« ២០. សកម្មភាព » ជម្រើសចេញមកពីក្បួនខ្នាតទូទៅ ( ឆ្នាំ២០២៣ ) ។
« ២០. សកម្មភាព » ជម្រើសចេញមកពីក្បួនខ្នាតទូទៅ
២០.
សកម្មភាពទាំងឡាយ
២០.១
គោលបំណង
សកម្មភាពទាំងឡាយក្នុងសាសនាចក្រនាំឲ្យសមាជិកសាសនាចក្រ និងមនុស្សដទៃទៀតមកជួបជុំគ្នាជា « ជាតិតែ១នឹងពួកបរិសុទ្ធ » ( អេភេសូរ ២:១៩ ) ។ គោលបំណងសម្រាប់សកម្មភាពទាំងឡាយអាចរួមមានដូចខាងក្រោម ៖
-
ស្ថាបនាសេចក្ដីជំនឿលើព្រះយេស៊ូវគ្រីស្ទ ។
-
ផ្ដល់ការសប្បាយរីករាយ និងបង្កើនសាមគ្គីភាព ។
-
ផ្ដល់ឱកាសឲ្យមានការរីកចម្រើនផ្ទាល់ខ្លួន ។
-
ពង្រឹងបុគ្គលម្នាក់ៗ និងក្រុមគ្រួសារ ។
-
ជួយសមាជិកឲ្យចូលរួមនៅក្នុងកិច្ចការនៃសេចក្តីសង្រ្គោះ និងភាពតម្កើងឡើង ( សូមមើល ១.២ ) ។
២០.២
ការរៀបចំផែនការសកម្មភាព
មុនពេលដាក់ផែនការធ្វើសកម្មភាពមួយ ថ្នាក់ដឹកនាំពិចារណាពីតម្រូវការខាងវិញ្ញាណ និងខាងសាច់ឈាមរបស់សមាជិកទាំងឡាយ ។ ថ្នាក់ដឹកនាំស្វែងរកការណែនាំពីព្រះវិញ្ញាណ នៅពេលសម្រេចចិត្តពីប្រភេទសកម្មភាពដែលនឹងជួយបំពេញតាមតម្រូវការទាំងនោះ ។
២០.២.១
ការទទួលខុសត្រូវសម្រាប់ការរៀបចំផែនការសកម្មភាព
សកម្មភាពទាំងឡាយក្នុងវួដអាចដាក់ផែនការបានតាមរបៀបណាមួយដូចតទៅនេះ ដោយផ្អែកលើតម្រូវការក្នុងមូលដ្ឋាន ៖
-
ក្រុមប្រឹក្សាវួដអាចមើលការខុសត្រូវលើការដាក់ផែនការនេះ ។
-
ក្រុមប្រឹក្សាវួដអាចចាត់តាំងអង្គការជាក់លាក់ណាមួយ ឲ្យជួយដាក់ផែនការធ្វើសកម្មភាពមួយ ឬច្រើន ។
-
នៅពេលដែលចាំបាច់ និងមានសមាជិកគ្រប់គ្រាន់ នោះគណៈប៊ីស្សពអាចរៀបចំឲ្យមានគណៈកម្មការសកម្មភាពវួដមួយឡើង ។
សម្រាប់ព័ត៌មានអំពីការដាក់ផែនការធ្វើសកម្មភាពយុវវ័យវួដ សូមមើល ១០.២.១.៣ និង ១១.២.១.៣ ។
២០.២.២
ការអញ្ជើញមនុស្សទាំងអស់ឲ្យចូលរួម
អ្នកដែលដាក់ផែនការធ្វើសកម្មភាពគួរតែទៅជួបនឹងមនុស្សទាំងអស់ ជាពិសេសសមាជិកថ្មី សមាជិកមិនសូវសកម្ម យុវវ័យ យុវមជ្ឈិមវ័យនៅលីវ មនុស្សដែលមានពិការភាព និងមនុស្សដែលមកពីជំនឿផ្សេងទៀត ។
សកម្មភាពទាំងឡាយមិនគួរដាក់បន្ទុកហួសហេតុទៅលើថ្នាក់ដឹកនាំ និងសមាជិកនោះទេ ។
២០.២.៣
បទដ្ឋាន
សកម្មភាពទាំងឡាយក្នុងសាសនាចក្រគួរតែជារឿងលើកតម្កើង និងគូសបញ្ជាក់លើអ្វីដែលជា « គុណធម៌ គួរស្រឡាញ់ ឬឈ្មោះល្អ ឬក៏គួរឲ្យសរសើរ » ( មាត្រានៃសេចក្តីជំនឿ ១:១៣ ) ។ សកម្មភាពទាំងឡាយមិនត្រូវរួមបញ្ចូលចំណុចណាមួយ ដែលផ្ទុយនឹងការបង្រៀនរបស់សាសនាចក្រនោះទេ ។
២០.២.៦
មូលនិធិសម្រាប់ធ្វើសកម្មភាព
សកម្មភាពភាគច្រើនបំផុតគួរតែមានលក្ខណៈសាមញ្ញ ហើយចំណាយបន្តិចបន្តួច ឬគ្មានចំណាយសោះ ។ រាល់ការចំណាយទាំងអស់ត្រូវតែបានអនុម័តជាមុនដោយគណៈប៊ីស្សព ឬគណៈប្រធានស្ដេក ។
ជាធម្មតា សមាជិកមិនគួរចំណាយប្រាក់ដើម្បីចូលរួមក្នុងសកម្មភាពនានានោះទេ ។ សម្រាប់គោលនយោបាយ និងគោលការណ៍ណែនាំស្ដីពីមូលនិធិសម្រាប់សកម្មភាពនានា សូមមើល ២០.៦ ។
២០.៤
សន្និសីទយុវវ័យ
ដោយចាប់ផ្តើមនៅខែមករានៃឆ្នាំដែលពួកគេឈានដល់អាយុ ១៤ ឆ្នាំ នោះយុវជន និងយុវនារីត្រូវបានអញ្ជើញឲ្យចូលរួមជាមួយគ្នានៅក្នុងសន្និសីទយុវវ័យ ។ ជាធម្មតា សន្និសីទយុវវ័យធ្វើឡើងមួយឆ្នាំម្ដងនៅកម្រិតវួដ ឬស្តេក ។ សន្និសីទទាំងនេះក៏អាចធ្វើឡើងនៅកម្រិតពហុស្ដេក ឬតំបន់បានផងដែរ ។ នៅឆ្នាំដែលយុវវ័យត្រូវបានចាត់តាំងឲ្យចូលរួមសន្និសីទ ដ.ក.យ. នោះស្ដេក និងវួដមិនគួរធ្វើសន្និសីទយុវវ័យនោះទេ ។
ក្រុមប្រឹក្សាយុវវ័យវួដគឺជាអ្នកដែលដាក់ផែនការ និងធ្វើសន្និសីទយុវវ័យវួដ ដោយនៅក្រោមការដឹកនាំរបស់គណៈប៊ីស្សព ( សូមមើល ២៩.២.៦ ) ។ គណៈប៊ីស្សពទទួលបានការអនុម័តពីគណៈប្រធានស្តេក ទាក់ទងនឹងផែនការសម្រាប់សន្និសីទយុវវ័យវួដ ។
នៅពេលថ្នាក់ដឹកនាំ និងយុវវ័យដាក់ផែនការធ្វើសន្និសីទយុវវ័យ នោះពួកគាត់គួរតែអនុវត្តតាមគោលនយោបាយនៅក្នុងជំពូកនេះ និងគោលការណ៍ណែនាំដូចតទៅនេះ ៖
-
អ្នកអាចប្រើបាវចនាយុវវ័យប្រចាំឆ្នាំរបស់សាសនាចក្រធ្វើជាបាវចនាសន្និសីទនេះបាន ។
-
ដាក់ផែនការសកម្មភាពដែលស៊ីគ្នានឹងបាវចនានេះ ។
-
ទទួលបានការអនុម័តពីគណៈប៊ីស្សព ឬគណៈប្រធានស្ដេកសម្រាប់អ្នកឡើងនិយាយ និងសកម្មភាពទាំងអស់ ។
-
ធានាឲ្យមានការគ្រប់គ្រងពីមជ្ឈិមវ័យឲ្យបានគ្រប់គ្រាន់នៅគ្រប់ពេលវេលាទាំងអស់ ( សូមមើល ២០.៧.១ ) ។
២០.៥
គោលនយោបាយ និងគោលការណ៍ណែនាំសម្រាប់ការជ្រើសរើស និងការរៀបចំផែនការសកម្មភាព
២០.៥.១
សកម្មភាពពាណិជ្ជកម្ម ឬនយោបាយ
សកម្មភាពដែលធ្វើឡើងសម្រាប់គោលបំណងពាណិជ្ជកម្ម ឬនយោបាយគឺមិនត្រូវបានអនុញ្ញាតនោះទេ ( សូមមើល ៣៥.៥.២ ) ។
២០.៥.២
ការរាំ និងតន្ដ្រី
នៅក្នុងការរាំទាំងអស់ សម្លៀកបំពាក់ ការតុបតែងខ្លួន ពន្លឺ របៀបរាំ ទំនុកបទ និងតន្ដ្រីគួរតែរួមចំណែកឲ្យមានបរិយាកាសមួយ ដែលព្រះវិញ្ញាណនៃព្រះអម្ចាស់អាចគង់នៅបាន ។
២០.៥.៣
រាត្រីថ្ងៃចន្ទ
សមាជិកត្រូវបានលើកទឹកចិត្តឲ្យធ្វើសកម្មភាពជាក្រុមគ្រួសារនៅថ្ងៃចន្ទ ឬនៅពេលផ្សេងទៀត ។ ពុំគួរមានសកម្មភាពសាសនាចក្រ ការប្រជុំ កម្មវិធីបុណ្យជ្រមុជទឹក ត្រូវធ្វើឡើងបន្ទាប់ពីម៉ោង ៦:០០ ល្ងាច ថ្ងៃចន្ទនោះទេ ។
២០.៥.៥
សកម្មភាពស្នាក់នៅពេលយប់
សកម្មភាពនៅក្នុងសាសនាចក្រដែលមានការស្នាក់នៅពេលយប់សម្រាប់ក្រុមយុវជន និងយុវនារីលាយចូលគ្នា ត្រូវតែមានការអនុម័តមកពីប៊ីស្សព និងប្រធានស្តេក ។ ការណ៍នេះក៏អនុវត្តសម្រាប់សកម្មភាពសម្រាប់សមាជិកនៅលីវជាបុរស និងស្ដ្រីផងដែរ ។
សកម្មភាពស្នាក់នៅពេលយប់នៅឯសាលាប្រជុំរបស់សាសនាចក្រ ឬនៅទីធ្លាសាលាប្រជុំគឺមិនត្រូវបានអនុម័តនោះទេ ។
២០.៥.៨
ការរក្សាថ្ងៃឈប់សម្រាកឲ្យបរិសុទ្ធ
ពុំត្រូវមានការបោះជំរំ ព្រឹត្តិការណ៍កីឡា ឬព្រឹត្តិការណ៍កម្សាន្ដក្នុងសាសនាចក្រធ្វើឡើងនៅថ្ងៃអាទិត្យឡើយ ។ ហើយក៏ពុំគួរមានក្រុមយុវវ័យ និងអ្នកផ្សេងទៀតធ្វើដំណើរទៅ ឬមកពីការបោះជំរំ ឬសន្និសីទយុវវ័យនៅថ្ងៃអាទិត្យដែរ ។
២០.៥.១០
ការទៅព្រះវិហារបរិសុទ្ធ
ការទៅព្រះវិហារបរិសុទ្ធត្រូវបានរៀបចំឡើងនៅកម្រិតវួដ ឬស្ដេកនៅក្នុងមណ្ឌលព្រះវិហារបរិសុទ្ធដែលបានចាត់តាំង ។
២០.៦
គោលនយោបាយ និងគោលការណ៍ណែនាំសម្រាប់ការផ្ដល់មូលនិធិដល់សកម្មភាព
២០.៦.១
សកម្មភាពដែលចំណាយដោយមូលនិធិវួដ ឬស្ដេក
មូលនិធិថវិកាវួដ ឬស្ដេកគួរតែត្រូវបានប្រើប្រាស់ដើម្បីបង់ថ្លៃសម្រាប់សកម្មភាពទាំងអស់—ដោយមានករណីលើកលែងមួយចំនួនដូចមានចែងនៅក្នុង ២០.៦.២ ។
២០.៦.២
ការផ្ដល់មូលនិធិដល់ការបោះជំរំយុវវ័យ
ប្រសិនបើគម្រោងថវិកាវួដ ឬស្ដេកមិនមានមូលនិធិគ្រប់គ្រាន់សម្រាប់សកម្មភាពដូចមានចែងខាងក្រោមនេះទេ នោះថ្នាក់ដឹកនាំអាចសុំឲ្យអ្នកចូលរួមបង់ថ្លៃមួយចំណែក ឬទាំងស្រុងសម្រាប់សកម្មភាពនេះ ៖
-
ការបោះជំរំធំសម្រាប់ក្រុមបព្វជិតភាពអើរ៉ុនប្រចាំឆ្នាំមួយ ឬសកម្មភាពស្រដៀងគ្នា ។
-
ការបោះជំរំធំសម្រាប់ក្រុមយុវនារីប្រចាំឆ្នាំមួយ ឬសកម្មភាពស្រដៀងគ្នា ។
ការចំណាយ ឬការធ្វើដំណើរសម្រាប់ការបោះជំរំប្រចាំឆ្នាំមួយ មិនគួរលើសកំណត់នោះទេ ។ ការខ្វះខាតមូលនិធិផ្ទាល់ខ្លួនពុំគួររារាំងសមាជិកណាម្នាក់មិនឲ្យចូលរួមនោះឡើយ ។
២០.៦.៣
ការផ្ដល់មូលនិធិសម្រាប់សន្និសីទ ដ.ក.យ.
យុវវ័យអាចត្រូវបានសូមឲ្យរួមចំណែកបង់ថ្លៃដើម្បីចូលរួមសន្និសីទ ដើម្បីកម្លាំងនៃយុវជន ( ដ.ក.យ. ) ។ ប្រសិនបើការចំណាយរារាំងមិនឲ្យយុវវ័យម្នាក់ចូលរួមបាន នោះប៊ីស្សពអាចប្រើមូលនិធិគម្រោងថវិកាវួដ ដើម្បីចេញថ្លៃទាំងស្រុង ឬចេញមួយចំណែកនៃការបង់ថ្លៃនេះបាន ។ សូមមើលគេហទំព័រ FSY.ChurchofJesusChrist.org ។
២០.៦.៥
ព្រឹត្តិការណ៍រៃអង្គាសថវិកា
ជាធម្មតា ការចំណាយសម្រាប់សកម្មភាពស្ដេក និងវួដត្រូវបានបង់ថ្លៃដោយមូលនិធិគម្រោងថវិកា ។ ទោះជាយ៉ាងណាក៏ដោយ ប្រធានស្តេក ឬប៊ីស្សពអាចអនុម័តឲ្យមានព្រឹត្តិការណ៍រៃអង្គាសថវិកាមួយជារៀងរាល់ឆ្នាំ សម្រាប់គោលបំណងដូចតទៅនេះតែប៉ុណ្ណោះ ៖
២០.៧
គោលនយោបាយ និងគោលការណ៍ណែនាំស្ដីពីសុវត្ថិភាពសម្រាប់សកម្មភាព
២០.៧.១
ការគ្រប់គ្រងពីមជ្ឈិមវ័យ
យ៉ាងហោចណាស់ត្រូវតែមានមជ្ឈិមវ័យពីរនាក់ចូលរួមនៅគ្រប់សកម្មភាពក្នុងសាសនាចក្រទាំងអស់ ដែលមានកុមារ និងយុវវ័យចូលរួម ។ មជ្ឈិមវ័យបន្ថែមទៀតអាចចាំបាច់ អាស្រ័យទៅលើទំហំនៃក្រុម ជំនាញដែលតម្រូវឲ្យមានសម្រាប់សកម្មភាពនោះ ឬកត្តាផ្សេងៗទៀត ។ ឪពុកម្តាយត្រូវបានលើកទឹកចិត្តឲ្យជួយ ។
មនុស្សទាំងអស់ដែលធ្វើការជាមួយកុមារ និងយុវវ័យត្រូវតែបញ្ចប់វគ្គបណ្តុះបណ្តាលការការពារកុមារ និងយុវវ័យ ។ សូមមើលគេហទំព័រ ProtectingChildren.ChurchofJesusChrist.org ។
២០.៧.២
តម្រូវការទាក់ទងនឹងអាយុដើម្បីចូលរួមក្នុងសកម្មភាពយុវវ័យ
ដោយមានការអនុម័តពីឪពុកម្ដាយរបស់ពួកគេ យុវវ័យអាចចូលរួមការបោះជំរំដែលមានការសម្រាកនៅពេលយប់ នៅដើមខែមករានៃឆ្នាំដែលពួកគេឈានចូលអាយុ ១២ ឆ្នាំ ។ ពួកគេអាចចូលរួមក្នុងការរាំ សន្និសីទយុវវ័យ និងសន្និសីទ ដ.ក.យ. នៅដើមខែមករានៃឆ្នាំដែលពួកគេឈានចូលអាយុ ១៤ ឆ្នាំ ។
២០.៧.៤
ការអនុញ្ញាតពីឪពុកម្ដាយ
កុមារ និងយុវវ័យមិនអាចចូលរួមនៅក្នុងសកម្មភាពសាសនាចក្រដោយគ្មានការអនុញ្ញាតពីឪពុកម្ដាយ ឬអាណាព្យាបាលរបស់ពួកគេបាននោះទេ ។ សម្រាប់សកម្មភាពសាសនាចក្រដែលរួមមានការស្នាក់នៅពេលយប់ នោះការធ្វើដំណើរក្នុងរយៈចម្ងាយឆ្ងាយ ឬមានហានិភ័យខ្ពស់ជាងសព្វមួយដង នោះចាំបាច់ត្រូវតែមានការយល់ព្រមជាលាយលក្ខណ៍អក្សរ ។
ឪពុកម្ដាយ និងអាណាព្យាបាលផ្ដល់ការយល់ព្រមនេះតាមរយៈការចុះហត្ថលេខាលើ ទម្រង់បែបបទស្ដីពីការអនុញ្ញាត និងការចេញវេជ្ជសាស្ដ្រ ។
២០.៧.៥
ការរាយការណ៍ពីការរំលោភបំពាន
ការរំលោភបំពានគ្រប់ទម្រង់ទាំងអស់ដែលកើតឡើងនៅក្នុងសកម្មភាពសាសនាចក្រ គួរតែត្រូវបានរាយការណ៍ទៅកាន់អាជ្ញាធរស៊ីវិល ។ អ្នកគួរតែទាក់ទងទៅកាន់ប៊ីស្សពភ្លាមៗ ។ សេចក្តីណែនាំសម្រាប់សមាជិកទាំងឡាយមាននៅក្នុង ៣៨.៦.២.៧ ។ សេចក្តីណែនាំសម្រាប់ប៊ីស្សពមាននៅក្នុង ៣៨.៦.២.១ ។
២០.៧.៦
បម្រាមស្ដីពីសុវត្ថិភាព ការឆ្លើយតបនឹងឧបទ្ទវហេតុ និងការរាយការណ៍អំពីឧបទ្ទវហេតុ
២០.៧.៦.១
បម្រាមស្ដីពីសុវត្ថិភាព
ថ្នាក់ដឹកនាំ និងអ្នកចូលរួមទាំងឡាយចូលរួមក្នុងសកម្មភាពនានាដោយប្រយ័ត្នប្រយែង ដើម្បីធានាឲ្យបានថាមានការប្រថុយប្រថាននឹងគ្រោះថ្នាក់ ឬជំងឺតិចតួចបំផុត ។ សកម្មភាពទាំងឡាយក៏គួរតែពាក់ព័ន្ធនឹងការប្រថុយប្រថាននឹងការខូចខាតដល់ទ្រព្យសម្បត្តិតិចតួចបំផុតផងដែរ ។ អំឡុងពេលធ្វើសកម្មភាព ថ្នាក់ដឹកនាំខិតខំឲ្យអស់ពីសមត្ថភាពដើម្បីធានាបាននូវសុវត្ថិភាព ។
២០.៧.៦.២
ការឆ្លើយតបនឹងឧបទ្ទវហេតុ
ប្រសិនបើឧបទ្ទវហេតុមួយ ឬគ្រោះថ្នាក់មួយកើតមាននៅក្នុងបរិវេណសាសនាចក្រ ឬអំឡុងពេលមានសកម្មភាពសាសនាចក្រ នោះថ្នាក់ដឹកនាំអនុវត្តតាមគោលការណ៍ណែនាំដូចតទៅនេះ ប្រសិនបើអនុវត្តបាន ៖
-
ផ្ដល់ជំនួយបឋម ។ ប្រសិនបើបុគ្គលម្នាក់ត្រូវការជំនួយផ្នែកវេជ្ជសាស្ដ្របន្ថែម សូមទាក់ទងទៅកាន់សេវាកម្មវេជ្ជសាស្ដ្រ ។ សូមទាក់ទងទៅកាន់ឪពុក ឬម្ដាយ អាណាព្យាបាល ឬទៅកាន់សាច់ញាតិជិតដិតដទៃទៀត ព្រមទាំងប៊ីស្សព ឬប្រធានស្ដេកផងដែរ ។
-
ប្រសិនបើនរណាម្នាក់បាត់ខ្លួន ឬស្លាប់ នោះសូមជូនដំណឹងទៅកាន់អាជ្ញាធរស្របច្បាប់ក្នុងមូលដ្ឋានភ្លាមៗ ។
-
ផ្តល់ការគាំទ្រផ្នែកសតិអារម្មណ៍ ។
-
មិនលើកទឹកចិត្ត ឬមិនបំបាក់ទឹកចិត្តទាក់ទងនឹងវិធានការណ៍ផ្លូវច្បាប់ ។ មិនធ្វើការតាំងចិត្តជំនួសឲ្យសាសនាចក្រ ។
-
ប្រមូល និងរក្សាទុកឈ្មោះសាក្សីទាំងឡាយ ព័ត៌មានទំនាក់ទំនងរបស់ពួកគេ ដើមហេតុដែលបានកើតឡើង និងរូបថត ។
-
រាយការណ៍ពីឧបទ្ទវហេតុនេះ ( សូមមើល ២០.៧.៦.៣ ) ។
២០.៧.៦.៣
ការរាយការណ៍អំពីឧបទ្ទវហេតុ
ស្ថានភាពដូចតទៅនេះគួរតែត្រូវបានរាយការណ៍តាមអនឡាញ តាមរយៈគេហទំព័រ incidents.ChurchofJesusChrist.org ។
-
ឧបទ្ទវហេតុ ឬគ្រោះថ្នាក់ដែលកើតឡើងនៅលើទ្រព្យសម្បត្តិសាសនាចក្រ ឬអំឡុងពេលធ្វើសកម្មភាពក្នុងសាសនាចក្រ ។
-
បុគ្គលដែលចូលរួមនៅក្នុងសកម្មភាពសាសនាចក្របានបាត់ខ្លួន ។
-
ទ្រព្យសម្បត្តិឯកជន សាធារណៈ ឬទ្រព្យសម្បត្តិសាសនាចក្ររងការខូចខាតអំឡុងពេលសកម្មភាពសាសនាចក្រ ។
-
មានគេគំរាម ឬរំពឹងទុកថានឹងមានវិធានការណ៍ផ្លូវច្បាប់ ។
ប្រសិនបើព្រឹត្តិការណ៍មួយនាំឲ្យមានគ្រោះថ្នាក់ធ្ងន់ធ្ងរ គ្រោះថ្នាក់ដល់អាយុជីវិត ឬការបាត់ខ្លួនមនុស្ស នោះប្រធានស្ដេក ប៊ីស្សព ឬសមាជិកដែលគាត់ចាត់តាំង ត្រូវជូនដំណឹងទៅកាន់ការិយាល័យតំបន់ភ្លាមៗ ។
២០.៧.៦.៤
ធានារ៉ាប់រ៉ង និងសំណួរទាំងឡាយ
ប្រសិនបើមានរបួសអំឡុងពេលព្រឹត្តិការណ៍របស់សាសនាចក្រ នោះថ្នាក់ដឹកនាំត្រូវកំណត់ថាតើត្រូវអនុវត្តកម្មវិធីជំនួយវេជ្ជសាស្ដ្រក្នុងសកម្មភាពសាសនាចក្រដែរឬទេ ។
នៅក្នុងករណីមួយចំនួន ប្រធានស្តេក ឬប៊ីស្សពអាចមានសំណួរអំពីបញ្ហាសុវត្ថិភាព ឬការទាមទារពីសាសនាចក្រ ។ ប្រធានស្តេក ( ឬប៊ីស្សពនៅក្រោមការដឹកនាំរបស់គាត់ ) បញ្ជូនសំណួរបែបនោះទៅកាន់ការិយាល័យផ្នែកគ្រប់គ្រងហានិភ័យ ឬទៅកាន់ការិយាល័យប្រចាំតំបន់ ។
២០.៧.៧
ការធ្វើដំណើរ
ការធ្វើដំណើរសម្រាប់សកម្មភាពសាសនាចក្រគួរតែត្រូវបានអនុម័តដោយប៊ីស្សព ឬប្រធានស្ដេក ។ ការធ្វើដំណើរនេះមិនគួរដាក់បន្ទុកហួសហេតុទៅលើសមាជិកនោះទេ ។
អ្នកចូលរួមមិនគួរធ្វើដំណើរក្នុងរយៈចម្ងាយឆ្ងាយ ( ជាងពីរបីម៉ោង ) សម្រាប់ចូលរួមសកម្មភាពនោះទេ ។ គណៈប្រធានតំបន់ត្រូវតែអនុម័តរាល់ករណីលើកលែងណាមួយ ។
នៅពេលណាអាចធ្វើបាន ក្រុមក្នុងសាសនាចក្រគួរតែប្រើមធ្យោបាយដឹកជញ្ជូនពាណិជ្ជកម្មសម្រាប់ការធ្វើដំណើរក្នុងរយៈចម្ងាយឆ្ងាយ ។ វាគួរតែមានអាជ្ញាប័ណ្ណ និងបានការពារដោយធានារ៉ាប់រងដែលមានការទទួលខុសត្រូវ ។
នៅពេលក្រុមក្នុងសាសនាចក្រធ្វើដំណើរក្នុងយានយន្ដដឹកអ្នកដំណើរឯកជន នោះយានយន្ដនីមួយៗត្រូវមានលក្ខខណ្ឌប្រតិបត្តិការសុវត្ថិភាពល្អ ។ បុគ្គលម្នាក់ៗគួរតែក្រវាត់ខ្សែក្រវាត់សុវត្ថិភាព ។ អ្នកបើកបរគ្រប់រូបគួរតែជាមជ្ឈិមវ័យម្នាក់ដែលមានប័ណ្ណបើកបរ និងមានការទទួលខុសត្រូវ ។