« ព្រះវិហារបរិសុទ្ធ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ព្រះវិហារបរិសុទ្ធ
យើងទទួលបានពរនៅពេលយើងថ្វាយបង្គំនៅក្នុងដំណាក់របស់ព្រះអម្ចាស់
សូមគិតអំពីកន្លែងដ៏ស្រស់ស្អាត និងសុខសាន្ដបំផុតដែលអ្នកធ្លាប់បានទៅ ។ តើអ្នកចូលចិត្តអ្វីខ្លះអំពីកន្លែងទាំងនោះ ? តើកន្លែងទាំងនោះបានធ្វើឲ្យអ្នកមានអារម្មណ៍បែបណា ? នៅពេលដែលយើងអាចទៅទស្សនា ឬចូលទៅក្នុងព្រះវិហារបរិសុទ្ធរបស់ព្រះអម្ចាស់ យើងក៏អាចមានអារម្មណ៍សុខសាន្តផងដែរ ។ ប៉ុន្តែនោះមិនមែនជាហេតុផលចម្បងដែលព្រះវិហារបរិសុទ្ធទាំងនោះមានសារៈសំខាន់ចំពោះយើងនោះទេ ។ ព្រះវិហារបរិសុទ្ធគឺមិនដូចកន្លែងផ្សេងទៀតនៅលើផែនដីទេ ព្រោះព្រះវិហារបរិសុទ្ធទាំងនោះគឺជាព្រះដំណាក់របស់ព្រះអម្ចាស់ ។ នៅខាងក្នុងព្រះវិហារបរិសុទ្ធយើងអាចធ្វើសេចក្តីសញ្ញាដើម្បីឲ្យកាន់តែខិតជិតទៅនឹងទ្រង់ និងរៀបចំខ្លួនសម្រាប់ជីវិតដ៏អស់កល្បជានិច្ច ។
ប្រធាន ជែហ្វ្រី អ័រ ហូឡិន បានមានប្រសាសន៍ថា ៖ « យើងស្រឡាញ់ព្រះវិហារបរិសុទ្ធដែលបានឧទ្ទិសរបស់យើង និងពិធីបរិសុទ្ធនៃការតម្កើងឡើងសំខាន់ៗ ដែលត្រូវបានអនុវត្តនៅទីនោះជាទីបំផុត ។ យើងសូមអរគុណដល់សា្ថនសួគ៌ដែលព្រះវិហារបរិសុទ្ធកាន់តែច្រើនត្រូវបានសាងសង់ ដោយអនុញ្ញាតឲ្យយើងម្នាក់ៗអាចចូលទៅកាន់ព្រះវិហារបរិសុទ្ធបានកាន់តែច្រើនឡើង ។ ។ ព្រះវិហារបរិសុទ្ធរបស់ព្រះអម្ចាស់គឺពិតជាបរិសុទ្ធបំផុត ជារចនាសម្ព័ន្ធដ៏ពិសិដ្ឋបំផុតនៅក្នុងនគររបស់ព្រះ » ។
តើព្រះវិហារបរិសុទ្ធជាអ្វី ?
ព្រះវិហារបរិសុទ្ធគឺមានន័យថាគឺជាដំណាក់នៃព្រះអម្ចាស់ ។ នៅក្នុងអគារបរិសុទ្ធទាំងនេះ សមាជិកសាសនាចក្រដែលមានភាពស័ក្ដិសមចូលរួមក្នុងពិធីបរិសុទ្ធដ៏ពិសិដ្ឋ និងធ្វើសេចក្តីសញ្ញាជាមួយនឹងព្រះអម្ចាស់ ។ ឧទាហរណ៍ ពិធីបរិសុទ្ធនៃការផ្សារភ្ជាប់អនុញ្ញាតឲ្យយើងនៅជាមួយគ្រួសាររបស់យើងសម្រាប់ភាពអស់កល្បជានិច្ច ប្រសិនបើយើងរក្សាសេចក្តីសញ្ញារបស់យើង ។ នៅក្នុងព្រះវិហារបរិសុទ្ធ យើងក៏អាចទទួលពិធីបរិសុទ្ធនានាជំនួសឲ្យបុព្វការីជនដែលបានទទួលមរណភាពផងដែរ ។ ព្រះអម្ចាស់យាងមកព្រះវិហារបរិសុទ្ធរបស់ទ្រង់ ហើយព្រះវិហារបរិសុទ្ធទាំងនេះគឺស្ថិតនៅក្នុងចំណោមកន្លែងដ៏បរិសុទ្ធបំផុតនៅលើផែនដី ។
ទិដ្ឋភាពទូទៅនៃប្រធានបទ ៖ ព្រះវិហារបរិសុទ្ធ
មគ្គទេសក៍សិក្សាដំណឹងល្អដែលជាប់ទាក់ទង ៖ សេចក្តីសញ្ញា និងពិធីបរិសុទ្ធ, ពិធីបរិសុទ្ធនៃអំណោយទានពិសិដ្ឋ និងពិធីផ្សារភ្ជាប់, ការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ, ពិធីបរិសុទ្ធ តំណាងសម្រាប់មរណជន
ផ្នែកទី ១
ព្រះអម្ចាស់បញ្ជារាស្រ្តរបស់ទ្រង់ឲ្យសាងសង់ព្រះវិហារបរិសុទ្ធ
ព្រះតែងតែបញ្ជាឲ្យរា្រស្តរបស់ទ្រង់សាងសង់ព្រះវិហារបរិសុទ្ធ ។ ព្រះវិហារបរិសុទ្ធនៃសាសនាចក្រសព្វថ្ងៃនេះមានភាពស្រដៀងគ្នាជាច្រើនទៅនឹងព្រះវិហារបរិសុទ្ធនៅក្នុងព្រះគម្ពីរពីបុរាណ ហើយមាននៅក្នុងប្រទេសជាច្រើនជុំវិញពិភពលោក ។ ព្រះវិហារបរិសុទ្ធខុសពីសាលាប្រជុំរបស់សាសនាចក្រ ដែលវាជាកន្លែងដែលយើងធ្វើសេចក្តីសញ្ញាពិសេស និងចូលរួមក្នុងពិធីបរិសុទ្ធដ៏ពិសិដ្ឋនានា ។ នៅខាងក្នុងព្រះវិហារបរិសុទ្ធ សមាជិកសាសនាចក្រក៏អាចធ្វើពិធីបរិសុទ្ធជំនួសបុព្វការីជនដែលបានស្លាប់របស់ពួកគេ និងបុគ្គលផ្សេងទៀតដែលមិនមានឱកាសទទួលបានពិធីបរិសុទ្ធទាំងនោះនៅក្នុងជីវិតនេះផងដែរ ។ បន្ទាប់មកអ្នកដែលបានទទួលមរណភាពអាចជ្រើសរើសទទួលយកពិធីបរិសុទ្ធទាំងនេះ និងទទួលបានសេចក្តីសង្គ្រោះ និងភាពតម្កើងឡើង ។
អ្វីៗគ្រប់យ៉ាងនៅក្នុងព្រះដំណាក់របស់ព្រះអម្ចាស់ បង្រៀនយើងអំពីព្រះវរបិតាសួគ៌ ព្រះអង្គសង្រ្គោះរបស់យើង គឺព្រះយេស៊ូវគ្រីស្ទ និងផែនការនៃសេចក្តីសង្គ្រោះរបស់ព្រះ ។ ព្រះវិហារបរិសុទ្ធ គឺជាកន្លែងដែលយើងអាចខិតកាន់តែជិតព្រះជាព្រះវរបិតា និងព្រះរាជបុត្រារបស់ទ្រង់ ។ ព្រះវិហារបរិសុទ្ធគឺជាកន្លែងដ៏ពិសិដ្ឋដែលបានញែកចេញសម្រាប់ការថ្វាយបង្គំ និងការបង្រៀន ។ នៅក្នុងព្រះវិហារបរិសុទ្ធ យើងអាចទទួលអារម្មណ៍នៃព្រះវិញ្ញាណរបស់ព្រះ និងសេចក្តីស្រឡាញ់របស់ទ្រង់ ។
រឿងទាំងឡាយដែលត្រូវពិចារណា
-
ព្រះវិហារបរិសុទ្ធ ខឺតឡង់ គឺជាព្រះវិហារបរិសុទ្ធដំបូងគេ ដែលបានសាងសង់ឡើងដោយពួកបរិសុទ្ធថ្ងៃចុងក្រោយ ។ វាទាមទារឲ្យមានការលះបង់ជាច្រើន ប៉ុន្តែពួកបរិសុទ្ធក៏ទទួលបានការសន្យាថាមានពរជ័យជាច្រើនសម្រាប់ការលះបង់ទាំងនោះផងដែរ ។ សូមអានអំពីការសន្យាទាំងនេះនៅក្នុង គោលលិទ្ធិ និងសេចក្ដីសញ្ញា ៩៧:៨–១៦ ។ បន្ទាប់មកអ្នកអាចអានអំពីបទពិសោធន៍ខាងវិញ្ញាណមួយចំនួនដែលពួកបរិសុទ្ធមាននៅក្នុងព្រះវិហារបរិសុទ្ធ ខឺតឡង់ នៅក្នុង គោលលិទ្ធិ និងសេចក្ដីសញ្ញា ១១០ និងនៅក្នុង ជំពូកទី ២១ នៃ Saints: The Story of the Church of Jesus Christ in the Latter Days vol. 1 Standard of Truth 1815–1846 ( ឆ្នាំ២០១៨ ) ទំព័រ ២៣២–២៤៣ ។ តើអ្នកទទួលបានអារម្មណ៍នៃវត្តមានរបស់ព្រះអម្ចាស់នៅក្នុងព្រះដំណាក់ដ៏បរិសុទ្ធរបស់ទ្រង់ដោយរបៀបណា ? តើអ្នកបានទទួលពរជ័យអ្វីខ្លះទៀតដោយសារព្រះវិហារបរិសុទ្ធត្រូវបានសាងសង់ឡើងនៅក្នុងសម័យរបស់យើង ? អ្នកក៏អាចជញ្ជឹងគិតផងដែរអំពីការលះបង់អ្វីខ្លះដែលអ្នកអាចធ្វើដើម្បីទទួលបានពរជ័យមកពីព្រះអម្ចាស់នៅក្នុងដំណាក់របស់ទ្រង់ ។
-
ខណៈពេលដែលព្រះវិហារបរិសុទ្ធមានលក្ខណៈពិសេសខុសៗគ្នា ព្រះវិហារបរិសុទ្ធនីមួយៗសុទ្ធតែមានបន្ទប់សំខាន់ៗដូចគ្នាសម្រាប់ការទទួលការណែនាំ ការចូលរួមក្នុងពិធីបរិសុទ្ធដ៏ពិសិដ្ឋ និងការធ្វើសេចក្តីសញ្ញានានា ។ អ្នកអាចស្វែងយល់បន្ថែមអំពីគោលបំណងនៃបន្ទប់ទាំងនេះដោយការអានអត្ថបទខ្លី « Inside Temples » ( នៅលើគេហទំព័រChurchofJesusChrist.org ) ។ តើអ្នករៀនអ្វីខ្លះពីអត្ថបទដែលបំផុសគំនិតអ្នកឲ្យថ្វាយបង្គំនៅក្នុងព្រះវិហារបរិសុទ្ធ ឬធ្វើដូច្នេះកាន់តែញឹកញាប់ ?
សកម្មភាពសម្រាប់ការរៀនសូត្រជាមួយអ្នកដទៃ
-
ប្រសិនបើអ្នកអាច សូមទៅកាន់ព្រះវិហារបរិសុទ្ធនៅក្បែរនោះជាមួយគ្នា ។ ប្រហែលជាអ្នកអាចដើរដោយស្ងៀមស្ងាត់នៅជុំវិញបរិវេណព្រះវិហារបរិសុទ្ធ ។ ឬអ្នកអាចមើលរូបភាពនៃព្រះវិហារបរិសុទ្ធ ។ ពេលអ្នកធ្វើដូច្នោះ សូមអាន ឬច្រៀងដោយស្រទន់នូវពាក្យនៅក្នុងបទ « ខ្ញុំចូលចិត្តមើលព្រះវិហារបរិសុទ្ធ » ។ បន្ទាប់មកចែកចាយជាមួយគ្នាទៅវិញទៅមកនូវគំនិត ឬអារម្មណ៍ណាមួយដែលអ្នកមានអំពីព្រះវិហារបរិសុទ្ធ ។ អ្នកអាចពិភាក្សាជាក្រុមពីមូលហេតុដែលអ្នកមានអារម្មណ៍ថាព្រះអម្ចាស់បានបញ្ជាយើងឲ្យសាងសង់ព្រះវិហារបរិសុទ្ធនៅក្នុងសម័យរបស់យើង ។ តើបុគ្គល គ្រួសារ និងសហគមន៍ទទួលបានពរដោយមកពីការសាងសង់ព្រះវិហារបរិសុទ្ធបន្ថែមទៀតតាមវិធីណាខ្លះ ?
ស្វែងយល់បន្ថែមទៀត
-
និក្ខមនំ ២៦–២៧; ៤០; របាក្សត្រ ទី២ ៥; នីហ្វៃទី២ ៥:១៦; គោលលទ្ធិ និងសេចក្ដីសញ្ញា ៨៨:១១៩; ៩៥:៨–១៧; ១២៤:៣៨–៤២
-
« Why Latter-day Saints Build Temples » នៅលើគេហទំព័រ ChurchofJesusChrist.org
-
« Welcome to the House of the Lord » ( វីដេអូ ) នៅលើគេហទំព័រ youtube.com
-
Church History Topics « Temple Building » នៅលើបណ្ណាល័យដំណឹងល្អ
-
Church History Topics « Temple Dedications and Dedicatory Prayers » នៅលើបណ្ណាល័យដំណឹងល្អ
ផ្នែកទី ២
យើងមានសិទ្ធិទទួលបានព្រះចេស្តា និងការណែនាំខាងវិញ្ញាណនៅក្នុងដំណាក់របស់ព្រះអម្ចាស់
ប្រធាន រ័សុល អិម ណិលសុន បានបង្រៀនថា « ព្រះវិហារបរិសុទ្ធគឺជាកន្លែងនៃវិវរណៈ ។ នៅទីនោះមានបង្ហាញបងប្អូនពីរបៀបដើម្បីឈានទៅរកជីវិតសេឡេស្ទាល ។ នៅទីនោះ បងប្អូននៅកាន់តែជិតព្រះអង្គសង្គ្រោះ ហើយត្រូវបានផ្ដល់សិទ្ធិឲ្យទទួលបានព្រះចេស្ដាទ្រង់កាន់តែមហិមា ។ នៅទីនោះបងប្អូនទទួលបានណែនាំក្នុងការដោះស្រាយបញ្ហាជីវិតរបស់បងប្អូន សូម្បីតែបញ្ហាដែលស្មុគស្មាញបំផុតក្តី ។ នៅក្នុងព្រះវិហារបរិសុទ្ធ អ្នកអាចស្វែងរកជំនួយ និងព្រះចេស្តាខាងវិញ្ញាណបាន ។ អ្នកអាចស្វែងរកការលួងលោម និងកម្លាំងដើម្បីឆ្ពោះទៅមុខក្នុងអំឡុងពេលមានបញ្ហាប្រឈមមុខ និងការសាកល្បង ។
អ្នកអាចបង្កើនសមត្ថភាពរបស់អ្នកដើម្បីទទួលជំនួយ និងការណែនាំខាងវិញ្ញាណនៅក្នុងព្រះដំណាក់របស់ព្រះអម្ចាស់ ពេលអ្នករៀបចំខ្លួនឯង និងស្វែងរកដើម្បីមាន « ដៃស្អាត និងចិត្តបរិសុទ្ធ » ( ទំនុកដំកើង ២៤:៤ ) ។ ក្នុងកន្លែងដែលសុខសាន្ត ពិសិដ្ឋ ដែលបានឧទ្ទិសនេះ ជាញឹកញាប់វាកាន់តែងាយស្រួលក្នុងការមានអារម្មណ៍ជិតស្និទ្ធនឹងទ្រង់ និងស្តាប់ឮការបំផុសគំនិតពីព្រះវិញ្ញាណរបស់ទ្រង់ ។
រឿងទាំងឡាយដែលត្រូវពិចារណា
-
ប្រហែលជាអ្នកមានសំណួរសំខាន់ ឬបញ្ហាប្រឈមដ៏លំបាកមួយ ។ តើអ្នកបានពិចារណាចំណាយពេលនៅឯព្រះវិហារបរិសុទ្ធ ដើម្បីស្វែងរកការណែនាំរបស់ព្រះអម្ចាស់ដែរឬទេ ? សូមពិចារណាពីរបៀបដែលការចូលរួមក្នុងពិធីបរិសុទ្ធក្នុងព្រះវិហារបរិសុទ្ធ អាចជួយអ្នកឲ្យទទួលបានភាពច្បាស់លាស់អំពីសំណួរ ឬបញ្ហាប្រឈមមុខរបស់អ្នកបាន ។ ប្រសិនបើអ្នកមិនមានប័ណ្ណចូលព្រះវិហារបរិសុទ្ធទេ ប្រហែលជាអ្នកអាចដើរជុំវិញបរិវេណព្រះវិហារបរិសុទ្ធ ហើយចំណាយពេលខ្លះក្នុងការអធិស្ឋាន និងពិចារណានៅទីនោះ ។ សូមពិចារណាធ្វើការកត់ត្រាការបំផុសគំនិតទាំងឡាយណាដែលអ្នកទទួលបាន ។
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន ណិលសុន បានបង្រៀន ៖« បងប្អូនប្រុសស្រីជាទីស្រឡាញ់របស់ខ្ញុំ សូមបងប្អូនផ្តោតចិត្តលើព្រះវិហារបរិសុទ្ធ តាមរបៀបដែលបងប្អូនមិនធ្លាប់បានធ្វើពីមុនមក ។ ខ្ញុំសូមផ្តល់ពរជ័យឲ្យបងប្អូនខិតកាន់តែជិតព្រះ និងព្រះយេស៊ូវគ្រីស្ទជារៀងរាល់ថ្ងៃ » ។ ដើម្បីយល់ពីអត្ថន័យនៃការផ្តោតចិត្តលើព្រះវិហារបរិសុទ្ធ អ្នកអាចនិយាយអំពីឧបករណ៍ដែលជួយយើងផ្តោតលើចក្ខុវិស័យរបស់យើង ។ អ្នកអាចប្ដូរវេនមើលតាមរយៈវ៉ែនតា កែវយឺត ឬតេឡេស្កុប ( ឬមើលរូបភាពនៃវត្ថុមួយក្នុងចំណោមវត្ថុទាំងនេះ ) ។ បន្ទាប់មកនិយាយអំពីរបៀបដែលអ្នកអាចបង្កើនការផ្តោតអារម្មណ៍របស់អ្នកលើព្រះវិហារបរិសុទ្ធតាមវិធីដែលអ្នកមិនធ្លាប់មានពីមុនមក ។ អ្នកក៏អាចពិចារណា និងកត់ត្រាពរជ័យដែលអ្នកទទួលបាននៅពេលអ្នកផ្តោតទៅលើព្រះវិហារបរិសុទ្ធក្នុងរយៈពេលប៉ុន្មានខែខាងមុខនេះ ។
ស្វែងយល់បន្ថែមទៀត
-
រ័សុល អិម ណិលសុន « ព្រះវិហារបរិសុទ្ធ និងគ្រឹះខាងវិញ្ញាណរបស់បងប្អូន » លីអាហូណា ខែវិច្ឆិកា ឆ្នាំ២០២១ ទំព័រ ៩៣–៩៦
-
ឌែល ជី រិនឡាន់ « ការទទួលបានព្រះចេស្តារបស់ព្រះតាមរយៈសេចក្ដីសញ្ញា » លីអាហូណា ខែឧសភា ឆ្នាំ២០២៣ ទំព័រ ៣៥–៣៧
ផ្នែកទី ៣
ព្រះអម្ចាស់អញ្ជើញអ្នករាល់គ្នាឲ្យមកព្រះវិហារបរិសុទ្ធ
ព្រះអម្ចាស់ចង់ឲ្យមនុស្សគ្រប់គ្នាមកកាន់ព្រះដំណាក់ដ៏បរិសុទ្ធរបស់ទ្រង់ និងធ្វើសេចក្តីសញ្ញាជាមួយនឹងទ្រង់ ។ ប៉ុន្តែទ្រង់ក៏ចង់ឲ្យយើងរៀបចំខ្លួនជាមុនសិនផងដែរ ។ ទ្រង់ដឹងថាការធ្វើសេចក្តីសញ្ញាទាំងនោះពីមុនពេលយើងត្រៀមខ្លួនជាស្រេចអាចនឹងដាក់កម្រិតលើលទ្ធភាពរបស់យើងក្នុងការរីករាយជាមួយនឹងពរជ័យនៃព្រះវិហារបរិសុទ្ធ ។ នោះជាមូលហេតុដែលទ្រង់កំណត់បទដ្ឋាននៃការត្រៀមរៀបចំខ្លួនខាងវិញ្ញាណសម្រាប់ការចូលទៅក្នុងព្រះវិហារបរិសុទ្ធ—បទដ្ឋានដែលទ្រង់អញ្ជើញមនុស្សទាំងអស់ឲ្យរស់នៅតាម ដើម្បីឲ្យមនុស្សទាំងអស់អាចទទួលបានពរជ័យរបស់ទ្រង់ ។
ដើម្បីចូលទៅក្នុងព្រះវិហារបរិសុទ្ធ អ្នកត្រូវការប័ណ្ណចូលព្រះវិហារបរិសុទ្ធ ដែលអ្នកអាចទទួលបានប័ណ្ណនោះបន្ទាប់ពីសម្ភាសន៍ជាមួយថ្នាក់ដឹកនាំបព្វជិតភាពរបស់អ្នក ។ ការណែនាំដ៏បំផុសគំនិតរបស់ពួកលោកជួយអ្នកឲ្យដឹងពីរបៀបរៀបចំខ្លួនដើម្បីទទួលបានពិធីបរិសុទ្ធក្នុងព្រះវិហារបរិសុទ្ធ ។ ប័ណ្ណចូលព្រះវិហារបរិសុទ្ធរបស់អ្នកគឺជានិមិត្តសញ្ញាមួយនៃការរៀបចំខ្លួនរបស់អ្នកដើម្បីចូលក្នុងព្រះដំណាក់របស់ព្រះអម្ចាស់ ។ វាគឺជានិមិត្តសញ្ញាដែលអ្នកព្យាយាមដើម្បីគោរពតាមព្រះបញ្ញត្តិរបស់ព្រះ ។ វាមានន័យថាអ្នក ព្រះអម្ចាស់ និងអ្នកតំណាងរបស់ទ្រង់ « ផ្តល់អនុសាសន៍ » សម្រាប់ការចូលទៅក្នុងដំណាក់របស់ព្រះអម្ចាស់ ។
បន្ទាប់មកនៅពេលដែលអ្នកបានទទួលអំណោយទានពិសិដ្ឋ និងពិធីបរិសុទ្ធផ្សេងទៀតក្នុងព្រះវិហារបរិសុទ្ធ សូមកុំឈប់នៅត្រឹមនោះឡើយ ! រៀបចំខ្លួនដើម្បីត្រឡប់ទៅកាន់ដំណាក់របស់ព្រះអម្ចាស់ ហើយរៀនសូត្របន្ថែម ។ ស៊ីស្ទើរ ស៊ីលវ៉ា អេច អាល់រែត បានបង្រៀនថា « យើងទាំងអស់គ្នាទទួលការណែនាំដូចគ្នា ប៉ុន្តែការយល់ដឹងរបស់យើងអំពីអត្ថន័យនៃពិធីបរិសុទ្ធ និងសេចក្តីសញ្ញាទាំងនោះនឹងកើនឡើង ពេលយើងត្រឡប់ទៅព្រះវិហារបរិសុទ្ធជាញឹកញាប់ជាមួយនឹងឥរិយាបថនៃការរៀនសូត្រ និងការពិចារណាអំពីសេចក្តីពិតដ៏អស់កល្បដែលបានបង្រៀន » ។
រឿងទាំងឡាយដែលត្រូវពិចារណា
-
សូមគិតអំពីកិច្ចការសំខាន់ដែលអ្នកត្រូវរៀបចំខ្លួនសម្រាប់ ដូចជា ការប្រឡងនៅសាលារៀន ការសម្ភាសន៍ការងារ ឬមេរៀននៅឯព្រះវិហារ ។ តើអ្នកបានរៀបចំខ្លួនដោយរបៀបណា ? តើនឹងមានអ្វីកើតឡើងប្រសិនបើអ្នកមិនបានរៀបចំខ្លួនទេនោះ ? បន្ទាប់មកពិចារណាថាហេតុអ្វីបានជាយើងត្រូវរៀបចំខ្លួនដើម្បីចូលទៅក្នុងព្រះដំណាក់របស់ព្រះអម្ចាស់ ។ អ្នកអាចអាន និក្ខមនំ ៤០:៧–១៥ ហើយពិចារណាពីអ្វីដែលអើរ៉ុន និងកូនប្រុសរបស់គាត់បានធ្វើដើម្បីរៀបចំខ្លួនចូលទៅក្នុងរោងឧបោសថ ។ អ្នកក៏អាចអានផងដែរនៅ គោលលទ្ធិ និងសេចក្ដីសញ្ញា ៩៧:១៥–១៦ ហើយពិចារណាថាការមានចិត្តបរិសុទ្ធមានអត្ថន័យយ៉ាងណាចំពោះអ្នក ។ ពិចារណាប្រសិនបើមានវិធីដែលអ្នកអាចខិតខំប្រឹងប្រែង ដើម្បីកាន់តែមានចិត្តបរិសុទ្ធ និងរៀបចំខ្លួនខាងវិញ្ញាណកាន់តែច្រើន ដើម្បីថ្វាយបង្គំនៅក្នុងព្រះដំណាក់របស់ព្រះអម្ចាស់ ។
សកម្មភាពសម្រាប់ការរៀនសូត្រជាមួយអ្នកដទៃ
-
បន្ទាប់ពីការសុគត និងការរស់ឡើងវិញរបស់ព្រះអង្គសង្គ្រោះ ទ្រង់បានយាងទៅជួបប្រជាជននៅទ្វីបអាមេរិក ។ កន្លែងដំបូងដែលទ្រង់បានបង្ហាញព្រះកាយគឺនៅព្រះវិហារបរិសុទ្ធនៅលើដែនដីបរិបូរណ៍ ។ សូមអាន នីហ្វៃទី៣ ១១:១–១០ ហើយនិយាយអំពីមូលហេតុដែលអ្នកគិតថា ព្រះអម្ចាស់បានជ្រើសរើសបង្ហាញព្រះកាយដល់ប្រជាជនដូចដែលទ្រង់បានធ្វើ ។ ប្រធាន រ័សុល អិម ណិលសុន បានមានប្រសាសន៍អំពីដំណើរទស្សនកិច្ចនេះថា ៖ « វាសំខាន់ណាស់ដែលព្រះអង្គសង្គ្រោះបានជ្រើសរើសដើម្បីបង្ហាញព្រះកាយដល់មនុស្សនៅឯព្រះវិហារបរិសុទ្ធ ។ ព្រះវិហារបរិសុទ្ធគឺជាដំណាក់របស់ទ្រង់ ។ … ខ្ញុំសូមសន្យាថា ការចំណាយពេលកាន់តែច្រើននៅព្រះវិហារបរិសុទ្ធនឹងផ្តល់ពរជ័យដល់ជីវិតរបស់បងប្អូន ដែលគ្មានរបៀបណាផ្សេងទៀតអាចផ្តល់ឲ្យបាននោះទេ » ។ និយាយអំពីមូលហេតុដែលព្រះអម្ចាស់ក៏សព្វព្រះទ័យឲ្យយើងទៅព្រះវិហារបរិសុទ្ធផងដែរ ។ ប្រសិនបើអ្នកបានទៅព្រះវិហារបរិសុទ្ធ សូមគិតអំពីពរជ័យដែលអ្នកបានទទួលសម្រាប់ការទៅនោះ ។ ប្រសិនបើអ្នកមិនមានព្រះវិហារបរិសុទ្ធនៅក្បែរនោះទេ ឬបច្ចុប្បន្នមិនអាចថ្វាយបង្គំនៅក្នុងព្រះវិហារបរិសុទ្ធដោយសារហេតុផលផ្សេងទៀត អ្នកអាចនិយាយអំពីវិធីដែលព្រះវិហារបរិសុទ្ធនៅតែអាចជាផ្នែកមួយដ៏សំខាន់នៃជីវិតរបស់អ្នក ដូចជាតាមរយៈការពិចារណាជាប្រចាំនូវពរជ័យដែលយើងទទួលបានមកពីការថ្វាយបង្គំនៅក្នុងព្រះវិហារបរិសុទ្ធ ឬការចងចាំសេចក្តីសញ្ញាក្នុងព្រះវិហារបរិសុទ្ធរបស់អ្នក ។
-
អ្នកអាចស្វែងរកសំណួរសម្រាប់សម្ភាសន៍ទទួលប័ណ្ណចូលព្រះវិហារបរិសុទ្ធនៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ឆ្នាំ២០២២ ) ទំព័រ ៣៦–៣៧ ។ ដើម្បីជួយគ្នាទៅវិញទៅមកឲ្យយល់ពីបទដ្ឋានរបស់ព្រះអម្ចាស់សម្រាប់ការចូលទៅក្នុងព្រះវិហារបរិសុទ្ធ នោះអ្នករាល់គ្នាម្នាក់ៗអាចជ្រើសរើសសំណួរមួយដើម្បីសិក្សា ។ អ្នកអាចប្រើសេចក្ដីណែនាំដល់បទគម្ពីរទាំងឡាយ និងសម្ភារសាសនាចក្រផ្សេងទៀត ដើម្បីស្វែងយល់បន្ថែមអំពីប្រធានបទនៃសំណួរ ។ សូមសួរខ្លួនឯងថា ហេតុអ្វីបានជាការណ៍នេះជាផ្នែកមួយដ៏សំខាន់នៃការរៀបចំខ្លួនសម្រាប់ព្រះវិហារបរិសុទ្ធ ? បន្ទាប់មកចែកចាយជាមួយគ្នាទៅវិញទៅមកនូវអ្វីដែលអ្នករៀន ។
ស្វែងយល់បន្ថែមទៀត
-
រ៉ូណល អេ រ៉ាសបាន « Recommended to the Lord » Liahona ខែវិច្ឆិកា ឆ្នាំ២០២០ ទំព័រ ២២–២៥
-
រៀបចំខ្លួនសម្រាប់ព្រះដំណាក់របស់ព្រះអម្ចាស់ » នៅលើគេហទំព័រ ChurchofJesusChrist.org
-
« ការរៀបចំខ្លួនចូលព្រះវិហារបរិសុទ្ធ » បណ្ណាល័យដំណឹងល្អ