« ការអញ្ជើញមនុស្សទាំងអស់ឲ្យទទួលយកដំណឹងល្អ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ការអញ្ជើញមនុស្សទាំងអស់ឲ្យទទួលយកដំណឹងល្អ
របៀបដែលយើងអញ្ជើញបុត្រាបុត្រីរបស់ព្រះដោយសេចក្តីស្រឡាញ់ឲ្យទទួលបានពរជ័យរបស់ទ្រង់
ស្រមៃថាអ្នកកំពុងដើរតាមផ្លូវជាមួយមិត្តភក្តិម្នាក់ ។ តាមផ្លូវគឺងងឹត ប៉ុន្តែអ្នកមានពិលដើម្បីបំភ្លឺផ្លូវ ។ អ្នកអាចប្រើពិលដើម្បីគ្រាន់តែជួយឲ្យអ្នកស្រួលមើលថាមានអ្វីនៅខាងមុខប៉ុណ្ណោះ ។ ប៉ុន្តែដោយសារតែអ្នកចង់ឲ្យការធ្វើដំណើររបស់មិត្តភក្តិរបស់អ្នកកាន់តែងាយស្រួល អ្នកក៏ចែកចាយពន្លឺរបស់អ្នកជាមួយពួកគេដែរ ។
យើងអញ្ជើញមនុស្សទាំងអស់ឲ្យមកទទួលយកដំណឹងល្អនៃព្រះយេស៊ូវគ្រីស្ទក្នុងហេតុផលដូចគ្នា ៖ ដំណឹងល្អធ្វើឲ្យដំណើរជីវិតរបស់យើងមានពន្លឺ ។ ដំណឹងល្អឆ្លើយសំណួរនៃព្រលឹង និងផ្តល់ឲ្យយើងនូវទស្សនវិស័យ សេចក្ដីសុខសាន្ដ និងសេចក្តីអំណរ ។ ដូច្នេះយើងចែកចាយដំណឹងល្អជាមួយបុត្រាបុត្រីរបស់ព្រះ ព្រោះយើងស្រឡាញ់ពួកគេ និងចង់ឲ្យមនុស្សទាំងអស់ទទួលបានអត្ថប្រយោជន៍មកពីពន្លឺរបស់ទ្រង់ដែរ ( សូមមើល នីហ្វៃទី៣ ១៨:២៤ ) ។
តើវាមានន័យយ៉ាងណា ដើម្បីអញ្ជើញមនុស្សទាំងអស់ឲ្យមកទទួលយកដំណឹងល្អនៃព្រះយេស៊ូវគ្រីស្ទ ?
ក្នុងនាមជាពួកបរិសុទ្ធថ្ងៃចុងក្រោយ យើងខិតខំអញ្ជើញមនុស្សទាំងអស់ឲ្យមកទទួលយកដំណឹងល្អរបស់ព្រះយេស៊ូវគ្រីស្ទ ព្រោះវាជា « ដំណឹងល្អអំពីសេចក្ដីសុខសាន្ដ ហើយ [ គឺជា ] សេចក្ដីដែលបណ្ដាលឲ្យរីករាយចិត្ដ » ( រ៉ូម ១០:១៥ ) ។ យើងអញ្ជើញមនុស្សដទៃឲ្យមកទទួលដំណឹងល្អ « ដោយវាចា និងដោយគំរូ » ។ ការណ៍នេះអាចមានដូចជាការចែកចាយដំណឹងល្អនៅក្នុងជីវិតប្រចាំថ្ងៃ ការបម្រើជាអ្នកផ្សព្វផ្សាយសាសនា និង « ការជួយដល់សមាជិកថ្មី និងសមាជិកដែលត្រឡប់មកកាន់សាសនាចក្រវិញឲ្យរីកចម្រើននៅលើផ្លូវនៃសេចក្តីសញ្ញា ។ » នៅពេលដែលយើងជួយមនុស្សដទៃ « ទទួលយកដំណឹងល្អដែលបានស្ដារឡើងវិញ តាមរយៈសេចក្ដីជំនឿនៅលើព្រះយេស៊ូវគ្រីស្ទ និងដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត » យើងអាចដកពិសោធន៍នូវសេចក្ដីអំណរដ៏ពិត ។
ទិដ្ឋភាពទូទៅនៃប្រធានបទ ៖ កិច្ចការផ្សព្វផ្សាយសាសនា
មគ្គទេសក៍សិក្សាដំណឹងល្អដែលជាប់ទាក់ទង ៖ សាសនាចក្រនៃព្រះយេស៊ូវគ្រីស្ទ ការប្រែចិត្ដជឿ សេចក្ដីសញ្ញាដ៏អស់កល្បអស់កាលជានិច្ច ការប្រមូលផ្តុំអ៊ីស្រាអែល
ផ្នែកទី ១
យើងជួយព្រះសម្រេចកិច្ចការរបស់ទ្រង់ នៅពេលដែលយើងអញ្ជើញមនុស្សទាំងអស់ឲ្យមកទទួលយកដំណឹងល្អនៃព្រះយេស៊ូវគ្រីស្ទ
ព្រះសព្វព្រះទ័យឲ្យបុត្រាបុត្រីរបស់ទ្រង់ទាំងអស់ស្តាប់ឮដំណឹងល្អរបស់ព្រះយេស៊ូវគ្រីស្ទ ដើម្បីពួកគេទាំងអស់គ្នាអាចទទួលបានពរជ័យពីដំណឹងល្អនេះ ។ របៀបមួយដែលព្រះអម្ចាស់នាំយកដំណឹងល្អរបស់ទ្រង់ដល់មនុស្សដទៃគឺដោយការហៅយើងឲ្យ « ប្រកាសព្រះបន្ទូលរបស់ទ្រង់ក្នុងចំណោមប្រជាជនទ្រង់ » ( នីហ្វៃទី៣ ៥:១៣ ) ។ យើងទទួលអារម្មណ៍នៃសេចក្ដីអំណរពេលយើងចែកចាយព្រះបន្ទូលរបស់ទ្រង់ ផ្ដល់ដល់មនុស្សដទៃនូវឱកាសដើម្បីមករកព្រះយេស៊ូវគ្រីស្ទ និងទទួលបាននូវការលួងលោម សេចក្ដីសង្ឃឹម និងសេចក្ដីសុខសាន្ដ ។
រឿងទាំងឡាយដែលត្រូវពិចារណា
-
ព្រលឹងនីមួយៗមានតម្លៃណាស់ចំពោះព្រះ ។ ទ្រង់សព្វព្រះទ័យឲ្យយើងទាំងអស់គ្នាត្រឡប់ទៅរកទ្រង់វិញ ។ សូមអាន គោលលទ្ធិ និងសេចក្ដីសញ្ញា ១៨:១០–១៦ ហើយពិចារណាពីតម្លៃរបស់បុត្រាបុត្រីរបស់ព្រះ ។ ហេតុអ្វីបានជាព្រះអម្ចាស់សព្វព្រះទ័យឲ្យអ្នកចែកចាយដំណឹងល្អជាមួយអ្នកដទៃ ? សូមគិតអំពីនរណាម្នាក់ដែលបានចែកចាយដំណឹងល្អជាមួយអ្នក ឬអ្នកដែលបានជួយអ្នកមករកព្រះគ្រីស្ទ ។ តើជីវិតរបស់អ្នកនឹងខុសគ្នាយ៉ាងដូចម្តេច ប្រសិនបើបុគ្គលនោះមិនបានចែកចាយពន្លឺរបស់ព្រះអង្គសង្គ្រោះជាមួយអ្នកទេនោះ ? កត់ត្រាចំណាប់អារម្មណ៍របស់អ្នក ហើយបន្ទាប់មកសរសេរពីរបៀបដែលអ្នកអាចចែកចាយព្រះបន្ទូលរបស់ទ្រង់ជាមួយអ្នកដទៃ ។
-
យើងជោគជ័យក្នុងការចែកចាយដំណឹងល្អនៅពេលយើងអញ្ជើញមនុស្សដទៃឲ្យរៀនអំពីដំណឹងល្អ ឬក៏គ្រាន់តែមក ហើយមើលថាដំណឹងល្អជាអ្វីក៏បានដែរ ។ ពួកគេអាចទទួលយកការអញ្ជើញរបស់យើង—ឬពួកគេអាចនឹងមិនទទួល ។ សូមអានផ្នែកដែលមានចំណងជើងថា « ចែកចាយរឿងរបស់អ្នក » នៅក្នុងសារលិខិតរបស់អែលឌើរ ឌៀថើរ អេហ្វ អុជដូហ្វ « ដំណើរផ្សងព្រេងដ៏អស្ចារ្យរបស់អ្នក » ។ ចូរពិចារណាពីនរណាម្នាក់ដែលអ្នកអាចអញ្ជើញឲ្យរៀនអំពីដំណឹងល្អ ឬបុគ្គលដែលអ្នកអាចអញ្ជើញម្តងទៀត ។ តើអ្នកអាចបង្ហាញសេចក្តីស្រឡាញ់ និងការគោរពរបស់អ្នកចំពោះបុគ្គលនោះដោយរបៀបណានៅពេលអ្នកអញ្ជើញពួកគេ ? តើការណ៍នេះអាចជួយពួកគេឲ្យទទួលអារម្មណ៍នៃសេចក្តីស្រឡាញ់របស់ព្រះអង្គសង្រ្គោះចំពោះពួកគេបានដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅពេលដែលយើងចែកចាយដំណឹងល្អរបស់ព្រះយេស៊ូវគ្រីស្ទ វាសំខាន់ក្នុងការភ្ជាប់ជាមួយអ្នកដទៃតាមរបៀបដែលពួកគេចង់បាន ឬត្រូវការ ។ សូមអានគំនិតមួយចំនួនរួមគ្នាសម្រាប់របៀបធ្វើដូច្នេះនៅក្នុង « ស្វែងយល់ពីស្ថានភាពរបស់ពួកគេ » ក្នុង ជំពូកទី ៩ នៃ ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ។ និយាយអំពីសំណួរ និងគំនិតនៅក្នុងផ្នែកនេះ ហើយព្រាងគំនិតផ្សេងទៀត ។ បន្ទាប់មកសម្ដែងធ្វើការសន្ទនាអំពីរបៀបដែលអ្នកអញ្ជើញនរណាម្នាក់ឲ្យរៀនអំពីដំណឹងល្អ ។ បន្ទាប់មក អនុវត្ដគោលការណ៍ទាំងនេះនៅក្នុងជីវិតរបស់អ្នកផ្ទាល់ ពេលអ្នកអញ្ជើញមនុស្សដទៃឲ្យមករកព្រះគ្រីស្ទ ។
-
សូមអាន គោលលទ្ធិ និងសេចក្ដីសញ្ញា ៤ ជាមួយគ្នា ហើយនិយាយអំពីអ្នកដែលត្រូវបានហៅឲ្យចែកចាយដំណឹងល្អរបស់ព្រះយេស៊ូវគ្រីស្ទ ( សូមមើល ខទី ៣ ) ។ បន្ទាប់មកពិភាក្សាអំពីគុណលក្ខណៈដូចព្រះគ្រីស្ទដែលបានរាយនៅក្នុងខទី ៥–៦ និងរបៀបដែលគុណលក្ខណៈទាំងនេះអាចជួយយើងចែកចាយព្រះបន្ទូលរបស់ទ្រង់ ។ អ្នកអាចលេងហ្គេមជាមួយគ្នាដើម្បីជួយអ្នកចងចាំគុណលក្ខណៈទាំងនេះ ។ ចាប់ផ្តើមដោយបោះបាល់ទៅនរណាម្នាក់នៅក្នុងក្រុមរបស់អ្នក ។ នៅពេលដែលបុគ្គលនោះចាប់បាល់បាន សូមឲ្យពួកគេនិយាយពីគុណលក្ខណៈមួយដែលអ្នកបានពិភាក្សា ។ បន្តជាមួយការលេងហ្គេមរហូតដល់គុណលក្ខណៈទាំងអស់ត្រូវបានលើកឡើង ។ អ្នកអាចលេងបានច្រើនជុំ ហើយមើលថាតើអ្នកអាចលេងបានកាន់តែលឿននៅជុំបន្ដបន្ទាប់ទៀតឬទេ ។ ជ្រើសយកគុណលក្ខណៈមួយដើម្បីអភិវឌ្ឍ ហើយសង្កេតមើលពីរបៀបដែលគុណលក្ខណៈនោះបានជួយអ្នកអញ្ជើញអ្នកដទៃឲ្យមកទទួលយកដំណឹងល្អនៃព្រះយេស៊ូវគ្រីស្ទនាពេលខាងមុខ ។
ស្វែងយល់បន្ថែមទៀត
-
ម៉ាកុស ១៦:១៥; យ៉ូហាន ៤:៣៥–៣៨
-
អិម រ័សុល បាឡឺដ « The Essential Role of Member Missionary Work » Liahona ខែឧសភា ឆ្នាំ២០០៣ ទំព័រ ៣៧–៤០
-
ឌី ថត គ្រីស្តូហ្វឺសិន « Sharing the Message of the Restoration and the Resurrection » Liahona ខែឧសភា ឆ្នាំ២០២០ ទំព័រ ១១០–១១៣
-
សេចក្ដីណែនាំដល់បទគម្ពីរទាំងឡាយ « កិច្ចការផ្សព្វផ្សាយសាសនា » នៅក្នុងបណ្ណាល័យដំណឹងល្អ
ផ្នែកទី ២
យើងអាចជួយមនុស្សដទៃទទួលយកដំណឹងល្អរបស់ព្រះយេស៊ូវគ្រីស្ទ ពេលយើងស្រឡាញ់ ចែកចាយ និង អញ្ជើញ
ក្នុងនាមជាសមាជិកនៃសាសនាចក្រ យើងចង់ឲ្យមនុស្សគ្រប់គ្នាទទួលយកដំណឹងល្អរបស់ព្រះយេស៊ូវគ្រីស្ទ « ដោយសារយើងស្រឡាញ់ព្រះ និងបុត្រាបុត្រីរបស់ទ្រង់ » ហើយយើងចង់ឲ្យអ្នកដទៃទទួលអារម្មណ៍នៃសេចក្ដីអំណរដូចដែលយើងទទួលបាន ។ ការនាំយកដំណឹងល្អទៅកាន់អ្នកដទៃគឺសាមញ្ញ—យើងគ្រាន់តែត្រូវការស្រឡាញ់ ចែកចាយ និង អញ្ជើញប៉ុណ្ណោះ ។ ពេលខ្លះយើងធ្វើកិច្ចការនេះតាមរយៈការបម្រើបេសកកម្មនៅក្នុងសាសនាចក្រ ។ ជាញឹកញាប់ យើងស្រឡាញ់ ចែកចាយ និងអញ្ជើញដោយការរស់នៅតាមគោលការណ៍នៃដំណឹងល្អ និងនិយាយអំពីជំនឿរបស់យើងតាមរបៀបសាមញ្ញ និងធម្មតា ។ ពេលយើងចែកចាយដំណឹងល្អជាមួយមនុស្សនៅគ្រប់ទិសទី យើងជួយរៀបចំបុត្រាបុត្រីរបស់ទ្រង់សម្រាប់ជីវិតដ៏នៅអស់កល្បជានិច្ច ។
រឿងទាំងឡាយដែលត្រូវពិចារណា
-
ពេលខ្លះយើងប្រហែលជាចង់ចែកចាយដំណឹងល្អរបស់ព្រះយេស៊ូវគ្រីស្ទ ប៉ុន្តែមិនប្រាកដថាត្រូវចាប់ផ្តើមពីកន្លែងណា ។ ពិនិត្យមើលសារលិខិតរបស់អែលឌើរ ហ្គែរី អ៊ី ស្ទីវ៉ែនសុន « ស្រឡាញ់ ចែកចាយ អញ្ជើញ » សម្រាប់ការបំផុសគំនិតអំពីរបៀបចែកចាយដំណឹងល្អតាមរបៀបសាមញ្ញ និងធម្មតា ។ បន្ទាប់មកសូមអាន ម៉ាថាយ ៧:៧ និង នីហ្វៃទី៣ ១៨:២០ ហើយពិចារណាពីរបៀបដែលអ្នកអាចទូលសុំជំនួយពីព្រះអម្ចាស់ក្នុងការចែកចាយដំណឹងល្អរបស់ទ្រង់ជាមួយមនុស្សដទៃ រួមទាំងមិត្តភក្តិ អ្នកជិតខាង និងមនុស្សជាទីស្រឡាញ់របស់អ្នក ។ សូមអធិស្ឋានទូលសុំការណែនាំរបស់ទ្រង់ ហើយបន្ទាប់មករកមើលឱកាសដើម្បីផ្សព្វផ្សាយសាសនា ។ កត់ត្រាពីរបៀបដែលអ្នកមើលឃើញព្រះហស្ដរបស់ព្រះអម្ចាស់ ពេលអ្នកអញ្ជើញមនុស្សដទៃឲ្យរៀនអំពីដំណឹងល្អរបស់ទ្រង់ដោយក្ដីស្រឡាញ់ ។
-
នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងមានឱកាសដើម្បីបម្រើជាអ្នកផ្សព្វផ្សាយសាសនា ។ សូមអាន « ការផ្សាយដំណឹងល្អនៃភាពសុខសាន្ដ » ដោយ ប្រធាន រ័សុល អិម ណិលសុន និង « អ្នកនឹងមានអំណរដ៏មហិមា » ដោយ អែលឌើរ រ៉ូណល អេ រ៉ាសបាន ។ ហេតុអ្វីបានជាព្រះអម្ចាស់ត្រូវការពួកអ្នកផ្សព្វផ្សាយសាសនាគ្រប់វ័យដើម្បីនាំដំណឹងល្អរបស់ទ្រង់ទៅកាន់មនុស្សដទៃ ? តើទ្រង់ប្រទានពរដល់ពួកគេសម្រាប់ការខិតខំប្រឹងប្រែងរបស់ពួកគេយ៉ាងដូចម្តេច ? សូមពិចារណាពីរបៀបដែលអ្នកបានឃើញពួកអ្នកផ្សព្វផ្សាយសាសនាធ្វើតាមគោលការណ៍នៃការស្រឡាញ់ ការចែកចាយ និងការអញ្ជើញជួយមនុស្សដទៃមករកព្រះគ្រីស្ទ ។ តើយើងអាចធ្វើអ្វីខ្លះ ដើម្បីធ្វើតាមគំរូរបស់ពួកគេ ? អ្នកក៏អាចពិចារណាផងដែរថាតើអ្នកអាចបម្រើបេសកកម្ម ហើយចាប់ផ្តើមរៀបចំសម្រាប់ឱកាសនោះ ។
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុងសារលិខិតរបស់លោក « កិច្ចការផ្សព្វផ្សាយសាសនា ៖ ការចែកចាយអំពីអ្វីដែលមាននៅក្នុងដួងចិត្តបងប្អូន » អែលឌើរ ឌៀថើរ អេហ្វ អុជដូហ្វ បានផ្តល់ការណែនាំសាមញ្ញចំនួនប្រាំ សម្រាប់ការចែកចាយដំណឹងល្អ ។ ពិនិត្យមើលការណែនាំទាំងនេះជាមួយគ្នា ហើយនិយាយអំពីរបៀបដែលយើងអាចយកការណែនាំទាំងនោះទៅអនុវត្តនៅក្នុងជីវិតរបស់យើង ។ អ្នកក៏អាចមើល « Simple Ways to Love, Share, and Invite » ឬ « Simple Ways to Love, Share, and Invite for Youth » ហើយពិភាក្សាអំពីរបៀបដែលយើងអាចចែកចាយដំណឹងល្អជាមួយមនុស្សដទៃតាមរបៀបសាមញ្ញបានផងដែរ ។ កាលអ្នកបានទទួលការបំផុសគំនិត សូមអនុវត្ដគោលការណ៍ទាំងនេះ ដោយការចែកចាយដំណឹងល្អនៅក្នុងជីវិតប្រចាំថ្ងៃរបស់អ្នកតាមធម្មតា ។ អ្នកអាចជួបគ្នាម្តងទៀតដើម្បីនិយាយអំពីកិច្ចខិតខំប្រឹងប្រែងរបស់អ្នក និងអ្វីដែលអ្នកបានរៀនអំពីកិច្ចការផ្សព្វផ្សាយសាសនានៅក្នុងដំណើរការនេះ ។
-
ការបម្រើបេសកកម្មអាចជាឱកាសផ្លាស់ប្តូរជីវិត ។ សូមអាន « ការបម្រើជាអ្នកផ្សព្វផ្សាយសាសនាបានផ្ដល់ពរដល់ជីវិតខ្ញុំជារៀងរហូត » ដោយ ប្រធាន អិម. រ័សុល បាឡឺដ ដើម្បីស្វែងយល់អំពីពរជ័យមួយចំនួនដែលបានមកពីការបម្រើបេសកកម្ម ។ ប្រសិនបើអ្នកបានបម្រើបេសកកម្មហើយ សូមពិចារណាចែកចាយពីរបៀបដែលការបម្រើរបស់អ្នកបានប្រទានពរដល់ជីវិតរបស់អ្នក ។ បន្ទាប់មកពិភាក្សាអំពីរបៀបដែលសមាជិកនៃសាសនាចក្រមានឱកាសដើម្បីស្រឡាញ់ ចែកចាយ និងអញ្ជើញក្នុងនាមជា អ្នកផ្សព្វផ្សាយសាសនាពេញម៉ោង អ្នកផ្សព្វផ្សាយសាសនាផ្នែកសេវាកម្ម និងអ្នកផ្សព្វផ្សាយសាសនារៀមច្បង ហើយពិភាក្សាអំពីទំនួលខុសត្រូវផ្សេងៗរបស់ការបម្រើទាំងនោះ ។ អ្នកក៏អាចច្រៀង « ខ្ញុំនឹងទៅដែលទ្រង់ឲ្យខ្ញុំទៅ » ជាមួយគ្នា ហើយពិភាក្សាអំពីរបៀបដែលព្រះអម្ចាស់នឹងជួយយើងឲ្យស្រឡាញ់ ចែកចាយ និងអញ្ជើញនៅគ្រប់ពេលដែលទ្រង់សុំឲ្យយើងបម្រើ ( សូមមើល នីហ្វៃទី១ ៣:៧ ) ។
ស្វែងយល់បន្ថែមទៀត
-
ម៉ាថាយ ៥:១៤–១៦; រ៉ូម ១:១៦; គោលលទ្ធិ និងសេចក្ដីសញ្ញា ៣៣:៥–៩
-
ដាល្លិនអេក អូក « Sharing the Restored Gospel » Liahona ខែវិច្ឆិកា ឆ្នាំ២០១៦ ទំព័រ ៥៧–៦០
-
ហ្គែរី អ៊ី ស្ទីវ៉ែនសុន « ការថែទាំ និងការថ្លែងទីបន្ទាល់របស់បងប្អូន » លីអាហូណា ខែវិច្ឆិកា ឆ្នាំ២០២២ ទំព័រ ១១១–១១៤
-
នែល អិល អាន់ឌើរសិន « It’s a Miracle » Liahona ខែឧសភា ឆ្នាំ២០១៣ ទំព័រ ៧៧–៨០
-
ការចែកចាយដំណឹងល្អ ធនធានទាំងឡាយនៅក្នុងបណ្ណាល័យដំណឹងល្អ