« ៣៤. ហិរញ្ញវត្ថុ និងសវនកម្ម » ជម្រើសចេញមកពីក្បួនខ្នាតទូទៅ( ឆ្នាំ២០២៣ ) ។
« ៣៤. ហិរញ្ញវត្ថុ និងសវនកម្ម » ជម្រើសចេញមកពីក្បួនខ្នាតទូទៅ
៣៤.
ហិរញ្ញវត្ថុ និងសវនកម្ម
៣៤.០
សេចក្ដីផ្ដើម
ដង្វាយមួយភាគក្នុងដប់ និងដង្វាយនានាអនុញ្ញាតឲ្យសាសនាចក្របន្តធ្វើកិច្ចការនៃសេចក្ដីសង្គ្រោះ និងភាពតម្កើងឡើងរបស់ព្រះអម្ចាស់ ( សូមមើល ១.២ ) ។ មូលនិធិទាំងនេះគឺពិសិដ្ឋណាស់ ។ វាតំណាងឲ្យការលះបង់ និងសេចក្ដីជំនឿរបស់សមាជិកសាសនាចក្រនេះ ( សូមមើល ម៉ាកុស ១២:៤១–៤៤ ) ។
៣៤.២
ថ្នាក់ដឹកនាំខាងហិរញ្ញវត្ថុវួដ
៣៤.២.១
គណៈប៊ីស្សព
ប៊ីស្សពមានការទទួលខុសត្រូវដូចខាងក្រោមចំពោះហិរញ្ញវត្ថុនៅក្នុងវួដ ។ គាត់អាចបែងចែកកិច្ចការនេះមួយចំនួនទៅដល់ទីប្រឹក្សា និងស្មៀនរបស់គាត់ ។
ប៊ីស្សព ៖
-
បង្រៀន និងបំផុសដល់សមាជិកឲ្យថ្វាយដង្វាយមួយភាគក្នុងដប់ពេញលេញ ហើយថ្វាយដង្វាយដោយចិត្តសប្បុរស ( សូមមើល ៣៤.៣ ) ។
-
ធ្វើឲ្យប្រាកដថា មូលនិធិវួដត្រូវបានប្រើប្រាស់ និងទទួលខុសត្រូវដោយត្រឹមត្រូវ ( សូមមើល ៣៤.៥ ) ។
-
ពិនិត្យមើលរបាយការណ៍ហិរញ្ញវត្ថុជារៀងរាល់ខែ ហើយធ្វើឲ្យប្រាកដថា បញ្ហានានាត្រូវបានដោះស្រាយភ្លាមៗ ។
-
ធ្វើឲ្យប្រាកដថា ថ្នាក់ដឹកនាំអង្គការជំនួយទាំងឡាយ និងស្មៀន រៀនពីការទទួលខុសត្រូវរបស់ពួកគេចំពោះមូលនិធិពិសិដ្ឋរបស់សាសនាចក្រ ។
-
រៀបចំ និងគ្រប់គ្រងថវិកាប្រចាំឆ្នាំរបស់វួដ ( សូមមើល ៣៤.៦ ) ។
-
ជួបជាមួយសមាជិកវួដជាប្រចាំឆ្នាំ ដើម្បីទទួលបានការផ្ទៀងផ្ទាត់ដង្វាយមួយភាគក្នុងដប់របស់ពួកគេ ។
៣៤.២.២
ស្មៀនវួដ
ប៊ីស្សពចាត់ឲ្យស្មៀនវួដ ឬជំនួយការស្មៀនវួដជួយក្នុងការរក្សាបញ្ជីការហិរញ្ញវត្ថុវួដ ។ ស្មៀនគួរតែធ្វើតាមគោលនយោបាយបច្ចុប្បន្ន ដើម្បីការពារមូលនិធិរបស់សាសនាចក្រ ព្រមទាំងធានាថាកំណត់ត្រាសាសនាចក្រមានភាពត្រឹមត្រូវ ។
ស្មៀនមានការទទួលខុសត្រូវដូចខាងក្រោម ៖
-
កត់ត្រា និងដាក់បញ្ញើគ្រប់មូលនិធិដែលបានទទួលជាមួយនឹងសមាជិកម្នាក់នៃគណៈប៊ីស្សព ។
-
ពិនិត្យមើលរបាយការណ៍ហិរញ្ញវត្ថុជារៀងរាល់ខែ ហើយធ្វើឲ្យប្រាកដថា បញ្ហានានា ត្រូវបានដោះស្រាយភ្លាមៗ ។
-
ជួយដល់គណៈប៊ីស្សពរៀបចំថវិកាវួដប្រចាំឆ្នាំ ( សូមមើល ៣៤.៦.១ និង ៣៤.៦.២ ) ។
-
ធ្វើឲ្យប្រាកដថា សមាជិកអាចចូលទៅមើលរបាយការណ៍នៃការបរិច្ចាគរបស់ពួកគេ និងជួយពួកគេតាមដែលត្រូវការ ។
ស្មៀនគួរតែកាន់បព្វជិតភាពម៉ិលគីស្សាដែក ហើយមានភាពស័ក្តិសមកាន់ប័ណ្ណចូលព្រះវិហារបរិសុទ្ធ ។
៣៤.៣
ការបរិច្ចាគ
៣៤.៣.១
ដង្វាយមួយភាគក្នុងដប់
ដង្វាយមួយភាគក្នុងដប់គឺជាការបង់ចំណូលមួយភាគក្នុងដប់របស់មនុស្សម្នាក់ទៅកាន់សាសនាចក្ររបស់ព្រះ ( សូមមើល គោលលទ្ធិ និងសេចក្តីសញ្ញា ១១៩:៣–៤; ធនធាន ត្រូវបានយល់ថាជាចំណូល ) ។ សមាជិកទាំងអស់ដែលមានប្រាក់ចំណូលគួរតែបង់ដង្វាយមួយភាគក្នុងដប់ ។
៣៤.៣.១.២
ការប្រកាសដង្វាយមួយភាគក្នុងដប់
ប៊ីស្សពជួបជាមួយនឹងសមាជិកម្នាក់ៗអំឡុងប៉ុន្មានខែចុងក្រោយនៃឆ្នាំនីមួយៗ ដើម្បីផ្ទៀងផ្ទាត់ដង្វាយមួយភាគក្នុងដប់របស់គាត់ ឬនាង ។
សមាជិកទាំងអស់ត្រូវបានអញ្ជើញឲ្យទៅជួបនឹងប៊ីស្សពដើម្បី ៖
-
ថ្លែងការណ៍ទៅប៊ីស្សពពីស្ថានភាពជាអ្នកបង់ដង្វាយមួយភាគក្នុងដប់របស់ពួកគេ ។
-
ធ្វើឲ្យប្រាកដថា កំណត់ត្រាការបរិច្ចាគរបស់ពួកគេគឺត្រឹមត្រូវ ។
ប្រសិនបើអាចធ្វើទៅបាន សមាជិកក្រុមគ្រួសារទាំងអស់រួមទាំងកុមារ គួរតែចូលរួមជាមួយគ្នា ។
៣៤.៣.២
ដង្វាយតមអាហារ
ថ្នាក់ដឹកនាំសាសនាចក្រលើកទឹកចិត្តសមាជិកឲ្យរស់នៅតាមច្បាប់តមអាហារ ។ ការណ៍នេះរួមមានទាំងការផ្ដល់ដង្វាយតមអាហារដោយសប្បុរសផងដែរ ( សូមមើល ២២.២.២ ) ។
សេចក្តីណែនាំសម្រាប់ការប្រើប្រាស់មូលនិធិដង្វាយតមអាហារត្រូវបានផ្តល់ឲ្យនៅក្នុង ២២.៥.២ ។
៣៤.៣.៣
មូលនិធិអ្នកផ្សព្វផ្សាយសាសនា
ការបរិច្ចាគសម្រាប់មូលនិធិអ្នកផ្សព្វផ្សាយសាសនាវួដ ត្រូវបានប្រើប្រាស់ជាចម្បង ដើម្បីបំពេញបង្គ្រប់ដល់ការតាំងចិត្តបរិច្ចាគរបស់អ្នកផ្សព្វផ្សាយសាសនាពេញម៉ោងចេញពីវួដនោះ ។
ការបរិច្ចាគសម្រាប់មូលនិធិអ្នកផ្សព្វផ្សាយសាសនាទូទៅ ត្រូវបានប្រើប្រាស់ដោយសាសនាចក្រក្នុងកិច្ចខិតខំផ្សព្វផ្សាយសាសនារបស់សាសនាចក្រទាំងស្រុង ។
៣៤.៣.៧
ការបរិច្ចាគពុំអាចប្រគល់សងវិញបានទេ
នៅពេលដង្វាយមួយភាគក្នុងដប់ និងដង្វាយផ្សេងៗត្រូវបានប្រគល់ជូនដល់សាសនាចក្រ នោះដង្វាយទាំងនោះជាកម្មសិទ្ធិរបស់ព្រះអម្ចាស់ ។ វាត្រូវបានឧទ្ទិសថ្វាយទ្រង់ ។
ប្រធានស្តេក និងប៊ីស្សពជូនដំណឹងទៅដល់អ្នកទាំងឡាយណា ដែលបរិច្ចាគដង្វាយមួយភាគក្នុងដប់ និងដង្វាយផ្សេងៗថា ការបរិច្ចាគទាំងនេះមិនអាចដកយកវិញបានទេ ។
៣៤.៤
ភាពសម្ងាត់នៃដង្វាយមួយភាគក្នុងដប់ និងដង្វាយផ្សេងៗ
ចំនួននៃដង្វាយមួយភាគក្នុងដប់ និងដង្វាយផ្សេងៗ ដែលត្រូវបានបង់ដោយអ្នកថ្វាយដង្វាយ គឺជាការសម្ងាត់ ។ មានតែប៊ីស្សព និងអ្នកទាំងឡាយណា ដែលបានទទួលការអនុញ្ញាតឲ្យចាត់ចែង និងពិនិត្យមើលការបរិច្ចាគទាំងនេះប៉ុណ្ណោះ ដែលគួរតែដឹងអំពីព័ត៌មាននេះ ។
៣៤.៥
ការចាត់ចែងមូលនិធិសាសនាចក្រ
ប្រធានស្តេក និងប៊ីស្សពត្រូវប្រាកដថា មូលនិធិទាំងអស់របស់សាសនាចក្រត្រូវបានចាត់ចែងយ៉ាងត្រឹមត្រូវ ។ គណៈប៊ីស្សព និងស្មៀនត្រូវបានលើកទឹកចិត្តឲ្យមើលវីដេអូ « Sacred Funds, Sacred Responsibilities » យ៉ាងហោចណាស់ម្ដងក្នុងមួយឆ្នាំ ។
៣៤.៥.១
គោលការណ៍ភាពជាដៃគូ
គោលការណ៍ភាពជាដៃគូតម្រូវឲ្យមានមនុស្សពីរនាក់—សមាជិកមួយរូបនៃគណៈប៊ីស្សព និងស្មៀនម្នាក់ ឬសមាជិកពីររូបនៃគណៈប៊ីស្សព—ចូលរួមយ៉ាងសកម្ម នៅពេលកត់ត្រា និងបញ្ចេញមូលនិធិរបស់សាសនាចក្រ ។
ថ្នាក់ដឹកនាំគួរតែការពារ និងមិនដែលចែកចាយពាក្យសម្ងាត់របស់ពួកគាត់ឡើយ ( សូមមើល ៣៣.៩.១.១ ) ។
៣៤.៥.២
ការទទួលដង្វាយមួយភាគក្នុងដប់ និងដង្វាយផ្សេងៗ
ព្រះអម្ចាស់បានប្រទានការជឿជាក់ដ៏ពិសិដ្ឋមួយដល់ប៊ីស្សពឲ្យទទួល និងមើលការខុសត្រូវលើដង្វាយមួយភាគក្នុងដប់ និងដង្វាយផ្សេងៗទៀតរបស់ពួកបរិសុទ្ធ ( សូមមើល គោលលទ្ធិ និងសេចក្ដីសញ្ញា ៤២:៣០–៣៣; ទំព័រ ១១៩ ) ។ មានតែប៊ីស្សព និងទីប្រឹក្សារបស់គាត់ប៉ុណ្ណោះ ដែលអាចទទួលដង្វាយមួយភាគក្នុងដប់ និងដង្វាយផ្សេងៗបាន ។ ភរិយារបស់គណៈប៊ីស្សព សមាជិកផ្សេងទៀតនៃក្រុមគ្រួសាររបស់ពួកគាត់ ស្មៀន ឬសមាជិកនៃវួដផ្សេងទៀត មិនត្រូវទទួលការបរិច្ចាគទាំងនេះទេ មិនថាក្នុងកាលៈទេសៈណាឡើយ ។
៣៤.៥.៣
ការបញ្ជាក់ និងការកត់ត្រាដង្វាយមួយភាគក្នុងដប់ និងដង្វាយផ្សេងៗ
ការបរិច្ចាគទាំងឡាយគួរតែត្រូវបានបញ្ជាក់ផ្ទៀងផ្ទាត់ និងកត់ត្រានៅថ្ងៃអាទិត្យដែលពួកគាត់បានទទួលការបរិច្ចាគនោះ ។ សមាជិកមួយរូបនៃគណៈប៊ីស្សព និងស្មៀនម្នាក់ ឬសមាជិកពីររូបនៃគណៈប៊ីស្សព បើកស្រោមសំបុត្រនីមួយៗជាមួយគ្នា ។ ពួកគាត់បញ្ជាក់ថា មូលនិធិដែលបានភ្ជាប់មកជាមួយនោះ គឺមានចំនួនដូចគ្នានឹងចំនួនដែលបានសរសេរនៅលើទម្រង់បែបបទដង្វាយមួយភាគក្នុងដប់ និងដង្វាយផ្សេងៗ ។ ពួកគាត់កត់ត្រាដង្វាយនីមួយៗឲ្យបានត្រឹមត្រូវ ។ ប្រសិនបើចំនួនមូលនិធិ និងចំនួនដែលបានសរសេរខុសគ្នា នោះពួកគាត់ទាក់ទងទៅកាន់អ្នកបរិច្ចាគភ្លាមៗ ដើម្បីដោះស្រាយនូវភាពខុសគ្នានេះ ។
៣៤.៥.៤
ការដាក់បញ្ញើដង្វាយមួយភាគក្នុងដប់ និងដង្វាយផ្សេងៗ
ការដាក់បញ្ញើគួរតែត្រូវបានរៀបចំ បន្ទាប់ពីការធ្វើឲ្យប្រាកដថា ចំនួនដែលបានកត់ត្រាគឺដូចគ្នានឹងចំនួនមូលនិធិដែលបានទទួល ។
នៅទីណាដែលមានធនាគារទទួលប្រាក់បញ្ញើ ២៤ ម៉ោង នោះសមាជិកនៃគណៈប៊ីស្សព និងអ្នកកាន់បព្វជិតភាពម្នាក់ទៀតដាក់បញ្ញើមូលនិធិនៅក្នុងធនាគារនៅក្នុងថ្ងៃតែមួយដែលមូលនិធិត្រូវបានបើក និងបញ្ជាក់ផ្ទៀងផ្ទាត់ ។
នៅទីណាដែលគ្មានធនាគារទទួលប្រាក់បញ្ញើ ២៤ ម៉ោងទេ ហើយធនាគារត្រូវបិទនៅថ្ងៃអាទិត្យ នោះប៊ីស្សពចាត់ឲ្យអ្នកកាន់បព្វជិតភាពម៉ិលគីស្សាដែកមួយរូបឲ្យទៅដាក់ប្រាក់បញ្ញើនៅថ្ងៃបន្ទាប់ដែលជាថ្ងៃធ្វើការ ។ គាត់គួរតែ ៖
-
ធ្វើឲ្យប្រាកដថា មូលនិធិត្រូវបានរក្សាទុកដោយសុវត្ថិភាពរហូតដល់មូលនិធិទាំងនោះត្រូវបានដាក់បញ្ញើ ។
-
ទទួលបានវិក្កយបត្រដាក់ប្រាក់បញ្ញើ ដែលបង្ហាញពីកាលបរិច្ឆេទ និងចំនួនប្រាក់ដែលដាក់បញ្ញើ ។
៣៤.៥.៥
ការការពារមូលនិធិសាសនាចក្រ
សមាជិកដែលទទួលខុសត្រូវលើមូលនិធិសាសនាចក្រមិនត្រូវទុកមូលនិធិទាំងនោះនៅក្នុងសាលាប្រជុំពេញមួយយប់ ឬទុកមូលនិធិទាំងនេះដោយគ្មានអ្នកមើលខុសត្រូវគ្រប់ពេលវេលានោះទេ ដូចជាក្នុងពេលប្រជុំ និងសកម្មភាពទាំងឡាយ ។
៣៤.៥.៧
ការគ្រប់គ្រងការទូទាត់ប្រាក់របស់ស្តេក និងវួដ
គ្មានការចំណាយរបស់ស្តេក ឬវួដអាចត្រូវបានចំណាយ ឬទូទាត់ដោយគ្មានការអនុញ្ញាតពីអ្នកកាន់តំណែងជាអធិបតីនោះទេ ។
ថ្នាក់ដឹកនាំដែលបានទទួលសិទ្ធិអំណាចត្រូវតែអនុម័តលើការទូទាត់ប្រាក់នីមួយៗ ។ ម្នាក់ក្នុងចំណោមពីរនាក់នេះគួរតែជាសមាជិកម្នាក់មកពីគណៈប្រធានស្តេក ឬគណៈប៊ីស្សព ។ ទោះបីជាទីប្រឹក្សាអាចមានសិទ្ធិចុះហត្ថលេខាលើការទូទាត់ប្រាក់ក្ដី ក៏ប្រធានស្តេក ឬប៊ីស្សពត្រូវតែពិនិត្យមើលលើការទូទាត់ប្រាក់នីមួយៗនោះដែរ ។ ថ្នាក់ដឹកនាំមិនគួរអនុម័តលើការទូទាត់ប្រាក់សម្រាប់ពួកគាត់ខ្លួនឯងនោះទេ ។
ការចារអនុម័តរបស់ប្រធានស្តេកទាមទារឲ្យមាន ពីមុនប៊ីស្សពអាចប្រើប្រាស់ដង្វាយតមអាហារ ឬអនុម័តការបញ្ជាទិញរបស់ប៊ីស្សពសម្រាប់ខ្លួនគាត់ ឬគ្រួសាររបស់គាត់ ។ តម្រូវឲ្យមានការអនុម័តជាលាយលក្ខណ៍អក្សររបស់គណៈប្រធានតំបន់ ពីមុនប៊ីស្សពអាចប្រើប្រាស់ដង្វាយតមអាហារ ឬអនុម័តការបញ្ជាទិញរបស់ប៊ីស្សពសម្រាប់ប្រធានស្តេក ឬគ្រួសាររបស់គាត់ ។ សូមមើល ២២.៥.១.២ សម្រាប់គោលការណ៍ណែនាំទាំងឡាយ ។
សមាជិកម្នាក់ដែលស្នើសុំសំណង ផ្ដល់គ្រប់បង្កាន់ដៃ ឬវិក្កយបត្រជាក្រដាស ឬជាអេឡិចត្រូនិច ។ គាត់ក៏បញ្ចូលនូវគោលបំណង ចំនួន និងកាលបរិច្ឆេទនៃការបញ្ជាទិញនោះផងដែរ ។
ប្រសិនបើមូលនិធិត្រូវបានអនុញ្ញាតឲ្យទៅដំណាក់កាលបន្ទាប់ទៀត នោះសមាជិកបញ្ជូនទម្រង់បែបបទស្នើសុំការទូទាត់ប្រាក់មួយ ដោយកត់ចំណាំពីគោលបំណង ចំនួន និងកាលបរិច្ឆេទ ។ ក្រោយពីការចំណាយនោះត្រូវបានបង់ហើយ បន្ទាប់មក សមាជិក ( ១ ) ផ្តល់បង្កាន់ដៃ ឬវិក្កយបត្រសម្រាប់មូលនិធិដែលបានចំណាយ និង ( ២ ) ប្រគល់រាល់មូលនិធិដែលមិនបានចំណាយត្រឡប់មកវិញ ។ មូលនិធិដែលប្រគល់មកវិញគួរតែត្រូវបានដាក់បញ្ញើវិញ ។
៣៤.៥.៩
ការរក្សាបញ្ជីការហិរញ្ញវត្ថុ
ស្តេក និងវួដនីមួយៗគួរតែរក្សាបញ្ជីការហិរញ្ញវត្ថុត្រឹមត្រូវ និងមានបច្ចុប្បន្នភាព ។
សម្រាប់ព័ត៌មានអំពីការប្រើប្រាស់ និងការថែរក្សាកំណត់ត្រា និងរបាយការណ៍ ស្មៀនគួរតែយោងទៅសេចក្តីណែនាំមកពីទីស្នាក់ការកណ្តាលនៃសាសនាចក្រ ឬការិយាល័យប្រចាំតំបន់ ។ បញ្ជីការហិរញ្ញវត្ថុគួរតែត្រូវបានរក្សាទុកសម្រាប់រយៈពេលយ៉ាងហោចណាស់បីឆ្នាំ បូករួមទាំងឆ្នាំបច្ចុប្បន្នផងដែរ ។
៣៤.៦
ថវិកា និងការចំណាយ
កម្មវិធីថវិកាឧបត្ថម្ភផ្តល់មូលនិធិទូទៅនៃសាសនាចក្រដើម្បីទូទាត់សម្រាប់សកម្មភាព និងកម្មវិធីទាំងឡាយរបស់ស្តេក និងវួដ ។
សកម្មភាពភាគច្រើនបំផុតគួរតែមានលក្ខណៈសាមញ្ញ ហើយចំណាយបន្តិចបន្តួច ឬគ្មានចំណាយសោះ ។
៣៤.៦.១
ថវិការបស់ស្តេក និងវួដ
គ្រប់ស្តេក និងវួដរៀបចំ និងធ្វើប្រតិបត្តិការថវិកាប្រចាំឆ្នាំ ។ ប្រធានស្តេកគ្រប់គ្រងថវិកាស្តេក ហើយប៊ីស្សពគ្រប់គ្រងថវិកាវួដ ។
គោលការណ៍ណែនាំទាំងឡាយត្រូវបានរៀបរាប់ដូចខាងក្រោមនេះ ៖
-
ពិនិត្យមើលលើចំនួនទឹកប្រាក់ដែលបានចំណាយក្នុងអំឡុងពេលឆ្នាំមុន ដើម្បីប្រាកដថាការចំណាយដែលបានចំណាយ ត្រូវបានគិតគូរដល់ ។
-
ស្នើសុំឲ្យអង្គការទាំងឡាយប៉ាន់ស្មានអំពីសេចក្តីត្រូវការថវិការបស់ពួកគេឲ្យលម្អិត ។
-
ប្រមូលផ្ដុំថវិកា ដោយប្រើប្រាស់ការអនុវត្តថវិកាដែលបានអនុម័ត ។
៣៤.៦.២
ថវិកាឧបត្ថម្ភ
៣៤.៦.២.១
ការបែងចែងថវិកា
មូលនិធិថវិកាត្រូវបានបែងចែកជាត្រីមាស ដោយផ្អែកទៅលើការចូលរួមនៅក្នុងផ្នែកដូចខាងក្រោមនេះ ៖
-
ការប្រជុំសាក្រាម៉ង់
-
យុវជន
-
យុវនារី
-
អង្គការបឋមសិក្សាសម្រាប់កុមារអាយុពី ៧–១០ ឆ្នាំ
-
យុវមជ្ឈិមវ័យនៅលីវ
វាសំខាន់ដើម្បីរាយការណ៍ពីការចូលរួមដោយត្រឹមត្រូវ និងទាន់ពេល ( សូមមើល ៣៣.៥.១.១ ) ។
៣៤.៦.២.២
ការប្រើប្រាស់ថវិកាដោយត្រឹមត្រូវ
ប្រធានស្តេក និងប៊ីស្សពត្រូវប្រាកដថា មូលនិធិថវិកាឧបត្ថម្ភត្រូវបានចំណាយដោយឈ្លាសវៃ ។
មូលនិធិថវិកាស្តេក និងវួដគួរតែត្រូវបានប្រើប្រាស់ដើម្បីបង់ថ្លៃសម្រាប់សកម្មភាព កម្មវិធី សៀវភៅសិក្សា និងសម្ភារទាំងអស់ ។
៣៤.៦.២.៣
ថវិកាដែលមិនត្រូវការ
មិនគួរចំណាយមូលនិធិថវិកាដែលផ្តល់ឲ្យដែលមិនត្រូវការនោះទេ ។ មូលនិធិវួដដែលមិនត្រូវការគួរប្រគល់ទៅឲ្យស្តេកវិញ ។
៣៤.៧
សវនកម្ម
៣៤.៧.១
គណៈកម្មការសវនកម្មស្តេក
ប្រធានស្តេករៀបចំគណៈកម្មការសវនកម្មស្តេក ។ គណៈកម្មការនេះធ្វើឲ្យប្រាកដថា ហិរញ្ញវត្ថុស្តេក និងវួដត្រូវបានចាត់ចែងស្របទៅតាមគោលនយោបាយសាសនាចក្រ ។
៣៤.៧.៣
សវនកម្មហិរញ្ញវត្ថុ
សវនករស្តេកធ្វើសវនកម្មកំណត់ត្រាហិរញ្ញវត្ថុរបស់ស្តេក វួដ សាខា និងមជ្ឈមណ្ឌល FamilySearch ពីរដងក្នុងមួយឆ្នាំ ។
អ្នកកាន់តំណែងជាអធិបតីរបស់អង្គភាព និងស្មៀនដែលបានចាត់តាំងខាងហិរញ្ញវត្ថុគួរតែមានពេល ដើម្បីឆ្លើយនឹងសំណួរ អំឡុងពេលធ្វើសវនកម្ម ។
៣៤.៧.៥
ការបាត់បង់ ការលួច ការកេងបន្លំ ឬការគៃបំបាត់មូលនិធិសាសនាចក្រ
ប្រធានស្តេក ឬប្រធាននៃគណៈកម្មការសវនកម្មស្តេក គួរតែត្រូវបានជូនដំណឹងភ្លាមៗ ប្រសិនបើ ៖
-
មូលនិធិសាសនាចក្របានបាត់ ឬត្រូវគេលួច ។
-
អ្នកដឹកនាំម្នាក់បានលួចបន្លំ ឬប្រើប្រាស់មូលនិធិសាសនាចក្រដោយមិនត្រឹមត្រូវ ។