« ២៤. អនុសាសន៍ និងការបម្រើជាអ្នកផ្សព្វផ្សាយសាសនា »ជម្រើសចេញមកពីក្បួនខ្នាតទូទៅ ( ឆ្នាំ២០២៣ ) ។
« ២៤. អនុសាសន៍ និងការបម្រើជាអ្នកផ្សព្វផ្សាយសាសនា » ជម្រើសចេញមកពីក្បួនខ្នាតទូទៅ ។
២៤.
អនុសាសន៍ និងការបម្រើជាអ្នកផ្សព្វផ្សាយសាសនា
២៤.០
សេចក្ដីផ្ដើម
នៅជំនាន់បុរាណ ព្រះអម្ចាស់បានប្រទានសិទ្ធិអំណាចឲ្យប្រមូលផ្ដុំអ៊ីស្រាអែលនៅក្នុងចំណោម « គ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ » ( ម៉ាថាយ ២៨:១៩; សូមមើលផងដែរ ខទី ២០ ) ។ ព្រះអម្ចាស់បានរំឭកសិទ្ធិអំណាចនោះនៅក្នុងជំនាន់ចុងក្រោយនេះ ( សូមមើល គោលលទ្ធិ និងសេចក្តីសញ្ញា ៣៩:១១; ៦៨:៦–៨; ១១២:២៨–៣០ ) ។
ការបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនាម្នាក់ គឺជាឯកសិទ្ធិដ៏ពិសិដ្ឋមួយ ។ វានាំមកនូវពរជ័យដ៏អស់កល្បដល់អ្នកផ្សព្វផ្សាយរូបនោះ និងអស់អ្នកដែលគាត់ ឬនាងបម្រើ ( សូមមើល គោលលទ្ធិ និងសេចក្ដីសញ្ញា ១៨:១៤–១៦ ) ។
ព្រះអម្ចាស់សុំឲ្យយុវជនគ្រប់រូបដែលមានសមត្ថភាព និងភាពស័ក្ដិសមឲ្យរៀបចំខ្លួន និងបម្រើបេសកកម្ម ។
ព្រះអម្ចាស់ក៏ស្វាគមន៍ឲ្យយុវនារីដែលមានសមត្ថភាព និងភាពស័ក្ដិសមបម្រើបេសកកម្មផងដែរ ប្រសិនបើពួកគេមានបំណងប្រាថ្នាចង់បម្រើ ។
អ្នកផ្សព្វផ្សាយសាសនារៀមច្បងក៏ត្រូវការផងដែរ ហើយត្រូវបានលើកទឹកចិត្តឲ្យរៀបចំខ្លួនដើម្បីបម្រើ ។
២៤.១
ការហៅឲ្យបម្រើ
អ្នកផ្សព្វផ្សាយសាសនាតំណាងឲ្យព្រះអម្ចាស់ និងត្រូវតែបានហៅដោយសិទ្ធិអំណាចត្រឹមត្រូវ ( សូមមើល គោលលទ្ធិ និងសេចក្ដីសញ្ញា ៤២:១១; មាត្រានៃសេចក្ដីជំនឿ ១:៥ ) ។ ជាទូទៅ ការហៅឲ្យបម្រើបេសកកម្មត្រូវបានផ្ដល់មកពីប្រធាននៃសាសនាចក្រ ។ សម្រាប់អ្នកផ្សព្វផ្សាយសាសនារៀមច្បងផ្នែកសេវាកម្ម ការហៅត្រូវបានផ្ដល់មកពីប្រធានស្តេក ។
២៤.២
ការចាត់តាំងជាអ្នកផ្សព្វផ្សាយសាសនា
ការហៅឲ្យបម្រើជាអ្នកផ្សព្វផ្សាយសាសនារួមមាននូវការចាត់តាំងដ៏ជាក់លាក់មួយ ។ ការចាត់តាំងទាំងនេះអាចខុសគ្នាខ្លាំង ។
២៤.២.១
ពួកអ្នកផ្សព្វផ្សាយសាសនាវ័យក្មេងផ្នែកបង្រៀន
ពួកអ្នកផ្សព្វផ្សាយសាសនាវ័យក្មេងផ្នែកបង្រៀនភាគច្រើនត្រូវបានចាត់តាំងឲ្យបង្រៀនដំណឹងល្អនៅឆ្ងាយពីផ្ទះ ។ ការចាត់តាំងទាំងនេះត្រូវបានធ្វើឡើងដោយពួកសាវកតាមរយៈវិវរណៈ ។ អ្នកផ្សព្វផ្សាយសាសនាទាំងនេះបម្រើនៅក្រោមការដឹកនាំរបស់ប្រធានបេសកកម្ម ។
២៤.២.២
អ្នកផ្សព្វផ្សាយសាសនាវ័យក្មេងផ្នែកសេវាកម្ម
អ្នកផ្សព្វផ្សាយសាសនាវ័យក្មេងផ្នែកសេវាកម្មមួយចំនួនត្រូវបានចាត់តាំងឲ្យបម្រើនៅក្នុងសាសនាចក្រ និងសហគមន៍ ខណៈពួកគេរស់នៅក្នុងគេហដ្ឋានខ្លួនឯង ។ ការចាត់តាំងទាំងនេះត្រូវបានធ្វើឡើងដោយពួកសាវកតាមរយៈវិវរណៈ ។ ពួកលោកផ្ដល់ការចាត់តាំងដល់បេក្ខជនដែលស្ថានភាពរបស់ពួកគេស័ក្ដិសមបំផុតសម្រាប់បេសកកម្មផ្នែកសេវាកម្ម ( សូមមើល ២៤.៣.៣ ) ។
២៤.២.៣
អ្នកផ្សព្វផ្សាយសាសនារៀមច្បង
អ្នកផ្សព្វផ្សាយសាសនារៀមច្បងទាំងអស់ត្រូវបានលើកទឹកចិត្តឲ្យស្វែងរកមនុស្សដើម្បីបង្រៀន និងជួយពួកគេឲ្យរៀបចំខ្លួនសម្រាប់ពិធីបុណ្យជ្រមុជទឹក ។ អ្នកផ្សព្វផ្សាយសាសនារៀមច្បងក៏អាចត្រូវបានចាត់តាំងឲ្យគាំទ្រដល់ ៖
-
សមាជិក និងថ្នាក់ដឹកនាំក្នុងតំបន់ ។
-
តំបន់ នាយកដ្ឋានសាសនាចក្រ និងអាគារសាសនាចក្រ ។
-
អង្គការសប្បុរសធម៌ ។
អ្នកផ្សព្វផ្សាយសាសនារៀមច្បងមិនត្រូវបានសូមឲ្យធ្វើការតាមម៉ោងដូចគ្នា ធ្វើសកម្មភាពដូចគ្នាទាំងអស់ ឬបំពេញតាមការរំពឹងទុកដូចគ្នានឹងអ្នកផ្សព្វផ្សាយសាសនាវ័យក្មេងនោះទេ ។
ការចាត់តាំងសម្រាប់អ្នកផ្សព្វផ្សាយសាសនារៀមច្បងត្រូវបានផ្ដល់ដោយវិវរណៈទៅកាន់ពួកសាវក ។ បេក្ខជនអាចបង្ហាញការពេញចិត្តសម្រាប់ការចាត់តាំងមួយបាន ប៉ុន្ដែគួរតែស្ម័គ្រចិត្តទទួលយកការចាត់តាំងផ្សេងទៀតផងដែរ ។
២៤.២.៤
អ្នកផ្សព្វផ្សាយសាសនារៀមច្បងផ្នែកសេវាកម្ម
បន្ថែមពីលើការហៅនៅក្នុងវួដ ឬស្ដេកកំណើតរបស់ពួកគេ នោះសមាជិកអាចបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនារៀមច្បងផ្នែកសេវាកម្មបាន ។ អ្នកផ្សព្វផ្សាយសាសនាទាំងនេះផ្ដល់ការបម្រើដ៏មានតម្លៃនៅក្នុងនាយកដ្ឋាន អគារ និងបេសកកម្មរបស់សាសនាចក្រ ( សូមមើល ២៤.៧.១ ) ។ ពួកគេរស់នៅក្នុងផ្ទះខ្លួនឯង ។
អ្នកផ្សព្វផ្សាយសាសនារៀមច្បងផ្នែកសេវាកម្មត្រូវបានហៅដោយប្រធានស្តេក ។ ពួកគេបម្រើនៅក្រោមការដឹកនាំរបស់លោក ។ ចំនួនពេលវេលាដែលពួកគេបម្រើរាល់សប្ដាហ៍ អាស្រ័យទៅលើសមត្ថភាពរបស់ពួកគេ ឱកាសបម្រើនៅក្នុងតំបន់របស់ពួកគេ និងការដឹកនាំមកពីគណៈប្រធានតំបន់ ។
២៤.២.៥
សេចក្ដីសង្ខេបនៃការចាត់តាំងជាអ្នកផ្សព្វផ្សាយសាសនា
តារាងខាងក្រោមនេះសង្ខេបពីប្រភេទនៃការចាត់តាំងជាអ្នកផ្សព្វផ្សាយសាសនា ។
|
អ្នកផ្សព្វផ្សាយសាសនាវ័យក្មេងផ្នែកបង្រៀន |
អ្នកផ្សព្វផ្សាយសាសនាវ័យក្មេងផ្នែកសេវាកម្ម |
អ្នកផ្សព្វផ្សាយសាសនារៀមច្បង |
អ្នកផ្សព្វផ្សាយសាសនារៀមច្បងផ្នែកសេវាកម្ម | |
|---|---|---|---|---|
|
ត្រូវបានហៅដោយ | អ្នកផ្សព្វផ្សាយសាសនាវ័យក្មេងផ្នែកបង្រៀន ប្រធានសាសនាចក្រ | អ្នកផ្សព្វផ្សាយសាសនាវ័យក្មេងផ្នែកសេវាកម្ម ប្រធានសាសនាចក្រ | អ្នកផ្សព្វផ្សាយសាសនារៀមច្បង ប្រធានសាសនាចក្រ | អ្នកផ្សព្វផ្សាយសាសនារៀមច្បងផ្នែកសេវាកម្ម ប្រធានស្តេក |
|
ត្រូវបានចាត់តាំងដោយ | អ្នកផ្សព្វផ្សាយសាសនាវ័យក្មេងផ្នែកបង្រៀន សាវក | អ្នកផ្សព្វផ្សាយសាសនាវ័យក្មេងផ្នែកសេវាកម្ម សាវក | អ្នកផ្សព្វផ្សាយសាសនារៀមច្បង សាវក | អ្នកផ្សព្វផ្សាយសាសនារៀមច្បងផ្នែកសេវាកម្ម ប្រធានស្តេក |
|
ត្រូវបានញែកចេញដោយ | អ្នកផ្សព្វផ្សាយសាសនាវ័យក្មេងផ្នែកបង្រៀន ប្រធានស្តេក | អ្នកផ្សព្វផ្សាយសាសនាវ័យក្មេងផ្នែកសេវាកម្ម ប្រធានស្តេក | អ្នកផ្សព្វផ្សាយសាសនារៀមច្បង ប្រធានស្តេក | អ្នកផ្សព្វផ្សាយសាសនារៀមច្បងផ្នែកសេវាកម្ម ប្រធានស្តេក ឬទីប្រឹក្សា |
|
រស់នៅ | អ្នកផ្សព្វផ្សាយសាសនាវ័យក្មេងផ្នែកបង្រៀន ឆ្ងាយពីផ្ទះ | អ្នកផ្សព្វផ្សាយសាសនាវ័យក្មេងផ្នែកសេវាកម្ម នៅផ្ទះ | អ្នកផ្សព្វផ្សាយសាសនារៀមច្បង ឆ្ងាយពីផ្ទះ ឬនៅផ្ទះ | អ្នកផ្សព្វផ្សាយសាសនារៀមច្បងផ្នែកសេវាកម្ម នៅផ្ទះ |
|
ថ្នាក់ដឹកនាំសាសនា | អ្នកផ្សព្វផ្សាយសាសនាវ័យក្មេងផ្នែកបង្រៀន ប្រធានបេសកកម្ម ឬប្រធានទីតាំងប្រវត្តិសាស្ដ្រ | អ្នកផ្សព្វផ្សាយសាសនាវ័យក្មេងផ្នែកសេវាកម្ម ប្រធានស្តេក | អ្នកផ្សព្វផ្សាយសាសនារៀមច្បង ប្រធានបេសកកម្ម ប្រធានព្រះវិហារបរិសុទ្ធ ឬប្រធានទីតាំងប្រវត្តិសាស្ដ្រ ឬប្រធានតំបន់ | អ្នកផ្សព្វផ្សាយសាសនារៀមច្បងផ្នែកសេវាកម្ម ប្រធានស្តេក |
|
រាយការណ៍ទៅកាន់ | អ្នកផ្សព្វផ្សាយសាសនាវ័យក្មេងផ្នែកបង្រៀន ប្រធានបេសកកម្ម ឬប្រធានទីតាំងប្រវត្តិសាស្ដ្រ | អ្នកផ្សព្វផ្សាយសាសនាវ័យក្មេងផ្នែកសេវាកម្ម ប្រធានបេសកកម្មតាមរយៈអ្នកដឹកនាំបេសកកម្មផ្នែកសេវាកម្ម | អ្នកផ្សព្វផ្សាយសាសនារៀមច្បង ប្រធានបេសកកម្ម ប្រធានព្រះវិហារបរិសុទ្ធ ឬប្រធានទីតាំងប្រវត្តិសាស្ដ្រ ប្រធានតំបន់ នាយកគ្រប់គ្រងមជ្ឈមណ្ឌលអ្នកទស្សនា ឬនាយកគ្រប់គ្រងនាយកដ្ឋាន ឬអគាររបស់សាសនាចក្រ | អ្នកផ្សព្វផ្សាយសាសនារៀមច្បងផ្នែកសេវាកម្ម អ្នកគ្រប់គ្រងផ្នែកប្រតិបត្តិការនៃការចាត់តាំងផ្នែកសេវាកម្ម |
|
តម្រូវការទាក់ទងនឹងអាយុ | អ្នកផ្សព្វផ្សាយសាសនាវ័យក្មេងផ្នែកបង្រៀន ១៨–២៥ ( បុរស ) | អ្នកផ្សព្វផ្សាយសាសនាវ័យក្មេងផ្នែកសេវាកម្ម ១៨–២៥ ( បុរស ) | អ្នកផ្សព្វផ្សាយសាសនារៀមច្បង ៤០ ឆ្នាំឡើង ប្រសិនបើបានរៀបការហើយ ឬប្រសិនបើជាបងប្អូនស្រីនៅលីវ | អ្នកផ្សព្វផ្សាយសាសនារៀមច្បងផ្នែកសេវាកម្ម ២៦ ឆ្នាំឡើង |
២៤.៣
ការរៀបចំខ្លួន និងការមានភាពស័ក្ដិសមដើម្បីបម្រើបេសកកម្ម
អនាគតអ្នកផ្សព្វផ្សាយសាសនាត្រូវបានលើកទឹកចិត្តឲ្យបម្រើបេសកកម្ម ដោយសារតែសេចក្ដីស្រឡាញ់របស់ពួកគេចំពោះព្រះអម្ចាស់ និងបុត្រាបុត្រីរបស់ទ្រង់ ។ ពួកគេគួរតែដឹងពី សំណួរសម្ភាសន៍សម្រាប់ការផ្តល់អនុសាសន៍អ្នកផ្សព្វផ្សាយសាសនា ។
២៤.៣.១
ការប្រែចិត្តជឿលើព្រះយេស៊ូវគ្រីស្ទ
បេក្ខជនអ្នកផ្សព្វផ្សាយសាសនាខិតខំពង្រឹងការប្រែចិត្តជឿរបស់ពួកគេលើព្រះយេស៊ូវគ្រីស្ទ និងដំណឹងល្អដែលបានស្តារឡើងវិញរបស់ទ្រង់ ។
២៤.៣.២
ការបំពេញតាមបទដ្ឋាននៃភាពស័ក្ដិសម
បេក្ខជនអ្នកផ្សព្វផ្សាយសាសនាខិតខំមានភាពស័ក្តិសមនឹងភាពជាដៃគូនៃព្រះវិញ្ញាណ ។ ការណ៍នេះចាំបាច់សម្រាប់ការបម្រើជាអ្នកផ្សព្វផ្សាយសាសនាដ៏មានប្រសិទ្ធភាព ( សូមមើល គោលលទ្ធិ និងសេចក្ដីសញ្ញា ៤២:១៣–១៤ ) ។
២៤.៣.២.១
ការប្រែចិត្ត
ការប្រែចិត្តតម្រូវឲ្យមានការអនុវត្តសេចក្ដីជំនឿលើព្រះគ្រីស្ទ ការមានបំណងដ៏ពិត និងការរក្សាព្រះបញ្ញត្តិទាំងឡាយ ។ ការណ៍នេះរួមមានការសារភាព និងការបោះបង់ចោលអំពើបាប ។ ចំពោះអំពើបាបធ្ងន់ធ្ងរ ការប្រែចិត្តតម្រូវឲ្យមានការសារភាពដល់ប៊ីស្សព ឬប្រធានស្តេក ( សូមមើល ៣២.៣ និង ៣២.៤ ក្នុងក្បួនខ្នាតនេះ ) ។
បុគ្គលម្នាក់ដែលប្រែចិត្ត ទទួលបានការអភ័យទោស ហើយត្រូវបានសម្អាតតាមរយៈដង្វាយធួន និងព្រះគុណរបស់ព្រះយេស៊ូវគ្រីស្ទ ។ ព្រះអម្ចាស់នឹងពុំចងចាំអំពើបាបនេះទៀតឡើយ ។ « សេចក្ដីអំណររបស់ទ្រង់មហិមាណាស់ហ្ន៎ចំពោះព្រលឹងណាដែលប្រែចិត្ត ! » ( គោលលទ្ធិ និងសេចក្តីសញ្ញា ១៨:១៣; សូមមើល អេសាយ ៤៣:២៥; យ៉ាកុប ៦:៥; អាលម៉ា ៣៤:១៥-១៧; ហេលេមិន ៥:១០-១១; គោលលទ្ធិ និងសេចក្តីសញ្ញា ៥៨:៤២-៤៣ និង ៣២.១ ក្នុងក្បួនខ្នាតនេះ ) ។
បេក្ខជនអ្នកផ្សព្វផ្សាយសាសនាត្រូវតែបានប្រែចិត្តពីអំពើបាបធ្ងន់ធ្ងរសិន ពីមុនប្រធានស្ដេកអាចបញ្ជូនអនុសាសន៍របស់គាត់បាន ( សូមមើល ៣២.៦; សូមមើលផងដែរ ២៤.៤.៤ ) ។ ដំណើរការនៃការប្រែចិត្តរួមបញ្ចូលទាំងការមានពេលវេលាគ្រប់គ្រាន់ ដើម្បីឲ្យបុគ្គលនោះបង្ហាញការប្រែចិត្តតាមរយៈការរស់នៅដោយសុចរិតដើម្បីគាត់ទទួលព្រះវិញ្ញាណនៃព្រះគ្រីស្ទឆ្ពោះទៅរកការអភ័យទោសពីអំពើបាប ( សូមមើល គោលលទ្ធិ និងសេចក្តីសញ្ញា ២០:៣៧ ) ។
២៤.៣.៣
សុខភាពផ្លូវកាយ ផ្លូវចិត្ត និងខាងសតិអារម្មណ៍
កិច្ចការអ្នកផ្សព្វផ្សាយសាសនាគឺពិបាក ។ ពួកអ្នកផ្សព្វផ្សាយសាសនាវ័យក្មេងផ្នែកបង្រៀនត្រូវតែប្ដេជ្ញាចិត្ត ទាំងខាងផ្លូវកាយ ផ្លូវចិត្ត និងខាងសតិអារម្មណ៍ដើម្បីអាចធ្វើតាមកាលវិភាគអ្នកផ្សព្វផ្សាយសាសនាពេញម៉ោងបាន ។
២៤.៣.៤
ហិរញ្ញវត្ថុ
២៤.៣.៤.១
ការផ្ដល់ហិរញ្ញវត្ថុដល់អ្នកផ្សព្វផ្សាយសាសនាវ័យក្មេងដែលបម្រើនៅឆ្ងាយពីផ្ទះ
បេក្ខជនវ័យក្មេងដែលបានរៀបចំខ្លួនស្របតាមសមត្ថភាពរបស់ពួកគេ មិនគួរពន្យារពេលដើម្បីបម្រើដោយសារមូលហេតុហិរញ្ញវត្ថុនោះទេ ។ អស់អ្នកដែលត្រូវការជំនួយផ្នែកហិរញ្ញវត្ថុ ដើម្បីបំពេញតាមការតាំងចិត្តបរិច្ចាគដែលបានរំពឹងទុក អាចទទួលបានជំនួយនោះមកពីគ្រួសារ និងមិត្តភក្ដិជិតឆ្ងាយទាំងឡាយ ។
ប្រសិនបើសេចក្ដីត្រូវការនៅតែមាន នោះប៊ីស្សព ឬប្រធានស្តេកអាចសូមឲ្យសមាជិកនៅក្នុងវួដ ឬស្ដេក ធ្វើការបរិច្ចាគចូលក្នុងមូលនិធិអ្នកផ្សព្វផ្សាយសាសនាវួដបាន ។
ថវិកា និងដង្វាយតមអាហាររបស់អង្គភាពក្នុងមូលដ្ឋាន មិនអាចយកមកប្រើប្រាស់បានទេ ។
ការតាំងចិត្តបរិច្ចាគរាល់ខែ ។ ពួកអ្នកផ្សព្វផ្សាយសាសនាវ័យក្មេងផ្នែកបង្រៀន និងក្រុមគ្រួសាររបស់ពួកគេបរិច្ចាគក្នុងចំនួនជាក់លាក់មួយជារៀងរាល់ខែ ដើម្បីជួយចេញថ្លៃចំណាយកម្មវិធីអ្នកផ្សព្វផ្សាយសាសនា ។
ការបរិច្ចាគនេះត្រូវដាក់ទៅក្នុងមូលនិធិអ្នកផ្សព្វផ្សាយសាសនាវួដ ។ ប៊ីស្សពបញ្ជាក់ថា មូលនិធិនេះត្រូវបានបរិច្ចាគជារៀងរាល់ខែ ។ មូលនិធិដែលលើសពីចំនួនប្រចាំខែ មិនគួរធ្វើការបរិច្ចាគទុកជាមុននោះទេ ។ មូលនិធិដែលបានបរិច្ចាគជាមុន មិនអាចប្រគល់សងវិញបានទេ ប្រសិនបើអ្នកផ្សព្វផ្សាយសាសនាត្រឡប់ទៅផ្ទះវិញមុនកំណត់នោះ ។
ចំណាយនៅក្នុងតំបន់បេសកកម្ម ។ ជារៀងរាល់ខែ អ្នកផ្សព្វផ្សាយសាសនាវ័យក្មេងទទួលបានមូលនិធិគ្រប់គ្រាន់មកពីបេសកកម្មដើម្បីផ្គត់ផ្គង់សម្រាប់ការចំណាយថ្លៃម្ហូបអាហារដែលមានសុខភាព មធ្យោបាយធ្វើដំណើរ និងការចំណាយថ្លៃរស់នៅផ្សេងៗទៀត ។ មូលនិធិទាំងនេះគឺពិសិដ្ឋណាស់ ។ អ្នកផ្សព្វផ្សាយសាសនាប្រើមូលនិធិនេះ តែសម្រាប់គោលបំណងដែលទាក់ទងនឹងបេសកកម្មប៉ុណ្ណោះ ។ មូលនិធិនេះមិនគួរប្រើប្រាស់សម្រាប់ការចំណាយផ្ទាល់ខ្លួន សន្សំទុក ឬផ្ញើទៅសមាជិកគ្រួសារ ឬអ្នកដទៃនោះទេ ។ អ្នកផ្សព្វផ្សាយសាសនាប្រគល់មូលនិធិនានា ដែលពួកគេមិនត្រូវការទៅកាន់បេសកកម្មវិញ ។
អ្នកផ្សព្វផ្សាយសាសនាប្រើប្រាស់មូលនិធិផ្ទាល់ខ្លួនដើម្បីចេញថ្លៃចំណាយផ្សេងទៀត ។ ការចំណាយផ្ទាល់ខ្លួនទាំងនេះគួរតែតិចតួចទេ ។ ( សូមមើល បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ ៤.៨ ) ។
២៤.៣.៤.២
ការផ្ដល់ហិរញ្ញវត្ថុដល់អ្នកផ្សព្វផ្សាយសាសនារៀមច្បងដែលបម្រើនៅឆ្ងាយពីផ្ទះ
ការតាំងចិត្តបរិច្ចាគរាល់ខែ ។ អ្នកផ្សព្វផ្សាយសាសនារៀមច្បងដែលបម្រើនៅឆ្ងាយពីផ្ទះ បរិច្ចាគទៅកាន់មូលនិធិអ្នកផ្សព្វផ្សាយសាសនាវួដកំណើតរបស់ពួកគាត់ជារៀងរាល់ខែ ។ ការបរិច្ចាគទាំងនេះជួយបង់ថ្លៃការចំណាយលើការស្នាក់នៅ និងយានយន្ត ។
ប៊ីស្សពបញ្ជាក់ថា មូលនិធិនេះត្រូវបានបរិច្ចាគជារៀងរាល់ខែ ។ មូលនិធិដែលលើសពីចំនួនប្រចាំខែ មិនគួរធ្វើការបរិច្ចាគទុកជាមុននោះទេ ។
ការចំណាយបន្ថែម ។ បន្ថែមពីលើការតាំងចិត្តបរិច្ចាគប្រចាំខែ ដែលជួយចេញថ្លៃការស្នាក់នៅ និងថ្លៃរថយន្ដ នោះអ្នកផ្សព្វផ្សាយសាសនារៀមច្បងត្រូវតែចេញថ្លៃចំណាយផ្សេងទៀតទាំងអស់ដោយខ្លួនឯង រួមមានទាំងអាហារ សម្ភារផ្ទាល់ខ្លួន និងប្រេងសាំងរថយន្តផងដែរ ។
២៤.៣.៤.៣
ការផ្ដល់ហិរញ្ញវត្ថុដល់អ្នកផ្សព្វផ្សាយសាសនាដែលបម្រើនៅផ្ទះ
អ្នកផ្សព្វផ្សាយសាសនាដែលបម្រើនៅផ្ទះ ទទួលខុសត្រូវលើតម្រូវការផ្នែកហិរញ្ញវត្ថុរបស់ពួកគេទាំងអស់ ។
២៤.៣.៤.៤
ការធានារ៉ាប់រង និងការចំណាយផ្នែកវេជ្ជសាស្រ្ត
ពួកអ្នកផ្សព្វផ្សាយសាសនាទាំងអស់ រួមទាំងពួកអ្នកផ្សព្វផ្សាយសាសនាវ័យក្មេងផ្នែកបង្រៀនត្រូវបានលើកទឹកចិត្តយ៉ាងខ្លាំងឲ្យពួកគេរក្សាការធានារ៉ាប់រងវេជ្ជសាស្ត្រ ដែលមានស្រាប់ប្រសិនបើអាចធ្វើទៅបាន ។
អ្នកផ្សព្វផ្សាយសាសនាដែលបម្រើនៅផ្ទះ ត្រូវតែមានការធានារ៉ាប់រងវេជ្ជសាស្ដ្ររបស់ពួកគេផ្ទាល់ និងការធានារ៉ាប់រងផ្សេងទៀត ។ អ្នកផ្សព្វផ្សាយសាសនារៀមច្បងដែលបម្រើនៅឆ្ងាយពីផ្ទះ ក៏ត្រូវតែមានការធានារ៉ាប់រងនេះដែរ ។ អ្នកផ្សព្វផ្សាយសាសនារៀមច្បងដែលនឹងបម្រើនៅក្រៅប្រទេសកំណើតរបស់ពួកគេ អាចទទួលបានការធានារ៉ាប់រងតាមរយៈ ផែនការវេជ្ជសាស្ដ្រសម្រាប់ការបម្រើរបស់ពួកអ្នកផ្សព្វផ្សាយសាសនារៀមច្បង ។
២៤.៣.៥
តួនាទីរបស់សមាជិកគ្រួសារ និងថ្នាក់ដឹកនាំនៅក្នុងការរៀបចំអ្នកផ្សព្វផ្សាយសាសនា
សមាជិកគ្រួសារ ប៊ីស្សព និងថ្នាក់ដឹកនាំដទៃទៀត ជួយយុវវ័យឲ្យរៀបចំខ្លួនបម្រើបេសកកម្ម ។
សមាជិកគ្រួសារ និងថ្នាក់ដឹកនាំលើកទឹកចិត្តឲ្យបេក្ខជនអ្នកផ្សព្វផ្សាយសាសនាទាំងអស់សិក្សា ៖
-
ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ។
សមាជិកគ្រួសារ និងថ្នាក់ដឹកនាំជួយបេក្ខជនទាំងអស់ឲ្យប្ដេជ្ញាចិត្តធ្វើតាមបទដ្ឋានអ្នកផ្សព្វផ្សាយសាសនា ។ ពួកគាត់លើកទឹកចិត្តឲ្យបេក្ខជនសិក្សាក្បួនខ្នាតបទដ្ឋានអ្នកផ្សព្វផ្សាយសាសនា ដែលមានខ្លឹមសារទាក់ទងនឹងការចាត់តាំងរបស់ពួកគេ ៖
-
សម្រាប់ពួកអ្នកផ្សព្វផ្សាយសាសនាវ័យក្មេងផ្នែកបង្រៀន ៖ បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ
២៤.៤
ការផ្ដល់អនុសាសន៍អ្នកផ្សព្វផ្សាយសាសនា
២៤.៤.១
ការវាយតម្លៃសុខភាព
បេក្ខជនទាំងអស់តម្រូវឲ្យមានការវាយតម្លៃពីគ្រូពេទ្យជំនាញ អំពីស្ថានភាពសុខភាពរបស់ពួកគេ ។
២៤.៤.២
ទម្រង់បែបបទការសម្ភាស និងអនុសាសន៍
ប៊ីស្សព និងប្រធានស្តេកដឹកនាំការសម្ភាសដោយយកចិត្តទុកដាក់ ដោយការស្រាវជ្រាវខាងវិញ្ញាណ និងដោយការលើកស្ទួយជាមួយនឹងបេក្ខជនម្នាក់ៗ ។ ពួកគាត់ប្រើប្រាស់ សំណួរសម្ភាសន៍សម្រាប់ការចេញអនុសាសន៍អ្នកផ្សព្វផ្សាយសាសនា ។
ប៊ីស្សព និងប្រធានស្តេកក៏ពិនិត្យមើលព័ត៌មានអំពីបទដ្ឋាននៃភាពស័ក្ដិសម និងស្ថានភាពសុខភាពនៅក្នុង ប្រព័ន្ធផ្ដល់អនុសាសន៍អ្នកផ្សព្វផ្សាយសាសនាតាមអនឡាញ ផងដែរ ។ ប៊ីស្សព និងប្រធានស្តេកមិនបន្ថែមបទដ្ឋានផ្សេងទៀត ដើម្បីមានសិទ្ធិចូលរួមនោះទេ ។ ហើយពួកគាត់ក៏មិនផ្លាស់ប្ដូរសំណួរសម្ភាសន៍ដែរ ។
ប្រសិនបើប៊ីស្សព និងប្រធានស្តេកមានកង្វល់អំពីការធ្វើតាមបទដ្ឋាននៃភាពស័ក្ដិសមរបស់បេក្ខជនម្នាក់ ឬអំពីស្ថានភាពសុខភាពរបស់គាត់ ឬនាង នោះពួកគាត់ប្រឹក្សាជាមួយគ្នា និងជាមួយបុគ្គលនោះ ។ ដោយមានការអនុញ្ញាតពីបេក្ខជនវ័យក្មេង នោះពួកគាត់ក៏អាចប្រឹក្សាជាមួយនឹងឪពុកម្ដាយរបស់គាត់ ឬនាងបានដែរ ។ ប៊ីស្សព និងប្រធានស្តេកមិនត្រូវបញ្ជូនអនុសាសន៍ទេ ទាល់តែបុគ្គលនេះបានប្រែចិត្តពីអំពើបាបធ្ងន់ធ្ងរជាមុនសិន ( សូមមើល ២៤.៣.២.១ ) ។ អាស្រ័យលើសុខភាពផ្លូវកាយ ផ្លូវចិត្ត ឬខាងសតិអារម្មណ៍របស់បុគ្គលនេះ នោះពួកគាត់អាចពិភាក្សាពីលទ្ធភាពនៃការចាត់តាំងឲ្យធ្វើជាអ្នកផ្សព្វផ្សាយសាសនាផ្នែកសេវាកម្ម ។
នៅក្នុងករណីបន្ទាន់ នៅពេលប៊ីស្សព ឬប្រធានស្ដេកអវត្តមាន នោះគាត់អាចផ្តល់សិទ្ធិអនុញ្ញាតឲ្យទីប្រឹក្សាម្នាក់របស់គាត់ដឹកនាំការសម្ភាសន៍ទាំងនេះបាន ។
នៅក្នុងមណ្ឌល ប្រធានបេសកកម្ម ឬទីប្រឹក្សាដែលបានចាត់តាំងធ្វើការសម្ភាស និងផ្ដល់អនុសាសន៍ដល់បេក្ខជនជាអ្នកផ្សព្វផ្សាយសាសនា ។ ប្រធានមណ្ឌលមិនដឹកនាំការសម្ភាសទាំងនេះទេ ។
២៤.៤.៤
អ្នកទាំងឡាយដែលមិនអាចបម្រើជាអ្នកផ្សព្វផ្សាយសាសនាពេញម៉ោងបាន
ពេលខ្លះ សមាជិកម្នាក់ដែលចង់បម្រើ ហើយត្រូវបានផ្តល់អនុសាសន៍ឲ្យបម្រើជាអ្នកផ្សព្វផ្សាយសាសនា អាចនឹងមិនត្រូវបានហៅឲ្យធ្វើជាអ្នកផ្សព្វផ្សាយសាសនាផ្នែកបង្រៀន ឬផ្នែកសេវាកម្មនោះទេ ។ ការណ៍នេះអាចបណ្តាលមកពីបញ្ហាសុខភាព មិនបំពេញតាមបទដ្ឋាននៃភាពស័ក្ដិសម បញ្ហាផ្លូវច្បាប់ ឬកាលៈទេសៈផ្សេងទៀត ។ ប៊ីស្សព និងប្រធានស្តេកបង្ហាញសេចក្ដីស្រឡាញ់ និងការដឹងគុណចំពោះឆន្ទៈបម្រើរបស់សមាជិករូបនេះ ។
២៤.៥
បន្ទាប់ពីទទួលបានការបម្រើបេសកកម្ម
អ្នកផ្សព្វផ្សាយសាសនាដែលបានហៅឲ្យបម្រើថ្មីៗ ត្រូវបានលើកទឹកចិត្តឲ្យអាន ឬអានឡើងវិញក្នុងព្រះគម្ពីរមរមន មុនពេលពួកគេចាប់ផ្តើមបេសកកម្មរបស់ពួកគេ ។ ពួកគេធ្វើតាមការប្រឹក្សារបស់ស្ដេចបេនយ៉ាមីនឲ្យ « ប្រយ័ត្នខ្លួន ទាំងគំនិតរបស់ខ្លួន និងពាក្យសម្ដីរបស់ខ្លួន និងកិច្ចការរបស់ខ្លួន » ( ម៉ូសាយ ៤:៣០ ) ។
២៤.៥.១
អំណោយទានពិសិដ្ឋនៃព្រះវិហារបរិសុទ្ធ និងការបម្រើក្នុងព្រះវិហារបរិសុទ្ធ
អ្នកផ្សព្វផ្សាយសាសនាដែលទើបហៅថ្មីត្រូវបានលើកទឹកចិត្តឲ្យទទួលអំណោយទានពិសិដ្ឋនៅក្នុងព្រះវិហារបរិសុទ្ធឲ្យបានឆាប់តាមដែលអាចធ្វើទៅបាន ហើយចូលរួមក្នុងព្រះវិហារបរិសុទ្ធឲ្យបានញឹកញាប់តាម កាលៈទេសៈផ្តល់ឲ្យ ( សូមមើល គោលលទ្ធិ និងសេចក្ដីសញ្ញា ៤៣:១៥–១៦; ១០៥:៣៣ ) ។ ការណ៍នេះអនុវត្តចំពោះអ្នកផ្សព្វផ្សាយសាសនាផ្នែកបង្រៀន និងអ្នក ផ្សព្វផ្សាយសាសនាផ្នែកសេវាកម្ម ប្រសិនបើសមរម្យសម្រាប់ស្ថានភាពរបស់ពួកគេ ។
អ្នកផ្សព្វផ្សាយសាសនាដែលទើបបានហៅថ្មីៗ ដែលបានទទួលអំណោយទានពិសិដ្ឋរួចហើយ អាចបម្រើជាអ្នកធ្វើការផ្នែកពិធីបរិសុទ្ធក្នុងព្រះវិហារបរិសុទ្ធបាន ពីមុនពួកគេចាប់ផ្ដើមការបម្រើជាអ្នកផ្សព្វផ្សាយសាសនាតាមការគួរ ( សូមមើល ២៥.៥ ) ។
២៤.៥.២
ការប្រជុំសាក្រាម៉ង់
គណៈប៊ីស្សពអញ្ជើញអ្នកផ្សព្វផ្សាយសាសនាដែលទើបបានហៅថ្មីៗ ឲ្យឡើងនិយាយនៅក្នុងការប្រជុំសាក្រាម៉ង់ មុនពេលពួកគេចាប់ផ្ដើមបេសកកម្មរបស់ពួកគេ ។ នេះគឺជាការប្រជុំសាក្រាម៉ង់តាមធម្មតាមួយ ។ វាគួរតែផ្ដោតលើសាក្រាម៉ង់ និងព្រះអង្គសង្គ្រោះ ។
២៤.៥.៣
ពិធីញែកចេញពួកអ្នកផ្សព្វផ្សាយសាសនា
ប្រធានស្តេកកំណើតធ្វើពិធីញែកចេញឲ្យអ្នកផ្សព្វផ្សាយសាសនាម្នាក់ៗដែលជិតដល់កាលបរិច្ឆេទចេញបេសកកម្មរបស់គាត់ ឬនាងបំផុត តាមដែលអាចធ្វើទៅបាន ។ នៅក្នុងករណីបន្ទាន់ នៅពេលប្រធានស្ដេកមិនទំនេរ នោះគាត់អាចផ្តល់សិទ្ធិអនុញ្ញាតឲ្យទីប្រឹក្សាម្នាក់របស់គាត់ធ្វើពិធីញែកចេញដល់អ្នកផ្សព្វផ្សាយសាសនាបាន ។
ប្រធានបេសកកម្ម ឬទីប្រឹក្សាម្នាក់របស់គាត់ធ្វើពិធីញែកចេញដល់អ្នកផ្សព្វផ្សាយសាសនា ដែលត្រូវបានហៅឲ្យបម្រើមកពីមណ្ឌលនៅក្នុងបេសកកម្មរបស់គាត់ ។ ប្រធានមណ្ឌលមិនធ្វើពិធីញែកចេញឲ្យអ្នកផ្សព្វផ្សាយសាសនាទេ ។
បងប្អូនប្រុសដែលនឹងបម្រើនៅឆ្ងាយពីផ្ទះ ត្រូវតែទទួលបព្វជិតភាពម៉ិលគីស្សាដែក ពីមុនការញែកចេញជាអ្នកផ្សព្វផ្សាយសាសនា ។ បងប្អូនប្រុសដែលនឹងបម្រើជាអ្នកផ្សព្វផ្សាយសាសនាផ្នែកសេវាកម្ម គួរតែកាន់បព្វជិតភាពម៉ិលគីស្សាដែក ប្រសិនបើសមស្របនឹងស្ថានភាពរបស់គាត់ ។
២៤.៦
ការបម្រើនៅឆ្ងាយពីផ្ទះ
២៤.៦.២
នៅក្នុងតំបន់បេសកកម្ម
២៤.៦.២.៥
សំណើសុំផ្តល់ជំនួយដល់អ្នកដទៃខាងហិរញ្ញវត្ថុ ឬថ្លៃសាលារៀន ឬការធ្វើអន្ដោប្រវេសន៍
អ្នកផ្សព្វផ្សាយសាសនា និងក្រុមគ្រួសាររបស់ពួកគេមិនគួរផ្ដល់ជំនួយផ្នែកហិរញ្ញវត្ថុដល់អស់អ្នកដែលរស់នៅក្នុងតំបន់ ដែលអ្នកផ្សព្វផ្សាយសាសនាកំពុងបម្រើនោះទេ រួមទាំងជំនួយផ្នែកហិរញ្ញវត្ថុថ្លៃសាលារៀនផងដែរ ។ ហើយអ្នកផ្សព្វផ្សាយសាសនា និងក្រុមគ្រួសាររបស់ពួកគេក៏មិនគួរធានាដល់បុគ្គល ដែលចង់ធ្វើអន្ដោប្រវេសន៍ទៅកាន់ប្រទេសដទៃទៀតនោះដែរ ( សូមមើល ៣៨.៨.១៩ ) ។
២៤.៦.២.៨
កំណត់ត្រាសមាជិកភាព និងដង្វាយមួយភាគក្នុងដប់
វួដកំណើតរបស់អ្នកផ្សព្វផ្សាយសាសនារក្សាកំណត់ត្រាសមាជិកភាព ។ វួដកំណើតក៏កត់ត្រាស្ថានភាពថ្វាយដង្វាយមួយភាគក្នុងដប់របស់គាត់ ឬនាងផងដែរ ។ អ្នកផ្សព្វផ្សាយសាសនាមិនបង់ដង្វាយមួយភាគក្នុងដប់ពីមូលនិធិគាំទ្រ ដែលពួកគេបានទទួលពីបេសកកម្មនោះទេ ។ ប៉ុន្ដែ ពួកគេត្រូវបង់ដង្វាយមួយភាគក្នុងដប់ ប្រសិនបើពួកគេមានប្រាក់ចំណូលផ្ទាល់ខ្លួនណាមួយ ។
២៤.៦.៣
ការត្រឡប់ពីបេសកកម្មទៅផ្ទះវិញ
២៤.៦.៣.១
ការត្រឡប់ពីបេសកកម្មទៅផ្ទះវិញតាមការកំណត់ដើម
អ្នកផ្សព្វផ្សាយសាសនា និងសមាជិកគ្រួសាររបស់ពួកគេមិនគួរស្នើសុំឲ្យមានការដោះលែងមុន ឬការពន្យារការបម្រើដោយសារភាពងាយស្រួលផ្ទាល់ខ្លួននោះឡើយ ។
អ្នកផ្សព្វផ្សាយសាសនាវ័យក្មេងគួរតែចេញដំណើរទៅផ្ទះតែម្ដងពីបេសកកម្មរបស់ពួកគេ ។ ការធ្វើដំណើរណាមួយផ្សេងទៀតអាចត្រូវបានអនុញ្ញាត តែនៅពេលអ្នកផ្សព្វផ្សាយសាសនាមានយ៉ាងហោចណាស់ឪពុក ឬម្តាយ ឬអាណាព្យាបាលនៅជាមួយប៉ុណ្ណោះ ។
អ្នកផ្សព្វផ្សាយសាសនាមិនត្រូវបានដោះលែងនោះទេ រហូតដល់ពួកគេបានទៅជួបនឹងប្រធានស្តេករបស់ពួកគេសិន ។ ពួកគេធ្វើតាមបទដ្ឋានអ្នកផ្សព្វផ្សាយសាសនារហូតដល់ពេលនោះ ។
២៤.៦.៣.២
ការត្រឡប់ទៅផ្ទះវិញមុនកំណត់
អ្នកផ្សព្វផ្សាយសាសនាផ្នែកបង្រៀន និងផ្នែកសេវាកម្មមួយចំនួនត្រូវបានដោះលែងមុនពេលកំណត់ ដោយសារតែមូលហេតុសុខភាព ភាពស័ក្ដិសម ឬមូលហេតុផ្សេងៗទៀត ។ ប៊ីស្សព និងប្រធានស្តេកផ្តល់ការគាំទ្រជាពិសេសដល់អ្នកត្រឡប់ពីបេសកកម្មទាំងនេះ ។ ថ្នាក់ដឹកនាំជួយពួកគេឲ្យខិតខំមានសុខភាពល្អឡើងវិញ ឬត្រឡប់ទៅកាន់ការបម្រើវិញ ប្រសិនបើអាចធ្វើបាន ។
២៤.៧
បេសកកម្មផ្នែកសេវាកម្ម
២៤.៧.១
ការកំណត់ឱកាសសម្រាប់អ្នកផ្សព្វផ្សាយសាសនាផ្នែកសេវាកម្ម
សម្រាប់អ្នកផ្សព្វផ្សាយសាសនាផ្នែកសេវាកម្មរៀមច្បង ប៊ីស្សព ប្រធានស្តេក និងអ្នកផ្សព្វផ្សាយសាសនាប្រឹក្សាជាមួយគ្នា ដើម្បីកំណត់ពីឱកាសបម្រើក្នុងមូលដ្ឋាន ។
សម្រាប់អ្នកផ្សព្វផ្សាយសាសនាផ្នែកសេវាកម្មវ័យក្មេង ថ្នាក់ដឹកនាំបេសកកម្មផ្នែកសេវាកម្ម ប្រាប់អំពីឱកាសបម្រើដែលសមរម្យ ។ ឪពុកម្តាយ ឬអាណាព្យាបាលរបស់អ្នកផ្សព្វផ្សាយសាសនាជាទូទៅចូលរួមក្នុងការពិភាក្សានេះ ។
២៤.៨
បន្ទាប់ពីការបម្រើជាអ្នកផ្សព្វផ្សាយសាសនា
២៤.៨.២
ការសម្ភាសដោះលែងអ្នកផ្សព្វផ្សាយសាសនា
ប្រធានស្ដេកដោះលែងអ្នកផ្សព្វផ្សាយសាសនាផ្នែកការបង្រៀន និងផ្នែកសេវាកម្ម ហើយដឹកនាំការសម្ភាសដោះលែងនេះ ។ នៅក្នុងមណ្ឌល ជាទូទៅប្រធានបេសកកម្ម ឬទីប្រឹក្សាដែលបានចាត់តាំង ជាអ្នកដោះលែងអ្នកផ្សព្វផ្សាយសាសនា ។
សេចក្ដីណែនាំខាងក្រោមសម្រាប់ការសម្ភាសនេះអាចមានអត្ថប្រយោជន៍ ។
-
លើកទឹកចិត្តពួកគេឲ្យបន្ដធ្វើជាសិស្សរបស់ព្រះយេស៊ូវគ្រីស្ទអស់មួយជីវិត ។
-
ផ្តល់ដំបូន្មានដល់ពួកគេឲ្យបន្ដស្ថាបនាលើទម្លាប់ល្អៗ ដែលពួកគេបានបង្កើតកាលនៅជាអ្នកផ្សព្វផ្សាយសាសនា ។
-
លើកទឹកចិត្តឲ្យពួកគេពិចារណា និងរៀបចំខ្លួនសម្រាប់អនាគត ដូចជាការអប់រំ និងការងារសម្រាប់អ្នកផ្សព្វផ្សាយសាសនាវ័យក្មេង ។
-
លើកទឹកចិត្តពួកគេឲ្យរស់នៅដោយភាពស័ក្ដិសមនឹងកាន់ប័ណ្ណចូលព្រះវិហារបរិសុទ្ធជានិច្ច ។
២៤.៨.៤
ការហៅទាំងឡាយ
ថ្នាក់ដឹកនាំផ្ដល់ការចាត់តាំងការផ្ដល់ការងារបម្រើ និងការហៅទាំងឡាយភ្លាមៗដល់អ្នកផ្សព្វផ្សាយសាសនាផ្នែកការបង្រៀន និងផ្នែកសេវាកម្មដែលទើបបានដោះលែងថ្មីៗ ។ ការណ៍នេះរួមមាន ការពិចារណាឲ្យធ្វើជាអ្នកធ្វើការផ្នែកពិធីបរិសុទ្ធនៃព្រះវិហារបរិសុទ្ធតាមការគួរ ( សូមមើល ២៥.៥ ) ។
២៤.៩
ធនធានសម្រាប់ការផ្តល់អនុសាសន៍ និងការបម្រើជាអ្នកផ្សព្វផ្សាយសាសនា
២៤.៩.២
គេហទំព័រ
-
MissionaryRecommendations.ChurchofJesusChrist.org ( មានតែសម្រាប់ថ្នាក់ដឹកនាំក្នុងមូលដ្ឋាន និងបេក្ខជនអ្នកផ្សព្វផ្សាយសាសនាប៉ុណ្ណោះ )