឥទ្ធិពលដល់ទីបន្ទាល់របស់អ្នកអំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ព្រះគម្ពីរមរមនគឺជាឧបករណ៍រៀបចំសម្រាប់ការប្រែចិត្ដជឿដ៏ទេវភាពមួយ ដែលមាននូវអានុភាពដើម្បីផ្លាស់ប្ដូរគំនិត ដួងចិត្ដ និងជីវិត ពេលយើងសម្របខ្លួនរបស់យើងជាមួយនឹងព្រះយេស៊ូវគ្រីស្ទ និងការបង្រៀនរបស់ទ្រង់ ។ សូមអានសេចក្តីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ជាមួយសមាជិកក្រុមរបស់អ្នក ៖
« ព្រះគម្ពីរមរមនគឺជាឧបករណ៍ដែលព្រះបានរៀបចំឡើងដើម្បី ‹ បោសផែនដី ដូចជាទឹកជំនន់ ដើម្បីប្រមូលពួកអ្នកជម្រើសរបស់ [ ទ្រង់ ] › ។ ( ម៉ូសេ ៧:៦២ ) ។ គម្ពីរដ៏ពិសិដ្ឋនេះចាំបាច់ត្រូវក្លាយជាផ្នែកកាន់តែសំខាន់នៅក្នុងការប្រកាសរបស់យើង ការបង្រៀនរបស់យើង និងកិច្ចការផ្សព្វផ្សាយសាសនារបស់យើង ។ …
« ខ្ញុំសូមអញ្ជើញយើងម្នាក់ៗឲ្យពិចារណាប្រកបដោយការអធិស្ឋានពីជំហានដែលយើងអាចធ្វើ ដើម្បីនាំយកសាក្សីថ្មីនេះនៃព្រះគ្រីស្ទមកកាន់ជីវិតរបស់យើងកាន់តែច្រើនជាងមុន ហើយមកកាន់ពិភពលោកដែលកំពុងត្រូវការសាក្សីនេះយ៉ាងអន្ទះសារ » ។
តើមានវិធីអ្វីខ្លះដែលយើងអាចជួយព្រះអម្ចាស់ក្នុងកិច្ចការរបស់ទ្រង់តាមរយៈការនាំយកនូវព្រះគម្ពីរមរមនយ៉ាងច្រើនសន្ធឹកសន្ធាប់មកកាន់ពិភពលោកនេះ ?
ស្វែងយល់បន្ថែមទៀត
-
នីហ្វៃទី២ ២៥:១៧–១៨; អេធើរ ៤:១១; គោលលទ្ធិ និងសេចក្ដីសញ្ញា ២០:៨–១៥
-
ជែហ្វ្រី អ័រ ហូឡិន « Safety for the Soul » Liahona ខែវិច្ឆិកា ឆ្នាំ២០០៩ ទំព័រ ៨៨–៩០
-
រ៉ូណល អេ រ៉ាសបាន « ថ្ងៃនេះ » លីអាហូណា ខែវិច្ឆិកា ឆ្នាំ២០២២ ទំព័រ ២៥–២៧
-
ម៉ៃឃើល ធី រីងវូដ « You Can Know For Yourself » Ensign ខែកុម្ភៈ ឆ្នាំ២០១៧ ទំព័រ ៦៦–៦៩
ធនធានផ្សេងទៀតអំពីព្រះគម្ពីរមរមន
-
ធនធានសម្រាប់កុមារ