« ១៩. តន្ត្រី » ជម្រើសចេញមកពីក្បួនខ្នាតទូទៅ ( ឆ្នាំ២០២៣ ) ។
« ១៩. តន្ត្រី » ជម្រើសចេញមកពីក្បួនខ្នាតទូទៅ
១៩.
តន្ត្រី
១៩.១
គោលបំណងនៃតន្រ្តីនៅក្នុងសាសនាចក្រ
តន្ត្រីពិសិដ្ឋបង្កើនសេចក្ដីជំនឿលើព្រះយេស៊ូវគ្រីស្ទ ។ តន្ដ្រីយាងអញ្ជើញព្រះវិញ្ញាណ ហើយបង្រៀនគោលលទ្ធិ ។ តន្ត្រីក៏បង្កើតឲ្យមានអារម្មណ៍គារវភាព បង្រួបបង្រួមសមាជិក និងផ្ដល់នូវរបៀបមួយដើម្បីថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទផងដែរ ។
១៩.២
តន្រ្តីនៅក្នុងគេហដ្ឋាន
តាមរយៈពួកព្យាការីរបស់ទ្រង់ ព្រះអម្ចាស់បានលើកទឹកចិត្តបុគ្គល និងក្រុមគ្រួសារទាំងឡាយ ឲ្យប្រើប្រាស់តន្ត្រីដែលលើកតម្កើងនៅក្នុងជីវិតប្រចាំថ្ងៃរបស់ពួកគេ ។
សំឡេងដែលថតទុកនៃតន្ត្រីរបស់សាសនាចក្រអាចរកបាននៅប្រភពដូចខាងក្រោមនេះ ៖
-
កម្មវិធី Sacred Music
-
កម្មវិធីបណ្ណាល័យដំណឹងល្អ
-
CDs នៅឯ store.ChurchofJesusChrist.org
១៩.៣
តន្ដ្រីនៅក្នុងការប្រជុំសាសនាចក្រ
១៩.៣.១
ការរៀបចំតន្រ្តីសម្រាប់ការប្រជុំក្នុងសាសនាចក្រ
អ្នកសម្របសម្រួលតន្ត្រីវួដ និងស្តេក ធ្វើការជាមួយនឹងថ្នាក់ដឹកនាំបព្វជិតភាព ដើម្បីរៀបចំតន្ត្រីសម្រាប់ការថ្វាយបង្គំទាំងឡាយ ។ ពួកគាត់ជ្រើសរើសតន្ដ្រីដែលបង្កើនស្មារតីនៃការថ្វាយបង្គំនៅក្នុងការប្រជុំទាំងឡាយ ។
១៩.៣.២
តន្ដ្រីនៅក្នុងការប្រជុំសាក្រាម៉ង់
តន្ត្រីនៅក្នុងការប្រជុំសាក្រាម៉ង់រួមមានការច្រៀងជាក្រុមជំនុំនូវទំនុកតម្កើង ដើម្បីបើក និងបិទការប្រជុំ និងពីមុនពិធីសាក្រាម៉ង់ ។ ទំនុកតម្កើងសាក្រាម៉ង់គួរតែផ្តោតទៅលើពិធីសាក្រាម៉ង់ដោយផ្ទាល់ ឬផ្តោតទៅលើពលិកម្មរបស់ព្រះអង្គសង្គ្រោះ ។
ភ្លេងកំដរមុនបើកកម្មវិធីត្រូវលេង ពេលដែលសមាជិកប្រមូលផ្ដុំគ្នាមុនការប្រជុំ ។ បន្ទាប់ពីការអធិស្ឋានបិទ ភ្លេងកំដរពេលបិទកម្មវិធីត្រូវលេងម្ដងទៀតកាលដែលសមាជិកចាកចេញពីការប្រជុំ ។
ការប្រជុំសាក្រាម៉ង់ក៏អាចរួមបញ្ចូលនូវទំនុកតម្កើងជាក្រុមជំនុំបន្ថែមទៀត ដែលនឹងច្រៀងនៅពាក់កណ្ដាលនៃការប្រជុំ—ឧទាហរណ៍ នៅចន្លោះការឡើងនិយាយ ។
១៩.៣.៣
តន្ត្រីនៅក្នុងថ្នាក់ទាំងឡាយ និងការប្រជុំវួដផ្សេងៗទៀត
ថ្នាក់ដឹកនាំលើកទឹកចិត្តគ្រូបង្រៀនឲ្យប្រើប្រាស់ទំនុកតម្កើង និងតន្ត្រីពិសិដ្ឋដទៃទៀត ដើម្បីជួយលើកកម្ពស់ដល់ការបង្រៀនរបស់ពួកគេ ។
១៩.៣.៦
ឧបករណ៍តន្ត្រី
ជាធម្មតា ឧបករណ៍លេងផ្ទាល់ត្រូវបានប្រើប្រាស់សម្រាប់ភ្លេងកំដរមុនបើកកម្មវិធី និងពេលបិទកម្មវិធី និងសម្រាប់ការលេងអមទំនុកតម្កើងនៅក្នុងការប្រជុំសាសនាចក្រទាំងឡាយ ។ ព្យាណូខ្យល់ និងព្យាណូគឺជាឧបករណ៍ត្រូវតាមបទដ្ឋាន បើមាន និងបើសមាជិកអាចលេងឧបករណ៍ទាំងនោះបាន ។ គណៈប៊ីស្សពអាចអនុម័តការប្រើប្រាស់ឧបករណ៍ផ្សេងៗទៀតដើម្បីអមដល់ការច្រៀងជាក្រុមជំនុំ សម្រាប់ភ្លេងកំដរមុនបើកកម្មវិធី និងពេលបិទកម្មវិធី និងនៅក្នុងជម្រើសតន្ត្រីផ្សេងៗទៀត ។
ប្រសិនបើមិនមានព្យាណូ ព្យាណូខ្យល់ ឬអ្នកលេងភ្លេងទេ នោះអាចប្រើសំឡេងដែលថតទុកដែលសមរម្យបាន ( សូមមើល ១៩.២ ) ។
១៩.៣.៧
ក្រុមចម្រៀង
១៩.៣.៧.១
ក្រុមចម្រៀងវួដ
បើមានសមាជិកគ្រប់គ្រាន់ នោះវួដអាចបង្កើតក្រុមចម្រៀង ដែលច្រៀងនៅក្នុងការប្រជុំសាក្រាម៉ង់ជាទៀងទាត់បាន ។
បន្ថែមទៅលើក្រុមចម្រៀងវួដ ក្រុមគ្រួសារ និងក្រុមស្ត្រី បុរស យុវវ័យ ឬកុមារអាចត្រូវបានអញ្ជើញឲ្យច្រៀងនៅក្នុងការប្រជុំសាសនាចក្របាន ។
១៩.៤
អ្នកដឹកនាំតន្ត្រីក្នុងវួដ
១៩.៤.១
គណៈប៊ីស្សព
ប៊ីស្សពទទួលខុសត្រូវលើតន្ត្រីនៅក្នុងវួដ ។ គាត់អាចចាត់ការទទួលខុសត្រូវនេះទៅឲ្យទីប្រឹក្សាម្នាក់របស់គាត់ ។
១៩.៤.២
អ្នកសម្របសម្រួលតន្រ្តីវួដ
អ្នកសម្របសម្រួលតន្រ្តីវួដបម្រើនៅក្រោមការដឹកនាំរបស់គណៈប៊ីស្សព ។ គាត់ ឬនាងមានការទទួលខុសត្រូវដូចខាងក្រោម ៖
-
បម្រើជាធនធានមួយដល់គណៈប៊ីស្សព និងថ្នាក់ដឹកនាំវួដដទៃទៀតលើបញ្ហាតន្រ្តី ។
-
ធ្វើការជាមួយនឹងគណៈប៊ីស្សព ដើម្បីរៀបចំតន្ត្រីសម្រាប់ការប្រជុំសាក្រាម៉ង់ ( សូមមើល ១៩.៣.១ និង ១៩.៣.២ ) ។
-
ពេលត្រូវបានសំណូមពរពីគណៈប៊ីស្សព សូមណែនាំសមាជិកដើម្បីបម្រើនៅក្នុងការហៅខាងតន្ត្រីនៅក្នុងវួដ ។ ណែនាំដល់អស់អ្នកដែលបម្រើនៅក្នុងការហៅទាំងនេះ ផ្ដល់ការគាំទ្រ ការបង្ហាត់បង្រៀន និងការបំពាក់បំប៉នតាមដែលត្រូវការ ។
១៩.៤.៣
ការហៅបន្ថែម
គណៈប៊ីស្សពអាចហៅសមាជិកឲ្យបម្រើនៅក្នុងការហៅដូចខាងក្រោម ។
១៩.៤.៣.១
អ្នកដឹកនាំតន្រ្តីវួដ
អ្នកដឹកនាំតន្រ្តីវួដដឹកនាំទំនុកតម្កើងក្រុមជំនុំសម្រាប់ការប្រជុំសាក្រាម៉ង់ និងសម្រាប់ការប្រជុំវួដដទៃទៀតតាមសំណើ ។
១៩.៤.៣.២
អ្នកលេងភ្លេងវួដ
អ្នកលេងភ្លេងវួដលេងភ្លេងកំដរមុនបើកកម្មវិធី និងពេលបិទកម្មវិធី ហើយលេងភ្លេងអមទំនុកតម្កើងនៅក្នុងការប្រជុំសាក្រាម៉ង់ និងនៅក្នុងការប្រជុំវួដដទៃទៀតតាមសំណើ ។
១៩.៧
គោលនយោបាយ និងគោលការណ៍ណែនាំបន្ថែម
១៩.៧.២
ការប្រើប្រាស់ឧបករណ៍របស់សាលាប្រជុំដើម្បីការហាត់ ការបង្រៀនជាឯកជន និងការសម្ដែងតូចៗ
នៅពេលគ្មានជម្រើសផ្សេងទៀតដែលសមហេតុសមផល នោះថ្នាក់ដឹកនាំបព្វជិតភាពអាចអនុញ្ញាតឲ្យប្រើប្រាស់ព្យាណូ និងព្យាណូខ្យល់ក្នុងសាលាប្រជុំសម្រាប់ការហាត់សម ការបង្រៀនជាឯកជនដោយបង់ថ្លៃ និងការសម្តែងដែលជាប់ទាក់ទងទៅនឹងសមាជិកនៃអង្គភាព ដែលប្រើប្រាស់សាលាប្រជុំ ។