« ២៣. ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ » ជម្រើសចេញមកពីក្បួនខ្នាតទូទៅ ( ឆ្នាំ២០២៣ ) ។
« ២៣. ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ » ជម្រើសចេញមកពីក្បួនខ្នាតទូទៅ ។
២៣.
ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ
២៣.០
សេចក្ដីផ្ដើម
ការអញ្ជើញមនុស្សទាំងអស់ឲ្យទទួលយកដំណឹងល្អ គឺជាផ្នែកមួយនៃកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ ( សូមមើល ១.២ នៅក្នុងក្បួនខ្នាតនេះ ម៉ាថាយ ២៨:១៩–២០ ) ។ ការណ៍នេះរួមមាន ៖
-
ការចូលរួមនៅក្នុងកិច្ចការផ្សព្វផ្សាយសាសនា និងការបម្រើជាអ្នកផ្សព្វផ្សាយសាសនា ។
-
ការជួយដល់សមាជិកថ្មី និងសមាជិកដែលត្រឡប់មកសកម្មឡើងវិញឲ្យរីកចម្រើននៅលើផ្លូវនៃសេចក្តីសញ្ញា ។
២៣.១
ចែកចាយដំណឹងល្អ
២៣.១.១
ស្រឡាញ់
របៀបមួយដែលយើងបង្ហាញសេចក្ដីស្រឡាញ់របស់យើងចំពោះព្រះ គឺតាមរយៈការស្រឡាញ់ និងការបម្រើបុត្រាបុត្រីរបស់ទ្រង់ ( សូមមើល ម៉ាថាយ ២២:៣៦–៣៩; ២៥:៤០ ) ។ យើងខិតខំស្រឡាញ់ និងបម្រើដូចជាព្រះយេស៊ូវគ្រីស្ទបានធ្វើដែរ ។ សេចក្ដីស្រឡាញ់នេះបំផុសគំនិតយើងឲ្យឈោងទៅជួយមនុស្សមកពីគ្រប់ទាំងសាសនា ពូជសាសន៍ និងវប្បធម៌ ( សូមមើល កិច្ចការ ១០:៣៤; នីហ្វៃទី២ ២៦:៣៣ ) ។
២៣.១.២
ចែកចាយ
ដោយសារយើងស្រឡាញ់ព្រះ និងបុត្រាបុត្រីរបស់ទ្រង់ នោះយើងតែងចង់ចែកចាយពរជ័យទាំងឡាយ ដែលទ្រង់បានប្រទានដល់យើង ( សូមមើល យ៉ូហាន ១៣:៣៤–៣៥ ) និងជួយប្រមូលសាសន៍អ៊ីស្រាអែល ។ យើងព្យាយាមជួយមនុស្សទូទៅឲ្យមានអារម្មណ៍នៃសេចក្ដីអំណរ ដែលយើងមាន ( សូមមើល អាលម៉ា ៣៦:២៤ ) ។ យើងនិយាយដោយបើកចំហអំពីព្រះអង្គសង្គ្រោះ និងព្រះចេស្ដារបស់ទ្រង់នៅក្នុងជីវិតរបស់យើង ( សូមមើល គោលលទ្ធិ និងសេចក្ដីសញ្ញា ៦០:២ ) ។ យើងចែកចាយអ្វីៗទាំងនេះតាមធម្មតា និងពីធម្មជាតិ ដែលជាផ្នែកមួយនៃការប្រាស្រ័យទាក់ទងផ្ទាល់ខ្លួន តាមអនឡាញ និងតាមរបៀបផ្សេងទៀត ។
២៣.១.៣
អញ្ជើញ
យើងអធិស្ឋានសូមការបំផុសគំនិត និងការណែនាំពីរបៀបដើម្បីអញ្ជើញមនុស្សដទៃឲ្យ ៖
-
មក ហើយមើលឃើញពរជ័យដែលមានតាមរយៈព្រះយេស៊ូវគ្រីស្ទ ដំណឹងល្អរបស់ទ្រង់ និងសាសនាចក្ររបស់ទ្រង់ ( សូមមើល យ៉ូហាន ១:៣៧–៣៩, ៤៥–៤៦ ) ។
-
មក ហើយបម្រើអ្នកខ្វះខាត ។
-
មក ហើយក្លាយជាកម្មសិទ្ធិក្នុងសាសនាចក្រនៃព្រះយេស៊ូវគ្រីស្ទដែលបានស្ដារឡើងវិញនេះ ។
ជារឿយៗ ការអញ្ជើញមានន័យសាមញ្ញថា ការរាប់បញ្ចូលគ្រួសារ មិត្តភក្ដិ និងអ្នកជិតខាងរបស់យើងនៅក្នុងសកម្មភាពដែលយើងកំពុងធ្វើ ។
២៣.២
ពង្រឹងសមាជិកថ្មី
សមាជិកថ្មីម្នាក់ៗត្រូវការមិត្តភាព ឱកាសដើម្បីបម្រើ និងការចិញ្ចឹមបីបាច់ខាងវិញ្ញាណ ។ ក្នុងនាមជាសមាជិកនៃសាសនាចក្រ យើងផ្ដល់សេចក្ដីស្រឡាញ់ និងការគាំទ្ររបស់យើងទៅដល់សមាជិកថ្មី ( សូមមើល ម៉ូសាយ ១៨:៨–១០ ) ។ យើងជួយពួកគេឲ្យមានអារម្មណ៍ថាចូលចុះចំណោមក្នុងសាសនាចក្រនេះ ។ យើងជួយពួកគេឲ្យរីកចម្រើនលើផ្លូវនៃសេចក្ដីសញ្ញា ហើយកាន់តែ « បានប្រែចិត្តជឿដល់ព្រះអម្ចាស់ » យ៉ាងស៊ីជម្រៅ ( អាលម៉ា ២៣:៦ ) ។
២៣.៣
ពង្រឹងសមាជិកដែលត្រឡប់មកសកម្មឡើងវិញ
សមាជិកមួយចំនួនជ្រើសរើសដើម្បីឈប់ចូលរួមនៅក្នុងសាសនាចក្រ ។ ព្រះអង្គសង្រ្គោះបានមានបន្ទូលថា « ដ្បិតចំពោះអ្នកនោះហើយដែលត្រូវធ្វើការងារបម្រើ ដ្បិតអ្នករាល់គ្នាពុំដឹងថាដល់ពេលណាទេ ដែលអ្នកនោះនឹងត្រឡប់មកវិញ ហើយប្រែចិត្ត ហើយមករកយើងដោយអស់ពីដួងចិត្ត ហើយយើងនឹងប្រោសឲ្យគេបានជា ហើយអ្នករាល់គ្នានឹងទៅជាមធ្យោបាយក្នុងការនាំមកនូវសេចក្តីសង្រ្គោះដល់គេ » ( នីហ្វៃទី៣ ១៨:៣២ ) ។
សមាជិកដែលមិនចូលរួមពេញលេញ ទំនងជានឹងត្រឡប់មកវិញ ប្រសិនបើពួកគេមានទំនាក់ទំនងដ៏រឹងមាំជាមួយនឹងសមាជិកសាសនាចក្រ ។ ដូចជាសមាជិកថ្មីដែរ ពួកគេត្រូវការមិត្តភាព ឱកាសដើម្បីបម្រើ និងការចិញ្ចឹមបីបាច់ខាងវិញ្ញាណ ។
២៣.៤
ធ្វើការប្រជុំសម្របសម្រួលប្រចាំសប្តាហ៍
រៀងរាល់សប្ដាហ៍ ការប្រជុំខ្លីក្រៅផ្លូវការមួយអាចធ្វើឡើង ដើម្បីសម្របសម្រួលកិច្ចខិតខំក្នុងការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ ប្រសិនបើអ្នកដឹកនាំបេសកកម្មវួដត្រូវបានហៅ នោះគាត់ដឹកនាំការប្រជុំទាំងនេះ ។ បើមិនដូច្នោះទេ សមាជិកម្នាក់នៃគណៈប្រធានកូរ៉ុមអែលឌើរអាចបំពេញតួនាទីនៃការដឹកនាំនេះបាន ។
អ្នកផ្សេងទៀតដែលត្រូវបានអញ្ជើញឲ្យចូលរួម រួមមាន ៖
-
សមាជិកនៃគណៈប្រធានសមាគមសង្គ្រោះ និងគណៈប្រធានកូរ៉ុមអែលឌើរដែលបានចាត់តាំង ។
-
អ្នកផ្សព្វផ្សាយសាសនាប្រចាំវួដ ។
-
ជំនួយការមួយរូបនៅក្នុងកូរ៉ុមសង្ឃ ( ឬប្រធានកូរ៉ុមគ្រូ ឬប្រធានកូរ៉ុមឌីកុន ប្រសិនបើពុំមានកូរ៉ុមសង្ឃនៅក្នុងវួដទេនោះ ) ។
-
សមាជិកម្នាក់នៃគណៈប្រធានក្រុមថ្នាក់យុវនារីដែលមានវ័យច្រើនជាងគេ ។
-
អ្នកផ្សព្វផ្សាយសាសនាពេញម៉ោង ។
២៣.៥
ថ្នាក់ដឹកនាំស្តេក
២៣.៥.១
គណៈប្រធានស្តេក
ប្រធានស្តេកកាន់កូនសោទាំងឡាយនៅក្នុងស្ដេកសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ គាត់ និងទីប្រឹក្សារបស់គាត់ផ្ដល់ការដឹកនាំទូទៅដល់កិច្ចខិតខំទាំងនេះ ។
ជាធម្មតា ប្រធានស្ដេកជួបនឹងប្រធានបេសកកម្មរៀងរាល់ខែ ដើម្បីសម្របសម្រួលកិច្ចខិតខំរបស់ថ្នាក់ដឹកនាំស្ដេក និងវួដ ព្រមទាំងរបស់ពួកអ្នកផ្សព្វផ្សាយសាសនា ។
២៣.៥.៣
ទីប្រឹក្សាជាន់ខ្ពស់
គណៈប្រធានស្តេកអាចចាត់តាំងទីប្រឹក្សាជាន់ខ្ពស់ឲ្យណែនាំ និងគាំទ្រដល់គណៈប្រធានកូរ៉ុមអែលឌើរ និងអ្នកដឹកនាំបេសកកម្មវួដបាន ។ ទីប្រឹក្សាជាន់ខ្ពស់ម្នាក់ ឬច្រើននាក់អាចត្រូវបានចាត់តាំងឲ្យដឹកនាំកិច្ចខិតខំទាំងនេះ ។ ទោះជាយ៉ាងណាក្តី ទីប្រឹក្សាជាន់ខ្ពស់ទាំងអស់មានទំនួលខុសត្រូវទាំងនេះ សម្រាប់វួដ និងកូរ៉ុមដែលពួកគាត់ត្រូវបានចាត់ទៅផងដែរ ។
២៣.៥.៤
គណៈប្រធានសមាគមសង្រ្គោះស្តេក
នៅក្រោមការដឹកនាំរបស់ប្រធានស្តេក នោះគណៈប្រធានសមាគមសង្រ្គោះស្តេកណែនាំ និងគាំទ្រដល់គណៈប្រធានសមាគមសង្រ្គោះវួដ នៅក្នុងការទទួលខុសត្រូវរបស់ពួកគាត់ដើម្បីចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។
២៣.៦
ថ្នាក់ដឹកនាំវួដ
២៣.៦.១
គណៈប៊ីស្សព
គណៈប៊ីស្សពសម្របសម្រួលជាមួយនឹងគណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ កាលពួកគាត់ដឹកនាំកិច្ចខិតខំរបស់វួដដើម្បីចែកចាយដំណឹងល្អ និងពង្រឹងសមាជិកថ្មី ក៏ដូចជាសមាជិកដែលត្រឡប់មកសកម្មឡើងវិញ ។ ថ្នាក់ដឹកនាំទាំងនេះប្រឹក្សាជាមួយគ្នាជាប្រចាំ ។
គណៈប៊ីស្សពត្រូវប្រាកដថា កិច្ចខិតខំទាំងនេះបានពិភាក្សា និងសម្របសម្រួលនៅក្នុងការប្រជុំក្រុមប្រឹក្សាវួដ និងក្រុមប្រឹក្សាយុវវ័យវួដ ។
ប៊ីស្សពសម្ភាសសមាជិកថ្មីដែលគ្រប់អាយុ ដើម្បីទទួលប័ណ្ណចូលព្រះវិហារបរិសុទ្ធដើម្បីធ្វើពិធីបុណ្យជ្រមុជទឹក និងពិធីបញ្ជាក់ជំនួស ( សូមមើល ២៦.៤.២ ) ។ គាត់ក៏ធ្វើការសម្ភាសបងប្អូនប្រុសដែលគ្រប់អាយុ ដើម្បីទទួលបព្វជិតភាពអើរ៉ុនផងដែរ ។ ជាធម្មតា គាត់ដឹកនាំការសម្ភាសទាំងនេះក្នុងរយៈពេលមួយសប្តាហ៍ក្រោយពីពិធីបញ្ជាក់របស់សមាជិកនោះ ។
២៣.៦.២
គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ
គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះដឹកនាំកិច្ចខិតខំប្រចាំថ្ងៃរបស់វួដ ដើម្បីចែកចាយដំណឹងល្អ និងពង្រឹងសមាជិកថ្មី ក៏ដូចជាសមាជិកដែលត្រឡប់មកសកម្មឡើងវិញ ( សូមមើល ៨.២.៣ និង ៩.២.៣ ) ។
ថ្នាក់ដឹកនាំទាំងនេះមានទំនួលខុសត្រូវដូចខាងក្រោម ៖
-
ជួយបំផុសគំនិតសមាជិកឲ្យស្រឡាញ់បុត្រាបុត្រីរបស់ព្រះ ចែកចាយដំណឹងល្អ និងអញ្ជើញមនុស្សដទៃឲ្យទទួលយកពរជ័យរបស់ព្រះអង្គសង្គ្រោះ ។
-
ចាត់តាំងបងប្អូនប្រុស និងបងប្អូនស្រីដែលផ្ដល់ការងារបម្រើឲ្យបម្រើដល់សមាជិកថ្មី និងសមាជិកដែលត្រឡប់មកសកម្មឡើងវិញ ( សូមមើល ២១.២.១ ) ។
-
ដឹកនាំកិច្ចការរបស់អ្នកដឹកនាំបេសកកម្មវួដ ។
ប្រធានកូរ៉ុមអែលឌើរ និងប្រធានសមាគមសង្រ្គោះម្នាក់ៗ ចាត់តាំងសមាជិកម្នាក់ក្នុងគណៈប្រធានរបស់ខ្លួនឲ្យជួយដឹកនាំកិច្ចខិតខំទាំងនេះ ។ សមាជិកនៃគណៈប្រធានទាំងពីររូបនេះធ្វើការជាមួយគ្នា ។ ពួកគាត់ចូលរួមការប្រជុំសម្របសម្រួលប្រចាំសប្ដាហ៍ ( សូមមើល ២៣.៤ ) ។
២៣.៦.៣
អ្នកដឹកនាំបេសកកម្មវួដ
គណៈប៊ីស្សពពិគ្រោះយោបល់ជាមួយប្រធានស្តេក ដើម្បីកំណត់ថាតើត្រូវហៅអ្នកដឹកនាំបេសកកម្មវួដឬអត់ ។
អ្នកដឹកនាំបេសកកម្មវួដគួរតែជាអ្នកកាន់បព្វជិតភាពម៉ិលគីស្សាដែក ។ ប្រសិនបើអ្នកដឹកនាំបេសកកម្មវួដម្នាក់មិនត្រូវបានហៅទេ នោះសមាជិកមួយរូបនៃគណៈប្រធានកូរ៉ុមអែលឌើរបំពេញតួនាទីនេះ ។
អ្នកដឹកនាំបេសកកម្មវួដគាំទ្រដល់គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះក្នុងការទទួលខុសត្រូវលើការផ្សព្វផ្សាយសាសនារបស់ពួកគាត់ ។ គាត់ក៏មានការទទួលខុសត្រូវដូចខាងក្រោមផងដែរ ៖
-
សម្របសម្រួលកិច្ចការរបស់សមាជិក និងថ្នាក់ដឹកនាំវួដ អ្នកផ្សព្វផ្សាយសាសនាវួដ ក៏ដូចជាអ្នកផ្សព្វផ្សាយសាសនាពេញម៉ោងដែរ ។
-
ដឹកនាំការប្រជុំសម្របសម្រួលប្រចាំសប្ដាហ៍ ( សូមមើល ២៣.៤ ) ។
២៣.៦.៤
អ្នកផ្សព្វផ្សាយសាសនាវួដ
អ្នកផ្សព្វផ្សាយសាសនាវួដជួយសមាជិកវួដឲ្យដកពិសោធន៍អំណរក្នុងការចែកចាយដំណឹងល្អដូចបានរៀបរាប់នៅក្នុង ២៣.១ ។ ពួកគេបម្រើនៅក្រោមការដឹកនាំរបស់អ្នកដឹកនាំបេសកកម្មវួដ ឬសមាជិកមួយរូបនៃគណៈប្រធានកូរ៉ុមអែលឌើរ ដែលបំពេញតួនាទីនេះ ។
២៣.៦.៥
ក្រុមប្រឹក្សាវួដ និងក្រុមប្រឹក្សាយុវវ័យវួដ
ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ គួរតែត្រូវបានពិភាក្សានៅក្នុងការប្រជុំក្រុមប្រឹក្សាវួដជាទៀងទាត់ ។ ប៊ីស្សពអាចអញ្ជើញអ្នកដឹកនាំបេសកកម្មវួដឲ្យចូលរួមក្នុងការប្រជុំក្រុមប្រឹក្សាវួដបាន ។
ធនធានដូចខាងក្រោមនេះអាចជួយដល់ការពិភាក្សាទាំងនេះបាន ៖
ក្រុមប្រឹក្សាយុវជនវួដបានផ្តល់ការយកចិត្តទុកដាក់ ជាពិសេសដល់ ( ១ ) យុវវ័យដែលជាសមាជិកថ្មី និងសមាជិកដែលត្រឡប់មកសកម្មឡើងវិញ និង ( ២ ) យុវវ័យដែលពួកអ្នកផ្សព្វផ្សាយសាសនាកំពុងបង្រៀន ។