“Unsaon Nako sa Pagpalambo ang Akong Pagtudlo?,” EnglishConnect alang sa mga Magtutudlo (2023)
“Unsaon Nako sa Pagpalambo ang Akong Pagtudlo?,” EnglishConnect alang sa mga Magtutudlo
Unsaon Nako sa Pagpalambo ang Akong Pagtudlo?
Ingon nga ang mga tigkat-on molambo sa paglabay sa panahon, ikaw mouswag usab sa imong pagsalig ug molambo sa paglabay sa panahon. Ang Ginoo mosuporta nimo samtang moserbisyo ug motabang ka sa mga tigkat-on sa imong grupo. Siya motudlo nimo “pagtulon-an human sa usa ka pagtulon-an, lagda human sa usa ka lagda” (2 Nephi 28:30). Salig nga ang Langitnong Amahan motabang nimo kon ikaw magtinguha sa Espiritu ug maningkamot nga molambo.
Mga Estratehiya alang sa Pagtudlo og Pinulongan
Sa ubos mao ang pipila ka estratehiya alang sa pagtudlo og Iningles. Dili sama sa mga klase sa pinulongan nga nagpokus sa instruksiyon bahin sa grammar, pagbansay sa bokabularyo, o pagpraktis sa paglitok, ang mga panag-istoryahanay sa grupo sa EnglishConnect nagpokus sa pagtabang sa mga tigkat-on sa paggamit sa pinulongan sa makahuloganong mga paagi. Kon gamiton nimo kini nga mga estratehiya, mas makatabang ka sa mga tigkat-on.
Moistorya og Iningles
Ang pag-istorya og Iningles makatabang sa mga tigkat-on nga mouswag ug usa kini ka importante nga paagi sa pagtinguha sa gasa sa mga pinulongan. Buhata kutob sa imong mahimo nga moistorya lamang og Iningles ug dapita ang mga tigkat-on sa pagbuhat sa samang butang. Mogamit og yano nga bokabularyo ug mubo nga mga kapahayag. Mosulti og hinay ug mosubli sa mga pulong ug hugpong sa mga pulong kon gikinahanglan. Human sa imong pagpangutana, hatagi ang mga tigkat-on og daghang panahon sa paghunahuna ug sa pagtubag. Gamita ang mga pulong ug mga sundanan nga gipraktis sa mga tigkat-on sa kasamtangan. Samtang mangulo ka sa mga kalihokan, mahimo nimong pabasahon ang mga tigkat-on sa gihubad nga mga instruksiyon sa kalihokan nga gihatag diha sa mga manwal sa tigkat-on sa EnglishConnect.
Ipakita ang mga Kalihokan
Ang pagpakita sa mga tigkat-on kon unsa ang buhaton sa kasagaran mas makatabang kaysa pagsulti nila kon unsa ang buhaton. Gamita ang ehemplo sa panag-istoryahanay nga anaa sa sinugdanan sa matag kalihokan aron himoong sanglitanan kon unsay buhaton sa mga tigkat-on sa ilang pagpraktis. Mahimo nimong idrama-drama ang duha ka papel diha sa panag-istoryahanay, o mahimo nimong hangyoon ang mga tigkat-on nga motabang nimo sa pagpakita.
Iawhag ang Panag-istoryahanay
Ang mga tigkat-on makabaton og pagsalig ug mas paspas nga makakat-on kon magpraktis sila gamit ang pinulongan. Ayaw kabalaka mahitungod sa pagkorehir sa matag sayop; tabangi lang ang mga tigkat-on nga moapil sa panag-istoryahanay. Idumala ang imong oras aron ang kadaghanan sa oras sa grupo magahin diha sa mga panag-istoryahanay nga magpares-pares.
Mosuporta sa Pagbalikbalik
Ang pagbalikbalik og praktis makaugmad og pagsalig ug kabatid. Awhaga ang mga tigkat-on nga magpulipuli og mga kapares ug magpraktis pag-usab. Ang pagpulipuli og mga kapares makahatag sa mga tigkat-on og daghang oportunidad sa pagpaminaw ug sa pagsulti og bag-ong mga butang. Kon ang mga tigkat-on mogamit sa unsay ilang nahibaloan sa lainlaing mga tawo, kini makatabang nila nga mapalig-on ang unsay ilang nakat-onan. Kini makapadugang usab sa ilang pagsalig ug makapasiugda og pakigdait.
Dasiga ang mga Tigkat-on
Ang mga tigkat-on kinahanglan nga mobati sa imong gugma ug pag-awhag. Tabangi ang mga tigkat-on nga mabuntog ang ilang kahadlok pinaagi sa pagsaulog sa matag paningkamot sa pag-istorya og Iningles. Mag-obserbar ug moapil sa matag grupo ug maminaw samtang ang mga tigkat-on nagpraktis sa usag usa. Daygon sila kanunay. Magpraktis uban nila ug motabang nila nga makasinati og kalamposan. Ipasabot og maayo ang tanang paagi nga sila nagkat-on ug naglambo. Samtang ikaw nahigugma ug nag-awhag sa mga tigkat-on, ikaw nag-ugmad og usa ka kahimtang nga adunay hugot nga pagtuo, pakigdait, ug paglambo.
Paglambo isip usa ka Kristohanon nga Magtutudlo
Isip usa ka magtutudlo sa EnglishConnect, ikaw adunay talagsaong oportunidad sa pagpangalagad ngadto sa uban. Ang mga baroganan sa Kristohanon nga pagtudlo magamit nimo. Mahimo kang makakat-on ug makagamit sa mga baroganan gikan sa kapanguhaan nga Pagtudlo sumala sa Pamaagi sa Manluluwas (2022). Ubos sa direksiyon sa imong lider sa pagkapari, mahimo ka nga motambong og mga miting sa konseho sa magtutudlo. Makahimo usab ka nga mosusi panagsa kon kumusta ang imong gihimo ug moila sa mga bahin nga mahimo nimong palamboon pinaagi sa paggamit sa “Paglambo isip usa ka Kristohanon nga Magtutudlo—Usa ka Personal nga Pagtimbang-timbang” (Pagtudlo sumala sa Pamaagi sa Manluluwas, 37). Ilha unsa ang maayo nimo nga nahimo. Tinoa ang mga dapit nga gusto nimo nga mapalambo ug paghimo og tino nga mga plano aron magamit ang unsay imong nakat-onan.
Hinumdomi, ang labing importante nga butang nga imong mahimo mao ang paghigugma sa mga tigkat-on ug sa pagtinguha nga magiyahan sa Espiritu samtang nagpasiugda ka og hugot nga pagtuo, pakigdait, ug paglambo.