« ការប្រមូលផ្ដុំសាសន៍អ៊ីស្រាអែល » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ការប្រមូលផ្ដុំសាសន៍អ៊ីស្រាអែល
បុព្វហេតុដ៏អស្ចារ្យបំផុតនៅលើផែនដីសព្វថ្ងៃនេះ
តើអ្នកធ្លាប់ផ្លុំរុក្ខជាតិដូចជាផ្កា dandelion ហើយមើលគ្រាប់របស់វាហោះខ្ចាត់ខ្ចាយឬទេ ? តើត្រូវការអ្វីខ្លះ ដើម្បីប្រមូលគ្រាប់ពូជទាំងអស់នោះត្រឡប់មកវិញ ? វាមើលទៅហាក់ដូចជាមិនអាចទៅរួចទាល់តែសោះ ។ ប៉ុន្ដែការណ៍ទាំងអស់នឹងសម្រេចបានដោយសារមានព្រះ ។
ព្រះគម្ពីសញ្ញាចាស់ ប្រាប់អំពីការខ្ចាត់ខ្ចាយមួយប្រភេទទៀត—នៅពេលរាស្ដ្រនៃសេចក្ដីសញ្ញារបស់ព្រះ ត្រូវបាន « កម្ចាត់កម្ចាយ … ដោយខ្យល់កួចឲ្យទៅនៅកណ្ដាលអស់ទាំងសាសន៍ »( សាការី ៧:១៤ ) ។ ប៉ុន្តែតាមរយៈព្យាការីរបស់ទ្រង់ ព្រះអម្ចាស់បានសន្យាថាថ្ងៃណាមួយពួកគេនឹងត្រូវបានប្រមូលផ្តុំម្តងទៀត ( សូមមើល ចោទិយកថា ៤:២៧–៣១ ) ។
យើងហៅការណ៍នោះថា « ការប្រមូលផ្ដុំសាសន៍អ៊ីស្រាអែល » ហើយការណ៍នេះបានចាប់ផ្តើមនៅពេលដែលសាសនាចក្រនៃព្រះយេស៊ូវគ្រីស្ទត្រូវបានស្តារឡើងវិញនៅក្នុងថ្ងៃចុងក្រោយ ហើយដំណឹងល្អរបស់ទ្រង់បានចាប់ផ្តើមរីករាលដាលពាសពេញពិភពលោក ។ កិច្ចខិតខំប្រឹងប្រែងប្រមូលផ្តុំនេះបានបន្តទទួលបានសន្ទុះដ៏ខ្លាំង នៅពេលដែលការស្តារឡើងវិញនៃដំណឹងល្អបានបន្ដឆ្ពោះទៅមុខ ។
តើអ្វីជាការប្រមូលផ្ដុំសាសន៍អ៊ីស្រាអែល ?
នៅពេលនិយាយអំពីការប្រមូលផ្ដុំសាសន៍អ៊ីស្រាអែល អ៊ីស្រាអែល សំដៅទៅលើពូជអំបូរសុទ្ធសាធនៃអ័ប្រាហាំ អ៊ីសាក និង យ៉ាកុប ។ វាក៏សំដៅទៅលើអស់អ្នកដែលត្រូវបានទទួលយកមកចិញ្ចឹមទៅក្នុងគ្រួសាររបស់ពួកគេ តាមរយៈសេចក្ដីសញ្ញានៃពិធីបុណ្យជ្រមុជទឹកផងដែរ ។ កាលពីបុរាណ ព្រះបានកម្ចាត់កម្ចាយកូនចៅនៃអ៊ីស្រាអែលដោយសារតែភាពទុច្ចរិត និងការបះបោររបស់ពួកគេ ។ អ៊ីស្រាអែលត្រូវបានប្រមូលផ្តុំនៅពេលដែលបុត្រាបុត្រីរបស់ព្រះទទួលយកដំណឹងល្អរបស់ព្រះយេស៊ូវគ្រីស្ទ ទទួលពិធីបរិសុទ្ធនៃសេចក្ដីសង្គ្រោះ និងភាពតម្កើងឡើង ធ្វើសេចក្ដីសញ្ញាជាមួយនឹងព្រះ និងខិតខំរក្សាសេចក្តីសញ្ញាទាំងនោះ ។
មគ្គទេសក៍សិក្សាដំណឹងល្អដែលជាប់ទាក់ទង ៖ សេចក្ដីសញ្ញាដ៏អស់កល្បអស់កាលជានិច្ច ការអញ្ជើញមនុស្សទាំងអស់ឲ្យទទួលយកដំណឹងល្អ ពរជ័យលោកអយ្យកោ ការយាងមកជាលើកទីពីររបស់ព្រះយេស៊ូវគ្រីស្ទ
ផ្នែកទី ១
សមាជិកនៃសាសនាចក្រនៃព្រះយេស៊ូវគ្រីស្ទគឺជាផ្នែកមួយនៃវង្សអ៊ីស្រាអែល
ព្រះអម្ចាស់បានស្ថាបនាសេចក្ដីសញ្ញាដ៏អស់កល្បអស់កាលជានិច្ចរបស់ទ្រង់ជាមួយអ័ដាម ។ ទ្រង់បានបន្តសេចក្ដីសញ្ញាជាមួយលោក អ័ប្រាហាំ និង សារ៉ាយ ជាមួយកូនប្រុសរបស់ពួកគេគឺ អ៊ីសាក និងជាមួយចៅប្រុសរបស់ពួកគេ គឺយ៉ាកុប ដែលឈ្មោះត្រូវបានប្តូរឈ្មោះទៅជាអ៊ីស្រាអែល ។ កូនចៅសណ្ដានក្រោយត្រូវបានស្គាល់ថាជា សមាជិកក្នុង « វង្សអ៊ីស្រាអែល » ។ ប៉ុន្តែនៅក្នុងសម័យរបស់យើង ពាក្យនេះអនុវត្តទូលំទូលាយជាងមុន ។
នរណាម្នាក់ដែលជឿលើព្រះយេស៊ូវគ្រីស្ទ និងចូលទៅក្នុងផ្លូវនៃសេចក្ដីសញ្ញារបស់ទ្រង់ ដោយចូលរួមជាមួយសាសនាចក្រដែលបានស្តារឡើងវិញរបស់ទ្រង់—ដោយមិនគិតពីពូជពង្សរបស់ពួកគេ—ត្រូវបានប្រមូលផ្តុំទៅក្នុងវង្សនៃអ៊ីស្រាអែល ហើយក្លាយជាផ្នែកមួយនៃរាស្ដ្រក្នុងសេចក្ដីសញ្ញារបស់ព្រះអម្ចាស់ ( សូមមើល និក្ខមនំ ៦:៧; នីហ្វៃទី១ ១៤:១៤; នីហ្វៃទី៣ ២១:៦; អ័ប្រាហាំ ២:១០ ) ។ អ្នកដើរតាមព្រះគ្រីស្ទទាំងនេះគឺជាកូនចៅក្នុងសេចក្តីសញ្ញា ( សូមមើល នីហ្វៃទី៣ ២០:២៥–២៧ ) ។ នៅពេលដែលពួកគេរក្សាសេចក្តីសញ្ញារបស់ពួកគេ ពួកគេទទួលបានពរជ័យដូចគ្នាដែលបានសន្យាដល់អ័ប្រាហាំ អ៊ីសាក និង យ៉ាកុប ( សូមមើល គោលលទ្ធិ និងសេចក្ដីសញ្ញា ៣៨:១៧–២០; ១៣២:៣០–៣១; អ័ប្រាហាំ ២:៩–១១ ) ។
រឿងទាំងឡាយដែលត្រូវពិចារណា
-
ដើម្បីស្វែងយល់បន្ថែមអំពីរបៀបដែលសមាជិកសាសនាចក្រជាផ្នែកមួយនៃវង្សអ៊ីស្រាអែល អ្នកអាចសិក្សាសុន្ទរកថារបស់ប្រធាន រ័សុល អិម ណិលសុន « ទុកឲ្យព្រះឈ្នះ » ។ តើការក្លាយជាផ្នែកមួយនៃ « អ៊ីស្រាអែល » មានន័យបែបណាចំពោះអ្នក ? អ្នកក៏អាចអាន ឬស្ដាប់ទំនុកច្រៀងនៃទំនុកតម្កើងដែលនិយាយអំពីអ៊ីស្រាអែល ដូចជា « ព្រះនៃអ៊ីស្រាអែល » « អ៊ីស្រាអែលអើយព្រះកំពុងហៅ » និង « សង្ឃឹមអ៊ីស្រាអែល » ជំនួសពាក្យ « អ៊ីស្រាអែល » ជាមួយពាក្យ « អ្នករក្សាសេចក្ដីសញ្ញា » ដើម្បីមើលថាតើអ្នកទទួលបានការយល់ដឹងអ្វីខ្លះ ។
-
អែលឌើរ ដេវីឌ អេ បែឌណា បានបង្រៀនអំពីសារៈសំខាន់នៃ ការជ្រើសរើស ធ្វើជាផ្នែកមួយនៃរាស្ដ្រនៃសេចក្ដីសញ្ញារបស់ព្រះ ដោយការធ្វើតាមក្រិត្យវិន័យរបស់ទ្រង់ ៖ « យើងមានទាំងការហៅរបស់ព្រះ និងការតបរបស់យើងផ្ទាល់ចំពោះការហៅនោះ ហើយមនុស្សជាច្រើនត្រូវបានហៅ ប៉ុន្តែមានមនុស្សតិចទេដែលត្រូវបានជ្រើសរើស ។ ការត្រូវបានជ្រើសរើស ឬក្លាយជាអ្នកដែលត្រូវបានជ្រើសរើស ពុំមែនជាស្ថានភាពពិសេសមួយដែលបានប្រទានដល់យើងឡើយ ។ តែបងប្អូន និងខ្ញុំអាចជ្រើសរើសដើម្បីត្រូវបានជ្រើសរើសនៅទីបំផុត តាមរយៈការអនុវត្តសិទ្ធិជ្រើសរើសផ្នែកសីលធម៌របស់យើងដ៏សុចរិត » ។ តើពរជ័យអ្វីខ្លះមានដល់យើង នៅពេលយើង « ជ្រើសរើសដើម្បីត្រូវបានជ្រើសរើស » ជាផ្នែកមួយនៃវង្សអ៊ីស្រាអែល ? តើអ្នកអាចធ្វើអ្វីបន្ថែមទៀត ក្នុងការជ្រើសរើសដើម្បីឲ្យបានជ្រើសរើស ?
សកម្មភាពសម្រាប់ការរៀនសូត្រជាមួយអ្នកដទៃ
-
អ្នកអាចអានរួមគ្នានូវផ្នែកនៃសុន្ទរកថារបស់ប្រធាន ណិលសុន « Choices for Eternity » ដែលលោកពិភាក្សាអំពីស្លាកទាំងឡាយ ។ បន្ទាប់មកសូមមើលស្លាកនៅលើអាហារ ឬប្រអប់ផ្សេងៗទៀត ហើយនិយាយអំពីរបៀបដែលស្លាកនៅលើអាហារ ឬប្រអប់ទាំងនេះមានឥទ្ធិពលលើអ្វីដែលយើងគិតអំពីអាហារទាំងនោះ ។ តើស្លាកបីណាខ្លះសម្រាប់យើងដែលប្រធាន ណិលសុន មានប្រសាសន៍ថា គួរតែដាក់អាទិភាពលើសជាងស្លាកទាំងអស់ផ្សេងទៀត ? តើស្លាក « បុត្រនៃសេចក្តីសញ្ញា » អាចជួយយើងឲ្យយល់ពីពរជ័យដែលអាចមានមកពីការក្លាយជាសមាជិកនៃវង្សអ៊ីស្រាអែលដោយរបៀបណា ? សូមអាន នីហ្វៃទី៣ ២០:២៥–២៧ ហើយពិភាក្សាអំពីអ្វីដែលខគម្ពីរទាំងនេះបង្រៀនយើង អំពីអ្វីដែលព្រះអម្ចាស់រំពឹងទុកពីយើងក្នុងនាមជាបុត្រនៃសេចក្តីសញ្ញារបស់ទ្រង់ ។
-
តាមរយៈសេចក្ដីសញ្ញាដ៏អស់កល្បអស់កាលជានិច្ចរបស់ព្រះដែលបានធ្វើជាមួយក្រុមមនុស្សជាក់លាក់អស់រយៈពេលជាច្រើនសតវត្សស៍មកហើយនោះ មនុស្សគ្រប់រូបអាចក្លាយជាផ្នែកមួយនៃសេចក្ដីសញ្ញានេះបាន ។ អែលឌើរ ឃ្វីនថិន អិល ឃុក បានបង្រៀន « អស់អ្នកដែលទទួលយកដំណឹងល្អនៃព្រះយេស៊ូវគ្រីស្ទដោយមិនថាមានពូជពង្សណានោះទេ ក្លាយជាផ្នែកនៃអ៊ីស្រាអែលដែលបានប្រមូលផ្តុំនោះ » ។ អ្នកអាចពិនិត្យមើលសារលិខិតរបស់អែលឌើរ ឃុក « ប្រមូលផ្ដុំគ្នាទៅផ្ទះដោយសុវត្ថិភាព » ដើម្បីស្វែងយល់បន្ថែមអំពីសារៈសំខាន់នៃការក្លាយជាផ្នែកមួយនៃវង្សអ៊ីស្រាអែលដែលបានប្រមូលផ្តុំ ។ ពិភាក្សាអ្វីដែលអ្នករៀន ។
ស្វែងយល់បន្ថែមទៀត
-
លោកុប្បត្តិ ៤៨–៤៩; កាឡាទី ៣:១៤, ២៧–២៩; យ៉ាកុប ៥; នីហ្វៃទី៣ ២០–២៣
-
រ័សុល អិម ណិលសុន « The Everlasting Covenant » លីអាហូណា ខែតុលា ឆ្នាំ២០២២ ទំព័រ ៤–១១
ផ្នែកទី ២
ការប្រមូលសាសន៍អ៊ីស្រាអែលគឺជាកិច្ចការដ៏សំខាន់បំផុតនៅលើផែនដីសព្វថ្ងៃនេះ
សាសន៍អ៊ីស្រាអែលពីបុរាណត្រូវបានខ្ចាត់ខ្ចាយដោយសារតែពួកគេបានបដិសេធព្រះយេស៊ូវ និងមិនស្មោះត្រង់ចំពោះសេចក្ដីសញ្ញារបស់ពួកគេជាមួយនឹងទ្រង់ ( សូមមើល លេវីវិន័យ ២៦:៣៣; ចោទិយកថា ៤:២៣–២៧ ) ។ ការខ្ចាត់ខ្ចាយនេះបានកើតឡើងអស់រយៈពេលយូរ ខណៈដែលសាសន៍អ៊ីស្រាអែលត្រូវបានត្រួតត្រាដោយសាសន៍ផ្សេងទៀត និងនាំទៅរកការជាប់ឃុំឃាំង ( សូមមើល ពង្សាវតាក្សត្រទី ២ ១៧:៦–២៣; ២៥:១–១២; នីហ្វៃទី១ ២២:៣–៥ ) ។ អ្វីដែលជាសោកនាដកម្មជាងនេះទៅទៀតនោះ ពួកគេជាច្រើនបានបាត់បង់អារម្មណ៍នៃអត្តសញ្ញាណរបស់ពួកគេក្នុងនាមជារាស្ដ្រនៃសេចក្ដីសញ្ញារបស់ព្រះ ( សូមមើល នីហ្វៃទី២ ៦:៨–១១ ) ។
ប៉ុន្តែព្រះអម្ចាស់មិនបានភ្លេចពួកគេឡើយ ។ ទ្រង់បានសន្យាថា ទ្រង់នឹងប្រមូលផ្តុំប្រជារាស្រ្តរបស់ទ្រង់ បន្ទាប់ពីពួកគេត្រូវបានខ្ចាត់ខ្ចាយមួយរយៈ ( សូមមើល នីហ្វៃទី២ ១០:៦–៨; គោលលទ្ធិ និងសេចក្ដីសញ្ញា ៣៣:៦ ) ។ រាស្ដ្ររបស់ព្រះត្រូវបានប្រមូលផ្តុំនៅពេលពួកគេមានចំណេះដឹងអំពីដំណឹងល្អនៃព្រះយេស៊ូវគ្រីស្ទ ហើយមករកទ្រង់ ( សូមមើល នីហ្វៃទី១ ១៩:១៦ ) ។
ព្យាការី យ៉ូសែប ស្ម៊ីធ បានបង្រៀនថា គោលបំណងចម្បងក្នុងការប្រមូលផ្តុំរាស្ដ្ររបស់ព្រះ គឺដើម្បីជួយពួកគេឲ្យទទួលពិធីបរិសុទ្ធនៃព្រះវិហារបរិសុទ្ធ និងរៀបចំពួកគេសម្រាប់សេចក្ដីសង្គ្រោះ ។ ការប្រមូលសាសន៍អ៊ីស្រាអែលដែលបានខ្ចាត់ខ្ចាយគឺមានសារៈសំខាន់នៅពេលនេះ ក៏ដូចជានៅក្នុងសម័យរបស់ព្យាការី យ៉ូសែប ស្ម៊ីធ ដែរ ។ ប្រធាន រ័សុល អិម ណិលសុន បានហៅការណ៍នេះថា « បុព្វហេតុដ៏ធំបំផុត និងជាកិច្ចការដ៏ ធំបំផុត នៅលើផែនដីសព្វថ្ងៃនេះ » ។ វាគឺជារបៀបដែលបុត្រាបុត្រីរបស់ព្រះអាចដឹង និងត្រឡប់ទៅរកទ្រង់វិញនៅទីបំផុត ។
រឿងទាំងឡាយដែលត្រូវពិចារណា
-
ប្រធាន ណិលសុន បានមានប្រសាសន៍ជាញឹកញាប់អំពីសារៈសំខាន់នៃការប្រមូលសាសន៍អ៊ីស្រាអែល ។ លោកបានប្រកាស ៖ « ព្រះអម្ចាស់កំពុងតែប្រមូលផ្តុំជនទាំងឡាយណាដែលនឹងជ្រើសរើសទុកឲ្យព្រះជាអង្គដែលមានឥទ្ធិពលសំខាន់បំផុតនៅក្នងជីវិតរបស់ពួកគេ ។ អស់រាប់សតវត្សរ៍ ព្យាការីទាំងឡាយបានព្យាករណ៍ពីការប្រមូលផ្តុំនេះ ហើយវាកំពុងតែកើតឡើងនៅពេលឥឡូវនេះ ! ជាព្រឹត្តិការណ៍ដ៏ចាំបាច់ដែលកើតឡើងពីមុនការយាងមកជាលើកទីពីររបស់ព្រះអម្ចាស់ វាគឺជាកិច្ចការ ដ៏សំខាន់បំផុត នៅក្នុងពិភពលោកនេះ ! » សូមគិតអំពីអត្ថន័យថាអ្វីទៅគឺជា « កិច្ចការដ៏សំខាន់បំផុត » នៅលើផែនដី ។ តើចំណេះដឹងនេះអាចជួយអ្នកសម្រេចចិត្តពីរបៀបដែលអ្នកចំណាយពេលវេលា ទេពកោសល្យ ថាមពល និងធនធានរបស់អ្នកដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
អ្នកអាចសិក្សា នីហ្វៃទី៣ ១០:៥–៦ និង គោលលទ្ធិ និងសេចក្ដីសញ្ញា ២៩:១–៨ ហើយពិភាក្សាអំពីរបៀបដែលព្រះអម្ចាស់កំពុងប្រមូលផ្តុំរាស្ដ្ររបស់ទ្រង់នៅក្នុងថ្ងៃចុងក្រោយ ។ តើការប្រមូលសាសន៍អ៊ីស្រាអែលដូចគ្នាទៅនឹងការដែលមេមាន់ក្រុងកូនមាន់របស់វាយ៉ាងដូចម្តេចទៅ ? ពេលអ្នកពិចារណាវគ្គបទគម្ពីរទាំងនេះ និងសំណួរនេះ សូមមើលទៅរូបភាពដែលភ្ជាប់មកជាមួយរូបរបស់មេមាន់ និងកូនមាន់ ។ ចែកចាយព័ត៌មានលម្អិតដែលហាក់ដូចជាមានសារៈសំខាន់ចេញពីរូបភាពនេះ ។ តើព័ត៌មានលម្អិតទាំងនេះជួយអ្នកឲ្យយល់ពីអ្វីដែលព្រះអម្ចាស់ចង់បង្រៀនយើងអំពីការប្រមូលផ្តុំដោយរបៀបណា ? តើយើងត្រូវបានការពារផ្នែកខាងរាងកាយ និងខាងវិញ្ញាណយ៉ាងដូចម្តេច ពេលដែលយើងប្រមូលផ្តុំជាមួយពួកបរិសុទ្ធផ្សេងទៀត ?
-
អ្នកអាចមើលវីដេអូ « Jesus Christ Prophesies of the Gathering of Israel » ដើម្បីស្វែងយល់បន្ថែមអំពីការប្រមូលផ្តុំនៅក្នុងសម័យរបស់យើង ។ តើព្រះអង្គសង្គ្រោះបង្រៀនអ្វីខ្លះ នៅក្នុងដំណើររឿងនេះ អំពីរបៀបដែលការប្រមូលផ្តុំសាសន៍អ៊ីស្រាអែលនឹងត្រូវបានបំពេញ ? ពិភាក្សាអំពីអ្វីដែលអ្នករៀន និងរបៀបដែលវាពាក់ព័ន្ធនឹងយើងនាសព្វថ្ងៃនេះ ។
ស្វែងយល់បន្ថែមទៀត
-
អេភេសូ ១:១០; នីហ្វៃទី១ ២២:៧–១២; គោលលទ្ធិ និងសេចក្ដីសញ្ញា ២៧:១៣; ១៣៣:២៦–៣២; មាត្រានៃសេចក្តីជំនឿ ១:១០
-
រ័សុល អិម ណិលសុន « The Gathering of Scattered Israel» Liahona ខែវិច្ឆិកា ឆ្នាំ២០០៦ ទំព័រ ៧៩–៨១
-
« ព្រះយេស៊ូវហៅ ‹ មកវិញ › ឱវង្សអ៊ីស្រាអែលអើយ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ២០២២ ទំព័រ ១២៥–១២៧
ផ្នែកទី ៣
ពួកបរិសុទ្ធថ្ងៃចុងក្រោយមានទំនួលខុសត្រូវក្នុងការជួយព្រះអម្ចាស់ប្រមូលផ្តុំសាសន៍អ៊ីស្រាអែល
ការប្រមូលផ្តុំសាសន៍អ៊ីស្រាអែលគឺទាំងខាងវិញ្ញាណ និងខាងរាងកាយ ( សូមមើល នីហ្វៃទី១ ២២:៣; Gospel Principles [ ឆ្នាំ២០១១ ] ទំព័រ ២៤៨ ) ។ មិនយូរប៉ុន្មានបន្ទាប់ពីសាសនាចក្រនៃព្រះយេស៊ូវគ្រីស្ទត្រូវបានស្តារឡើងវិញ ព្រះអម្ចាស់បានបញ្ជាឲ្យពួកបរិសុទ្ធប្រមូលផ្តុំដោយផ្ទាល់នៅ ខឺតឡង់ រដ្ឋអូហៃអូ អ៊ិនឌីប៉ែនដែនស៍រដ្ឋមិសសួរី ណៅរូ រដ្ឋអិលលីណយ និងចុងក្រោយគេនៅជ្រលងភ្នំ សលត៍ លេក ។ សព្វថ្ងៃនេះ ជាជាងការប្រមូលផ្តុំនៅទីតាំងតែមួយ សមាជិកសាសនាចក្រស្ថាបនាសាសនាចក្ររបស់ព្រះអម្ចាស់នៅក្នុងតំបន់ដែលពួកគេរស់នៅ នៅពេលដែលពួកគេប្រមូលផ្តុំគ្នាទៅរកព្រះអង្គសង្គ្រោះ—ទៅរកគោលលទ្ធិ និងសេចក្តីសញ្ញារបស់ទ្រង់ ( សូមមើល នីហ្វៃទី២ ១០:២ ) ។
សមាជិកសាសនាចក្រមានកាតព្វកិច្ចដើម្បីជួយក្នុងការប្រមូលផ្តុំ ( សូមមើល គោលលទ្ធិ និងសេចក្ដីសញ្ញា ២៩:២, ៧; ៨៨:៨១; អ័ប្រាហាំ ២:១០–១១ ) ។ ការចែកចាយដំណឹងល្អគឺជាផ្នែកមួយដ៏សំខាន់នៃកិច្ចខិតខំប្រឹងប្រែងនោះ ។ ហើយកិច្ចការព្រះវិហារបរិសុទ្ធ និងពង្សប្រវត្ដិក៏ដូច្នោះដែរ នៅពេលដែលយើងនិយាយអំពីការប្រមូលផ្ដុំសាសន៍អ៊ីស្រាអែលក្នុងចំណោមទាំងអ្នកនៅរស់ និងអ្នកដែលបានស្លាប់ហើយ ។
រឿងទាំងឡាយដែលត្រូវពិចារណា
-
អែលឌើរ រ៉ូណល អេ រ៉ាសបាន បានសង្កត់ធ្ងន់អំពីសារៈសំខាន់នៃកិច្ចការផ្សព្វផ្សាយសាសនានៅក្នុងការជួយប្រមូលផ្ដុំសាសន៍អ៊ីស្រាអែល ។ លោកបានមានប្រសាសន៍ ៖ « យើងកំពុងប្រមូលផ្ដុំបុត្រាបុត្រីរបស់ព្រះនៅថ្ងៃចុងក្រោយនេះ ដើម្បីពួកគេអាចមាន ‹ ព្រះពរដ៏ធំទាំងឡាយបានស្រោចមកលើក្បាលពួកគេ › [ នីហ្វៃទី៣ ១០:១៨ ] និងការសន្យានៃ ‹ ទ្រព្យសម្បត្តិទាំងឡាយខាងភាពអស់កល្បជានិច្ច › [ គោលលទ្ធិ និងសេចក្ដីសញ្ញា ៧៨:១៨ ] ។ ដើម្បីប្រមូលផ្ដុំអ៊ីស្រាអែល យើងត្រូវការអ្នកផ្សព្វផ្សាយសាសនា— ឲ្យច្រើនជាងអ្នកកំពុងបម្រើ[ បច្ចុប្បន្ននេះ ] ។… ក្នុងនាមជាសាវករបស់ព្រះអម្ចាស់ព្រះយេស៊ូវគ្រីស្ទ ខ្ញុំសូមឲ្យបងប្អូនបម្រើជាអ្នកផ្សព្វផ្សាយសាសនា ដើម្បីប្រមូលផ្ដុំអ៊ីស្រាអែល » ។ ចូរពិចារណាពីរបៀបដែលអ្នកអាចជួយព្រះអម្ចាស់ប្រមូលផ្តុំរាស្ដ្ររបស់ទ្រង់—ដោយមាន ឬគ្មានការហៅជាផ្លូវការក្នុងនាមជាអ្នកផ្សព្វផ្សាយសាសនា ។ កត់ត្រាចំណាប់អារម្មណ៍ដែលអ្នកទទួលបាន ហើយធ្វើសកម្មភាពតាមចំណាប់អារម្មណ៍ទាំងនោះ ។
សកម្មភាពសម្រាប់ការរៀនសូត្រជាមួយអ្នកដទៃ
-
សូមអាន គោលលទ្ធិ និងសេចក្ដីសញ្ញា ១៨:១០–១៦ ជាមួយគ្នា ហើយចែកចាយចំណាប់អារម្មណ៍របស់អ្នកជាមួយគ្នា អំពីរបៀបដែលព្រះមានព្រះទ័យចំពោះបុត្រាបុត្រីរបស់ទ្រង់ ។ ហេតុអ្វីបានជាកិច្ចការនៃការប្រមូលផ្តុំបុត្រាបុត្រីរបស់ទ្រង់មានសារៈសំខាន់ខ្លាំងចំពោះទ្រង់ ? តើយើងរកឃើញអ្វីខ្លះនៅក្នុងខគម្ពីរទាំងនេះ ដែលបំផុសគំនិតយើងឲ្យជួយប្រមូលសាសន៍អ៊ីស្រាអែល ?
-
តើយើងជួយប្រមូលសាសន៍អ៊ីស្រាអែលដោយរបៀបណា ? សូមពិចារណាការពន្យល់ដ៏មានឥទ្ធិពលនេះមកពី ប្រធាន រ័សុល អិម ណិលសុន « រាល់ពេល ដែលបងប្អូនធ្វើ អ្វីមួយ ដើម្បីជួយ នរណាម្នាក់—នៅទាំងសងខាងនៃវាំងនន—បោះជំហានទៅធ្វើសេចក្ដីសញ្ញាជាមួយនឹងព្រះ ហើយទទួលពិធីបរិសុទ្ធនៃពិធីបុណ្យជ្រមុជទឹក និងព្រះវិហារបរិសុទ្ធដ៏សំខាន់របស់ពួកគេ នោះបងប្អូនកំពុងជួយប្រមូលអ៊ីស្រាអែលហើយ ។ វាសាមញ្ញដូច្នោះឯង » ។ វាអាចជារឿងដ៏សប្បាយក្នុងការបង្កើតបញ្ជីនៃសកម្មភាពដែលជាផ្នែកនៃការប្រមូលផ្ដុំអ៊ីស្រាអែល ។ មើលថាអ្នកណាអាចបង្កើតបញ្ជីដែលវែងជាងគេ ! អ្នកក៏អាចចែកចាយជាមួយគ្នាទៅវិញទៅមកនូវកិច្ចការមួយចំនួនដែលអ្នកបានធ្វើក្នុងសប្ដាហ៍នេះ—ឬ ដែលអ្នកដាក់ផែនការដើម្បីធ្វើនៅសប្ដាហ៍ខាងមុខ—ដើម្បីជួយនៅក្នុងកិច្ចការដ៏អស្ចារ្យនៃការប្រមូលផ្ដុំអ៊ីស្រាអែល ។ ( ឧទាហរណ៍អាចរួមមាន ការបង្រៀនថ្នាក់អង្គការបឋមសិក្សា ឬ ថ្នាក់សាលាថ្ងៃអាទិត្យ ការធ្វើពង្សប្រវត្តិ ការចូលរួមក្នុងព្រះវិហារបរិសុទ្ធ ការចែកចាយបទគម្ពីរនៅលើប្រព័ន្ធផ្សព្វផ្សាយសង្គម ឬការជួយនរណាម្នាក់ដែលខ្វះខាត ) ។ តើអ្នកបានឃើញពរជ័យអ្វីខ្លះ ពេលដែលអ្នកបានជួយព្រះក្នុងកិច្ចការរបស់ទ្រង់នៃការប្រមូលផ្តុំរាស្ដ្ររបស់ទ្រង់ឲ្យទៅរកទ្រង់ ?
ស្វែងយល់បន្ថែមទៀត
-
អេសាយ ១១:១១–១២; យេរេមា ១៦:១៤–១៦
-
ប្រធានបទប្រវត្តិសាសនាចក្រ « The Gathering of Israel » បណ្ណាល័យដំណឹងល្អ ។
-
រ័សុល អិម ណិលសុន « ការចូលរួមរបស់បងប្អូនស្រីនៅក្នុងការប្រមូលផ្ដុំសាសន៍អ៊ីស្រាអែល » លីអាហូណា ខែវិច្ឆិកា ឆ្នាំ២០១៨ ទំព័រ ៦៨-៧០