« យ៉ូសែប ស៊្មីធ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
យ៉ូសែប ស៊្មីធ
ជាព្យាការីដែលព្រះបានជ្រើសរើស ដើម្បីស្តារដំណឹងល្អរបស់ព្រះយេស៊ូវគ្រីស្ទ
ព្យាការី យ៉ូសែប ស្ម៊ីធ បានសម្រេចនូវរឿងដែលមិនគួរឲ្យជឿក្នុងជីវិតដ៏ខ្លីរបស់លោក ។ ក្នុងនាមជាព្យាការីដែលបានជ្រើសរើសរបស់ព្រះ លោកបានបកប្រែព្រះគម្ពីរមរមន « ដោយអំណោយទាន និងព្រះចេស្តានៃព្រះ » ( បុព្វកថាអំពីព្រះគម្ពីរមរមន ) បានទទួលការនិមិត្ដ និងវិវរណៈ និងរៀបចំសាសនាចក្រនៃព្រះយេស៊ូវគ្រីស្ទនៅលើផែនដីឡើង ។ វាអាចស្តាប់ទៅហាក់ដូចជាមិនអាចទៅរួចទេ ដែលមានមនុស្សម្នាក់អាចធ្វើការបានច្រើនដូចនេះ ។ ប៉ុន្តែ យ៉ូសែបមានបេសកកម្មដ៏ទេវភាពដើម្បីស្តារឡើងវិញនូវដំណឹងល្អរបស់ព្រះយេស៊ូវគ្រីស្ទ ហើយព្រះអម្ចាស់បានរៀបចំវិធីមួយសម្រាប់លោក ដើម្បីបំពេញកិច្ចការរបស់ទ្រង់ ។
ដោយសារព្យាការី យ៉ូសែប ស្ម៊ីធ យើងដឹងថា ព្រះស្រឡាញ់យើង ហើយនៅតែមានបន្ទូលមកកាន់យើងសព្វថ្ងៃនេះ ។ យើងដឹងថាទ្រង់មានផែនការមួយសម្រាប់បុត្រាបុត្រីរបស់ទ្រង់ ហើយបានរៀបចំផ្លួវសម្រាប់ពួកគេដើម្បីទៅរស់នៅជាមួយទ្រង់ម្តងទៀត ។ ហើយយើងដឹងថានេះគឺជា « កិច្ចការ [ របស់ទ្រង់ ] និងសិរីល្អ [ របស់ទ្រង់ ]—គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។
តើ យ៉ូសែប ស្ម៊ីធ ជានរណា ?
យ៉ូសែប ស្ម៊ីធ ជុញ្ញ័រ បានកើតនៅឆ្នាំ១៨០៥ នៅរដ្ឋ វើរម៉ុន ស.រ.អា. ។ ព្រះបានហៅ យ៉ូសែប ដើម្បីធ្វើជាព្យាការី និងដើម្បីស្តារឡើងវិញនូវដំណឹងល្អរបស់ព្រះយេស៊ូវគ្រីស្ទនៅក្នុងសម័យរបស់យើង ។ លោកគឺជាប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ព្យាការី យ៉ូសែប ស្ម៊ីធ បានទទួលការនិមិត្ដ និងវិវរណៈដ៏ពិសិដ្ឋ ។ ព្រះជាព្រះវរបិតា និងព្រះយេស៊ូវគ្រីស្ទបានបង្ហាញព្រះកាយដល់ យ៉ូសែប ស្ម៉ីធ ។ លោកបានទទួលសិទ្ធិអំណាចបុព្វជិតភាពពីសារទូតស្ថានសួគ៌ ហើយបានបកប្រែព្រះគម្ពីរមរមន និងបទគម្ពីរបុរាណផ្សេងទៀតដោយអំណោយទាន និងព្រះចេស្តានៃព្រះ ។ យ៉ូសែបត្រូវបានធ្វើទុក្ខបុកម្នេញជាញឹកញាប់សម្រាប់ទីបន្ទាល់របស់លោក ប៉ុន្តែលោកនៅតែស្មោះត្រង់ចំពោះទីបន្ទាល់នោះរហូតដល់ចុងបញ្ចប់នៃជីវិតរបស់លោក នៅពេលដែលលោក និងបងប្រុសរបស់លោក ហៃរុម ត្រូវបានសម្លាប់ដោយពួកមនុស្សកំណាចនៅឆ្នាំ១៨៤៤ ។
ទិដ្ឋភាពទូទៅនៃប្រធានបទ ៖ យ៉ូសែប ស្ម៊ីធ
មគ្គទេសក៍សិក្សាដំណឹងល្អដែលជាប់ទាក់ទង ៖, ព្យាការី, ការស្តារឡើងវិញនៃដំណឹងល្អ, ការនិមិត្តដំបូង, ព្រះគម្ពីរមរមន, ការស្តារឡើងវិញនៃបព្វជិតភាព
ផ្នែកទី ១
យ៉ូសែប ស្ម៊ីធ គឺជាសាក្សីដ៏ស្មោះស្ម័គ្រម្នាក់របស់ព្រះជាព្រះវរបិតា និងព្រះរាជបុត្រាទ្រង់គឺ ព្រះយេស៊ូវគ្រីស្ទ
នៅពេលដែល យ៉ូសែប ស្ម៊ីធ មានអាយុត្រឹមតែ ១៤ ឆ្នាំ លោកបានឃើញព្រះជាព្រះបិតា និងព្រះរាជបុត្រាទ្រង់គឺព្រះយេស៊ូវគ្រីស្ទ ( សូមមើល យ៉ូសែប ស្ម៊ីធ—ប្រវត្តិ ១:១៥–១៧ ) ។ ព្រឹត្តិការណ៍នេះត្រូវបានស្គាល់ថាជាការនិមិត្តដំបូង និងបានសម្គាល់ពីការចាប់ផ្តើមនៃការស្តារឡើងវិញនៃដំណឹងល្អ ។ ខណៈដែលការស្តារឡើងវិញបានបន្តលាតត្រដាង យ៉ូសែបបានធ្វើជាសាក្សីនៃព្រះវរបិតាសួគ៌ និងព្រះយេស៊ូវគ្រីស្ទនៅក្នុងការនិមិត្តផ្សេងទៀត និងបានធ្វើទីបន្ទាល់អំពីទ្រង់ទាំងទ្វេ ( សូមមើល គោលលទ្ធិ និងសេចក្ដីសញ្ញា ៧៦:១៩–២៤; ១៣៧:១–៣ ) ។
យ៉ូសែបបានប្រឈមមុខនឹងការសាកល្បងជាច្រើន និងត្រូវបានធ្វើទុក្ខបុកម្នេញសម្រាប់អ្វីដែលលោកដឹងថាជាការពិត ។ ប៉ុន្តែមិនថាការរងទុក្ខរបស់លោកខ្លាំងប៉ុនណាក៏ដោយ ក៏លោកនឹងមិនបដិសេធទីបន្ទាល់របស់លោកអំពីព្រះ និងព្រះយេស៊ូវគ្រីស្ទ ឬថាលោកត្រូវបានហៅឲ្យធ្វើកិច្ចការរបស់ព្រះអម្ចាស់ដែរ ( សូមមើល យ៉ូសែប ស្ម៊ីធ—ប្រវត្តិ ១:២៥ ) ។ នៅចុងបញ្ចប់នៃជីវិតរបស់លោក ព្យាការីបានបិទទីបន្ទាល់របស់លោកជាមួយនឹងលោហិតរបស់លោកនៅពេលដែលលោកត្រូវបានគេធ្វើទុក្ករកម្មនៅក្នុងពន្ធនាគារ កាតធេច ( សូមមើល គោលលទ្ធិ និងសេចក្ដីសញ្ញា ១៣៥:១–៣; សូមមើលផងដែរ ពួកបរិសុទ្ធ, ១:៥៤២–៥៥២ ) ។ ភាពស្មោះត្រង់របស់លោកចំពោះកិច្ចការរបស់ព្រះអម្ចាស់បានជួយនាំដំណឹងល្អទៅដល់បុត្រាបុត្រីរបស់ព្រះនៅលើផែនដីម្តងទៀត ( សូមមើល គោលលទ្ធិ និងសេចក្ដីសញ្ញា ១៣៦:៣៧–៣៨ ) ។
រឿងទាំងឡាយដែលត្រូវពិចារណា
-
ទីបន្ទាល់ដ៏មានឥទ្ធិពលរបស់យ៉ូសែប ស្ម៊ីធ អំពីព្រះយេស៊ូវគ្រីស្ទត្រូវបានកត់ត្រានៅក្នុងព្រះគម្ពីរ ។ សូមអានទីបន្ទាល់របស់លោកនៅក្នុង គោលលទ្ធិ និងសេចក្ដីសញ្ញា ៧៦:២២–២៤ និង គោលលទ្ធិ និងសេចក្ដីសញ្ញា ១១០:១–៤ ។ សូមជញ្ជឹងគិតពីអ្វីដែលអ្នករៀនអំពីព្រះយេស៊ូវគ្រីស្ទចេញមកពីខគម្ពីរទាំងនេះ ។ បន្ទាប់មកពិចារណាពីទីបន្ទាល់ផ្ទាល់ខ្លួនរបស់អ្នកអំពីព្រះអង្គសង្គ្រោះ ( សូមមើល នីហ្វៃទី២ ៣១:១៨ ) ។ តើទីបន្ទាល់របស់ព្យាការី យ៉ូសែប ស្ម៊ីធ អំពីព្រះយេស៊ូវគ្រីស្ទមានឥទ្ធិពលលើទីបន្ទាល់របស់អ្នកផ្ទាល់យ៉ាងដូចម្ដេចខ្លះ ? អ្នកក៏អាចនឹងកត់ត្រាទីបន្ទាល់របស់អ្នក ឬបទពិសោធន៍ផ្ទាល់ខ្លួនផ្សេងទៀតដែលបាននាំអ្នកឲ្យខិតកាន់តែជិតព្រះអម្ចាស់ផងដែរ ។
សកម្មភាពសម្រាប់ការរៀនសូត្រជាមួយអ្នកដទៃ
-
នៅអាយុ ១៤ ឆ្នាំ យ៉ូសែប ស្មីធ បានធ្វើទីបន្ទាល់ជាលើកដំបូងអំពីព្រះវរបិតាសួគ៌ និងព្រះយេស៊ូវគ្រីស្ទ ។ ស្វែងយល់អំពីទីបន្ទាល់នេះដោយការអាន យ៉ូសែប ស្ម៊ីធ—ប្រវត្តិ ១:១៤–២០ ជាមួយគ្នា ។ តើយើងអាចរៀនអ្វីខ្លះចេញពីដំណើររឿងនេះ អំពីព្រះវរបិតាសួគ៌ និងព្រះយេស៊ូវគ្រីស្ទ ? តើពិភពលោកបានផ្លាស់ប្តូរយ៉ាងដូចម្តេចខ្លះដោយសារតែទីបន្ទាល់របស់ យ៉ូសែប ? ចែកចាយគំនិតរបស់អ្នក ហើយបន្ទាប់មកមើលវីដេអូ « #HearHim: Listen to the Voice of Jesus Christ » ( នាទីទី ១:៤៧ ) ជាក្រុម ។ តើអ្នកឮព្រះសូរសៀងរបស់ព្រះអង្គសង្គ្រោះដោយរបៀបណា ? ( សូមមើលផងដែរ គោលលទ្ធិ និងសេចក្ដីសញ្ញា ៦:២២–២៤; ៨:២–៣; ៩:៨–៩;; ១១:១២–១៣ ) ។ សូមពិភាក្សាអំពីគំនិតរបស់អ្នក ហើយបន្ទាប់មកនិយាយអំពីឥទ្ធិពលដែលទីបន្ទាល់របស់អ្នកអាចមានលើអ្នកដទៃ នៅពេលអ្នកបានស្តាប់ឮព្រះអង្គសង្គ្រោះដូច យ៉ូសែប ដែរ ។
-
ទីបន្ទាល់របស់សយ៉ូសែប អំពីព្រះអង្គសង្គ្រោះត្រូវបានរួមបញ្ចូលនៅក្នុង « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ។ សូមអានទីបន្ទាល់របស់ព្យាការីនៅក្នុងសេចក្តីប្រកាសជាមួយគ្នា និងពិភាក្សាអំពីសាវតារប្រវត្តិសាស្រ្តសម្រាប់ការនិមិត្ដដែលលោកបានទទួល ។ អ្នកក៏អាចធ្វើការទន្ទេញទីបន្ទាល់របស់ព្យាការីជាក្រុមបានផងដែរ ។ ប្រហែលអ្នកអាចសូត្រពាក្យទាំងនោះឲ្យឮៗ ហើយប្រើរូបភាពមកពី បណ្ណាល័យប្រព័ន្ធផ្សព្វផ្សាយ របស់សាសនាចក្រ ឬបង្កើតរូបភាពផ្សេងទៀតដើម្បីជួយអ្នក ។ សូមនិយាយអំពីរបៀបដែលការទន្ទេញទីបន្ទាល់របស់ព្យាការីអាចបង្កើនសេចក្តីជំនឿផ្ទាល់ខ្លួនរបស់អ្នកនៅលើព្រះយេស៊ូវគ្រីស្ទ និងជាប្រភពនៃព្រះចេស្តា ការលើកទឹកចិត្ត ការបំផុសគំនិត និងការលួងលោម ។
ស្វែងយល់បន្ថែមទៀត
-
អិម រ័សុល បាឡឺដ « សរសើរដល់លោក » លីអាហូណា ខែវិច្ឆិកា ឆ្នាំ២០២៣ ទំព័រ ៧៤–៧៥
-
« Testimony of the Book of Mormon» ( វីដេអូ ) បណ្ណាល័យដំណឹងល្អ
-
« The First Vision » « Tutored by Heaven » « Strengthened by Trials » « Sealed His Testication with His Blood » ( វីដេអូ ) បណ្ណាល័យដំណឹងល្អ
ផ្នែកទី ២
យ៉ូសែប ស៊្មីធ ត្រូវបានជ្រើសរើសដោយព្រះដើម្បីស្ដារដំណឹងល្អរបស់ព្រះយេស៊ូវគ្រីស្ទឡើងវិញ
ព្រះបានជ្រើសរើសព្យាការី យ៉ូសែប ស្ម៊ីធ ដើម្បីស្តារភាពពេញលេញនៃដំណឹងល្អរបស់ព្រះយេស៊ូវគ្រីស្ទនៅលើផែនដី ( សូមមើល គោលលទ្ធិ និងសេចក្ដីសញ្ញា ១:១៧; ២៧:១៣ « ការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » បណ្ណាល័យដំណឹងល្អ ) ។ តាមរយៈព្រះចេស្តារបស់ព្រះ យ៉ូសែបបានបកប្រែព្រះគម្ពីរមរមន និងបាននាំមកនូវបទគម្ពីរបន្ថែម ( សូមមើល បុព្វកថានៃព្រះគម្ពីរមរមន; គោលលទ្ធិ និងសេចក្ដីសញ្ញា ១៣៥:៣ ) ។ លោកបានរៀបចំសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយឡើង ទទួលបានសិទ្ធិអំណាចបព្វជិតភាព និងរៀបចំពួកបរិសុទ្ធដើម្បីបង្កើតស៊ីយ៉ូន ( សូមមើល គោលលទ្ធិ និងសេចក្ដីសញ្ញា ២០:១; ពួកបរិសុទ្ធ, ១:១០៨–១០៩ ) ។
ដោយសារតែបេសកកម្មរបស់ យ៉ូសែប ស្ម៊ីធ យើងដឹងថាព្រះមានផែនការសម្រាប់បុត្រាបុត្រីរបស់ទ្រង់ ហើយយើងអាចទទួលបានពិធីបរិសុទ្ធ និងធ្វើសេចក្តីសញ្ញាជាមួយនឹងទ្រង់នៅក្នុងដំណាក់របស់ព្រះអម្ចាស់ ។ កិច្ចការរបស់យ៉ូសែប បានចាក់គ្រឹះសម្រាប់ដំណឹងល្អរបស់ព្រះយេស៊ូវគ្រីស្ទនៅថ្ងៃចុងក្រោយ ដែលអនុញ្ញាតឲ្យសាសនាចក្រឆ្ពោះទៅមុខក្រោមការដឹកនាំដែលបានបំផុសគំនិតរបស់ព្យាការី អ្នកមើលឆុត និងអ្នកទទួលវិវរណៈ ( សូមមើល ពួកបរិសុទ្ធ, ១:៥១៩–៥២០ ) ។
រឿងទាំងឡាយដែលត្រូវពិចារណា
-
ប្រធាន ជែហ្វ្រី អ័រ ហូឡិន បានធ្វើទីបន្ទាល់ថា « ខ្ញុំដឹងថា យ៉ូសែប ស្ម៊ីធ បានទទួលស្គាល់ថា លោកមិនល្អឥតខ្ចោះនោះ ជាឧបករណ៍ដ៏ជម្រើសនៅក្នុងព្រះហស្តរបស់ព្រះ ដើម្បីស្តារឡើងវិញនូវដំណឹងល្អដ៏អស់កល្បដល់ផែនដី ។ ខ្ញុំក៏ដឹងថា ការណ៍ដូច្នោះ—មួយផ្នែកគឺតាមរយៈការបកប្រែព្រះគម្ពីរមរមន—លោកបានបង្រៀនខ្ញុំថែមទៀតអំពីក្ដីស្រឡាញ់របស់ព្រះ ទេវភាពរបស់ព្រះគ្រីស្ទ និងអំណាចបព្វជិតភាពច្រើន ជាងព្យាការីផ្សេងទៀតដែលខ្ញុំធ្លាប់បានអាន ស្គាល់ ឬឮពេញមួយជីវិតនៃការស្វែងរករបស់ខ្ញុំ » ។ តើព្យាការី យ៉ូសែប ស្ម៊ីធ បានបង្រៀនអ្វីខ្លះអំពីសេចក្តីស្រឡាញ់របស់ព្រះ ទេវភាពរបស់ព្រះគ្រីស្ទ និងអំណាចបព្វជិតភាព តាមរយៈការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ ? តើការបង្រៀនទាំងនោះធ្វើជាទីបន្ទាល់ដល់អ្នកយ៉ាងដូចម្តេចថា យ៉ូសែប ស្មីធ ត្រូវបានជ្រើសរើសដោយព្រះ ? សូមកត់ត្រាការបំផុសគំនិតណាមួយដែលអ្នកទទួលបាន ។
សកម្មភាពសម្រាប់ការរៀនសូត្រជាមួយអ្នកដទៃ
-
យើងរីករាយជាមួយពរជ័យជាច្រើន ព្រោះព្រះបានស្តារដំណឹងល្អតាមរយៈ យ៉ូសែប ស្មីធ ។ ជាក្រុម សូមព្យាយាមបង្កើតបញ្ជីនៃពរជ័យទាំងនោះ ។ អ្នកអាចចាប់ផ្តើមជាមួយនឹងពរជ័យទាំងនោះដែលបានរៀបរាប់នៅក្នុង គោលលទ្ធិ និងសេចក្ដីសញ្ញា ១៣៥:៣ ។ ប្រសាសន៍ទាំងនេះមកពីប្រធាន រ័សុល អិម ណិលសុន ក៏អាចផ្តល់ឲ្យអ្នកនូវគំនិតមួយចំនួនផងដែរ ៖ « [ការស្តារឡើងវិញនៃដំណឹងល្អ ] មានន័យថា បងប្អូន និងគ្រួសារបងប្អូនអាចត្រូវបានផ្សារភ្ជាប់ជាមួយគ្នាជានិរន្ដរ៍ ! វាមានន័យថា ដោយសារតែបងប្អូនបានទទួលបុណ្យជ្រមុជទឹកដោយមនុស្សម្នាក់ដែលមានសិទ្ធិអំណាចមកពីព្រះយេស៊ូវគ្រីស្ទ ហើយបានបញ្ជាក់ជាសមាជិកនៃសាសនាចក្ររបស់ទ្រង់ នោះបងប្អូនអាចរីករាយនឹងភាពជាដៃគូនៃព្រះវិញ្ញាណបរិសុទ្ធដ៏ខ្ជាប់ខ្ជួន ។ ទ្រង់នឹងដឹកនាំ ហើយការពារបងប្អូន ។ វាមានន័យថាបងប្អូននឹងមិនទុកឲ្យនៅឯកោ ឬពុំអាចទទួលបានព្រះចេស្ដានៃព្រះដើម្បីជួយបងប្អូននោះទេ ។ វាមានន័យថាអំណាចបព្វជិតភាពអាចប្រទានពរដល់បងប្អូន នៅពេលបងប្អូនទទួលពិធីបរិសុទ្ធដ៏សំខាន់ ហើយធ្វើសេចក្ដីសញ្ញាជាមួយនឹងព្រះ ហើយរក្សាសេចក្ដីសញ្ញាទាំងនោះ ។ បន្ទាប់មកសូមនិយាយអំពីរបៀបដែលអ្នកអាចបង្ហាញពីការដឹងគុណរបស់អ្នកចំពោះអ្វី ដែលព្រះអម្ចាស់បានប្រទានឲ្យអ្នកតាមរយៈព្យាការីរបស់ទ្រង់ យ៉ូសែប ស្ម៊ីធ ។
-
តើអ្នកដឹងទេថាព្យាការីម្នាក់ទៀតឈ្មោះ យ៉ូសែប ដែលបានរស់នៅក្នុងសម័យបុរាណ បានមើលឃើញបេសកកម្មរបស់ យ៉ូសែប ស្ម៊ីធ ? សូមអាន នីហ្វៃទី២ ៣:៦–១៥ ដើម្បីស្វែងយល់ពីអ្វីដែលយ៉ូសែបនៃអេស៊ីព្ទបានព្យាករអំពី យ៉ូសែប ស្ម៊ីធ និងកិច្ចការដ៏សំខាន់របស់លោក ។ តើពាក្យអ្វីខ្លះដែលត្រូវបានប្រើដើម្បីពិពណ៌នាអំពី យ៉ូសែប ស្ម៊ីធ នៅក្នុងខគម្ពីរទាំងនេះ ? តើព្រះបានរៀបចំលោកឲ្យធ្វើអ្វីខ្លះ ? និយាយជាមួយគ្នាទៅវិញទៅមកអំពីអ្វីដែលអ្នកបានរកឃើញ ។ អ្នកក៏អាចពិភាក្សាអំពីពរជ័យដែលបានសន្យានៅក្នុងការព្យាករនេះ និងរបៀបដែលពរជ័យទាំងនោះបានកើតឡើងតាមរយៈការស្តារឡើងវិញផងដែរ ។
ស្វែងយល់បន្ថែមទៀត
-
ដាល្លិន អេក អូក,« Joseph, the Man and the Prophet » Ensign ខែឧសភា ឆ្នាំ១៩៩៦ ទំព័រ ៧១–៧៣
-
ថាត អរ ខាលីស្ទើ « Joseph Smith—Prophet of the Restoration » Liahona ខែវិច្ឆិកា ឆ្នាំ២០០៩ ទំព័រ ៣៥–៣៧
-
« Ministry of Joseph Smith: The Book of Mormon » « Ministry of Joseph Smith: The Restoration of Priesthood Authority » ( វីដេអូ ) បណ្ណាល័យដំណឹងល្អ
-
« Teachings of Joseph Smith: The Organization of the Church » ( វីដេអូ ) បណ្ណាល័យដំណឹងល្អ
ផ្នែកទី ៣
អ្នកអាចទទួលបានទីបន្ទាល់ផ្ទាល់ខ្លួនរបស់អ្នកថា យ៉ូសែប ស្ម៊ីធ គឺជាព្យាការីរបស់ព្រះ
វាជាការណ៍មួយដ៍បំផុសគំនិតក្នុងការគិតថា ក្នុងនាមជាក្មេងប្រុសអាយុ ១៤ ឆ្នាំ យ៉ូសែប បានឃើញព្រះវរបិតាសួគ៌ និងព្រះយេស៊ូវគ្រីស្ទ ។ ប៉ុន្តែតើមានអ្វីកើតឡើងមុនពេល យ៉ូសែប ទទួលបានការនិមិត្តដំបូងនោះ ? លោកបានពិចារណាបទគម្ពីរ ចង់បានប្រាជ្ញាមកពីព្រះ និងបានអធិស្ឋានទូលសុំការណែនាំរបស់ទ្រង់ ( សូមមើល យ៉ូសែប ស្ម៊ីធ—ប្រវត្តិ ១:១០–១៩ ) ។ ដំណើររឿងរបស់ យ៉ូសែប រំឭកយើងថា យើងក៏អាចទទួលបានសាក្សីផ្ទាល់ខ្លួនអំពីព្រះអង្គសង្គ្រោះ និងដំណឹងល្អរបស់ទ្រង់—រួមទាំងថា យ៉ូសែប ស្ម៊ីធ ត្រូវបានហៅឲ្យស្តារដំណឹងល្អឡើងវិញផងដែរ ។ ខណៈពេលដែលទីបន្ទាល់នេះអាចកើតឡើងទៅតាមពេលវេលាជាជាងនៅក្នុងព្រឹត្តិការណ៍គួរឲ្យកត់សម្គាល់មួយ តាមរយៈព្រះវិញ្ញាណបរិសុទ្ធយើងអាចដឹងដោយភាពច្បាស់លាស់ដូចគ្នានូវការពិតនៃអ្វីៗទាំងអស់ ( សូមមើល មរ៉ូណៃ ១០:៥ ) ។
រឿងទាំងឡាយដែលត្រូវពិចារណា
-
មានវិធីជាច្រើនដែលយើងអាចទទួលបានទីបន្ទាល់ផ្ទាល់ខ្លួនថា យ៉ូសែប ស្ម៊ីធ គឺជាព្យាការី ។ អែលឌើរ នែល អិល អាន់ឌើរសិន បានមានប្រសាសន៍ថា « វាអាចកើតមកពេលអ្នកលុតជង្គង់ចុះអធិស្ឋានទូលសូមព្រះឲ្យបញ្ជាក់ថាលោកគឺជាព្យាការីពិត ។ វាអាចកើតមកពេលអ្នកអានដំណើររឿងនៃការនិមិត្តដំបូងរបស់ព្យាការី ។ ទីបន្ទាល់មួយអាចនឹងដក់ជាប់ទៅលើព្រលឹងរបស់អ្នកពេលអ្នកអានព្រះគម្ពីរមរមនម្ដងហើយម្ដងទៀត ។ វាអាចកើតឡើងពេលអ្នកថ្លែងទីបន្ទាល់ផ្ទាល់ខ្លួនរបស់អ្នកអំពីព្យាការី ឬនៅពេលអ្នកឈរនៅក្នុងព្រះវិហារបរិសុទ្ធ ហើយដឹងថាតាមរយៈ យ៉ូសែប ស្ម៊ីធ នោះអំណាចនៃការផ្សារភ្ជាប់ដ៏បរិសុទ្ធត្រូវបានស្ដារឡើងវិញនៅលើផែនដី » ។ សូមគិតអំពីទីបន្ទាល់របស់អ្នកអំពីតួនាទីរបស់ យ៉ូសែប ស្ម៊ីធ ក្នុងនាមជាព្យាការីរបស់ព្រះ ។ តើអ្វីខ្លះបានជួយអ្នកជឿលើការហៅដ៏ទេវភាពរបស់លោក ? តើអ្នកអាចធ្វើអ្វីបន្ថែមទៀតដើម្បីទទួលបាន ឬពង្រឹងទីបន្ទាល់របស់អ្នកថាលោកគឺជាព្យាការី ?
សកម្មភាពសម្រាប់ការរៀនសូត្រជាមួយអ្នកដទៃ
-
ទីបន្ទាល់ផ្ទាល់ខ្លួនដែលថា យ៉ូសែប ស្ម៊ីធ គឺជាព្យាការីរបស់ព្រះ ពុំកើតឡើងចំពោះយើងដោយឯកឯងទេ— វាជាអ្វីដែលយើងខិតខំប្រែងដើម្បីទទួលបានទីបន្ទាល់នោះ ។ អ្នកអាចពង្រឹងទីបន្ទាល់ផ្ទាល់ខ្លួនរបស់អ្នកអំពីការហៅរបស់ យ៉ូសែប ដោយការចែកចាយបទគម្ពីរមួយមកពីព្រះគម្ពីរមរមនជាមួយក្រុមរបស់អ្នក ហើយនិយាយអំពីរបៀបដែល យ៉ូសែប គឺជាឧបករណ៍មួយនៅក្នុងព្រះហស្តរបស់ព្រះ ដើម្បីធ្វើឲ្យបទគម្ពីរនោះអាចមានសម្រាប់យើង ។ ប្រហែលអ្នកក៏អាចប្ដូរវេនកត់ត្រាទីបន្ទាល់របស់ព្យាការីចេញមកពី មុក្តាដ៏មានតម្លៃមហិមា ជាមួយគ្នា ហើយបន្ទាប់មកស្តាប់ទីបន្ទាល់នោះ ឬចែកចាយវាជាមួយអ្នកដទៃ ។ តើព្រះគម្ពីរមរមន និងទីបន្ទាល់របស់ យ៉ូសែប ពង្រឹងសេចក្តីជំនឿរបស់អ្នកដែលថា យ៉ូសែបត្រូវបានហៅដោយព្រះ ដោយរបៀបណា ?
-
យើងអាចពង្រីកទីបន្ទាល់របស់យើងអំពីការហៅដ៏ទេវភាពរបស់ យ៉ូសែប ស្ម៊ីធ ពេញមួយជីវិតរបស់យើងបាន ។ ប្រហែលទីបន្ទាល់របស់អ្នកអំពីតួនាទីរបស់លោក មានអារម្មណ៍ថារឹងមាំនៅពេលជាក់លាក់ណាមួយជាងពេលខ្លះទៀត ។ អ្នកអាចអានជាមួយគ្នានូវដំបូន្មាននេះដោយប្រធាន ឌៀថើរ អេហ្វ អុជដូហ្វថា « ខ្ញុំសូមអញ្ជើញអ្នកឲ្យថយក្រោយបន្ដិច ក្រឡេកមើលជីវិតរបស់អ្នកពីទីខ្ពស់ រួចធ្វើឲ្យដំណើរជីវិតមានភាពសាមញ្ញចំពោះភាពជាសិស្ស » ។ ពិចារណាស្វែងយល់ពីរបៀបដែលដំបូន្មានរបស់ប្រធាន អុជដូហ្វ អនុវត្តចំពោះទីបន្ទាល់របស់អ្នកថា យ៉ូសែប គឺជាព្យាការីរបស់ព្រះ ដោយមើលរូបភាពមួយដែលត្រូវបានពង្រីកលើព័ត៌មានលម្អិតមួយ ។ និយាយជាមួយគ្នាថាតើរូបភាពនោះមើលទៅដូចជាអ្វី ។ បន្ទាប់មកមើលរូបភាពដូចគ្នានោះដែលបានបង្រួមដើម្បីវាបង្ហាញរូបភាពទាំងមូល ។ តើរូបភាពនេះមើលទៅខុសពីមុនយ៉ាងដូចម្តេច ? តើឧទាហរណ៍នេះបង្រៀនអ្នកអ្វីខ្លះ អំពីរបៀបដើម្បីទទួលបានទីបន្ទាល់អំពីការហៅដ៏ទេវភាពរបស់ព្យាការី យ៉ូសែប ស្ម៊ីធ ?
ស្វែងយល់បន្ថែមទៀត
-
នែល អិល អាន់ឌើរសិន « Joseph Smith » Liahona ខែវិច្ឆិកា ឆ្នាំ២០១៤ ទំព័រ ២៨–៣១
-
« The Life and Ministry of Joseph Smith » Teachings of Presidents of the Church: Joseph Smith ( ឆ្នាំ២០១១ ) ទំព័រ ១–២៤
-
Joseph Smith: The Prophet of the Restoration ( វីដេអូ ) នៅលើបណ្ណាល័យដំណឹងល្អ