தேவனின் திட்டம் உங்களுக்கானது

பரலோக பிதா இந்தத் திட்டத்தை துவக்குபவராயிருக்கிறார். அவர் உங்கள் ஆவிக்கு பிதா, அவர் உங்களை நேசிக்கிறார். அவர் உங்களுக்குத் தம்முடைய மிகப்பெரிய ஆசீர்வாதத்தை—அவருடனான நித்திய ஜீவனை கொடுக்க விரும்புகிறார். வேறு வார்த்தைகளில் எனில், நீங்கள் அவரைப் போலவே மாறி, அவர் வாழும் மகிழ்ச்சியான, மகிமையான வாழ்க்கையை வாழ வேண்டும் என்று அவர் விரும்புகிறார். அவருக்கு எல்லா வல்லமையும் உண்டு, எல்லாம் தெரியும். வாழ்க்கை கடினமாக இருந்தாலும் கூட, நீங்கள் அவரை நம்பலாம்.

இயேசு கிறிஸ்து இத்திட்டத்தை சாத்தியமாக்குகிறார். உலகம் சிருஷ்டிக்கப்படுவதற்கு முன்பு, பரலோக பிதா அவரை உங்கள் இரட்சகராகத் தேர்ந்தெடுத்தார். இயேசு கிறிஸ்து ஒருவரால் மட்டுமே உங்களை உங்கள் பரலோக பிதாவிடம் திரும்பக் கொண்டு வர முடியும். இதனால்தான் நாம் அவரைப் பின்பற்றத் தேர்வு செய்கிறோம். எல்லாம் அந்தத் தேர்வைப் பொறுத்தது!

திருமணமும் குடும்பமும் தேவனின் திட்டத்திற்கு இன்றியமையாதவை. நீங்கள் தேவனின் குடும்பத்தின் ஒரு பகுதியாக இருக்கிறீர்கள், அவருடைய ஆவிக்குரிய பிள்ளைகள் அனைவரும் ஒரு தாய் மற்றும் தகப்பன் மூலம் பூமிக்கு வருகிறார்கள். தேவன் தம்முடைய மகள்களும் மகன்களும் நித்திய பரிபூரணத்தை நோக்கி ஒன்றாக முன்னேற விரும்புகிறார். அன்பான, ஒன்றுபட்ட திருமணத்திற்கு ஆண்களும் பெண்களும் சமமாக பங்களிக்கின்றனர். பூமியில் குடும்ப வாழ்க்கை—அதன் எல்லா அபூரணங்களுடனும்கூட—மிகுந்த மகிழ்ச்சியைத் தர முடியும். இது தேவனுடன் நித்திய ஜீவனுக்கு உங்களை தயார்படுத்த உதவும்.

ஒரு நித்திய பார்வையை காத்துக்கொள்ளுங்கள். நீங்கள் சோதனைகள், பாடுகள், ஏமாற்றங்கள் அல்லது கடினமான தேர்வுகளை எதிர்கொள்ளும் போதெல்லாம், தேவனின் திட்டத்தை உங்களுக்கு நீங்களே நினைவூட்டுங்கள். அவருடைய திட்டத்தைப் பற்றி நீங்கள் அறிந்த நித்திய சத்தியங்கள் உங்கள் சவால்களை வித்தியாசமாகப் பார்க்க எவ்வாறு உதவும் என்பதைப் பாருங்கள்.

உங்கள் வாழ்க்கையில் அவருடைய கரத்தைத் தேடுங்கள். தேவன் உங்களை எப்படி ஆசீர்வதிக்கிறார் என்பதைக் கவனியுங்கள். அது யாரோ ஒருவரின் அன்பான செயலாகவோ, ஒரு கண நேர அமைதியாகவோ அல்லது ஜெபத்துக்கான பதிலாகவோ இருக்கலாம்.

தேவனின் திட்டத்தைப் பின்பற்றத் தேர்ந்தெடுங்கள். உங்கள் பரலோக பிதா நீங்கள் என்ன செய்ய விரும்புகிறார் என்பதைப் பற்றி அறிந்து கொள்ளுங்கள். வேதங்களையும், ஜீவிக்கிற தீர்க்கதரிசிகளின் வார்த்தைகளையும், குடும்ப பிரகடனத்தையும், உங்கள் கோத்திரத் தலைவனின் ஆசீர்வாதத்தையும் நீங்கள் படிக்கும்போது அவருடைய வழிகாட்டுதலைத் தேடுங்கள். இது ஒரு ஊழியக்காரராகவும், உங்கள் வாழ்நாள் முழுவதும் கர்த்தருக்கு சேவை செய்ய உங்களைத் தயார்படுத்த உதவும். கர்த்தருக்கு சேவை செய்தல், நித்திய திருமணம், பிள்ளைகளை வளர்த்தல் ஆகியவற்றை உயர்ந்த முன்னுரிமையாக ஆக்குங்கள். இயேசு கிறிஸ்துவின் போதனைகளைப் பின்பற்றுவதன் மூலம், மகிழ்ச்சியான குடும்பத்தைப் பெற இப்போதே உங்கள் பங்கைச் செய்யுங்கள்.

வாழ்க்கையின் சோதனைகளை நீங்கள் கிறிஸ்துவில் தைரியத்துடனும் நம்பிக்கையுடனும் எதிர்கொள்ள முடியும். தேவனுடைய நித்திய திட்டத்தைப் பற்றி நீங்கள் அறிந்திருப்பதால், கடினமான காலங்களில் உங்களுக்கு உதவக்கூடிய ஒரு மதிப்புமிக்க கருவி உங்களிடம் உள்ளது. பிறப்புக்கும் இறப்புக்கும் இடையில் நடப்பதை விட வாழ்க்கையில் இன்னும் நிறைய இருக்கிறது என்பது உங்களுக்குத் தெரியும். நீங்கள் உண்மையில் யார், உங்கள் நோக்கம் என்ன, இரட்சகரின் உதவியுடன் நீங்கள் யாராக முடியும் என்பது உங்களுக்குத் தெரியும். இயேசு கிறிஸ்துவே உங்கள் பெலன்!

நீங்கள் இயேசு கிறிஸ்துவைப் பின்பற்றும்போது நித்திய ஜீவனைப் பெறலாம். அவரைப் போல ஆகவும், உங்கள் பரலோக பெற்றோரிடம் திரும்பவும், உங்கள் அன்புக்குரியவர்களுடன் நித்தியமாக மகிழ்ச்சியாக வாழவும் அவர் உங்களுக்கு வல்லமையைத் தருவார். இயேசு கிறிஸ்துவை நம்புங்கள்