ஆலய நியமங்களும் உடன்படிக்கைகளும் தேவனின் ஆசீர்வாதங்களை அதிக அளவில் பெற உங்களுக்கு உதவுகின்றன.

இந்த தரிப்பித்தல் அறிவு மற்றும் வல்லமையின் வரம். ஆலய தரிப்பித்தல்களின் நியமங்களில், நீங்கள் இரட்சகரின் நாமத்தை முழுமையாக உங்கள் மீது தரித்துக்கொள்கிறீர்கள். நீங்கள் தேவனுக்குக் கீழ்ப்படிய உடன்படிக்கை செய்கிறீர்கள், அவருடைய சித்தத்தைச் செய்ய தியாகம் செய்கிறீர்கள், இயேசு கிறிஸ்துவின் சுவிசேஷத்தின்படி வாழ்கிறீர்கள், கற்புடைமை நியாயப்பிரமாணத்திற்குக் கீழ்ப்படிகிறீர்கள், உங்கள் வாழ்க்கையையும் தேவன் உங்களுக்குக் கொடுத்த அனைத்தையும் அவருடைய சபைக்கு பரிசுத்தப்படுத்துகிறீர்கள்—அல்லது அர்ப்பணிக்கிறீர்கள். இவை உங்கள் வாக்குறுதிகள். தேவன் உங்களுக்கு அதிக அறிவு, பாதுகாப்பு மற்றும் அவரது வல்லமையை பெறும் வாய்ப்பை அளித்து ஆசீர்வதிப்பதாக வாக்குறுதி அளிக்கிறார். அவரோடு நித்திய ஜீவனை உங்களுக்குக் கொடுப்பதாகவும் அவர் வாக்குறுதி அளிக்கிறார். தரிப்பித்தலின் ஒரு பகுதியாக, பரிசுத்த ஆசாரியத்துவத்தின் வஸ்திரத்தை அணியும் பரிசுத்த சிலாக்கியத்தைப் பெறுகிறீர்கள். அந்த வஸ்திரம் இயேசு கிறிஸ்துவின் சின்னமாகவும், உங்கள் ஆலய உடன்படிக்கைகளின் நினைவூட்டலாகவும் இருக்கிறது.

ஆலய முத்திரித்தல் தம்பதிகளையும் குடும்பங்களையும் நித்தியத்திற்கும் ஒன்றிணைக்கிறது. ஆலய முத்திரித்தல் நியமப்படி, நீங்களும் உங்கள் துணைவரும் தேவனுடனும் ஒருவரோடொருவரும் ஒரு உடன்படிக்கை செய்வீர்கள். நீங்கள் தேவனுக்கும் ஒருவருக்கொருவர் முழுமையாக உண்மையாக இருப்பீர்கள் என்றும், ஒருவரையொருவர் நேசித்து சேவை செய்வீர்கள் என்றும், தேவனின் நியாயப்பிமாணங்களைக் கடைப்பிடிக்க ஒன்றாக உழைப்பீர்கள் என்றும் உறுதிமொழி எடுப்பீர்கள். இது உங்கள் வாக்குறுதி. உங்கள் துணைவருடனும் உங்கள் பிள்ளைகளுடனும் உங்கள் உறவு என்றென்றும் நீடிக்கும் என்று தேவன் வாக்குறுதி அளிக்கிறார். நீங்கள் உங்கள் உடன்படிக்கைகளைக் கடைப்பிடிக்கும்போது, ​​பரலோக ராஜ்யத்தில் அவருடன் மிக உயர்ந்த மகிமையைப் பெற முடியும் என்றும் அவர் வாக்குறுதி அளிக்கிறார். இந்த ஆசீர்வாதம் மேன்மையடைதல் என்று அழைக்கப்படுகிறது.

எப்போதும் ஒரு ஆலய பரிந்துரையை வைத்திருங்கள். அதைப் பெற உங்கள் ஆயத்தின் உறுப்பினரை சந்தித்துப் பெறுங்கள். கர்த்தருடைய பரிசுத்த வீட்டிற்குள் பிரவேசிப்பதற்கான தரங்கள்படி நீங்கள் எவ்வாறு வாழ்கிறீர்கள் என்பது குறித்து அவர் உங்களிடம் கேள்விகள் கேட்பார். இந்தக் கேள்விகளை அடிக்கடி சிந்தித்துப் பாருங்கள். (இந்த வழிகாட்டியின் பிற்சேர்க்கையில் அவற்றைக் காணலாம்.) நீங்கள் ஒரு ஆலயத்திலிருந்து வெகு தொலைவில் வாழ்ந்தாலும், உங்கள் பரிந்துரை கர்த்தர் மீதான உங்கள் அன்பிற்கும், அவருடைய தரங்கள்படி வாழ்வதற்கான உங்கள் அர்ப்பணிப்பிற்கும் அடையாளமாக இருக்கட்டும்.

உங்களால் முடிந்தவரை அடிக்கடி ஆலயம் செல்லுங்கள். உங்கள் ஆலய பரிந்துரையுடன், நீங்கள் கர்த்தருடைய வீட்டிற்குள் பிரவேசித்து ஞானஸ்நானம் பெற்று, உங்கள் மூதாதையர்களுக்காக திடப்படுத்தப்படலாம், இதனால் அவர்கள் உங்களுக்குக் கொடுக்கப்பட்ட ஆசீர்வாதங்களைப் பெற முடியும். ஆலயத்தில் இருக்க ஒவ்வொரு வாய்ப்பையும் சாதகப்படுத்திக் கொள்ளுங்கள். கர்த்தரை அவருடைய பரிசுத்த வீட்டில் தேடுங்கள். நியமங்கள், சின்னங்கள் மற்றும் நீங்கள் உணரும் ஆவியில் அவரைத் தேடுங்கள். நீங்கள் அவரைக் கண்டுபிடிப்பீர்கள்.

கர்த்தருடைய ஆலயத்தில் உடன்படிக்கைகளைச் செய்யத் தயாராகுங்கள். இதைச் செய்வதற்கான சிறந்த வழிகளில் ஒன்று உங்கள் ஞானஸ்நான உடன்படிக்கையைக் கடைப்பிடிப்பதாகும். ஆலய நியமங்களைப் பெறுவதையும், வாழ்நாள் முழுவதும் உடன்படிக்கையைக் கடைப்பிடிப்பவராக இருப்பதையும் உங்கள் வழிகாட்டும் இலக்குகளில் ஒன்றாக ஆக்குங்கள். ஆலயத்தில் நீங்கள் கீழ்ப்படிவதாக உறுதியளிக்கும் நியாயப்பிரமாணங்களின்படி வாழ இப்போதே தொடங்குங்கள்: தேவனின் கட்டளைகளுக்குக் கீழ்ப்படிதல், தியாகம், இயேசு கிறிஸ்துவின் சுவிசேஷம், கற்புடைமை மற்றும் பரிசுத்தப்படுத்தல். உங்கள் குடும்பத்தினர், ஆயர் மற்றும் சபையின் பிற தலைவர்கள் உங்களுக்கு உதவ முடியும்.

நீங்கள் இயேசு கிறிஸ்துவைப் போல ஆகலாம். அவர் உங்களை நீதியின் சிறந்த பின்பற்றுபவராக மாற்ற உதவுவார். தேவனுடைய பிரசன்னத்தில் எப்படி பிரவேசிப்பது, அவரோடு நித்திய ஜீவனைப் பெறுவது என்பதை ஆலய நியமங்களும் உடன்படிக்கைகளும் உங்களுக்குக் கற்பிக்கும்.

நீங்கள் தேவ வல்லமையால் சர்வாயுத வர்க்கம் தரிப்பீர்கள். தேவனுடைய வல்லமையும் மகிமையும் உங்கள் மீது இருக்கும் என்ற வாக்குறுதியுடன் ஆலய உடன்படிக்கைகள் வருகின்றன. அவருடைய தூதர்கள் உங்களைக் கண்காணிப்பார்கள்.

ஆலயத்தில் இருக்கும் நேரம் உங்களை இயேசு கிறிஸ்துவுடனும் பரிசுத்த ஆவியுடனும் மிக நெருக்கமாக இணைக்கும். நீங்கள் தேவ சமாதானத்தையும் ஓய்வையும் உணர்வீர்கள். நீங்கள் அவருடைய குரலை அதிக தெளிவுடன் கேட்பீர்கள். பரலோகங்கள் உங்களுக்குத் திறக்கும், அவருடைய வழிகளை நீங்கள் நன்றாகப் புரிந்துகொள்வீர்கள். உங்கள் இருதயம் அவரோடு இணைந்திருப்பதால், உங்கள் சவால்களை எதிர்கொள்ள உங்களுக்கு அதிக பலம் கிடைக்கும்.